ВИТЯ — ИЧӦТ ПИ

Сьӧдвад лесопунктса механик Василий Иванович Андреев оліс Вадор сиктын, лесопунктсянь куим километра сайын. Тані сылӧн вӧлі неыджыд керка, кодӧс стрӧитліс война помасьӧм бӧрын нин. Сылӧн гӧтырыс — Анна Николаевна, ар нелямын вита, кузиник тушаа, косіник чужӧма, дзормыштӧм юрсиа нывбаба, уджаліс совхозын дояркаӧн.

Удж помасьӧм бӧрын Василий Иванович восьлавліс гортас паськыд вӧрса туйӧд, кӧні сылы вӧлі тӧдса быд мыльк, быд гуран.

Андреевъяслӧн керкаыс кӧть и сулаліс торйӧн, сикт помас, татчӧ зэв тшӧкыда волывлісны челядь. Анна сьӧлӧмсяньыс радейтіс посниясӧс. Челядь волывлісны медсясӧ сэки, кор эз вӧв Анналӧн верӧсыс.

Мыйла челядь полісны Василийысь, гӧтырыс некыдз эз вермы гӧгӧрвоны. Сійӧ вӧлі ыджыд тушаа, паськыд пельпомъяса. Сёрнитны радейтліс этша. Ветлӧдліс тэрмасьтӧг, ӧтарӧ-мӧдарӧ катласигтыр. Гӧлӧсыс сылӧн ас кодьыс жӧ ён. Ранитчӧм шуйга синмас новліс сьӧд кӧртӧд, мыйысь видзӧдласыс сылӧн кажитчис зумышӧн, стрӧгӧн. Татшӧм видзӧдлассьыс, гашкӧ, и медсясӧ полісны челядь.

— Мед кӧть челядьыскӧд меліалыштін, а то полӧны найӧ тэысь, — некымынысь нин шуліс сылы гӧтырыс.

— Мый нӧ повныс. Абу ӧд ме ош, — коса вочавидзліс Василий. — Висьталін жӧ, полӧны пӧ...

Андреев гозъя ӧтлаын олісны кызь куим во, но налӧн вӧлі сӧмын ӧти пи Витя, кудриа юрсиа, тупыль кодь кыз детинка. Ассьыс писӧ Василий Иванович некор эз балуйтлы. Сыкӧд вӧлі сэтшӧм жӧ стрӧг, кыдзи гӧтырыскӧд. Вит арӧссянь нин велӧдіс Витяӧс кокньыдик уджъясӧ, кӧть и мамыслы вӧлі вывті жаль кесйӧдлыны ӧти пиӧс. Кор Витялы тыри сизим арӧс, сійӧ сьӧкыда висьмис, а дас ӧтиӧд луннас кувсис.

Витяӧс дзебӧм бӧрын Василий Иванович пыр жӧ муніс вӧрӧ и гортас воис сӧмын сизим лун мысти. Вӧйӧм син гуранъяс сертиыс гӧтырыс гӧгӧрвоис, кутшӧм сьӧкыд сьӧлӧм вылас верӧсыслы.

Ӧтчыд казяліс Анна, кыдзи Василий перйис шкапысь Витялысь карточкасӧ да унаысь окыштіс сійӧс. Анна гусьӧникӧн видзӧдіс верӧсыс вылӧ, а мӧдыс сулаліс да чышкаліс синъяссӧ.

Мам сьӧлӧмын рана дыр на эз бурд, а Василий Ивановичӧс сьӧкыд вӧлі гӧгӧрвоны, мый йылысь сійӧ мӧвпалӧ. Анналы мукӧд дырйиыс кажитчыліс, мый верӧсыс дзикӧдз нин вунӧдіс пи йывсьыс. «Мужикъясыдлӧн абу сьӧлӧм, а кӧрт», — видчис сійӧ ас кежас.

Анна чеччиг и водіг пыр казьтыліс ассьыс ӧтка писӧ, коді некор нин сэсся сійӧс оз шу мамукӧн. Челядьӧс ӧні сійӧ радейтіс ещӧ на ёнджыка. Натӧг ӧти лун эз вермы овны.

