«УДИТА...»

Унаысь паныдасьлывла тайӧ детинаыскӧд. Сійӧс ме тӧда мӧд во нин. Детина кыдз детина. Пасьтасьӧ мичаа, радейтӧ чӧскыд кампет да мороженӧй. Тӧвъяснас любитӧ иславны лыжи вылын, вугравтӧдзыс видзӧдны телевизор. Вель частӧ ӧбидитлывлӧ ас дорсьыс посниджыкъясӧс. Гожӧмнас шоча и пыравлӧ гортас, то кар кузя шӧйтӧ, то луннас дасысь купайтчас. Жораӧн сійӧс шуӧны. Нёльӧд классын велӧдчӧ. Сылы кӧть абу на и дас кык арӧс, а позьӧ сетны дас нёльӧс. И ёнлуннас абу ӧбидитӧмаӧсь. Сӧмын вот Жора вывті... Но та йылысь тӧдмаланныд бӧрынджык.

Эм тайӧ детинаыслӧн бать и мам. Эм и пӧрысь баб, коді ас дорсьыс ёнджыка радейтӧ внуксӧ.

Жоралӧн батьыс капитан. Уна во нин ветлӧ паракод вылын. Мыйӧн Сыктыв да Эжва юясысь кылалас йиыс, гортас оз и волывлы прамӧя. Котласӧдз да Архангельскӧдз гырысь пуръяс кыскалӧ. И мамыс Жоралӧн батьыскӧд арӧдзыс ветлӧ, паракод вылын уджалысьяслы ӧбед пуӧ.

Бать-мамыс мунӧм бӧрын некымын тӧлысь Жора олӧ бабыскӧд. И тайӧ бурджык сылы: мый кӧсйӧ, сійӧ и вӧчӧ. Тӧдӧ, бабыс оз кут норасьны сы вылӧ бать-мамыслы. Мӧдарӧ — ошкыны кутас, бура пӧ оліс, кывзысис, эз вильшась. И, дерт, батьыс арнас бара ньӧбас выль велосипед либӧ мича костюм.

Водз таво воссис ваыс. Жоралӧн бать-мамыс бара эновтісны гортнысӧ да мунісны паракод вылӧ.

Жора локтіс школаысь да чуймис: керкаыс тыртӧм. Бабыс сӧмын ӧтнас. Первойсӧ весиг гажтӧм босьтліс, бать-мамсьыс дыр кежлӧ янсаліс да... Сэсся пуксис телевизор дорӧ да бӧр лои гажа. «И коді кужӧма мӧвпыштны телевизорсӧ, лун и вой кӧть видзӧд, а пыр окота видзӧдны», — мӧвпаліс ас кежас детина. И вунӧдіс урокъяссӧ вӧчӧм йылысь.

Кор воис водан кад, бабыс мӧдіс ропкыны:

— Тэ нӧ дыр на мӧдан сычвидзны телевизор дорас? Кор нӧ урокъястӧ вӧчан?

— Удита. Ой, бабусь, сэтшӧм киноыс лӧсьыд, шпионъяс йылысь.

Помасис кино. Заводитісны петкӧдлыны цирк. Бабыс бара, кылӧ, видчӧ:

— Кусӧд, мися... Бара тай нӧ он кывзысь.

— Талун зэв кокни гортса уджӧй. Здукӧн вӧча. Удита... Эн шогсьы. Сӧмын ичӧтика видзӧдышта. Тэ ӧд менам зэв бур.

А пызан вылын сулалысь будильник тотшкӧдчис-муніс водзӧ, вӧчис кытш бӧрся кытш.

Гашкӧ, Жора дыр на видзӧдіс циркса артистъясӧс, но бабыс кусӧдіс телевизорсӧ и стрӧга шуис:

— Мун вод, синмыд куньса нин. Аски водзджык чуксала.

Асывнас и збыльысь бабыс чуксаліс детинаӧс мукӧд лунъяс серти водзджык. Но Жоралы сэтшӧм дыш чеччынысӧ, мӧдіс меліавны бабыслы:

— Куйлышта да дзик пыр чечча. Думышта, кыдзи бурджыка решитны задачасӧ. А то талун Елена Митрофановна урокъяс вылын юасьны кутас.

