ЧУЖИН КӦ МОРТӦН


ПЕРВОЙ ЮКӦН


Медводдза глава


Кар таладор помсӧ кизьӧриника югдӧдісны зэв шоч бияс. Вой кежлӧ ёнакодь кӧдздӧдӧм ывла вылын некод эз тыдав. Кимлӧн вежӧрыс, коді талун уджаліс кыдзкӧ вывті нин ясыда да писькӧса, кутшӧмкӧ здукӧ весиг пасйис: «Быттьӧ ме веськалі тӧдтӧм планета вылӧ, кодӧс эновтӧмаӧсь став олысьясыс».

Ким быттьӧ век на кылӧ Милялысь ыркалӧм вом доръяссӧ и окыштчигъясӧ сы дінӧ зэлыда топӧдчывлысь мылькъя морӧссӧ, коді виртӧ пузьӧданаа тӧдчӧ весиг пась пырыс.

Сійӧ пыр ёнджыка велалӧ Миля дінӧ. Пӧшти со быд рыт кутіс колльӧдны школасьыс. А ныла-зонмалӧн колльӧдчӧмыд, дерт, абу сӧмын кодзувъяс лыддьӧм.

Ким немтор эз думайт, мыйӧдз делӧыс воас налӧн. Сылы лӧсьыд Милякӧд, ныв кыскӧ сійӧс ас дінас, кыдзи кӧрт торйӧс магнит.

«А лоис-ӧ эськӧ татшӧмыс, эг кӧ веськалӧ ӧти парта сайӧ? — мӧвпалӧ Ким. — Шуам, пукаліс кӧ Милякӧд мӧд том морт?»

Но татшӧм туясьысь мӧвпъясыс Ким юрӧ талун дыр кежлӧ оз ӧшйыны: шызьӧм сьӧлӧмыслы любӧджык казьтывны нимкодьджыктор.

Талун со Нина Михайловна, литература велӧдысь, став класс водзын лыддис сылысь сочинениесӧ. Тшӧктыліс гижны быдӧнлы медъёна кажитчанатор йылысь, буракӧ, мед пыдісяньджык гӧгӧрвоны да тӧдмавны ассьыс верстьӧ велӧдчысьяссӧ.

Кимлӧн гижӧдыс шусис: «Вӧрын тӧвся лун». Сэні сійӧ, кыдзи сяммис, зілис петкӧдлыны ывлалысь мичлунсӧ, коді оз чусмыв весиг кӧдзыд тӧлын.

Ставӧн шуисны: пӧся пӧ гижӧмыд, вӧр-васӧ бура кылӧмӧн-аддзӧмӧн.

Но, буракӧ, медуна висьталісны Милялӧн синъясыс: наысь сӧдзтысис радейтӧм и шензьӧм, а ӧттшӧтш найӧ быттьӧ ошйысисны сыӧн, Кимӧн: со ӧд пӧ кутшӧм мекӧд пукалысьыс!

Гырысь воськовъясӧн кокниа шавксьӧдысь Кимлӧн не сӧмын кыпалӧма лолыс, но и став ыджыд тушаыс кыдзкӧ тӧдчымӧн ловзьӧма-вынсялӧма, лоӧма быттьӧ кокньыдджыкӧн да пелькджыкӧн, мыйысь сылы зэв окота чеччыштавны лым толаяс вомӧн.

«А Гена, гашкӧ, водіс нин, оз кӧ бара жуглы юрсӧ эсы вылын. Да-а, зэлыд гӧрӧд ми босьтчим разьны! Тайӧ тэныд абу ю дорӧ петалӧм йывсьыд гижӧмыд...»

Кимлӧн мӧвпыс шыбӧлитчӧ Гена другыскӧд бӧръя кадся вензьӧм-корсьысьӧмъяслань: ӧд сы мында нин найӧ бертлӧдлісны юр вемнысӧ тайӧ выльтор вылас. А сійӧ век оз кӧсйы сетчыны, оз кӧсйы висьтавны, кутшӧмджык ключӧн воссьӧ. Ылӧсас тайӧ ключыс быттьӧкӧ важӧн нин гӧгӧрвоана, но кутшӧмкӧ пиньяс да кусыньяс век на лишнӧйӧсь, оз тӧрны, оз кӧсйыны бергӧдчыны мудер томанас.

Кык друг шуисны лӧсьӧдны прибор, код отсӧгӧн позис эськӧ тӧдмавны, ёна-ӧ нин шыляліс-чирссис уджалысь мотор пытшкын поршневӧй система. Тӧдмавны моторсӧ разьлытӧг, машина уджалігас, быттьӧ югыд стеклӧ пыр век видзӧдны, мый сэні вӧчсьӧ.

Сэки эськӧ позис казявны, ёна-ӧ нин «мудзӧма-пӧрысьмӧма» машиналӧн сьӧлӧмыс, бура тӧдны, мый сысянь позьӧ на виччысьны да мый оз, кутшӧма на позьӧ уджӧдны сійӧс.

Мыйта бурсӧ ваяс тайӧ, артмылас кӧ коркӧ!

«А коркӧ, гашкӧ, и быд мортлысь кыдзкӧ тадзи жӧ пондасны тӧдмавны, мый вӧчсьӧ пытшкӧсас, — ӧддзӧмвывсьыс водзӧ на писькӧдчис Кимлӧн мӧвпыс. — Шуам, киын новлан ичӧтик часі кодь прибор отсӧгӧн, а не рентген кабинетъясын, кытчӧ мортыд висьмытӧдзыс оз на и ёнатӧ мун...»

Тайӧ мӧвпыс не этша гажӧдіс Кимӧс.

Сы водзвылын, уличаяс вомӧнсянінсянь неылӧ, здук кежлӧ сувтовкерліс паныд воысь войся автобус, дзуртігтырйи зэлыда восьтыліс чегсьысь ӧдзӧсъяссӧ, чеччӧдіс ӧти мортӧс да тэрмасьӧмӧн дзужнитіс-муніс Ким дінті водзӧ. Эз на удитны саявны автобуслӧн гӧрд биясыс, кыдзи горувлань лэччысь бокыса уличаын кыліс нывбабалӧн лёкысь горӧдӧм:

— О-о-й! Мездӧй!!!

Аслас мӧвпъясӧ вӧйтчӧм Ким виччысьтӧмысла дрӧгмуніс, здук кежлӧ кынмыліс места вылас. «Оз-ӧ мыйкӧкертны кутшӧмкӧ нылӧс?! — юрас дзенӧбтіс мӧвп. — Мый нӧ вӧчны? Котӧртны гортлань, быттьӧ немтор эг кывлы?» — Сэк жӧ сійӧ казяліс, кыдзи морӧсас вынысь тіпкӧ сьӧлӧмыс.

«Ме пола, пола!.. — дӧжнасис мышкусӧ кӧдзӧдысь мӧд мӧвп. — Код тӧдас, кодъяс сэні... Код тӧдас, мый вермасны вӧчны...»

— Мездӧ-ӧй!.. — бара кыліс пикӧ воӧм мортлӧн горӧдӧмыс, но сэсся гӧлӧсыс друг ори, буракӧ, горзысьсӧ тшапнитісны горшӧдыс.

Ким кватитіс куртка зепъяссьыс чуня кучик кепысьяссӧ, зэвтіс тірзьыштысь киясас. И пыр жӧ кулакъясыс лоины быттьӧ сьӧкыдджыкӧсь, топыдджыкӧсь, кисьтӧма кодьӧсь.

И сійӧ уськӧдчис горзӧм шыӧ гӧра вывсянь пыдӧстӧм йирӧ моз: сьӧлӧмыс ыркмунӧма повзьыштӧмысь, но сэк жӧ и ӧзйӧма удаллунӧн.

Матысса керка стен бердысь сылань визьнитісны кык вуджӧр.

Ким котӧртігмозыс мый вынсьыс горӧдіс: «Лейтенант, паныдав!» — весиг ачыс шензьыштіс, кыдзи да кытысь друг сюрисны тайӧ кывъясыс. Сэсся ярмӧм ош моз вувзьысис ыджыд тушанас кык вылӧ ӧтнас. Кодлыкӧ зургис кепыся кулакнас, кодлыкӧ чужйис.

«Горзӧмыс ылынджык кыліс. Тайӧяс, буракӧ, кыйӧдчысьяс». — Ким эз и сувтлы, котӧртіс водзӧ. Сьӧлӧмыс ёнакодь личмуныштіс, сы вӧсна мый казяліс — пакӧститчӧны томиник зонъяс. — «Тайӧяскӧд ме шегъяся!»

Водзын кыліс лымйысь весалӧм пу мостки вывті тэрыб каблукъяслӧн тотшсьӧдӧм. Но некод эз тыдав. Ким дугдіс котӧртӧмысь. «Пышйисны, буракӧ, ставныс!» Муртса на удитіс тадзсӧ думыштны, кыдзи джынъялӧм пес чипас сайсянь сы вылӧ уськӧдчисны ещӧ кыкӧн. Ким, улісянь выліӧ, дӧжныштіс воддзаыслы тшӧка лыас, и сійӧ коньӧр моз горӧктӧмӧн лэбис мостки бокӧ лэптӧм толаӧ. Но сэк жӧ мӧд мортыс удитіс кульыштны Кимлы юрас мыйӧнкӧ зэв чорыдӧн. «Кастет! Мед кӧть садьӧс не воштыны!» — Ким тювгысис водзлань да кыкнан кинас шамыртіс-сывъяліс здук кежлӧ падмылӧм кучкысьӧс, сьӧкыд тушанас лямӧдіс сійӧс да пондіс зутшйӧдлыны сьӧкыд кулакъяснас бокъясас. «Часлы, регыд дугдан чужъясьнытӧ! Мед сӧмын ёртъясыд эз воны-а». Здук мысти личкӧм зон кутіс сьӧкыда кашкыны, сойясыс сылӧн лесмунісны. «Мед сӧмын мӧдъясыс эз воны!..» — Ким сьӧкыдпырысь сувтіс, но муртса бӧр эз усь: сэтшӧма дурмис юрыс. Лои мыджсьыны пес чипасӧ, ляскысьны ньылӧдӧм чужӧмнас чипасвывса лым шапкаӧ. Толаӧ сунгӧм морт некӧн эз тыдав.

Ӧтка пӧнарӧн муртса югдӧдыштӧм улича горувланьын бара кыліс каблукъяслӧн тотшсьӧдӧм, но ӧні найӧ бӧр матыстчисны.

— Коді тані? — юаліс нывбабалӧн повзьӧм гӧлӧс.

— Лейтенант Исков, — мырдысьӧн вочавидзис Ким, сьӧкыда петысь лов шысӧ кутіг.

— Аттьӧ тіянлы, лейтенант ёрт, — пӧся шуис личмунӧм гӧлӧсӧн нывбаба да матыстчис Ким дорӧ. — Аттьӧ, мездінныд... Ой, чужӧмныд тіян вирӧсь! А менам весиг носовикӧй абу, сумкаӧс мырддисны бандитъясыд.

— Менам эм, со. — Кимлы друг окота лои, мед эськӧ нылыс (а сійӧ кажитчис томиникӧн на) и збыльысь чышкаліс сылысь чужӧмсӧ. Сылӧн век на гудыр юрыс. Юрсиыс, тӧдчӧ вӧлі, кӧтасьӧма. Буракӧ, юр кучикыс ыджыдакодь потӧма да вирыс ёна сӧдзтысис. Зэв ёна ёнтіс и шуйга черлыыс.

Ким ботинки нырнас тувкнитыштіс век на куйлысь зонлы:

— Эй, вояк, чеччы! Видзӧдлам кӧть, коді тэ сэтшӧмыс.

Мӧдыс сьӧкыдпырысь пуксис.

— Чеччы, чеччы! — Ким чабыртіс том мортӧс шошаӧдыс да сувтӧдіс кок йылас. Тайӧ вӧлі ар дас сизима зон, кузь тушаа, Кимысь неуна сӧмын ичӧтджык, но, дерт, ёна вӧсньыдджык. Сылӧн веськыд ки пыдӧссьыс Ким нетшыштіс резинаӧн зэвтӧм свинеч плашки.

— Но, мый ӧні пондам керны? Татшӧмторъяссьыд ӧд, буракӧ, медальяс ни орденъяс оз сетлыны?

— Лэдзӧй менӧ... — ӧдва-ӧдва вермис сёрнитны зонмыс.

Орчча керкаын (а тані ставыс вӧліны ӧти да кык судта пу керкаяс) друг ӧзйис би, улич вылын лои югыдджык. Сэсся том йӧз дінӧ петісны фуфайкаяса кык мужичӧй, буракӧ, ая-пиа.

— Ас могысь ывлаӧ петалі, — шыасис олӧмаыс, — кыла, кашкӧны мыйкӧ, ружтӧны. Мися, неладнӧ делӧыс. Садьмӧді Петяӧс, петалам жӧ, мися, видзӧдлам, мый сэні вӧчсьӧ.

— Лӧсьӧдланныд, дядя! — друг скӧрысь шуис ныв. — Кор ме вылӧ уськӧдчисны, керкаыд биа на вӧлі. Горзыны куті да, сэки на кусі биныд.

— Чӧв, бур нылӧй! — пыр жӧ лӧгасис дядьӧ, но Ким мыйлакӧ думыштіс: «Ылӧдчӧ». — Сідзи ӧд он жӧ шу. Гӧгӧрвоим кӧ, первойсянь жӧ петім.

— Но, тырмас! — орӧдіс ныв.

А дядьӧ эз кӧсйы, мед сы йылысь лёк ног думайтісны:

— Мӧдарсянь кӧ видзӧдлыны, ӧпаснӧ и петнытӧ — уличыс гу кодь, немся пӧнар абу. Шпанаясыдлы вӧля тані. Вежон сайын ӧти мужикӧс пуртӧн сутшкалӧмаӧсь. Первой пӧ шобасны — деньга корсьӧны. Сэсся тадзи жӧ кодкӧ суны кутас. Сэки пежъясыд мышкас куимысь сутшкасны перочиннӧй пуртӧн дай пышъясны. Шуйга тысӧ весиг розьӧдӧмаӧсь мортыслысь. А мыйысь?.. Гашкӧ, тайӧяс и вӧліны! — ырыштчис зон вылӧ дядьӧ.

— Ме эг... — киргыштіс зонмыс юрсӧ лэптывтӧг.

— Вот сэсся и пет! — водзӧ норасис дядьӧ. — Он и тӧдлы, бырскасны бокад. Шуа тай: вӧля налы тані. Милиция оз кежавлы-а. Кодкӧ кӧ татчӧс юыштас да гораджыка равӧстас гӧтыр вылас, сэки машинаӧн гургӧдасны чижовкаӧ. А сэсся он пӧръяв, кар шӧрӧд дживкъялӧны.

Кимлы ньӧти эз вӧв окота кывзыны варовмӧм дядьӧӧс. Ыззьылӧм бӧрас вир-яйыс сылӧн кыдзкӧ друг дзикӧдз лесмуніс, зэв ёна мудзис. «Ок эськӧ водны кӧ ӧні!» — Шоныд вольпась тайӧ здукас кажитчис сылы олӧмас медмусаӧн.

— Эсійӧ керкаас телефон эм, вай звӧнитам милицияӧ, — бара на шыасис варов дядьӧ. — Мед нуӧны. Сэні, топӧдасны да, ставсӧ висьталас.

Том мортӧс тайӧ кывъясыс мазі моз чушкисны.

— Лэдзӧй менӧ, — шуис нораа. Сибӧдчыліс чужӧмнас Кимлань да шӧпкӧмӧн моз шуис ӧтнаслы: — Эн тшӧкты звӧнитны, батьӧ виас менӧ... Сійӧ милицияын жӧ уджалӧ... Вай ас костаным ладмӧдчам...

Ким весиг шутёвтіс вочасӧ:

— Со тай! Но и но... Вай кутшӧмкӧ документ — и весась. Эм абу мыйкӧ?

Том морт чӧв оліс юрсӧ ӧшӧдӧмӧн. Сэки Ким павкнитіс сылысь шоныд воротника курткасӧ, ачыс пыраліс питшӧгас да судзӧдіс паспорт, серӧктігмоз шуис: — Лабутнӧй грабитысьыс, документа ветлӧдлӧ... Эн пов, ог вошты. Менӧ верман заводысь корсьны, быттьӧ водзджык кӧ ковма.

— Ме тӧда тэнӧ, — ышловзис зон.

— Но?.. Тӧдан кӧ и, бурджык на. А ӧні усйысь, верман кӧ, вӧтӧд другъястӧ да кевмы, мед менам юрын, кодӧс тэ, буракӧ, поткӧдін, тіян йылысь вывті лёк думъясыс эз жӧ чужны.

А том мортлы, татшӧм кокниатӧ мыніс да, окота лои дзикӧдз мынтӧдчыны. Сійӧ кежаліс пес чипас бокӧ, вайис сэтысь нывлысь мырддьылӧм сумкасӧ, юрсӧ лэптывтӧг шуис: — Деньгасӧ удитім перйыны, тӧварыш ордын.

— Уна-ӧ нӧ вӧлі? — юаліс Ким.

— Вит шайта, — киргис зон.

— Вит шайт понда дасьӧсь мортӧс вины. Кастетаӧсь ветланныд. Пурт на, гашкӧ, вӧлі и. Вӧлі эз?

— Эз...

— Веритӧй сылы! — бара шыасис дядьӧ. — Эн йӧйтав: эн лэдз!

— Ӧні некытчӧ оз пышйы, паспортыс ме ордын.

— Вай бӧр сійӧс, а? — шуис том морт и гӧлӧснас тӧдчӧдыштіс, мый он кӧ пӧ сет ӧні, верман на и каитчыны.

Но Ким быттьӧ эз и казяв тайӧс:

— Эн тэрмась. Ӧтлаын воланныд сыла другъясыдкӧд. Кастетыдла да. Завод общежитиеын торжественнӧя сетам.

— А ме уджала газет редакцияын, — виччысьтӧг шуис ныв, мыйӧн не этша шензьӧдіс Кимӧс. — Выльысь кӧ ковма, Светлана Туробоваӧс юаланныд.

Кор том морт сьӧкыда восьлалігтыр уньыртіс-муніс, ныв пӧся юаліс:

— Буракӧ, зэв сьӧкыд тіянлы?

— Нинӧм. Неуна. — Збыль вылассӧ Ким кыліс доймысь юр чашкаас быттьӧ бокысь сюйӧм ёкмыль.

— Тӧданныд мый? Мунамӧй ӧдйӧджык миянӧ!

— Мыйла нӧ? Ме ог... Гортӧ надзӧникӧн визга.

— Мунамӧй, мунамӧй! Абу ылын тасянь. Ёдалам кӧть, мед оз пежась.

— Гашкӧ, инӧ ёдалыштны...

Ныв видзчысьӧмӧн босьтіс Кимӧс сойӧдыс, медбӧръяысь видзӧдліс майксьӧм-таляссьӧм лым вылӧ, шога шуис:

— Асывнас йӧз казяласны лым вылысь вирсӧ, и доймасны сьӧлӧмъясныс: кодӧскӧ пӧ бара певкйӧмаӧсь войнас...

Неуна восьлалыштӧм бӧрын ныв шуис:

— Ме висьталі нин — Светаӧн менӧ нимтӧны.

— Менӧ Кимӧн.

— Ким... Лӧсьыд ним, выль ним. Ещӧ ӧтчыдысь аттьӧ тіянлы, Ким.

— Нинӧмысь, — яндысьыштіс мӧдыс.

— Не кӧ ті, код тӧдас, мый эськӧ и вӧчисны. Лёк понъясыд! Ті нӧ збыльысь лейтенант?

— Ме сэтшӧм жӧ лейтенант, кутшӧм ті — полковник, — серӧктіс Ким. — Заводын ме уджала...

— Горӧдінныд тай, мися, сідзи да...

— Ачым эг и тӧдлы, кыдзи артмис... Мед ёнджыка весьӧпӧртны зонъяссӧ...

— Со... А ті, буракӧ, смел морт?

— Абу ёнасӧ, ачымӧс ковмис не этша ышӧдны.

— Ті ӧд энӧ тӧдӧй, кодъяс тані. Мый вермис лоны...

— Шуа тай: сьӧлӧмӧй тірзис жӧ. Кысь нӧ повтӧгыс. Дзик повтӧмнас ме сӧмын вина юӧм бӧрын овла.

— Ӧні садьӧсь да?

— Садь... Но ті зэв жальӧсь лоинныд. Нывбабаыдлысь ойзӧм-бӧрдӧмсӧ сьӧкыд кывзыны.

— Со кыдз! — шензьыштіс Света. — А мужичӧй кӧ горзіс? Сэки нӧ энӧ эськӧ отсалӧй?

— Ог тӧд, — нюмъяліс Ким. — Эз сідзи лӧсяв да.

— А тышкасьнысӧ ті, буракӧ, удалӧсь?

— Кужышта, боксёр вӧвлі.

— Тіян киӧн да ещӧ пасьталан кӧ эсійӧ нӧш кодь кепысьсӧ, ӧшкӧс позьӧ чергӧдны.

— Ог тӧд, эг видлы. Мортъясыд тай пӧрӧны-а.

— Ті шуинныд: «вӧвлі». А ӧні?

— Эновтчыны лои. Певйӧс ӧтчыд музгыльтлі да, век кутіс доймавны.

— Ӧні эн дойдӧй? — ныв гӧлӧсын кыліс тӧждысьӧм.

— Ӧні эг, ме водзвыв кепысяси.

Налы паныд восьлаліс кутшӧмкӧ морт. Кимлӧн тӧдлытӧг бӧр зэлаліс мудзӧм-доймалӧм тушаыс.

— Папа? Тайӧ тэ? — друг радпырысь горӧдіс орччӧн мунысь ныв.

— Света?! — пырысь-пыр жӧ шыасис паныд воысь. Гӧлӧс сертиыс бура тӧдчис, мый мортыс ёна нин майшасьӧма да ӧні сӧмын, нывсӧ казялӧм бӧрын, личмуніс. — Виччысим да виччысим... Мися, кӧть автобус сувтланінӧдз котӧртла.

— О-о, менам охрана ёнмӧ! — дзикӧдз долыдмис Света; ӧнтая повзьылӧм бӧрас нывлӧн кутіс ворсны лолыс. — Пап, тайӧ — Ким. А папаӧс шуӧны Николай Васильевичӧн, — шуис нылыд тадзи и думыштіс: висьтавны али не батьыслы лоӧмтор йывсьыс? Но батьыс ачыс гӧгӧрвоис, мый делӧыс абу дзик ладнӧ: Кимкӧд киасигӧн сійӧ казяліс зон чужӧмысь бара нин сӧдзтысьӧм вирсӧ.

— Ӧні жӧ висьталӧй, мый лои?! — тӧждысянаа шуис Николай Васильевич.

Света мунігмозыс дженьыдика висьталіс и та дырйи не этша бур кыв шуис аслас мездысь йылысь.

— Но, екуняваня, йӧз серам тай! — сьӧласис Николай Васильевич. — Войын кӧть эн пет ывла вылӧ! Света, донаӧй, эн ветлӧдлы ӧтнад татшӧм сёрӧннас.

— Но, папа, — гажаа шуис ныв, а Ким думыштіс, мый, буракӧ, Светаыс и водзӧ оз на ёна кут видзӧдны кад вылад.

Гӧгӧр бара вӧлі лӧнь. Кар узис чӧскыд унмӧн. Сэзь енэжын дзирдалісны уна кодзувъяс, найӧ быттьӧ гыбалісны-ворсісны. А Ким, кодлы неважӧн на вӧлі окота чеччавны толаяс вомӧн, ӧдва сулаліс кок йылас.

Выль тӧдсаяс пырисны джуджыд дзиръяа ӧдзӧсӧд, а сэсся краситӧм югыд посводзӧд. Керкаас, ыджыд жырйын, налы воча лои зэв чукырӧсь чужӧма, но тэрыб кока на пӧрысь баб. Сійӧ шылькнитіс лыӧсь-гӧрӧдӧсь кырымнас косьмӧм-корсьӧм чужӧмсӧ да нораа шыасис Света дінӧ:

— Батьыдкӧд дзикӧдз воштім югыдлунсӧ. Коля, мися, петав, эз-ӧ мыйкӧ ло.

— Мый нӧ мекӧд лоас, бабӧ, кор тэнад Енмыд видзӧ менӧ? — шуис Света пӧчлысь ичӧтик юрсӧ морӧс бердас топӧдлігтыр.

— А тайӧ том мортыс нӧ?

— Тайӧ автобусысь чеччыштіс, вильдіс да уси, — шуис Света мужичӧйяслы синъяссӧ лӧсьӧдлігмоз. Ачыс ӧдйӧ пӧрччысис да петіс аптечкала.

— Но, дона морт, мыйла нӧ сідзи чеччалан? Абу ӧд ур. — Кимлӧн гырдӧсь чужӧм вылӧ улісянь вылӧ сюся видзӧдлігтыр сёрнитіс баб. Сійӧ, буракӧ, эз зэв эскы висьталӧмторйыслы.

— Мам, тэ вод, ми асьным тані, — меліа тшӧктіс Николай Васильевич.

— Но, но... Сёяныд ставыс кукня пызан вылын, — сёрнитіс баб. — Кая либӧ паччӧрӧ. Эсытшӧма колӧ жӧ усьны.

— Папа, звӧнитлы «скорӧй помощӧ», — шуис Света Кимлысь доймӧм юрсӧ видлалігмоз. — Ранаыс ыджыд, ковмас вурыштны.

Света шоныд ваын кӧтӧдӧм ватаӧн выльысь чышкаліс Кимлысь чужӧмсӧ. Нывлӧн кузьмӧс киясыс вӧліны небыдӧсь, пельк чуньясыс инмӧдчывлісны зэв шоныда, и Кимлы окота лои, мед эськӧ дырджык тадзи вӧлі.

Ӧні, югыдінын, кор ныв пӧрччис котиковӧй сьӧд пасьсӧ, пашкыр гӧна еджыд шапкасӧ да, Ким бурджыка видзӧдліс сьӧд юрсиӧн дорӧсалӧм векни бана еджыд чужӧм вылӧ. Света кажитчис сылы тӧдсакодьӧн. Сӧмын некыдз эз вермы уськӧдны тӧд вылас, кытысь аддзыліс сійӧс.

Но ёнасӧ мӧвпавны сійӧ эз вермы: доймис юрыс.

Тайӧяслӧн, буракӧ, асланыс неыджыд керка. Пианино со сулалӧ, тӧдӧмысь, Света ворсӧ. Чуньясыс ворсысьлӧн кодь кузьӧсь. Паныдӧн — стен пасьталаыс книга тыра джаджъяс.

Друг Кимлы зэв яндзим лои. «Мыйла нӧ ме татчӧ локті? Мед ошйысьыштны на водзын? Видзӧдлӧй пӧ, кутшӧм ме герой... А найӧ, дерт, казялӧны тайӧс...»

Керка ӧшиньӧ ывласянь ылькнитліс яр би югӧр, сэсся кыліс машиналӧн гораа тутӧстӧм.

— Воис нин «скорӧйыд», — шуис Света да бергӧдчыштліс ӧшиньлань сетчӧм батьыслань. — Папа, пет — ӧлӧд, ми пырысь-пыр тшӧтш воам.

— Света, ыджыд аттьӧ тіянлы тӧждысьӧмсьыд, — шуис Ким, кор Николай Васильевич петіс. Ким вӧлі нин рад, мый воис «скорӧйыс», ӧд яндысьӧмысла эз тӧд, мый вӧчны. Сійӧ мый вермӧмсьыс корсяліс вежӧрсьыс лӧсьыдджык да бурджык кывъяс. И содтіс: — Ме чайта, тіян кияс бӧрын врачьясыслы нинӧм лоӧ вӧчны.

— Лоӧ на уджыс, — нюммуныштіс ныв да думыштіс: «Пӧжалуй, колян кӧ тайӧс ӧтнассӧ, оз на и мун больничаад». И тшӧтш кутіс пасьтасьны. Ывлаын, гӧрд креста «Волга» дорын, ныв шуис батьыслы:

— Папа, ме ветла жӧ больничаӧдзыс.

— Гашкӧ, инӧсь, ме, Свет? Тэ вод шойччы...

— Папа, менам всё равно оз кут узьсьыны... Пап, тэ эн тӧждысь, том мортыс менӧ бӧр вайӧдас машинанас. Вайӧданныд ӧд менӧ бӧрсӧ? — шыӧдчис сійӧ шопер дінӧ.

Мӧдыс зэв збыльысь кӧсйысис. Ким пондыліс дугӧдны Светаӧс тшӧтш мунӧмысь, абу пӧ ме кага, ӧтнам воӧдча, но ныв пукаліс нин машинаын. Кимлы эз вӧв лӧсьыд шоперысь, мый татшӧм сёр кадӧ сійӧс, зонкаӧс моз, колльӧдӧ ныв; но ӧттшӧтш быттьӧ и нимкодь лои, мый татшӧм нывкӧд орччӧн пукалӧ.

Кабинаводзса рӧмпӧштанын гусьӧникӧн паныдасьлӧны налӧн видзӧдласъясыс, сэсся повзьӧмпырысь бӧр ырсмунлӧны ӧтарӧ-мӧдарӧ.

Светалӧн сьӧд синъясыс пӧся аттьӧалӧны зонмӧс, а тшӧтш и жалитӧны, тшӧтш кылӧны сылысь дойсӧ.

Кимлӧн пыдіа пукалысь руд синъясыс, кодъяс весьтын паськыда шевкнитчӧмаӧсь еджгов йӧзлӧн шочджыка овлысь сьӧд синкымъяс, шӧйӧвошӧмаӧсь став тарытъясьыс и юасьӧны, юасьӧны — найӧ кӧсйӧны унджык тӧдны тайӧ лэчыд ныв йывсьыс...

А больничаын, кор вотйисны-вурисны юрсьыс пазьмунӧминсӧ, Ким гажаа шмонитіс врач-нывъяскӧд: лючкиджык жӧ пӧ топӧдӧй кучиксӧ, мед кӧть пӧ чужӧмӧй эз ло вужинь-вежинь, ӧд коркӧ пӧ, гашкӧ, и ковмас на гӧтрасьны, невестапу корсьны.

Сійӧ жӧ машинанас воисны Кимъяслӧн общежитие дорӧдз. Янсӧдчигас ныв шуис:

— Тӧданныд, мый ме думайті? Кор ті выльысь аддзысьланныд миян «другъяснымкӧд», менӧ тшӧтш корлӧй. Но?..

— Позьӧ... Дерт жӧ корам!..

— Эн вунӧдӧй — Света Туробоваӧс юаланныд.

Машина тӧвзьыштіс-муніс. Улич чукыль сайын сылӧн гӧрд

биясыс саймовтчисны.


Мӧд глава


Ыджыдкодь жырйын Ким оліс Гена Игнатовкӧд, коді вӧлі налӧн бригадирӧн. А бригадаыс вӧчис-чукӧрталіс заводын дизельяс, найӧ мунісны вӧр промышленносьтса предприятиеясӧ пӧшти страна пасьтала.

Гена узис крӧвать вылас пӧрччысьтӧг, свитера, ботинкиа, кокъяссӧ пуктӧма улӧс вылӧ. Мыйӧн сӧмын Ким восьтіс ӧдзӧссӧ, сійӧ звирк чеччыштіс, быттьӧ абу и узьлӧма, дивитыштӧмӧн шуис:

— Дыр тай талун... Нинӧм эн висьтав-а. Миляыд эз лэдз?

А мыйӧн казяліс другыслысь кӧртӧда кымӧссӧ, узигас чукрасьӧм векни чужӧмыс быттьӧ водзӧ на йывмыштіс:

— Тэ тай тышкасьӧмыд?!

— Мездысьны лои Миляӧс колльӧданінысь воигӧн. Торӧ-ёрӧ ӧти нылӧс вӧлі сувйӧны.

— Кутшӧм торӧ-ёрӧ? — эз гӧгӧрво Гена.

— Но, миян сідзисӧ шуӧны посниуловӧс... — Ким висьталіс кыв-мӧдӧн, кыдзи да мый лои, пызан вылӧ гольс пуктіс кастет.

— Ф-ю-у! — шутёвтіс Гена. — Бура на помасьӧма тэнад да... А татшӧм торӧ-ёрӧыд вермисны дзикӧдз немортӧ вӧчны. Ӧні колӧ асьнысӧ тискиӧ топӧдны бурджыка!

— Мыйкӧ думыштлам, — шуис Ким крӧвать вылас водіг. Сылӧн зэв ёна дурмис юрыс, быттьӧ шӧри потны-чашкавны пондіс, торйӧн нин шуйга бокыс — черлысяньыс и вылӧджык.

— Кимка, а кодъясджык эськӧ найӧ сэтшӧмъясыс? Первойысь петісны татшӧмтор вылас? Али вир вылӧ велалӧм ош кодьӧсь нин?

— Тӧдмалам... Сэки и видзӧдлам, кыдзи да мый вӧчны накӧд. — Ким кыкнан кинас топӧдіс юрсӧ. — Мыйкӧ вывті нин пондіс чашкӧдны юрӧс...

— Гашкӧ, шонтыштны колӧ?

— Вай видлам.

Гена лӧсьӧдіс рефлектор, кодлӧн югъялысь ыджыд синмыс регыд мысти кутіс ымравны кисьмӧм оз рӧмӧн. Ким пондіс шонтыны юр пӧвсӧ. Ачыс дон гӧрдӧдіс. Но дойыс эз лӧнь, а мыйлакӧ, вабергач моз, вешласис ӧтарӧ-мӧдарӧ.

— Оз отсав? — тӧждысьӧмӧн юасис Гена.

— Оз... сверлитӧны быттьӧ.

— У-у, проклятӧйяс! — кос кулаксӧ кабыртӧмӧн грӧзитіс Гена тыдавтӧм шпанаяслы.

— Куртка зептын лекарство эм, больничаас сетісны... Вайлы сійӧс.

Гена вайис, Ким ӧтпырысьӧн юис куим таблетка анальгин.

— Тэ, Кимка, лишнӧйсӧ эн жӧ ю, а то он садьмы, дзикӧдз вылӧ унмовсян.

— Садьма, медтыкӧ унмовсьла-а.

Регыд мысти кӧсичасӧ розьӧдны быттьӧ дугдісны, и дойыс ӧтмоза разаліс юр пасьталаыс. Но сы пыдди заводитлісны жмитны-топӧдны ӧта-мӧдланьыс кӧсичаяссӧ болт вылын моз. Сэсся бӧр личӧдыштісны гайкасӧ. Сэсся юр пытшкас быттьӧ кисьтісны мыйкӧ шоныдӧс, пляжвывса кос лыа кодьӧс. Кокньӧдіс.

— Тэнад, буракӧ, прамӧя вӧрзьӧма юр вемыд.

— Врачыс тай сідзи шуис-а...

— Велӧдчӧмсьыд колян пежгагъяс вӧсна.

— Нинӧм, тайӧтӧ эськӧ нинӧм да...

— Тэ, Кимка, тайӧ рытъясӧ ӧтнад эн ветлӧдлы. Вермасны топӧдны... Школасьыд лэдзалігкежлӧ ми кутам паныд волывлыны.

— Мый тэ, Ген, абу ӧд ме нывка...

— Ме тӧдаджык, мый колӧ да мый оз. Миляыд мед автобусӧн ветлӧдлӧ...

— Ген, а эсійӧ нылыс, кодӧс мезді, газетын пӧ уджалӧ...

— Оз жӧ ӧд! — чуймис Игнатов.

— Сэні... Шуис, мед ми сійӧс тшӧтш корлім, кор пондам шегъясьны сумка мырддьысьясыскӧд.

— Интереснӧ!.. Оз жӧ ӧд кут газетас гижны та йылысь?

— Ог тӧд.

— А мый, позяс ӧд и гижны, ставнысӧ тӧдмавны бурджыка да. Мед и мукӧд кузь киаяссӧ ӧлӧдны... Оз кӧ быттьӧ повзьы?

— Абу тай полысь кодь-а.

— Ми вермам сылы конвой лӧсьӧдны, Кимка.

— Вермам, дерт...

— Дела-а!.. Но тырмас, Кимка, больгыны. Аски на луныс лоӧ. Тэныд колӧ быть узьыштны.

И Гена кусӧдіс бисӧ. Водіс и дзикӧдз лӧнис.

Кимлы колӧ жӧ узьыштны. Быть колӧ узьыштны. Колӧ кусӧдны быд пӧлӧс думъяс, кутшӧм кӧть пӧсьӧсь найӧ эз вӧвны. Колӧ дзикӧдз дугдыны вӧрны, быд сӧн личӧдны вата кодьӧдз. Юр боксӧ со бара кутіс розьӧдны. Дерт, думайтӧмсьыс. Бара джумйын моз бергалысь розьыс быттьӧ вешъялӧ ӧтарӧ-мӧдарӧ юрас. Дивӧ... Коркӧ Кимлы вӧлі дас куим арӧс, и ӧти ёрткӧд тулысын шуисны пышйыны детдомысь. Сы вӧсна, мый налысь радейтана, муса директорнысӧ вежисны, налысь юавтӧг нуисны кытчӧкӧ, а сы пыдди вайӧдісны кыз гӧлӧса стрӧг дядьӧӧс, коді вӧлі дзик мӧд мортӧн: воддзаыслы кӧ став батьтӧм-мамтӧмыс вӧліны аслас челядь кодьыс жӧ донаӧсь, то мӧдыс видзӧдіс на вылӧ ёнджыкасӧ кыдзи слугаяс вылӧ... Пес пилитӧдіс аслыс, турун пуктӧдіс аслас мӧслы... Кыдзи татшӧмыдкӧд олан? Бона помъясысь вӧчисны пур, мыйтакӧ сёян дасьтісны и вӧскресенньӧ асылӧ, зэв водз, йӧткыштчисны кывтны. Но ыджыд ваыс пырысь-пыр жӧ сюйис найӧс вабергачӧ, кутіс гӧгрӧдлыны пышйысьясӧс дурпопӧс моз. Берег дорӧ оз матыстлы, зібъяс оз судзны, кӧть бӧрд. Ӧд вермасны суны да юавны: кытчӧ нин пӧ туй кутанныд, чемоданъясаӧсь и весь? А чемоданыс Кимлӧн мича вӧлі! Сьӧд, югъялысь кӧрт доръяса да патефон ящик кодь серъяса. Коркӧ пӧ батьыс на зон дырйиыс вайлӧма Архангельскысь, вӧр лэдзысь ударникъяслӧн слёт вылысь... Дыр и мырсисны кык друг сійӧ джумъяс, но кыдзкӧ-мыйкӧ мынісны жӧ. Ӧні на быттьӧ син водзас ыльгӧны-гартчӧны воронка кодь пемыд розьясыс.

Кутшӧм путешествие вӧлі налӧн сэки! Ӧти сайын кык друг кӧсйисны мунны ылӧджык, Чёрнӧй море дорӧдз, да медасьны кутшӧмкӧ корабль вылӧ, коді ветлӧ мирса став странаясӧ. Найӧ вӧтӧн и вемӧсӧн вӧлі аддзӧны тропическӧй каръяс, кодъяслӧн весиг нимъясыс шемӧсмӧдӧны вежӧртӧ: Рио-де-Жанейро, Гонолулу, Буэнос-Айрес.

Но найӧс кутісны да бӧр вайӧдісны детдомӧ. Помтӧм-дортӧм океанын пыдди бара на лои плавайтны векняммӧм Сыктылын...

«Ак, пеж вабергач, бара нин розьӧдӧ!»

«Школаӧ тайӧ лунъясӧ ог ветлы, Миля, гашкӧ, и гортӧдз волас... Уджавны ӧдвакӧ верма и. Кодсюрӧ, кӧнкӧ, думыштасны, мый код юрӧн тадзсӧ лои».

«Кутшӧм пӧсьӧсь Светаыслӧн синъясыс... Чикыш борд кодь синкымъясыс быттьӧ лэбӧдӧны найӧс... Мый со сійӧ думайтӧ вӧчны-а?»

«Тӧрыт, лун сьӧмӧснас, войтва нин виялыштіс. Регыд тулыс... Менам думъясӧй, гашкӧ, ва войтъяс жӧ да? Кыськӧ петӧны и петӧны. Кыдзи вевт вылын сывны заводитӧм лымйысь ва войтъяс. Колӧ пӧ вермыны асьтӧ. Кокни тайӧс шунытӧ. А вермы вот, унмовськӧд... А Генка, тыдалӧ, вермӧ. Видзӧд, кыдзи шкоргӧ. Сылӧн, Ким тӧдӧ, чорыдджык асьсӧ кутан кӧртвомыс».

Ким судзӧдіс пызан вылысь да нӧшта юис анальгин. Дойсӧ бара пӧдтыштіс лекарствоыс, но сы пыдди кыськӧ пырысьтӧм-пыр жӧ, нӧшта на ярджыка, уськӧдчисны думъясыс.

«Коркӧ, буракӧ, менӧ дзикӧдз помаласны мездысигад!»

Ӧд дыр-ӧ на олӧ карын, а мӧдысь нин та понда мучитчӧ...

А кутшӧм пӧсь кӧсйӧмъясӧн сійӧ локтіс карас! Чайтіс, мый аслас вынӧн да ыджыд мывкыднас (тадзи и думайтіс) быдтор вермас вӧчны! Карын сійӧ ёна велӧдчас, помӧдз сӧвмӧдас вежӧрсӧ и лоӧ ыджыд мортӧн. Ставӧн кутасны тӧдны сы йылысь! И сійӧ вӧчас йӧзлы уна-уна буртор!..

А дона карыд, видзӧд, оз ёна меліась сыкӧд. Первойсяньыс... Вӧрысь воан луннас жӧ зэв ёна висьмис кынӧмыс. Тӧдсаясыс чайтісны, мый гӧгйыс вӧрзьӧма, и тракйӧмӧн-сюгйӧмӧн пондісны веськӧдны. Но дойыс пыр ӧтарӧ ёсьмис. Сэсся корисны «скорӧй помощь» да катӧдісны больничаӧ. Сэні дзумгылісны-сюйлісны ваннаӧ да пырысь-пыр жӧ водтӧдісны операционнӧй пызан вылӧ. Хирург чилснитіс-вундіс кынӧмсӧ, час кымын гудрасьыштіс резина кепыся кинас Кимлӧн сювъяс пӧвстын, а сэсся и петкӧдліс чаль ыджда гырдӧсь сюв пом.

Талун кӧ пӧ эн лок операция вылӧ, тайӧ дивӧыс пӧ потіс, пежасис гырк пытшкӧсыд и — эштіс олӧмыд. Медбӧръя приступ пӧ вӧлӧма.

«Сідзкӧ, карыс спаситіс менӧ! — радліс сэки Ким. — Сійӧ дасьтӧ менӧ ыджыд делӧяс вылӧ и эз лэдз кувны!»

Колӧ вӧлі корсьны удж. Тшӧтш и оланін, тӧдсаясыс син бӧжнаныс нин видзӧдлывлӧны сы вылӧ. А сьӧм кутіс нин бырны. Но медводз Ким пырис рытъя школаӧ, кӧкъямысӧд классӧ. Та могысь ковмис сдайтны кык экзамен: уна нин пӧ кадыс кольӧма велӧдчӧмсяньыд да, гашкӧ пӧ, ставсӧ нин вунӧдін... Бура сдайтіс.

А сьӧлӧм серти удж некытысь эз сюр. Сэтшӧм-татшӧминас эз вӧв окота пырны, а бурджыклаас эз босьтны. Пырас вӧзйысьны, а сэні видзӧдласны сылӧн лӧзӧдӧм син доръяс вылӧ и шуӧны нюмнысӧ кутігмоз: «Оз, миянлы уджалысьяс оз ковны».

Мед кӧть юалісны ли мый ли, мыйысь лӧзӧдісны син доръясыс! Мездысигӧн лӧзӧдісны найӧс...

Сэсся и зэв яндзим кутіс лоны вӧзйысьнысӧ. Тӧдсаяс ордас мунны яндзим и. Кӧть мый вӧч... Пырас вӧлі ресторанӧ, босьтас сур кружка да лунтыр пукалас. Кутшӧм думъяс сӧмын эз волыны юрас!

Кар спаситіс сійӧс, а ӧні сэсся тӧдны оз кӧсйы. А ӧд сійӧ, Ким, бур сьӧлӧмӧн локтіс татчӧ.

Бӧр сетчыны чужанінлань вӧлі яндзим жӧ. Дерт, шуам, бӧр кӧ каяс, бара на бур морт туйын лоӧ. Сэні сійӧс тӧдӧны, морт пыдди пуктӧны... Пӧрӧдчис лесопунктын, вӧлі комсоргӧн. Райкомолса членӧн бӧрйылісны. Кӧсйисны райкомолас уджавны босьтны... Но со, воис тай карӧ. Сэтшӧм окота велӧдчыны сылы, лов тырнас кыскыны ас пытшкас ыджыд культура.

Вӧлі кӧ эськӧ мамыс, позис на и бӧр кайны. Мый нӧ яндысьнысӧ. А ӧні гортас некод оз виччысь сійӧс. Тьӧткаясыс, гашкӧ, радӧсь нин, мый муніс. И другъяс тані абуӧсь, некодкӧд юксьыштны сьӧлӧм шогнад.

Сьӧкыд, кор морт ӧтнас. Оз ков лоны мортлы ӧтнасӧнлы.

Аскинас Ким муніс вӧзйысьны карса медыджыд заводӧ. И пырис веськыда партийнӧй комитетӧ да ратшнитіс-шуис секретарыслы, бур чужӧмаӧн кажитчысь еджгов мужичӧйлы:

— Ме, комсомолец, вӧвлӧм танкист. Кӧсъя уджавны тіян заводын. Пыри нин велӧдчыны рытъя школаӧ.

Мӧдыс дугдіс сёрнитны косіник чужӧма зонкӧд, шензигтыр кутіс видзӧдны Ким вылӧ.

— Со кыдз! — шуис сэсся бурпырысь зонкалӧн кодь сӧдз гӧлӧсӧн. — А гашкӧ, тіянлы колӧ кадръяс отделӧ пыравны?

— Ме вӧлі нин дас отделын, — шуис Ким. — И быдӧнлӧн ӧткодь сёрни: «Он ков!» А калымитны сэтшӧм-татшӧм удж вылын ог кӧсйы.

— А син дорыд со лӧз... Мыйысь эськӧ? — наяна юаліс парторг.

— Висьтавны кӧ тіянлы, мый уси, онӧ эскӧй, — шуис Ким. — Свадьба вылын мездысигӧн лӧсыштісны.

— Мездысигӧн-ӧ?

— Збыль шуа... Больничаысь петӧм бӧрын вынӧй этшаджык на вӧлі да, сэки.

— Мыйӧн нӧ служитін, танкистыс? — юаліс сэки кос чужӧма зон.

— Командирӧн, «пятьдесятчетвёрка» вылын.

— Но?! — долыдмис косіник зон. Сэсся сійӧ шыӧдчис парторг дінӧ: — Виль Николаевич, позьӧ кӧ, вай ме сыкӧд сёрнитла.

Тадзи найӧ тӧдмасисны Генакӧд. Сэсся и кутісны уджавны ӧтлаын. Сідзкӧ, карыд абу нин сэтшӧм лёк вӧлӧма. Ӧд сійӧ со кутшӧм другӧс сетіс! Со кутшӧм коллективӧ веськӧдіс!..

Ӧні Ким некыдз оз вермы шуны, мый сійӧ ӧтнас...

Сӧмын тай юрыс поткӧдӧ-висьӧ. Но и мед висьӧ! Анальгиныс тай со мӧд пачка на эм... Дерт, эз кӧ кеж горӧдӧм вылас, эз эськӧ вись ӧні юрыс. Но кыдз нӧ мездысьтӧгыс!

Бокысянь кӧ видзӧдны — карыс быттьӧ узьӧ. Гырысь и посни керкаясын кусӧдӧма би. Шочиника сӧмын журкнитлӧны машинаяс. Муртса югдӧдыштӧм уличаяс вылын оз тыдавны йӧз. Кар весьтын ыджыдалӧ кӧдзыд, но тулыс кӧра нин войыс. Кутшӧм вӧтъяс сӧмын сійӧ оз вай йӧзлы. Чукӧртны кӧ ӧти войся став вӧтсӧ, кодъяс чужӧны карын, ёна и тешкодь книга эськӧ артмас.

Но мукӧдыслы, видзӧдтӧ, не вӧтасьӧмӧдз.

Кор Света санитарнӧй машинаӧн бӧр воис гортас, Николай Васильевич, дерт, эз на жӧ узь.

— А сьӧлӧма, буракӧ, зонмыс, — ошкыштіс Николай Васильевич, кор нылыс висьталіс ветлӧм йывсьыс. — Татшӧмтӧ позьӧ ош гу дінӧ босьтны. Шуан, заводын уджалӧ?

— Сідз тай висьтасис.

— Веськыда кӧ шуны, ме и ачым сідзи чайті. — Николай Васильевич весиг долыдмыштіс. — Заводса йӧзыд кыдзкӧ век смелджыкӧсь миян кодь рушмӧм служакъяс дорсьыд.

— Мыйысь нӧ нин смелмисны найӧ?

Николай Васильевич здук кежлӧ падмыштліс, тэрыб кинас малыштіс балябӧжас кольӧм этшаник юрсисӧ да шуис:

— Кыдз эськӧ тэд шуны?.. Ме чайта, заводса рабочӧйыд смелджык сы вӧсна, мый миян дорысь зумыдджыка асьсӧ му вылас кылӧ. Ӧд орччӧн сымда ёрт эм сылӧн... Ӧти удж вӧчысь ёрт... И мый кӧть оз ло, найӧ век воасны отсӧг вылӧ... А кор морт мышсяньыс кылӧ ёртъясыслысь вынсӧ, сэки сійӧ и ачыс вынаджыкӧн да смелджыкӧн лоӧ...

— Но ӧд миян пӧшти быдлаын ӧтвылысь уджалӧны, папа.

— Сідз эськӧ да... Сӧмын тай унаӧнлӧн вӧчӧмторйыс оз тыдав. Лунтырӧн гижасны кутшӧмкӧ кабалатор, а рытнас, гортас мунігӧн, бӧр шыбитасны сійӧс ёг чукӧрӧ. Татшӧм уджсьыд ӧмӧй бурмас сьӧлӧмыд? Ӧдвакӧ. Татшӧм уджыд сьӧлӧмтӧ сӧмын сісьтӧ. А мый нӧ? Деньга локтӧ, а мортыс некор оз выныштчыв кыдзи колӧ. Татшӧмыд сӧмын и думайтӧ, мед эськӧ не воштыны шоныд местасӧ, кӧні позьӧ муссӧ зырттӧг перйыны кынӧмпӧт. Кысь нин татшӧмыдлы лоны смелӧн да ыджыд сьӧлӧмаӧн? Мӧд морт вӧсна вийсьысьӧн? А заводсаясыд, позьӧ шуны, киссьӧм-жугалӧм лӧм чукӧрысь вӧчӧны выль трактор! Небось тыдалӧ, екуняваня!.. Таысь ӧмӧй оз бурмы сьӧлӧмыд?.. Таысь и ёртъясыд, кодъяскӧд ӧтув тэ сетін вынтӧ выль машина вӧчны, лоӧны мусаджыкӧсь да донаджыкӧсь...

— Гашкӧ и, сідз... — ышловзис Света. — Но век жӧ, ме ногӧн, мед мортӧн лоны, абу быть вӧчны трактор...

— Абу, дерт!.. Ме ӧд ог шу!..

— Ме тӧда шань и смел йӧзӧс газетчикъяс пӧвстысь... — мӧвпаланаа шуис Света.

— Эмӧсь, дерт!.. Эмтӧм абу!.. Сэсся ӧд, сідз кӧ нин шуны, гижысь мортыд ачыс рабочӧй кодь — лун и вой мырсьӧ.

Николай Васильевич шочиника гижавліс жӧ газетӧ заметкаяс и тӧдӧ, кыдзи найӧ сетчӧны. А гижавліс сійӧ ёнджыкасӧ фельетон сямаясӧс, сы вӧсна мый уджалӧ народнӧй контрольын, и мортыдлӧн век тырыс эмӧсь примеръяс йӧзлӧн чукыль-мукылясьӧм йылысь, олӧмын индӧм правилӧяс кытшовтӧм йылысь.