— Донукъясӧй, кутшӧм ті бурӧсь да мичаӧсь, — тшӧкыда шулывліс сійӧ челядь вылӧ видзӧдіг. — Вӧлі кӧ менам Витенька, тіянкӧд жӧ котраліс. Ок-ок, абу тай шудыд вӧлӧма. Кынӧмӧй пӧт и юр сюянін эм, а челядьтӧг олӧм — коньӧр олӧм.

Кадыс муніс. Колины вояс, а Андреев гозъя пыр на олісны ас кежас. Мукӧд дырйи Василий кажитчис варовджыкӧн, и Анна пырджык зілис сёрнитны ӧтитор йылысь: кыдзи эськӧ босьтны кодлыськӧ кага да быдтыны Витя пыдди.

— Ассьыным кӧ эгӧ кужӧй видзны, йӧзыд коді сетас. Дитяыд ӧд абу кычипи, быдӧнлӧн дона, — дӧзмӧмпырысь вочавидзліс Василий, и сёрни пыр жӧ орлі.

Колян во Анна ветліс гӧститны вокыс ордӧ. Гортас бӧрсӧ локтігӧн аскӧдыс вайӧдіс дас ӧти арӧса Динаӧс, вокыслысь нывсӧ.

— Нылӧс со тэныд вайи, — порог дорсянь на шыасис Анна, а аслас сьӧлӧмыс мыйлакӧ поліс. «Видчыны кӧ кутас верӧсӧй, ӧд сылы немтор эг висьтав».

Но Василий ни ӧти лёк кыв эз шу. Весиг ачыс Диналы узьлыны вӧчис пу крӧвать, а мӧд луннас гӧтырыслы сетіс деньга нывкалы паськӧм ньӧбӧм вылӧ.

Анна лои помтӧм рад: налӧн эм нывка. Но рӧкыд вылӧ регыд Дина кутіс гажтӧмтчыны бать-мамсьыс да чой-вокъяссьыс. Быд ногыс зілисны гажӧдны сійӧс, но немтор эз вермыны вӧчны. А толысь мысти нывкаӧс бӧр ковмис нуны гортас.

Бара шогӧдіс Аннаӧс, а Василий Дина мунӧм бӧрын лои ещӧ зумышджык. Чеччӧмсӧ да водӧмсӧ сӧмын и гӧтырыс аддзывліс сылысь. Кӧні ветлӧ, мый вӧчӧ — висьталас ӧмӧй. Варовджык лолӧ сӧмын сэк, кор стопка вина юас. Войнас ымзӧ, бергалӧ, а кутшӧм шог мучитӧ сійӧс — эн юась, дӧзмас сӧмын.

* * *

Гожся рыт. Ыджыд лов шыӧн лолаліс ывла. Пуяс копрасисны, шаркӧдчисны коръяснас. Банйӧм рытъя кыа некымынысь петкӧдчыліс оръясьӧм кымӧр пластъяс костӧд да дыр кежлӧ кытчӧкӧ воши.

Василий Иванович мукӧд лунъяс серти гортас талун воис водзджык. Анна буретш пукаліс кильчӧ помас да дӧмис дӧрӧмсӧ совхознӧй пастук пилысь. Ар сизима детинка сулаліс трусик кежсьыс, мыжа морт моз видзӧдіс кок улас.

Механикӧс казялӧм бӧрын детинка кӧсйис пышйыны, но Василий Иванович кутіс сійӧс плеть вороп кодь вӧсни киӧдыс.

— Эн пов, — кыз гӧлӧсӧн мурӧстіс сійӧ да сьӧкыда пуксис кильчӧ пос вылӧ. — Небось, пу вылӧ кавшасьлін.

— Вот и эг. Петялысь кӧть юав.

— Потшӧс вомӧн вуджигӧн соссӧ косялӧма, — шуыштіс верӧсыслы Аняа да бергӧдчыліс детинкалань. — Мамӧ пӧ нӧйтас. Ковмас мездыны «кавалер» мортӧс.

Кисьмӧм сэтӧр тусь кодь сьӧд синъяснас детинка гусьӧникӧн видзӧдлывліс Василийлы стрӧг чужӧмас. Мӧдыс казяліс тайӧс да скупа нюмъёвтіс.