— Сӧмын дыр эн нежитчы. Менам и сёян нин дась, — небзис бабыслӧн сьӧлӧмыс.

А пызан вылын сулалысь будильник тэрыба котӧртӧ водзӧ. Бӧр унмовсис крӧвать вылын куйлысь детина, вунӧдіс задачаяс йылысь.

— Но и но, тэ тай нӧ бара нин шкорган. Школаад сёрман. И урокъясыд вӧчтӧмӧсь. Ок-ок-ок.

— Уди-та-а... — очсалігмоз шуыштіс Жора и неокотапырысь эновтіс шоныд вольпась.

Тайӧ луннас век жӧ урок вылас сійӧ сёрмис. Да и дневникас соді ещӧ ӧти двойка гортса удж вӧчтӧмысь.

Гортас локтіс сёрӧн нин. Школа бӧрас стадион вылӧ кежавліс, лэччыліс видзӧдлыны ойдӧм Сыктыв ю вылӧ, другыс ордӧ пыраліс, мороженӧйӧн чӧсмасис.

— Кӧні бара сы дырасӧ шӧйтан-а? Бабыс вися. Котӧртлы кӧть магазинӧ, нянь да йӧв ньӧб. Ужнайтныд лоӧ нинӧмӧн. Деньгаыд со пызан вылын.

— Бабушка, а мороженӧй мем позьӧ ньӧбны?

— Ньӧб, ньӧб, сӧмын ӧдйӧджык ветлы. Кынӧмыд, кӧнкӧ, сюмалӧ?

Жора аддзис пызан вывсьыс выль «Огонёк» журнал, заводитіс видлавны сэтысь картинаяссӧ. Кор аддзис кроссворд, босьтіс киас карандаш да мӧдіс решайтны. Бара ылаліс Жора. Пукалӧ да жуглӧ юрсӧ.

А пызан вылын сулалысь будильник тэрмасьӧмӧн котӧртӧ аслас тӧдса туйӧд.

— Ветлы нин, ветлы ньӧбасьныд. Магазиныс пӧдласяс. Ме шойччышта неуна. Тэрмась, мися...

— Удита, — кроссворд бердысь юрсӧ лэптывтӧг нурбыльтіс Жора.

Бабыс, тыдалӧ, унмовсис. Эз кыв сылӧн гӧлӧсыс. Жора вель дыр на пукаліс кывзысьтӧм кроссворд дінын, сэсся вӧлисти мӧдӧдчис магазинӧ.

Муртса петіс гортсьыс и казяліс: моски кузя мунӧ олӧма дядьӧ, а сыкӧд орччӧн дом йылын тапиктӧ ошпи. Жора пыр жӧ суӧдіс ошпиӧс, заводитіс вӧтчыны сы бӧрся. А вӧрса звер челядь моз дурӧ, то чепӧсйылас пу вылӧ, то сувтлас бӧр кокъяс вылас. Гашкӧ, быдса час Жора вӧтчис ошпи бӧрся. Мороженӧйӧн весиг сійӧс гӧститӧдіс и ачыс сёйис. Кор дум вылас уси, кытчӧ да мыйла ыстіс бабыс, бергӧдчис да котӧрӧн мӧдӧдчис магазинлань. Котӧртӧ и бурӧдӧ асьсӧ:

— Удита на, удита...

Но бара эз удит. Магазин ӧдзӧсын ӧшаліс томан. Удитӧмаӧсь пӧдлавны, абу виччысьӧмаӧсь Жораӧс. Няньтӧг да йӧвтӧг ковмис бергӧдчыны гортас. Бур, мый мороженӧйсӧ ещӧ удитіс ньӧбны да сёйны.

«Удита» кывйыс унаысь на сконъявліс Жораӧс. Радейтӧ, вӧлӧм, тайӧ кывйыс дышъястӧ, на дінын и бергалӧ.

«Удита» кыв вӧснаыс детина унатор эз удит вӧчны. Кор заводитчисны гожся каникулъяс, Жора табельын лясвидзис куим двойка. Мӧд во кежлӧ сійӧс колисны нёльӧд классӧ. Со мый вӧчис «удитаыд».