Николай Васильевич тӧдӧ: куш сӧмын примерыд гижан уджад этша на. Колӧ сідзи сійӧс бергӧдны, сідзи петкӧдлыны лыддьысьысьлы, мед мортыс ясыда казяліс, мед чуймис да бурысь либӧ скӧрысь думыштчис... Та вӧсна ичӧтик заметка вылын Николай Васильевичлы ковмылӧ мырсьыны войбыдъясӧн. Да и то на сутши-кетши артмылӧ, ковмылӧ на сетны нылыслы шыльӧдны.

А сійӧ перӧнас визьйӧдлыштас, и дзик мӧд кодьӧн гижӧдыс лоӧ, быттьӧ бур чӧвтысьлӧн шыльыда сыналӧм зорӧд.

Водӧм бӧрас Света дыр думайтіс батьыслӧн кывъяс йылысь. И бара на казяліс, мый сійӧ, кӧть и шусьӧ журналистӧн, ньӧти оз тӧд рабочӧйяслысь олӧмсӧ. Тыр вежӧра олігчӧжыс сійӧс пыр кыдзкӧ ёнджыка кыскыліс сьылысьяс да гижысьяс дінӧ. И газетас уджалігӧн нин век пырӧдчыліс гижны мыйкӧ на йылысьджык. Рабочӧйяс дінӧ мунны сійӧ полыштіс, грубӧйджыкӧн век найӧ кажитчылісны сылы и, веськыда кӧ шуны, эз чайт аддзыны сэтысь нинӧм интереснӧйсӧ. Станок, детальяс, нормаяс... — ставыс тайӧ, дерт, колана, но ни гижысьлысь, ни лыддьысьысьлысь, сы ногӧн, оз зэв вӧрзьӧд сьӧлӧмсӧ.

А ӧні со кутшӧм виччысьтӧг лои тӧдмасьны буретш заводсакӧд. Интереснӧ, артмас-ӧ сылӧн, Светалӧн, мыйкӧ кӧ панны тарытъясяньыс йӧткыштчӧмӧн? Думыштіс и повзис: ок, паськыда ковмас босьтны ӧтар и мӧдар...

Света сьӧлӧмнас кылӧ, мый тавойсяыс дыр кежлӧ шызьӧдіс сійӧс, и ӧдвакӧ регыдӧн верман лӧньны. «Ме ӧні быттьӧ кӧч кыйысь пон, коді веськаліс свежӧй кок туй вылӧ», — донъяліс сэсся лов кылӧмсӧ ныв.


Коймӧд глава


«Сюри!!! Мый нӧ ӧні лоӧ? Нёльӧн ӧти мортӧс эгӧ вермӧй топӧдны!.. — Валерьян забеднӧысла да скӧрысла гирскис-йирис пиньяссӧ. Сійӧ восьлаліс гортланьыс, кар мӧдар помлань. — Сволочь Габӧ, кодакӧкості пышйӧма! Мый эськӧ заводсасӧ ме вылысь не колскыны. Ставыс эськӧ шито-крыто вӧлі. А ӧні?..»

Валерьянӧс кутіс кызӧдны, но кызнысӧ сійӧ эз вермы — сэтшӧма доймис морӧсыс. Сійӧ сувтіс да кызӧктӧм пыдди кызмырдысьӧн, коньӧр моз киргигтыр, кыскис ас пытшсьыс кызӧмсӧ.

«Сволочыд, буракӧ, чуктӧдӧма мыйкӧ. Гашкӧ и, сьӧлӧмӧй вӧрзис места вывсьыс, шуйга бокӧй доймӧ да. Ён, пежыд...»

Сэсся Валерьян думыштіс бать йывсьыс да быдсӧн йӧжгыльтчыліс, кӧдзыд йирмӧг босьтліс морттӧ. Ставсӧ кӧ тӧдмалас батьыс, вермас на кык мында содтыны...

«А йӧршитасны кӧ тюрмаӧ? Шуам, сэтшӧм жӧ колонияӧ, кутшӧмын коркӧ уджавліс батьыс? Баракъясыс кык пӧвста потшӧс сайын, потшӧсъяссӧ стын моз сувтӧдалӧма вӧсньыдик кузь керйысь, а вылісяньыс везъялӧма бытшласьысь сутугаӧн. Йӧз видзӧдчӧны потшӧс костӧд, синъясныс налӧн шогӧсь, гажтӧмӧсь; морт нетшкысьӧ вӧля вылӧ, но он небось пет».

Ы-й-й, Валерьян оз кӧсйы сэтчӧ!

Ӧні, кор сійӧс эз нин кут заводсалӧн чорыд кабырыс, паспортсӧ кольӧмыс Валерьянлы кутіс кажитчыны йӧйталӧмӧн. «Позис жӧ косявлыны, либӧ кыдзкӧ ылӧдлыны, пышйыны!»

«Бать, сӧмын бать вермас отсавны! Мед ветлӧ, мед личкыштӧ кытчӧ колӧ». — Валерьянлы син водзас сувтіс батьыслӧн ыджыд кабыра кыз сойыс. — «Вермас, дерт, бонзьӧдны паханыд... Но мед... Медтыкӧ тюрмасьыс мездіс-а...»

Ӧшинь улас лёкысь увтчигтыр да чепнас зильӧдчигтыр паныд чепӧсйис ун тӧдтӧм Церберыс. Но кор тӧдіс Валерьянӧс, пырысь-пыр жӧ кутіс меліа никсыны. Валерьян аслас ключӧн восьтіс кильчӧсӧ, небыдика тувччалігтыр пырис аслас жырйӧ. Велалӧмӧн матыстчис пызан дорӧ, личкыштіс лампалысь кнопкасӧ. Виж абажурӧн сайӧдӧм би небыда югдӧдіс комната пытшкӧссӧ. Ставыс ас инас. «Спидола» приёмник, кодӧс батьыс ньӧбис неважӧн, дас сизим арӧс тыран лунӧ. Пельӧсын, тумбочка вылын, — фотоувеличитель. Неыджыд этажерка вылын книгаяс — ставыс детективнӧй роман. Восьтан кӧ пызан йӧр, аддзан уна фотокарточка. Ачыс снимайтліс быд ногыс нывъясӧс да зонъясӧс, судзӧдаліс мукӧд странаясысь вайӧм снимокъяс — пасьтӧм йӧзлӧн «радейтчӧм» йылысь. Видзӧдлан татшӧм снимок вылас, да вирыд пузьылӧ.

Матыстчис шкап дорӧ. Зеркалӧсянь сы вылӧ видзӧдіс еджыд чужӧма да зэв кузь, нывлӧн моз шырӧм русыд юрсиа, ичӧтик лэчыд синъяса зон. «Валька, тэ дырйи менам бырӧ садьӧй...» — тӧрыт на шуис тадзи сылы рыжӧй Марӧ, код вӧсна сійӧ, гашкӧ, и сюри... Бара малыштіс морӧссӧ, пыкыштліс ловсӧ — дойыс сэні ньӧти эз чин, а пыр ӧтарӧ содіс. «Кӧть мый эн шу, а сьӧлӧм вужъясыс, буракӧ, и збыльысь чуктӧмаӧсь, — кымынӧдысь нин мӧвпыштіс шога. — Нэм кежлӧ калекаӧн коля...»

— Но, жӧник, талун бара выль краляӧс колльӧдін? — друг кыліс ӧдзӧс дорын батьыслӧн гӧлӧсыс. Гӧлӧсас нинӧм лёкыс эз вӧв, нывъясӧс вежлалӧмысь батьыс эз дивит писӧ. Весиг мӧдарӧ: Валерьян ӧтчыд кывліс, кыдзи батьыс, ыкшаа сералігтыр, ошйысис тайӧн аслас гӧсьтъяслы.

Валерьян бергӧдчис. Батьыс сулаліс ӧдзӧс шӧрын — сувтсаног и пасьтаног ӧдзӧссӧ дзоньнас тупйӧма да наяна нюмъялӧ:

— Мися, бара выль краляӧс колльӧдін? — мӧдысь наяна юаліс Кызродев да вуджӧдіс ыджыд, шылялӧм тушасӧ комнатаӧ, пӧдлаліс ас бӧрсяыс ӧдзӧссӧ.

— Да-а... — ньӧжмыда шуис Валерьян, но весиг и тайӧ ичӧтик выныштчӧмсьыс чунгис морӧсас лёк дойӧн.

— Тэнад сибдӧма гӧлӧсыд? Тэ тышкасин? Да?

— Да-а...

— Бара, кӧнкӧ, юин да, дерт. Ок эськӧ тэнӧ!

Валерьян нинӧм эз вочавидз, сійӧ лэдзчысис улӧс вылӧ да ещӧ улӧджык ӧшӧдіс юрсӧ.

— Да тэ мый немӧялан?! — чорыдджыка нин шуис Пантелеймон Михайлович да ён кияснас чатӧртіс пиыслысь юрсӧ. Мӧдыс морӧс доймӧмысла ымӧстыштіс. Таысь Пантелеймон Михайловичлӧн тревожитчыны заводитӧм сьӧлӧмыс ярмис. Сійӧ зымкнитіс сьӧкыд кокнас джоджӧ да горӧдіс:

— Мый, мися, он сёрнит?!

«Ӧні кӧ висьтала, вермас вины скӧрйывсьыс», — думыштіс Валерьян да бӧрланьӧ сетчыштӧмӧн тэрыба чеччис улӧс вылысь. Сувтіс батьыслы воча, синъяснас кыйкнитліс ӧтарӧ-мӧдарӧ. Пызан вылысь казяліс кузь воропа мӧлӧт, да личмуныштіс сьӧлӧмыс.

— Ме, папа, сюри... — кыдз вермис шыльыдджыка шуис Валерьян.

— Кытчӧ сюрин?! — Пантелеймон Михайлович пытшкын водзӧ зэлаліс пружинаыс.

— Ми кӧсйим мырддьыны ӧти нывлысь деньга... Но миянӧс кутісны...

Пантелеймон Михайлович, милицияса уджалысь, весьӧпӧрис тайӧ кывъяссьыс. Мортыдлӧн мыйкӧ быттьӧ орис пытшкӧсас, вошліс кывйыс. Сэсся пондіс шуавны шӧйӧвошӧмӧн:

— Но стерво!.. Но сволочь!.. — Вывті ёна скӧрмӧм дырйи Пантелеймон Михайловичлӧн век медводз петалісны тайӧ мисьтӧм кывъясыс. — Сёйин тай ловъя вылысь!.. Сы мында деньга сетала да, век на али мый оз тырмы ад горшлы?!

Горзӧм шыӧ локтіс Валерьянлӧн мамыс, гырысь черлыяса, паськыд чужӧма, пӧв кодь косньӧд тушаа нывбаба.

— Господи, мый нӧ сэтшӧма горзанныд? Мый нин бара лои?

— Позо-ор! Со мый лои! — горӧдіс верӧсыс. Тшӧг чужӧм вылас сылӧн лоӧма мырдысьӧн пычкӧм вужынь-вежыня нюм. — Грабитны петӧма!.. Кылан? Грабитны петӧма муса пиным... Кутӧмаӧсь... — Пантелеймон Михайлович сьӧлӧм дойысла ымӧстіс, ляскысис чужӧмнас стен бердӧ да шӧйӧвошӧмӧн пондіс вартны-кучкавны стенас.

— Ой!.. Ой, караул... — пи вылас синъяссӧ арыштӧмӧн Кызродева-мам пондіс бӧрыньтчыны. — Абу жӧ ӧд збыль тайӧ, Валер?.. — кевмысяна юаліс сійӧ. — Тэ ӧд нарошнӧ шуин? Да ӧд?

— Збыль, мама...

Мамыс кыкнан кинас кутчысис морӧсас да кыдзкӧ коньӧр моз лябис-пуксис крӧвать вылӧ.

— Ой, Валер, начкин тай тэ менӧ, — шуаліс сійӧ сьӧкыда лолалігтыр. — Ой, кула...

— Звер! Морт сёйысь! — друг горӧдіс батьыс да гӧрддзалӧм кулакъясӧн уськӧдчис Валерьян вылӧ. Но мӧдыс, быттьӧ абу и доймылӧма, шурк босьтіс пызан вылысь кузь воропа мӧлӧтсӧ да лӧня шуис сибдӧм гӧлӧснас:

— Папа, матыстчан кӧ, сӧта... Меным ӧні всё равно...

Пантелеймон Михайлович падмис, гӧгӧрвотӧма сувтӧдіс пи вылас шӧйӧвошӧм посньыдик синъяссӧ. Сылы ньӧжйӧ воисны вежӧрӧдзыс пиыслӧн татшӧм кывъясыс.

— Пасибӧ, дона пи... — медбӧрын шуис сійӧ ёна мудзӧм морт моз. — Пасибӧ бур кыв вылад... Кылан, Павла?.. Кылан, кыдзи сёрнитӧ муса пиыд миян?

Мӧдыс ойзіс.

А Валерьянлӧн друг ыпнитіс пӧсь лӧглун бать-мам вылас. Сылы кажитчис, мый бать-мамыс ёнджыкасӧ ойзӧны не сы понда, Валерьян понда, а ас понданыс. Торйӧн нин батьыс. Ӧд друг татшӧмтор кывсяс: этатшӧм батьлӧн пӧ пи петӧма да грабитӧ...

Кор тайӧ мӧвпъясыс воисны Валерьян юрӧ, сійӧ шуис аслыс: «Часлы, ме тайӧ струна вылас и кута личкавны».

— Висьтав, мый нӧ кӧть лои? — сайкалыштӧм бӧрын юаліс Пантелеймон Михайлович.

— Нинӧм торъясӧ... Пукалім ресторанын, юим... кыдзи и пыр, эз тырмышт... Деньга некодлӧн эз коль... Нывъясӧс колим сэтчӧ, а ми, зонъяс, мунім... «удждысьны». Ныв дінӧ матыстчылім... Но кутіс горзыны... Горзӧм шыас кыськӧ уськӧдчис заводса зон... Пусь-пасьвӧчис ставнымӧс... Нёльнаннымӧс...

— Ӧтнас? — чуймӧмӧн юаліс бать, кодлӧн сійӧ здукас весиг вунліс пи вылас лӧгалӧмыс.

— Да-а... Пышйисны мукӧдыс да, эновтісны гадъяс!

— И тэнӧ тӧдӧ сійӧ мортыс?

— Тӧдӧ... Паспортӧс босьтіс да...

— Босьтіс да! — мучитчӧмӧн нерыштіс Пантелеймон Михайлович. Ымӧстіс: — Ы-ы-ы... — Сэсся друг бара пузис: — Чӧрту! Ӧні жӧ весась менам керкаысь! Мед кок пӧлыд эз вӧв тані!.. Кылан, пеж лов?! Кылан али он тэ, змей?!

Пантелеймон Михайлович эз кут вермыны асьсӧ кутны. Сійӧ горзіс мый вынсьыс, горзігас сьӧласис, зымкнитліс кокнас, лёкысь кутчысьліс кыкнан кинас юрас, пыдісянь ойзіс. Тайӧн сійӧ дзикӧдз повзьӧдіс гӧтырсӧ. Павла Васильевна первойсӧ виччысьтӧмысла весьӧпӧрліс, но сэсся, верӧссьыс нэмӧвӧйся полӧмсӧ венӧмӧн, матыстчис сы дінӧ.

— Паня, мый тэкӧд? Паня, чӧв вай... Паня, бурӧн думыштны колӧ... Тадзинад начканныд ӧта-мӧднытӧ... Паня...

— Ланьт! — горш тырнас горӧдіс мӧдыс да вынысь ӧвтыштіс кыз сойнас. Ӧні сійӧ медъёнасӧ, буракӧ, скӧраліс сыысь, мый оз лысьт матыстчыны пи дорас. Оз вермы кыдзи колӧ пӧвсавны сійӧс. Ӧні Пантелеймон Михайлович ачыс аслыс кажитчис му вылас медся шудтӧм мортӧн.

Павла Васильевналӧн ёна нервничайтӧмысла гораа зяткакылісны пиньясыс, но сійӧ сатш кутчысис верӧсыслы веськыд сояс.

— Паня, кӧть ви, ог лэдз!.. Паня, мый нӧ тэ вӧчан? — лӧвтіс-шуаліс коньӧр нывбаба.

Валерьян первойысь на аддзис, мед эськӧ кывтӧм пемӧс кодь мамыс тадзи лысьтіс сибӧдчыны батьыс дінӧ, и сы сьӧлӧмын вӧрзис мамыс дінӧ ӧнӧдз тӧдлытӧм чувство — кутшӧмкӧ жальлун да нӧшта на мыйкӧ. И сійӧ чорыда шуис:

— Вӧрзьӧдан кӧ мамӧс, кульышта мӧлӧтнас! Сідзи и тӧд!.. — И сылӧн синъяс серти батьыс гӧгӧрвоис, мый пиыс и збыль вермас тайӧс вӧчны.

Кор медбӧрын мыйкӧ мында лӧньыштісны, Валерьян шуис:

— Ладнӧ, ме муна гортысь. Но, чайтанныд, тіянлы таысь кокньыдджык лоас? Но, менӧ пуксьӧдасны. А йӧзыс кутасны чуньнаныс индавны: со пӧ, бур семья лыддьыссьӧ. Батьыс пӧ милицияын уджалӧ, йӧзӧс мыждӧ, а ӧтка писӧ пӧ, буракӧ, тшыгйӧн видзӧ. Петӧма пӧ да йӧзлысь деньга мырддялӧ.

— Ой, морт сёйысь! — бара ымӧстіс Пантелеймон Михайлович. — Кор нӧ ме тэныд мый жалитлі?

— Йӧзыдлы веськодь. Найӧ кутасны думайтны сідзи, кыдзи налы кажитчӧджык, — пыр ӧтилаӧ синіс Валерьян.

— Мый нӧ вӧчны? Мый нӧ вӧчны? — Пантелеймон Михайлович став аслас ыджыд, топыд яя тушанас вӧлі сэтшӧм коньӧр кодь, мый весиг Валерьян шӧйӧвошис. Сійӧ шыбитіс кисьыс мӧлӧтсӧ, ӧддзӧдчӧмӧн уськӧдчис пидзӧс вылас да сывйыштіс батьыслысь кокъяссӧ.

— Папа, эн эновт, эн эновт! — шуаліс сійӧ бӧрдігтыр. — Судитасны ӧд. Тюрмаад ӧд, ачыд тӧдан, дзикӧдз верма тшыксьыны. Пап, ветлы ныв дінас. Тэ ӧд кужан, кыдзи колӧ вӧчны.

— Ветлы, Паня! — сыркъяліс-бӧрдіс и гӧтырыс.

Пантелеймон Михайловичлӧн кӧтасисны синъясыс. Сійӧ шыльӧдіс пиыслысь сук юрсисӧ да меліа думыштіс: «Кутшӧм мича сылӧн юрсиыс. Том дырйи менам татшӧм жӧ вӧлі».

Кызродевъяс сэсся эз нин вермыны унмовсьлыны. Шогӧ усьӧм Пантелеймон Михайлович пырис аслас жырйӧ, пласьт водіс крӧвать вылас да муртса эз бӧрддзы сьӧлӧм дойысла да забеднӧысла.

«Этатшӧмтор ӧмӧй ме виччыси ӧтка писянь?! Янӧдіс тай дзикӧдз пӧрысьӧ-нэмӧ! И не сӧмын янӧдіс — лёкысь сконйыштіс сійӧ менӧ...»

Пантелеймон Михайлович думнас аддзӧ, кыдзи тайӧ мисьтӧм юӧрыс воас министерствоӧдз. Ӧткымынӧн, дерт, наяна шпыньмунасны. А ёсь кывъя Петухов, гашкӧ, и шуас: «Ме тай нӧ тэнӧ чайтлі Дзержинскӧйӧн, а тэ ӧти питӧ он вермы быдтыны!»

«Ок-ок-ок!» — ымӧстӧ тайӧ думсьыс Пантелеймон Михайлович. Сійӧ тӧдӧ, ӧткымын сотрудникъяс ӧтдортчӧны сы дінысь, ас кежаныс шмонитӧны сы вылын. Но тшӧтш и полӧны. Сы вӧсна мый сійӧ, Кызродев, ӧкуратнӧй морт, некор оз торкав удж дисциплина и мукӧдлы оз лэдз тайӧс вӧчны. Та вӧсна, дерт, ковмылӧ корсюрӧ и юӧртавлыны ӧттор-мӧдтор йылысь ыджыдджык начальникъяслы.

А эз кӧ вӧв ӧкуратнӧйӧн, гашкӧ, важӧн нин отставкаӧ ковмис петны. Ӧд сійӧ институтъяс эз помавлы, мортлысь психология эз велӧдлы и, дерт, преступлениеястӧ сылы сьӧкыдджык восьтыны ёна велӧдчӧмаяс дорысь.

Тайӧ думъяссьыс Пантелеймон Михайлович ышловзьӧ: «Пӧжалуй, колонияын уджавны кокньыдджык вӧлі, кӧть эськӧ сэні быд пӧлӧс уркаыс пукаліс».

Гашкӧ, эз и ков вуджны карас? Дась велалӧм сайын оліс и оліс эськӧ пенсияӧдз...

Не пиыс кӧ, гашкӧ, эз и вудж: окота вӧлі сійӧс овмӧдны культурнӧйджыкинын, карын, мед театръясӧ ветлӧдліс, мед тӧлкаджыкӧн лои. Мед унджык велӧдчис.

А со тай — лои! Со тай — велӧдчис! Мыйла нӧ сійӧ татшӧм быдмӧ? Лысьтліс ӧмӧй думыштлыны сійӧ, мый сылӧн пи татшӧмтор вылӧ петас!

Сэсся та йылысь висьталасны министрлы... Пантелеймон Михайлович весиг сыркнитчылӧ тайӧ думсьыс. «Толькӧ не тайӧ! Толькӧ не тайӧ!» — повзьӧмӧн водзсасьӧ сылӧн лолыс. Но вежӧрыс быттьӧ кылӧ нин министрлысь гӧлӧссӧ:

«Мый нӧ тайӧ, майор Кызродев? А ми тэнӧ кӧсйылім вӧчны подполковникӧн?»

А мый? Кад нин и вӧчны — дас во майоралӧ. Сылӧн тшӧтшъяясыс полковникъясӧн нин пӧкаживайтӧны... Дерт, сійӧ академия эз помав, но ӧд полковниктӧ позьӧ академиятӧг на сетны... Заочнӧя средньӧй школа помаліс, быдса вит во ветлӧдліс.

И со, ставыс дзугсис! Кывсяс кӧ министерствоӧдз — пом!

— Сӧмын не тайӧ! Сӧмын не тайӧ! — горӧдӧ Пантелеймон Михайлович да чеччыштӧ крӧвать вывсьыс. — Колӧ быть ветлыны ныв ордас, кевмысьны, деньга сетны... Мед толькӧ оз явит милициялы.

Тайӧ думнас ышмӧдӧм Пантелеймон Михайлович вына тӧв ныр моз бӧр пырис пиыслӧн жырйӧ. Кӧсйис пырысь-пыр жӧ висьтавны аслас план йылысь, но сэтчӧс серпасыс падмӧдыштіс сійӧс.

Валерьян пукаліс койка вылас дӧрӧмтӧм, а мамыс аслас приданӧй, мичаа вышивайтӧм помъяса зэв кузь ки чышкӧдӧн зэлыда кардъяліс-гартліс сылысь морӧссӧ.

— Буракӧ, гыркас мыйкӧ вӧрзьӧма, — тӧждысяна шуис гӧтырыс. — Лолыштны лючки оз вермы зонкаыс.

— Такоскӧй эськӧ да! — эз нин сэтшӧм скӧрысь шу Пантелеймон Михайлович. — Сэсся виччысьтӧг мӧвпыштіс: «А экспертиза вылӧ кӧ нулыны, мыйкӧ отсалас оз? Позяс-ӧ чинтыштны мыжсӧ, лоӧ кӧ нӧйтӧм йывсьыс справка? Ӧдвакӧ. Пондасны ещӧ юасьны: кӧні да мыйла тадзисӧ лои?»

— Колӧ аски жӧ ветлыны нылыс дінӧ! — шуис Пантелеймон Михайлович. — Тӧдан он тэ сійӧс?

— Гашкӧ, бурджык заводса дінас ветлыны, — лӧня шуис Валерьян. — Паспортӧй сы ордын...

— Паспортӧй, паспортӧй... Код лешак вылас кыскалан паспортсӧ?! — Пантелеймон Михайлович бара кутіс пузьыны. — Главнӧйыс — нылыс. А код пӧ сійӧ сэтшӧмыс?

— Редакцияын уджалысьӧн висьтасис... — нурбыльтіс Валерьян.

— Да тэ мый? Збыль али мый?! — бара на весьӧпӧрис батьыс.

— Сідз тай шуис-а... Буракӧ, Уродоваӧн ли Туробоваӧн шусис...

— Ой-ой-ой! Ой-ой-ой! Мый нӧ тэ керин?! Тэ нӧ йӧй али мый, сэтшӧм йӧз вылӧ усьласян?!

— Мыйӧн нӧ ме тӧді. Пемыдінад ставыс ӧткодьӧсь...

— Ой-ой-ой! Ой-ой-ой! Вот и помаліс! Сё пасибӧ, муса пи! — Пантелеймон Михайлович вылӧ жаль вӧлі видзӧднысӧ — сэтшӧма сійӧ вийсис-мучитчис. Да и, сідз кӧ нин шуны, код эськӧ эз мучитчы, вӧлі кӧ сы местаын.

Гӧтырыс, Павла Васильевна, шогсис-майшасис сыысь не омӧльджыка, но ыджыд шогсӧ да дойсӧ сійӧ сотіс ас пытшкас, ортсыӧ петкӧдтӧг. И та вӧсна сылы, гашкӧ и, сьӧкыдджык на вӧлі.


Нёльӧд глава


Удж вылӧ воысь Света муртса на удитіс пӧрччысьны да кыпӧдчыны аслас судтаӧ, паныдасьысь ныв шуис:

— Света, тэ дорӧ воисны! Кутшӧмкӧ военнӧй. Гашкӧ и, генерал, зэв тай ыджыд да ён-а.

Коридор кузя аслас отделлань восьлалігӧн ныв зілис думсьыс уськӧдны тӧд вылас, кутшӧм военнӧйлы да мыйла сійӧ ковмис, но некутшӧм помка эз сюр сылы. Комнатаын нывлы паныд сувтіс ыджыд тушаа, тыр вир-яя чужӧма, дзирдалысь куш юра, милиция формаа майор; вына еджыд киясас сійӧ шызьӧмӧн — тадзи кажитчис Светалы — гартіс-бергӧдліс гӧрд дорӧса да дзирдалысь лэбула картузсӧ.

— Видза оланныд, — чуймӧмсӧ ӧлӧдны зілигтыр шуис Света. — Ті менӧ юалінныд?

— Ті Туробова ёрт? Светлана Николаевна? — майор шемӧсмӧмӧн видзӧдліс тӧлка чужӧма, лӧсьыд статя Света вылӧ да мучитчанаа думайтіс: «Этатшӧм ныв вылӧ колӧ жӧ уськӧдчыны! Кӧинъяс, а абу йӧз!»

— Да, ме Туробова. — Ныв яндысьыштіс ыдждӧдлӧмысь, кыйкнитліс синъяснас налань видзӧдысь сотрудникъяс вылӧ.

— Извинитӧй, ме, гашкӧ, торка тіянӧс кутшӧмкӧ зэв колана уджысь.

— Онӧй, онӧй! — нӧшта ёна яндысьыштіс Света. — Ме кывза тіянӧс.

— Кхы... — кызӧктыштіс майор да тшӧтш видзӧдліс гӧгӧр. — Ме кӧсйи... Менам тіян дінӧ ӧти сёрни эм... Позьӧ кӧ эськӧ, ас кежаным сёрнитыштны, — и мыжа морт моз бара видзӧдліс гӧгӧр.

— Мыйла нӧ оз позь, — шуис Света; сійӧ вӧлі чуймӧма и ёна яндысис, мый тайӧ ыджыд тушаа олӧма майорыс тадзи сёрнитӧ сыкӧд: быттьӧ аслас начальствокӧд. — Пӧжалуйста, коридор помын миян эм комната, сэні некод абу.

Кор найӧ воча пуксисны пызан сайӧ, майор, гырысь еджыд чуньяснас картузсӧ песігтыр, ӧнтая моз жӧ джӧмданаа шуис:

— Овӧй менам Кызродев... Пантелеймон Михайлович.

— Зэв рад тӧдмасьны, Пантелеймон Михайлович, — вочавидзис Света.

— Д-да... Ме вои тіян дінӧ... — Пантелеймон Михайлович кӧсйис нин панны колана сёрнисӧ, но сійӧ здукас казяліс Света голяысь гӧрдов визьяс и бӧр уси сьӧлӧмнас: «Буракӧ, шпана чукӧрыс парсалӧмаӧсь!..»

— Ме кывза тіянӧс, Пантелеймон Михайлович, — сьӧлӧмсяньыс шуис Света.

— Кхы... Меным зэв сьӧкыд, Светлана Николаевна. Зэв яндзим меным. Менам пиӧй... Менам быдтасӧй... Кольӧм войӧ тіян вылӧ уськӧдчылӧма... гр... деньга мырддьыны.

— Тіян пиныд?! — чуймӧмысла Света быдсӧн кыпӧдчис улӧс вывсьыс. Сійӧ здукас кӧ эськӧ комнатаӧ пырис мӧдар югыдысь воӧм морт, то ныв, буракӧ, ёнджыкасӧ эз нин чуймы.

— Дивӧ кӧть абу, менам пиӧй, — сьӧкыда ышловзис Пантелеймон Михайлович; сійӧ думсьыс зілис тӧдмавны Светалӧн вежсьӧм чужӧм серти, кодарланьӧ вӧрзис нывлӧн сьӧлӧмыс.

— Кодіджык нӧ тіян пиныд? Сэні унаӧн вӧліны. — Светалӧн кузьмӧскодь авъя чужӧмыс зэлаліс. «Со тай, вӧлӧм, мый вӧсна сійӧ татшӧма пыдди пуктӧ менӧ!»

— Валерьян... — зывӧка моз шуис майор. — Паспортсӧ тай ещӧ сетӧма... — шуис и бара думыштіс: «Колӧ жӧ этатшӧм ныв вылӧ уськӧдчыны! Татшӧм нывъяссӧ колӧ шамравны, чӧсмасьны наӧн, а не грабитны».

— Ак, Валерья-ан! — наяна нюжӧдіс Света. — Ті, гашкӧ, онӧ вердлӧй сійӧс? Тшыг ветлӧдлӧ карса уличаясӧд?

— Мый ті, мый ті, Светлана Николаевна! — садьтӧгыс повзис нывлӧн татшӧм думысь майор. — Барин моз олӧ! Ӧтка сійӧ миян. Керка асланым, мӧс на век видзим. Йӧлыд и яйыд мыйта колӧ. Сы ради карӧ локті овны — водзті колонияясын уджавлі. Мед сӧмын сылы бурджыка овсис. Мед культурнӧй мортӧн быдмис...

Скӧрмыштны заводитлӧм Светаӧс вӧрзьӧдіс пикӧ воӧм мортлӧн тайӧ пӧся, кыдзсюрӧ висьтасьӧмыс. «Кӧнкӧ, сійӧ синсӧ эз куньлы, виччысис, кор нин локтас асылыс, мед ӧдйӧджык котӧртны ме дорӧ», — думыштіс ныв.

— Менӧ ті дзикӧдз чуймӧдінныд, Пантелеймон Михайлович. Ме ог и куж, мый колӧ татчӧ шуны.

— Найӧ дойдалісны тіянӧс Светлана Николаевна?

— Мый эськӧ ёнасӧ да, — ныв ас тӧдлытӧгыс малыштіс голясӧ, сэсся мӧвпыс тӧдлытӧг вежӧртіс Кимӧс. И шуис:

— Мукӧдъяслы ёнджыка дӧнзис. Но век жӧ вир-яй дойыд сійӧ регыд бурдӧ. А вот сьӧлӧмӧй ёна доймис! Сьӧлӧмӧй вирӧн ойдӧма татшӧмторсьыд! Ӧні, тіянкӧд сёрнитӧм бӧрын, ещӧ ёнджыка ойдіс. Ещӧ ёнджыка матӧ воис. Кыдз нӧ сідз, Пантелеймон Михайлович, тіян пиныд, сӧветскӧй офицерлӧн пи, петӧма грабитны! Кыдз нӧ тайӧс позьӧ гӧгӧрвоны! Висьталӧй меным, мыйла тадзсӧ артмӧ? И позьӧ-ӧ татшӧмторйыскӧд миритчыны?!

— Сідзкӧ, ті судитчыны мӧданныд? — усис сьӧлӧмнас майор.

— Да судитчӧмын ӧмӧй делӧыс! — скӧрмыштіс Света. — Делӧыс ӧд абу сыын, дона Пантелеймон Михайлович, дзик абу сыын. — Света кузя видзӧдліс майорлӧн ыджыд надеяӧн воча видзӧдысь синъясӧ да думыштіс: «Буракӧ, талы ӧні весьшӧрӧ лоӧны став сёрниясыс. Сійӧс ӧні песӧ сӧмын ӧтитор: судитчыны али не... Но век жӧ, мыйла сылӧн пиыс сэтшӧм? Кыдзи сійӧ лоис сэтшӧмнас?»

— Пантелеймон Михайлович, — друг кыпыда шуис Света. — А позьӧ-ӧ эськӧ волыны тіянӧ? Бурджыка тӧдмасьны Валерьяныдкӧд? Тіянкӧд тшӧтш и?

— Пӧжалуйста! — чужӧм тырнас нюмдіс майор. — Кӧть тарыт жӧ! Сэтшӧм радӧсь ми лоам! Став сьӧлӧмсянь. Ті, буракӧ, зэв бур морт, Светлана Николаевна.

— Тарыт жӧ и вола! — зэв збыльысь кӧсйысис Света.

Редакцияысь петігӧн Пантелеймон Михайловичлӧн тыр вир-яя ыджыд чужӧмыс вӧлі тӧдчымӧн югдӧма-личалӧма.


Витӧд глава


Батьыс мунӧм бӧрын Валерьян куйліс вольпась вылас час-мӧд, думсьыс виччысис, оз-ӧ кодкӧ лок другъяс пӧвстсьыс, но некод эз тэрмась сы ордӧ. «Стервоясыд, тӧрӧканъяс моз дзебсисны щелльӧ да чайтӧны, мый оз аддзыны найӧс сэтысь! Сэн кӧсйӧны коллявны гым-грӧзсӧ! А, гашкӧ, чайтӧны, мый ме эг жӧ сюр? Ӧдвакӧ. Сідз кӧ вӧлі, кодкӧ эськӧ пыраліс нин. А, гашкӧ, чайтӧны, мый ме кӧ ӧтнам сюри, ӧтнам и кута кывкутны? Тӧрыт эновтісны и ӧні кӧсйӧны ӧтдортчыны? Быттьӧ ме ӧтнам вӧлі?»

Тайӧ думъяссьыс Валерьян яра мурчнитіс пиньяснас да заводитліс чеччыны койка вывсьыс. Но морӧсыс сэтшӧма чунӧбтіс-доймис, мый коньӧр моз ымӧстсис да лои ньӧжйӧникӧн бӧр водны.

Но куйлыны вольпасьын сійӧ эз жӧ нин вермы, сы вӧсна мый быд пӧлӧс мӧвпъяс доналӧм кӧрт моз дугдывтӧг дзижалісны сійӧс. «Гашкӧ, нылыс да заводсаыс менам паспортӧн буретш милицияын пукалӧны? Гашкӧ, папа эз нин су нывсӧ редакцияас?»

Век жӧ Валерьян зэв видзчысьӧмӧн ки чышкӧдӧн кардъялӧм морӧссӧ кинас кутышталігтыр, чеччис да заводитіс пасьтасьны. Мамыс некӧн эз кыв гортас. Валерьян гижыштіс записка, мый недыр кежлӧ ветлас ёртъяс ордас, да петіс ывлаӧ. Сэні вӧлі ульдӧма, весиг буситыштіс зэр, вевт вылысь чукталісны да гылалісны югыд йинёньяс, азыма вияліс войтва.

«Бара тулыс матысмӧ, — ловзьыштліс Валерьян. Но доймысь морӧсыс пырысь-пыр жӧ тшӧктіс вежны думсӧ. — Гашкӧ, таво тулыс вылад ковмас видзӧдны решёткаа ӧшинь сайсянь?» Сэсся шогӧ усьӧм вежӧрыс быттьӧ нарошнӧ мыччӧдліс кольӧм тулысся серпасъяс, кор найӧ, быдса койташ, куим пара, кык лун да вой олісны кык палаткаын Эжва дорын. Мыйта вина лои юӧма! Мыйта окасьӧма вежӧдны заводитӧм луд вылын!

Таво вӧлі кӧсйӧ жӧ кайлыны, сӧмын ӧні муніс эськӧ Маринакӧд. «Ок и пӧсь, курваыд! Ӧддзас да, сідзи эськӧ и сёяс-курччалас. Интереснӧ, дыр-ӧ тӧрыт виччысисны найӧ миянӧс? Кӧнкӧ, чушнитісны-скӧрмисны. Ничево, бурмас, ӧти-мӧдлаті гильӧдыштан да. Абу таысь шогыс!» «А мый эськӧ шуас Марӧыс, висьтала кӧ сылы, кыдзи сьӧмсӧ кӧсйим судзӧдны? Ещӧ на паськӧдас, буракӧ, чашка пасьта синъяссӧ. А, гашкӧ, сійӧ тӧдӧ? Сӧмын оз кӧсйы петкӧдлыны, мый тӧдӧ?»

Валерьян восьлаліс зэв ньӧжйӧ, коксӧ пуктыліс небыда, мед нин оз зӧркнитчы вӧрзьӧм гырк пытшкӧсыс; а чужӧмсӧ зілис вӧчны сэтшӧмӧн, мед эськӧ йӧзыс чайтісны, мый сійӧ талун дзик некытчӧ оз тэрмась, мый нинӧм вӧчӧм могысь петӧма нимкодясьыштны гажа луннас. А юаласны кӧ: «Мыйла абу автошколаын?» — висьталас, мый висьыштӧ. Ӧти пӧдруга медсестраӧн уджалӧ — бюллетеньтӧ куим лун кежлад кыдзкӧ-мыйкӧ судзӧдас больничаӧ ветлытӧг. Таысь абу жӧ шогыс.

Со этайӧ керка дінас — сэки сійӧ вӧлі стрӧитсьӧ на — найӧ коркӧ кокньӧдісны ӧти дядьӧӧс. Дядьӧыс садьтӧм код нин вӧлі, а ещӧ на куим доз вина ньӧбис магазинысь.

«Мырддям винасӧ!» — шуис сэки Габӧ.

«Ог мырддьӧй, а спаситам мортсӧ, — шуис Марс. — Сійӧ зэв нин код, и нӧшта кӧ юас, вермас дзикӧдз сотчыны либӧ мыйкӧ лёктор вӧчны. Гӧтырсӧ пӧвсавны либӧ суседыслысь ӧдзӧссӧ пазӧдны. Вай водзвыв ӧлӧдамӧй таысь. Сылы бур лоӧ, и ми тшӧтш гажӧдчыштам».

«Артист! Юра сідзсӧ! — думайтӧ ӧні Марс йылысь Валерьян. — Мыйкӧ да мыйкӧ век нин ас ногыс мӧвпыштас...» Сэки найӧ кытшалісны дядьӧӧс да Габӧ шуис, мый он кӧ сет куимнан дозсӧ, ӧні жӧ вытрезвительӧ нуӧдам. Дядьӧ кыв шутӧг сетіс да, кӧть и код вӧлі, тӧв ныр моз уйкнитіс-пышйис.

Тайӧ вӧлі кольӧм арын. Валерьян сэки первойысь на петіс татшӧмтор вылас да ёнакодь шемӧсмис, мый сэтшӧм кокньыда да мыжтӧг ставыс артмис. «А мый? — водзӧ нуӧдіс сійӧ сэки Марсиклысь мӧвпсӧ. — Ми, гашкӧ, и збыльысь буртор вӧчим?»

Но мӧдысь татшӧм «операциясӧ» нуӧдігӧн ӧти том мужичӧй эз мыччы налы «лишнӧй» дозсӧ. Сійӧ пальс кучкис сулеясӧ керка стенӧ да сійӧ жӧ здукас чергӧдіс Гаврилӧс. Но ачыс вильдіс да тшӧтш жӧ уси. Скӧрмӧмвывсьыд нёльӧннад ёнакодь чужъялісны сэсся сійӧс. Но мортыд, кытчӧдз вермис, пыр воча чужъясис. А сэсся, буракӧ, и эз кут вермыны, лӧнис.

Сэки Валерьян ёнакодь повзьыліс: «А виим кӧ ми сійӧс? Ёна жӧ звермылӧны йӧзыд, кор тадзи ӧта-мӧд вежмӧн пурӧны кодӧскӧ».

Вежон кык сэки найӧ омӧля и петавлісны гортсьыныс. И Валерьян первойысь казяліс, мый налӧн кыйсьӧмыс абу нин дзик ворсӧм кодь вӧлӧма. Сылы кажитчис, мый мужичӧйыс первой здукнас жалитыштіс найӧс: сійӧ кӧ эськӧ эз пальснит стен бердӧ сьӧкыд бутылкасӧ — сылӧн вӧлі 850 грамма кыз дора сулея, а кульыштіс кӧ сійӧн кодлыкӧ юрас, то пырысь-пыр жӧ эськӧ мӧдар югыдӧдз мӧдӧдіс.

«Мӧдысь он кут жалитны! — мӧвпалӧ ӧні Валерьян сійӧ дядьӧ йывсьыс. — Кӧсъян кӧ тайӧ му вылас овны, мукӧдӧс немтор жалитны...» «А сідз кӧ либӧ, ӧні меным немтор жӧ милӧсьт виччысьны? — друг весьӧпӧрис Валерьян. — Ме эг жалитлы, и ӧні менӧ некод жӧ оз понды жалитны?..»

Валерьянлы окота уськӧдчыны котӧртны, ӧдйӧджык волыны куимнан другыс ордӧ да, кытчӧдз эз на кус ярлуныс, куимнанныслысь разьны ныр-вомсӧ. Но котӧртнысӧ сійӧ оз вермы, сэтшӧма доймӧ морӧсыс, торйӧн нин шуйга коксӧ лэптыштлігӧн; сійӧ мунӧ зэв ньӧжйӧ, кольмӧм чери моз. «Пӧжалуй, татшӧмнад разян! — мӧвпалӧ сэсся сійӧ шогпырысь. — Казяласны коньӧрлунтӧ да асьтӧ на лотшкӧдасны, вельмӧм понъяс моз».

Со и медбӧрын воис жӧ Марслӧн керкаыс. Вит судта, выль районын, гырысь панельясысь вӧчӧм сы кодь жӧ уна мукӧд керкаяс чукӧрын. Марс бабыскӧд татчӧ вуджисны кык во сайын, кор налысь кар шӧрын сулалысь джынвыйӧ киссьӧм пу керкасӧ разисны.

Марслӧн мамыс пӧ сьылысь вӧвлӧма, эновтлӧма верӧссӧ, кор пиыслы кык арӧс тырӧма. Мӧд пӧ сэки кажитчӧма, а сэсся пӧ и коймӧд. «Ме тай шуа, мый став бабаыс — курва!» — скӧрысь думайтӧ Валерьян. — Миян карӧ пӧ мамыс сэсся ӧтчыд и волӧма, олӧ пӧ кӧнкӧ, гажӧдӧ йӧзӧс мукӧд, лунвывсаджык каръясын. А батьыс Марслӧн вӧйлӧма код юрӧн купайтчигӧн.

Марс пыр бабыскӧд и быдмас-олас, внук пыдди и пи пыдди лоас сылы. Бабыс сідзсӧ шань морт, бухгалтерияын уджавлӧма нэмсӧ, но винатӧ радейтӧ жӧ юнытӧ; олӧмыс абу жӧ ёна юмов вӧлӧма да, дерт, кӧнкӧ, сы вӧсна.

Марсыс налӧн командаын, позьӧ шуны, комиссар пыдди, лӧсялӧ кӧ быттьӧ тані тайӧ нимыс. Сійӧ фантазёр и, буракӧ, войся «уджыс» сылы кажитчӧ сцена вылын ворсӧм кодьӧн. Тыдалӧ, мамсяньыс вуджӧма артисталан руыс. Мыйсӧ сӧмын сійӧ оз лӧсьӧдлы! Шуам, ассьыныс командасӧ, а стӧчджыка кӧ шуны, шайкасӧ, Марс нимтіс «Еджыд эдельвейсӧн». Сійӧ жӧ лӧсьӧдіс и присяга, кодӧс быть колӧ лыддьыны шайкаӧ пырысьяслы. Уна гора кывъяс лыдын сэні эмӧсь и татшӧмъяс: «Клянитча адмирал-корсар Френсис Дрейклӧн некор куслытӧм паметьӧн, мый ме кӧ коркӧ вузала ассьым ёртъясӧс, мед найӧ быд паныдасигӧн кутасны сьӧлавны меным чужӧмӧ!»

«Сідзкӧ нӧ, ме ӧтнам сюри да, збыльысь ӧтнамлы и ковмас кывкутны? — скӧраліс Валерьян. — А найӧ ставныс кольӧны сӧстӧминикӧсь?!»


Квайтӧд глава


Час нёль гӧгӧрын ӧдзӧсӧ кодкӧ тэрыба таркнитіс.

— Да-да! — горӧдіс Ким койка вывсяньыс; сійӧ водӧмӧн лыддьысис, юр увсӧ пӧдушкаясӧн да фуфайкаясӧн вылӧджык кыпӧдӧмӧн.

Воссис ӧдзӧс, и жырйӧ воськовтіс Света. Пырысь-пыр жӧ табак тшын дука сынӧдӧ разаліс чӧскыд дуки дук.

— Бур рыт! — пыригмозыс гажаа шыасис ныв.

— Бур рыт... — шӧйӧвошис Ким. Сійӧ пуктіс книгасӧ да, Света вылӧ шензьӧмӧн и яндысьӧмӧн видзӧдлывлігтыр, кутіс лӧсьӧдыштавны вывсьыс дзугсьӧм спортивнӧй костюмсӧ.

— Со ӧд кутшӧма кӧтӧдіс! — Светалӧн гырысь сера пальтолӧн ной сіяс йылын югъялісны ва войтъяс, чужӧмыс кӧтасьыштӧма и.

— Татшӧм зэрыд лунъя сӧмын, — шуис Ким. — Тулыс помсӧ сӧмын нюжӧдас. Вай ті пӧрччысьӧй, пуксьӧй.

Света гӧгӧртӧдіс синъяснас зонъяслысь оланінсӧ. Книга тыра ыджыдкодь шкап; полируйтӧм тумбочка вылын приёмник радиолаӧн, кӧлуй видзан шкап, шӧрас ыджыд зеркалӧа; выліас тыдалӧны сьӧд гантельяс да кык воропа эспандер; Геналӧн еджыд прӧстыняясӧн мичаа лӧсьӧдӧм крӧватьыс — Кимлӧн кыдзсюрӧ пузувтӧма, — джодж шӧрын паськыд ковровӧй вольӧс; порог дорын кык пудъя да пудъя гираяс, шкап сайын кык гоз лыжи.

— А лӧсьыд тіян тані, сӧстӧм и, — шуис Света.

— Генка миян бур ичмонь моз сӧстӧмлунтӧ радейтӧ, — серӧктыштіс Ким.

— Молодеч. Ӧтлаын уджаланныд?

— Да, сійӧ миян бригадир. Заводын зэв тӧдса морт.

— Мыйкӧ зэв нин пондін ошкыны сійӧс, — шуис Света и повзьыштіс: ӧд ӧнӧдз эз на «тэ» вылас сёрнитлы Кимкӧд. Гӧрдӧдыштіс таысь. Но тӧдтӧмасьнысӧ нывлы ньӧти эз вӧв окота: тӧрытъя бӧрын тайӧ мортыс кыдзкӧ зэв нин ас мортӧн кажитчис, важысянь тӧдсаӧн. Сюсьджыка видзӧдліс Ким вылӧ: казяліс-ӧ сійӧ тайӧ вежсьӧмсӧ? Но мӧдыслӧн чужӧмыс та йылысь немтор эз висьтав.

— Сэтшӧм и эм да, — шуис Ким. — Ме ог ошкы, а висьтала сӧмын, кутшӧм эм мортыс.

— Тэ нӧ лыддьысян нин? — ныв тӧждысьӧмӧн видзӧдліс Кимлӧн кӧртӧда юр вылӧ. — А позьӧ-ӧ тэныд лыддьысьнысӧ?

— Немтор кернысӧ да... Санчасьтӧ ветлі, справка сетісны: лун куимсӧ пӧ наперво куйлышт.

Света матыстчис пызан дорӧ, босьтіс Кимлысь сэтчӧ пуктӧм книгасӧ.

— Джек Лондонӧс лыддян? Кажитчӧ?

— Да-а... Челядь дырйи садьӧс вӧлі вошта сы понда. Сэсся мыйлакӧ дыр кад чӧж эз веськавлыны киӧ сылӧн книгаясыс. Ӧні со Генка кыськӧ вайӧма, да ог вермы орӧдчыны.

— Мый нӧ лыддин?

— Войвывса висьтъяссӧ. Крепыда гижӧма. И сэтшӧм вына да веськыд йӧзӧс петкӧдлӧма. Лыддян да ачыд быттьӧ вынаджыкӧн лоан. Лолыд зумыдмӧ и. Бур писатель...

— А тэ «Мартин Иденӧс» лыддин сылысь?

— Эг на.

— А тэ лыддьы, быть лыддьы! — тӧдчӧдіс Света. Сійӧ тыр синмӧн видзӧдіс зонлӧн кӧртӧда, еджыд чалмаа кодь чужӧм вылӧ и друг юрас вуджӧртіс кыськӧ кывлӧм, а гашкӧ, и аслас думыштӧм мӧвп: «Мортлӧн чужӧм — Енмӧн сетӧм пас».

А мый нӧ сылы висьталӧ тайӧ, чалмаа, пасыс? Торйӧн нин тайӧ комнатаас, кӧні эм уна книга, гираяс и со нӧшта стенын кык картина.

«Ме тӧрыт, машинаын, думышті, мый сылӧн чужӧмыс нач абу косясьысьлӧн кодь».

Ӧні таысь Светалы лои неэтша долыд: сыысь, мый мортлӧн чужӧм серти кутшӧмакӧ вермис тӧдмалыштны асьсӧ мортсӧ; сідзкӧ, сійӧ, Света, вочасӧн велалӧ жӧ гижан уджӧ, коді сэтшӧм интереснӧй и сьӧкыд.

— Тіян нӧ заводад унаӧн тадзи чукӧртӧны книгаяссӧ?

— Унаӧн. Мукӧдыс ёна лыддьысьӧны. Да и быть лыддьысь — унджыкыс велӧдчӧны рытъя школаясын да институтъясын.

— А тэ?

— Ме ветлӧдла жӧ десятӧйӧ. Таво кыдзкӧ-мыйкӧ помавны колӧ.

— Абу сьӧкыд уджавны и велӧдчыны?

— Кор он дышӧдчы — абу. Быттьӧ сідзи и колӧ, велалӧмвывсьыд... А вот кор кежан туй воргасьыд, сэки дышӧдлӧ. Сэки мырдӧнавны ковмылӧ асьтӧ. Дугдыны зэв окота лолӧ.

— Мыйла нӧ, дугдыны оз ков! — сьӧлӧмсяньыс шуис ныв.

— Оз эськӧ да... Сӧмын тай олӧмас зэв нин уна ылӧдчанторйыс эм, — серӧктіс Ким.

И Светалы сьӧлӧм вылас воис, мый тайӧ, буракӧ, восьса сьӧлӧма зонмыс оз зіль кажитчыны сы водзын бурджыкӧн да сӧстӧмджыкӧн сыысь, кутшӧм эм збыль вылас.

— А тайӧ красавицаыс нӧ мыйла нин ваас пыралӧма? — юаліс ныв, кодлӧн видзӧдласыс уна пӧрйӧ нин мытшасьліс Ким крӧвать весьтын ӧшалысь ыджыд картинаӧ.

