ЈУГЫԀЛАԊ

Арнас, меԁ-воԇԇа-лун школаӧ-мунігӧн, баԏӧ мем шуіс: „Бура-жӧ-пӧ, бара, піӧј, велӧԁчы. Ен ԁышӧԁчы, ен ԍетчы ԁурӧм-вылӧ. Став бур-олӧмыс-ӧԁ міјан велӧԁчӧм-сајын. Ӧні быԁӧн велӧԁчӧны: гырыԍ-і, посԋі-і, озыр-і, гӧԉ-і. Уҗалыԍјасыԁ уҗ-ештӧм-бӧрас ветлӧны школајасаԁ. Зіԉӧны быԁторсӧ тӧԁмавны ԁа воԍса-ԍінмӧн віԇӧԁны олӧм-вылас. Ԁӧзмӧмаӧԍ-ԋін ԍінтӧм-гутјас-моз-пемыԁын-олӧмԍыԁ, југыԁлаԋ петӧны. Прӧстӧј-лунӧ-кӧ оз ештыны велӧԁчыны, вӧскреԍеԋԋајасӧ велӧԁчӧны. Војԁӧр мі ԋігајасԍыԁ повлім, ез леԇлыны лыԃԃыԍныԁ. Ӧні, слӧј-кӧ ԍурӧ, велӧԁчӧм-мортыԁ пыр ԋіга-вылын зуԋаԍӧ.

Быԁ-асыв карјасын, ԍіктјасын ԁа вӧлӧԍтјасын, кӧԇыԁ-інын-і, шоныԁ-інын-і, уна-ԍурс чеԉаԃ, те-моз-жӧ, школааԁ мунӧ. Ставныс најӧ ас-ногыс паԍтаԍӧмаӧԍ ԁа ас-ногыс ԍорԋітӧны, ставныс мунӧны ӧԏі-уҗ-вылӧ — велӧԁчыны. Мунӧны быԁногӧн: коԁі поԁӧн, коԁі вӧлӧн-ԁоԃԃӧн, ԏеԉегаӧн, коԁі пыжӧн, кӧрт-туј-куԅа, трамвајӧн — мунӧны ставныс ԋігааӧԍ.

Велӧԁчан-інјасыԁ-ӧԁ абу-ӧткоԃӧԍ. Ԍібырын школајасыс тӧвнаԁ лымјӧн тырӧмаӧԍ, Афрікаын најӧс пујасӧн гожԍыс сајӧԁӧны.

Со-ӧԁ кущӧм абу-ӧткоԃӧԍ школајасыԁ, абу-ӧткоԃӧԍ велӧԁчыԍјасыс-ԋі, сӧмын ӧԏі-торјӧ быԁсӧн велӧԁчӧны, ӧԏі-тујӧԁ мунӧны-ԁај. Меԁ-бара пыр-жӧ тајӧ став велӧԁчыԍ чеԉаԃ-чукӧрыс тенаԁ ԍінвоԇаԁ лоӧ. Те-ӧԁ щӧщ на-пыщкын, ԁа накӧԁ. Ез-кӧ еԍкӧ вӧв велӧԁчыԍ арміјаыс, ԋемтор еԍкӧ јӧзыԁ ез тӧԁны. Олісны еԍкӧ важ-јӧз-моз, пемыԁын, јӧја-ԁа. Воԇӧ-јылыԍ ԋемтор еԍкӧ ез мӧвпавны. Велӧԁчӧмыԁ — југыԁ. Велӧԁчӧм-мортыԁлӧн ԍінвоԇыԁ воԍса. Велӧԁчӧмаԁ став шуԁыс, став бур-олӧм-вылас ескӧмыс. Бура жӧ-бара велӧԁчы, ԁа збоја мун воԇіаԁ, југыԁлаԋыԁ, те-ӧԁ ічӧԏік-салԁат лоан ыҗыԁ велӧԁчыԍ арміја-піас”.