— Мый тэнад нимыд?

— Коля, — вочавидзис детинка да бӧрыньтчыштіс.

— О, тэ тай, зонмӧ, кӧчлӧн друг: немторсьыс полан.

Василий Иванович гач зепсьыс кыскис табак кӧшель да пондіс куритчыны. Табак тшын гартчигтырйи кайис вывлань. А зонпоснияс гусьӧникӧн сералісны Коляӧс.

— Кутад кӧ серавны друг вылад, менам и петшӧр эм, — ӧлӧдіс найӧс Василий. — Цыц, вильышпозъяс.

Тшӧкмунісны-ланьтісны челядь, зумыштчисны гожъялӧм чужӧмъясыс.

Детинкаяслы Анна сетіс морт ӧти кампетӧн, колльӧдіс найӧс ӧшинь улӧдзыс, а сэсся пуксис верӧсыскӧд орччӧн да меліа шыасис:

— Талун тай тэ водз воин.

— Аски муна районӧ, соборуйтны корӧны. Вывті нин тшӧкыда кутісны больгыны.

— Дыр ветлан?

— Ог на тӧд. Сессия вылӧ на лоӧ кольччывны дай. Лун куим-нёльыд прӧйдитас.

Мӧд луннас Василий Иванович вӧлі нин райцентрын. Райисполкомын висьталісны, мый делегатъяс эз на чукӧрмыны, и сӧвещанньӧ воссяс сӧмын аски рытъявылыс.

Андреев восьлаліс сикт кузя. Колӧ вӧлі пыравны магазинъясӧ, мыйсюрӧ ньӧбны. Поводдяыс сулаліс мича. Небыдик шоныд тӧв котраліс чужӧм кузя. Шонді югӧръяс малалісны керка вевтъяс, забор пӧвъяс, сьӧдасьӧм тротуаръяс.

Универмагысь петӧм бӧрын Василий мӧдӧдчис гӧстиничаӧ. Эз на удит мунны километр джын, кыдзи кык судта пу керка бокысь аддзис челядьӧс. Ӧтияс на пӧвстысь вӧліны посньыдикӧсь, мукӧдъяс — гырысьджыкӧсь. Челядь ворсісны сэтшӧм гажаа, весиг ветлысь-мунысьяс шензисны на вылӧ.

Андреев син бӧжнас видзӧдліс ӧграда сайӧ и содтіс шагсӧ. Но сэки буретш сійӧс казяліс ар куима детинка, коді мукӧд челядьяссьыс сулаліс торйӧн. Детинка котӧртіс ӧграда дорӧ да вӧсньыдик гӧлӧсӧн горӧдіс:

— Папа!

Василий Иванович шай-паймуні. Кокъясыс быттьӧ слабитісны. А детинка пыр на вӧччис сы бӧрся да ӧвтчис ичӧтик кияснас.

— Папа! Менам папа! — тэрыба горзіс сійӧ.

— Но, мокасьтӧ, тайӧ менӧ кӧ тадзи ыдждӧдлӧ-а...

Андреев сувтіс. Ӧграда сайын, дзик сыкӧд паныд, сулаліс кудриа юрсиа, кызіник детинка. Ки-кокыс гожъялӧма. Гӧгрӧс синъясыс сылӧн сатшкысисны Василийлы чукыртчӧм чужӧмас.

— Тэ менам папа? Да? — зэв збыльысь сёрнитіс детинка.

— Абу... Ме тӧдтӧм дядя, — кыдз позьӧ небыда вочавидзис Андреев, а ачыс мыйлакӧ лэччис пидзӧс вылас да тупкыштіс кинас ранитчӧм синсӧ.

Василий Иванович вель дыр видзӧдіс детинка вылӧ. Сылы весиг кажитчис, мый тайӧ «карапузыс» зэв ёна мунӧ пиыс вылӧ. «Дзик Витяным кодь, тушанас сӧмын ичӧтджык, — думайтіс сійӧ. — Вермас жӧ лоны татшӧмтор. Вот дивӧыд. Анналы эськӧ петкӧдлыны». И сэн жӧ дум вылас усьлі аслас пиыс.