— Купайтчыны кӧ-а, — нюммуніс зон. — А гашкӧ, и сійӧ ваын олысь, шонді водзас петӧма шонтысьыштны.

— Коді нӧ рисуйтіс?

— Ме эськӧ да... Шыбитны колӧ. — Кимлы друг лои зэв яндзим. Весиг майшасьӧмӧн думыштіс: «Асланым нывъяс тай нӧ кымынысь нин волісны, а некор эз вӧвлы яндзим».

— Мыйла нӧ шыбитны?

— А мый нӧ, пасьтӧм да...

Света сьӧлӧмсяньыс серӧктіс.

— Код нӧ эськӧ татшӧм натурщицаыс вӧлі?

Ким вильыша видзӧдліс ныв вылӧ, смелмӧдчис да шуис:

— Аслам гажтӧмтчысь сьӧлӧмӧй... Зонъясыд ӧд неэтша мечтайтӧны русалкаяс йывсьыд.

— Интереснӧ... А кор нӧ эськӧ тэ велавлін рисуйтчынысӧ?

— А-а, тайӧ ӧмӧй рисуйтчӧм! — Ким ӧвтыштіс кинас. — Лякӧм омӧлик...

— Но, а век жӧ?

— Детдомын олігӧн. Директорным миян ёна бур морт вӧвлі, и быдтор сяммысь. Сійӧ велӧдліс, лӧсьыда вӧлі рисуйтчӧ. Книгаяс лыддьыны сійӧ жӧ ыззьӧдліс и, пасибӧ сылы... — Ким ышловзис. — Но кытчӧкӧ сэсся нуӧдісны морттӧ миянысь.

— Жа-аль... — зэв збыльысь шуис Света русалкаӧс выльысь видзӧдалігтыр. — Сэсся эн и заводитлы збыльысьсӧ велӧдчыны? Рисуйтчынысӧ?

— Эг. Сідз-тадз дурыштла, кор абу дыш.

— Жа-аль, — бара на шуис Света. — А тэ нӧ мый — детдомын быдмылін?

— Сэні, — дженьыдика шуис Ким. И мед сэсся ӧлӧдны нывлысь та кузя водзӧ юасьӧмъяссӧ, содтіс: — Батьӧ усис война вылын, а мамӧй война бӧрын нин висьмис да кувсис. Ми, кык вок, кольлім шег кодьӧсь. Ичӧт вокӧс тьӧтка босьтіс ас ордас, а менӧ нуӧдісны детдомӧ.

«Нӧшта ӧти трагическӧй судьба, — шогалӧ Кимӧс кывзысь Света. — Кытчӧ он видзӧдлы, быдлаын войнаӧн дойдӧм йӧз».

— Ким, а тэ помнитан батьтӧ? Сӧмын эн дивит менӧ татшӧм юасьӧмсьыс...

— Ог помнит. Сорок четвёртӧйын волӧма гортӧ, госпитальсянь, тӧлысь олӧма. А ме немтор ог помнит, куим арӧсыс на меным сэки эз вӧв. Война помасян вонас сэсся и вокӧй чужис, ас пыддиыс батьӧ колис...

— Уна на му вылад шогыд, — ышловзис Света.

— Уна, — ӧтикывъясис Ким.

— А татчӧ, заводас, кыдзи веськалін?

— Кӧнкӧ ӧд колӧ уджавны! — быттьӧ эз и вӧвлы нормылӧмыс, кыпыда шуис Ким. — Армия бӧрын ме вӧрын пӧрӧдчи. А велӧдчыны окота вӧлі. Лесопунктын жӧ рытъя школа абу. Ӧтнам заводитлі, учебникъяс ньӧбалі, но регыдӧн ылалі. Мися, кытчӧдз абу на сёр, вай жӧ ме пета карӧ. И вои. Нӧшта ӧти морт вылӧ соді кар завоюйтысьяслӧн лыдыс. — Ким серӧктыштіс.

— Завоюйтысьяслӧн?

— А мый нӧ! Кӧнкӧ ӧд сиктсяньыд не ӧти том морт воӧ карад татшӧм наполеоновскӧй планъясӧн.

— Интереснӧ! — ӧні нин серӧктіс Света. — Но и кыдз? Завоюйтін?

— Удж вылӧ ог норась. Велӧдча со. Бур ёртъяскӧд Енмыс тӧдмӧдіс. Мый сэсся колӧ? Менам, буракӧ, шуда на вӧвсьӧма.

И Ким бара серӧктыштіс, сэк кості вомас сяргысьлісны шыльыда да топыда пуксьӧм поснидик еджыд пиньясыс.

«Шуда и эм, — шоныда думыштіс ныв. — Дерт, кӧнкӧ, ыджыд шуд — быдмыны батьтӧг-мамтӧг». Сэсся юаліс:

— А вокыд нӧ ӧні кӧні?

— Армияын на, сверхсрочнӧя куим во кежлӧ кольччӧма. Гашкӧ, оз и лок татчӧ...

— Мыйлакӧ?

— Велӧдчӧ жӧ да... Сійӧ миян серьёзнӧй морт, абу ме кодь тырлы-бырлы. Дас кӧкъямыс арӧсӧн пырӧма партияӧ. Вовсю пӧ парторгалӧ батальонас.

— Видзӧд со! — пӧся шуис Света. Нылӧс виччысьтӧг шымыртіс пӧсь норлун. И ачыс эз тӧд, мыйысь. Гашкӧ, сыысь, мый Кимлӧн кывъясысь казяліс сирӧтаӧн кольӧм ичӧт вок вӧснаыс лов тырнас нимкодясьӧмсӧ?

Мед дзебны нормыштӧм чужӧмсӧ Кимысь, Света бергӧдчыштіс да дыркодь выльысь видзӧдіс ваысь петӧм шыльыд вир-яя русалка вылӧ.

— Ме тэнӧ чистӧ мучиті аслам юасьӧмӧн, — шуис ныв здук мысти. — Кӧнкӧ, чайтан: воис пӧ да, оз и мун сэсся!

— Мый тэ, Света? — быдӧн повзьыштіс Ким. — Ӧтнамлы меным сэтшӧм гажтӧм вӧлі.

— Вай сэсся бӧр вод. Сӧмын этшаджык лыддьысь, юр вемыд мед лӧня олыштас.

— Всё равно ӧд думайтсьӧ...

— Да, думайтсьӧ, — друг Светалы бара на окота лои юавны зонлысь ӧтитор. — Ким, кыдзи тэ чайтан, мыйла петісны сэтшӧмтор вылӧ тӧрытъя зонъясыд? А? Эз жӧ ӧд сӧмын сы вӧсна, мый бать-мамныс сетісны налы сэтшӧм сьӧлӧмъяс?

— Эз, дерт! — тэрыба шуис Ким. — Но ме найӧс ньӧти на ог тӧд.

— Ме ог жӧ. А окота тӧдны! Зэв окота! Ким, а ме ӧд мӧдӧдчи тӧрытъя зон ордад, паспортсӧ тай кодлысь босьтім.

— Да-а? — чуймис Ким. — А ме чайті, татчӧ найӧс корлыны. Гашкӧ, завод клубӧ...

— Ми корлам на найӧс, корлам! А талун ме кӧсйыси гортас волыны. Зонмыслӧн батьыс редакцияӧ пыраліс.

— Батьыс?!

— Но да! — Света сьӧлӧмсяньыс нюмъяліс. — Муртса на удиті воны, а шуӧны нин: тэнӧ пӧ кутшӧмкӧ военнӧй корсьӧ. Повзьыштлі быдӧн. И друг пондіс ыдждӧдлыны менӧ Светлана Николаевнаӧн.

— Збыль?! — долыдмис тшӧтш и Ким; сылӧн быттьӧ и жувгысь юрсьыс дойыс разалыштіс. — Сідзкӧ тай, мыйкӧ зэв лӧсьыдтор кӧсйӧ пусьыны. Час, ме либӧ пасьтася да тшӧтш ветла.

— Ким, ме чайта, тэныд оз ков ӧні мунны на ордӧ, — шуис Света аттьӧалана синъясӧн зон вылӧ видзӧдігтыр. — Ме ӧтнам ӧні ветла.

— Ӧтнад?! — Кимлӧн синъясын тӧдчис тӧждысьӧм. — А мыйкӧкертасны кӧ?..

— Мый?

— Но, повзьӧдлыны кутасны. Топӧдасны.

— Дерт, сідзи! Йӧй! Кӧсъян кӧ тӧдны, ӧні найӧ менӧ медбур гӧстяӧс моз кутасны пыдди пуктыны! Мед небзьӧдны сьӧлӧмӧс.

— Пӧжалуй, сідзи и эм. — Ким гыжйыштіс балябӧжсӧ.

— А меным тайӧ и колӧ! — вильыша сёрнитіс Света и, сылӧн сьӧд синъясыс кутісны пӧсьджыка югъявны. — Гӧгӧрвоан, Ким? Меным колӧ тӧдмавны, кыдзи найӧ олӧны-вылӧны. Тӧдмавны, кыдзи вермис лоны, мый татшӧм мортлӧн пиыс петӧма ывла вылӧ да сумкаяс мырддялӧ.

— Мед сэсся гижны та йылысь газетад?

— Ог тӧд, гижны ли абу ли. Но ачыс фактыс кутшӧм, а?

— Да.

— Сідзкӧ, ме мӧді!

Света мунӧм бӧрын Ким бара кутіс казьтывны, кытысь сійӧ водзынджык нин аддзыліс тайӧ нывсӧ. Син водзас быттьӧ зэв ясыда сулалӧ, а доймӧм юрыс оз вермы уськӧдны тӧд вылас. Но медбӧрын сайӧдысь кымӧръясыс разалісны.

Вӧлі тайӧ тӧлысь-мӧд сайын, республиканскӧй библиотека залын. Ким вӧлі лыддьӧ Бальзаклысь «Утраченные иллюзии» роман. Ыпъялысь сьӧлӧмӧн, главнӧй герой Люсьенкӧд ӧтвылысь сійӧ быттьӧ тшӧтш тӧдмасяліс Парижса красавицаяскӧд, аслас талантӧн тшӧтш шемӧсмӧдаліс лыддьысьысьясӧс да литература вӧчысь войтырӧс... Вот гижӧма! Лыддян и лолыд тӧдлытӧг бордъясьӧ, и чужӧмыд ыпъялӧ-сотчӧ.

Глава помалӧм бӧрын Ким кыпӧдліс юрсӧ, шоналӧм синъясӧн гӧгӧртӧдіс ыджыд залсӧ. Полируйтӧм пемыдгӧрд пызанъяс сайын тырыс зунясисны йӧз. Ӧтияс, Ким моз жӧ, вӧлі дзикӧдз вӧйтчӧмаӧсь лӧсьыд книгалӧн коддзӧдысь руӧ, мӧдъяс, кымӧснысӧ чукрӧдлігтыр, мый вынсьыс вермасисны книганыскӧд, мырдысьӧн тувъялісны-тӧрӧдісны юраныс сійӧс, мый коркӧ гижлӧмаӧсь ыджыд мывкыда йӧз.

Сэки пырис тайӧ нылыс. Веськыд визьясӧн сулалысь пызанъяс костӧд сійӧ веськӧдчис зал помлань — сыланьын жӧ и пукаліс Ким — да вель дыр восьлаліс, синъяснас кажитчысьджык пызан корсигтыр. Лӧсьыд книгаӧн ыззьӧдӧм Ким колльӧдіс сійӧс видзӧдласнас пырӧмсяньыс да пуксьытӧдзыс. И пуксьӧм бӧрас на синъясыс эз кӧсйыны вешйыны сы вылысь. Нывлӧн вӧлі сӧстӧм еджыд чужӧм и смоль сьӧд юрси. Юрсиыс вӧлі шыльыда да крута исковтӧ косіник пельпомъяс вылӧдзыс, сайӧдыштӧ шыльыд кымӧссӧ да кузьмӧскодь бандзибъяссӧ. Ныв чужӧм вылын быттьӧ вермасисны ӧта-мӧдныскӧд чим еджыдыс да чим сьӧдыс. И весигтӧ сылӧн синъясын муніс татшӧм жӧ вен: еджыдъясыс сэні вӧліны йӧв сӧстӧмлунаӧсь, но сы пыдди син аканьясыс югъялісны ыджыд люстра би улын пӧсь сир войтъяс моз.

Тайӧ чужӧмыс, асьсӧ бура тӧдысь мортлӧн чужӧмыс, кажитчис тшап кодьӧн, но гырысь синъяссьыс быттьӧ и сӧдзтысис бурлун.

«Кутшӧм думъяс со чужӧны тайӧ синъяс саяс-а? — мӧвпаліс сэки ныв йылысь Ким. — И кодӧс меліалӧны найӧ...»


Сизимӧд глава


Журналистлы ёна кыпыд да лӧсьыд овлӧ сэк, кор сюрӧ ыджыд тема, кор сійӧ сьӧлӧмнас кылӧ, мый тайӧ темаыс, вермас кӧ лэптыны сійӧс, уна йӧзӧс вӧрзьӧдас, а гашкӧ, и неэтша йӧзлы отсалас налӧн олӧм-вылӧмын, кыдзкӧ мӧвпыштчӧдас да садьмӧдас бур чувствояс.

Журналистлӧн олӧмын татшӧм здукъясыс — медся шудаӧсь. Сэки сылӧн сьӧлӧмыс морӧсас чеччӧ котӧртігӧн моз да вӧвлытӧм вынӧн йӧткӧ ыззьӧм вирсӧ; сэки сылӧн, бур рокӧс вылын моз, туӧ-кыпалӧ лолыс, а юрас ыпниталӧны-чужӧны уна мӧвпъяс — и сы йылысь, кыдзи эськӧ бурджыка да унджык тӧдмавны, да тайӧс вӧчигӧн не повзьӧдлыны, не кӧдзӧдны йӧзӧс; и сы йылысь, кыдзи сэсся бурджыка панны гижӧдсӧ, мыйсянь заводитны да мыйӧн помавны, мый вылӧ ёнджыка личкыштны, а мый кольны вуджӧр сайынджык да сідз водзӧ.

И век жӧ тайӧ здукъясас журналист не сӧмын медся шуда, но и медся шудтӧм морт. Шуда сы вӧсна, мый сэки сылӧн вир-яяс ловзьӧма быд сӧн, и сэки сійӧ, позьӧ шуны, медбура кылӧ олӧмыслысь пессьӧмсӧ; а шудтӧм сы понда, мый ыджыд нервнӧй удж вӧснаыс сылӧн лунын ни войын оз куслы мӧвпыс, пыр гартчӧ-сизьдысьӧ волнуйтысь тема гӧгӧрыс, и сійӧ весиг вӧтасьӧ та йылысь жӧ, кор мыйкӧ дыра кежлӧ унмовсьыштлас; татшӧмторйыд морттӧ, дерт, неэтша жӧ укшальмӧдӧ. Буракӧ, та вӧсна журналистъясыд абу зэв кузь нэмаӧсь.

Ставыс тайӧ торйӧн нин ёна лӧсялӧ томджык журналистъяслы, Света коддьӧмъяслы, кодъяс сӧмын на пырӧны тайӧ зэв интереснӧй, но и зэв сьӧкыд уджас, кодъяс и полыштӧны на тырвыйӧ лэдзны ассьыныс гӧлӧснысӧ, но налы и зэв нин окота сетны сійӧс юралысь горӧн.

Дерт жӧ, Света ставсӧ бура тӧдмалас, аддзӧдлас пансьӧм гӧрӧдыскӧд йитчӧм став йӧзсӧ, быдӧнкӧд бура сёрнитас. И сылӧн, буракӧ, чужас сьӧлӧм вӧрзьӧдана гижӧд. Ныв мӧвпалӧ, мый сійӧ петкӧдлас сэні том йӧзлысь кык котырсӧ. Найӧ олӧны ӧти карын, ӧти сынӧдӧн лолалӧны, ӧти нянь сёйӧны, а оласногъясыс ёна торъялӧны.

Мыйла тадзи артмӧ? Кутшӧмджык вынъяс веськӧдлӧны том йӧзлӧн сьӧлӧмъясӧн?

Буретш та вылӧ и видлас сійӧ вочавидзны. Дерт, оз кокни ло, опытыс этша на да. Но ӧд кор мыйкӧ сьӧкыд овлӧ вӧчны, сэки мортыс корсьӧ да аддзӧ ас пытшсьыс сэтшӧм вынъяс, кодъяс йылысь водзті некыдз эз вермы думыштлыны.

А, гашкӧ, та йылысь оз ков гижнысӧ да? Мед следовательяс гудйысьӧны лёк ног олысь йӧзлӧн дурӧмын да мудеритӧмын. А налы, журналистъяслы, олӧмас бурыс юр выв тырыс! Гашкӧ, бурсӧ сӧмын ошкыны, бур йӧз йывсьыс сьывны? Сэки и аслыд кокньыдджык лоӧ: некод нин тэнӧ оз кут дивитны, мый няйтсӧ зыръялан-путкылялан. Тэ вылӧ лӧгалысьыс некод оз ло ни: мыйла нӧ кутасны лӧгавны, кор тэ славитан-ошкан быдӧнӧс?

Света шӧйӧвошліс виччысьтӧг чужӧм думъяссьыс, мыйкӧ дыра восьлаліс дзоньнас налы сетчӧмӧн. Рытыс вӧлі лӧнь, букшасис, друг ульдылӧмыс эз на кӧсйы кынмыны. Туй бокъясын лымйыс сьӧдӧдӧма, ӧд карын мыйта тшынсӧ лэдзӧны котельнӧйяс да заводъяс, лыдтӧм машинаяс. Сквер дінті мунігӧн Света казяліс, мый пуяс вылын, гожся зэр бӧрын моз, югъялӧны лысва войтъяс. «Кӧнкӧ, пуясыс дзикӧдз шӧйӧвошисны, — думыштіс сійӧ. — Быттьӧ пӧ тай нӧ водз на тулысыслы воны, а шоныд нин. Код тӧдас пӧ сэсся: лэдзны ли не нин гаръяссӧ». Сыысь, мый буретш татшӧм ногӧн вежӧртіс матыстчысь тулыслысь разведкаӧн водзӧ пыралӧмсӧ, Светалӧн бӧр шоналіс сьӧлӧмыс.

А со и Кызродевъяслӧн керкаыс. Света ньӧжмӧдіс воськовъяссӧ, ёсьтіс-сюсьмӧдіс видзӧдлассӧ, мед эськӧ йиджтыны вежӧрас керкаыслысь синмӧ шыбитчанаджык пасъяс. Гӧрдоват черепицаӧн кышӧм крут пӧката вевт. Лӧз краскаӧн югъялысь пӧвйӧн эжӧм стен вылын лӧсьыда сьӧдӧдӧны ва визувтан кӧрт трубаяс. Ён калиткаа джуджыдкодь забор, сы сайын пытшкас, буракӧ, мӧс карта.

«Абу жӧ кӧ тайӧ налӧн керкаыс-а? — майышмуніс ныв; сылӧн вежӧрыс некыдз эз вермы ӧти кывйӧ воны сэтшӧмторкӧд, мый тайӧ керкаын олысь морт мырддис сылысь вит шайт. — Сораси жӧ кӧ ме-а?» Света судзӧдліс сумкасьыс ичӧтик блокнотсӧ, выльысь видзӧдліс бӧръя лист бокӧ пасйыштӧм адрес вылӧ. Сійӧ керкаыс!

Восьтіс дзиръя ӧдзӧссӧ, но муртса удитіс воськовтны йӧрас, кыдзи сы вылӧ лёкысь увтчӧмӧн уськӧдчис зэв ыджыд пон. Садьтӧг повзьӧм Света эз и казявлы, кыдзи бӧр лои забор мӧдарын. «Сёяс татшӧмыд!» — мӧвпыштіс ныв. Но сэки забор сайын кыліс нывбабалӧн дивитысь гӧлӧс.

— Шеть, Цӧбӧр! Мый нӧ бур йӧз вылас увтан!.. Светлана Николаевна, пыр, эн пов!

«Буракӧ, гӧтырыс майорыслӧн», — думыштіс Света, дворӧ выльысь воськовтігмоз.

— Пыр, пыр! — водзӧ сёрнитіс косіник нывбаба Света вылӧ юасяна руд синъясӧн видзӧдігтыр. — А ме, часлы, тайӧ зверсӧ йӧрта. Водзджык кӧсйи да эг эшты. Сідзи и суин.

Нывбаба босьтіс пыр на эргысь кӧин кодь понйӧс голя домӧдыс, кодлысь кольчаа помсӧ вӧлі пысалӧма кузь сутугаӧ, да гольскис-нуӧдіс мӧс карталань, а сэсся и каличаліс йыла юра чомйӧ. Нывбаба вӧлі мича лӧз платтьӧа да тупкӧс морӧса дзескыдкодь ковтаа, коді — пырысь-пыр жӧ казяліс Света — зэв эз лӧсяв сылы, сы вӧсна мый косіник морӧсыс вӧлі мужичӧйлӧн моз шыльыд.

Нывбабалӧн гырысь черлыяса чужӧмыс и негырысь руд синъясыс, и весиг сійӧ, кыдзи мортыс сувтіс Света водзӧ, — вӧлі висьталӧны, мый сійӧс личкӧ шог; мый сійӧ шӧйӧвошӧма да оз и тӧд, мый колӧ вӧчны, кодарсянь панны сёрнисӧ.

— Кӧзяиныс лавкаӧ котӧртіс, — шуис сэсся нывбаба. — Виччысьыштлам, час локтас регыд.

— Да ті энӧ тӧждысьӧй, Павла Васильевна, ме ог тэрмась, — меліа шуис Света, и сылӧн быдтор казявны зільысь синъясысь эз дзебсьы, мый тӧдтӧм мортӧн ним-вичӧн шуӧмыс — Света тайӧс водзвыв тӧдмаліс майорлысь — сьӧлӧм вылас воис нывбабалы. Мортыдлӧн быттьӧ личалыштісны сійӧс яндысьӧм выйын кутысь везъясыс, и чужӧмыс кыдзкӧ пырысь-пыр лои асӧнджык. Сэсся, мед и водзӧ на личӧдыштны нывбабалысь ловсӧ, а ӧти сайын и тӧдмавны ӧттор-мӧдтор, Света шуис; — Пантелеймон Михайловичыд тіян бур морт на вӧлӧма — ачыс со магазинӧ ветлӧдлӧ ньӧбасьны?

— Хы-хы... — шпыньмуныштіс Павла Васильевна. — Оз эськӧ ёнасӧ да. Талун тэнӧ виччысьӧ да сійӧн жӧ-а. Менам, гашкӧ, не сідзи мыйкӧ ньӧбсяс, сэтшӧмтор вылад абуджык велавсьӧма да... — шуис тадзи, а сэсся быттьӧ друг тшӧкмуніс, сы вӧсна мый тӧд вылас усины мужикыслӧн кывъясыс: «Воас кӧ ветлігкості корреспондентка, мед нинӧм абусӧ эз вӧв бызгӧма!»

«Кыдзи сэсся и колӧ сёрнитны татшӧмыскӧд?» — майшасис нывбаба.

А Света, быттьӧ нинӧм абу и вӧвлӧма, важ тӧдса моз сёрнитӧ:

— Овмӧсыд тіян ыджыд, Павла Васильевна, уна удж пуктылӧма.

— Эн нин шу, нылӧ! — бӧр ловзьыштіс кӧзяйка. — Став душатӧ лоӧ сетны керка-картаыдлы. Мукӧдыс небурысь индалӧны ме вылӧ: некӧн пӧ оз уджав! А кыккирудзтӧ ог на жӧ пукав! Мед эськӧ татшӧмъясыс видлісны карад мӧстӧ видзны! Турунтӧ пуктыны колӧ Ыбӧдз кайны! Совхоз шӧри пай сетас кутшӧмкӧ эндӧм ылыс видз, и гӧрбуша косанад мыйкӧ жӧ кокалан сійӧс да новлан-чукӧртан вутшъяс костӧдыс уялӧмӧн. Сэсся джын турунсӧ лоӧ совхозыслы жӧ и кольны — видз пайсӧ. А вайӧм-петкӧдӧмыс сэтысь кутшӧм! Машинаыд ӧд абу аслад! Шопертӧ мыйкӧ жӧ медавлан.

— Бур кӧть, мый мужикъясыд ёнӧсь, отсасьысьясыд, — шуис Света.

— Ёнӧсь эськӧ, ен сыкӧдӧн да, — азыма сёрнитіс кӧзяйка, быттьӧ гажыс нин бырӧма татшӧм сёрнисьыс, кор гӧгӧрвоӧмӧн кывзӧны сійӧс. — Сӧмын ӧд налӧн кадыд этша жӧ. Уджалігад. А горт гӧгӧрад кӧзяиныс миян чер-пилаӧнджык любитӧ ноксьыны. Кык гожӧм веранда тотшкӧдіс-керис, видзӧд со кутшӧм лӧсьыд артмис...

— Лӧсьыд и эм. Мастер, тыдалӧ?

— Мастер... Сы вылӧтӧ мастер, нинӧм шуны... А мукӧдторнас аслым лоӧ ёнджыкасӧ вийсьыны. Николаевна, лок, колӧкӧ, видзӧдлам менсьым Сюраньӧс? — сьӧлӧмсяньыс вӧзйис нывбаба.

— Радпырысь, позьӧ кӧ, — Света быдӧн нимкодясис.

— Мый нӧ оз позьыс! — долыдмис жӧ мӧдыс.

Найӧ матыстчисны брускысь тэчӧм ыджыдкодь гид дорӧ. Павла Васильевна перйис скӧбаясысь додь вож, кодӧн вӧлі тасалӧма ӧдзӧссӧ. Пытшсяньыс лэчыда да сука ӧвтыштіс шоналӧм куйӧд дук; пыдісянь, пемыд пельӧссянь, катласигтыр, на дінӧ воис еджыд кымӧса ыджыд мӧс; гӧгӧрвотӧма видзӧдліс чашка пыдӧс гырся синъяснас, нюжӧдыштліс голясӧ да дженьыдика бакӧстіс.

— Мый нӧ, донаӧй, бара нин кынӧмыд сюмалӧ? — кага дінӧ моз меліа шыасис Павла Васильевна. Тапкӧдыштіс Сюраньӧс вердаса, шыльыд гӧна сьыліӧдыс, сэсся котӧртліс посводзас да вайис ыджыдкодь нянь шӧрӧм, шуис Светалы:

— Николаевна, окотитан кӧ, на сет. Ок ёна любӧ сылы, кор ки помсьыд вердан.

Света полігтырйи мыччис мӧслы нянь шӧрӧмсӧ, мӧдыс сарӧга паськыд кывнас азыма нюлыштіс сійӧс, тшӧтш и нывлысь кисӧ гилькнитіс-нюлыштіс.

— Чорыд кывйыс, зуд кодь! — шуис повзьыштӧм и нимкодьмӧм Света. — Павла Васильевна, уна-ӧ нӧ сетӧ йӧвсӧ Сюраньыд?

— Йӧла матушкаыс, немтор норасьны. Ӧні — тӧлысь на коли куканясьӧмсяньыс — луннад кызь литратӧ войтӧдлам.

— Кызь литр? Зэв тай уна. Кытчӧ нӧ сы мында йӧвсӧ воштад?

— Мый тэ, донаӧй! Йӧлыд бара инасяс! Сёям пӧттӧдз. А мый кольӧ — вузыштам. Тані ньӧбысьыд мыйта колӧ эм. Челядюловыд тай быдсӧнлӧн лӧсьӧдӧма, быдсӧнлы колыштӧ йӧвторйыд. А миян, матушкалӧн, ен сыкӧдӧн, чӧскыд йӧлыс, сук. Абу магазинса кодьыд, сэні пӧ тай, сукджык кӧ, ваӧн кизьӧртӧны-а. А миян, матушкалысь, быттьӧ нӧк юан. Вердіс на менӧ, матушкаыд! Водзӧсӧ ог тӧд, кыдзи лоӧ-а. Сэсся со кукань вузалім. Кӧсйим эськӧ яй вылӧ арӧдзыс видзны, но мужиклӧн тӧдсаыс сирасис: вузалӧй пӧ и всё. Тіян пӧ зэв бур рӧдыс. На либӧ, мися, мый сэсся тіянкӧд вӧчан. Аслыным порсьпи лӧсьӧдім.

— Тырмӧ и эм тіян уджныд, Павла Васильевна.

— Кыдз оз! — водзӧ на варовмис кӧзяйка. — Вед и сы ыджда йӧр ӧшалӧ ме вылын: эсымында картупель колӧ вӧдитны-чередитны; скӧттӧ вед колӧ мыйӧнкӧ вердны, сынӧднас он пӧткӧд. Да и, веськыда кӧ шуны, зэв радейта йӧрад ноксьынытӧ. Помидор пуктыла, ӧгурцы... Мыйӧн пондас тулыс дукыс кывны, верит кӧть эн, Николаевна, сідзи и кыскӧ йӧрӧ. Быттьӧ став гажыс сэні.

— А ме ногӧн кӧ, тайӧ зэв буртор, Павла Васильевна, — сьӧлӧм сетіс ныв — Меным и аслым йӧрса уджыд муса, кӧть ме и карын чужлӧм морт. А ті, кӧнкӧ, сиктын быдмылінныд?

— Сэні, му дорад ичӧтысянь ёна ноксьылі.

— Павла Васильевна, а, гашкӧ и, сиктын кӧ быттьӧ олінныд, медся пыдди пуктана мортыс ӧні вӧлінныд? — висьталіс Света виччысьтӧг воӧм мӧвпсӧ.

— Чӧв, нылӧ, вай эн серав, — кӧзяйка ӧвтыштіс кузь сойнас. А сэсся мӧвпаланаа содтіс: — Уджсьыд эськӧ некор эг повлы да.

Нывбаба ышловзис, сэсся бурысь нюммуніс — быттьӧ лов шынас лэдзис содтӧд майышмунлӧмсӧ да дӧвӧля нин шуис:

— А ми, Николаевна, и карын медомӧлясӧ некор эг овлӧй. Ӧні миян быдтор тырмӧ.

— Сэсся шу, карад и гажаджык: киноыд и театрыд мыйта колӧ эм.

— Митӧ эськӧ и омӧля нин театрасьлам, — бӧр варовмис нывбаба. — Ме, Николаевна, кӧть и карын ола, вунӧді нин, кутшӧм ӧдзӧсӧд сэтчӧ пырӧны. Миян кӧзяинлы, буракӧ, дыш нин новлӧдлыны менӧ театръястіыд. — Павла Васильевна бара ышловзис, но эз нин сэтшӧм сьӧкыда, кутшӧма виччысис Света татшӧм висьтасьӧм бӧрас. «Сійӧ немтор вылӧ нин оз норась, сійӧ велалӧма нин ӧнія мозыс овны», — думайтіс ныв и сьӧлӧмсьыс кыліс, мый жалитӧ и дивитӧ нывбабаӧс.

Нывбабалӧн косньӧд да винёв туша-рожа вылӧ видзӧдігӧн Света друг думыштіс, мый тайӧ гозъяыс, буракӧ, оз ёна бура овны ӧта-мӧдныскӧд; мый шыльыд чужӧма майорыс ӧдвакӧ йӧла мӧс видзысь гӧтырыскӧд шуда.

— Телевизортӧ вот видзӧдлывла, Николаевна. Ёна буртор сійӧ, — орӧдіс Светалысь думъяссӧ кӧзяйка. — Уна артистӧс гӧлӧс сертиыс нин понді тӧдны, — сэсся нывбаба друг быттьӧ сайкалыштіс сёрнисьыс, вежсьӧм синъясӧн видзӧдліс Света вылӧ да шуис: — Ставсӧ тай ме тэд висьтаси, Николаевна, эмсӧ и абусӧ. Эн ёнасӧ дивит пемыд бабатӧ. Мужикъясыд миян оз ёнатӧ шыасьлыны да, сёрнитнытӧ бур мортыдкӧд зэв окота, — чӧв усьліс, синъясыс друг быттьӧ коньӧрсялыштісны, да джӧмдаланаа юаліс сійӧс, мый медводзсянь кӧсйис юавны, но пыр на со эз смелмӧдчы: — Николаевна, мый нӧ лоӧ миян Валеракӧд? Зэв ыджыд лёктор пӧ керӧма да?

Света кыпӧдіс синъяссӧ, и пырысь-пыр жӧ морӧссӧ сотыштіс ёсь жальлун, сы вӧсна мый сэтшӧма вежсьӧма вӧлі Павла Васильевналӧн гырысь черлыяса чужӧмыс, сы мында шог друг сӧдзтысьӧма-петӧма сэтчӧ. «Со ӧд сійӧ мам сьӧлӧмыд! — нывбаба дінӧ нӧшта ыджыдджык мелілунӧн йиджтысиг думыштіс Света. — Кӧнкӧ, кыдз сӧмын нин эз доймась-чукрась. А пиыс, гашкӧ, эз на и думыштлы мам йывсьыс».

— Павла Васильевна, ме тіянысь на шемӧсджык ветлӧдла, — шуис Света. — Торйӧн нин ӧні, кор кутшӧмакӧ тӧдмалышті, кыдзи ті оланныд. Тӧрытнас ме чайті, мися, гашкӧ, кутшӧмкӧ тшыг йӧз уськӧдчылісны, кодъяслы нинӧм вылӧ няньсӧ ньӧбны. А тіян со быдтор эм.

— Ме ог тӧд, мый сылы оз тырмы, — воча шыасис коньӧр нывбаба. — Сёян-юан — душа и мера! Немтор нин он жалит, ставсӧ сетан сылы: медтыкӧ вӧлі йӧз сертиыс не омӧльджыка пасьтасьӧма, йӧз сертиыс не чӧскыдтӧмджыка сёйӧма-юӧма. Йӧвтӧ лишнӧй вузала да, деньгатӧ пыр сета и... Шоперад велӧдчӧмысь мынта и... Мися, помалас да, кокньыд меным лоӧ: турун додьтӧ да пес додьтӧ гургӧдыштас... А со тай сійӧ мый керӧ... Юр яндзимтӧ тай керис жӧ миянлы!

— Пиыд нӧ ӧтнас тіян? Челядьныд сэсся абу?

— Абу. Тайӧ керкасӧ лэптігӧн ме буретш сьӧкыд вӧлі да дойми. Шой нывка чужліс. Сэксянь сэсся эз лоны челядьыс.

— Мыйкӧ сьӧкыда лэптінныд, кӧнкӧ?

— Дерт, сідз. Уль керйыд тай абу кокни. Пессьӧмыд, майбыр, сюрыштіс жӧ меным. Но со тай кӧзяин локтӧ нин.

Пантелеймон Михайлович мыйкӧ сьӧкыда кыскис ыджыд сьӧд сумка тыр. Светаӧс казялӧм бӧрын ывла вывті ветлӧдлӧмысь кыза банйӧм чужӧмыс пырысь-пыр жӧ вежсис, лои кымӧр сайысь мыччысьӧм шонді кодь мелі.

— Ті, вӧлӧмкӧ, танӧсь нин, Светлана Николаевна? Дыр нин виччысянныд? Извинитӧй. Мый нӧ мортсӧ керкаӧдзыс он пырт, кынтан ывла вылас?! Пырамӧй, пырамӧй.

Светаӧс пыртӧдісны горничаӧ, зэв ыджыд жырйӧ, кӧні стенас и джоджас вӧліны гырысь ковёръяс. Пызан-улӧс, креслӧяс, телевизор, трюмо — ставыс вӧлі выль и, буракӧ, дона.

«Сӧмын, буракӧ, книгаяс тайӧяслӧн абуӧсь...» — думыштіс Света паныда стенысь кык ыджыд портрет видзӧдалігмоз. Сэні вӧліны зэв мича чужӧма ныв да зон. Буракӧ, гозъя том дырйиыс. Но, кутшӧма кӧть эз корсь Света налӧн чужӧмъясысь мыйкӧ ӧткодьӧс ӧнія ловъя чужӧмъясыскӧд, немтор эз аддзы.

Гозъя ноксисны кухняын, дерт, лӧсьӧдісны сёян-юан. Светалы эз вӧв окота пуксьыны пызан сайӧ, но эз вӧв лӧсьыд и сідзсӧ бӧр мунны. Сэсся ӧд и, быттьӧкӧ, эз на вӧв налӧн медыджыд сёрниыс...

— Кытчӧ нӧ сэтчӧ лӧдан?! Абу ӧд порсьыдлы! — кыліс друг Света кухнясянь Кызродевлысь зэлыда шӧпкӧмсӧ. Светалӧн чепӧсйис вирыс чужӧмас, быттьӧкӧ сылы аслыс шуисны тайӧ чорыд кывъяссӧ.

А со Пантелеймон Михайлович воӧ нин банйӧм блин кодь нюмъялысь чужӧма да вына кияс вылас петкӧдӧ поднос, кытчӧ кужӧмӧн тӧрӧдӧма быд пӧлӧс закускаа тарелкасӧ. Сэсся и пызан вылын лоины шампанскӧй да коньяк дозъяс.

— Да мый нӧ ті, Пантелеймон Михайлович! — шемӧсмис Света. — Ме вӧсна али мый ті тадзисӧ?..

— Ме абу юысь морт, Светлана Николаевна, — шуис Кызродев пызан вылӧ тарелкаяс да румкаяс кужӧмӧн тэчалігтыр, — но ме ордӧ кӧ пырис дона гӧсьт, ме ог лэдз сійӧс бӧрсӧ тшыгйӧн... Павла, вайлы чистӧйджык чышкӧд! — А кор мӧдыс вайис вышивайтӧм помъяса лым еджыд дӧра, ачыс кутіс чышкавны румкаяс.

— Бур морт пырис керкаӧ да, кыдз нӧ гӧститӧдтӧгыс! — кыпыда варовитіс кӧзяин.

Сылӧн синъясыс дзикӧдз гажмисны, а еджыд, топыд вир-яйӧн зэвтӧм чуньяснас весиг медпосни, чуньлыс кодь румкаяссӧ чышкаліс пелька да кужӧмӧн. Света любӧпырысь видзӧдіс мужичӧй кияслӧн татшӧм ноксьӧм вылӧ. Да и не сӧмын кияс вылас, — нывлы зэв любӧ вӧлі видзӧдлыны гажъялысь Пантелеймон Михайлович вылӧ, коді, ыджыд да ён туша вылас видзӧдтӧг, шуркъяліс-вӧрис сэтшӧм пелька.

Павла Васильевна вайис пызан вылӧ тасьтіын зэв гӧрд, мича, шыльыда пӧльтчӧм помидоръяс.

— Тайӧс видлы, Николаевна, — шуис сьӧлӧмсяньыс. — Асланым быдтасъясыс, асьным солалім и...

— А позьӧ?! — быттьӧ ловзис Света: помидоръясыс вӧліны сэтшӧм гӧгрӧсӧсь да шыльыдӧсь, сэтшӧм яра югъялісны ӧзйысь люстра улын, мый сылы зэв окота лои пырысь-пыр жӧ видлыны ӧтиӧс.

— Позьтӧм абу! — долыдмис кӧзяйка.

Света сюйис вомас тар кольк ыджда топыд, кӧдзыд помидор, личкыштіс кывнас, и пырысь-пыр жӧ вомыс тырис анис да неуна шом кӧра лязӧн.

— Ой, кутшӧм чӧскыд! — ныв любӧысла весиг куньліс синъяссӧ.

— Сёй, сёй, Николаевна, — шуис помтӧм шуда кӧзяйка, кодлы пыр ёнджыка и ёнджыка воис сьӧлӧм вылас тайӧ ыкшасьтӧм нылыс. «Гижысь пӧ, а ньӧти со оз вылӧ пуксьы!» — ас кежас шензис нывбаба.

Пантелеймон Михайлович кыпӧдіс югыд больясӧн пуысь шампанскӧй тыра бокалсӧ да шуис:

— Светлана Николаевна, тіян вӧсна!..

— Мый нӧ нин ме вӧсна, — яндысьыштіс Света. — Юны кӧ нин, вайӧ юамӧй, — Светалы окота вӧлі шуны: «Кӧзяйка вӧсна», но сійӧ видзӧдліс мужиксяньыс ылынкодь бокын куткырвидзысь Павла Васильевна вылӧ да кывйыс эз бергӧдчы тадзсӧ шуны. — Вайӧ юамӧй сы вӧсна, мед эськӧ быдӧнлӧн вӧлі бур семья, мед эськӧ быд семьяын вӧлі унджык шуд.

Кызродевлӧн Света вылӧ югнитлысь видзӧдласыс висьталіс: «Тайӧ, буракӧ, лишнӧй уна нин тӧдмалӧма ми йылысь?! Этайӧ бызгӧма нин эмсӧ и абусӧ». Сэсся Пантелеймон Михайлович шуис:

— Лӧсьыд тост ті шуинныд, Светлана Николаевна. Ме чайта, сійӧс, мый ті вӧзъянныд, ёна кӧсйӧ быд сӧветскӧй морт. Юамӧй та вӧсна!

Света да Пантелеймон Михайлович юыштісны шампанскӧйсӧ ичӧтикаӧн, чурснитыштісны да румканысӧ бӧр сувтӧдісны пызан вылӧ. А Павла Васильевна юис помӧдзыс, сӧдз винаысь петысь чорыд газыс чамгис-кучкис нырас да морттӧ пыдісянь гораа сутшиктӧдіс, мыйысь велавтӧм нывбаба сука гӧрдӧдіс, а мужикыс лыйыштіс сійӧс пурт дор кодь лэчыд видзӧдласӧн.

— Горшад сідзи и сатшкысьӧ, — зілис вештыны «мыжсӧ» нывбаба. — Лёк вина тайӧ.

— Лёк, дерт, — пытшкӧсса зэлыдлунсӧ кыпыд нюмӧн личӧдыштны зілигтыр шуис верӧсыс, сэсся тшӧтш пондіс дорйыны гӧтырсӧ Света водзын: — Тайӧ миян абу велалӧма винатӧ юны, оз куж. Кӧть мыйта кисьтан, ӧтчыдысь сӧмын юӧ, мӧдысьтӧ оз.

— Сідзкӧ, либӧ коліс коньяксӧ кисьтны Васильевнаыдлы. Мед кӧть неуна гажмыштіс, — шуис Света.

— Мыйкӧ тай ме вӧсна пондінныд! — яндысьыштіс нывбаба. — Юӧй вай, сёйӧй. Николаевна, сэтӧр варенньӧсӧ видлы!

— Эн тӧждысьӧй, Павла Васильевна. Ме сёйлывла жӧ гортын сійӧс, бабкӧд унакодь жӧ пулім.

— Вӧрысь вотлінныд?

— Ӧшинь улысь! Миян йӧртор жӧ эм, асланым жӧ керка.

— Да?! — шыасис Пантелеймон Михайлович, коді ёна нин дзугыльмыліс сыысь, мый сёрниыс век кежӧ колана визьысь. — Видзӧд со... Сідзкӧ, Светлана Николаевна, ми тіянкӧд кыкнанным частнӧй собственникъяс? — и гажаа серӧктіс.

— Сідзкӧ, и скӧтина тшӧтш видзанныд? — юаліс и кӧзяйка, коді вӧлі тшӧтш чуймыштӧма татшӧм юӧрсьыс.

— Ог, — нюммуніс Света. Шампанскӧйыс сылы кучкыштіс юрас, морӧсыс шоналіс, и нывлы лои лӧсьыд — быттьӧ сійӧ шондіа лунӧ нем тӧждысьтӧг лайкъяліс гыа ва вылын. — Ог. Батьлӧн миян сад вӧснаджык гажыс бырӧ, дзоридзьяс вӧсна да. Наӧн эськӧ лун и вой ноксяс.

— Сэсся нӧ йӧр пасьталаыд сад али мый? — дивитанаа шуис кӧзяйка.

— А пӧшти. Неыджыд теплица сӧмын эм. А картупель батькӧд неуна пуктыштлам бокӧ.

— Мыйла батьыдкӧд? — бара шыасис кӧзяйка. — А мамыд нӧ?

— Мамӧй менам абу, — шуис Света да кутіс видзӧдны джынъялӧм бокалӧ, код пыдӧсысь петісны и петісны югыд больяс.

— Но тай! — пырысь-пыр жӧ сьӧлӧм сетіс нывбаба. — Абу? Важӧн абу дай?

— Квайт арӧс меным вӧлі, кор дзебим. Рак висьӧмысь кувсис. Комын кык арӧс сэки сылы вӧлі.

— Аминь, аминь! Со вӧд, — кӧзяйкалӧн негырысь руд синъясыс кутісны югъявны чукӧрмӧм синваысь. — А батьыд нӧ выльысьсӧ эз гӧтрасьлы?

— Эз, — бокал вылысь синъяссӧ лэптавтӧг шуис Света. А сэсся думыштіс: «Мыйла нӧ ме тайӧяслы висьтавла та йылысь? Ме жӧ эг ас йылысь сёрнитны лок татчӧ, а налӧн олӧм-вылӧм йылысь тӧдмавны...»

Пантелеймон Михайлович быттьӧ и тшӧтш кывзіс нывбабаяслысь сёрнисӧ, но пӧшти немтор эз кыв. Сы вӧсна мый морӧсыс сылӧн и юр вемыс вӧліны донӧдз пӧсялӧмаӧсь юавны кӧсйӧмысь. А кор тай ачыд мыйкӧ зэв ёна кӧсъян шуны, сэки мукӧдыдлӧн сёрниыс ӧти пельтіыд пырӧ да, некытчӧ кутчысьлытӧг, мӧд пельтіыд петӧ. Кызродевлы кажитчис, мый ӧні, буретш ӧні воис сійӧ здукыс, кор позьӧ дзикӧдз помавны майшасьӧм-мучитчӧмсӧ; мый буретш ӧні — нюжмасьны кӧ кутан, сёр лоӧ — корреспонденткаыс бур ногӧн вермас помавны мисьтӧм делӧсӧ. И Пантелеймон Михайлович юаліс:

— Светлана Николаевна, мый нӧ сэсся кутам вӧчны бандитыскӧд?

Света вӧлі пӧшти рад сёрнисӧ вежны. Сы вӧсна мый мам йывсьыс казьтылӧмыс дзикӧдз нормӧдіс сійӧс, и ныв весиг эз лысьт водзӧ нуӧдны сёрнисӧ: поліс, мый бӧрддзас. Кызродевлӧн юалӧмыс пырысь-пыр жӧ пальӧдіс сійӧс.

— Аскӧдыс эськӧ окота вӧлі тшӧтш сёрнитны, — шуис ныв.

— Дерт, эськӧ да! — Пантелеймон Михайловичлӧн сьӧлӧмыс ойдіс нинӧм гӧгӧрвотӧм пиыс дінӧ лӧглунӧн. — Эз тай со лок.

— Виччысьлам, локтас на, — рама шуис кӧзяйка.

— Сідзи, дерт, — бур йӧзыс асылӧдзыс пондасны виччысьны сійӧс! — кыдзи кӧть эз кутчысь, Пантелеймон Михайловичлӧн гӧтырыслы шусис гораджыка, чорыдджыка; сійӧ ачыс казяліс тайӧс да мыжа морт моз тэрыба видзӧдліс гӧстя вылӧ. Но гӧтырыс нем думайттӧг эрдӧдіс сійӧс, мый, думсьыс, кӧсйис дзебны Пантелеймон Михайлович.

— Мый нӧ горзан? — дӧзмӧмӧн шуис кӧзяйка. — Век вӧд горзӧ. Быттьӧ бурӧнсӧ оз позь.

Пантелеймон Михайлович падмыліс корреспондент дырйи шуӧм тайӧ кывъяссьыс. А сэсся видзӧдліс гӧтыр вылас сэтшӧм синъясӧн, мый быттьӧ кӧсйис пӧсь пӧимӧ пӧртны сійӧс.

Светалы сэсся эз ло окота пукавны тані: нывлы кажитчис, мый сылы ставыс лоӧ гӧгӧрвоана.

— Ме тіян Валерьянлы ог кӧсйы лёксӧ, — шуис Света. — Ме кӧсъя, мед сійӧ морт моз оліс. Мукӧдыс тшӧтш и... Но сӧмын мед эськӧ эз жӧ ло сідзи, мый ӧні кӧ найӧс прӧститам, бара важ моз кутасны овны.

— Оз, Светлана Николаевна, эскӧй меным! — личмунӧм сьӧлӧмӧн горӧдіс Пантелеймон Михайлович.

— Этатшӧм мучитчӧм бӧрад ӧні тӧлксялыштас, — шуис тшӧтш Света вылӧ вазьӧм синъясӧн видзӧдысь Павла Васильевна.

— Код тӧдас... — ышловзис Света. — Сьӧлӧмас сылӧн, буракӧ, лёклуныс уна нин чукӧрмӧма. Буракӧ, сійӧ ас йывсьысджык велалӧма думайтны и оз кыв мӧд мортлысь шогсӧ. Мыйла эськӧ, а?

Пантелеймон Михайлович зумышмис, улӧдз копыртіс юрсӧ. Пукалӧ чӧла, некод вылӧ оз видзӧд, ён чуньяснас бергӧдлӧ сӧмын бокалсӧ вӧсньыдик кокӧдыс.

— Мыйла? Сы вӧсна мый асьным лёкалам, зверъяс моз! — друг пӧся и курыда шуис Павла Васильевна. — Гашкӧ, и зонкаыд тшӧтш велаліс... Тшӧтш сылы йиджис...

Кӧзяйка бӧрддзис.

— Прӧститӧй, мыйкӧ кӧ не сідз шуи. — Света ачыс падмис, сійӧ эз виччысь, мый сылӧн кывъясыс инмасны гозъялы медся дойманаинас. — Ме бур вылӧ шуи...

Кызродевлӧн керка дорсянь Света восьлаліс нормыштӧм сьӧлӧмӧн. «А ӧд ортсысяньыс кажитчӧ — крепыда олысь, шуда семья, — думайтіс ныв. — Коді оз тӧд, буракӧ, тадзи и чайтӧ. А со, вӧлӧмкӧ, шудсӧ кыӧма сісь сунисысь».

Светалы вӧлі жаль уджалысь вӧв пыдди олысь Павла Васильевнаӧс. Ӧд мужикыс йӧз дырйи горзӧ сы вылӧ, а мый вӧчӧ сэк, кор некод оз аддзы да оз кыв? Вермас ӧмӧй татшӧминад лоны сёрни нывбабаӧс пыдди пуктӧм йылысь? И пиыс, гашкӧ, збыльысь велаліс батьыслысь сідз жӧ кӧдзыда видзӧдны мамыс вылӧ. А сэсся, гашкӧ, и став нывбабаяс вылас.

Ставсьыс таысь Светалӧн пондыліс ёна петны лӧгыс майор вылӧ. А сэсся друг кутіс думайтны: «А, гашкӧ, сійӧ сэтшӧм сӧмын сы вӧсна, мый оз радейт гӧтырсӧ? Ӧд видзӧднысӧ быттьӧ и шань морт...» И пыр жӧ ачыс аслыс вочавидзис: «Оз кӧ радейт, нинӧмла вӧлі гӧтрасьны сы вылӧ. И сэсся, мед кӧть и оз радейт, морт пыддиыс всё равно колӧ пуктынысӧ! Дерт, и аслыс, Павла Васильевналы оз ков сэтшӧма сетчыны. Сы мында удж вӧчӧ да, колӧ ёнджыка дорйыны асьсӧ».

«Интереснӧ, мыйла найӧ ӧтвывтчылӧмаӧсь, оз кӧ лӧсявны ӧта-мӧдныскӧд? Кутшӧм рӧк суӧма олӧмас?»

Ывла вылын вӧлі пемыд нин, кыліс на ульдӧм лым дук, но ыркӧдӧма нин. Улича вылын чусыда ӧзйисны гӧрд биа шочиник пӧнаръяс, йӧз таті ветлӧдлісны гежӧда. Мыйкӧ мында муныштӧм бӧрын ныв бергӧдчыліс мышлань и сылы кажитчис, мый кодкӧ вӧтчӧ сы бӧрысь... Светалӧн лёкысь ыркмуніс сьӧлӧмыс, мыш пасьталаыс разаліс йирмӧг, кыдзи тай овлӧ кӧдзыд ывласянь пӧсь пывсянӧ пырӧм бӧрын. Сылы зэв окота лои уськӧдчыны котӧртны, ӧдйӧджык вешйыны татысь кар шӧрлань, йӧзаинлань.

