* * *

Бара муна, чужан сиктӧй, муна,
Бара воссьӧ кенясьлӧм нин дой.
Бара тэнад вежӧрысь ме вуна,
Кыдзи вунлӧ лунын пемыд вой.

Бара тэнад вежӧрысь ме быра,
Кыдзи кусӧ мунысь зэр кок шы.
Асъя ру моз ваас йиджа-пыра,
Чышкас-юас менӧ нювсьысь гы.

Бара тэнад вичкоысь ме куса
Кынмысь тӧлӧн ньылыштӧм сись моз.
Горӧдан, мый вӧвлі тэд ме муса,
И оз шыась воча некод, оз,

А кор локта — мудзӧм, вӧтлӧм, ёрӧм,
Сэки аддза: виччысьӧмыд дыр.
Сӧмын бара кыскас туйӧ корӧм,
Бара муна — тадзи лоас пыр.