Детинка чангыльтчыштӧм нырсӧ сюйис забор костӧ, сэсся гораа юаліс:

— А кодлӧн тэ папа?

— Ме... ме... — джӧмдіс механик и эз тӧд, мый вочавидзны. — Ме некодлӧн абу папа... Но кыдз тэныд тӧлкуйтны, дона пи?

— А вот и ылӧдчан. Тӧда, менӧ корсян. И тётя Клава висьталіс, регыд пӧ папыд тэ дорӧ воас. А мыйла нӧ эськӧ ӧні шуин дона пиӧн?

— Дона пи и эм да... — эз сюрны мукӧд пӧлӧс кывъясыс Андреевлы. Сэсся сійӧ малыштіс детинаӧс юрӧдыс да содтіс: — Вот сідз, ичӧт пи...

Детина эскана синъясӧн видзӧдліс паськыд пельпомъяса дядьӧ вылӧ, сэсся тэрыба котӧртіс ворсысьяс дінӧ.

Андреев дыркодь сулаліс ӧтнас: сылы окота на вӧлі сёрнитыштны тайӧ варов детинкаыскӧд.

Войнас Андреев некыдз эз вермы унмовсьны. То номъяс дзизгӧны пель водзас, то байкӧвӧй эшкын гильӧдӧ. Сійӧ унаысь чеччыліс крӧвать вывсьыс. Юрас бергалісны уна сикас думъяс. Син водзас мыччысьліс пиыслӧн чужӧмыс. «Ловъя кӧ вӧлі, бурлак эськӧ. Эсійӧ детинка мозыс жӧ котраліс-ворсіс. Водз тэ эновтін миянӧс, Витюк. Кыз му улын куйлан».

И сэн жӧ быттьӧ кыліс кудриа юрсиа детинкаыслысь гӧлӧссӧ: «Папа! Менам папа!»

— Папаӧн менӧ шуӧ. Гӧгӧрвоӧ, трустыд, мый бать сылы колӧ.

Асъявылыс механик сӧмын унмовсис. Вӧтнас аддзыліс весиг детдомса детинкаӧс. Восьлалӧ быттьӧ сыкӧд сикт кузя и став йӧзыс видзӧдӧны на вылӧ.

Аскинас Андреев завтракайтіс водз. Этша узьӧмысла жувгис юрыс. Быд лун уджавны велалӧм мортлы прӧста олігӧн кадыс муніс надзӧн. Сійӧ эз тӧд, мый кутас вӧчны та кузя луннас.

Лун шӧр гӧгӧрын Василий Ивановичлы бара дум вылас уси детдомса детинка. «Ки тыр кампет кӧть нуа сылы гӧснеч пыдди. Вывті нин тӧлка да мелі сійӧ».

Час мысти механик сулаліс нин кык судта пу керка дорын. Челядь бара ворсісны паськыд ӧшинь улын. Василий Иванович матыстчис забор дорӧ да кутіс видзӧдны ворсысьяс вылӧ.

Челядь унджыкыс вӧліны ӧткодь паськӧмаӧсь, и на пиысь Андреев некыдз эз аддзы ассьыс ичӧтик «другсӧ».

«Нимсӧ весиг вунӧді юавны тӧрыт. Кысь нӧ татысь сійӧс аддзан», — видіс асьсӧ Андреев. Сійӧ кӧсйис нин бӧр мунны, но льӧм пу сайсянь кодкӧ горӧдіс:

— Папа! Локтін? Ур-а-а! — ыджыд гӧлӧсӧн горӧдіс детинка.

Тайӧ вӧлі тӧрытъя детинкаыд. Синъясыс сылӧн долыда югъялісны. Юрыс кажитчис ещӧ на кудриаджык.

— Гӧснеч тэд вайи, — зепсьыс кампет перйиг, шуис механик. — На, чӧсмась, да дядясӧ эн вунӧд.

Детинка нюжӧдіс кисӧ да пыр жӧ босьтіс.

— Пасибӧ, — кыдзкӧ аслыс ног небыда вочавидзис сійӧ. И тайӧ «пасибӧ» кывсьыс Андреевлы лои шоныдджык морӧс пытшкас.

— Мый тэнад нимыд?

— Витя!