Но сійӧ кыдзкӧ-мыйкӧ кутіс асьсӧ, эз чепӧсйы котӧртны, а сӧмын вочасӧн содтіс и содтіс воськовсӧ. Керка вуджӧр сайын — мед оз гӧгӧрво вӧтчысьыс — ныв бара бергӧдчыліс: кодкӧ важ моз тэрмасис сы бӧрся. Уличаяс вомӧнасянінӧдз воӧм бӧрын Света, тіпкысь сьӧлӧма, чепӧсйис боквыв, котӧртыштіс да дзебсис кутшӧмкӧ забор сайӧ. Вӧтчысьыс воис сы весьтӧдз, сувтіс да шӧйӧвошӧмӧн шуис, буракӧ, ачыс аслыс:

— Кытчӧ нӧ сійӧ вошис?

Света кыліс улича мӧдарысь кодъяслыськӧ варов гӧлӧсъяс, збоймӧдчыштіс да петіс дзебсьӧминысь.

— Ті, гашкӧ, менӧ воштід? — шуис лэчыда. — Ме тані.

Сы водзын вӧлі неыджыд тушаа, дженьыдик курткаа том морт, сійӧ явӧ вӧлі шӧйӧвошӧма.

— Гм. Бур рыт, Света, — джӧмдаланаа шуис том морт.

— Бур рыт, — ныв ачыс падмис зонлӧн шӧйӧвошӧмысь, сылӧн бур гӧлӧсысь, а медсясӧ нин нимнас шуӧмысь. Ӧд сійӧ виччысис мыйкӧ лёкӧс, весиг дум вӧліс, мый тӧрытъяясыд бара кӧсйӧны топӧдны, мед эськӧ сійӧ эновтчис на дінысь. А тайӧ со нинӧм, бур ногӧн ыдждӧдлӧ.

— Ме — Генка, — бара шыасис том морт. — Буретш вӧлі муна уличаӧдыс. Видзӧда — ті. Час, мися, вӧтӧда.

— Ак, ті буретш вӧлі мунанныд! — серамбанӧн шуис Света, коді пырысь-пыр жӧ гӧгӧрвоис, кутшӧм Генка тайӧ. Нывлы лои зэв нимкодь, мый тадзи тӧждысьӧны сы вӧсна, но стрӧга шуис: — Верманныд висьтавны Кимыдлы со мый: нинӧмла конвоируйтны. Ме абу президент кутшӧмкӧ...

— Тӧрытъя бӧрад быдторйыс думайтсьӧ, — яндысьӧмпырысь дорйысис Гена.

— А ме кӧ вой шӧрӧдз пукалі сэні? Пыр али мый эськӧ кыйялінныд керка дорас?

— Шоныд рытыс да, — быттьӧ нинӧм абу и вӧвлӧма, шуис Гена. — Тшын дука цехад уджалӧм бӧрын мый не лолалыштны сӧстӧм сынӧднас?

Светалӧн муртса синваыс эз пет тайӧ кывъяссьыс.

— Аттьӧ, Гена. Сӧмын весьшӧрӧ ті каднытӧ тадз ноканныд. Немтор мекӧд оз ло! — ныв крукыштіс том мортӧс сой пӧлӧдыс, да найӧ тэрмасьтӧг мӧдӧдчисны кар шӧрлань.


Кӧкъямысӧд глава


Марс, киас зеркалӧа, пукаліс крӧвать вылын да, гашкӧ, сёӧдысь нин видлаліс пазалӧм, пыктӧм вылыс парсӧ. Парйыс пытшкӧссяньыс вӧлі потӧма судта ногыс буретш шӧрӧдыс, жӧлӧбаинӧдыс, а вом дорӧдыс чашкалӧма ставнас. «Бурдас да, кӧч вом дор кодь вожа лоӧ!» — гажтӧма думайтіс Марс, и сылы вӧлі синва петмӧн жаль тшыксьӧм мича чужӧмыс.

А нӧшта поліс. Бабыс тӧрыт луннас нин мунліс пӧдруга ордас да эз на волы, и Марслы кажитчис, мый ӧтнас сійӧ вермас йӧймыны тані. Вой шӧр гӧгӧрын гортас котӧрӧн воӧм бӧрын сійӧ игналіс квартира ӧдзӧссӧ кыкнан пытшкӧс томаннас, кусӧдаліс став бияссӧ да дыр сулаліс-кывзысис ӧдзӧс дорас. Пос кузя кымыныськӧ тотшсьӧдісны-кайисны сёрмӧм олысьяс, и быд пӧрйӧ сылы кажитчис — тайӧ воӧны сыла.

Марслы кажитчис, мый найӧ веськалісны милиция шӧрӧ. Сылӧн пельясын быттьӧ ӧні на кылӧ ён гӧлӧсӧн горӧдӧм: «Лейтенант, паныдав!» Сы серти, кыдзи горӧдысьыс лӧсыштіс сылы вомас, Марс вӧлі чайтӧ, мый сійӧ — самбист либӧ боксёр. Сэки Марс весиг немтор эз удит думыштны, эз и казявлы, кыдзи усьӧминсьыс чеччӧм бӧрын кокъясыс асьныс нин пышйисны-котӧртісны.

«Менӧ эз кутны, а мукӧдсӧ, гашкӧ, дзабыртісны?» — дойдаліс и дойдаліс сійӧс жаль тӧдтӧм мӧвп. А сэсся тайӧ мӧвпыс чужтыліс мӧдӧс, сэтшӧм жӧ сьӧкыдӧс: «Шуам, некодӧс эз удитны кутны. Но ӧд найӧ вермасны вайӧдны понйӧс. И, вермас лоны, понйыс нуӧдас ме ордӧ». И сійӧс ӧтнассӧ босьтасны. А сэсся пондасны юасьны: «Кодкӧд вӧлін?»

Войнас Марс вӧталіс лёк вӧтъяс, унаысь садьмыліс, быд садьмылігӧн кажитчис, мый кодкӧ восьтӧ керка ӧдзӧссӧ. Полӧмсӧ кыдзкӧ-мыйкӧ венӧмӧн сійӧ куим-ӧ-нёльысь матыстчыліс ӧдзӧс дорӧ, быд пӧрйӧ думайтіс: буракӧ, вунӧді игнавнысӧ, да бара на малыштліс ключьяссӧ, мед тӧдмавны, помӧдз-ӧ найӧс бергӧдӧма.

Асывнас садьмис нильӧг пӧсь пытшкын, гырдӧсь вом дорыс вӧлі кыза зэлалӧма-пыктӧма. «Кӧть шыд пу, быдса бригадаӧс вердас», — шога думыштіс зеркалӧ вылӧ видзӧдысь Марс. Ӧні, кор тӧрытъя юӧм винаыс ньӧти нин эз ышӧд-шонты сьӧлӧмсӧ, полӧмыс ещӧ на содіс, шымыртіс ставнас ловсӧ. Ёна полӧмысла сылӧн дзикӧдз бырис-пакталіс вӧляыс, и лолыс кажитчис тӧв йылын тіралысь ӧтка кор кодьӧн.

«Ок, олӧм! — шога норасис Марс код тӧдас кодлы. — Чужлан жӧ свет вылас мучитчынысӧ». Сылы син улас веськалі тумбочка вылын куйлысь альбом, Марс судзӧдіс сійӧс да шог синъясӧн дыр видзӧдіс мича чужӧма том гозъя вылӧ.

Тайӧяс чужтісны сійӧс, сетісны, позьӧ шуны, винёв олӧм, мича чужӧм да эз нин омӧль вир-яй. Таысь аттьӧ налы. А нӧшта мый найӧ сетісны? Мича ним?.. Бабыс тай ӧнӧдз ас ногыс шуӧ-а — Юрӧн. Ыджыд юраӧн пӧ чужсьылӧма да. Зонкаыс пӧ юраӧн да мывкыдаӧн лоас... А батьыс пӧ томӧн-кадӧн вӧйлӧма купайтчигӧн. «А гашкӧ, эз вӧй, а вӧйтчис?! — друг чуткис Марсӧс лёк мӧвп. — А мый? Мама мунӧма сы дорысь. Гашкӧ, ёна радейтліс мамӧӧс? Винатӧ юлӧма жӧ. Дыр-ӧ татшӧма вийсигад мыйкӧ вӧчны аскӧдыд?»

«Ок, олӧм!» — майшасьӧ Марс, мамыс вылӧ видзӧдлассӧ веськӧдігмоз. «Красавица!» — быдӧн нимкодьмылӧ сійӧ. Сэсся сылы тӧд вылас усьӧ ӧти зэв важся серпас. Найӧ сулалӧны жургысь самолёт дорын. Марс зэв на ичӧт, мамыс босьтӧма сійӧс моздорас да ёна окалӧ чужӧмсӧ, окалӧ и бӧрдӧ. А сэсся самолётыс лэбӧдіс-нуис кытчӧкӧ мамсӧ, лэбӧдіс, буракӧ, зэв ылӧ, сы вӧсна мый сэтысянь сійӧ ӧтчыд сӧмын и воліс.

Восьмилетка помалӧм бӧрын, кор Марслы тырис дас вит арӧс, сійӧ ветліс мамыс ордӧ. Сэні сылӧн олісны-вылісны куим ичӧт чой да зэв сёрнитӧм, кидтысьысь дядьӧ — выль бать. Чойясыс эськӧ и ёна пондылісны меліасьны енэжсянь усьӧм та ыджда воиныскӧд, но зумыш «батьыс» видзӧдіс «пи» вылас эз зэв меліа.

А Марс бабыс дінын велаліс ас вӧляысь овны да регыд мысти бӧр кутіс лӧсьӧдны чемодансӧ. Ӧні нин мамыс колльӧдіс сійӧс. Мамыс бара бӧрдіс кыз синваӧн.

— Тэнад, дерт, ёна лӧгыд петӧ ме вылӧ, Марсик, — сёрнитіс сійӧ бӧрдігтыр. — Прӧстит омӧлик мамтӧ. Мый сэсся вӧчан, сідзи лоис да? Меным, кагаӧй менам, абу жӧ кокни. Чойястӧ колӧ быдтыны-велӧдны. А тэ век жӧ мужичӧй. Тэ ӧні ыджыд нин. Кыдзкӧ-мыйкӧ ачыд нин писькӧд аслыд туйтӧ...

«Но мый нӧ, мама, пасибӧ и таысь», — курыда мӧвпалӧ ӧні Марс. Но сы сьӧлӧмын мамыс дінӧ абу некутшӧм скӧрлун, сылы жаль мамыс, сідз жӧ, кыдзи и ачыс аслыс жаль.

Тані Марслысь кыдзсюрӧ пессьысь думъяссӧ орӧдӧ электрическӧй звӧноклӧн тюрӧбтӧмыс. Марс кынмылӧ места вылас, сэсся юрас, ӧта-мӧдныскӧд панласигтыр, чепӧсйӧны повзьӧм-шӧйӧвошӧм мӧвпъяс: «Воисны! Мый нӧ вӧчны? Соссьыны? Мися, вом дорӧй усьӧмысь жугаліс, вильді да... А мукӧдыс кӧ висьталісны нин ме йылысь? Кодӧскӧ кӧ кутісны нин?..»

Марс бара на сувтліс зеркалӧ водзӧ, асьсӧ выныштӧмӧн пычиктіс чужӧм вылас мыйкӧ нюм модааӧс да, пазалӧм вом дорнас шутьлявны зілигтыр, матыстчис ӧдзӧс дорӧ. Сылы вӧлі зэв окота юавны: «Коді?» — но восьтіс юавтӧг.

Ӧдзӧс сайын сулаліс скӧр чужӧма Валерьян. Марс вылӧ сук сьӧд синкымъяс увсяньыс букыша видзӧдігтыр сійӧ чӧла воськовтіс квартираӧ, а кор мӧдыс клопкис-пӧдлаліс ӧдзӧссӧ, зэлыда юаліс:

— Шутьлялан, комиссар?

— Кӧсъя сӧмын, Дрейк, — вочавидзис Марс не аслас гӧлӧсӧн. — Вомысь торксьӧма симметрияыс да нинӧм оз артмы.

Налӧн вочаасисны синъясыс, Валерьянлӧн пемыдгӧрд синъясын ыпъяліс муртса кутны вермана ярлун, Марслӧн руд, неуна вижоват синъясыс ӧні нин вильыша нюмъялісны.

— Но?! — пинь пырыс сӧдзӧдіс Валерьян.

— А ме чайті — милиция, — пыктӧм вомнас мырдысьӧн нюммуніс Марс.

— Милиция? — Валерьянлӧн друг вежсис гӧлӧсыс и чужӧмыс. — Тэнӧ кутлісны али мый?!

— Менӧ эськӧ эз да... Тэнӧ либӧ эз жӧ? — Марслысь ловсӧ югдӧдіс пемыд войӧ друг ыпнитӧм би кодь надея.

— «Эз жӧ, эз жӧ!» — скӧрысь нерыштіс Валерьян. — Трус чукӧр, ӧтнамӧс колинныд! Ачыд ещӧ присягаяс лӧсьӧдалан.

— Но не милициякӧд жӧ миянлы тышкасьны.

— Тьпу! — яра сьӧлыштіс Валерьян. — Кысь тэ милициясӧ аддзылін? Заводса хмырь вӧлі. Ӧтнас!

— Ӧтнас?.. — Марс муртса эз лажыньтчы шӧйӧвошӧмысла. — Эн сӧ-ӧр...

— Тэд шуӧны ӧтнас, мися!

— Мама родная! — Марс некыдзи эз вермы воны ас выяс. Но сэсся сійӧс друг шымыртіс пӧсь радлун, ӧти здукӧн сьӧлӧмсьыс бырис-разаліс став полӧмыс да мучитчӧмыс:

— Тэ либӧ петкӧдлін сылы пуж?! — пӧся шуис Марс. — Да, Дрейк?

— Кутшӧм сюсь кылӧ, — зывӧка шуис Валерьян. — Эз ков кӧч моз пышйыны, а коліс локны да кыскыны заводсасӧ ме вылысь.

— Но ме жӧ чайті, мый милиция шӧрӧ веськалім, облава шӧрӧ! — Марслӧн бӧр гӧгрӧсмисны вижоват синъясыс. — Горзӧ жӧ вӧлі кутшӧмкӧ лейтенантлы...

— А тэ нӧ сӧмын асьтӧ сюсьӧн лыддян? Чайтан, ӧтнад тэ верман ылӧдлыны йӧзсӧ? Вот лӧсышта ӧні тшӧка лыад! — пиньяссӧ мурчнитӧмӧн сёрнитіс Валерьян. Сійӧ, гашкӧ, эськӧ и збыльысь заводитіс тышкасьны — кӧть и кутшӧмакӧ полыштіс Марсысь, — но верман ӧмӧй мыйкӧ вӧчны сэтшӧма доймысь морӧснад.

— Сідзкӧ, сійӧ вермис тэнӧ? — чӧла юаліс Марс.

— Да! Да! — дой йывсьыс вунӧдӧмӧн, мый вермӧмсьыс горӧдіс Валерьян, но сэсся коньӧр моз кусыньтчис да кыкнан кинас кутчысис морӧс дінас. Копыртчӧминсяньыс Марс вылӧ вынтӧм лӧглунӧн видзӧдіг водзӧ шуаліс: — Морӧс пытшкысь, тыдалӧ, ставсӧ чуктӧдӧма. Лолавны ог вермы. Будь проклят. Паспортӧс на мырддис и...

— Паспорттӧ?! — Марслӧн мытшасьліс жӧ лов шыыс, сылы кажитчис, мый голяас шыркнитісны зэлыд петля, да сійӧ аслыс казявтӧг весиг малыштіс голясӧ. — Мыйла нӧ паспорттӧ кыскалан? Чайтан, сытӧг нывъясыд оз сетны сумканысӧ?!

— А-а, чушис!.. Тайӧ пинжаксӧ рытъясын эг пасьтавлывлы, а тӧрыт быттьӧ тойлісны. Сэні вӧлі... — Валерьян казяліс, мый лябмыштіс другыс водзын да бӧр скӧрӧнджык вӧчис гӧлӧссӧ. — А мый, эз кӧ вӧв паспортыс?! Сэки эськӧ эг нин ӧнія моз больгы тэкӧд! Решётка сайын эськӧ ковмис узьны войсӧ. Сідзтӧ эськӧ эз лэдзны. Нылыс, вӧлӧм, газетын уджалӧ...

— Мама родная! — Марс быдсӧн шатовмуніс. — Ставыс гӧгӧрвоана лои. Ковмас либӧ сукар заводитны дасьтыны? А? — Марс мый вынсьыс зілис не петкӧдлыны татшӧм юӧрсӧ кывлӧм бӧрын сьӧлӧмнас усьӧмсӧ, кӧть эськӧ аслыс и зэв шог лои.

— Дрейк, а гашкӧ, кытчӧдз абу на сёр, мыйкӧ вӧчны колӧ, бурджыка повзьӧдны колӧ найӧс. Шуны: милицияӧ кӧ пӧ явитанныд, бур эн виччысьӧй, топӧдам пемыдінын? Гашкӧ, кыкнанныслы ультиматумъяс гижны? Ловныс ӧд, кӧнкӧ, жаль жӧ?

— Топӧдысь петӧма! Уна-ӧ нӧ топӧдін? Ӧтнас со пазӧдіс ставнымӧс, а мыйтаӧн сэтшӧмыс заводас!

— Миянӧс ӧд оз тӧд, вермам кыйӧдны.

— А ме йылысь вунӧдін?! Чайтан, лэдзчысясны ме дінысь, кытчӧдз ставсӧ оз тӧдмавны?

— Мый нӧ либӧ вӧчны, Дрейк? Чӧла виччысьны, кытчӧдз, вугырӧ шедӧм сынпиянӧс моз, ӧтиӧн-ӧтиӧн оз кыскавны? Али тэ, кыдзи капитан, став кывкутӧмсӧ ас вылад кӧсъян босьтны?

Валерьян мынтӧдіс кияссӧ морӧс дінсьыс, веськӧдчис, синъяс пыддиыс быттьӧ лэчыд стеклӧ торъяс лоины. Сьӧкыд лов шы пырыс юаліс мырдысьӧн лӧньӧдӧм гӧлӧсӧн:

— Гуляйтім-пируйтім ӧтлаын, а мынтысьнысӧ меным ӧтнамлы? Да?..

— Но ӧд, Дрейк, кор судно вӧйӧ бой дырйи, бур капитанъяс век сідз вӧчлӧны: командасӧ пуксьӧдӧны шлюпкаясӧ, а асьныс кольччӧны вӧйысь судно вылӧ. Налӧн чесьтныс оз лэдз мӧд ногсӧ вӧчны. И ме, кӧть и абу капитан, сюри кӧ, на моз жӧ эськӧ вӧчи.

— Дерт, ме кӧ докажита, мый ті некод энӧ вӧлӧй, мый ме ӧтнам уджалі, тіян ставыс шито-крыто лоӧ...

— Сэки эськӧ бушколыс тӧвзяс муса командаыдлӧн юр весьтӧдыс.

— Но сы пыдди став выннас швачкас ме вылӧ, ӧтнам вылӧ?

— Нинӧм он вӧч: олӧмас кодкӧ да кодкӧ век шудтӧмджык.

— А эталысь кӧрсӧ он кӧсйы видлыны? — пинь пырыс сӧдзӧдіс Валерьян зэвтӧм кулаксӧ Марслӧн ныр-вом дорӧ матыстіг.

— Сідзкӧ, вузалан? — Марс эз и вӧрзьыв, пыр сідз жӧ сулаліс. — Ай, капитан! А ме ещӧ тэнӧ нимта Дрейкӧн. Да тӧдан-ӧ тэ, кутшӧм морт вӧлі Френсис Дрейкыс? Сійӧ эз повзьыв испанскӧй корольлӧн армадаясысь! Быдса великӧй державалы паныд сувтліс аслас корсаръяскӧд, кокньӧдаліс сылысь зарни тыра каравеллаяссӧ, а ӧти сайын восьталіс выль муяс да выль мореяс...

Ӧні, кор ставыс лои тӧдса, кор лои гӧгӧрвоана, мый найӧ дзикӧдз йӧзасисны, Марслӧн бырины войся полӧмъясыс. «Нинӧм шензьынысӧ, тайӧс колӧ вӧлі виччысьны! — друг думыштіс сійӧ. — Ёна лёкджыкыс сэні, «пионерлагерас», буракӧ, оз жӧ нин ло. Татчӧс олӧмсьыс восӧдны жӧ нин кутіс...»

— Мый тэ мем кутін кӧкны аслад Дрейк йылысь! — скӧраліс Валерьян. — Менӧ ӧтнамӧс йӧткалӧм дорысь, вай мӧд ног видлам вӧчны. Бурӧн висьтасям, мый первойысь татшӧмыс лои. Ресторанын случайнӧя паныдасим, ӧти пызан сайӧ веськалім. Деньга эз тырмышт да код юрнад воис мӧвп кодлыськӧ «удждыштны...» Ме и батьлы сідзи висьталі.

— Тэ нин батьыдлы висьталін?!

— А мый? Сійӧ жӧ милицияын уджалӧ — отсалас миянлы! Тӧдӧ, кыдзи да мый сэн вӧчсьӧ. Сійӧ нин асывсяньыс редакцияӧ муніс.

— Да? Вот баталияыс лоӧ! Бойӧ пырӧны пыр выль и выль фрегатъяс.

— Тэ вай эн бызгы нинӧм абусӧ. Корасны да, ме моз висьтав, ӧти визь пондам нуӧдны.

— Колӧ мӧвпалыштны, Дрейк. Колӧ зэв ёна мӧвпыштлыны, мед выльысь не пуксьыны рифъяс вылӧ.

— Мый сэн мӧвпавнысӧ? Али сӧстӧмӧн кӧсъян кольны? Ассьыд кутӧ видзны?

— Меным нинӧмла сійӧс видзнысӧ, всё равно некодлы сыысь сапӧгсӧ вурны. Некод оз кут бӧрдны ме понда ни. Тэнад ӧд бӧрдысьясыс эмӧсь-а, видзӧд, пырысь-пыр жӧ редакцияӧ гӧнитӧмаӧсь. А менам баб кӧть и лӧвтыштас, лёкджыкыс сылы оз нин ло — сійӧс важӧн нин корсьӧны мӧдар югыдын сартаса биӧн.

— Ме ӧд кута надейтчыны, Марс? Ӧтвылысь колӧ...

— Видзӧдлам.

— Да тэ мый?! Тэ мый нюглясян?! Смотри, неморт ног кӧ вӧчан, бур эн виччысь!

— Верман мунны повзьӧдлыны Сашукӧс...

— Гашкӧ, тэ ветлан сы ордӧ? Гаврил дінӧ да? Висьталан налы, кыдзи-мый делӧыс?

— Менам «паспортӧй» оз лӧсяв татшӧм почётнӧй миссияыслы.

— Тэ, Марсик, талун мыйкӧ не ас кодьыд?

— Буракӧ, сы вӧсна, мый татшӧмтор жӧ казялі тэнсьыд.

— Гм... Но ладнӧ. Ме муні. Пока.

— Пока! Да, коді нӧ заводсаыс? Гашкӧ, ме тӧда да.

— Кимӧн шуӧны. Век тай ещӧ Гена нимакӧд ӧтлаын ветлӧдлӧны. Генаыс штанга лэпталӧм да борьба частӧ судитлӧ.

— А-а, тӧда! Бур гренадёр шӧрӧ веськавсьӧма.


Ӧкмысӧд глава


Люда Туисова талун асыв, кыдзи и век, воис садьмӧдны ассьыс тӧждысянторсӧ — дыр узьысь Габӧӧс; чайтіс, бара ковмас кияс доймытӧдзыс йиркӧдны ӧдзӧсас. Но ӧдзӧс вӧлі восьса нин, а ачыс Габӧ, вӧччан паськӧма, куйліс крӧвать вылын да, буракӧ, мыйкӧ чорыда думайтіс. (Мӧд крӧватьыс ӧні вӧлі тыртӧм, сэні узьлысьыс кӧнкӧ отпускаліс-ветліс.)

— Чолӧм! — шуис Люда чуймӧмсӧ дзебтӧг. — Тэ тай менам талун молодеч. Ачыд садьмин?

— Пиньӧй висьӧ, оз сет узьны, — лӧня шуис Гаврил.

Тайӧ вежсьӧмсӧ Люда пырысь-пыр жӧ казяліс, сы вӧсна мый мукӧд асывъяснас Габӧ пӧттӧдзыс вӧлі тешитчас ныв вылын. Люда эськӧ важӧн шыбитіс татшӧм уджтӧ — кодлы любӧ кывзыны лёк кывъя мортлысь эргӧм-увтчӧмсӧ! — но абу тай аслад вӧляыд: комсомольскӧй организациялӧн бюро тшӧктіс сылы тайӧс вӧчны: тшӧктіс быд асыв садьмӧдны Габӧӧс, мед сійӧ эз сёрмы удж вылӧ. Бюро вылын шуисны, мый тайӧ пӧ тэнад лоӧ комсомольскӧй поручение и тэ пӧ та вӧсна юрнад кывкутан. И со Люда быд асыв котӧртлывлӧ нывъяслӧн общежитиесянь зонъяс оланінӧ да садьмӧдӧ Габӧӧс. А мӧдыс татшӧм нежнӧй тӧждысьӧмсьыд пыр вельмӧ и вельмӧ, пыр яндысьтӧгджыка сералӧ ныв вылын да тшӧтш и комсомольскӧй бюро вылын. Люда неӧтчыд кывліс, кыдзи Габӧ вӧлі ошйысьӧ зон чукӧрлы: «Вот оландырӧй менам пуксис! Асылын мича гӧлӧса чипан чуксалӧ. Мӧд чипан, видзӧдан да, кино вылӧ билет вайӧ».

И со тайӧ Габӧыс талун раммӧма; дженьыдик ныра ыкша чужӧмыс сылӧн Людалы кажитчӧ весиг норӧн. Кыдз он шензьы таысь. Морттӧ, буракӧ, чорыда топӧдӧма пиньыс.

— Удж вылад нӧ он мун либӧ? — юаліс куйлысьлысь Люда.

— Ог вермы. Муна нетшышта пиньӧс, — вомсӧ паськыд ки пыдӧснас вевттьӧмӧн шуис Гаврил.

— Мед сӧмын менӧ бара эз мыждыны тэ вӧсна, — шуис Люда, кодлы неэтша нин сюрліс Габӧ понда. — Ачыд ӧд тӧдан: выль керкатӧ майӧдз помавны кӧсйим, тэрмасьны колӧ.

— Ог вермы, мися! — скӧрысь шуис Габӧ.

Люда мунӧм бӧрын сійӧ игнасис да бӧр водіс. И пырысь-пыр жӧ сійӧс бара кӧртвомаліс мустӧм, повзьӧдчысь думыс, коді войбыд эз и лэдзлы лючки синсӧ лапкерны.

«Буракӧ, кутісны Дрейкӧс?» — со кутшӧм вӧлі тайӧ думыс.

Гаврил юрын — а вежӧрыс сылӧн некор эз вӧвлы ёна писькӧсӧн — ньӧжйӧникӧн бара пондісны выльысь гартчыны тӧрытъя серпасъясыс. Со найӧ Дрейккӧд сулалӧны чипас сайын. Дерт, «удждысьнысӧ» ковмас сылы, Габӧлы. «Небыд нямӧдъяс, полӧны лякӧсьтны кинысӧ! — скӧралӧ ӧні ёртъяс вылас Гаврил. — Быттьӧ деньгаыс, кодӧс эськӧ ӧтлаын юим, абу лякӧссьӧма!.. Со сійӧ воськовтіс пемыдінсянь ныв дінӧ. Мӧдыс, дерт, виччысьтӧмысла весьӧпӧрліс, но, ёмаыд, пырысь-пыр жӧ пондіс горзыны, сумканас на лои дыркодь мырддьысьны и. Горзӧм шыас и воис кодкӧ, тӧв ныр моз. Мыйӧн кылісны лейтенант йылысь горӧдӧмсӧ, сійӧ, Гаврил, пырысь-пыр жӧ кӧсйис усйысьны-пышйыны, но Дрейк кутіс: тайӧ пӧ ылӧдчӧ, вай пӧ велӧдам сійӧс, мед мӧдысь кежлӧ оз сюй нырсӧ, кытчӧ оз ков. Со тай — велӧдісны: сылӧн, Гавриллӧн, вомас кык пинь потӧмаӧсь, быттьӧ сакарторъяс. Лӧсьыда зяткисны сылы тшӧка лыас, идзас кольта моз лэбовтіс лым тола вомӧн, кӧть эськӧ и сьӧктаыс матӧ сизимдас кило.

А Дрейкӧс кӧ збыльысь кутісны? Сылӧн киас кастет вӧлі, удитіс-ӧ сӧтны сійӧн? А сӧтіс кӧ да виис? Выныд ӧд сылӧн тырмас та вылӧ — сійӧ медъён на пӧвстын.

Сэки сылы, Гавриллы, ковмас мунны вокъясыс туйӧд. Ковмас мунны тюрмаӧ. А, гашкӧ, и сідз на ковмас мунны, кутісны кӧ Дрейксӧ.

Оз, сійӧ оз кӧсйы мунны тюрмаӧ!

Гаврил тӧдӧ, мый кӧть сійӧ и ёсялӧ йӧз водзын, кӧть и петкӧдлӧ асьсӧ повтӧмӧн да чорыдӧн, — ачыс бура тӧдӧ, мый ыджыдджык вокъяс сертиыс сійӧ ёна полысьджык да лябджык. Сійӧ оз вермы вокъяс мозыс овны тюрмаын! Найӧ куим пӧрйӧ нин пукалісны и быттьӧ немтор абу и вӧвлӧма, быттьӧ некымын во кежлӧ удж вылӧ медасьлӧны сэтчӧ; а сійӧ — сьӧлӧмыс аслас кылӧ — ӧтчыдысьсӧ оз вермы!

Потӧм пиньясыс Гавриллӧн заводитісны зэв ёна доймыны, дойыс кутіс юр чашкасӧ поткӧдны. Сійӧ чеччис да пель бокас кутчысьӧмӧн пондіс ӧтарӧ-мӧдарӧ шуркъявны-ветлӧдлыны векньыдик жырйӧд. Но дойыс эз лэдз, быттьӧ ветлӧдліс сыкӧд. Сэки пузьӧдіс электроплитка вылын чайник да вомас пӧсь ва босьтӧмӧн кутіс шонтыны потӧм пиньяссӧ, тадзинад вочасӧн личӧдыштіс.

Кутіс сюмавны кынӧмыс. Но кыдзи сёян, кор ӧтар бокас кык пинь потӧма — улісьыс и вылісьыс. Думайтыштӧм бӧрын Гаврил ёна пӧлыньтіс юрсӧ шуйгавыв — мед висян пиньясас оз веськав някляланторйыс — да видзчысьӧмӧн кутіс сюявны вомас нянь тупӧсьысь чеплялӧм сьӧмӧссӧ. Кымыныськӧ сӧмын и удитіс лючки-ладнӧсӧ кылӧдны. Друг няньыс веськаліс потӧм пиняс, и лёк дойысла Габӧ быдсӧн чеччыштліс. Лои эновтчыны сёйӧмсьыс.

«Пуксьӧдасны кӧ, гашкӧ и, Матвей дінӧ веськала, — друг думыштіс сэсся ыджыдджык вок йывсьыс. — Тадзтӧ эськӧ бурджык вӧлі...»

Быттьӧкӧ Енмыс ёрӧма найӧс ставнысӧ. Вок котыр быдӧн ӧткодьӧсь — юысьӧсь да тышкасьысьӧсь. Буракӧ, бать-мамсяньыс татшӧмыс вуджӧма. Мыйӧн Гаврил помнитӧ, бать-мамыс пыр нин юисны да зыксисны. Сиктса йӧз пӧвстын не этшаысь позьӧ вӧлі кывлыны татшӧм сёрнияс:

— Трӧпим керка дінті вӧлі муна да, ӧшиньыс тай кыдз зиль-зёльмунас!

— Сідзкӧ, Трӧпим гозъя бара нин концертасьӧны.

— Сэсся, нылӧ, Трӧпимыс жугалӧм ӧшиньӧдыс кыдз тай ружьеӧн чеччыштас! Вот, мися, и чергӧдас ӧні.

— Кыдз со бара челядьыс, коньӧръяс, олӧны-а?

А сідзи и олісны. Кор пӧтӧсь, а кор тшыгӧсь. А кор и кодӧсь на. Кыдзи кужисны, сідзи и олісны. Ӧд бать-мамныслы винатӧ юигӧн уставитны да велӧдны найӧс вӧлі некор. Куим вок пиысь некод эз помав весиг семилетка.

Гавриллысь думъяссӧ торкис Валерьян Кызродевлӧн воӧмыс.

— Тэ? — Гаврил чуймис и ӧтпырйӧ лолыс радлунӧн тырис. — Ловъя?!

— А тэд эськӧ колӧ, мед ме моргын нин вӧлі, — пинь пырыс сӧдзӧдіс Валерьян. — Сы вылӧ и эновтін менӧ?

— Ме тэд водзвыв шуи, мый колӧ усйысьны. — Гавриллысь сьӧлӧмсӧ бӧр шымыртіс майшасьӧм. — Дзик немторла вӧлі лезитны, кытчӧ оз ков. Сумкаыс сюри, и колӧ вӧлі пышйыны.

— А менӧ ӧд кутісны, — шуис Валерьян, ачыс думсьыс водзвыв радлӧмӧн виччысис, кыдзи мӧрччас тайӧ юӧрыс Габӧлы. Но мӧдыс быттьӧ эз и повзьы:

— Ме видзӧда нин, — шуис Гаврил да бара думыштіс: «Пуксьӧдасны кӧ, мед эськӧ Матвей дінӧ жӧ нин веськала!»

— Тэ, кӧнкӧ, тшӧтш жӧ чайтан, мый милиция шӧрӧ веськалім? — Валерьянлӧн пыр ёнджыка и ёнджыка петіс лӧгыс Габӧ вылӧ. «Тайӧ нӧш юра кретиныслы, тыдалӧ, ставыс веськодь! — ас кежас пинясис сійӧ. — Аддзывсьӧма жӧ другӧс!»

— А мый, эг али мый?

— «Эг али мый! Эг али мый!» — скӧрысь нерыштіс Валерьян. — Скӧтинаяс, ӧти мортысь ставныд пышйид! Трусъяс! Заводса зон ӧтнас вӧлі... Тьпу! Веськыда кӧ шуны, тэсянь, Габӧ, татшӧмтортӧ ме эг виччысь!

— Тэныд лӧсьыд видчыныд, а менам кык пинь потӧма, — думсьыс Валерьянӧс бурмӧдыштны зілиг шуис Гаврил. Сэсся бара на мӧвпыштіс: «Ыджыд вокъясӧй, буракӧ, эськӧ эз пышйыны...»

— А вот босьта да и мукӧд пиньястӧ кисьта, труслысь! — Валерьян весиг вайӧдліс кулаксӧ Гавриллы вом дорас. — Мый ӧні кутан висьтавны, корасны кӧ допрос вылӧ?

— Мыйла нӧ менӧ корасны, ме эг сюр да, — виччысьтӧг шуис Гаврил, и сылӧн дженьыд ныра чужӧм вылын тыдовтчис чуймӧм. — Менӧ кӧть и корасны, понда шуны: мися, первойысь кыла татшӧм дивӧсӧ! — Мыйӧн шеді татшӧм мӧвпыс, Габӧ пырысь-пыр жӧ кутчысис сы дінӧ: — А мый, Дрейк? Мыйла колӧ ставнымлы йӧзасьнысӧ? Дерт, шуам, вермасны тэнӧ пуксьӧдны. Но бурджык ӧтнадлы пуксьыны, ставнымлы дорысь. Гашкӧ, и Матвей вок дінӧ на веськалан. Сійӧ миян юр вундысь кодь. Письмӧ гижа да, ас дінас сибӧдас тэнӧ. Оз сет ӧбидитны. А ми сэсся тэнӧ видлыны волам.

— Сё пасибӧ... Тэ тай зэв бур морт вӧлӧмыд. — Валерьян шемӧсмис Гавриллӧн татшӧм кывъясысь, яндзим тӧдтӧг сы дінысь ӧтдортчӧмысь. — Гадина! — став лӧглунсӧ да зывӧктӧмсӧ гӧлӧсас тӧрӧдӧмӧн шуис Валерьян. — Куйӧд гаг...

А Гаврил друг чепӧсйис койкаланьыс, павтыртіс юр увсӧ да судзӧдіс сэтысь кузь пурт, коді дзирдыштіс ӧшиньӧд пырысь шонді югӧр улын. Сэсся сувтіс Валерьян водзӧ зэвтчӧм вӧркань моз, кор сійӧ лӧсьӧдчӧ чеччыштны бӧрйӧм сам вылӧ.

— Ланьтан кӧ ланьт! — шуис сійӧ руд синъяснас лӧга кодзлалігтыр. — А то сутшкысяс вед...

— Да тэ нӧ мый?! — шемӧсмӧм Валерьян тӧдлытӧг сетчыштіс бӧрвыв. «Сутшкас ӧд татшӧм зверыд!..» — вуджӧртіс юрас тэрыб мӧвп. — Мый нӧ пуртӧн шенасян? Ме вылӧсӧ мый шенасян?..

А мӧдыс, водзвыв чургӧдыштӧм пуртсӧ легӧдігтыр, букыша шуис:

— Вот, Дрейк, менӧ кӧ соритан — боктӧ розьӧда. Ог кӧ ачым вермы, вокъяслы тшӧкта. А найӧ меысь мастерджыкӧсь. Толькӧ видлы соритны...

«Чужйыны кынӧмас, и пуртыс усьӧ! — чардбиӧн югнитіс Валерьянлӧн мӧвп. — Ӧні кӧ та водзын коньӧрӧн лоан, бурӧн он мын сэсся сыысь...» Но Валерьянлӧн зэв ёна висис морӧсыс, и сійӧ эз лысьт уськӧдчыны пурта морт вылӧ, кӧть эськӧ и вынаджык вӧлі Габӧысь. Сылы окота лои кыдз позьӧ ӧдйӧджык петны тайӧ комнатасьыс, шондіа ывла вылӧ петны...

— Но тэ морт вӧлӧмыд... — шуис Валерьян ёна падмӧмӧн; шуис сідзи, мед эськӧ и Габӧӧс водзӧсӧ не скӧрмӧдны, и асьсӧ не омӧльтны-уськӧдны. Сэсся сьӧлыштіс да мӧдӧдчис ӧдзӧслань.

— Эн вунӧд, Дрейк, мый ме висьталі, — петысьлы мышсяньыс казьтыштіс Габӧ.

Валерьян мунӧм бӧрын Гаврил дзебис финкасӧ юрлӧс улас да бара водіс. Шызьылӧм бӧрад пиньясыс нӧшта ёна кутісны доймыны. Видзчысьӧмӧн малыштіс улысса потӧм пиньсӧ, и пырысь-пыр жӧ быттьӧ кок чуньясӧдзыс чунгис. «Этатшӧма лы вермӧ висьны!» Сэсся думъясыс бара на кежисны важ шыбӧльӧ: «Соритас ӧмӧй Дрейкыс? Лысьтас ӧмӧй? А соритас кӧ, мый лоӧ?»

Тӧд вылас уси вӧт, кодӧс мыйлакӧ зэв нин унаысь аддзыліс. Быттьӧ милиционеръяс йӧткыштӧны сійӧс лёк дука пемыд баракӧ. Сэні муртса на удитӧ лолыс шедны, быдладорсянь сы вылӧ уськӧдчӧны кутшӧмкӧ йӧз да пондӧны нетшкыны вывсьыс паськӧмсӧ. Лёкысь нетшкӧны и шӧпкӧны: ми пӧ тэнӧ параша петкӧдны сувтӧдам, та вылӧ пӧ кыз дӧраысь вурӧм дӧрӧм-гач сетам тэныд. Татчӧдз вӧталӧм бӧрын Гаврил пыр садьмыліс. Буракӧ, сьӧлӧмыслӧн ёна тіпкӧм вӧсна. Садьмас вӧлі, да ки ни кок оз вермы вӧрзьӧдны повзьӧмысла. Татшӧм здукъясас сійӧ торйӧн нин ёна поліс веськавны тюрмаӧ, сетліс аслыс кыв — кыдзкӧ шаньджыка овны. Но лун югыдӧ да йӧз дінӧ веськалӧм бӧрын вӧтыс да сы бӧрын майшасьӧмыс регыдӧн бӧр вунлісны, и Гавриллӧн олӧмыс водзӧ гӧгыльтчыліс кыдзсюрӧ да кытчӧ веськалӧ, гӧра вывсянь лэдзӧм из моз.

«Оз прӧста сэтшӧм частӧ петкӧдчы тайӧ вӧтыс, — оз вермы ӧвсьыны ӧні Габӧ. — Мыйкӧ, буракӧ, лоӧ».

Пӧтӧлӧкӧ видзӧдысь синъясыс сылӧн казялӧны сьӧдасьӧм черань вез, кытчӧ, буракӧ, арнас на шедлӧма гут. И друг сьӧлӧмыс ёнтыштӧ сы вывті мунлӧм дойысь.

Сэки сылы вӧлі ар дас ӧти-дас кык. Бать-мамыс лун куим-ӧ-нёль палявлытӧг юисны, сёйны гортас вӧлі немтор. Зонкалӧн ёна сюмаліс кынӧмыс, и сійӧ гусьӧн пырис ӧти керкаӧ, кӧні пызаныс некор эз рекмывлы чӧскыд сёян-юанысь. Сэтысь Габӧ петкӧдіс питшӧг тырыс небыд шаньгаяс, сакар да жаритӧм яй торъяс. И, гашкӧ, первойысь олӧмас сёйис душа и мера. Та бӧрын тшыг кынӧмыс сійӧс бара на некымынысь вайӧдліс йӧз ордӧ. А сэсся и кутісны. Со пӧ тай коді вӧлӧм урӧс каньыс! Сюрис жӧ пӧ медбӧрын!

Кӧзяиныс кӧртавліс зонкаӧс гезйӧн, пыртіс нюдз ньӧр да быд боксянь пондіс швичйӧдлыны. Мыйкӧ жӧ горзіс сэки Габӧ. Но горзӧмыс сылӧн, буракӧ, нӧшта на ышӧдіс скӧрмӧм кӧзяинӧс. Ничево пӧ, лыыд оз чег небыд ньӧрсьыд! Мӧдысь пӧ сэсся, небось, он кут кырымтӧ нюжйӧдлыны!

Ок, кутшӧма скӧрмис сэки Габӧ йӧз вылӧ! Став олӧм вылас. И бать-мам вылас. Сійӧ эз вунӧд нӧйтысьсӧ да кыдзи вермис ёна на пакӧститлывліс сылы. Сэсся и усйысис сиктысь.

Ставыс тайӧ сідз. Но кыдзи мынтӧдчыны черань везйысь ӧні? Не ланьтӧдчыны жӧ сы пытшкын эсійӧ гутыс моз. Гаврил бӧр судзӧдіс юрлӧс улысь сера воропа пуртсӧ, чунь помъяснас видлалыштіс сылысь лэчыд дорсӧ, сэсся тумбочка пыдӧссьыс перйис пуртӧс, сюйис сэтчӧ пуртсӧ да кутіс пасьтасьны.


Дасӧд глава


— Сашук! Ме муні. Кылан, бура сёй! Кухняад, пызан вылын, дасьтӧма колькъяс. Холодильникад эм калбас. Чеччан да дзужнит-жаритышт. Чайтӧ юныд тортыд эм на и. Кылан, сёйтӧг эн коль узьӧмыдла. А то юрыд оз кут уджавны. Но, ме муні! Да, Сашук, талун рытнас ме сёрмышта. Собрание миян. Водзджык кӧ воан, эн виччысь менӧ, ӧтнад ужнайт.

Тадзи гораа сёрнитіс пиыскӧд Софья Степановна, трюмо водзын вӧччиг-сулалігмоз. Сійӧ лӧсьӧдыштіс юр вывсьыс небыд гӧна пежку шапкасӧ, бергӧдчыштліс ӧтарӧ-мӧдарӧ. Зеркалӧсянь сылӧн быд вӧрзьӧм бӧрся сюся видзӧдіс сьӧд синъяснас гӧгрӧс, банйӧм чужӧма ань. Тайӧ аньыс кӧть эськӧ и йӧткыштчис нин нелямын арӧсысь и эз нин вӧв ылын сылы ветымынӧдз, чужӧм-рожанас вӧлі шыльыд на, а синъясыс кажитчисны кызь арӧса нывлӧн кодь на визулӧсь.

Софья Степановна пыркнитліс юрнас рӧмпӧштансалы, ас кежас гажаа шуис сылы: «Ничево на!» — и чожа петіс гортсьыс.

Тайӧ аньыс вӧлі тэрыб. Уджаліс ӧти министерствоын, министрӧс вежысьӧн, а сыысь ӧтар вӧлі парторганизацияса секретарӧн да куим-ӧ-нёль разнӧй пӧлӧс общественнӧй комитетса да комиссияса членӧн. И ветлӧдліс Софья Степановна тэрыба: позьӧ шуны, чеччаліс топыд мач моз и быдлаӧ вевъяліс. И сёрнитліс сійӧ тэрыба да уна. И кӧть кӧні да кӧть кодкӧд сійӧ эз вӧвлы, коді кӧть эз веськавлы сыкӧд орччӧн мунысьыс либӧ пукалысьыс, — сёрнитысьнас векджык вӧлі Софья Степановна. А мукӧдыс кывзылісны. Сёрниыс Софья Степановна вомысь петіс сэтшӧм жӧ гылыда да помасьлытӧг, кыдзи му пытшкысь булькйӧ-петӧ ключ ва.

Софья Степановналӧн верӧсыскӧд, Пётр Максимовичкӧд, ӧти пи и вӧлі. Дыр виччысяна пи. Гозъя чайтісны нин, мый ковмас, буракӧ, бӧбыльясӧн коллявны нэм помсӧ, но Енмыс эз на жӧ дзикӧдз эновт найӧс. Комын арӧс бӧрын нин Софья Степановна друг сьӧктіс, сэсся и вайис сьӧд синъяса пиӧс. Мыйта радлӧмыс вӧлі сэки гозъялӧн! Тшӧтш и пӧрысь пӧчлӧн, Софья Степановна мамлӧн.

А сыӧдз ӧти кадӧ гозъя дзикӧдз нин дӧзмылісны ӧта-мӧд выланыс. Кыкнанныслы кага колӧ, а сійӧ некыдзи оз ло. Скӧрмасны вӧлі да ӧта-мӧднысӧ мыждӧны: тэ пӧ таысь мыжаыс! Ӧтчыд гозъя весиг торйӧдчылісны, Пётр Максимович мунліс гортсьыс во джын кежлӧ. Но торйӧн олігад гозъялӧн, буракӧ, бырис жӧ гажыс ӧта-мӧдсьыныс да бӧр ӧтлаасисны. А веськыда кӧ шуны, не сӧмын та понда бӧрсӧ ӧтлаасисны найӧ. Сэки Софья Степановнаӧс буретш вӧлі кӧсйӧны кыпӧдыштны удж вылас; корлісны морттӧ министерствоса партбюроӧ да шуисны: кыдзкӧ-мыйкӧ колӧ бурмӧдны гозъя кост олӧмнытӧ, а то пӧ йӧзыс быдторсӧ сёрнитӧны... И Софья Степановна ладмӧдіс, йӧз син водзын тай лада лои налӧн олӧмыс. А сэсся чужис Сашук да быттьӧкӧ ёнджыка нин матысмӧдіс бать-мамсӧ.

Гӧтырыс серти Пётр Максимович дзик мӧд пӧлӧс морт. Софья Степановна кӧ пановтӧма йӧзӧс аслас тэрыблунӧн да писькӧслунӧн, то верӧсыс сылӧн, мӧдарӧ, быттьӧ кольччыштӧма — сійӧ зэв ньӧжмыд, лабутнӧя тапикасьӧ-ветлӧдлӧ да сідзи жӧ тэрмасьтӧг шмотӧдчӧ-сёрнитӧ кыз льӧбъяса вомнас. Бӧръя воясӧ Пётр Максимович ёнакодь жебмис: вир-яйыс косьмис, чужӧмыс пемдіс, и мортыд лои кыдзкӧ зэв нин коньӧрӧн, кыдз шуласны, видзӧдлынысӧ немтор вылӧ.

А ӧд армияысь сійӧ волӧма молодеч кодь, кӧть и тушанас абу пановтӧма йӧзсӧ: вир-яйыс шыльыд вӧлӧма, вердаса бычӧпилӧн кодь. Война бӧръя воясӧ сійӧ служитӧма интендантскӧй часьтын: неэтша кӧлуй вайӧма сьӧрсьыс — быдсяма ковёръяс да кӧм-паськӧм, тшӧтш и тырмымӧн сьӧм. И сэки мортыд сьӧлӧм вылас воас Софья Степановналы, кӧть эськӧ и дас арӧсӧн олӧмаджык.

Но да ӧд сэки, война бӧрад, бӧрйысьмӧн мындаыс эз вӧв мужикуловыд. И Пётр Максимович кодь жӧникъясыд вӧліны бур туйынӧсь, торйӧн нин вывтіджык кисьмӧм нывъяслы.

Мыйла Пётр Максимовичыс кадысь водз пондіс небзьыны? Öд абу на сійӧ сэтшӧм пӧрысь? Код тӧдас. Мортыд тай не сӧмын сёян-юан тырмытӧм вӧсна косьмӧ.

Гашкӧ, кутшӧмакӧ вина юышталӧмыс тӧчитыштіс сійӧс, а ёнджыкасӧ, гашкӧ, сійӧ, мый гӧтырыскӧд, Софья Степановнакӧд, эз жӧ аддзы колана шудсӧ. Пётр Максимович сідзсӧ тӧлка морт и эз вермы не казявны, мый гӧтырыслы воысь-во лоӧ ковтӧмджыкӧн и ковтӧмджыкӧн.

Уджалӧ Пётр Максимович экономистӧн, частӧ ветлывлӧ командировкаясӧ. И колӧ веськыда шуны, мый командировкаад петавны мортыдлы ещӧ и нимкодь на. Сэні, ӧтикӧн пуртікасигӧн, сійӧ неэтша шойччывлӧ турӧб кодь зіль да катша кодь варов гӧтыр дінас олӧмысь.

Дерт, татшӧм гозъя костад кӧзяин пыдди семьяын век вӧвлі Софья Степановна. Торйӧн нин кутны кӧ тӧд вылын, мый зіль нывбаба верӧс сайӧ петӧмсяньыс ёна быдмис удж вылас, велаліс веськӧдлыны йӧзӧн.

Со кутшӧм бать-мамлӧн пиыс куйліс вольпасьын, небыд эшкынӧн шебрасьӧмӧн. Бабыс кувсьӧм бӧрын — а сысянь колис нин нёль во — комнатаыс Сашуклы лои ӧтнаслы вылӧ: сійӧ абу ыджыд, но абу нин и сэтшӧм ичӧт; видзӧдӧ лунвылӧ, и кузь тӧвбыдӧн гажтӧмтчӧм да яра нюмъялысь шонді быттьӧ дзоньнас пырӧма ӧшиньӧдыс.

Сашук асывъяснад некор оз тэрмась чеччынытӧ. Сы вӧсна мый велӧдчӧ мӧд сменаын — сідз тай сылы лӧсяліс: мӧдӧд классянь лои рытъя сменаӧ ротъявны. И бать-мамыс мунӧм бӧрын бурпӧт на узьлывлӧ. Ӧні мамыс со котӧртіс жӧ удж вылӧ, а батьыс командировкаын. Сідзкӧ, Сашук — ачыс кӧзяин, вермас вӧчны мый лолыслы колӧ, узьны кӧть гитараӧн ворсны, сьывны кӧть йӧктыны, включитны «Яуза» магнитофонсӧ да.

«А, пӧжалуй, и бур, мый мӧд сменаыс эм, — мӧвпалӧ Сашук, — сизим часнад менӧ эськӧ пушкаысь лыйӧмӧн эн вермы садьмӧдны».

