ВАДОР ЙӦР


Тулыс воис.
Паськыд вадор йӧрын
Нюммунӧма эжа...
Трактор!
Вадор йӧрӧ
Эжа пластсӧ гӧрны
Вай жӧ тэкӧд
Кежам!
Вадор бансӧ вежам.

Ситурунлы,
Еджыд катшасинлы
Тырмас жӧдзны,
Тырмас синсӧ
Пӧртны.
Босьтам помсянь,
Мунам мӧдар помӧдз.
Кӧрт укладӧс
Мылькъяслы не йӧртны.

Плугъяс улын
Путкыльтчас и эжа,
Бырасны и мылькъяс,
Сьӧдӧдас и вадор йӧр,
Омӧль турун,
Еджыд катшасинъяс
Му пласт улысь
Оз нин кыпты бӧр.

Мӧйму тані
Мед вӧлі кос турун,
Еджыд катшасинъяс
Мед быдмисны явӧ...
Таво...
Ыджыд вадор йӧрын
Лӧзов шабді розйӧн
Шебрасяс, дерт, таво.

Аддза водзвыв...
Воас шоныд гожӧм,
Гажа шумӧн
Тырас вадор йӧр.
Трактор!
Зыкнад гора пальӧд.
Кежам сэтчӧ,
Кӧні паськыд эжа.
Ставнас гӧрам,
Шабді кӧйдыс кӧдзам,
Шабді розйӧн
Войму боксӧ эжам.