ВИСЕРСА ЙӦРА

Миян Ипатьын да-й, гашкӧ, не сӧмын Ипатьын пӧрысь йӧз шулывлӧны: «Талун тай пӧтӧсь, а аски, гашкӧ, Висерын моз ӧшинь уланым йӧра локтас». Челядь дырйи на кывлывлі.

Зэв нин важӧн сійӧ коркӧ лоӧма. Висерас вӧлӧма кутшӧмкӧ праздник — Иван лун ли мый ли. Празднуйтны кутасны, молебствуйтны вичко дорын, нопъясӧн чукӧртчасны и молебствуйтчигас сэтчӧ воас йӧра. Кыськӧ вӧрысь локтас йӧраыд. Сійӧс начкасны, пуасны и сёясны. Став йӧзыд деревнянас юкасны да сёясны.

Сэсся мукӧд воясас праздник дырйиыд эськӧ и молебствуйтчыны жӧ кутасны, чукӧртчасны сідз жӧ, но йӧраыд оз лок.

Дерт жӧ, быд пӧрйӧ ӧд оз лок. Сэсся висерсаясыд пондасны сійӧ праздник кежлас ӧш быдтыны, йӧра пыдди. Ӧш быдтасны, праздник кежлас начкасны и пуасны ыджыд пӧртйын. Ӧнӧдз на шулӧны: «Висерӧ пӧ йӧра локтіс». Дерт, эськӧ ӧні йӧраыд оз нин лок да.