Сашук зільӧ не мӧвпавны тӧрытъя йывсьыс, кыдзи сӧмын вермӧ ылӧдлӧ асьсӧ. Но лоӧмторсӧ, лым пытшкысь писькӧдчысь тувсов шорӧс моз, нинӧмӧн оз вермы потшны. «Кӧть и кодӧскӧ кутіс милицияыс, менӧ оз явитны, — медбӧрын писькӧдчӧ шорыс зонка юрын. — Да, шуам, кӧть и явитасны, мыйысь менӧ мыждаснысӧ? Ме немтор эг кер да. Сэсся ӧд меным дас вит арӧс на сӧмын, пуксьӧдныд оз позь. Да кӧть и вӧлі дас квайт нин, мама эськӧ всё равно дорйис. Сійӧс став начальствоыс тӧдӧ. Сійӧ миян быдтор вермӧ...» Письтӧм шорыс Сашук вежӧрын ойдӧдӧ-пӧдтӧ став мукӧд думъяссӧ, и сійӧ весиг оз слӧймы думыштны, кутшӧм дой ваяс мамыслы, йӧзасяс кӧ.

Сашук мунӧ кухняӧ, пуктӧ газ плита вылӧ шонтыны чай. Сёйны сылы оз ков, тӧрытъя юӧм бӧрын зэв ёна висьӧ юрыс. Заводитлӧ весавны пиньсӧ, но мыйӧн сӧмын пастаа щӧткаыс веськалӧ вомас, заводитӧ вуктӧдлыны и лоӧ эновтчыны пинь весалӧмысь. Сашук зывӧкпырысь видзӧдлӧ тасьті вылӧ, кытчӧ мамыс дасьтӧма колькъяс да калбас. «Он кӧ сёй, бара шум кыпӧдас», — мӧвпалӧ Сашук. Сійӧ терпитны оз вермы кольктӧ; кутшӧма кӧть мамыс оз тшӧкты, некыдзи эз велав, пыр мырдысьӧн сорӧн сёйӧ. Сашук кӧсйӧ пальснитны колькъяссӧ помӧй ведраӧ, но сэки казялӧ балкон вылысь гулюясӧс и нюмдӧ: «Часлы, ме тіянӧс чӧсмӧдышта!» Сэсся сійӧ пуӧ кык кольк да посни торпыригъяс вылӧ нырӧмӧн вердӧ гулюясӧс. Ӧти сайын шыблалӧ и калбасторъяс. Ачыс тортӧн юӧ чай.

Нуръясьыштӧм бӧрын Сашук бӧр мунӧ аслас комнатаӧ, пуктӧ радиола вылӧ пластинка (магнитофонысь кындзи эм сылӧн и радиола) да бӧр водӧ. Ньӧжмыдіника ворсӧ джаз, кодкӧ гӧгӧрвотӧма сьылӧ, но Сашуклы талун оз йидж сьӧлӧмас.

«А, гашкӧ, Дрейк да Габӧ пукалӧны нин да? — друг думыштӧ сійӧ и первойысь зэв ёна повзьӧ. — Гашкӧ, коліс висьтавны мамалы? Гашкӧ, Дрейкыс да Габӧыс явитісны, и мамалы звӧнитлісны нин милициясянь? Звӧнитлісны кӧ, мый сійӧ сэки думыштіс? Гашкӧ и, эз эскы. Оз пӧ вермы лоны, мед менам пи. Тайӧ пӧ кодкӧ мӧд».

Сашук ымӧстӧмӧн кымыньтчӧ, юрсӧ сюйӧ юрлӧс улас. Но верман ӧмӧй дзебсьыны мӧвпъяссьыд? Накӧд вермасьны сэтшӧм жӧ сьӧкыд, кутшӧм сьӧкыд венласьны кодзувкотъяскӧд, кор тувччан налӧн жӧдзысь-пуысь кар вылӧ.

«Колӧ мунны, бӧр колӧ мунны на дінысь, — вийсьӧ думнас Сашук. — Мунны, кытчӧдз абу на сёр!

А сёр кӧ нин?»

Сашук ӧні мый вынсьыс ёрӧ сійӧ лёк лунсӧ, кор тӧдмасис «тайӧ бандаыскӧд».

Седьмойӧдз Сашук вӧлі медъёнӧн асланыс классын, быдӧнӧс вермыліс, быдӧн повліс сыысь. Сашуклы вӧлі зэв любӧ. Тайӧ велӧдчан во заводитчигӧн на дінӧ воисны выль йӧз, на пӧвстын кык зон. Найӧ вӧліны Сашук кодь жӧ вынаӧсь и, содтӧд, зэв ёна дружитісны ӧта-мӧдыскӧд. Сашук эськӧ и пондыліс босьтны найӧс ас кабырас, но кык друг шӧтясисны. А ӧтчыд, рытын, школаысь мунігӧн, асьсӧ атакуйтісны. Кыкӧннад чергӧдісны кынмавны заводитӧм му вылӧ и, гашкӧ, бур пӧт на пӧвсалісны, но виччысьтӧг воис мездысь. Тайӧ вӧлі ыджыд тушаа зон. Бӧртинас тыдовтчис — Дрейк. Сійӧ горт дінӧдзыс колльӧдіс Сашукӧс. Зонка висьтавліс сылы класса делӧяс йылысь, гортса олӧм йывсьыс и.

«Ме видзӧда да, зонмыс тэ смел! — ошкис мездысьыс. — Кӧсъян дружитны? Сэки тэнӧ ни ӧти пон оз лысьт вӧрзьӧдны. Сэк ми тэнсьыд врагъястӧ сэтшӧма топӧдлам, мый найӧ кӧчьясысь рамджыкӧсь лоӧны!»

Сашуклӧн лӧгыс пуис-петіс сылысь славасӧ мырддьысь зонъяс вылӧ и пырысь-пыр жӧ шуис: «Да». А сэсся Валерьян тӧдмӧдіс сійӧс аслас войтыркӧд, и зонкалы ковмис примитны присяга:

«Клянитча адмирал-корсар Френсис Дрейклӧн некор куслытӧм паметьӧн, мый ме кӧ коркӧ вузала ассьым ёртъясӧс, кута кӧ паськӧдны миян олӧм йылысь тайна, сэки мед быд корсар быд паныдасигӧн сьӧвзьӧ меным чужӧмӧ...»

Сэсся сійӧ войтырыскӧд тшӧтш петіс войся карӧ. И ӧти рытӧ сылы тшӧктісны матыстчыны код дядьӧ дінӧ да нуӧдыштны сійӧс бокӧ...

Сашук ёнакодь поліс сійӧ лун-войсӧ. Но, такӧд тшӧтш, и ачыс аслыс неэтша кажитчис сыысь, мый лысьтӧ татшӧмторъяс вӧчны. А выль ёртъясыс, кыдз кужисны, пӧльтісны зонкалысь тайӧ чувствосӧ.

Раммӧм синъясӧн пондісны видзӧдны Сашук вылӧ и сійӧс нӧйтысь зонъяс. Сы вӧсна мый Дрейк да мукӧдъяс шуӧмаӧсь налы кыв-мӧд. Сідзкӧ, Сашук бӧр лои ыджыдалысь пыдди классын.

Сэсся вӧлі Марс ордын койташ. Сашук рытывбыд йӧктіс Зина нима нывкӧд, коді вӧлі ар кӧкъямысӧн ыджыдджык сыысь. Зина вӧлі ыджыд тушаа да гӧгрӧс пельпомъяса, шыльыд мича чужӧма да топыд вир-яя. Сійӧ вӧлӧм верӧс сайын нин, мужикыс служитіс армияын. Том гозъялӧн быдмис куим арӧса ныв — сэки сійӧ узис Зина мамкӧд — а ачыс Зинаыс петіс «пальӧдчыштны».

Найӧ мыйлакӧ колины куш кыкӧн квартираын. Слабиника дзувъяліс войся лӧз би, Зина топӧдчис Сашук дінӧ ыджыд шоныд тушанас да пӧся шӧпкӧмӧн юаліс:

— Сашук, разявлін-ӧ тэ коркӧ ныв морӧсысь ковта кизьяс?

— Эг... — шуис Сашук вошӧм гӧлӧсӧн.

— Сідзкӧ, тэ немтор на он тӧд...

Сашук пондіс разявны Зиналысь морӧс кизьяссӧ. Киясыс сылӧн тірзисны, некыдз эз вермыны мынтӧдавны петляясысь.

— Ок тэ, кутюк! — пӧся шӧпкӧдіс Зина да жара окаліс сотчысь-дрӧжжитысь зонкаӧс, шамраліс-топӧдліс сылысь леторос кодь вӧсни да винёв тушасӧ.

Сэсся сёрӧнджык Зина кыпӧдіс яндысьысь Сашуклысь юрсӧ восьса морӧс вылас да югъялысь синъяснас сійӧс меліаліг шуис:

— Но вот, Сашук, тэ и лоин мужичӧйӧн.

Сашук вӧлі дась му пырыс мунны яндзимысла. Но мӧд, ӧнӧдз тӧдлытӧм чувство, вӧлі ёна вынаджык яндзим дорсьыс: сылы вӧлі помтӧм лӧсьыд кывны Зиналысь зумыд пӧсь морӧссӧ, пӧся окалӧмсӧ, аддзыны сылысь дзирыд синъяссӧ. «Да ме и збыльысь вӧлӧм немтор на ог тӧд!» — шудаа думайтіс Сашук.

— А тэ абу нин нач зонка вӧлӧмыд. Тэ чӧскыд нин вӧлӧмыд, — меліаліс-сёрнитіс Зина, а Сашуклы вӧлі муса тайӧ сёрниыс, Зиналӧн кывъясыс вӧчисны зонкаӧс верстьӧджыкӧн да вынаджыкӧн.

Сэсся Зиналӧн чужӧмыс быттьӧ вуджӧртчыліс, сійӧ ышловзис да вежсьӧм гӧлӧсӧн шуис:

— Водзджык эськӧ лои тэнад заводитӧма да, мый сэсся вӧчан. Коркӧ, гашкӧ, и лёк кывйӧн кутан казьтывны менӧ...

— Мый тэ! — пӧся шуис Сашук да дзебсис чужӧмнас Зиналӧн морӧсӧ. — Тэ кӧ эськӧ тӧдін, кутшӧм шуда ме! Сэтшӧм шуда!.. Шуда!..

— Йӧй на да — сы вӧсна, — сераліс Зина.

Вежон чӧж Сашук ветлӧдліс код морт кодь. Найӧ быд лун аддзысьлісны Зинакӧд: то рытын, школа бӧрын, а мукӧддырйиыс и лунын — школаӧ мунтӧдз. Сашуклӧн йывмис чужӧмыс, син гуранъясыс вӧйисны. Сійӧ кызмырдысьӧн ветлӧдліс школаӧ, немтор йылысь сылы эз вӧв окота думайтны. Сійӧ сӧмын сьӧлӧм пыдзрасьтӧдзыс мучитчис-виччысис, кор нин бара аддзысясны Зинакӧд.

Весиг уджӧн тырӧм, спокой тӧдтӧм мамыс медбӧрын казяліс пиыслысь вежсьӧмсӧ.

— Он-ӧ тэ вись, Сашук? — юаліс ӧти асылӧ Софья Степановна. — Мыйкӧ быттьӧ омӧльтчыштін бӧръя каднас.

— Ог жӧ вись, мама, — бурӧдіс мамсӧ Сашук. — Ми ӧти ёрткӧд приёмник заводитім вӧчны, ёна лоӧ думайтны. Сы вӧсна и сёрмыштла мукӧддырйиыс.

— Зӧлӧтӧй тэ менам! — бӧр нимкодь лои Софья Степановналы. Сійӧ пыр нимкодясьліс, кор казявліс пиыслысь, сылӧн характерысь аслас кодьӧс жӧ: мыйкӧ вӧчны зільӧм, инӧ ӧшйытӧмлун. И дзугыльмывліс, кор Сашук овлывліс батьыс моз ньӧжмыдӧн. И век жӧ Софья Степановна эскис, надейтчис, мый пиыслӧн характерын зіль руыс лоӧ вынаджыкӧн да вермас лёк ньӧжмыдлунсӧ (верӧсыслысь кодь сямсӧ терпитны оз вермы), и Сашук лоӧ сы кодьӧн жӧ, Софья Степановна кодьӧн, обществолы зэв колана мортӧн.

Тайӧ ыджыд эскӧм радиыс Софья Степановна эз торкав Сашукӧс ас мывкыднас олӧмысь; сійӧ, кор пансяс вӧлі та йылысь сёрниыс, быд пӧрйӧ казьтыштліс, мый челядьӧс колӧ лэдзны ас морттуйнасджык овны, оз ков топӧдны-дзескӧдны найӧс бать-мамлӧн вӧляӧн. Сёрнитнытӧ эськӧ и сёрнитіс тадзи, но, веськыда кӧ шуны, Софья Степановна неуна ылӧдчыштіс: татшӧм шуасьӧмъяснас сійӧ кӧсйис сайӧдны челядьӧс воспитайтӧмын ассьыс жеблунсӧ.

Збыль вылассӧ делӧыс мӧд ногаджык вӧлі. Дас ӧти арӧсӧдз Сашукӧс быдтісны-сӧвмӧдісны куимӧн — мамыс да батьыс, а нӧшта и бабыс. Тайӧ вӧлі зэв зіль пӧч, сійӧ бергӧдіс-вӧчис став гортса уджсӧ: пусис и пӧжасис, песласис и лавкаӧ котраліс, вотчис и Сашукӧс видзис. Сы дінын нылыс, Софья Степановна, ачыс пыр кага кодь вӧлі, пыр пуксьыліс дась пызан сайӧ, тӧдіс сӧмын ассьыс уджсӧ. А коркӧясӧ и ырыштчыліс пӧрысь мамыс вылӧ, мый сійӧ не сідзи быдтӧ зонкаӧс, да заводитліс вӧчны ас ногыс. Но тайӧн сӧмын падмӧдліс ставсӧ, сы вӧсна мый Софья Степановна ачыс лючкисӧ эз тӧд, кыдзи колӧ быдтысьны. Да и дыр ноксьыны пиыскӧд сылӧн эз вӧв ни кад, ни терпенньӧ.

Батьыс жӧ, Пётр Максимович, позьӧ шуны, гусьӧникӧн и сёрнитліс-меліасьліс пиыскӧд, кӧть эськӧ и ёна радейтліс сійӧс. Ёнджыкасӧ батьыс ветлӧдліс командировкаясӧ и, гашкӧ, вывтіджык вӧлі велалӧма вина дінӧ. Кодавнысӧ эськӧ и эз кодав, но юыштліс тшӧкыдакодь. Ӧтчыд, Сашалы вӧлі сэки ар дас, зонка юаліс гажа юра батьыслысь:

— Пап, тэ эськӧ коді?

Мӧдыс курыда нюммуніс да шуис тешкодя:

— Ме? Ме, другӧ, муж при Дуньке.

Зонка эз гӧгӧрво да выльысь пондіс юасьны. Но мӧдыс эз кут стӧчмӧдны, шуис сӧмын:

— Коркӧ быдман да гӧгӧрвоан.

Пётр Максимовичлӧн тайӧ вӧлі мӧд гӧтыр. Воддза гӧтырыс сылӧн оліс Украинаын, сэні жӧ быдмис и Сашуклӧн чой, код йылысь зонка, дерт, нинӧм эз тӧд ни эз кывлы.

Буракӧ, тайӧ нывка йывсьыс частӧ мӧвпавліс Пётр Максимович, кор дыр кежлӧ сайӧдчывліс аслас жырйӧ.

Кор пӧрысь баб кувсис, Софья Степановна дзикӧдз шӧйӧвошліс. Сы мында удж вӧчлӧма горт гӧгӧрыс мамыс! Босьтны кӧ быттьӧ став уджсӧ аслас киясӧ, ковмас эновтчыны уна общественнӧй уджысь. Тайӧс Софья Степановна эз вермы вӧчны. Сійӧ эськӧ пырысь-пыр жӧ косьмис, ӧтдортчис кӧ йӧз дінысь. Сійӧ вӧлі сьӧлӧмсяньыс эскӧ, мый вайӧ обществолы ыджыд пӧльза, ёна унджыкӧс мукӧдъяс серти.

А гортас мужикъяслы вӧляджык лои овны. Дерт, оз позь шуны, мый Софья Степановна оз вӧлі казяв тайӧс. Казялӧ! Сійӧ не этшаысь думайтліс, мый лоӧ кӧ Сашуккӧд омӧльтор, то йӧймас эськӧ. Но Софья Степановна чорыда эскис: сылӧн пи оз вермы лоны лёк мортӧн!

А Сашук эз вӧв ни мамыс кодьӧн, ни батьыс кодьӧн. Сійӧ быдмис ас кодьысӧн. Школаын велӧдчис эз омӧля. Ӧти кадӧ, кор бабыс ловъя на вӧлі, весиг «лучшӧйӧн» лыддисны. Но век жӧ ыджыд терпенньӧ сылӧн эз вӧв. Ас йывсьыс велаліс думайтны ыджыда, унаторйӧ нин босьтчыліс: авиамодельнӧй кружокӧ ветлӧдліс, шахмат секцияӧ гижсьыліс, музыкальнӧй школаӧ пыраліс, но помӧдз немтор на эз вайӧдлы, быд пӧрйӧ дышӧдліс. Гашкӧ, сы вӧсна, мый ичӧтсяньыс быдтор кокниа шедіс сылы? Мыйкӧ кӧ ковмас, то бабыс, то мамыс, то батьыс пырысь-пыр и мыччӧны-сетӧны сылы. Ӧти кӧ йӧртас, мӧд сетӧ, весиг радпырысь сетӧ, мед зонка сійӧсджык радейтас.

Сашук жӧ медъёна радейтліс бабсӧ. Мам йывсьыс сійӧ ичӧтысянь кывліс йӧзсянь ыдждӧдлана кывъяс, век ошйысьліс мамнас тшӧтшъяяс водзас. Но торъя матыслун эня-пиа костын эз вӧвлы. Зонка полыштіс мамсьыс. Софья Степановна жӧ волывліс гортас мудз, быдторйысь регыд дӧзмыліс, меліасьӧм вылӧ сылӧн выныс эз нин тырмыв.

Эз вывті радейт Сашук и чӧв олысь батьсӧ. Гашкӧ, сылы, мужик мортлы, эз кажитчы, кыдзи батьсӧ лунысь-лун кеслӧ мамыс, а мӧдыс кыв ни джын оз шу воча? Чӧв олӧмнас на командировкаӧ ветлӧдлӧмнас сӧмын выналӧ.

«Збыльысь, «муж при Дуньке»!» — ӧтчыд дивитіс Сашук батьсӧ, кор усины тӧд вылас сылӧн коркӧя кывъясыс.

Мый медъёна кӧсйис Сашук олӧмас? Сійӧ эз на тӧд. Но лювалӧм-нюжалӧм тушаас чукӧрмис нин прамӧй уна вын, тайӧ гӧгӧрвотӧм на выныс корис, чуксаліс мыйкӧ вӧчны велӧдчӧмысь ӧтар. Корис вӧчны мыйкӧ тӧдчанаӧс, сьӧлӧм бурмӧданаӧс.

И сэки Сашук паныдасис «корсаръяскӧд». Найӧ отсалісны сылы бӧр кыпӧдчыны классын медвылынӧдз. Найӧ велӧдісны юны вина. На отсӧгӧн Зина-салдатка «вӧчис сійӧс мужичӧйӧн». Сашук аддзысьліс сыкӧд кык вежон чӧж, а сэсся радейтчӧм вылӧ зэв азым том нывбаба мустӧммис сылы. Сашуклы вӧлі любӧ мунны «корсаръяс» чукӧрын рытъя карӧд, вӧлі любӧ казявны, кыдзи верстьӧ зонъяс полӧны наысь...

Кутіс нин матысмыны школаӧ мунан кад. Но Сашук пондіс повны школаас мунны. Сылы заводитіс кажитчыны, мый став школаыс тӧдӧ нин сылӧн «корсаралӧм» йылысь. И сійӧ эз пет эшкын увсьыс. Первой колӧ вӧлі виччысьлыны мамсӧ.

Но медводдзаӧн воис Дрейк, сылы ковмис куим-ӧ-нёльысь звӧнитны, кытчӧдз Сашук эз восьты. Валерьян вӧлі жугыль чужӧма; кор тӧдмаліс, мый некод сэсся абу керкаын, нораа и бурысь шуис:

— Буракӧ, сюрим, Сашук. Ме йӧзаси...

Сашуклӧн пемдыліс син водзыс, ки-коксьыс дзикӧдз бырлі эбӧсыс. Эз и тӧдлы, кыдзи вазисны синъясыс.

— Мый нӧ ӧні лоӧ?! — юаліс коньӧр моз.

— Ог тӧд, — ышловзис Валерьян. Сэсся велӧдіс, кыдзи колӧ кутчысьны, мый висьтавлыны, быттьӧ корасны кӧ. Первойысь пӧ аддзысим, юыштім и эз тырмы... Сашукъяс ордӧ восьлалігӧн Валерьян кӧсйис висьтавны сылы, мед зонмыс оз пов: ме пӧ тэнӧ ог явит. Но керкаӧ пырӧм бӧрын Дрейклӧн думыс друг вежсис: «Сашукыслӧн мамыс вермас медъёна дорйыны миянӧс».

Валерьян мунӧм бӧрын Сашук ырӧстӧмӧн бӧрддзис. Медъёна сійӧ поліс мамсьыс, сыысь, мый лоӧ мамыскӧд, кор тӧдмалас сылӧн татшӧм делӧяс йылысь. Воліс весиг дум ӧшӧдчыны. Сійӧ заводитліс мӧвпавны-лыддьӧдлыны, мыйӧн позяс шыркнитны голясӧ. Но кор думнас быттьӧ аддзис асьсӧ нюжӧдӧм кывъяӧн да печенча кодь лӧзӧдӧм чужӧмаӧн, чур-чермунліс.

Сэки кодкӧ выльысь звӧнитіс. Тайӧ вӧлӧма Габӧ. Сылӧн лӧга дзувъялісны синъясыс, сійӧ пыригмозыс жӧ юаліс:

— Дрейк эз волы?

— Воліс...

— Сволочь, гад... Ме сійӧс мортӧн лыддьылі, а сійӧ няр кукань вӧлӧма. Ӧтнас сюрис и ставнымӧс кӧсйӧ вузавны. Но мед толькӧ видлас! Сэки тӧдмалас Габӧӧс! Тэ, Сашук, корасны кӧ кытчӧкӧ, лысьтас кӧ вузавны, — висьтав: ме пӧ немтор ог тӧд... Ставным сідзи висьталам. Куттӧмыд абу на вӧр! Пондам соссьыны, мед видлӧны докажитны...


Дас ӧтиӧд глава


Светаӧс гортас важӧн нин виччысисны. Посводзсяньыс на сійӧ кыліс пианинолысь мыла шыяс да Максимлысь лӧсьыда сьылӧмсӧ. И Светалы зэв нимкодь лои, мый воӧмаӧсь ёртъясыс. Аски шойччан лун, позяс бурпӧт пукавны, гажӧдчыштны, личӧдны бӧръя лун-войнас ёнакодь шызьылӧм сьӧлӧмсӧ.

— Чолӧм артистъяслы! — порог дорсянь кыпыда горӧдіс Света.

Ворсысь-сьылысьяс пыр жӧ бергӧдчисны сылань, уськӧдчисны паныд.

Первойӧн шамыртіс-сывъяліс Светаӧс небыд кыз сойяснас Катя, коді таӧдз ворсіс пианиноӧн.

— Светка, балбеска, — тэрыба сёрнитіс сійӧ, — кымынысь ме тэд шулі: эн ветлы ӧтнад сэтшӧм сёрӧн! Ловтӧ босьтасны... Бур ещӧ, мездысь на кыськӧ сюрӧма. Кутшӧмкӧ йӧй аддзысьӧма.

Сэсся Светаӧс кыкнан киӧдыс меліа кутліс Максим, шӧркоддьӧм тушаа, пашкыр сьӧд юрсиа зон. Еджыд чужӧмсӧ сылысь кыкнан боксяньыс, дзик тшӧка лы дінӧдзыс, нюлыштӧмаӧсь сьӧд кывъяс кодь бакенбардъяс; вылыс пар весьтас сьӧдӧдіс вӧсньыдик, ной шӧртысь не кызджык, устор; сьӧд тшӧтьтор мыччасис и ёсь тшӧка лы рӧч йылас. Нывлы синъясас пӧся да тӧждысяна видзӧдіг, Максим шуаліс:

— Света, милая, тэ нӧ ловъя на? Висьталісны да, мыйсӧ нин эг чайт ме...

— Да мый ті ставныд водзвыв гуаланныд менӧ? — сераліс Света. — Ме ӧмӧй нӧ кулысь кодь?

— Героиня кодь! — гораа шуис Катялӧн кавалерыс — косньӧд тушаа, чангыля ныр вылас вожӧдӧм кыз ӧчкиа Рудольф. Сэсся сійӧ, сёян-юанӧн тыр пызан вылӧ индіг, содтіс: — И героиняӧс виччысьӧ царскӧй ужын!

Батьыс, Николай Васильевич, буретш вӧлі лӧсьӧдӧ-корсьӧ пызан. Сійӧ юасяна синъясӧн кыйкнитлывліс ныв вылас и, мыйӧн сӧмын казяліс Светалысь радлунӧн югзьысь чужӧмсӧ, пырысь-пыр жӧ тшӧтш нимкодьмис.

Тані жӧ вӧлі и пӧрысь бабыс. Кор ныла-зонма вешйыштісны Света дінысь, сійӧ матыстчис внучкаыс дінӧ, босьтіс сылысь шыльыд кисӧ аслас чукырӧсь да гӧрӧдӧсь киясас да юаліс:

— А эсійӧ нӧ, тӧрытъя усьлысь зонмыд, абу? Кӧні нӧ сійӧ?

— Гортас, бабӧ, гортас! — шуис Света меліасьысь синъясӧн бабыс вылӧ видзӧдіг. И сэк жӧ мӧвпыштіс: «Буракӧ, бабӧ сэки эз эскы Кимлӧн усьӧмлы».

— Светка, но висьтась нин, висьтась, кыдзи-мый вӧлі! — ставлысь гӧлӧсъяссӧ венӧмӧн тшӧктіс Катя.

— Первой пуксямӧй пызан сайӧ! — корис Николай Васильевич.

— А ме талун код нин, папа, — сералігтыр шуис Света. — Код и пӧт. — И ныв висьталіс Кызродевъясӧ ветлӧм йылысь, а войтырыслы — и тӧрытъя йывсьыс.

— Сідзкӧ, сюрисны! — скӧраліс и нимкодясис Катя. — Ставнысӧ колӧ пуксьӧдны, шыш чукӧрӧс! А то — юр яндзим: нывъяс вылӧ усьласьӧны! Чистӧйджык лоӧ воздухыс карын.

— Шуан, Кызродевыс — майор? — Рудольф читкыраліс кыз ӧчки саяс синъяссӧ да долыдпырысь воча ниртіс кияссӧ. — Светка, тэ верман бизнес вӧчны та вылын. Быдса серия статьяяс сетны! А мукӧдыслӧн бать-мамыс, гашкӧ, генералъяс? А тэ найӧс — хоп! Ничево, дорогой папаша, эн чукрась! Эн сяммы быдтыны чадотӧ — ать, два! — эн лӧгась. Лыддьы ас йывсьыд газетысь.

— Света, тэ кӧсъян гижны на йылысь? — Максимлӧн пемыдгӧрд синъясыс лоины нӧшта на тӧждысянаӧсь. — Газетад ӧдвакӧ лэдзасны, уна кӧ няйтыс лыбас... Нервъястӧ сӧмын тшыкӧдан ассьыд. Явит милицияӧ, и мед вӧчӧны, мый колӧ.

Светалы лӧсьыд кывны и аддзыны ас вӧснаыс тайӧ тӧждысьӧмсӧ. Сылы нимкодь, нимкодь сыысь, мый му вылын олӧны сійӧс мездалысь, сы понда тӧждысьысь йӧз. Ныв козьналіс Максимӧс шоныд видзӧдласӧн да кыпыда шуис:

— Немтор на ме ог тӧд, Макс, мый кута вӧчны! Наперво, зэв окота бурджыка тӧдмавны, кодъяс найӧ сэтшӧмъясыс! Мыйся олӧмӧн олӧны. Кыдзи воисны сэтшӧм олӧмӧдзыс.

— Либӧ менӧ тшӧтш босьт, ёрт пыдди, — сьӧлӧмсяньыс вӧзйысис Максим. — Татшӧмтортӧ вӧчигӧн дорйысь вермас ковмыны...

— Аттьӧ, Макс, ме чайта, дорйысьыд ӧні менам тырмымӧн лои — быдса завод...

— А ме ногӧн, вӧлясӧ вывті уна сетісны йӧзыслы! — чирӧстӧмӧн сюйсис сёрниӧ Катя. — Мыйкӧ пакӧститасны, а ми найӧс юрси ньылыд шыльӧдам: «Оз эськӧ ков, муса пи, тадзитӧ. Вай тэ, молодеч, эн сэсся вӧч тадзитӧ...» — серам петкӧданаа нерыштіс Катя. — А «молодечьяслы» тайӧ и колӧ. На йылысь не гижны колӧ, а колӧ сісьтыны татшӧмъяссӧ тюрмаын!

— Ай да Катька! — скӧравтӧг, шмонитанаа шуис Рудольф. — Тэныд эськӧ прокурорӧн лоны, а тэ — йӧй! — посни челядьӧс велӧдны кӧсъян. Прокурорӧн кӧ лоин, став преступносьтсӧ эськӧ пырысь-пыр лои бырӧдӧма.

Николай Васильевич, шыльыд яя Катя вылӧ тэрыб синъяссӧ читкыраліг, шуис:

— Куш чорыдлуныд, Катюш, оз жӧ век отсав. Во кызь-комын сайын эз ёна меліасьлыны, но преступникыд ӧнія дорысь ёна уна вӧлі. И кутшӧм преступникъяс! Вывтіасяна чорыдлуннад мортыд торйӧн нин ёна лёкмӧ.

— Гашкӧ, либӧ колӧ став милициясӧ да став тюрмасӧ бырӧдны! — ырыштчис Николай Васильевич вылӧ гӧрдӧдӧм чужӧма Катя.

— Мыйла нӧ бырӧдны? — дӧзмытӧг сёрнитіс кӧзяин. — Натӧг тай оз на жӧ позь. Но тшӧтш и йӧзсӧ колӧ кыдзкӧ ёнджыка бурӧдны. Мед эськӧ бурджык сьӧлӧмаӧсь найӧ лоины. Мед эськӧ ӧти морт мӧдӧс пыдди пуктіс. Мед эськӧ тӧрис вӧльнӧй свет вылас сыкӧд ӧтлаын овны.

— Кӧинтӧ пӧ кӧть кыдзи эн велӧд, век видзӧдӧ вӧрӧ пышйыны, — сулаліс ас дум вылас Катя.

— А мортыд, Катюш, абу кӧин, оз кӧинӧн чуж сійӧ. — Николай Васильевичӧс босьтіс жӧ вензян жарыс. — И гортыс сылӧн абу сьӧд вӧр шӧрын, абу тюрмаын ни. Ме чайта, быд мортлы окотаджык кывзыны аслас мусаыслысь либӧ ичӧт кагаыслысь кывъяссӧ, а не конвоиръяслысь чорыда горӧдлӧмъяс.

— Да-а, ёна на лёкалӧны йӧзыд... — нормыштӧмӧн ышловзис Максим. — Быттьӧкӧ миян, кызьӧд нэмӧ, и ёна вежӧрсялісны найӧ, а лёкалӧмыс оз чин... Пыр содӧ... А кысь пӧ и чинас, кор ӧтарӧ пыр война да война... Артыштны кӧ, мыйта тані лёкалӧмыс вӧлі... Ӧти народлӧн мӧд народ вылӧ... Ӧти мортлӧн мӧд морт вылӧ... А мыйта миллион йӧзӧс пазйӧма!.. А сэсся кодкӧ и ӧні на калека... Мӧдлӧн батьыс усьӧма, коймӧдлӧн — дедыс, нёльӧдлӧн — дедыс и батьыс. А витӧдлысь и мамсӧ тшӧтш нырыштӧмаӧсь, тшыглы кулӧма ли... Мыйта челядьдыр вужинь-вежинь песовтӧма... Ыджыд культураысь удзӧдӧма... — Максимлӧн чужӧмыс нюкырмунӧма, буракӧ, висьталан думъясыс ёна дойдӧны сійӧс. — Сэсся и войнатӧгыс смертьыс миян кадӧ зэв нин матіті ветлӧдлӧ. Мукӧддырйиыс садьма водз асывнас, и муыс йиркакылӧ выліті лэбысь самолётъяслӧн жвиньгӧмысь. А друг, мися, тайӧ абу миян, а кодлӧнкӧ мӧдлӧн? А друг мынтӧдасны миян кар вылӧ ӧти атомнӧй бомба? Мый сэки лоӧ? Мый меысь кольӧ?.. Мыйла ме чужлі?! Мыйла олі кызь кӧкъямыс арӧсӧдзыс, кувны кӧ татшӧм йӧя, ном моз?.. Ставыс тайӧ, дерт, ёна личкӧ мортлы лов вылас... Унаӧнӧс нервнӧйӧн вӧчӧ... Сӧмын аслас олӧм понда вийсьысьӧн... Мӧдлысь дойсӧ кывтӧмӧн...

— Вай кувтӧдзыд первой клыснитыштам! — гажаа шуис Рудольф и кутіс кисьтавны сьӧрсьыс вайӧм столичнӧй. — А то шузьӧ винаыс.

— Но, но, тэ вай эн сэтшӧм тырӧн кисьтав аслыд! — ёкыштчис Рудольф вылӧ Катя. — А то бара меным ковмас кыскыны лёльӧӧс моз.

— Ничево, кыскалан, — шмонитіс мӧдыс Катялысь кывзысьтӧг. — Мыйла нӧ либӧ ме кӧсъя тэ вылӧ гӧтрасьнысӧ, он кӧ кут кыскавны? Ме сэтшӧм думӧн и радейта тэнӧ да...

— Вот зуышта кӧ юрад, сэки аддзылан гаж! — пыркӧдіс Катя артмӧм булки кодь кабырнас, и кыз яйыс сояс легис-тіраліс.

«Пара кӧтіыд, буракӧ, и лӧсялӧны на! — бурпырысь мӧвпыштіс вензьысьяс йылысь Света. — Но найӧс, дерт, оз ёна песлӧдлыны мирыслӧн судьба йылысь думъясыд... Гашкӧ, Максыс вывтіджык дзугыльмис ме вылӧ уськӧдчылӧмысь? Ёна шогсис да?..»

— Макс, — шыасис сэсся ныв, — а винаыс тэныд некор оз мун гаж вылӧ.

— Ме ог мыжав таысь винасӧ, милая Света. Неунатӧ юыштӧм бӧрын менам чувствоясӧй быттьӧ ёсьмӧны, зудъялӧм бритва дор моз, сатӧкджыкӧсь лоӧны, и ме сэки бурджыка кыла олӧмсӧ, став лёкалӧмсӧ сэтысь...

— Мыйла нӧ куш сӧмын лёкалӧм?

— Буракӧ, сійӧ унджык на да, сы вӧсна. Мӧвпыд ӧд, сьӧлӧм кылӧмыд оз нинӧм абусьыс чуж, кысянькӧ жӧ петӧ. Кыдзи быдмӧг — кӧйдыссянь... Мукӧддырйиыс меным весиг кажитчӧ, мый морӧсын оз сьӧлӧмӧй пессьы, а кыдзкӧ веськалӧма сэтчӧ дзоньнас Му шарыс да сійӧ лёкысь нӧйтчӧ... И лов тырӧн ме кыла сылысь став дойсӧ...

Максим кымыньтіс вомас румка пыдӧсӧ кольӧм водкасӧ, чеччис да матыстчис полируйтӧм уліа трюмо дінӧ, босьтіс киас гӧгрӧс дуки кӧрӧбка, код вылӧ важӧнкодь нин видзӧдлывліс. Чӧла нимкодясьыштіс сьӧд лак вылӧ зарни краскаӧн рисуйтӧм пӧлянӧн ворсысь мичаник пастукӧн, бергӧдчис сы вылӧ юасяна синъясӧн видзӧдысь войтырлань да шуис:

— Ме чайта, тайӧс рисуйтысьыслӧн сьӧлӧмыс ме моз жӧ доймалӧма. Ме быттьӧ аддза художниксӧ, сылысь жугыль, бур синъяссӧ. Найӧ, тӧдӧмысь, мудзӧмаӧсь жӧ гыма-йиркакылысь кызьӧд нэмысь. Сыысь, мый тэнӧ быд пельӧсын вермас талявны машина, мый тэ самолётӧн верман бруткысьны чорыд му вылӧ, мый кыскан тыясад сымда са, и кор тэ вӧтасян юр вылад гылалысь атомнӧй бомба йылысь... Художникыс, дерт, ёна гажтӧмтчӧ тайӧ пастукыслӧн кодь вӧльнӧй олӧмысь, сэтшӧм олӧмысь, кор мортӧс кытшалӧ югыд шонді улын нимкодясьысь природа — дзордзалысь лудъясӧн да гажаа жургысь лӧз ваа шоръясӧн, кор сьӧлӧмсӧ сылысь оз дойдав ни полӧм, ни завидьтӧм, ни скӧралӧм — немтор. Кор гӧгӧр сӧмын поэзия да любов... — Максим чӧв усьліс, сувтӧдіс шоналӧм видзӧдлассӧ Света вылӧ да содтіс:


«Эськӧ чорыд изйысь дзоридз

Чужтіс радейтӧмлӧн би».


Максимлӧн пӧсь сёрниыс кутшӧмкӧ да кутшӧмкӧ ногӧн быдӧнӧс вӧрзьӧдіс. Весиг пӧрысь баб шензьӧмӧн видзӧдіс сы вылӧ, кӧть эськӧ и сьӧкыд пельнас эз помӧдз велав уна кыв.

Света первойсӧ наяна нюмъяліс, но кор нывлӧн синъясыс паныдасисны Максимлӧн пӧсь вый моз югъялысь синъяскӧд, и торйӧн нин, кор кыліс кывбурлысь сьӧлӧм вӧрзьӧдана кывъяссӧ, сэки Светалӧн шоналіс-нимкодьмис лолыс, сылы окота лои кывзыны и кывзыны татшӧм пӧсь кывъяссӧ:


«Эськӧ чорыд изйысь дзоридз

Чужтіс радейтӧмлӧн би».


Но со, кылӧ, сёрнитӧ Рудольф:

— Грандиознӧя шуӧма! Сӧмын, ме кӧ эськӧ сэтшӧма радейті ассьым Пенелопаӧс, то бурджык... Чорыд изйысь сьӧмтор чужті... Сэки эськӧ ми тэкӧд, дорогуша, сэтшӧм свадебнӧй путешествие вӧчим! Средиземнӧй мореӧд. Асланым яхта вылын! Стамбул, Афины, Рим, Марсель...

— Ланьт, пӧрысь! — шонді моз Рудольфлы воча нюмъяліс Катя.

Шунысӧ шуис тадзи, но сьӧлӧмыс ыркмунліс и весиг синъясыс шонавлісны: вот пӧ эськӧ, збыльысь кӧ лои олӧмын татшӧмыс!

Николай Васильевич кытшовтіс видзӧдласнас сёян-юанӧн тыр пызан вывсӧ, сувтыштліс гырысь апельсинъяс вылӧ, кодъяс пиысь ӧтиӧс вӧлі поткӧдӧма, да чӧланъясыс улиса дзирдалісны би югӧр улын. Николай Васильевичлы ёна жӧ мӧрччис Максимлӧн сёрниыс, унатор йылысь тшӧктіс казьтыштны аслас дыркодь нин олӧмысь. Но сылы тшӧтш окота лои и вензьыштны зонкӧд... Кӧзяин чӧскыдпырысь кылӧдіс апельсинлысь васӧд, небыд да ыркыд юкӧнсӧ, кыдзкӧ-мыйкӧ водзвыв лӧньӧдыштіс ассьыс вензян пӧсьлунсӧ да шуис:

— А ме, Максим, ас пайысь кызьӧд нэмтӧ не сӧмын кулита. Лёкыс, дерт, сылӧн тырмӧ на, но сы пыдди бурыс став мукӧд нэмъяс дорысь унджык. Да, да, унджык! Кытчӧ он видзӧдлы... Шуам, со тайӧ пызан выв сертиыс босьтам. Водзті ӧмӧй коркӧ аддзылісны миян кӧдзыд муын апельсинтӧ? Да нӧшта тӧлын? Екуняваня, непӧштӧ апельсин, яблӧг йывсьыс эз тӧдлыны войвывсаясыд! А ӧні со тӧвбыд фрукты сёям. Быттьӧ Африкаын олам. А сэтчӧсъяс, кӧнкӧ, миян турипувйӧн да тшакӧн чӧсмасьӧны. И тшӧтш радӧсь. Буретш кызьӧд нэмыс и матыстіс, орччӧдіс шоныд и кӧдзыд муяссӧ. Матыстіс, тӧдсаджыкӧн вӧчис сэнъясын олысь войтырсӧ... Самолётнад и телевизорнад... А мый нӧ? Аслад керкаысь петавтӧг кытчӧ сӧмын он волы, екуняваня!.. И, видзӧдан да, кывзан да, — быдлаын йӧзыс кӧсйӧны бурджыка овны...

Николай Васильевич юасяна видзӧдліс Максим вылӧ: кывзӧ-ӧ сійӧ, и кор казяліс, мый зон зэв збыльысь кывзӧ, бара на шуис:

— Ме, гашкӧ, тіян серти этшаджык тӧда, но ёна жӧ мӧвпала та йылысь, олӧм йывсьыс... И, тӧдан, мый ме чайта? Мися, миян кадӧ морт асьсӧ и олӧмсӧ ёна гӧгӧрвоныджык кутіс. Быдлаын... Быдлаын сійӧ пондіс лоны ёнджыка мортӧн, а не кывтӧм пемӧсӧн. И тӧлка войтыр шуӧны, мый сы вылӧ медся ёна ышӧдіс йӧзсӧ миян революцияным. Таысь меным любӧ жӧ.

Максимӧс шензьӧдыштіс кӧзяинлӧн татшӧм сёрниыс, сы вӧсна мый ӧнӧдз чайтіс Николай Васильевичӧс татшӧмторъяс вылад неуна ныжджыкӧн; шӧрт кызта сьӧд ускыс сылӧн нӧшта на вӧсняммыштліс, нюжалыштіс, но шуис, быттьӧ нинӧм абу и вӧвлӧма:

— Николай Васильевич, ме ог кӧсйы вензьыны. Ставыс тайӧ гӧгӧрвоана. Но ӧд ньӧв моз лэбысь, жвиньгысь самолётъясыс кыскалӧны не сӧмын чӧскыд апельсин, но и сэтшӧм плодъяс, кодъяс вермасны здукӧн поткӧдны Му шарсӧ. Со мый повзьӧдлӧ менӧ. Либӧ тайӧ жӧ «лэбачьясыс» син лапнитігкості вермасны зургыны ракетаяслӧн би улӧ уна «шуда» молодечӧс.

— Тэ, дорогуша, талун висельник моз сёрнитан, — серӧктіс Рудольф. — Вай юам, и нинӧм миянлы тӧждысьны мир вӧснаыс, сійӧ миянлысь всё равно оз кывзысь. Эн вунӧд, мый философъяс важӧн нин шулӧмаӧсь: став истинаыс пӧ винаын.

— А войнаясыд, Максим, не сӧмын кызьӧд нэмын вӧліны, — шуис Николай Васильевич. — Сэсся ӧд, буракӧ, абу став войнаыс ӧткодь. Кодъяскӧ нуӧдӧны войнасӧ, медым овны вӧльнӧя. Не раб туйын овны. И «жвиньгысь» самолётъяссӧ кодъяскӧ буретш сы вӧсна и вӧчалӧны, мед эськӧ тэа-меа юр выланым друг эз пондыны гылавны атомнӧй бомбаясыс... — Николай Васильевич кутіс дӧзмыштны. И медъёна дӧзмӧдіс сійӧ, мый нинӧм аддзывтӧм морт тадзи, ӧтар боксяньыс, мыжалӧ олӧмсӧ, а сійӧ, салдат Туробов, би пыр и ва пыр мунӧм морт, оз вермы велӧдны том мортӧс олӧмсӧ ас ногыс кывны.

— А миянлы паныд сулалысьясыс пӧжалӧны «жвиньгысь» самолётъяссӧ миянысь полӧмӧн, — шуис Максим. — Пыр унджык и унджык жӧ вӧчалӧны. И помыс некӧн оз тыдав.

— Сідзкӧ нӧ, мый колӧ вӧчнысӧ, Максим? — Николай Васильевич эз сетчы дӧзмӧмыслы. — Ставным ли мый, екуняваня, кутам сьывны да пӧлянасьны тэнад пастук моз? Тадзнад ӧд кызьӧд нэм бӧрад локтас оз кызь ӧтикӧд, а миян эраӧдз на кутшӧмкӧ вӧвлӧм нэм. Сэсся, сідз кӧ нин шуны, мыйла нӧ ми революциясӧ вӧчим, не кӧ дорйыны сійӧс «жвиньгысь» самолётъяснас?

— Николай Васильевич, ме сёрнита сы йылысь, кутшӧм сьӧкыда личкӧ морт вылӧ миян ядернӧй нэм, быд пӧлӧс оружиеӧн тшӧтясьӧм нэм, а не сы йылысь, кутшӧм политика колӧ нуӧдны миян страналы, — чорыдджыка шуис Максим. — Ме сӧмын кӧсъя гӧгӧрвоны, мыйла йӧзыс сэтшӧма лёкалӧны. Кытысь петӧ лёклуныс бурмысь олӧмас... А сёрнитны кӧ ас йылысь, то менам дед и бать усьлӧмаӧсь жӧ войнаяс вылын: ӧтиыс гражданскӧйын, мӧдыс — Отечественнӧйын. И вай юыштам тшӧтш и на вӧсна. — Бӧръя кывъяссӧ шуигӧн Максимлӧн курзис горшыс, и сійӧ, некодӧс виччысьтӧг, тэрыба юис ыджыд румка тыр вина.

Мукӧдыс тшӧтш жӧ шогӧ усьлісны Максимлӧн тадзсӧ шуӧмысь, быдӧн чӧв усьлісны. А сэсся Николай Васильевич ышловзьӧмӧн шуис:

— Дерт, тайӧ ыджыд шог. Но, ме думысь, тайӧ шогсьыс оз ков пӧлянасьны пышйыны, а, сьӧлӧмтӧ зэвтӧмӧн, водзӧ нуӧдны сійӧ уджсӧ, код вӧсна бур йӧзыс пуктісны юрнысӧ.

...Кор гӧсьтъяс мӧдӧдчисны мунны, Максим дыркодь кутіс Светалысь кисӧ аслас киясын, а сэсся мыжа морт моз шуис:

— Эн дивит, милая Света, мый эзджык сідзи ло. Пыралім тэнсьыд сьӧлӧмтӧ бурмӧдыштны, доръян кыв шуны, а бара на со вензьысис. Мый сэсся вӧчан... Но тэ, милая, видзчысьӧмӧнджык кыдзкӧ. Войся кӧинъясыд ӧд гусьӧн пурысьяс. Кӧнкӧ кӧ сёрмӧдчан, звӧнитлы меным.

— Аттьӧ, Макс!

— Став бурсӧ тэныд, умницаӧй менам. — Максим копыртчыліс да окыштіс нывлысь шыльыд кисӧ. — Тэ, югыд кодзув моз, индан мем веськыд туй...

«Абу-ӧ сійӧ пондӧма воштыны кок увсьыс зумыд подувсӧ? — водӧм бӧрас нин тӧждысяна мӧвпаліс Максим йылысь ныв. — Мый вӧчсьӧ сылӧн лов пытшкас? Оз-ӧ чегсьы мыйкӧ сэні? Абу-ӧ пондӧма бонзьыны олӧмыскӧд йитысь медшӧр везйыс? Оз-ӧ сійӧ вочасӧн кӧдзав йӧз дінӧ? Тадзи кӧ ӧд — зэв сьӧкыд сылы лоӧ! И дзикӧдз сійӧ вермас ылавны...»

«А, гашкӧ, сылы колӧ тӧдмасьны выль ёртъяскӧд, кодъяс зумыдджыка восьлалӧны олӧмтіыс? Кодъяс оз коньӧрмыны паныдасьлысь нелючкиясысь?»

«А мый, тӧдмӧдны кӧ сійӧс заводсаяскӧд? Кажитчасны-ӧ найӧ сылы? Крепаммас-ӧ лолыс татшӧм йӧзыскӧд волысьӧмысь?»

Ныв пырысь-пыр жӧ быттьӧ ловзьыштліс татшӧм думсьыс. «Позьӧ миян ордын и чукӧртчывны, сьылыштны-ворсыштны. Мед заводсаясыс нывъяскӧд воасны. Интереснӧ, кутшӧмӧсь налӧн пӧдругаясыс-а? Кимлӧн кутшӧм? Гашкӧ, буретш ӧнія здукӧ сійӧ малалӧ Кимыслысь доймӧм юрсӧ. Ме вӧсна доймӧм юрсӧ. И шуалӧ кутшӧмкӧ прӧстӧй, но сьӧлӧмсянь петысь кывъяс».

Света дыр на быд ногыс мӧвпаліс Максим йылысь. Шоналӧм сьӧлӧмӧн казьтыліс, кыдзи найӧ первойысь бурджыка тӧдмасисны.


Света сэки вӧзйысис командировкаӧ нефть корсьысь разведчикъяс дінӧ. Окота вӧлі аслас синмӧн аддзывны, кыдзи петӧ джуджыд гӧбӧчысь мулӧн сьӧд вирыс. Сэні сійӧ паныдасис Максимкӧд, коді ветлӧдліс репортёрскӧй магнитофона. Мыйта интереснӧйсӧ аддзыліс сэки Света! Буретш сы дырйи кыскисны ӧтилаысь мӧдлаӧ буритчан вышка. Разявтӧгыс. А ӧд вышкаыс матӧ ветымын метр судта, дзоньнас сійӧс кӧртысь дорӧма-кыӧма. И кыскынысӧ колӧ вӧлі оз шыльыд туй кузя, а вӧрті писькӧдӧм паськыд прӧсекӧд. Доддясисны дас трактор, кӧкъямысӧн водзсяньыс, а кыкӧн бӧрсянь, мед кутны пӧрӧмысь. Эргӧмӧн-мургӧмӧн вӧрзьӧдісны вышкасӧ, и сійӧ мӧдӧдчис ньӧжйӧник кывтны вӧр весьтӧд. Света да Максим восьлалісны ылын бӧрвылас, и вышкалӧн быд шатовмунігӧн нывлӧн быттьӧ кынмыліс вирыс. А кутшӧмджык вӧлі сэки томиник прораблы, беринӧсь чужӧма коми зонлы, коді смелмӧдчис вуджӧдны вышкасӧ?!

Ӧти скважинаысь буретш вӧлі чепӧсйӧма нефть, войвывса кӧдзыд мулӧн сэтшӧм колана сьӧд выйыс. Радлысь-нимкодясьысь разведчикъяс тшӧтш мавтісны кослунъя вый кодь нильӧг нефтьӧн Светалысь чужӧмсӧ. Сэсся сылы кисьтыштісны нефтьсӧ пробиркаӧ, чуктӧдыштісны му пытшкын нефтьсӧ кутысь-видзысь, мочалӧ кодь синмӧсь-синмӧсь, порода тор. Ну пӧ гортад, казьтывны кутан...

Рытнас найӧ Максимкӧд дыр пукалісны гостиница-барак жырйын. Максим лыддис кывбуръяс, ассьыс и мукӧдлысь. Сійӧ, вӧлӧм, тӧдӧ шензьымӧн уна кывбур, кыдзи сӧмын и кутӧ паметяс сымдасӧ!

Тайӧ вӧлі некор вунӧдлытӧм рыт... Ывлаын трачкӧдчис кӧдзыд. Кӧнкӧ орччӧн, му пытшкӧ писькӧдӧм километрӧн-джынйӧн судта розьӧд, вывлань клысьйис-чепсасис нефть, а тані, пӧвъя щитъясысь тэчӧм, лым пытшкӧ тубыртчӧм баракын, кыпыда юргисны кывбуръяс: комиӧн, рочӧн, мукӧд кывъяс вылысь вуджӧдӧмаяс.