— Витя? — кӧть и зэв бура кыліс, мыйлакӧ мӧд пӧв юаліс Андреев. — Но и но... Витя сідзкӧ. Збыль али мый?

— Да... Витя Сорокин. Менам и друг эм Коля Сизов. Талун сійӧ висьӧ, а то петкӧдлі эськӧ.

Тайӧ кывъяс бӧртиыс механиклӧн бара петіс нюмыс.

— Ӧнісянь кӧ друг эм, тайӧ бур. Другтӧг некыдз оз позь. Но котӧрт, сідзкӧ, ворсны, кӧнкӧ, окота.

Витя котӧртіс челядь дінӧ да заводитіс юклыны гӧснечсӧ. «Тӧварышъяссӧ оз удзӧд. Таысь прамӧй морт быдмас», — думыштіс Андреев. Сэсся детинка дыр мыйкӧ висьталіс челядьлы да вӧсньыдик чуньнас унаысь индыліс забор сайӧ, кӧні сулаліс Андреев.

Забор дорӧ матыстчис лым кодь еджыд халата олӧма нывбаба. Сійӧ казяліс тӧдтӧм мужчинаӧс да пыр жӧ сувтіс.

— Гражданин, кодӧскӧ видлыны воид?

— Эг... Ме сідз... Тӧрыт тӧдмаси ӧти детинкакӧд, Витя Сорокинӧн висьтасис.

— А, Витя... Молодеч сійӧ миян. Сӧмын вот... — Сідзи и эз удит помавныс, сы дорӧ котӧртіс Витя да радпырысь юӧртіс.

— Тётя Клава, а ме дорӧ со папа воис. Тэ ӧд висьталін, воас пӧ коркӧ. Вот и воис. Папа меным со кампет вайис. Да ӧд, папа?

Нывбаба да Василий Иванович видзӧдлісны ӧта-мӧд вылас.

— Мун кампеттӧ пукты тумбочкаад, а сэсся бӧр локтан, — ыстіс детинкаӧс нывбаба.

— А папа оз мун?

— Ог, ог. Да тэ эн пов, ог, мися, мун.

Кор Витялӧн юрыс воши ӧдзӧс сайӧ, нывбаба ыджыда ышловзис.

— Мамыс Витялӧн кувсис, а батьыс эновтіс сійӧс.

— Со ӧд кутшӧм батьяс эмӧсь, — скӧраліс механик.

Василий Иванович кӧть эз радейтлы лишнӧй сёрнитны, но тайӧ пӧрйӧ вель унатор юасис Витя йылысь. Да и ас йывсьыс мыйсюрӧ висьталіс тайӧ олӧма нывбабаыслы, коді висьтасис детдомса заведующӧйӧн. Юӧртіс и сы йылысь, кутшӧма гӧтырыслы колӧ челядь.

— Тіян местаын кӧ, ме Витя Сорокинӧс пи пыдди босьті.

— А сетанныд?

— Бур семья кӧ тіян, сетам, — и детдомса заведующӧй дыр висьталіс Андреевлы, кутшӧм документъяс колӧны Витяӧс пи пыдди босьтӧм вылӧ. — Ми, дерт, челядьӧс видзам ог лёка, но быдӧнлы колӧ бать-мам. Ачыд тай аддзылін...

Кудриа юрсиа детинка дыр кутіс ас дінас Василий Ивановичӧс. Нинӧм мӧдтор оз кӧсйы кывзыны: «Папа дай ставыс».

Рытнас воссис вӧр лэдзысьяслӧн сӧвещанньӧ. Сійӧ муніс кык лун чӧж. Василий Иванович прӧст кадӧ волывліс детскӧй домӧ.

Ичӧтик Витя сэтшӧма велаліс тайӧ ён тэчаса мужичӧй дорас, мый некыдз оз лэдз «батьсӧ» ас дінсьыс.

«Со сійӧ кутшӧма радейтӧ менӧ, а гӧтырӧй шуӧ, челядь пӧ полӧны меысь. Жаль, мый Анна абу тані».

Кор Андреев мӧдӧдчас мунны, детинка шогпырысь юавліс:

— Аски волан ме дінӧ, папа?

— Вола, Витенька, вола. Кыдзи нӧ...

