ВЕЖ НИТШКА ПОТАНСЯНЬ

Чужан вӧр-валы

1 Веж нитшка вольпася потаныс — му, Лайканыс — сы весьтын дзуртыштысь пу. Коз пулӧн шувгӧмыс — пӧчыслӧн мойд, Сӧдзтысьӧ му пытшкысь войт бӧрся войт. Окыштлӧ чужӧмсӧ йӧралӧн вом, Гильӧдӧ, серамыс долыд да том. Котӧртны ӧдӧбтӧ, тэрыб да чож, Му-мамлӧн, шонділӧн уджыс эз вош. 2 Парма шӧрысь, Козъя вӧрысь Босьтӧ туйсӧ ичӧт ёль. Сюмӧд чибльӧг Сійӧс видлӧ, Вылас усьлӧ гежӧд коль. Енэж ясыд — Кодзувъясӧн Ворсӧ сылӧн чужӧмбан. Тӧлысь лыбӧ, Ваас кыбӧ, Вӧр-ваыслӧн рӧмпӧштан. Кывтысь корйыс, Наридз торйыс Васӧ гудырӧн оз вӧч. Киняулас Вӧрса юлы Пырӧ ёльыс югыд, сӧдз. 3 Ӧкмӧ тэрыб ёльясысь, Лым ваысь да зэрысь. Вотӧ васӧ ольясысь, Рӧдмӧдӧ нин чери. Чукльӧдлӧ да мукльӧдлӧ, Яла ягъяс ордйӧ. Эжӧр кокӧ чутйӧдлӧ, Джумъя куръя кодйӧ. Кокньыдика мыш вылас Ветки пыжъяс кутӧ, Пелыс улын ышмылас. Аршын пасьта ютӧ. Каньпиӧс моз мольӧдӧ Пелыс ки кодь лопнас. Воча ваыс долыда Быгыльтчӧ мӧд бокнас. 4 Чери гыбалӧмысь, Пелыс лыбалӧмысь Сӧдзлуныд оз быр. Берегдорса турун, Кымӧр — летӧм вурун — Видзӧдчӧ сы пыр. Эзысь деньга быттьӧ Вӧр ю киас лыддьӧ — Жуӧ кельчи-мык. А сы весьтын сынӧд Лышкыд эбӧс-вынӧн Морӧстӧ оз пык. 5 Водзӧ кывтӧ Видзьяс вывті, Быттьӧ кодӧскӧ оз су. Ва пыр содӧ, Паськыд ота Вомӧналӧ сійӧс ю. Бипур ӧзйӧ, Лосын — мӧсъяс. Нӧрыс йылас уна чом. Пелька вӧчӧм Ӧшинь-ӧдзӧс Быттьӧ синъяс, быттьӧ вом. Шуньгӧ чӧла, Паськыд, вӧлӧм, Вӧльнӧй светыс, пом ни дор. Джуджыд ваті Пыжа катӧ, Сынӧ морт пыдди мотор. Аттӧ вына, Быттьӧ мынӧм Ён капканысь, пышйӧ зверь. Гӧлӧс гора, Ош тадз ёрӧ, Пуля-порок, лэчыд чер. Пыжлӧн нырыс Юсӧ кырӧ, Ваыс гызьӧ, тӧв оз ков. Вӧтлӧ йирӧ И горш сирӧс, Шызьӧдӧ став ловъя лов. Визув нуӧ Водзӧ юӧс, Сылы шойччӧгыд оз сюр. Оз тай ышнясь, Вына мышнас Кыскӧ уна-уна пур. 6 Петіс паськыдінӧ, Лоис ыджыд нима. Оз нин сьӧла-тар Койтны берег бокас. Кузь трубаа кока Тшыналӧ тан кар. Быттьӧ чужан вӧрас Юны локтіс йӧра... Сьӧлӧмтӧ эн дойд. Со и пожӧм вокыс Лясӧм берег бокас, Быттьӧ синва войт, Сӧдзтысьӧ на сирыс. Воймас, юлӧн йирас, Гашкӧ, воас пом. Юсӧ асьсӧ босьтлас Нӧшта ю и восьтас Вой саридзыс вом...
Гижысь: 
Гижӧд
Веж нитшка потансянь
Жанр: 

lkejrlkelkrgner klrjnelknfrkl ekjnrjkenfrej

1