Кымын талантливӧй мортлӧн мӧвпыс да чувствоыс, кодъясӧс шыльыда тӧчитӧмӧн тӧрӧдӧма дженьыдик кывбуръясӧ, позтысьӧмаӧсь ӧти морт юрӧ.

Тӧвся кузь рытнад мыйсӧ сӧмын эз сёрнитны найӧ сэсся. Светалӧн юасьӧм вылӧ Максим неуна висьталыштіс весиг аслас челядьдыр йылысь. Света быттьӧ ӧні на кылӧ Максимлысь нормыштӧм гӧлӧссӧ.

«...Сизим арӧсӧдз ме тӧдлі куш сӧмын радейтӧм, кор мамӧкӧд кыкӧн олім. Сійӧ сетіс меным ассьыс мелілунсӧ кык пай мында — тшӧтш и усьӧм батьлы пыдди... Мамӧ уджаліс библиотекаын, война бӧрад тшыг нисьӧ пӧт олім, но тайӧ вӧлі шуда кад: сы вӧсна мый ми сэтшӧма радейтім ӧта-мӧднымӧс, и тайӧ радейтӧмыс вежис став сьӧкыдсӧ, немтор сэсся быттьӧ миянлы эз и ков... Ме кӧ эськӧ сэки верми вежӧртны сьӧлӧм кылӧмӧс, то ньӧти падъявтӧг эськӧ шуи:

— Олӧмыс, и Му шарыс дзоньнас, ловзьӧмаӧсь-артмӧмаӧсь шудысь!

Сэсся кыськӧ лоис менам выль бать. Сійӧ вӧлі ёна томджык мамӧысь, ош кодь ён. Сійӧ быттьӧ и лӧсяліс мамӧкӧд, но мыйлакӧ ньӧти эз вермы терпитны менӧ. Сэки ме, дерт, эг на гӧгӧрво, мыйла... Быдӧн менӧ радейтӧны, тӧлкаӧн да мичаӧн шуӧны, а сійӧ ӧтнас терпитны оз вермы... Менӧ тайӧ ёна шензьӧдліс... Ӧні ме гӧгӧрвоа: сылы зывӧк вӧлі аддзыны аслас позйысь йӧзлысь писӧ... Абу ӧтнас сійӧ сэтшӧмыс...

Выль батьыд менӧ частӧ пондіс нӧйтны, век нин мыжтӧ вӧлі аддзас. Весиг анькытш вылӧ куш пидзӧсӧн сувтӧдлывліс... А код юрнас и мамӧӧс тшӧтш лупсуйтліс, кор сійӧ уськӧдчыліс менӧ дорйыны. Ми сэки пышйывлім гортысь... Неважӧн ме телевизор пыр аддзылі, кыдзи дикӧй понъясысь пышйӧны кенгуруяс: мамыс тшукӧдас-сюяс ичӧт писӧ кынӧмувса сумкаӧ и чеччалӧ-пышйӧ. Миян сідзи кымын жӧ вӧлі...

А мамӧ век бурӧн сыкӧд зілис, ставсӧ терпитіс — гашкӧ пӧ и, вочасӧн велалас...

Тайӧ вӧлі сьӧкыд кад... Сэксянь ме ог вермы видзӧдны йӧзлӧн лёкалӧм вылӧ... Ӧти мортӧн мӧд мортӧс пурӧм вылӧ. Кор тайӧс аддза, весиг кор ме думайта та йылысь, тірала сэки...»

Максим висьталіс, мый мамыс да выль батьыс усьӧмаӧсь самолётӧн, отпускаланінысь воигӧн. «Дзенӧбтіс чардби, и ме, дас сизим арӧса зон, коли ӧтнам. Му выв тырыс йӧз, а ме — ӧтнам... Ёнакодь ме весьӧпӧрлі сэки... Мем кажитчис, мый самолёт усьӧмсьыс ме мыжаыс, сы вӧсна мый унаысь кӧсйылі выль батьлы, кор сійӧ тешитчывліс ме вылын, став лёксӧ...

Не кӧ поэзия, ме верми эськӧ йӧймыны либӧ код тӧдас мыйӧн лоны... Поэзия бур рокӧс моз ловзьӧдіс менсьым ёна гудырмылӧм лолӧс, а ме со век на уя олӧмӧдыс, век на эг вӧй олӧмыслӧн уна лыда йиръясӧ...

Кодӧс ме сӧмын эг лыддьы да велӧд сэки!»


Тайӧ ветланінсьыс Света бӧрсӧ воис вӧвлытӧм кыпыдӧн. Ӧд сымда аддзыліс нефть перъянінысь! А содтӧд вылӧ — сэтшӧм интереснӧй морткӧд бура тӧдмасис.

Тадзитӧ аддзысьӧм бӧрын Максим кыдзкӧ лои зэв матыссаӧн, быттьӧ важысянь нин тӧдсаӧн. Сійӧ кутіс частӧ волывлыны на ордӧ. Мукӧддырйиыс другъясыскӧд. Лӧсьыд сёрниа рытъяс овлывлісны. Лыддисны кывбуръяс. Музыка да сьыланкывъяс юргывлісны. Но такӧд тшӧтш Светалы неӧтчыд нин ковмыліс вештыны Максимлысь «ылалӧм» кисӧ.

«А гашкӧ, оз ков вештавнысӧ? Гашкӧ, Максимыс таысь медъёна жугыльмӧ? Ӧд со мыйыс жӧ нин абу мунлӧма сьӧлӧм вывтіыс...»

«А заводсаясыскӧд быть колӧ тӧдмӧдны сійӧс, мукӧдсӧ тшӧтш и. Таысь, ме чайта, ӧтар и мӧдар сӧмын бур лоӧ».


Дас кыкӧд глава


Пемдӧм бӧрын Марс дыр бовъяліс заводсаяслӧн общежитие дорын, думсьыс виччысис, оз-ӧ пет Ким. Мыйла? Помӧдз мӧвпыштӧм план Марслӧн эз на вӧв, но сьӧлӧмыс кыскис бурджыка видзӧдлыны сійӧ морт вылас, код вӧсна сылӧн, Марслӧн, олӧмыс ӧнісянь вермас дзикӧдз вежсьыны.

Общежитие гӧгӧр, быттьӧ мазі поз гӧгӧр, жуис-гыис уна том йӧз. Ӧтияс воалісны удж вылысь, мӧдъяс, вӧччӧмаӧсь-вежсьӧмаӧсь нин, тэрмасьтӧг муналісны гуляйтны, коймӧдъяс кытчӧкӧ тэрмасисны портфельясаӧсь... Чорыда клопйӧдлісны ӧдзӧсъяс, восьса форточкаяс пыр гораа юргис музыка, ывласӧ косявлісны моднӧй сьылысьяслӧн нявзысь-веглясьысь гӧлӧсъяс.

«Найӧ, дерт, ставныс тӧдӧны ӧта-мӧднысӧ, видлы вӧрзьӧдны татшӧмъястӧ...» — думыштіс Марс, зумыд тэчаса зонъясӧс жугыль видзӧдласӧн колльӧдігтыр. Сылы зэв эз вӧв лӧсьыд сьӧлӧм вылас. Ачыс аслыс сійӧ кажитчис эбӧстӧм кӧинӧн, коді кытшлалӧ морт оланін гӧгӧр, кыйӧдчӧ, оз-ӧ сюр мыйкӧ сӧтны.

Час ӧкмысын кымын Ким петіс ывлаӧ пальӧдчыштны. Ӧнӧдз думсьыс сійӧ век на виччысис Генаӧс, коді муніс Кызродевъяслань Светалы телохранителявны. Но Гена век на эз тыдав, а Кимлӧн бара заводитіс бергӧдчыны юрыс, — буракӧ, лыддьысьӧмсьыс, — и сійӧ шуис лолыштны ывла сынӧднас.

Рытыс вӧлі лӧнь, ульдылӧм бӧрын заводитӧма бӧр кынмыны, кок улын вильдаліс. «Пласьткысьны на верман, — тӧждысьыштіс Ким, — вӧрзьӧм юр вемыд дӧбелькиӧдз вермас пыркнитчыны».

Марс казяліс Кимӧс. И пырысь-пыр жӧ донъяліс сылысь видзчысяна ньӧжмыд воськовсӧ: «О-о, сылы, буракӧ, дӧнзьӧма жӧ!»

Кутшӧм лӧсьыд ӧні мышсяньыс гусьӧникӧн матыстчыны да зургыны-конйыштны сійӧс! Вильыд вылас лӧсьыда и грымгысяс. А сэсся вожасьны вылас, кватитны горшӧдыс да шуны: «Он кӧ дугды миянӧс нокны, джагӧда!»

А сэсся мый лоӧ? Этатшӧм «корсарыд» пырысь-пыр жӧ шыбитас вывсьыс. Йӧз вермасны суны и...

Марс мыйкӧ мында гусьӧникӧн муныштіс Ким бӧрся, а кор матын йӧз эз лоны, пондіс котӧрӧн вӧтӧдны сійӧс, котӧртігас зілис ёнджыка зымӧдны кокъяснас йизьӧм асфальт вывті.

«Дерт, ӧні сійӧ казяліс нин, мый сы бӧрысь вӧтчӧны, — сьӧлӧм чеччӧмсӧ кыліг мӧвпаліс Марс. — Мый сійӧ ӧні думайтӧ? Ӧд тышкасьӧм бӧрад оз позь не думайтны, мый кодкӧ кӧсйӧ босьтны водзӧс. — Тадзсӧ мӧвпалігӧн Марс нюлыштіс вармунӧм, кыза пыктӧм парсӧ. — Часлы, вежсяс походкаыс. Часлы, бергӧдчас, мед паныд сувтны».

Но Ким эз бергӧдчы, эз веж воськовсӧ ни, весиг боквыв эз сетчышт — ньӧжйӧникӧн муніс и муніс водзӧ. Тайӧ дзикӧдз раммӧдіс Марсӧс.

Пемыдруд мехӧвӧй курткасӧ Ким вӧлі пасьталӧма веськыда спортивнӧй костюм вылас, юрас пыдӧдз зэвтӧма тугъя лыжнӧй шапка, мед вевттьыны кымӧссьыс еджыд бинтсӧ.

— Дядя, тэ либӧ пельтӧм, либӧ тэнад нервъясыд манильскӧй трос кодь чорыдӧсь! — виччысьтӧг шуис Марс ӧтвесьтасигӧн.

Ким воча видзӧдліс том зонлӧн сы вылӧ бурысь веськӧдӧм чужӧмӧ, и кыдзкӧ зэв долыдпырысь личмуніс топавлӧм сьӧлӧмыс, а тшӧтш и небзисны зэлавлӧм сӧнъясыс.

— А тэ нӧ мый — психиатр? — долыда шуис Ким. — Ывла вылын тӧдмалан, кодлӧн кутшӧм нервнӧй система?

«Абу лёка шуӧма!» — пырысь-пыр жӧ донъяліс Марс. И вочавидзис:

— А мый, эз эськӧ вӧв лёк, водзвыв кӧ вермин тӧдны тайӧс. И нӧшта — йӧзлысь думъяссӧ водзвыв тӧдны.

— Мыйла нин тэныд йӧзыслӧн думыс ковмис? — серӧктіс Ким.

— О-о, сэк эськӧ ме век тӧді, кыдзи да мый колӧ меным вӧчны. И век эськӧ вӧлі вермысьӧн. — Марс быдӧн нимкодьмис татшӧм мӧвпсьыс.

— Сюсь тай кывсян! — нюмъяліс Ким.

— А сы вӧсна, мый ме ог на куж тӧдмавны, мый вӧчсьӧ йӧз юрын, то висьтав, мый тэ думайтін, кор ме тэ бӧрысь котӧрті.

— Но мый... — эз кут пыксьыны Ким, сылы сьӧлӧм вылас кутіс воны мичаник чужӧма зонкӧд друг пансьӧм сёрниыс. — Дерт, ме кылі, мый кодкӧ котӧртӧ ме бӧрся. И шыасьлытӧг. Ог соссьы — сьӧлӧмӧй ыркмунліс, торйӧн нин сы вӧсна, мый неважӧн юрӧс чуть эз поткӧдны тэ коддьӧмъясыс. Но ме пырысь-пыр жӧ думышті: «Котӧртӧ ме бӧрысь кодкӧ ӧти. Мый сійӧ мекӧд вермас вӧчны? Оз кӧ мышсянь пуртӧн бырскы. А татшӧмтор вылад шоч морт мунӧ — ӧд сэки сылы и аслыс не овны. Нинӧм, мися, ӧтиыд мекӧд оз вермы вӧчны. Кутчысяс кӧ, асьсӧ на ме сійӧс бонзьӧда... А тэ шуан: трос кодь нервъяс...

— Позьӧ чайтны, мый тэ — сыщик, — шуис Марс, сійӧ ӧдва кутчысис, мед не висьтасьны, кутшӧм бура «тӧдса» заводсакӧд.

— Ха! — сьӧлӧмсяньыс серӧктіс Ким. — Ме сэтшӧм жӧ сыщик, кыдзи тэ — психиатр.

— Гашкӧ, либӧ батьыд сыщик?

— Бара эн тӧд, психиатр. Батьӧй менам, другӧ, ме арлыдӧн нин усьлӧма война вылын. Ог тӧд весиг, кӧн гуыс сылӧн. Асьсӧ ог помнит ни. Ме, другӧ, детдомса «сыщик».

— Да?! — Марсӧс тайӧ чуймӧдіс ставсьыс ёна. Мыйла? Пырысь-пыр сійӧ, гашкӧ, эськӧ эз на вермы висьтавны, мый вӧчсис сьӧлӧмас, но ылӧсас кӧ шуны, то сэні кыптіс мыйкӧ завидь сяма и мыйтакӧ асьсӧ дивитан сяма — ӧд со пӧ, кыдзи жӧ быдмылӧма, а оз ме моз кыйӧдчы йӧз бӧрысь. Марсӧс дзикӧдз жугыль босьтліс. Сэсся сылы окота лои нуӧдлыны тайӧ заводсасӧ гортас да лыддьыны сылы суд кежлӧ дасьтӧм ассьыс речсӧ, кодӧс талун гижис. Мый эськӧ сійӧ сэки шуас? Первойсӧ, дерт, буракӧ, чуймас, мый сійӧ, Марс, тшӧтш вӧлі сумка мырддьысьяс лыдын. А сэсся, гашкӧ, и шензьыштас сылӧн речысь... Интереснӧ, сяммас-ӧ эськӧ тайӧ заводсаыс казявны сэтысь сійӧ русӧ, код понда медъёна висьӧ Марслӧн сьӧлӧмыс? Сяммас-ӧ казявны ӧнія бӧрын — татшӧм йӧйталӧм бӧрад, мый сылӧн, Марслӧн, сьӧлӧмыс тшӧтш жӧ шудтор кӧсйӧ, мый сійӧ кӧсйӧ интереснӧйджыка жӧ овны, сӧмын тай немтор оз артмы-а...

«А мый, нуӧда кӧ ӧд, мунас, буракӧ, гортӧ? Вот эськӧ сёрнитыштім веськыда! Тайӧ, буракӧ, гӧгӧрвоысь морт, кӧть и детдомса. Сылы, буракӧ, ичӧтысяньыс паныдасьлӧма тӧлка бур друг...» Тайӧ думъяссьыс Марслӧн шоналіс сьӧлӧмыс; заводса зонмӧс гортас нуӧдӧмыс да сійӧ сёрниыс, коді вермас лоны (быть лоас!) на костын, ӧні кажитчис Марслы аслас олӧмын медся тӧдчанаторйӧн.

Но сэсся Марсӧс друг кӧдзӧдіс виччысьтӧг чужӧм мӧвп: «А оз-ӧ кут талы кажитчыны — кор тӧдмалас, мыйся морт ме, — оз-ӧ кут кажитчыны сылы, мый ме леститча сы водзын? Мый мыжӧс вештӧм могысь вӧча тадзсӧ? Пидзӧс вылӧ сувтӧмӧн кора прӧща?..»

Пӧсь яндзим сотыштіс Марслысь чужӧмсӧ. Сійӧ гажтӧммӧм синъясӧн кузя видзӧдліс Ким вылӧ да шуис:

— Став бурсӧ тэныд, сыщик! — и нюлыштіс вурысасьысь парсӧ.

— Тэныд сідз жӧ, психиатр! — воча нюмъёвтіс Ким, кодӧс неэтша шензьӧдіс тӧдтӧм зонкӧд паныдасьӧмыс, сыкӧд татшӧм сёрниыс. «Абу-ӧ тайӧ менам выль «другъяс» лыдысь жӧ?» — мӧвпыштіс сэсся сійӧ.

Асланыс ӧшинь улын Марсӧс паныдаліс Габӧ.

— Ме вель дыр нин кӧйялі тані, — шуис Габӧ. — Бабыд оз тӧд, кытчӧ мунӧмыд... Дрейк воліс тэ дінӧ?

— Воліс.

— Гадыд курвитчӧма! Казялін? Ставнымӧс вузавны кӧсйӧ. Быттьӧ оз тӧд, гад, мый тадзнад ёнджыка на топӧдасны. Вермасны шуны бандаӧн. Мый пондам керны, вузалас кӧ?

— Сумел ты воровать, сумей ответ держать! — гажаа сьылыштіс Марс, кӧть эськӧ асьсӧ друг шогӧдны кутіс: сыысь шогӧдны, мый со кутшӧмӧсь сылӧн ёртъясыс, а не эсійӧ заводсаыс кодьӧсь; мый налӧн весиг сёрниыс мӧд пӧлӧс. Марслы лои шог сыысь, мый другъясыслӧн, да и сылӧн, вынныс оз тырмы весиг кывкутны асланыс пакӧститчӧмысь.

— Тэ вай дугды сьывнытӧ, — скӧрысь шуис падмылӧм Габӧ. — Али тшӧтш курвитчин?

— Ме ӧні вӧлі милицияын и висьталі ставсӧ миян делӧяс йылысь! — кыпыда шуис Марс.

— Гад, дугды?! — Гавриллӧн вом доръясыс кутісны тірзьыны, а веськыд киыс тӧдлытӧг пырис зептас, чабыртіс пурт вороп.

— Да, да висьталі! — негораа, но зэлыда шуаліс Марс, ачыс кыліс, кыдзи тайӧ пырмунігмоз лӧсьӧдлӧм сёрнисьыс сьӧлӧмыс тырӧ кутшӧмкӧ лӧг радлунӧн и — дивӧ! — личалӧ. — Шуи, мися, капитанӧн миян вӧлі Валерьян, комиссарӧн — ме, адъютантӧн — Сашук. А тэнӧ ме нимті главнӧй экзекуторӧн, а, мӧд ног кӧ, главнӧй палачӧн.

— Тэ йӧймин? Да тэ нӧ мый! — Гаврил весиг шатовмуніс шемӧсмӧмысла.

— Но кыскы, кыскы, мый тэнад эм зептад... — морӧссьыс удал долыдлун кыліг шуаліс Марс, ачыс кыйӧдчысь кань моз видзӧдіс Гавриллӧн быд вӧрзьӧм бӧрся. — Ме сӧмын пасибӧ висьтала, мӧдӧдан кӧ менӧ тайӧ пемыдсьыс мӧдар югыдас. Ме пӧт нин татчӧс олӧмсьыс. Но... — Марс друг чеччыштіс и чардби ӧдӧн кучкис ки дорышнас Гавриллы сояс боксяньыс, гырддза весьтас. Гаврил ойӧстіс, сылӧн немӧймыліс сойыс, и мортыд немтор эз на сяммы думыштны, кыдзи сылӧн пуртӧса пуртыс лои нин Марс киын... — Но настоящӧй баталиятӧг мӧдар югыдад ме ог мун. Менам век жӧ корсарлӧн сьӧлӧм! — сьӧкыда лолалігтыр помаліс Марс ассьыс мӧвпсӧ.

— Гад!.. Вай пуртсӧ... Абу аслам сійӧ...

— Привет! Сійӧ жӧ менам законнӧй трофей! Ме эг гусяв сійӧс, а честнӧй бойын судзӧді.

— Часлы, тэ меным сюрлан на! Гад...

— Бура узьны тэныд, экзекутор, — шуис Марс да тэрыба сетчыштіс подъездлань. — Деньгаыд кӧ эм, мунігмозыд пыравлы лавкаӧ, сукар ньӧб. Аски «чёрный ворон» локтас тэа-меала...

— Вот гад! Но и гадъяс! Вузалісны сювъясӧн нюньӧяс!

«Повзьӧмвывсьыд пышъяс ещӧ кытчӧкӧ войнас! — котӧрӧн-сорӧн ылыстчысь Гаврил вылӧ пемыд подъездсянь видзӧдігтыр думайтіс Марс. — Эскис ӧд бӧлбаныд! Кыв шутӧг. Сэтшӧма и тӧдӧны найӧ менӧ. Оз небось думыштлы, верма-ӧ ме вӧчны тадзсӧ накӧд сёрнитчытӧг. Ок ми, пеж дзодзувъяс, муртса на тальччисны бӧж выланым, а сявгысим нин ӧтарӧ-мӧдарӧ, орӧдім бӧжъяснымӧс и — драла!»

Сэсся Марс мӧвпыштіс: «Гашкӧ и, колӧма нуӧдлыны заводсасӧ? Кӧть нин висьтасьны ли. Леститчӧмысь яндзим лои. А, гашкӧ, ӧні ветлыны? Петкӧдлыны ассьым гижӧмторйӧс? Мед колӧкӧ пуксьӧдӧны. Но мед судӧдзыс кӧть ӧти прамӧй морт тӧдіс, мый морт сямаыс ме пытшкын этшаник кӧть да эм на жӧ».

Тайӧ мӧвпъясыс пӧсьӧдісны-ышӧдісны зонмӧс, и сійӧ, кытчӧдз эз на кӧдзав, котӧрӧн кайис гортас, ӧлӧдіс бабсӧ: тэрмася пӧ, босьтіс ассьыс гижӧдсӧ да бӧр котӧртіс пемыд ывлаӧ.


Ким, гортас воӧм бӧрын, петіс гӧрд пельӧсӧ видзӧдны телевизор — буретш петкӧдлісны мирса первенство вылӧ хоккей кузя ордйысьӧмъяс. Миян хоккеистъяс вӧлі вермӧны канадасаясӧс.

Кутшӧма нимкодясьӧ, а ӧттшӧтш кутшӧма пыдзрасьӧ-мучитчӧ сьӧлӧмыд хоккейтӧ видзӧдігӧн. Торйӧн нин сэк, кор ворсӧны миян. Ким вунӧдліс став йывсьыс. Сылы окота вӧлі тшӧтш уськӧдчыны йи вылӧ да отсасьны, отсасьны морӧсаныс «СССР» гижӧда рыцаръяслӧн кодь доспехъясӧ пасьтасьӧм багатыръяслы. А кор миян сюйисны нӧшта ӧти шайба морӧсаныс клён коръяса командалы, и лои нин гӧгӧрвоана, мый миян бара лоӧны мирса чемпионъясӧн, Кимлӧн нимкодьысла петіс синваыс.

Да сӧмын ӧмӧй Кимлӧн! Медбӧръя шайбасӧ сюйигӧн залӧ сюйсьӧм-шӧтӧм йӧз мый вынсьыс горӧдісны сэтшӧма, мый ыджыд бетон керкаыс дрӧгнитліс ставнас. Воддза радын пукалысьяс пиысь куим-ӧ-нёльӧн чеччыштісны места вывсьыныс да пондісны йӧйяс моз чеччавны, зымӧдны кокъяснаныс.

И ӧд мый пыднаӧдз вужъясьӧма морт пытшкӧ асыс, асланымъяс вӧсна «висьӧмыс». Вермӧны миян — тэ медся шуда морт: а вермӧны кӧ миянӧс — мурган-сьӧласян.

Ворсӧм помасьтӧдзыс вӧлі на вит минут, кор Кимӧс чукӧстіс Гена, коді, буракӧ, муртса на воӧма: тэнӧ пӧ виччысьӧны.

— Мед татчӧ локтас, видзӧдас помсӧ! — воча горӧдіс Ким йӧз чукӧрсянь. Ӧні, кор йи вылын вӧліны медся шызьӧдысь, медся пӧсь здукъясыс, сійӧс, Кимӧс, ӧдвакӧ эськӧ кодкӧ вермис петкӧдны залысь. Но виччысьтӧг Ким мӧвпыштіс: «А гашкӧ, Света? Гашкӧ, найӧ воисны Генакӧд?»

И сійӧ петіс залысь.

Асланыс жырйысь чуймӧм Ким казяліс ӧнтая мича чужӧма зонмӧс.

— А, тайӧ тэ, психиатр? — Кимлӧн сьӧлӧмын, а тшӧтш и чужӧм вылын, дӧзмыштӧм и шензьыштӧм. — Гашкӧ, кӧсъян тӧдмавны, мый ме думайта ӧнія здукӧ?

— Ме ӧтитор висьтавны кӧсъя тэныд... — Марс воча чеччис улӧс вылысь.

— Он ёна тэрмась? — тэрыба юаліс Ким. — Петам видзӧдам помсӧ! Некымын минут коли.

— Меным ӧні абу нин интереснӧ, водзсӧ эг видзӧд да.

— Сідзкӧ, менӧ виччысьлы тані, но?! — И кор мӧдыс кӧсйысис, Ким котӧрӧн бӧр петіс.

«Мися, кутшӧм жӧ равзӧм кылӧ ывлаӧдзыс... Талун ӧд хоккей, дзикӧдз вунӧді», — жалитӧмпырысь мӧвпаліс Марс. Пондіс видзӧдавны гӧгӧр, шензьыштіс: «А ничево налӧн кают-компанияыс!» Порог дорысь казяліс гираяс и бара мӧвпыштіс зонъяс йылысь: «Со и косясь татшӧмъясыдкӧд!»

Гена да Ким бӧр воисны гораа радліг-сералігтыр, шуда чужӧмъясаӧсь.

— Ми вермим, психиатр! — пыригмозыс на горӧдіс Ким. — Ми бара на чемпионъяс!

— Дерт, шуам, шведъяс отсалыштісны, — ыркӧдыштіс Кимӧс Гена.

— Всё равно вермим! — Ким юис ӧтпырйӧ кык стӧкан ва, мед лӧньӧдыштны асьсӧ, сэсся и юаліс Марслысь: — Но, мый кӧсъян висьтавны?

Марс педзыштіс места вылас, кӧсӧйтчыліс Гена вылӧ. Ким казяліс сылысь видзӧдлӧмсӧ, шуис:

— Генкаысь менам некутшӧм секрет абу.

— Ме кӧсъя сетлыны тэныд лыддьыны ӧти... вердикт, — шуис Марс. — Сӧмын водзвыв кора, кыдз шулӧны дипломатъяс, «отнестись к нему с должным вниманием и пониманием».

Заводсаяс кыкнанныс нюммунісны, но налӧн синъясын пырысь-пыр жӧ тыдовтчис пӧсь кӧсйӧм тӧдмавны тадзи вӧзъянасӧ.

— Кыдзи кужам, кутам лоны дипломатъяс кодьӧн, — серӧктіс Ким.

— Гашкӧ, ог Вышинский кодьӧн, но век жӧ... — шуис тшӧтш и Гена.

Марс кыскис турунвиж штормовка зепсьыс шӧри кусыньтӧм тетрадь да мыччис Кимлы.

— Ас кежысь лыддьыны али гораа? — юаліс Ким, кодӧс пыр ёнджыка шензьӧдіс тайӧ гӧгӧрвотӧм зонмыс.

— Верман гораа, — шуис Марс. — Сӧмын ме котӧрта гортӧ. — Марслы окота вӧлі на пукалыштны тані, но сылы эськӧ зэв сьӧкыд вӧлі кывзыны ассьыс гижӧдсӧ. И сійӧ муніс.

«Граждана судьяяс! Бур йӧз!» — заводитіс лыддьыны Ким, но пырысь-пыр жӧ быттьӧ тшӧкмуніс, кыпӧдіс шензьысь синъяссӧ: мыйся дивӧ пӧ тайӧ веськаліс ме киӧ...

Гена чуймӧм чужӧма жӧ сулаліс:

— Ноко, ноко, лыддьыв водзӧ!


Дас коймӧд глава


«Граждана судьяяс! Бур йӧз! — выльысь лыддис Ким. — Ставӧн ті зэв сьӧлӧмсяньныд кывзінныд прокурорлысь мыжалана речсӧ и тіян, тӧдӧмысь, кыптіс не этша скӧрлун миян дінӧ, кодъяс тшыксьӧм понъяс моз заводитлісны курччасьны войся карын.

Ті кывзінныд тшӧтш и адвокатӧс, коді мӧрччана кывъясӧн зілис вӧрзьӧдны тіянлысь сьӧлӧмъяснысӧ, чуксаліс не сэтшӧм чорыда мыждыны миянӧс, сы вӧсна мый ми зэв на томӧсь.

Кутшӧм кӧть эз ло миянлы приговорыс, ме тшӧтш кӧсъя шуны кыв-мӧд, висьтавны, кыдзи вои тайӧ скамья вылӧдзыс, кодӧс со потшӧма. Гашкӧ и, менам олӧм йылысь висьтыс кодсюрӧлы бур вылӧ мунас.

Ті, буракӧ, ӧти кывйӧ воанныд, ме кӧ шуа, мый ме эг чужлы сумка мырддялысьӧн. Сэк, кор ме первойысь аддзи олӧм югыдсӧ роддомын, кор медводдзаысь топӧдчи мамлӧн морӧс дінӧ, сэки ме эг на мӧвпав та йылысь. Эг думайт ме та йылысь и сёрӧнджык, кор нин понді котравны ас кок йылын, кор нин куті видзӧдны ас гӧгӧр вежӧраджык синъясӧн.

Медводдза мӧвпъясысь ӧти, коді чужис менам юрын, вӧлі дзик мӧд сяма: «Мыйла мукӧдыслӧн эм бать и мам, а менам найӧ абуӧсь? Мыйла менам эм сӧмын пӧрысь баб?»

Сэсся тайӧ мӧвпыс, эскадра вӧйтӧм йылысь лёк юӧр моз, воліс менам юрӧ зэв унаысь, быдмигчӧж. Воліс сэк, кор менам кутшӧмкӧ ёрт батьыскӧд вӧлі мӧдӧдчӧ войколӧн вуграсьны. Воліс и сэк, кор татшӧм ёртсӧ вӧлі окалӧ-меліалӧ мамыс школаысь вайӧм «пятёркаысь».

Колӧ-ӧ висьтавны тіянлы, мый татшӧмторсӧ аддзигӧн меным вӧвлывліс эз зэв долыд?

Шуӧны: батьӧй пӧ юигӧн вӧйӧма. Ті, буракӧ, гӧгӧрвоанныд, кутшӧм сьӧкыд вӧлі меным тӧдны тайӧс. Ме эськӧ вӧлі сё пӧв шудаджык, сійӧ кӧ эськӧ вӧйис крейсер вылын врагкӧд тышкасигӧн либӧ граница дорйигӧн... Сэки эськӧ ме верми ошйысьны сыӧн, сэки эськӧ сійӧ, кулӧмаыс нин, отсаліс меным сӧстӧмджыкӧн лоны, чуксаліс менӧ мичаджыкторъяс вылӧ.

А сійӧ менам код юрӧн, коньӧр моз, вӧйӧма. Думыштлӧй асьныд, ёна-ӧ кутас ошйысьны зонкаыд татшӧмторнад! Аслам другъяскӧд сёрнитігъясӧ ме быдмигчӧж ньӧтчыд эг казьтывлы бать йылысь, а пансьыліс кӧ татшӧм сёрниыс, ме зільлі кежӧдны сійӧс мӧд туй вылӧ.

А сэсся, кор ме ыджыдджык нин лои, куті мӧвпавны джуджыдджыка. Мися, мыйла нӧ миян олӧмын, кодӧс ми лыддям медся мичаӧн да сӧстӧмӧн, олӧмын, кодӧс ошйысьӧмӧн шуам, мый сэні быд морт мӧд мортлы вок кодь, — мыйла нӧ, мися, тайӧ олӧмас менам бать коддьӧмъяс юсьӧны? Мыйла нӧ мукӧд йӧзыс лэдзӧны татшӧмторыслы лоны?

Кор ме тадзи куті думайтны, ме куті сюсьджыка видзӧдны олӧм вылас и казялі, мый йӧзыд ӧта-мӧдныскӧд оз на бур вокъяс моз овны. Сійӧ йӧзыс, кодъясӧс ме тӧді, медъёна радейтісны асьнысӧ, ассьыныс челядьнысӧ. Ме понда некодлӧн сьӧлӧмыс эз вись.

Шуам, менам ӧти друглӧн, Андрейлӧн, батьыс — ыджыд морт — нуӧдіс ассьыс писӧ музыкальнӧй школаӧ, сійӧс сэні кыв шутӧг примитісны. Ме куті вӧзйысьны баблысь, мед сійӧ менӧ тшӧтш нуӧдас. Ми ветлім бабкӧд сэтчӧ, но менӧ эз босьтны, кӧть эськӧ ме Андрей дорысь бурджыка сьыла, ёнджыка радейта музыкасӧ. Миянлы бабкӧд шуисны: инструмент кӧ эськӧ вӧлі тіян, пианино, то босьтім пӧ.

Пианино вылӧ миян сьӧмным эзджык тырмы, и ме ньӧби гитара да зэв бура велалі сьывны блатнӧй сьыланкывъяс. Налысь нор мотивсӧ нюркйӧдлігӧн менам сьӧлӧмӧй ойдыліс шогӧн, син водзӧ сувтліс батьтӧм-мамтӧм олӧмӧй. Ме, кыдзи шуласны, мыссьылі синваӧн. Но татшӧм синва бӧрас кыдзкӧ век кокньӧдліс.

Дырӧн-регыдӧн ме казялі, мый весиг школаын, классын, учительницаяс оз быдӧн вылӧ ӧткодя видзӧдны. Ме казялі, мый менӧ муртса-муртса терпитӧны, зывӧкпырысь видзӧдӧны ме вылӧ, а, шуам, Андрейӧс весиг ачыс директриса меліа ыдждӧдлӧ Андрюшенькаӧн.

Видзӧд, сылӧн батьыс ыджыд начальник, а менам батьӧй код юрӧн вӧйӧма. Но ме ӧмӧй мыжа таысь?

Кор ме воӧдчи татшӧм думъясӧдзыс, ме эг понды кывзысьны менӧ кедзовтысь учительницаяслысь, ме найӧс асьнысӧ куті кедзовтны: дышпырысь вӧчавлі урокъяс, вензи. И, дерт, дневникын унджык «двойка» кутіс лоны. Учительницаяс пондісны норасьны рӧдительскӧй собраниеяс вылӧ ветлӧдлысь баблы: вермӧ пӧ велӧдчынысӧ, но, асныра пон моз, оз кӧсйы.

А ӧтчыд, кор Андрейлы дзик нин яндысьтӧма лэптісны оценкасӧ, ме сэтшӧма скӧрми, мый перемена дырйи ставсӧ ратшкӧді-висьтавлі сылы, а сэсся, косьӧ воим да, ме сійӧс нӧйті. Дерт, мисьтӧмтор вӧчи, зонкаыс эз вӧв мыжа ме водзын. Но мыйкӧ друг сэтшӧм забеднӧ лои, горшӧдз лыбис скӧрлунӧй, и эг вермы кутчысьнысӧ.

Та бӧрын ме вылӧ ещӧ на мисьтӧмджыка пондісны видзӧдны, и лои кутны курс мӧд школаӧ.

Но ті, гашкӧ, чайтанныд, мый ме акула кодь лёк морт? Мый ме пурсьысьӧн и чужлі? Збыльысь шуа: эг. Ме весиг чайта, мый ме пытшкын ковтӧм уна эм небыдлун да жальлун. Шуам, ме эськӧ зэв шудаӧн вӧлі, мекӧд кӧ орччӧн оліс ичӧтджык чой. Ме эськӧ быд ногыс меліалі-видзи сійӧс, быдӧнысь эськӧ дорйи...

Школаын велӧдчигӧн на менам чужис мӧвп: сійӧ йӧзыс, кодъяс тӧдӧны менӧ, оз гӧгӧрвоны менӧ, оз весиг кӧсйыны гӧгӧрвоны. А меным синва петтӧдз окота вӧлі, мед эськӧ кодкӧ менӧ гӧгӧрвоис. Мед эськӧ казяліс меын не сӧмын ортсысяньыс тыдалана, смешитчысь-грубитысь зонмӧс, но тшӧтш и сійӧс, мый вӧчсьӧ ме пытшкын. Ме эськӧ тайӧ мортыслы висьталі став ассьым гуся думъясӧс! И сійӧ эськӧ казяліс, мый ме абу нин сэтшӧм акула. Сійӧ эськӧ сетіс меным вына кисӧ, да сы вылӧ мыджсьӧмӧн ме эськӧ кыпӧдчи вылӧ, вылӧ.

Ок, кутшӧм окота вӧлі меным паныдасьны татшӧм мортыскӧд! Но сійӧ мыйлакӧ паныдсӧ некыдз эз во.

Сэки ме мӧдӧдчи мамӧс корсьны, кодӧс вӧлі муртса-муртса помнитышта. Окота вӧлі норасьыштны сылы, а ӧти сайын шуны некымын «мелі» кыв сыысь, мый сійӧ, кӧч мам моз, сэтшӧм водз эновтчис меысь. Ме аддзи мамӧс ылі карысь, сэні вӧліны тшӧтш и зэв мусаник чойяс. Эз ӧти, а куим — найӧ мыйӧнкӧ муныштісны ме вылӧ, и таысь менам сьӧлӧмӧй дзикӧдз гызьыліс. Но сэні вӧлі тшӧтш и мӧд бать, сійӧ видзӧдіс ме вылӧ сэтшӧм жӧ меліа, кутшӧм меліа видзӧдӧ тшыг пон мӧд пон вылӧ, коді кыйӧдчӧ мырддьыны сылысь вильӧдан лысӧ.

Менам кывйӧй эз бергӧдчы дивитны мамӧс. Сы вӧсна, мый сійӧ меным кажитчис меысь на шудтӧмӧн. Гашкӧ, коркӧ том дырйиыс неыджыд вензьӧм вӧсна сійӧ муніс бать дінысь, кӧсйис аддзыны ыджыдджык шуд; но шудыд тай из тор моз оз туплясь туй вылын. Мамӧ мӧд сайӧ петӧма верӧс сайӧ, но кык во мысти и сы дорысь на мунӧма, ичӧтик чойӧс моздорас топӧдӧмӧн. А сэсся и ӧтвывтчӧма со тайӧ мыр моз чӧв олысь мортыскӧд.

Эз ёна гажа вӧв сэки миян янсӧдчӧмным. Чужӧмъяс выланым ни менам, ни мамӧлӧн эз дзордзав нюм.

Сійӧ здукас ме гӧгӧрвои, мый менам сэсся некод вылӧ надейтчыны. Ас вылӧ кындзи. Ме шуи дугдыны велӧдчӧмысь да петны удж вылӧ. Меным друг окота лои, мед менам киын лоис унджык сьӧм, ас сьӧм. Мед эськӧ ме верми видзны сійӧс кыдз гажӧй. Окота вӧлі видлыны гырысьяс моз гажӧдчыны, ветлыны ресторанӧ. Ӧти кывйӧн кӧ, бурджыка тӧдмавны вина кӧрсӧ, аслым тӧдмавны, мыйӧн жӧ сэтшӧма кыскӧ йӧзсӧ юӧм-гуляйтӧмыс.

Меным окота вӧлі пырны уджавны заводӧ. Окота вӧлі кывны ачымӧс машинаяс вӧчысь уна тысяча йӧз пӧвстысь. Ме весиг вӧлі аддза нин, кыдзи смена помасьӧм бӧрын ме пета тайӧ вына йӧзыскӧд завод воротаӧд. Менам воськолӧй зумыд, а мудзыштӧм чужӧм вылын ворсӧдчӧ шуд, коді лоӧма сьӧлӧм бурмӧдана уджысь.

Кор ме муні вӧзйысьны заводӧ, тшӧг дядьӧ юаліс менсьым:

— Специальносьтыд кутшӧм?

Ме висьталі сылы: мися, школьнӧй мастерскӧйын мыйтакӧ слесаритлі, но разрядыс абу на. Кӧсъя ученикӧ пырны, мися, ме ӧдйӧ велала. Но дядьӧ шуис:

— Ми примиталам сӧмын специалистъясӧс.

Ме жугыльмӧм чужӧмӧн виччысьышті на, меным эз на кӧсйыссьы эскыны, мый югыд мечтаӧй татшӧм ӧдйӧ пазаліс. Час, мися, дядьӧыс выльысь на лэптас юрсӧ да бурӧн сёрнитыштас мекӧд. Но сійӧ, буракӧ, вунӧдіс нин ме йылысь. Меным окота вӧлі пӧсь кывъясӧн выльысь шыӧдчывны сы дінӧ, висьтавны ставсӧ, мый вӧчсьӧ ме пытшкын, но менам гӧрддзасис горшӧй, да нинӧм нин сэсся эг вермы шунысӧ.

Рытнас гортын ме кывзі радио пыр объявлениеяс. Вӧлі корӧны удж вылӧ инженеръясӧс, механикъясӧс, бухгалтеръясӧс. Татшӧм уджъяс вылад ме, дерт, эг туй. Но со помланьыс висьталісны, мый чукӧртӧны том йӧзӧс вӧрса трактористъясӧс велӧдан школаӧ. Ме и шуи баблы: мися, муна сэтчӧ. Баб ышлолалыштіс да шуис: окота кӧ пӧ и — мун.

Ме ог кут кузя тіянлы висьтавлыны сэні велӧдчӧм йылысь — велӧдчи сідз-тадз, веськыда кӧ шуны, трактор дінӧ менӧ эз зэв кыскы. Трактор велӧдӧмкӧд тшӧтш ми, том йӧз, велӧдчим и вина юны, не ӧтчыд тышкасьлім сэтчӧс зонъяскӧд, а ӧтчыд меным весиг сутшкисны сойӧ перочиннӧй пуртӧн. Ранаыс эз вӧв джуджыд, регыд бурдіс.

Но сэки меным лои мунны училищеысь, во сӧмын и велӧдчи, кык во пыдди. Ӧти асылӧ ме бӧр веськӧді курсӧс гортӧ. Кольӧм во помын вӧлі тайӧ делӧыс, меным буретш тырис дас сизим арӧс... Ёнасӧ сэки ме эг шогав: ӧд лоыштіс нин вынтор, сідз ли тадз, ӧні нин ме ачым верми перйыны кынӧмпӧт. Пыри уджавны кардорса рейдӧ, чернад ӧвтчыны тай регыд велалан...

Гашкӧ, ті юаланныд, кыдзи ме ӧнӧдз гӧгӧрволі олӧмсӧ? Веськыда шуа, быд пӧлӧс горзӧм-ошйысьӧмсьыд менӧ шогӧдӧ. Сійӧ йӧзыслӧн, кодъясӧс ме тӧда, мича да гора кывъясыс оз сьӧлӧманыс чужны, кыдз, шуам, коркӧ Дзержинскийлӧн либӧ Павел Корчагинлӧн, а артмӧны сідз-тадз; талун тайӧ кывъяссӧ койыштасны-резыштасны, а аски найӧс вунӧдӧмаӧсь нин. И олӧны татшӧмъясыс дзик мӧд ног сы серти, мый сёрнитӧны да мыйӧ чуксалӧны йӧзӧс. Кор аддзан татшӧмтортӧ, зэв видзчысьӧмӧн кывзан гора кывъястӧ, кывзан, а ачыд думайтан горзысь йывсьыс: «Тэ ӧд, муса друг, ас пондаыд медъёна вийсян! Он йӧз понда. Кӧть эськӧ и петкӧдлан, мый ас йывсьыд ньӧти он думайт...»

Менам аддзысисны другъяс, и ми ас ног кутім овны. Луннас уджалам, а рытыс миян, мый кужам, сійӧс и вӧчам. Колӧкӧ — вина юам, колӧкӧ — театрӧ мунам. Ті энӧ думайтӧй, мый ми сэтшӧм нин ныжӧсь да весиг театрӧ некор эгӧ ветлӧдлӧй: кутшӧма на ещӧ ветлӧдлім, сӧмын, дерт, эг сэтшӧм спектакльяс вылӧ, кӧні кутшӧмкӧ ветеран помся дӧжналӧ-велӧдӧ том йӧзӧс, кыдзи колӧ овны... Вӧлі лыддям миянлы кажитчысь кывбуръяс, вензям. И вензям ог комсомольскӧй рытъяс вылын моз — сэні ӧд ёсьджык мӧвптӧ либӧ кутшӧмкӧ сомнение он висьтав, — вензям вӧлі некодысь повтӧг, шуалам сійӧс, мый думайтам.

Сӧмын тай винаыс вочасӧн пондіс вермыны миянӧс. Пыр частӧджык кутім юны, нывъяскӧд радейтчыны. А мед, мися! Ӧтчыд ӧд олам! Гуляйтыштам, кор томӧсь на! Пӧрысьман да сёр лоӧ!

Чиркъяслӧн кодь гажа олӧм миян пуксис! Сьылам да йӧктам. Нывъяскӧд узьлам, окасям кольмытӧдз. Сэтшӧм на лӧсьыд ещӧ вӧлӧма сідзтӧ овны. Удж вылын ӧдва-ӧдва вӧлі рытсӧ верма виччысьны.

Но деньгаыд эз кут судзсьыны. Аппетитъясным содісны — унджык вина кутіс ковны, чӧскыдджык закуска. Сэсся ӧтчыд, кор винаыс бырис буретш азартӧ воӧм бӧрын, а деньгаясным эз вӧвны, мунім магазин дорӧ да кокньӧдім винаысь ӧти зэв код мортӧс. Мися, лёкыс таысь нинӧм эз ло: сійӧс со сідз нин вермӧма винаыс, а миянлы оз на тырмы...

Со кытчӧдз ми воим. И со мый ме кӧсйи висьтавны тіянлы, граждана судьяяс, уважайтана публика!

Нӧшта ме кӧсъя шуны, мый сьӧлӧмӧй менам эз на жӧ дзикӧдз нитшсяв татшӧм олӧмсьыс, и тайӧ лун-войнас ме ёнакодь мучитчи-думайті. Уна мӧвп воліс юрӧ: а ӧд, мися, вермис на и лёкджыка ставыс тайӧ помасьны. Код юрнад ми вермим на и вины кодӧскӧ. Сэки эськӧ, мися, и миянӧс нырыштісны.

— Ми, дерт, мыжаӧсь, и миянӧс, тӧдӧмысь, топӧдасны. Ме, ас пайысь, некутшӧм прӧща ог кор. Ме висьталі ассьым медбӧръя кывйӧс сы могысь, мед эськӧ кутшӧмкӧ мӧд зонка эз таляв менсьым чукыльӧсь-мукыльӧсь туйӧс, ме висьталі ставсӧ тайӧс тшӧтш и сы могысь, мед эськӧ и гырысьясыс вӧліны сьӧлӧмаджыкӧсь олӧмнас дойдӧм ме кодь зонкаяс дінас, мед эськӧ найӧ корсюрӧ тшӧтш думыштчылісны: мыйся олӧм пӧ олӧ татшӧм коньӧрыс...»

Ким помаліс лыддьынысӧ, и шы ни тӧв лолі, мыйкӧ дыра кыліс сӧмын кузьмӧс радиоприёмник вылын сулалысь будильниклӧн тічкӧмыс. Сэсся Гена шуис шензяна гӧлӧсӧн:

— Вот шплинтыд, мый гижӧма! Кимка, сійӧ, буракӧ, тэ кодь жӧ сочинитель.

— Абу йӧй, тыдалӧ, — шуис Ким мича почеркӧн гижӧм тетрадь вылӧ шоныда видзӧдігтыр. Ачыс батьтӧг-мамтӧг быдмылӧм морт, сійӧ сьӧлӧмнас кыліс ас кодьыс жӧ судьбаа мӧд мортлысь шогсӧ.

— Сӧмын, гашкӧ, гижысьыс вывтіджык кӧсйӧ пычкыны кодлыськӧ жальлунсӧ, — шуис Гена.

— Ӧдвакӧ нарошнӧ вӧчис тадзсӧ, — шуис Ким. — И ме чайта, татшӧм висьтасьӧмыс абу ӧти лунӧн чужӧмтор, сійӧ вочасӧн дыр нин чукӧрмӧма.

— Бур эськӧ, сідз кӧ. А то татшӧмъясыд ӧд мудерӧсь овлӧны: быд дивӧсӧ лӧсьӧдласны, мед сӧмын эз мыждыны пакӧститчӧмсьыс.

— Меным тай быттьӧ оз сэтшӧмӧн кажитчы-а.

— Да-а... Быдса речь гижӧма, зырымбедьыд... Юрыс уджалӧ... А, шуам, судӧдз кӧ лоӧ, лыддьыны али мый кутас?

— А мый, вермас бара татшӧмыд.


Дас нёльӧд глава


Марслӧн милицияӧ явитӧм йылысь кывъясыс дзикӧдз весьӧпӧртісны Гаврилӧс. Карыс сылы друг быттьӧ лои дзескыдӧн. Став йывсьыс вунӧдӧмӧн Гаврил уськӧдчис котӧртны общежитиеланьыс, котӧртіс лов тыртӧдзыс, гоз-мӧд мортӧс муртса эз пӧрӧд кок йывсьыс. «Ӧдйӧджык, ӧдйӧджык! — тэрмӧдліс сійӧ асьсӧ. — Босьта паспортӧс, чемоданӧс и — вокзалӧ. Вой шӧрын мунӧ поезд Москваӧ. Утьышта сійӧн... Сэсся кытчӧкӧ Сибирлань. Гашкӧ, оз кутны сэтшӧма корсьны. Эг ӧд мортӧс начкы». А сэсся Гаврил друг думыштіс: «А, гашкӧ, милицияыс менӧ виччысьӧ нин общежитиеын?» Тайӧ виччысьтӧм мӧвпас Гаврил зурасис, быттьӧ завор потшӧ вӧв, тан-сувтіс, сэсся, кӧть и нинӧм на эз удит мӧвпыштны выльсӧ, чепӧсйис бӧрвыв, мед сӧмын ылӧджык усйысьны общежитиеысь. Кокъясыс асьныс лэбӧдісны вокзаллань. Котӧртігас сійӧс пановтіс автобус. «Гашкӧ, пуксьыны сэтчӧ?» Югдӧдӧм автобус пытшкын пукалісны да сулалісны тӧждысьтӧм чужӧма йӧз, чӧла думайтісны ассьыныс думъяснысӧ. Гавриллы сьӧлӧм доймытӧдзыс завидь вӧлі аддзыны йӧзлӧн чужӧмъясысь лӧньлунсӧ. Сійӧ эз лысьт пуксьыны автобусӧ — «а друг тӧдса аддзылас да юӧртас!» Базар дорті туй вуджигӧн паныд лои сьӧд пася да кресталӧм тасмаяса милиционер. Гавриллӧн гут ыдждаӧдз топаліс лолыс, быттьӧ йизис мышкыс, кокъясыс лоисны не аслас кодьӧн, вынтӧмӧсь, и ачыс сійӧ лоис быттьӧ не ачыс. Милиционер, кыдзи кажитчис Гавриллы, стрӧга сатшкыліс сы вылӧ синъяссӧ да кыв шутӧг муніс водзӧ. «Тайӧяс, буракӧ, туй кузялаыс нин кыйӧдчӧны! Ӧд кыдзи видзӧдліс. А ме муна вокзалӧ! Веськыда налӧн лапаясӧ! Кысь нӧ и налы корсьнысӧ, не вокзалысь кӧ?!»

Повзьӧм, шемӧсмӧм Гавриллы друг тӧд вылас уси телевизор пыр неважӧн петкӧдлӧм серпас. Вӧрын вӧлі кутӧны низьӧс. Йӧз да понъяс вель дыр вӧтлысисны коньӧр бӧрся, сэсся и гӧгӧр потшисны сійӧс тывъясӧн. Низьыс эз кӧсйы бурӧн сетчыны — пуысь пуӧ чеччалӧ, ӧтарӧ-мӧдарӧ чепсасьӧ лым вывті, лёкысь эралӧ став вылас. Но кутісны...