«А мый, збыль кӧ босьтны сійӧс пи вылӧ? — думайтіс Василий Иванович гӧстиничаӧ локтӧм мысти. — Гӧтырӧй зэв рад лоӧ». И сэк жӧ дум вылас уси, кыдзи колян во Аннаыс вайліс вокыслысь нывсӧ, кодӧс гажтӧмтчӧмысла бӧр лои нуны гортас. «Челядьтӧгыс нин олам. На бӧрся ӧд кутшӧм ыджыд дӧзьӧр колӧ. Вермас и гажтӧмтчыны. Да и ме абу мукӧд батьяс кодь мелі».

Аскинас Василий Иванович эз нин кӧсйы ветлыны Витя дінӧ, но ачыс эз казяв, кыдзи кокъясыс вайӧдісны сійӧс детдом дорӧ. «Медбӧръяысь видзӧдла Витя вылӧ. Кӧнкӧ, сійӧ виччысьӧ нин менӧ», — ӧградаті пыриг думыштіс сійӧ.

Витя збыльысь виччысис нин. Сійӧ долыда уськӧдчис Василий Ивановичлы паныд да ичӧтик кияснас кутчысис сьылі гӧгӧрыс.

— Папа, ой, тошкыд кутшӧма гильӧдчӧ. Ёна жӧ бур тэ, папук.

— Бур, Витенька, бур, — синсӧ лапйӧдліс Андреев. Витя кыскис сійӧс садйӧ. Мӧдыс кыв шутӧг вӧтчис детинка бӧрся. Кыкнанныс вӧліны шудаӧсь. Челядь завидьпырысь видзӧдлывлісны асланыс тӧварыш вылӧ, коді весиг воськов эз вешйыв «бать» дінсьыс.

— Ті тай «ая-пиа» бара нин ӧтлаынӧсь, — шыасис детдомса заведующӧй да мыччис Василий Ивановичлы ассьыс небыдик кисӧ.

— Кыдзи нӧ.

— Клавдия Ивановна, папа сэсся менӧ некор оз коль? — шыасис Витя.

— Ассьыс юав, Витенька.

Витя уськӧдчис «батьыслы» паныд и топыда шымыртіс сійӧс. Василий Иванович кыліс, кыдзи морӧс бердас топӧдчис детинка. Тайӧ здукас сылы кажитчис, мый кутлӧ ассьыс писӧ, кодӧс некор оз вермы вунӧдны.

— Папа, а тэ змей кужан вӧчны? Ыджыдӧс?

— Кужа. Аски жӧ вӧча. И медся мича чачасӧ ньӧба. Тугъя кампет вая.

Клавдия Ивановна видзӧдіс тайӧ шуда «ая-пиа» вылас да тшӧтш сьӧлӧмсяньыс радліс.

* * *

Вӧлі нин ӧкмыс час рыт. Сикт вочасӧн лӧнис. Восьса ӧшинь пыр пӧльыштіс кокньыдик тӧв. Гӧрд сорса петук ыджыд шыӧн лэбзис аслас узянінӧ. Руд пон, град бӧрӧздаӧд чеччаліг, котӧртіс кильчӧлань, быттьӧ кӧсйис висьтавны кӧзяйкаыслы кутшӧмкӧ бур юӧр.

Пон некымынысь долыда лявкнитіс. Тадзи сійӧ увтчылӧ сӧмын тӧдсаясӧс аддзӧм бӧрын. Виччысьтӧг таркнитісны кильчӧ ӧдзӧсӧ. Анналӧн долыда кутіс тіпкыны сьӧлӧмыс. «Василий, буракӧ, локтӧ». Кӧмтӧгыс петіс посводзӧ. Гольснитіс кильчӧ калич, гурйыв воссис ӧдзӧс. Пос вылын тыдовтчис верӧсыслӧн ён тушаыс. Ӧти киас сійӧ кутіс ар куима детинкаӧс, мӧдас — вель ыджыд чемодан. Василий Ивановичлӧн чужӧм вылас ворсӧдчис долыд нюм, веськыд синмыс тырӧма шудӧн.

— Кыкӧн воим! — трубаысь моз кыліс кыз гӧлӧс.

