ЮГЫДЛАНЬ

Арнас, медводдза лун школаӧ мунігӧн, батьӧ мем шуис: «Бура жӧ пӧ, бара, пиӧй, велӧдчы. Эн дышӧдчы, эн сетчы дурӧм вылӧ. Став бур олӧмыс ӧд миян велӧдчӧм сайын. Ӧні быдӧн велӧдчӧны: гырысь и, посни и, озыр и, гӧль и. Уджалысьясыд удж эштӧм бӧрас ветлӧны школаясад. Зільӧны быдторсӧ тӧдмавны да восьса синмӧн видзӧдны олӧм вылас. Дӧзмӧмаӧсь нин синтӧм гутъяс моз пемыдын олӧмсьыд, югыдлань петӧны. Прӧстӧй лунӧ кӧ оз эштыны велӧдчыны, вӧскресенняясӧ велӧдчӧны. Войдӧр ми нигаяссьыд повлім, эз лэдзлыны лыддьысьныд. Ӧні, слӧй кӧ сюрӧ, велӧдчӧм мортыд пыр нига вылын зунясьӧ.

Быд асыв каръясын, сиктъясын да вӧлӧсьтъясын, кӧдзыдінын и, шоныдінын и, уна сюрс челядь, тэ моз жӧ, школаад мунӧ. Ставныс найӧ ас ногыс пасьтасьӧмаӧсь да ас ногыс сёрнитӧны, ставныс мунӧны ӧти удж вылӧ — велӧдчыны. Мунӧны быд ногӧн: коді подӧн, коді вӧлӧн-доддьӧн, телегаӧн, коді пыжӧн, кӧрт туй кузя, трамвайӧн — мунӧны ставныс нигааӧсь.

Велӧдчанінъясыд ӧд абу ӧткодьӧсь. Сибырын школаясыс тӧвнад лымйӧн тырӧмаӧсь, Африкаын найӧс пуясӧн гожсьыс сайӧдӧны.

Со ӧд кутшӧм абу ӧткодьӧсь школаясыд, абу ӧткодьӧсь велӧдчысьясыс ни, сӧмын ӧтиторйӧ быдсӧн велӧдчӧны, ӧти туйӧд мунӧны дай. Мед бара пыр жӧ тайӧ став велӧдчысь челядь чукӧрыс тэнад син водзад лоӧ. Тэ ӧд тшӧтш на пытшкын, да накӧд. Эз кӧ эськӧ вӧв велӧдчысь армияыс, немтор эськӧ йӧзыд эз тӧдны. Олісны эськӧ важ йӧз моз, пемыдын, йӧя да. Водзӧ йылысь немтор эськӧ эз мӧвпавны. Велӧдчӧмыд — югыд. Велӧдчӧм мортыдлӧн син водзыд восьса. Велӧдчӧмад став шудыс, став бур олӧм вылас эскӧмыс. Бура жӧ бара велӧдчы, да збоя мун водзиад, югыдланьыд, тэ ӧд ичӧтик салдат лоан ыджыд велӧдчысь армия пиас».