Сійӧс ӧмӧй нӧ тшӧтш кутасны? Ок эськӧ, гожӧм кӧ вӧлі, позис вӧрӧ лӧсыштны — мун да корсь сэтысь! А ӧні небось он мун. Тӧдсаяс ордӧ видлыны вӧзйысьны? А кӧнӧсь найӧ, сэтшӧм тӧдсаясыс? Пырысь-пыр и вузаласны. Со тай, вӧліны другъяс — мый керисны! Гадъясӧс нырыштны эськӧ ставнысӧ!

Водзӧс косӧдана думъясысь Гавриллӧн бурмылӧ сьӧлӧмыс, здук кежлӧ вешйылӧ лёкысь майшасьӧмыс. Но сӧмын ӧти здук кежлӧ. Муртса югдӧдыштӧм улич кузя мунысь машинаяс бӧр казьтыштӧны Гавриллы, мый сійӧ эз на мын налькйысь. «Колӧ видлыны пуксьыны кутшӧмкӧ машинаӧ, мунны Княжпогостӧ. А сэні — поезд...»

И со нин кузь тушаа зон кашкӧ-котӧртӧ кар мӧдарлань, сылань, кӧні енэжас мырдгӧрд исергаясӧн ӧзйӧны телевышкалӧн биясыс. Ӧтарӧ-мӧдарӧ шыбласьӧм-котралӧмысла сійӧ дзикӧдз нин мудзӧма, кӧтасьӧма, лясӧма ньылӧдӧм вир-яй дінас дӧрӧм и гач. Но Гаврил оз на кӧсйы сувтны, сылы окота петны тайӧ клетка-карсьыс, кӧні сы мында йӧз пӧвстын абу ни ӧти лов, коді эськӧ вермис меліасьӧмӧн лӧньӧдны-бурӧдны сылысь пикӧ воӧм сьӧлӧмсӧ.

Улича пельӧсын Гаврил бара тангысис тэрыба мунысь нывбабакӧд, мӧдыс шатовмуніс, муртса эз усь да скӧрысь горӧдіс:

— Шпана омӧлик! Туйыс сылы оз тырмы!

Тайӧ гӧлӧссьыс Гавриллӧн зэлалӧм лолыс пырысь-пыр жӧ кыдзкӧ личмуніс, небзис, быттьӧ сійӧс пожйыштісны пӧсь йӧлӧн. Тайӧ гӧлӧсыс вӧлі Люда Туисовалӧн. «Со коді ваяс меным паспортӧс!» — югдӧдіс вежӧрсӧ тарыт вылӧ медшуда дум.

— Люда! Людук! Тайӧ ме, Гаврил. Габӧ. Кылан, Люда?! — пӧся шуаліс сійӧ ылысмыштӧм нин нывлы и тайӧ здукас медъёна поліс сыысь, мый Люда оз бергӧдчыв, оз сувт, и сійӧ, Гаврил, бара кольӧ ӧтнасӧн сёр рытӧ тайӧ кӧдзыд карас. Но Люда сувтіс, бергӧдчис да чуймӧмӧн кутіс дзоргыны аслас подшефнӧй вылӧ.

— Оз жӧ нин тэнад модаыд вежсьы, Габӧ, — дивитанаа шуис Люда. — Гортын и улич вылын — быдлаын ӧткодь. Мый нӧ йӧзсӧ тойлалан? Сэтшӧма повзьӧдін.

— Люда, прӧстит, ме эг нарошнӧ, — кашкӧмсӧ кутны зілиг шуис Гаврил, и сылӧн гӧлӧсыс бара на чуймӧдіс нылӧс, сы вӧсна мый сылӧн подшефнӧйыс некор на эз сёрнитлы татшӧм небыдасӧ.

— Кытчӧ нин сэтшӧм ӧдйӧсӧ тӧвзян? — юаліс Люда Гавриллань воськовтігмоз. — Винала али мый гӧнитӧдлісны другъясыд? Ресторанӧ?

— Люда. Тэ бур ныв... Выручит!

— Мый нӧ лоис? — повзьыштіс мӧдыс; и эз сӧмын сыысь, мый бара на мыйкӧ лоӧма тайӧ Габӧыскӧд, но тшӧтш и сыысь, мый Габӧ пондаыс бара на кутасны пинявны сійӧс комсомольскӧй бюро вылын.

— Немтор эськӧ эз ло да... — Гаврил мый вермӧмсьыс зілис аддзыны мог, мед эськӧ мӧдӧдлыны Людаӧс аслас комнатаӧ паспортла. — Тӧдан, меным колӧ пыравны общежитиеӧ. А сэні другъяс, буракӧ, виччысьӧны. Кӧсйӧны вина юны нуӧдны. А менӧ важсьыс на восӧдӧ. Найӧ ӧмӧй веритасны. Люда, тэ, гашкӧ, пыралан? Паспорт зэв ёна колӧ...

— Мыйла нӧ нин войнас друг паспортыс ковмис? Дас час со лоӧ.

— Но, колӧ! Колӧ!

— А висьтав, мыйла!

— Люда, быть колӧ! Чемоданӧй томантӧм, шуйга пельӧсас паспортыс. — Гавриллы эськӧ зэв окота вӧлі тшӧтш корны и чемодансӧ, но эз кӧсйы тайӧн вывтісӧ повзьӧдны Людаӧс. Да и нинӧм бурторыс чемоданас эз вӧв.

— Ме тэд век буртор вӧча, а тэ менсьым он кывзысь, — эз на тэрмась Люда.

— Ӧнісянь кывзысьны понда, Люда. Тэ толькӧ котӧртлы ӧдйӧджык!

— И мед немся прогул эз вӧв! А то ставнымӧс век янӧдан!

— Люда, ӧнісянь ме мӧд мортӧн лоа! Люда, кадыс оз виччысь, котӧртлы!

— А рытъя школаӧ пыран велӧдчыны? — Люда казяліс Габӧлысь сетчӧмсӧ да зілис нетшыштны ыджыдджыктор.

— Арнас жӧ и пыра! — шуис терпенньӧсьыс петӧм Гаврил. — Ме весиг ньӧби нин ӧти учебник. Алгебраӧн, буракӧ, шусьӧ. Толькӧ тэ вай котӧрт нин!

— Смотри, мед аски эз вӧв заводитӧма мӧд ног сьывны! Сэки ме тэнӧ ньӧти нин ог кут пуктыны морттуйӧ! Ӧні, гашкӧ и, пуктышта на-а. А ӧні вай висьтав, мыйла сэтшӧма ковмис паспортыд. — Люда дзикӧдз нимкодьмис, мый сяммис тадзикӧн домповодавны ассьыс подшефнӧйсӧ — вот кутас шензьыны Беликова, комсомольскӧй секретар. Гашкӧ, и шуас на ошйысигтыр: кужи эг пӧ ме думыштнысӧ! Вай пӧ и мукӧд нарушительяс дінӧ индалам нывъясӧс! «Вӧчас бара сійӧ, ӧддзӧмвывсьыд...»

— Но и морт жӧ тэ, Люда! — Габӧ инас ӧшйытӧм чань моз педзис места вылас. — Но либӧ висьтала нин. Ме кӧсъя мунны общежитиесьыд. Асланым сиктсакӧд паныдаси, корӧ: лок пӧ ов миянын. Ӧні жӧ и муна. Аски, гашкӧ, и удж вылад ог волы, колӧ мортыслы кер вайны отсавны... Тэ висьтав бригадирыдлы... — Ставсӧ тайӧс Габӧ лӧсьӧдліс сы могысь, мед дырджык оз кутны корсьны сійӧс, мед лӧнь дырйиыс позяс ылӧджык усйысьны. Наперво сійӧ кӧсйис лӧсыштны-мунны Молдавияӧ, кӧні пӧ олӧ сылӧн дядьыс, кодӧс Габӧ ньӧтчыд на эз аддзыв. «Коркӧ ӧд колӧ жӧ мортыскӧд тӧдмасьны!» — весиг тадзи такӧдіс асьсӧ Гаврил.

Общежитиеысь ни общежитие гӧгӧрысь некутшӧм другъясӧс Габӧлысь Люда эз казяв. «Тані мыйкӧ абу дзик ладнӧ!» — повзьыштіскодь ныв. Сэсся казьтыштіс Габӧлысь вежсьӧмсӧ и торйӧн нин ӧнія майшасьӧмсӧ: «Вой шӧра войӧ паспорт ковмӧма!» Гавриллӧн чемоданас вӧлі кыдзсюрӧ тубыртӧм гоз-мӧд няйт дӧрӧм, киссьӧм носкияс да свинеч ёкмыль. Людалӧн петіс жальыс: «А коньӧр жӧ эськӧ мортыс да!» — водзӧ на содіс майшасьӧмыс. Ӧні нин ныв вӧлі пӧшти эскӧ, мый Габӧ мыйкӧ вӧчӧма и кӧсйӧ пышйыны.

«Но мый, мый сійӧ пакӧститіс? — аслас думъясысь весиг повзьыштіс ныв. — Видзӧд, гортас со оз лысьт пырны. Гашкӧ, висьтавны зонъяслы, мед ӧтвылысь кутӧны Габӧӧс да вайӧдӧны гортас? Но тадзтӧ вӧчан да, мортыс кӧ абу мыжа? Весьшӧрӧ кӧ лоӧ дойдӧма мортсӧ? Кутшӧм синмӧн сійӧ кутас видзӧдны ме вылӧ? Мый нӧ вӧчны? Корсьлыны комсомольскӧй секретарӧс? Но ӧд виччысьӧ Габӧыс, дырджык кӧ он лок, пышйыны вермас. Да и мый на ещӧ думыштас Беликоваыс — босьтас да звӧнитас милицияӧ. Мый нӧ вӧчны? А паспортсӧ нуа да, пышъяс кӧ? Мед пышйӧ, мына кӧть, сэтшӧма жӧ нин тай дӧсадитіс. Вермас дзикӧдз пропадитны, дас сизим арӧссянь тюрмаӧ веськавны. Либӧ кодалігас мыйкӧкерасны...»

Медбӧрын Люда шуис видлыны бурӧн вайӧдны Гаврилӧс гортас, кыдзкӧ мелілунӧн небзьӧдыштны сійӧс. Ныв дзебис Гавриллысь паспортсӧ да котӧрӧн мӧдӧдчис сійӧс виччысьысь зонлань.

— Тайӧ тэ, Люда? Вайин? — тэрыба юаліс пельӧс сайсянь вуджӧртысь Гаврил.

— Эг вай, абу паспортыд чемоданад, ме гӧгӧрбок лукйи.

— Кыдз абу, мый тэ сӧран! — шуис Гаврил и кватитіс Людаӧс пальто морӧсӧдыс. — Ловтӧ босьта гадлысь, мыйкӧкеран кӧ!

— Лэдз, мый сэн кватласян, — Люда штукатурлӧн вына кинас мынтӧдіс Габӧлысь кисӧ. — Сы дінӧ, прамӧй морт дінӧ моз, бур сьӧлӧмӧн воӧны, а сійӧ жӧ и кватласьӧ. Мый нӧ ме тэнӧ кута ылӧдлынысӧ. Ылӧдчӧм вылӧ кӧ, ме эськӧ эг и лок.

— Меным сэтшӧма колӧ паспортыс! — Капканӧ шедӧм руч моз никсіс Гаврил. — Кытчӧ нӧ сійӧ вермис вошны?

— Мун да ачыд корсь, немся друг тэнад некӧн оз тыдав.

— Некод эз юась менӧ ни?

— Некод эз юась, — шуис Люда.

— А тэ он пӧръясь?

— Ог, мися... Колӧкӧ, ветлам ӧтлаын.

— Смотри, пӧръясян кӧ! Бур эн виччысь.

Найӧ воисны Гавриллӧн жырйӧ, зон пыригкостіыс уськӧдчис чемодан дінӧ, а Люда ньӧжйӧник игналіс ӧдзӧссӧ. Гаврил, повзьӧма и чуймӧма, чатӧртіс юрсӧ:

— Мый нӧ тэ?!

Люда матыстчис лажыньтчӧм Гаврил дінӧ, чорыд кинас пувк-певквӧчис юрсисӧ. Меліа шуис:

— Дугдыв лукйысьнытӧ. Вай ӧтчыд кӧть бур ногӧн сёрнитыштлам. Шуам, быттьӧ ми тэкӧд чоя-вока, быттьӧ ичӧт вок тэ менам...

Чуймӧм Гаврил пуксис крӧвать вылас, баргӧ-видзӧдӧ Людалӧн нюмсермунӧм чужӧм вылӧ, коді кыза гожъялӧма ывла вылын тӧв и гожӧм уджалігӧн. И бура тӧдчана черлыяса тайӧ чужӧм вывсьыс Гаврил друг казяліс мыйкӧ зэв бурӧс, сьӧлӧм тырнас шонтӧмаӧс, мыйкӧ сэтшӧмӧс, кутшӧмӧс некодлӧн чужӧмысь, весиг мамыслысь, эз на казявлы. И таысь майшасьысь зонлӧн лов вылас мыйкӧ быттьӧ вӧрзис, кыпӧдчис горшас да курыд ёкмыльӧн сибдіс сэтчӧ.

— Гаврил, тэ ӧд эн жӧ ви кодӧскӧ? — чӧла юаліс Люда.

Мӧдыс повзьӧмӧн ырсмуніс, посньыдик синъясыс гӧгрӧсмисны:

— Тэ мый, йӧймин?!

— Но и слава Богу, а то ме мыйсӧ нин эг думайт, — шуис личмунӧм сьӧлӧма Люда.

— Мый тэ думайтін?! Мый тэ сӧран?! — чепӧсйис Гаврил нывлань.

— Да пуксьы, мый бара ызъявны кутін. Чайтан, ме ог казяв, мый тэкӧд мыйкӧ неладнӧ. Ме ӧд абу йӧй. Ставсӧ казяла... Став йӧйталӧмтӧ тэнсьыд... И шензя тэ вылӧ, Габӧ. Мыйла стенӧ каттьысян? Мый тэныд оз тырмы? Тэ жӧ со чӧлӧй мужик нин быдмӧмыд. Уджавны верман... Ов да ов сӧмын йӧз мозыс... А тэ юӧмӧ да косясьӧмӧ сетчан... Татшӧмторыд ӧд некор на некодӧс бурӧдз эз вайӧдлы... Тадзинад ӧд тэнад характерӧн, он и тӧдлы, чӧскӧ шедан... И томысянь-кадсянь нэм чӧж кежлад пазалас олӧмыд...

Гаврил юрсӧ ӧшӧдӧмӧн кывзіс Людаӧс да шога мӧвпаліс: «Мый нӧ ме тан куті пукавны? Колӧ жӧ пышйыны...» Но сылы и ньӧти эз вӧв окота петны шоныдінысь пемыд да кӧдзыд ывлаӧ; сійӧс босьтліс дрӧж, кор думыштліс, мый кӧин моз, дзебсясигтыр, колӧ пышйыны код тӧдас кытчӧ, тӧдтӧм муӧ, тӧдтӧм йӧз дінӧ. Ӧд и сэні ковмас дзебсясьны да дыр думайтны сы йылысь, мый тэнӧ корсьӧны, ковмас повны быд милиционерысь. А тані со эм сылӧн юр сюянін, эм удж. И нывлӧн синъясыс со видзӧдӧны шоныда, быттьӧкӧ и сійӧс гӧгӧрвоӧмӧн, мыйысь Гавриллы окота весиг пуктыны юрсӧ ныв пидзӧс вылӧ да пӧттӧдзыс бӧрдны ичӧт зонка моз.

Мед Люда эз казяв сылысь тадзи небзьӧмсӧ, Гаврил копыртіс юрсӧ пызан вылӧ да пондіс мый вынсьыс курччавны вом доръяссӧ. А Люда сулаліс орччӧн, растворӧн сёйӧм сарӧг кинас малаліс сылысь дженьыдика шырӧм, тшӧть кодь чорыд юрсисӧ да небыда шуаліс:

— Ок тэ, Габӧ, Габӧ...


Дас витӧд глава


Министерствоын муніс ӧтувъя партийнӧй да профсоюзнӧй собрание, кӧні видлавсис ӧти вопрос: «Семьяын челядьӧс быдтӧм йылысь». Софья Степановна бура дасьтысис собрание кежлас: водзвыв ачыс сёрниталіс кык докладчиккӧд, пенсиялань матысмысь мужичӧйяскӧд, кодъяс бура быдтӧмаӧсь-велӧдӧмаӧсь пи-нывнысӧ, тшӧктіс налы, мед юксясны том бать-мамкӧд асланыс опытӧн. Активистъясӧс мӧдӧдліс школаясӧ, кӧні найӧ тӧдмалісны, кыдзи велӧдчӧны уджалысьясыслӧн челядьыс. И кор Софья Степановналы, кыдзи парторганизацияса секретарлы, звӧнитлісны редакциясянь да ныв гӧлӧс шуис, мый сійӧ тшӧтш кӧсйӧ волыны налӧн собрание вылӧ, мортыдлы зэв нимкодь лои, сы вӧсна мый тӧдіс: собрание мунас бура.

И со Света тшӧтш пукалӧ собрание вылын. Чукӧрмӧма морт нелямын и кызвыныс — мужичӧйяс. Софья Степановна восьтіс собраниесӧ, сэсся сійӧс жӧ и бӧрйисны нуӧдысьнас.

Света сюся видзӧдіс Софья Степановна бӧрся, сьӧлӧмсянь кывзіс сійӧс. Дерт, нывбаба немтор на оз тӧд пиыскӧд лоӧмтор йывсьыс. Тӧдіс кӧ, эз эськӧ сэтшӧм кыпыд вӧв.

Софья Степановна висьталіс, кутшӧм ыджыд тӧдчанлуныс видлалан вопросыслӧн.

— Челядь — миян будущӧйным, — тӧдчӧдіс сійӧ. — Налы ковмас босьтны кианыс миянсянь коммунизм стрӧитан делӧ. И миянлы колӧ вӧчны ставсӧ сы могысь, медым налӧн киясыс вӧліны сӧстӧмӧсь.

Сёрнитіс Таранова гылыда, быттьӧ и сьӧлӧмсяньыс, кӧть эськӧ ёна ыджыд выльторъяссӧ эз висьтав. Ставсӧ, мый висьталіс сійӧ, быд пукалысь важӧн нин тӧдіс. «А ӧд сійӧ, кӧнкӧ, сьӧлӧмсяньыс кӧсйӧ, мед эськӧ уджалысьясыслӧн челядьыс збыльысь бурджыкӧн лоины? — думайтіс Света кывзігас. — Али сылы веськодь таысь, вӧчӧ сӧмын сы понда, мед нуӧдны содтӧд мероприятие, мед кодъяскӧ шуисны: со пӧ ӧд кутшӧм Тарановаыс! Велӧдчӧй пӧ сылысь!» А нӧшта Света думыштіс Софья Степановнаӧс кывзігӧн: «Сылы, ме чайта, ёна кажитчӧ тадзи велӧдны йӧзӧс. Сійӧ велалӧма нин веськӧдлыны йӧзӧн, сетавны налы колана индӧдъяс. Сылы, буракӧ, ёна кажитчӧ, мый вермӧ кӧзяинавны со кутшӧм солиднӧй мужичӧйяс вылын...» Татчӧ вотӧдз Света мый вермис тӧдмаліс Софья Степановна йылысь и ӧні казяліс, мый ловъя Таранова вель ёна ӧткодь сійӧ ӧбразыскӧд, кодӧс водзвыв лӧсьӧдіс ас вежӧрас.

«Мый со сійӧ кутас вӧчны-а, кор тӧдмалас пи йывсьыс?» — кымынӧдысь нин думыштіс Света, сылы вӧлі сьӧлӧмсяньыс жаль тайӧ зіль, вына да аслысногӧн интереснӧй нывбабаыс.

Кыв сетісны дзор юрсиа, гӧгрӧс юра экономистлы. Сійӧ висьталіс, мый ыджыд пиыс сылӧн неважӧн лои экономическӧй наукаса кандидатӧн, мӧд пи заводитіс нин агрономавны, а нылыс велӧдчӧ институтын...

— О-о-о! — ышловзис Светакӧд орччӧн пукалысь косіник том нывбаба.

— Вот ті и висьталӧй, Трофим Яковлевич, кыдзи тадзсӧ верминныд быдтыны челядьнытӧ, — тшӧктіс Софья Степановна.

— Зэв нин важӧн вӧлі да, менам вунӧма нин, — бур нюмӧн нюмъялігтыр шмонитыштіс мужичӧй.

Но сійӧс гӧгӧрбоксянь кутісны корны, олӧма морт кусӧдіс нюмсӧ да зэв збыльысь нин шуис:

— Но мый... Челядьӧс быдтӧмын-велӧдӧмын кӧ менам эм кутшӧмкӧ заслуга, то, ме чайта, сійӧ, мый ме ичӧтысяньыс велӧді найӧс книга дінӧ. Ме, кыдзи сямми, велӧді найӧс думайтны. Думайтны олӧм йылысь, йӧз йылысь, быд морт йылысь. Вӧр-ва йылысь. Меным аслым ичӧтысянь ёна ковмыліс уджавны, и кыдз верми велӧді удж дінӧ и челядьӧс. Ачым ме абу ыкша морт, ас вӧсна омӧльджыка тӧждысьлі, на вӧсна, челядь вӧснаыс, ёнджыкасӧ тӧждысьлім гӧтыркӧд. Ӧні, дерт, любӧ миянлы.

Старик ёна волнуйтчис, сылӧн, буракӧ, став олӧм-вылӧмыс сувтліс син водзас, сёрнитіс мыкталыштӧмӧн, но сылӧн джӧмдалана сёрниыс вӧрзьӧдіс Светалысь сьӧлӧмсӧ, нывлы тӧдлытӧг зэв нимкодь лои, синва петмӧныс нимкодь сыысь, мый миян олӧмын прӧстӧй йӧзлӧн пияныс лоӧны учёнӧйясӧн да агрономъясӧн... Поэтъясӧн да профессоръясӧн. Быд удж вылын лоӧны збыльысь геройясӧн... И пыр этшаджык кольӧ лӧптыс да шактарыс... Бур йӧзлысь олӧмсӧ дзугысьыс да торкалысьыс... И ӧтвылысь кӧ босьтчыны найӧс дзикӧдз бырӧдны, регыдӧн позьӧ став ёгсӧ весавны... А нӧшта Светалы лои нимкодь сыысь, мый бать-мам со тадзи тӧждысьӧны челядь вӧсна, кӧть эськӧ, гашкӧ, и мукӧддырйиыс озджык лючки налӧн артмы.

«Вот эськӧ и челядь кӧ ас пайсьыныс кыдзкӧ водзджык тшӧтш йиджтысисны тайӧ тӧждысьӧмнас! — мӧвпаліс Света. — Да ичӧтысянь велалісны кывны бать-мамыслысь тайӧ шогсӧ да могсӧ».

Ныв зілис тӧдмавны, кутшӧма мӧрччисны стариклӧн кывъясыс Тарановалы. Председательлӧн пызан сайын пукалысь Софья Степановналӧн векни кымӧса, кузькодь ныра да гӧгрӧс бандзибъяса чужӧмыс кажитчис дзугыльмыштӧмаӧн. Мый йылысь сійӧ думайтіс? Гашкӧ, сы йылысь, мый ачыс сійӧ оз вермы тайӧ старикыс моз бура тӧждысьны пи вӧснаыс? Век некор. Помасьлытӧм уджалӧм-ноксьӧм. Став тӧждысьӧмсӧ мамыс вылӧджык вожӧдліс. А дыш верӧсыслы сьӧлӧмыс эз жӧ лэптыв дзикӧдз вылӧ сетны Сашукӧс.

Светаӧс сэтчӧдз ӧдӧлитісны быд пӧлӧс думъяс, мый сійӧ пӧшти немтор эз велав мӧд олӧма мужичӧйлысь сёрниысь. Сэсся месткомса морт кутіс янӧдны найӧс, кодъяслӧн омӧля велӧдчӧны челядьыс. Медъёна дӧнзис Светакӧд орччӧн пукалысь том нывбабалы. Сылӧн пӧ нылыс мӧд во нин пукалӧ 6-ӧд классын, и бара на пӧ тырыс «двойка». Мортыд пукалӧ — гӧрдӧдлӧ и едждӧдлӧ, а кор сетісны кыв, пӧся горӧдіс:

— Да мый нӧ ме верма керны! Уроктӧ вӧчны, кӧть юрсӧ керав, оз пуксьы! Ачыс вед сэтшӧм зіль. Горт гӧгӧртӧ ставсӧ мыськалас-идралас, лавкаад котӧртлас. Век нин юасьӧ: мый пӧ ещӧ, мама, колӧ керны. Мед толькӧ не пуксьыны книга сайӧ.

— А миян бара мӧдарӧ, — сувтігмозыс шуис ыджыд тушаа да векни кузь юра мужичӧй. — Миян мыйӧн сӧмын воасны школаысь, пыригкостаыс сатшкысьӧны книга сайӧ. Чемодан кодь кыз книгаяс кыскалӧны. Джоджтӧ мыськыны колӧ тасмаӧн тшӧктыны.

«Быдӧнлӧн аслас шог! — думайтіс Света. — А век жӧ, кутшӧм ыджыд наука — быдтыны челядьӧс! А унаӧн-ӧ кужӧны тайӧс вӧчны? Оз, оз на... Дас кӧкъямыс арӧса ныв петас верӧс сайӧ да мый нӧ сійӧ кужас вӧчны? Кор ачыс на кага? И мый сійӧ вермас велавны радио да телевизор пыр корсюрӧ овлысь лекцияястӧ кывзігӧн? Кор сылы велӧдчынысӧ, юр вывтырнас кӧ вӧйӧма уджӧ? Ой, ыджыд тай наука вӧлӧма челядьтӧ быдтӧмыд!»

Собрание помасьӧм бӧрын Света кӧсйис сёрнитыштны Софья Степановнакӧд, видзчысьӧмӧн висьтавны сылы Сашук йывсьыс, но йӧз чукӧрын залысь восьлалігӧн ныв виччысьтӧг казяліс коридорысь штатскӧй паськӧма Пантелеймон Михайловичӧс. И Света кежис петанінлань, ӧні Софья Степановналы сытӧг нин висьталасны мыйта колӧ. Светалы ньӧти эз вӧв окота лоны нывбабалӧн ыджыд шог вылӧ бокисянь видзӧдысьӧн.


Аскинас, буретш ӧкмыс часын, Светалӧн кабинетын триньӧбтіс телефон. Отделса заведующӧй, Никита Петрович, дзормыны заводитӧм сьӧд юрсиа, паськыд кымӧса мужичӧй, нюжӧдіс телефон трубкасӧ ӧдзӧсӧд пырысь сотрудниклы:

— Света, тэнӧ корӧны.

— Светлана Николаевна, тайӧ Таранова сёрнитӧ, — кыліс трубкаын тӧдса гӧлӧс. Но кутшӧма вежсьӧма тайӧ гӧлӧсыс тӧрытъя собрание бӧрын!

— Бур асыв, Софья Степановна, — сьӧлӧмсяньыс шуис Света.

— Светлана Николаевна, ме ставсӧ тӧда, — кыліс трубкаын, и кузь проводъясыс, кодъяс кузя воисны тайӧ кывъясыс, ньӧти эз дзебны гӧлӧссьыс курыд шогсӧ.

— Ме тӧрыт кӧсйи тіянлы ачым висьтавны, Софья Степановна, но виччысьтӧг казялі Пантелеймон Михайловичӧс.

— Мый нӧ меным ӧні вӧчны, Светлана Николаевна? Сьӧлӧмӧй потӧ шогысла. Войбыд на бӧрді, киӧ некутшӧм удж оз пыр. Верми-ӧ ме думыштлыны, мый Сашукӧй татшӧмтор вылӧ петас?

— Ті энӧ сэтшӧма вийсьӧй, Софья Степановна, ме лёксӧ ог кӧсйы тіян Сашуклы.

— Позор! Ой, позор! Ме талун, Светлана Николаевна, кабинетысь ог лысьт петны. Йӧзыскӧд ог лысьт паныдасьны синъясӧн. Ті ӧні сэсся дзикӧдз нин янӧданныд менӧ. Кӧнкӧ, газетад гижанныд?

— Абу ӧд куш сӧмын яналӧмын делӧыс, Софья Степановна! — лэчыда шуис Света. — А, ме чайта, ёнджыкасӧ сыын, мыйла тадзисӧ лоис. И сыын, мый колӧ вӧчны, мед эськӧ зонъяссӧ бӧр морттуй вылӧ веськӧдны. Мед эськӧ и мукӧд зонъяслы не лэдзны татшӧмъяснас лоны.

— Прӧститӧй менӧ, Светлана Николаевна, шогӧйла ме ог тӧд, мый сёрнита.

— Софья Степановна, буракӧ, миянлы колӧ ставнымлы ӧтлаын чукӧртчывны. Быттьӧ бурӧн кӧ тайӧ мисьтӧмторсӧ помавны... Кӧнкӧ заводса войтыр ордын позьӧ. Мед унджык йӧз лоӧ, мед висьтасьӧны сэні.

— Гашкӧ, миян Сашукыслы оз на ков. Сійӧ ӧд миян кага на. Кӧнкӧ, мукӧдыс повзьӧдлӧмӧн кыскисны сійӧс, мырдӧн тшӧктісны. Сэтшӧма мучитчӧ ӧні. Дзикӧдз вермас мыйкӧкертны.

— Ок, Софья Степановна, Софья Степановна! Чайтанныд, меным ёна окота ноксьынысӧ тайӧн? Да?! Муна да милицияӧ явита, гашкӧ, сэки онӧ яналӧй.

— Эн лӧгалӧй ме вылӧ, Светлана Николаевна. Доймӧм мам сьӧлӧмыд оз тӧд, мый вӧчны. Ми воамӧ сэтчӧ...

Кор ныв пуктіс трубкасӧ, Никита Петрович меліа шуис:

— Кывзы, Света, а, гашкӧ, збыльысь колӧ ветлыны милицияас. Чӧвлы, чӧвлы! Коркӧ тай полковникыд выступайтіс ми водзын. Шань морт сійӧ. Сӧветуйтчыны сыкӧд... На отсӧгӧн бурджыка тӧдмавны, ёна-ӧ нин мыжаӧсь тэнад «другъясыд». Первойысь петісны татшӧмтор вылас, али ыж гидйӧ вельмӧм кӧинъяс кодьӧсь нин... Гашкӧ, найӧс ни ӧти лун нин оз позь видзны вӧля вылас да.

— Но мый ті, Никита Петрович, сэтшӧм томиникӧсь на ӧд найӧ!

— А, гашкӧ и, томӧсь да удалӧсь! — эз личлэдз мӧдыс. — Да нӧшта нин кор ӧти чукӧрынӧсь... Сэки найӧ петкӧдласны тэд — том... Быть колӧ явитны милицияас!


Дас квайтӧд глава


Гена воис удж вылысь зумыш. Чӧла пӧрччысис (вежсьыны-мыссьыны оз ков — выль цехын уджалӧ душ, сменатӧ помалӧм бӧрын мыйта колӧ верман сулавны пӧсь зэр улын), юаліс койкаын куйлысь Кимлысь:

— Талун некод на эз волы речнад?

Ким казяліс, мый кӧть эськӧ и другыс юаліс тадзи, думъясыс аслас мӧдтор гӧгӧр бергалісны. И ачыс пондіс юасьны:

— А тэнӧ талун коді чушкис?

Геналӧн морӧсын, тӧв йыв би моз, и збыльысь ыпъяліс скӧрлун. Другыслӧн кывъясысь быттьӧ мыніс-воссис кутӧдыс.

— Кимка, ме видзӧда да, миян Кузовыд ышмыны пондіс — шплинтлӧн кок ув муыс зумыдмис, и юрыс чатӧртчыны кутіс, регыд ныр розьясас зэр кутас пырны.

— Мый нӧ лои? — серӧктіс Ким. Сійӧ тӧдіс, мый скӧрйывсьыныс, цехса войтыр Кузовӧн нимтісны мастер Кузовкинӧс.

— Ӧні, заводысь петӧм бӧрын нин, матыстчис Вася Козликов и норасьӧ: Кузовыд пӧ бюллетень оз тшӧкты сетны. Видзӧд, Васяыс тӧрыт варӧдӧма чуньсӧ. Но, мунас санчасьтӧ, а сэні пӧ фельдшер шуӧ: «Вася, гашкӧ, он пет больничнӧй вылӧ? Мастерыд воліс, кӧсйис чунь бурдтӧдзыд мӧд удж вылӧ вуджӧдлыны...» Аддзан мый вӧчсьӧ! Ӧд бюллетень кӧ сетасны — цехын лоӧ травматизм. А лоӧ кӧ травматизм — мастерлӧн премияыс исковтас! Фельдшерыслӧн и...

— А мортыслӧн кӧ пежасяс чуньыс? — ыззис тшӧтш и Ким.

— Сійӧ ӧд и эм! Ме тай шуи, мися, ышмыны кутіс Кузовыд! А институтсьыс воис — сэтшӧм лабутнӧй быттьӧ вӧлі: бурӧн сёрнитӧ, отсасьӧ-керӧ...

— Гашкӧ, гӧтрасис да сы понда вежсис. Семьяыдлы, буракӧ, унджык колӧ сьӧмыд, — шуис Ким, и син водзас сувтліс Кузовкинлӧн ичӧтик, лӧсьыдіник акань кодь гӧтырыс, коді, буракӧ, ёна радейтіс мичаа пасьтасьны.

— Но ӧд оз жӧ ков йӧз здоровье вылын сьӧмсӧ нажӧвитны! — эз вермы лӧньны Генка. — Мыйыс ӧд удж вылад оз овлы да.

— Гашкӧ, чайтӧ, мый миян, понъяслӧн моз, быд рана сідз бурдас, немтор оз ло? Кывнад нюлыштан и — бурдас.

— А вот ме сылы петкӧдла — бурдас! Аски ставсӧ веськыда синмас висьтала — бурсӧ и син курӧданасӧ, а татшӧмсӧ ме сылысь неэтша нин казявлі. А оз кӧ отсав, парткомын на пана сёрни.

— Либӧ ме вылӧ сылӧн ӧні лӧгыс пуӧмӧн пуӧ? Кык лунтӧ эг уджав да? Сідзкӧ, бюллетень меным не аддзывны? Абу производственнӧй травма да? Гашкӧ и, думайтӧ, мый ме код юрӧн тышкаси? Прогул ещӧ гижас?

— Ми тэнсьыд пайсӧ асьным уджалім, — шуис Гена. Сэсся друг тӧд вылас уси Ким йылысь Кузовкинкӧд сёрниыс: сэки мастер шуис Геналы, мый выныштчыланныд кӧ пӧ ёнджыка, Кимтӧгыс кӧ онӧ чинтӧй выработканытӧ, позьӧ и не босьтны бюллетеньӧ, а сюйны Кимсӧ нарядӧ, быттьӧкӧ уджаліс. А то пӧ бюллетень вермасны на и не сетны — кутасны юасьны, кыдзи да мый лои, доймис ӧд эз заводын... Геналы сэки кажитчис, мый мастер тӧждысьӧ Ким понда (а Кузовкин таланьӧ и пӧлыньтіс сёрнисӧ); ӧні жӧ Гена казяліс делӧыслысь мӧдар бансӧ: «Тэ тай, вӧлӧм, он Кимка вӧсна, а бара жӧ аслад премия вӧсна вийсян! — думайтіс ӧні бригадир аслас мастер йылысь. — Тэнӧ тай, вӧлӧм, волнуйтӧ оз мортыс, а сійӧ, мый тайӧ доймӧмсьыс тэнӧ вермасны удзӧдны сьӧмӧн?» Думнас тайӧс стӧчмӧдӧм бӧрын Гена ышловзьӧмӧн шуис:

— Нда-а. Син водзад тшыксьӧны йӧзыд, солавтӧм чери моз. Збыль ӧмӧй гӧтырыс велӧдӧ дорын узьлыны? Шплинт кодь и эм ачыс-а? Сідзкӧ, Кимка, тэа-меа вай некор огӧ гӧтрасьӧй!

— Вай! — серӧктіс Ким.

— А то гӧтыраыд дзебсяс краляыскӧд аслас позйӧ и дзик мӧд кодь мортӧн лоӧ: полысьӧн, начальстволы паныд кыв оз лысьт шуны, дружинникавны петны сира гезйӧн он кыскы.

— Сідзкӧ, мед оласны пролетарий-холостякъяс! — шуис Ким. — Налы оз ков повны мыйкӧ воштӧмысь.

— И найӧ некор оз кутны копрасьны сэн, кӧні колӧ сулавны болт моз веськыда да вылын юраӧн! — шуис Гена, кос кабырнас вывлань тувкнитӧмӧн. Сэсся содтіс: — А часлы, ме бритчышта, да ӧні жӧ и корсьла Кузовтӧ... Кытчӧдз эг на кӧдзав...

— Мый нӧ быть ӧнісӧ... Виччысьлы нин аскиӧдз, — шуис Ким.

— Аски вермас не артмыны талунъя мозыс, ыркалӧм моторнад.

Гена мунӧм бӧрын шоналӧм сьӧлӧма Ким вель дыр мӧвпаліс другыс йылысь. Ӧні Ким кыдзкӧ вӧвлытӧм пӧся да ясыда гӧгӧрвоис, кутшӧм лышкыдӧн вӧлі сылӧн судьбаыс карӧ воӧм бӧрын — ӧд тӧдмӧдіс буретш тайӧ мортыскӧд. А эз, шуам, сумка мырддялысьяс кодькӧд...

Кутшӧм разнӧй йӧз свет вылас!..

«Мыйся мӧлӧтъясӧн нӧ олӧмыс дорӧ Гена Игнатов кодьяссӧ? Кутшӧм биын калитӧ? — думайтсис Кимлы. — Кыдзи да мыйла найӧ лоӧны кодзувкот кодь зільясӧн да уджалысьясӧн, кор колӧ — чорыдӧн, а кор колӧ — ыджыд сьӧлӧмаӧн, мӧд мортлысь шогсӧ да могсӧ бура кылысьӧн?»

Ким казьтылӧ Геналысь аслас олӧм йывсьыс дженьыдик висьтъяссӧ, зільӧ йитны, ӧтувтны тайӧ торъя серпасъяссӧ кыдзкӧ ӧтилаӧ.

Чужлӧма Гена Эжва бердса сиктын, ыджыд семьяын — бать-мамыслӧн вӧлӧма сизимӧд кагаӧн. Да нӧшта сы бӧрын на кык нывка вӧзйысьӧмаӧсь вӧльнӧй светас. Батьыс пӧ кузнеч, ӧні на кузнечалӧ. Зонпоснияс, мыйӧн сӧмын заводитӧны, вӧлӧм, сувтны кок йыланыс, пыр нин зыртчылӧмаӧсь кузнеча гӧгӧр — то пушкан гычӧдӧны, то ичӧтик мӧлӧтъясӧн кӧрт тув либӧ агас пинь дорӧны. Дерт, кужтӧгыд да велавтӧгыд зонкаяслӧн чунь гыжъяссьыс пӧшти абу и быравлӧмаӧсь лӧз вир пасъяс, ва больясӧдз дзужасьлӧма-сотчылӧма кучикныс, но радлуныс, коді ойдӧдлывлӧ быд ловъя лолӧс мыйкӧ артмӧм бӧрын, вӧвлӧма дойяссьыс ёна вынаджык. Да и батьыс пыр ышӧдлывлӧма мыйкӧ вӧчны. Батьыс пӧ налӧн — зэв зіль да мастерӧвӧй морт; зонкаяс ичӧтысянь казявлӧмаӧсь, мый йӧзыс сійӧс зэв пыдди пуктӧны, и татшӧм батьыдлӧн ошкӧмыс век вӧвлӧма медыджыд наградаӧн. Вок котыр институтъясын абу велӧдчӧмаӧсь — ӧти чой сӧмын лоӧма учительницаӧн, — но некод дась нянь оз сёй: ӧти пӧ батьыс моз жӧ кузнечалӧ, кыкӧн — трактористъяс, ӧти — шопер. Гена да нӧшта ӧти вок — слесаръяс. И быдӧн уджалӧны батьыс моз жӧ зіля, нёль вокӧс наградитӧмаӧсь нин орденъясӧн да медальясӧн, на лыдын и Генаӧс — «Знак Почёта» орденӧн.

«Сідзкӧ нӧ, мый позьӧ та кузя шуны? Мый вӧсна, медсясӧ, лоины найӧ татшӧмъяснас? — мӧвпалӧ ӧні Ким и вочавидзӧ: — Сьӧлӧмсянь керан удж вӧчис татшӧмъяснас вок чукӧрӧс: сы дінӧ найӧ велалісны ичӧтысяньыс... Уджалігас век ӧтарӧ бурмис налӧн киподтуйыс... А сэсся бур киподтуя, сьӧлӧм бурмӧдана уджыс вочасӧн и асьнысӧ лэптіс, ёнджыка мортъяммӧдіс...»

Гортас сизимӧд класс помалӧм бӧрын Гена мунас ремесленнӧй училищеӧ — окота вӧлӧм ӧдйӧджык лоны специалистӧн, сувтны ас кок йылӧ. А сэсся и мӧдӧдасны тайӧ заводас. Заводыс лоӧма Геналы мӧд гортӧн. Бать-мам дінас кӧ сійӧ чужис, мыйтакӧ сӧмын вынсьӧдыштіс бордъяссӧ, медым лэбны ыджыд олӧмас, то тані, заводса коллективын, сійӧ лои мастерӧвӧй мортӧн, ыджыд сямлуна рабочӧй-специалистӧн. Дас кӧкъямыс арӧсӧн нин зарни кияса зонмӧс индасны медся кывкутана уджъясысь ӧтиӧ — чукӧртны дизельяс, и сэксянь пыр сэні мортыс, не кӧ лыддьыны армияын служитӧмсӧ.

И армияад мастерӧвӧй морттӧ казялӧны — Гена служитас танкӧвӧй полкын механик-водительӧн. Бара жӧ дизельяс дінын лоӧма ноксьыны, и моторъяссӧ ещӧ на бура тӧдмалас. Полкын сійӧ лоӧма мастер-водительӧн.

А видзӧдлӧй, кодлӧн мотора пыжыс медӧдйӧ шуркъялӧ Эжва вывті йи вӧрзьӧмсянь йи сувттӧдз? Дерт жӧ — Геналӧн. Сійӧ и вӧр-ваын оз вермы овны мотортӧгыд!.. Таво тӧвбыд найӧ бурмӧдісны «военно-транспортнӧй суднонысӧ». Рулевӧй управлениесӧ петкӧдісны пыж нырӧ, лӧсьӧдісны штурвальнӧй кӧлеса, кодӧн позьӧ и содтыны да чинтыны газ. Тадзинад ёна лӧсьыдджык лои тювъявны юяс кузя, пыж бӧжад эргысь мотор весьтын зітшвидзӧм дорысь, — пельтӧ оз косяв шумыс, и онджык кут повны вӧйӧм керъясӧ зурасьӧмысь.

Генаыс важӧн нин пыравлӧма вӧралысьяслӧн да чери кыйысьяслӧн обществоӧ, эм сылӧн двустволка, кодӧн ньӧти метитчытӧг вермӧ уськӧдны швычӧка лэбысь уткаӧс.

Сюсь зон, немтор шуны, — быдлаӧ судзсьӧ!..

А ӧд видзӧднысӧ ачыс кос кельчи кодь и эм — йывмӧм чужӧма, абу ёна паськыд пельпома, весигтӧ быттьӧ вӧйыштӧм морӧса. Но сылӧн эм кутшӧмкӧ гӧгӧрвотӧм вын. Первойсӧ Ким некыдз эз вермы эскыны талы. Вӧлі пуксясны воча, мыджсясны пызан вылӧ гырддзаяснас и — давай личкыны ӧтарӧ-мӧдарӧ. Ружтӧны, кык ыджыд вын паныдасьлӧмла киясныс тіралӧны. Веськыд киныс кыкнанныслӧн вӧлі ӧткодь вына. А шуйганас Гена вӧлі личкӧ Кимӧс. Тайӧ вӧлі дивӧ кодь. Ӧд ачыс Ким вӧлі зумыд вир-яя ыджыд тушаа морт, ичӧтысянь уджавліс, радейтіс спорт, а вот Гена, кодлӧн сойыс ёна вӧсньыдджык дай дженьыдджык, личкӧ Кимлысь шуйга кисӧ, Геналӧн сойясыс вӧліны еджыд, вӧсни, быттьӧ пырыс тыдалана кучикаӧсь, код улын топыд везъяс моз дзӧрисны-ворсісны вӧсни пратьясысь зэлыда кысьӧм мускулъясыс.

Мукӧддырйиыс Кимлы кажитчыліс, мый другыс сылӧн тӧдӧ кутшӧмкӧ секрет, код отсӧгӧн кыдзкӧ позьӧ кыскыны-босьтны ас пытшкад кӧртлысь крепыдлунсӧ. Гена кажитчыліс сылы моторъяслӧн да быд пӧлӧс кӧрта кӧлуйлӧн тунӧн. Аслас векньыдик рудов чужӧмнас, кос нюдз тушанас Гена кутшӧмкӧ ногӧн вӧлі быттьӧ вужнас йитчӧма кӧрт да сталь тыра цехыскӧд. Нетшышт сійӧс сэтысь, и мыйкӧ оз кут тырмыны цехас, дай ачыс сійӧ, дзоридз моз, нёрмас сійӧс вердысь мутӧгыс да совъястӧгыс.

Гырысь дизельяс, кодъясӧс чукӧрталіс Геналӧн бригадаыс, мунісны не сӧмын миян Коми муӧ, но и ыліӧ, весиг Сибирса вӧръясӧдз. Сылӧн вит морта коллективыс первойӧн заводын кутіс сдайтны сэтшӧм продукция, кодӧс некор бӧрсӧ оз бергӧдлыны, бригада ӧтиторсӧ некор оз вӧчлыв кык пӧв.

Ставыс тайӧ гӧрддзасьліс бригадирсянь. Гена сэтчӧдз эз эновтчыв, кытчӧдз сьӧлӧмнас эз гӧгӧрволы, мый ӧні бур нин лои. Позьӧ чайтны, мый сы киысь кӧ коркӧ петіс брак, Гена эськӧ висьмис. Да и уджыс зэв нин кывкутана налӧн! Ӧд шуам, нелючки кӧ тэчан-регулируйтан поршневӧй система, не сідзи зэлӧдан клапанъяс, — сэки и двигательыд оз кут уджавны, лёкысь несъявны сӧмын кутас.

Первойсӧ Геналӧн татшӧм, быд делӧын вуж дінӧдзыс пырӧдчан уджыс ӧткымын войтырлы эз кажитчыв. Шыльӧдам-мольӧдам пӧ, мукӧдыс жӧ шур-шарвӧчыштасны, а сьӧмсӧ миянысь не этшаджык кульӧны.

— Татшӧм сьӧмыд эськӧ менсьым киӧс сотіс, мавтастӧг уджалысь поршеньӧс моз, — шулывліс Гена татшӧмъясыслы. — И некод тэнӧ ёнасӧ оз кут: колӧ кӧ, мун бригадаысь.

Но та вӧсна бригадаысь йӧз некор эз мунлыны.

Любӧ вӧлі видзӧдны бригадирлӧн уджалӧм вылӧ. Сылӧн негырысь, лӧз сӧнъяса киясыс вӧлі кыдзкӧ быттьӧ дзикӧдз вылӧ ӧтлаасьлӧны инструменткӧд да детальяскӧд. А кор сійӧ вӧчліс медся кывкутанасӧ — шуам, регулируйталіс клапанъяс, — сэки сылӧн вӧсни чуньясыс малалісны кӧртсӧ сэтшӧм жӧ нежнӧя, кыдзи, шуам, радейтана нылӧс. Сылӧн чуньясыс быттьӧ сёрнитісны-меліасисны посни детальяскӧд, ӧтвылысь сӧветуйтчисны, кыдзи колӧ пуксьыны бурджыка.

Гена бура тӧдіс став пӧлӧс двигательяссӧ. Сійӧ вермис висьтавны, кӧні, кутшӧм машина вылын кутшӧм сулалӧ — кымын цилиндра да кымын вӧв вына. Сійӧ, буракӧ, эськӧ вермис на пиысь быдӧнӧс разьны да бӧр чукӧртны, первойӧн казявны, кыті-мый жугалыштӧма. Сійӧ сьӧлӧмсяньыс радейтіс техника, дизельнӧй моторъяс — медъёна. Сы вӧсна мый найӧ вынаӧсь, абу дрӧчкаӧсь, азымӧсь: сёйӧны оз бензин, а донтӧминик солярка.

Мӧвпалӧ быдтор йывсьыс Ким, и сьӧлӧмыс шоналӧ тшӧтш сыысь, мый сыкӧд, Кимкӧд, паныдасьӧмыс эз жӧ лёк вылӧ мун другыслы: бӧръя кык вонас Гена пондіс тшӧтш ёнджыка лыддьысьны, ачыс тшӧтш кутіс ньӧбавны книгаяс, торйӧн нин — «Замечательнӧй йӧзлӧн олӧм» серияысь. И — мӧдарӧ: Генакӧд ӧтлаын олігӧн да уджалігӧн ӧні Ким и ачыс лои быттьӧ авъяджыкӧн, быд удж дінӧ терпеливджыкӧн, кӧть эськӧ и ӧдйӧ ӧзйысь характер вӧснаыс быдторйыс на жӧ овлывлӧ...

«Ӧд дзик абу ӧткодьӧсь ми сыкӧд, разнӧй шомӧсысь пӧжалӧмаяс, а кыдзкӧ тай со велалім ӧта-мӧд дінӧ! — нимкодясьӧ и шензьӧ Ким. — Кӧть кодарсянь эн босьт — абу ӧткодьӧсь... Весиг со и спортад... Сылы штанга медмуса вӧлӧма, вит во лэпталӧма, а меным со — бокс... Вӧр-ваын сідз жӧ и. Сійӧ кӧть лунтыр вугыр шатинӧн пукалас пыжын, а меным эськӧ ружьеӧн вӧрӧд котравны...

Ёна жӧ лӧсьыд, кор тэнад эм бур ёрт, тэнӧ гӧгӧрвоысь ёрт, кодлы верман висьтавны ассьыд быд дум, сьӧлӧмыдлысь быд вӧрзьӧм. Мед кӧть мукӧддырйиыс сійӧ и оз ӧти кывйӧ во тэкӧд, но таысь оз кӧдзав тэ дінӧ, а пыр кольӧ важкодьӧн, сы вӧсна мый кажитчан сылы и сэтшӧмӧн, кутшӧм тэ эм збыль вылас, и сійӧ некутшӧма оз кӧсйы вӧчны тэнӧ ас кодьысӧн. И тэ он кӧсйы вӧчны сійӧс ас кодьыдӧн...»

Мӧвпалӧ та йылысь Ким, и сылы весиг чайтсьӧ, мый налӧн, кык друглӧн, разнӧй характеръяс ӧтлаасьӧмысь быттьӧ артмӧ коймӧд морт, наысь кыкнансьыс вылынджык личность, коді кыкнанныслы быттьӧ сетӧ пример, кыдзи колӧ бурджыка овны. Тайӧ вир-яйтӧм личностьыс, позьӧ шуны, неэтша отсалӧ уджын: ӧд сы бӧрын, кор найӧ овмӧдчисны ӧтлаын, кор ӧти пыжын кутісны катлывлыны Эжваӧд, ӧти рачысь панявны тшын кӧрӧн ӧвтысь чӧскыд юква, ӧти би дорын узьлыны тар койтӧм виччысигмоз, — ӧд та бӧрын найӧ сетісны нин нёль рационализаторскӧй предложение, кӧть эськӧ, шуам, уджалісны кӧ торйӧн, то, гашкӧ, рационализаторство йылысь думъясыс некоднанныслӧн эз и чужлыны.