Гӧтырыс нинӧм эз гӧгӧрво. Сійӧ чуймӧмпырысь видзӧдіс то верӧсыс вылӧ, то детинка вылӧ. Вӧтын моз ставыс вӧлі.

— Тайӧ мама? — вӧсньыдик чуньнас Анна вылӧ индіс Витя.

— Да, тайӧ мама, — вашъяліс Василий. — А ме коді?

— Папа! Папа! — лэптыштіс юрсӧ Витя да кутіс Андреевӧс сьылі гӧгӧрыс.

— Кылан, Анна, Витялӧн тэ мам, а ме бать. Со пи тэныд вайи, любит да быдты.

Анналы пыр жӧ ставыс лои гӧгӧрвоана. А детинка чургӧдіс нин кияссӧ, медым кутыштлыны ассьыс выль мамсӧ.

Нывбабалӧн косіник чужӧм кузяыс радысла тюрӧбтіс синва войт, синъясыс кутісны видзӧдны ещӧ на меліджыка.

— Донаӧй! Кыдзи нӧ тэнӧ шуӧны?

— Витя Андреев, — збоя вочавидзис детинка.

Анна видзӧдліс верӧсыс вылӧ, детинка вылӧ, сэсся паськыда нюмдіс.

Василий Иванович гораа серӧктіс да окыштіс Витяӧс.

— Вернӧ висьталан, дона пиӧй. Талунсянь тэ Витя Андреев. А Сорокин Витяыс коді?

— Ме, — зэв збыльысь висьталіс детинка.

— А Витя Андреевыс коді?

— Ме.

— Сідзкӧ, миян кык Витя?

— Кык.

— Гашкӧ, абу кык, а ӧти? — вывлань качӧдліс дзикӧдз ышмӧм детинкаӧс. — Тэ ӧд миян ӧти пи, дзик ӧти пи.

— Ӧти, — кӧк моз шыасис Витя.

Детинка мӧдіс ветлыны киысь киӧ, кутліс то батьсӧ, то мамсӧ. Анна сэтшӧма радліс, эз тӧд, мый вӧчны, мый шуны. Медбӧрын гӧгӧрвоис жӧ юавны верӧсыслысь:

— Энӧ ӧмӧй машинаӧн локтӧй?

— Паракодӧн локтім. Машинанад ӧд зӧркӧдіс эськӧ ичӧт писӧ.

Сэсся дыр висьталіс, кыдзи райцентрын аддзысис Витякӧд, детдомса заведующӧйкӧд. Кутшӧм унаысь ковмис пыравны райисполкомӧ, медым детинкаӧс босьтны пи пыдди.

Регыд Витя унмовсис Анна ки вылын.

— Ой, кутшӧма мудзӧма дитяыс!..

Витя водӧм бӧрын Анна дыр на чӧв пукаліс вольпась помас да видзӧдіс узьысь детинка вылӧ. Медбӧрын шыасис верӧсыс дінӧ:

— Тӧдан мый, Вася? Тайӧ дзик миян Витя кодь.

— Сійӧн и медсясӧ ме босьті. Вывті нин варов. Кор аддзи детдомсьыс, сьӧлӧмӧс вӧрзьӧдіс. Быд лун волывлі сы дінӧ.

— Нырыс дзик пинымлӧн кодь, и синъясыс...

— Нырыс и вомыс ме кодь, быттьӧ ляскӧмаӧсь, — шмонитіс Василий. — Мед сӧмын ӧдйӧджык быдмас.

Гӧтырыс ышловзис, сэсся сувтіс детина дорӧ да, кияссӧ кресталӧмӧн, дыр сулаліс ӧти местаын.

Керкаын вель дыр пукаліс шы ни тӧв. Василий кыскис зепсьыс табак кӧшель, кӧсйис куритчыны, но син улас уси Витя и пыр жӧ бӧр дзебис куритчанторсӧ.

Войвывса гожся вой эз кӧсйы пемдыны. Андреев гозъя петісны кильчӧ пос вылас, пуксисны орччӧн да тадзи, коді тӧдас, мый дыра пукалісны.

Керкасянь, восьса ӧдзӧс пыр, кыліс ичӧтик мортлӧн узьӧм шы.