Со кӧть босьтны нёльӧд предложениесӧ. Кольӧм гожӧмӧ тайӧ вӧлі. Буретш вӧлі тӧлысь помасьӧ, а цехлӧн планыс оз тыр — сы вӧсна мый эз тырмыны запаснӧй часьтьяс, торйӧн кӧ — поршневӧй системаӧ. Кор петісны пыжӧн пекнича рытӧ, Геналысь жугыльлунсӧ эз пальӧд весиг гажа рытыс. Думъяснас мортыд век гартчис цехын, поршеньяс виччысьысь дизельяслӧн блокъяс гӧгӧр. Ким ачыс тшӧтш и, кӧть эськӧ сійӧ и эзджык сэтшӧма вийсьы. Лэччысь шондіӧн лӧсталысь юыс, кодлӧн шыльыд морӧсӧд дзужгисны-катісны мотор бӧрся мотор, ыркыд да сӧстӧм сынӧдыс водзджык пальӧдісны сылысь нимкодясьны лютджык сьӧлӧмсӧ. Узьмӧдчисны Таш ю вом дорӧ. Сёрӧн нин, юква панялӧм бӧрын — черисӧ Гена кыйис проводкаӧн, а Кимлы сир да ёкыш шедіс спиннингасигӧн — кыкнанныс куйлісны би дорын да чӧла видзӧдісны шойччысь ю вылӧ. И со кутшӧм сёрни лоис сэки налӧн.

— Юыс со визувтӧ и визувтӧ, оз, небось, изсьы-шыляв поршеньяс мозыд, — шуис Гена.

— Ваыдтӧ, дерт, но сы пыдди берегъясыс кырлалӧны, — шуис Ким. Спиннингасигӧн сійӧ мудзыштіс, а сэсся пӧттӧдз юква сёйӧм бӧрын да нӧшта юыштӧм бӧрын, лолыс сылӧн паськыд юыс моз жӧ лӧнис, юрас муртса тӧдчымӧн вуджӧртышталісны кутшӧмкӧ зэв лӧсьыд мӧвпъяс, кодъясӧс сылы дыш вӧлі сувтӧдлыны, дыш бурджыка вежӧртны. Лӧсьыд тай-а, мый ещӧ колӧ.

— Берегъястӧ позьӧ зумыдмӧдны, мед оз кырӧд, — шуис Гена. — А поршеньтӧ кыдзи зумыдмӧдан.

— Сідз жӧ! — Ким друг звиркнитіс-пуксис. — Мыйла нӧ коленвалъяс реставрируйтам, а поршеньяс — ог?

— Но, ӧткодяліс... — шуис Гена, а аслас тшӧтш жӧ песовтчыштіс сьӧлӧмыс радлана надеяысь. — Кысь нӧ тэ кывлін татшӧмторсӧ?

— Шуан, некор на эз вӧчлыны?! — Ким пыр ӧзйис и ӧзйис друг югнитӧм мӧвпысь. — Став пӧрысьмӧм поршеньяссӧ век на шыблавлісны лом вылӧ? Но ӧд коркӧ и валъястӧ шыблавлісны! А мый, видлыны кӧ?

— Дирекцияыд ӧдвакӧ та вылӧ мунас. Вӧчан тадзитӧ да, пырысь-пыр жӧ пасьмунӧ дизельыд. Сэки мый лоӧ? Тайӧ абу шутка. Кысянькӧ Сибирсянь рекламация воас: мый пӧ ті сэні мудританныд. Тискиӧ топӧдасны сэки тэа-меаӧс.

— А миянлы колӧ видлыны, эскӧдны расчётъясӧн, мый оз пасьмун.

— Дела, Кимка! Тэ меным бур шплинт сатшкин морӧсӧ. Збыль ӧмӧй позяс поршеньыслысь нэмсӧ нюжӧдны? Хы... Сэки эськӧ... Сэки эськӧ ой-ой-ой мыйта позис вӧчны! Планыд тырис и экономия лои. Позяс ӧмӧй нӧ, а?

Та бӧрын кык друг дыр вийсисны расчётъясӧн. Но сопромат тӧдтӧгыд налы вӧлі сьӧкыд ставсӧ артавны. Гена шыасис отсӧгла мастер Кузовкин дінӧ. Том инженер первойсӧ зэв эскытӧмпырысь донъяліс мӧвпсӧ, а сэсся, мыйкӧ мында уджалыштӧм бӧрын, казяліс: буртор пӧ ті думыштӧмныд!

Ӧтвылысьнад выльторсӧ регыдӧн подулалісны колана расчётъясӧн, выльмӧдісны некымын поршень, гӧгӧрбок бура испытайтісны найӧс. И заводса администрация шуис: выльторсӧ паськыда пыртны производствоӧ. Куим авторлы сетны благодарносьт да премия.

Выльмӧдӧм поршеньясысь чукӧртӧм дизельяс мунісны нин заводысь, но найӧс ставнысӧ босьтісны торъя учёт вылӧ. А Геналы да Кимлы татшӧм двигательясыс вӧліны ас кага кодь донаӧсь, и кык друг збыльысь тӧждысисны-вийсисны налӧн «дзоньвидзалун» вӧсна, кыдзи тӧждысьӧ аслас челядь вӧсна радейтысь бать.

Но «кагаясыс», тыдалӧ, чужисны ёнӧсь, зумыдӧсь, найӧ уджалісны, ӧнӧдз некод на эз норасьлы на вылӧ. Тайӧ «кагаясыс» не сӧмын ӧддзӧдісны цехлысь уджсӧ, экономитісны металл да сьӧм, но и кыпӧдісны, вӧчисны тӧдсаджыкӧн найӧс чужтысьяслысь нимъяссӧ.

А нӧшта — Ким та йылысь вермас кӧть кодлы шуны! — водзӧ на зумыдмӧдісны налысь дружбасӧ.

«Верми-ӧ эськӧ ме, чукӧстас кӧ Генка, ньӧти юасьтӧг уськӧдчыны биӧ кӧть ваӧ? — пӧся юасьӧ ассьыс Ким, и пырысь-пыр жӧ вочавидзӧ: — Верми!»


Дас сизимӧд глава


— Коньӧрушкоӧй тэ менам, ёна доймӧ?

Марина, каньпи кодь ичӧтик, сэтшӧм жӧ небыдик да мелі ныв, тӧждысьӧмӧн малалӧ диван вылӧ нёровтчӧм Валерьянлысь век на кардъялӧм морӧссӧ.

— Доймӧ. Кымын лун нин коли, а век мыйкӧ ёнтӧ морӧс пытшкын.

Валерьян гӧлӧсын кылыштӧ норлун, и сёрниыс зэв мелі. Татшӧм мелінас сійӧ шоча овлӧ, та вӧсна Марина торйӧн нин ёна жалитӧ:

— Мыйся нӧ йӧз ті, зонъяс, этатчӧдз певкъянныд ӧта-мӧднытӧ!

Найӧ кыкӧнӧсь Зина квартираын. Ачыс кӧзяйкаыс удж вылын, нывкаыс яслиын. Марина уджалӧ Зинакӧд ӧти парикмахерскӧйын, но мӧд сменаӧ. Сійӧ олӧ Зина ордын на: найӧ ӧти сиктын чужлӧмаӧсь, и кор томиник нывка воис карӧ велӧдчыны пырны, Зина овмӧдіс сійӧс ас ордас.

Паныда стенсянь, неыджыд рамкасянь, на вылӧ, гажаа нюмъялігтыр, видзӧдӧ джуджыд картуза да морӧсас уна значокъяса сержант.

«Нюмъяв, нюмъяв! — ас кежсьыс курыда сёрнитӧ сыкӧд Валерьян. — Гортад воан да дугдан нюмъявнытӧ. Кор тӧдмалан, кыдзи тані виччысис тэнӧ Зиночкаыд».

Но мый нӧ сійӧ, Валерьян, йӧз вӧснаыс шогсьӧ? Мед колӧкӧ йӧйталӧны, коді кыдзи кужӧ. Сылы веськодь. Сылы аслыс колӧ мынтӧдчыны нальксьыс. Батьыслӧн мыйкӧ артмис ли эз ли, немтор тай оз висьтав та йылысь-а. Гашкӧ, Сашук мамкӧд, ӧтвылысьнад, кыдзкӧ тупъясны жӧ вомнысӧ эсійӧяслысь. А оз кӧ вермыны? Автошколаас тай, буракӧ, нинӧм на оз кывсьы-а....

Гашкӧ, письмӧ гижны, быттьӧ кодкӧ нимсянь: видлӧй пӧ толькӧ вӧрзьӧдны Валерьянӧс! Сэки пӧ юръясныд Сыктыв йи улын лоӧны! Гашкӧ, тшӧктыны, мед Марӧ гижӧ, сылысь почерксӧ некод оз тӧд. А позьӧ на и машинкаӧн печатайтны. И унджык татшӧм письмӧсӧ гижны, разнӧй киӧн. Мед чайтӧны, мый став карыс кӧсйӧ босьтны водзӧс! Мед, стервояс, ывла вылӧ оз кутны лысьтны петны...

А татшӧм запискаясыс кӧ водзӧ на дзугасны делӧсӧ? Позяс-ӧ бӧртинас соссьыны наысь? — бӧр ыркалӧ Валерьян.

А, гашкӧ, видлыны кыдзкӧ Марӧ пыр? Зэв бура тай велаліс нин нювсьынысӧ...

Валерьянлӧн киыс меліа пуксьӧ нывлӧн кос ньыв пу лыс рӧма юр вылӧ, чуньясыс пондӧны меліа лебезитны небыд юрсисӧ. Таысь нывлӧн сьӧлӧмыс заводитӧ сывны шоныдінӧ веськалӧм йитор моз.

— Ме тэнӧ век ёнджыка и ёнджыка любита, — синъяссӧ куньӧмӧн шудаа шӧпкӧ Маринка. — Тэ ӧд, Валька, менам первой любов. А первойтӧ пӧ век медъёна любитлӧны.

— Либӧ тэ он кӧсйы, мед менӧ судитісны?

— Мый тэ, Валька. Бара кутіс нинӧм абунас повзьӧдлыны!..

— Либӧ вай тшӧтш отсышт меным.

— Да кыдзи нӧ ме верма?

И Валерьян висьталіс муртса на чужӧм план. Та дырйи и чужӧмсӧ, и гӧлӧссӧ зілис вӧчны сэтшӧмӧн, мед эськӧ Марина чайтіс, мый ӧні сы киын и Валерьян, и дзоньнас налӧн радейтчӧмныс:

— Тэ, гашкӧ, кыв-мӧд шуан налы. Найӧ тэнӧ оз тӧдны. Кывлі пӧ сёрнияс Валерьянлӧн другъяссянь. Зэв пӧ унаӧнӧсь найӧ. Он кӧ пӧ бурӧн эновтчӧй Валерьян дінсьыс, вермасны кыйӧдны пемыд пельӧсын.

— Ой, Валька, дугды тадзитӧ думайтны! Татшӧмтор ӧд он жӧ вӧч!

Марина чепӧсйыштіс друг дорсьыс, сьӧдӧн йиджтӧм доръяса руд синъясыс повзьӧмаӧсь и шӧйӧвошӧмаӧсь.

— Да ме ог и вӧч! — Валерьян кӧсйис шуны «дура». — Ӧлӧдны толькӧ колӧ! Гӧгӧрвоан? Мед миянлы лёктор эз вӧчны! Мед шито-крыто вӧлі ставыс.

— Валька, а ме, гашкӧ, мӧд ног сёрнита накӧд? Кӧсъян, кевмысьны кута! Мися, Валькаыс менам сэтшӧма страдайтӧ! Сэтшӧма страдайтӧ! Прӧститӧй, мися, ӧтчыдтӧ!.. Абу ӧд из сьӧлӧмъяс, прӧститасны!

— Тадзинад найӧ ёнджыка на вельмасны, — зумыша нурбыльтіс Валерьян.

— Оз, Валька! Ме налы сідзи висьтала! Сідзи висьтала! Кӧть из сьӧлӧмъяс сывда!

— Либӧ тэ менӧ ньӧти он любит, Марийка. А ме тэ вӧсна сэтшӧм нылӧс эновті.

— Эн сёрнит нинӧм абусӧ, Валька! Кыдзи нӧ ме тэнӧ ог любит?! Ме ӧд тэ вӧсна и карас кольччи! Сідзи эг и кай бӧр гортӧ... Кыдзи нӧ либӧ ещӧ ёнджыкасӧ колӧ любитны?

— Любитін кӧ, эськӧ кывзысин менсьым.

— Но муна либӧ, муна! Висьтала. Тэ вӧсна ме кӧть кытчӧ муна. Весиг кытчӧ оз ков. — Мариналӧн кутіс доршасьны синваыс.


Коньӧр ныв пӧшти лунтыр кыйӧдчис Ким бӧрся, кодӧс дышӧдіс куйлынысӧ гортас да петіс удж вылӧ, кӧть эськӧ юрас ыджыд лӧньӧмъяс эз на вӧвны. Маринка кӧсйыліс матыстчыны зон дінӧ и заводсьыс петігӧн, и рытнас, школаас мунігӧн. Но некыдз оз вӧлі смелмӧдчы, сы вӧсна мый заводсаыс некор эз вӧвлы ӧтнасӧн, а век кутшӧмкӧ да кутшӧмкӧ зонъяскӧд.

Кыдзи тайӧяслы висьталан сэтшӧм кывъястӧ?

А он кӧ висьтав, Валерьян дзикӧдз скӧрмас. Эновтны вермас.

Мыйсӧ сӧмын эз думайт кыйӧдчигас Марина. Дзикӧдз шогӧдліс. Карса став олӧмыс тӧд вылас усьліс. Гортсьыс зэв гажтӧм лолі и.

Воис Марина карӧ ылі сиктысь кольӧм гожӧмын, медицинскӧй училищеӧ кӧсйис пырны. Но экзаменсӧ эз вермы сдайтны. Кӧсйыліс нин бӧр гортас мунны, но сэки Зина кутіс каймӧдлыны. Дугды, шуӧ, йӧй, куйӧд пытшкын лукйысьны он жӧ бӧр мун. Мынін кӧ бурӧн сэтысь, пасибӧ нин висьтав. Медичка уджтӧ пӧ ог ошкы ни. Ӧд мый висьталіс! Шуам, ковмас кӧ пӧ уколавны кутшӧмкӧ сё арӧса старикӧс, кодлӧн став лыыс нин гуля-голякылӧ? Куш пӧ ӧти думыштӧмсьыс восӧдӧ. Тайӧ нӧ пӧ удж? Гашкӧ пӧ, и ничево, уколавны кӧ шыльыд бекъяса мичаник зонъясӧс, а киссьӧм розвальястӧ — Енмыс мед видзас. Лок пӧ мунам миян парикмахерскӧйӧ! Недыр ученицаӧн уджалыштан, а сэсся и ачыд лоан мастерӧн. Сэтшӧм мича юръяс кутан шырны! Верман аслыд бӧрйыны медмича юрасӧ...

— А мый, парикмахерыдлӧн медколана уджыс! — дзикӧдз варовмис сэки Зина. — Сійӧ кӧ эз вӧв, эськӧ йӧзыс важӧн нин бӧр ӧбезьянаясӧ пӧрисны! Эн ӧмӧй лыддьыв газетысь, кыдзи Москваысь ӧти ныв ветлӧма Парижӧдз, сэтчӧс президентыслысь гӧтырсӧ шырны. А мӧдыс кутшӧм сӧмын пӧдарки абу сетӧма сылы.

Кыдзи кутан водзсасьны татшӧм сёрнилы? Да ещӧ кор тэнӧ, сиктса нывкаӧс, гӧгӧрвотӧма шензьӧдӧ кар, сылӧн ортсысяньыс сэтшӧм мича олӧмыс? Сьӧкыд водзсасьнытӧ...

Ӧні Марина ачыс нин велаліс шырны. Ӧні сылы кутісны нин сетавны не сӧмын рака поз кодь юръяса челядьӧс, но тшӧтш и сэтшӧмъясӧс, кодъяс шыригкостіыд ворсӧдчӧны синъяснас.

Зинакӧд ӧтлаын олігӧн унаторсӧ велаліс Марина. Краситчыны-баситчыны. Кузь кӧсасӧ риснитіс-орӧдіс и еджгов, сӧдз шабді юрсисӧ краситіс. Сур-вина юыштны да зонмасьны велаліс и. Сэтшӧм кавалер на ещӧ сюрис! Ачыс герой кодь, и бать-мамыс зэв бура олӧны. Эз эськӧ вӧв лёк рӧдняасьны накӧд.

А тешкодя жӧ найӧ тӧдмасисны! Зинакӧд киоскысь вӧлі ньӧбӧны пиво, кык целофанӧвӧй мешӧкӧ кисьтісны. И кыськӧ кӧвъясисны зонъяс, кыкӧн жӧ:

— Миян юръяс аминь ёна висьӧны! Оз-ӧ позь тіянкӧд тшӧтш мунны, ангелъяс?

А Зина, ёма моз:

— Мый нӧ оз позьыс, мунам!

Сысянь и заводитчис. Зиналы веськаліс Марсик, а сылы, Мариналы, — Валерьян. Марсикыс регыд мысти и эновтчис Зинаысь, сійӧс вежліс нин Сашук, а Валерьян со век на дружитӧ сыкӧд.

И сэтшӧм муса Валюнчикыс! Кӧть эськӧ и грубӧйджык. Буракӧ, батьыс рӧдӧ мунӧма, сійӧ тай оз жӧ ёнатӧ сёрнит. Мамыс, Павла Васильевна, зэв мелі нывбаба, кымынысь нин гӧститӧдліс сійӧс.

Но кыдзи висьтавны Валерьяныслысь тшӧктӧмторсӧ заводсаыслы? И мыйла вӧлі колӧ уськӧдчыны этатшӧм багатыръяс вылас?.. Повзьӧдлӧмыд ӧдвакӧ мӧрччас татшӧмъясыдлы! А мый нӧ либӧ висьтавны?

Мӧд луннас, смена бӧрын, заводсаыс петіс проходнӧйӧд медбӧръяяс лыдын. И ӧтнасӧн. Дзугйӧ шедӧм уркай моз тривкнитчис Мариналӧн сьӧлӧмыс. Ныв лои тэрмасьтӧг восьлалысь заводса водзын и друг вильдіс да уси. Мӧдыс тӧждысьӧмӧн отсаліс кыпӧдчыны.

— Аттьӧ!.. — сьӧлӧмсяньыс шуаліс ичӧтик, гӧгрӧсіник ныв, юрсисӧ виж шапка улас сюяліг. — Сэтшӧм вильыд лоӧма... — А ачыс думыштіс: «Киясыс аминь ёнӧсь талӧн!»

— Эн-ӧ кӧть доймӧй? — сьӧлӧм сетіс Ким.

— Эг ёнасӧ. Пидзӧсӧй тай неуна. Нинӧм!

— Ме тіянӧс колльӧдышта, — вӧзйысис зон.

— Но инӧ, автобус дінӧдз, — ышнясьтӧг шуис ныв. И содтіс: — Менӧ Маринаӧн шуӧны.

— А менӧ Кимӧн.

— А ті, буракӧ, тайӧ заводас уджаланныд?

— Тані.

— Чӧвлӧй, чӧвлӧй! А ме ӧд кывлі тайӧ заводса Ким йылысь! Воча воксянь...

— Да? Код нӧ эськӧ тіян воча вокныд?

— Валерьян... Кызродев. Тӧданныд? — Бур сьӧлӧма Марина эз и казявлы, кыдзи шусис Валерьянлысь нимсӧ, дай весиг овсӧ, кӧть эськӧ и сійӧ ёна ӧлӧдіс таысь.

— Тӧдышта ме сійӧс. — Ким эскытӧма видзӧдліс вылісянь моднӧй ныв вылӧ. — Мыйджык нӧ эськӧ сёрнитӧ ме йылысь воча вокныд?

— Ой! Тӧдінныд кӧ эськӧ ті, кутшӧма висьӧ сійӧ! Сэтшӧма висьӧ! Шогсьӧмысла дзикӧдз нин косьмыны кутіс! Куш нырыс нин и коли чужӧм вылас. Сійӧ нӧ тышкасис али мый тіянкӧд? Этатшӧм шань да благороднӧй мортыскӧд?

— Вӧлі сэтшӧм делӧыс.

— Дерт, кӧнкӧ, гажа юрӧн! Кӧть эськӧ и винасӧ зэв шоча видлывлӧ. Сідзсӧ сійӧ зэв бур морт! Каньӧс оз ӧбидит. Ме сійӧс зэв ёна любита! Кхы... Мукӧд чойяс тшӧтш и...

Ким казяліс, кыдзи томиник нывлӧн ыпнитыштліс небыдик чужӧмыс, и помӧдз нин гӧгӧрвоис, кутшӧм тайӧ «воча чой».

— Сідзкӧ, тэнӧ «воча вокыд» ме дінӧ ыстіс? — юаліс Ким.

— Мый ті?! — повзис Марина. — Ме пӧдруга ордӧ ветлі! Ӧтлаын сыкӧд медучилищеӧ заводитлім пырны. Сійӧ сдайтіс экзаменсӧ, а ме эг вермы. Ӧні ме парикмахерскӧйын уджала. Волы, шыра юртӧ! Ӧні ме велалі нин...

— Аттьӧ, Марина, локта...

Кимлы друг жаль лои тайӧ ичӧтик нылыс, коді абу на велалӧма мудеритны да, кыдзи кужӧ, сідзи и зільӧ отсавны кажитчана мортыслы.

— Лок, лок!.. — дзикӧдз долыдмис Марина. — Тэнад юрсиыд, буракӧ, зэв сук. Сэтшӧм «канадка» вӧчам, а колӧкӧ, и укладка... А Валерьяныс сэтшӧма вийсьӧ!.. Ёна ӧмӧй ыджыд лёктор сійӧ вӧчис?

— Кыдз эськӧ тэд шуны... — Ким падмис.

— Эскӧй меным: сійӧ абу лёк морт! Гашкӧ, ӧтчыдтӧ позяс и прӧститны?.. Сэтшӧм на томиник ӧд сійӧ — дас сизим арӧса, йӧй руыс на сійӧс вӧдитӧ.

— Ме, Марина, абу жӧ вывті лёк морт. Ме кута корны, мед оз ёна мыждыны найӧс.

Автобусӧ пуксьысь Мариналӧн гӧгрӧсіник чужӧмыс вӧлі помтӧм шуда да югзис шондіа лунӧ воссьӧм дзоридз моз.

Гортас восьлалысь Кимӧс шызьӧдіс жӧ тайӧ паныдасьлӧмыс:

«Вот сэсся и гӧгӧрво олӧмтӧ. Ӧтилаын морт вӧчӧ мисьтӧмысь-мисьтӧмтор. А мӧдлаын сійӧс жӧ пӧся радейтӧны, со кутшӧма вийсьӧны сы понда. Ачыс, кӧнкӧ, радейтӧ и окасьӧ, шуалӧ мелі кывъяс. Тешкодь. Кыдзи нӧ эськӧ ӧти морт пытшкас ӧтпырйӧ вермӧны овны радейтӧмыс и лёкалӧмыс? Би да ва тай нӧ оз вермыны тадзисӧ?..»


Дас кӧкъямысӧд глава


Зумыд колоннаясӧн пыклӧм, сьӧкыда зымвидзысь керкаӧ пыригӧн Светалӧн ёнакодь нӧйтчис сьӧлӧмыс. Сійӧ некор на эз вӧвлы милицияын и ӧні поліс, мый вермас лоны мыйкӧ не сідз... Сэсся ӧд сійӧ пырӧ оз кутшӧмкӧ кесйылӧс дінӧ, а — полковник дорӧ!.. Гашкӧ, быд татшӧмторнас дзик нинӧмла дӧзмӧдны та ыджда чина мортсӧ?..

Тайӧ думъяссьыс ныв джӧмдыліс на милиция керкалӧн джуджыд кильчӧ вылын. Гашкӧ, бӧр бергӧдчыны? Сэсся звӧнитлыны телефон пыр да висьтавны, мый редактор виччысьтӧг ыстіс мӧдлаӧ?..

Но тадзинад ӧмӧй мыйкӧ кысьылас сылӧн? Панӧмаыс?..

Кык пӧвста ӧдзӧс пыр, туннельӧд моз, Света воськовтіс приёмнӧйсянь ыджыд, кузьмӧс кабинетӧ, коді вӧлі ойдӧма джуджыд ӧшиньясӧд пырысь ывла югыдӧн. Журналисткалӧн сюсьмӧм нин синмыс ӧдйӧ казяліс и дубӧвӧй вижоват пызанъяс, и сэтшӧм жӧ рӧма шкап, и джуджыд мышка небыд улӧсъяс, и пельӧсын сулалысь сейф, и паныда стенысь Ленинлысь краскаясӧн рисуйтӧм портрет. Кабинетас нинӧм лишнӧйыс эз вӧв, сійӧ кажитчис кыдзкӧ вывтіджык стрӧгӧн.

Полковник пукаліс вомӧна пызан сайын да гожся гым кодь ён гӧлӧсӧн сёрнитіс телефон пыр. Прӧст кинас сійӧ индіс Светалы пуксьыны медматысса улӧс вылӧ, а ачыс водзӧ шуаліс трубкаӧ:

— Колӧ, мед милицияса татшӧм геройяссӧ быдӧн тӧдісны! Гырысьяс и челядь. Мед йӧзыс гӧрдитчисны наӧн... Ӧд мортыс дась ловсӧ пуктыны йӧзлӧн спокойнӧя уджалӧм да олӧм вӧсна.... — Сэсся чорыда камгис-пуктіс трубкасӧ да висьталіс Светалы лӧньтӧм на думсӧ: — Терпитны ог вермы, кор мукӧдъяс видзӧдӧны милиция вылӧ полӧкалӧяс вылӧ моз... Либӧ важ кадся жандармъяс вылӧ моз... А ӧд миян йӧзным, позьӧ шуны, век бойынӧсь, йӧзлӧн шуд вӧсна бойынӧсь... Чайтанныд, ёна кокни ӧлӧдны пурта да пищаля бандитъяссӧ?..

Полковник вӧлі ар ветымына зумыд тэчаса морт; ён сьылі вылас крепыда пукаліс ыджыд юр, чужӧмыс ыджыд жӧ — джуджыд кымӧса, паськыд ныра да ён тшӧка лыа, абу мича чужӧма, но век жӧ кажитчӧ лӧсьыдӧн, сы вӧсна мый кыдзкӧ быттьӧ тӧдчӧдӧ мужичӧйлысь вынсӧ.

— Ме кывза тіянӧс, Светлана Николаевна, — нывлӧн удостоверение вылӧ тэрмасьтӧг видзӧдлӧм бӧрын шуис полковник. Сійӧ бурысь чӧвтіс руд, неуна лӧзоват синъяссӧ журналистка вылӧ.

Сы бӧрын, кор тайӧ Туробоваыс звӧнитліс да корис примитны, полковник эз-эз да бара на думыштлывліс, кутшӧм мог сійӧс вермис суны. «Буракӧ, абу сэтшӧм-татшӧм делӧ, ме дінӧдз кӧ нин вӧзйысьӧ. Ачыс али мый мыжмис мыйыськӧ?» Но мыйӧн сӧмын казяліс Светалысь шызьӧмысла гӧрдӧдыштӧм сӧстӧм чужӧмсӧ, кӧть и майышмунӧм, но ясыда видзӧдысь сьӧд синъяссӧ, полковник пырысь-пыр жӧ бӧр веськӧдіс асьсӧ: «Мыжа мортыдлӧн чужӧмыс оз овлы татшӧмӧн». И сыысь, мый буретш тадзи вежӧртіс воысь ныв йылысь, полковниклы долыдджык лои; ӧд сійӧ, кӧть и милицияын уджалысь, мукӧд моз жӧ — морт, сылӧн сьӧлӧм жӧ, и кымын этшаджыкысь ковмылӧ туясьны да луасьны йӧзлӧн йӧйталӧмын, сымын кокньыдджык да лӧсьыдджык сьӧлӧмыслы.

Света тэрмасьӧмӧн пондіс висьтавны аслас мог йылысь. Мыйӧн сӧмын шуис том йӧзлӧн ас вылас уськӧдчылӧм йылысь, полковниклӧн чужӧмыс зумышмис. Света казяліс тайӧс да думсьыс бара пондыліс каитчыны татчӧ воӧмсьыс... Но век жӧ помӧдз висьталіс аслас да заводсаяслӧн план йылысь. Кӧсъям пӧ уна йӧз водзӧ сувтӧдлыны мыжмӧмъяссӧ. Мед сэні и удж вывсяньыс кодъяскӧ вӧліны, и найӧс тӧдысь том йӧз... Но и, дерт, бать-мамыс тшӧтш... Мед пӧ висьтасьӧны, кыдзи воӧдчисны татшӧмторйӧдзыс... И гижны кӧсйӧм йывсьыс тшӧтш висьталіс.

Полковниклӧн чужӧмысь зумышыс вочасӧн бӧр разаліс, лэчыд синъясыс кутісны югъявны.

— Интереснӧ, интереснӧ, Светлана Николаевна! — друг пӧся шуис полковник да весиг сувтіс пызан саяс. — Веськыда кӧ шуны, ті менӧ чуймӧдыштінныд. Да, да... Бур ногӧн чуймӧдінныд.

— Бур ногӧн? А ме, веськыда жӧ кӧ шуны, ёнакодь полі тіянӧ пыригӧн. — Полковник сьӧлӧмсяньыс гораа серӧктіс.

— Но вот, — шуис сэсся шыльыд пызанӧ кыз чуньяснас таркӧдігтыр, — весиг журналистъяс чайтӧны, мый ми тані пукалам зверъяс кодьӧсь — дасьӧсь тшапнитны быдӧнӧс... — чӧв усьліс, донъялана синъясӧн видзӧдліс ныв вылӧ. — Ті, Светлана Николаевна, гашкӧ, и асьныд на помӧдз онӧ казялӧй, кутшӧм делӧ панінныд. Быттьӧ миян ногджык кӧ сёрнитны... И зэв бур, мый татшӧмторъясыс тшӧтш вӧрзьӧдӧны тіянӧс. Зэв бур!.. Сӧмын ӧд, ме чайта, ноксьӧм-пессьӧмыс уна лоӧ? — юалӧмӧн моз шуис полковник.

— Сэтшӧм окота бурджыка гӧгӧрвоны ставсӧ тайӧс, — ышловзис Света. — И вӧчны мыйкӧ! Со тай и тіян дінӧдз вои та понда.

— И бур, мый воинныд, Светлана Николаевна, — аслас нывлы моз меліа шуис полковник. — Ми отсалам, мыйта ковмас... Сӧмын окота на юавны тіянлысь, Светлана Николаевна: ті ёна эсканныд, мый буретш тіян ног колӧ вӧчны зонъясыскӧд? Оз ков чорыдджыка? Ӧд бандитъястӧ медбура позьӧ ӧлӧдны сӧмын чорыда накажитӧмӧн. Помнита, миян сиктын на шулывлісны, мый бордтӧм петук пӧ ӧвсяс тышкасьӧмысь сӧмын сэк, кор сылысь песовтан сьылідзирсӧ, кор асьсӧ бурпӧт пӧвсалан.

— Ме чайта, тайӧяс абуджык на сэтшӧмӧсь, — шуис Света. — Ме, дерт, помӧдзсӧ ог тӧд, но век жӧ...

— Век жӧ эсканныд, мый налӧн сьӧлӧмъясысь эз на няйтӧссьы став бурыс? И бур, мый эсканныд, Светлана Николаевна! Меным окота жӧ эскыны... Ті энӧ чайтӧй, мый ми, тані уджалысьяс, кужам сӧмын мыждыны йӧзӧс. — Полковникӧс вӧрзьӧдіс тайӧ нылыс, коді со босьтчӧма быттьӧкӧ и сылы лӧсявтӧмтор дінӧ, и окота лои висьтавны сьӧлӧмсьыс вӧзйысянасӧ. — Дерт, милициялӧн шӧр могъясысь ӧти — не кольны эрдӧдтӧг ни ӧти мыж, ни ӧти преступление. Но тайӧс вӧчны колӧ оз кын сьӧлӧмӧн, а мортӧс пыдіа гӧгӧрвоысь сьӧлӧмӧн. Мортӧс мыждігӧн миянлы ёнджыка колӧ думайтны сы йылысь, кыдзи бӧр бергӧдны сійӧс обществоӧ, семьяас, бӧр на вӧчны сійӧс йӧзлы коланаӧн, а асьсӧ шудаӧн... Ме ог и куж висьтавны, кутшӧма ті бурмӧдінныд менсьым, пӧрысь милиционерлысь, сьӧлӧмӧс асланыд волӧмӧн, Светлана Николаевна! Унджыкӧн кӧ эськӧ тадзи кежалісны миянӧ — журналистъяс, писательяс, учительяс, воспитательяс да бать-мам. Унджык кӧ эськӧ гижисны миян йӧзлӧн удж йылысь, сӧветуйтчисны миянкӧд. Мыйта эськӧ позис вӧчны ӧтвылысьтӧ, мыйта преступлениеысь ӧлӧдны, мыйта мортӧс не лэдзны лёк туй вылӧ! — Полковникӧс тшӧтш шызьӧдіс аслас сёрниыс. Коставлӧм бӧрын сійӧ шуис: — А ми отсалам тіянлы, Светлана Николаевна. Быд ногыс!.. Тіянлы отсӧг вылӧ ме инда медся бур уджалысьясысь ӧтиӧс.

— Колӧ-ӧ тадзсӧ, полковник ёрт? — чуймыштіс ныв. — Оз-ӧ вывті ло тайӧ?

— Колӧ, Светлана Николаевна, быть колӧ! Мыжыс ӧд вӧчӧма! Зэв лёктор вӧчӧма... И миянлы колӧ бурджыка тӧдны мыжаяссӧ... А друг да найӧ абу сэтшӧмӧсь, кутшӧмӧн ті чайтад?.. Друг да найӧ бара на мыйкӧ вӧчасны? Эн полӧй, миян ёртыс — сюсь морт, тіян «другъясыд» оз казявны сійӧс. А ачыс сійӧ зэв регыдӧн ставсӧ тӧдмалас, Светлана Николаевна... Дерт, тіянкӧд ӧтвылысь...

А Света эз и куж, мый вочасӧ шуны: эз виччысь, мый тадзи ставыс бергӧдчас. Сэсся сійӧ ёна шӧйӧвошӧмӧн мӧвпыштіс: «Гашкӧ, либӧ кӧть нин висьтавны ӧні жӧ, мый ӧти мыжмӧм зон, — милицияса уджалысьлӧн пи! Всё равно ӧд тӧдмаласны бӧртинас?..»

Но Света эз на висьтав та йылысь, сылӧн эз лэпты сьӧлӧмыс дзугыльмӧдны ӧні полковникӧс, коді сэтшӧм бура гӧгӧрвоис сійӧс.

Кор нин ныв кутіс лӧсьӧдчыны мунны, полковник, ныр вывсьыс босьтӧм ӧчкинас ворсӧдчигтыр, друг юаліс:

— Светлана Николаевна, а эсійӧ, заводсаыс, буракӧ, смел морт? Пемыд войӧ уськӧдчӧма мездысьны. Ён морт, буракӧ?

— Да... Боксёрӧн вӧвлӧма, шусьӧ...

— Том на ачыс?

— Армия бӧрын во-мӧд-коймӧд.

— Гм... Гашкӧ и, велӧдчӧм морт?

— Дасӧд класс таво помалӧ рытъя школаын. Вежӧра сідзсӧ, ёна, буракӧ, лыддьысьӧ и...

— Светлана Николаевна, а сійӧ эськӧ оз лок миянӧ уджавны? — юаліс полковник да тайӧн бара на чуймӧдіс.

— Ог тӧд, — серӧктіс Света.

— Ме ӧд ог шутит, Светлана Николаевна, — шуис полковник... — Миянлы ёна колӧны ыджыд сьӧлӧма, повтӧм йӧзыд. Думайтысь йӧзыд... Ме тай шуи нин, мый милицияыдлы колӧ лоны не сэтшӧма карайтысь, кутшӧма йӧзӧс воспитывайтысь органӧн. Миян главнӧй могыс — вӧчны ставсӧ, медым бырӧдны преступлениеяслысь подувсӧ... Та вылӧ миян органъясын эмӧсь вывті шань да тӧлка йӧз, зарни йӧз. Пыранінысь, кӧнкӧ, ті аддзылінныд стенд? — Света гогнитіс юрнас. — Но вот, тайӧ — миян геройяс. Ӧткымынӧн на пиысь пуктісны ловнысӧ ӧпаснӧй преступникъяскӧд тышкасигӧн. — Полковник чӧв усьліс, лэчыд синъясыс сылӧн неуна жугыльмылісны. — Но татшӧмъясыскӧд тшӧтш миян эмӧсь на и уна хамъяс, из сьӧлӧма, бескультурнӧй йӧз, кодъяс выналӧны сӧмын налы сетӧм власьтӧн да чорыдлунӧн. И бур эськӧ вӧлі ӧдйӧджык мынтӧдчыны наысь...

— Ме гӧгӧрвоа тіянӧс, но заводсаыд ӧдвакӧ локтас, — шуис Света. — Ме чайта, сылӧн жальлуныс вывтіджык уна. Преступникъяссӧ, йӧршиталӧм пыдди, ставнысӧ кутас бӧр лэдзавны.

— А ми эськӧ, кор колӧ, велӧдім и чорыдджыкӧн лоны, — шуис полковник.

Ныв серӧктіс. Сэсся эз и тӧдлы, кыдзи петкӧдісны кокъясыс ыджыд, пыранінын гозйӧн-гозйӧн сулалысь колоннаяса, ортсысяньыс зэв стрӧг гӧрдоват керкаысь. Нимкодьысла сылы весиг мичаӧн кажитчисны сьӧдасьӧм лымъя паркын гӧликъяс моз сулалысь топольяс да кыдзьяс, кодъяс вылын сьӧдӧдісны лыдтӧм-тшӧттӧм рака позъяс.


Дас ӧкмысӧд глава


Светалӧн лолыс тайӧ лун-войнас, позьӧ шуны, вӧлі тувсов льӧм пу гар кодьӧн: сэні мыйкӧ шузис-ловзис да, гарпытшса кор моз жӧ, мырдысьӧн вӧзйысис ортсыӧ; нывлы вӧлі зэв окота висьтавны, мыйысь сэтшӧма вӧрзис сьӧлӧмыс, висьтавны пӧся да лӧсьыдджыка.

Татшӧмторсӧ сійӧ эз на казявлы ассьыс. Мед эськӧ гижӧмӧн висьтавны кӧсйӧмыс лои висьӧм кодьӧн, мыйысь некыдз он вермы мынтӧдчыны; мед эськӧ тайӧ кӧсйӧмыс сэтшӧма пӧсьӧдіс вирсӧ, босьтіс став думъяссӧ и весиг войнас вӧтавсис.

Дерт, сійӧ и водзті нин гижліс не этша, уна гижӧд лэдзлывліс жӧ сьӧлӧм пырыс. Но мед тадзи пессьыны, тадзи радлыны и шогавны мӧвпалантор вӧснаыс — эз, татшӧмыс эз на вӧвлы.

Ӧні сійӧ ылӧсас аддзӧ нин, мый кӧсйӧ висьтавны да петкӧдлыны. Но такӧд тшӧтш казялӧ, мыйта колӧ вӧчнысӧ. Мыйта колӧ вӧчнысӧ! Кӧсйӧ кӧ быттьӧ сюрӧсавны эскӧдана, правдивӧй гижӧд да кодлыкӧ кӧть кутшӧмакӧ отсавны сійӧн.

Но ӧд кокни сӧмын шунытӧ — колӧ гӧгӧрвоны быд мортӧс. А видлы вот вӧчны тайӧс збыль вылассӧ, кор ачыд асьтӧ помӧдз он вермы гӧгӧрвоны! Ӧд быд морт — помтӧм-дортӧм торъя мир.

Кор Света тӧдмаліс, мый тарыт заводсаяс петӧны карӧ дружинникавны, тшӧтш вӧзйысис накӧд. Журналисткалы окота ёнджыка бергавны на гӧгӧр, кывзыны налысь сёрнияссӧ, мӧвпъяссӧ. А сэсся сылы окота тшӧтш тӧдмавны, кыдзи да мыйӧн олӧ рытъя карыс.

Чукӧртчисны паркын. Ким, Гена, нӧшта кыкӧн бригадасьыныс — еджыд юрсиа Лёша да зэв мугов чужӧма, Кимысь на ыджыдджык тушаа Анатолий. Но и Света тшӧтш. Налы колӧ вӧлі мунны кӧрт туй вокзаллань, ветлӧдлыны сыладорса уличаясӧд.

Лунся шондіысь небзьылӧм ывла выв тӧдчымӧн торскыштіс-кынмис, кок улын вильыдджык лои, йинёньяс дугдісны гылавны. А туй вылын артмылӧм посньыдик шоръяссӧ, ыжъясӧс моз, кодкӧ быттьӧ йӧрталіс вой кежлӧ.

Вочасӧн лӧнис и кар. Уличаяс вылын шочджыка кутісны журъявны машинаяс, ёна чиніс ӧтарӧ-мӧдарӧ визласьысь йӧз. Найӧ, мазіяс моз, пырисны кирпич да бетон короминаясӧ — быдӧн асланыс позйӧ. И, дерт, быд позйын заводитчыліс аслыснога жӧдзӧм-дзизгӧм: быдӧн ас ногыс каттис рытсӧ, ас ногыс веськӧдіс лунъя мудзсӧ, сы вӧсна мый сэні, йӧз синмысь бокын, аслас семьяын, мортыс ёнджыка лоліс ас кодьысӧн. Ӧтияс топыда ужнайтӧм бӧрын рытывбыд кежлӧ пуксьылісны телевизоръяс водзӧ, мӧдъяс книга чукӧрӧн сайӧдчывлісны лӧньджык жыръясӧ, коймӧдъяс сьӧд войӧдз сибдывлісны вина тыра пызанъяс сайӧ, и налӧн гора гӧлӧсъясыс да зымӧдчӧмыс кокниа писькӧдчылісны и мукӧд позъясӧ, сы вӧсна мый бетон стенъясыс зэв гораӧсь...

Татшӧм думъяс бергӧдчисны Света вежӧрын лӧньыштӧм карӧд восьлалігӧн. А нӧшта ныв казяліс, мый уличаяс вылын йӧзыс не сӧмын шочмис, но быттьӧ и томмис. Тані нинӧм жӧ дивитанаыс абу, сы вӧсна мый нэм чӧж на сідзи вӧвлі: сикт и кар рытын том йӧз киын. Торйӧн нин тулысын, кор вежсьӧ сынӧдыс да коддзӧдыштӧ быд ловъя лолӧс; и быд ловъялӧн туӧ вирыс, ыпъялӧ лолыс, чужӧны и гӧгӧрвоана и гӧгӧрвотӧм пӧсь кӧсйӧмъяс.

Улича помланьын, керка вевтъясысь быттьӧ сӧмын неуна и вылынджык, пемыдлӧз енэжын югзисны-ломзисны тӧлысьлӧн эзысь чарла да Венера кодзув. Найӧ вӧліны дзик орччӧнӧсь, и та вӧсна кажитчис, мый петӧмаӧсь рытъя енэжас, кӧні муртса тӧдчымӧн читкыралісны синнысӧ ылісаджык кодзувъяс, петӧмаӧсь ворсӧдчыштны, мыйкӧ висьтавны ӧта-мӧдныслы. Светалӧн, да и зонъяслӧн тшӧтш, синъясыс сідзи и сибдісны тайӧ серпас дінас, коді не сӧмын шензьӧдіс аслас мичлунӧн, но быттьӧ и пӧсьӧдіс том йӧзлысь тулысӧн сідз нин шызьӧдӧм вирнысӧ.

Чатрасигтыр Света кольччыштіс, и друг сылы пельпомас лёкысь воча зургисны. Ныв муртса эз гатш усь виччысьтӧмысла. Кузь юрсиа кык зон, ӧтиыс морӧсас кӧв йылын ӧшӧдӧм гитараа, быттьӧ нинӧм абу и вӧвлӧма, ньӧжйӧникӧн восьлалісны водзӧ.

— Нахалъяс! Туйыс али мый оз тырмы, йӧткасянныд! — горӧдіс налы Света.

Ким, коді восьлаліс Светаысь неуна водзынджык, казяліс нылӧс зургӧмсӧ да ӧтчыд чеччыштӧмӧн кватитіс гитараасӧ шошаӧдыс, шуис:

— Энлы на тэрмасьлы, вояк! — а сэк кості воисны и мукӧд зонъяс. Кыкнан том мортыслӧн кельдӧдісны чужӧмъясыс.

— Гитараа, а йӧткалан нывъясӧс, — шуис Ким. — Он ӧмӧй тӧд, мый гитараа зонъясыс сё вояс сайын нин сьывлісны нывъяслы нежнӧй серенадаяс?

— Ме эг нарошнӧ... — шуис повзьӧм зон.

— Ӧні жӧ извинитчы ныв водзас, — шуис Ким.

— Мыйысь? — гӧгӧрвотӧм улӧ заводитліс лэдзчысьны зон.

— Ак тэ он тӧд мыйысь? — шуис Гена. — Сідзкӧ, стӧчмӧда: дружинник вылӧ усьласьӧмысь. Висьтав овтӧ и мӧдім миянкӧд.

— Ме эг казявлы...

— Кыдзи, мися, овыд?

— Но, Кулаков...

— Кӧні уджалан-велӧдчан?

— ГПТУ-ын...

— Гӧгӧрвоана!

— Вася, извинитчы! — кевмысянаа шуис мӧд зонмыс. — Нарошнӧ ӧд и тойыштін.

— Но либӧ, извинитӧй... Мӧдысь ог кут, — мырдысьӧн пычиктіс сэсся гитарааыс.

— Смотри, борд пӧвтӧ чегам, тадзи кӧ кутан шенасьны, — шуис Лёшка.

— Ачыд нӧ кӧть гӧгӧрвоан он, мый нывъясӧс йӧткавны — зэв мисьтӧмтор? — юасис Ким. — Вӧр пу кузя мужиклы...

— Эг и тӧдлы, кыдзи лои... Извинитӧй...

Кык друг мунісны дружинникъяс дінысь зэв тэрыб воськовъясӧн. Света жугыльпырысь видзӧдыштіс на бӧрся да шуис:

— Мыйла тайӧ пацанъясыслӧн ньӧти абу нывбаба дінӧ уважениеыс?

Дыр некод нинӧм эз вочавидз.

— Тайӧяс — йӧй кыръяс, кодъяс друг казялісны ассьыныс вын, — шуис Ким. — Ӧні пӧ позьӧ чужъясьны и курччасьны. Мый колӧ, сійӧс и вӧчны слабиник эньясыдкӧд...

— И мыйта на татшӧмыс! — курыда ышловзис Света.

— Да, — шуис Ким. — И татшӧмъясыс рытнад оз библиотекаясын пукавны, а кӧйялӧны магазинъяс дорын. Да ещӧ кӧнсюрӧ...

Медуна йӧзыс и збыльысь вӧлі кинотеатръяс, магазинъяс да ресторанъяс дорын.

На водзын тэрмасьтӧг восьлалісны ныла-зонма. Кыкнанныс ыджыд тушааӧсь, томӧсь, меліа топӧдчыштӧмаӧсь ӧта-мӧд дінаныс. «Сэтшӧм жӧ мичаӧсь, кыдзи тӧлысьлӧн эзысь чарлаыс да зарни кодзулыс», — нимкодясис Света. Друг нылыс, кылӧ, юаліс ёртыслысь:

— Юра, а мый эськӧ олӧмас главнӧйыс — уджавны олӧм вӧсна, али овны уджалӧм вӧсна?

Света тувкыштіс гырддзанас орччӧн мунысь Кимлы, индыліс синъяснас ныла-зонма вылӧ: кывзыв пӧ тшӧтш.

— Овны уджалӧм вӧсна! — кыпыда шуис зон. — Сэтшӧм удж вӧсна, мыйысь радлӧ лолыд.

Кор ныла-зонма кежисны на водзысь мӧд улича вылӧ, Ким шуис Светланалы:

— Тайӧ некор оз кут усьласьны нывъяс вылад.

— Да-а... Татшӧмъясыд кужасны бӧрйыны мича туй.

— Ме бур ногӧн завидьта татшӧмъясыслы, — шуис Ким.

— Завидьтылӧны ёнджыкасӧ сэтшӧмъяс, кодъяс асьныс оз вермыны мыйкӧ вӧчны. А мем чайтсьӧ, тэ абу сэтшӧмъяс лыдысь.

— Ми вокӧс йӧй руыс частӧ на жӧ вӧдитлывлӧ, — ылӧсас шуис Ким, кӧть эськӧ и аслыс нимкодь лои нывлӧн татшӧм кывъясысь.

— Кутан кӧ сетчыны, дерт, — эз эновтчы Света.

— Велалӧмвывсьыд тай, он и тӧдлы, сідз на артмӧ, — варовмис Ким. — Кольӧм гожӧм ми ӧти ёрткӧд Москваын вӧлім, пыралім Большой театрӧ, югъялӧ-дзирдалӧ гӧгӧр, синъяснымӧс паськӧдӧмӧн видзӧдам ӧтарӧ-мӧдарӧ; мися, водзті тані асьныс царъясыс пукавлісны, а ӧні со — ми... Но тайӧ эз мешайт миянлы быд антракт дырйи уськӧдчыны буфетӧ да дучкыны-юны сур; кольмыштӧм гут кодьӧн и видзӧдім спектакльсӧ. А орчча пызанъяс сайын гозйӧн-гозйӧн сулалісны ныла-зонмаяс да юисны лимонад. Найӧ сёрнитісны эз сур да чӧскыд сьӧмга чӧлӧсъяс йылысь, а кужӧмӧн вензисны пьеса йывсьыс, донъялісны артистъяслысь ворсӧмсӧ, налысь быд шуӧм... На вылӧ видзӧдігӧн меным лолі сэтшӧм завидь!..

Света чуймӧмӧн кывзіс Кимлысь тайӧ виччысьтӧм сёрнисӧ, и сылӧн чужисны зэв шоныд думъяс, кодъясӧс эськӧ со кыдз сійӧ гижис газет строкаясӧ: «Пӧжалуй, миян медся ыджыд вермӧмъясысь ӧтиӧн лоӧ сійӧ, мый со татшӧм рабочӧй зонъясыс велалісны думайтны, кутісны видзӧдны олӧм вылас сӧвмӧм вежӧра интеллигентъяс моз».

Но век жӧ Светалы мыйлакӧ окота вӧлі аддзыны Кимсӧ и мукӧдысь торъяланаджыкӧн. Нывлы вӧлі любӧджык думайтны Ким йылысь, кыдзи зарни из йылысь, кодлӧн кӧть и оз на тыдав сы дінӧ сибдӧм сёй да лыа пырыс збыль мичыс, но весалан кӧ, югыда дзирдыштас.

Мыйла сылы колӧ буретш татшӧм Кимыс? Буракӧ, сы вӧсна, медым тӧдчанаджык, мыгӧраджык «пуксяс» панӧм гижӧдӧ...

А мӧдыс, дерт, немтор оз тӧд нывлӧн думъяс йылысь, тэрмасьтӧг восьлалӧ водзӧ. Кӧть и зонлӧн ыджыд тушаыс яг выв пожӧмлӧн кодь зумыд да топыд и, дерт, кӧнкӧ, сьӧкыд, но кузь кокъяс вылас сійӧ тувччаліс кыдзкӧ зэв кокниа, ён пружинаяс вылын моз, и некутшӧм выныштчӧм эз тӧдчы. Муныштас и ворсігмоз кымыныськӧ зэлыда кабыртлас неуна ӧвтчыштысь кияссӧ. Киыс сылӧн абу ёна ыджыд, чуньясыс абу кызӧсь ни, но Света тӧдӧ нин, мый вермӧ вӧчны тайӧ кабырыс.

— Ким, а мыйла эськӧ тэ сідзи кабыртавлан киястӧ?

— А мый, мисьтӧм видзӧднысӧ? — виччысьтӧмысла падмис мӧдыс.

— Ме ог шу — «мисьтӧм». Ме сідз юала.

— Велавсьӧма тай, — личмунӧмӧн серӧктыштіс зон. — Век окота тренируйтыштны найӧс. Сойяс менам абу кызӧсь, кыдзкӧ ӧд колӧ чукӧртны налы вынсӧ.

— Этша на тэнад да, — нюммуніс Света.

— Содтӧд выныд мужик мортыдлы оз мешайт, — шуис Ким. — Сэки прамӧйджык мортӧн аслыд кажитчан. Да и сідз любӧ кывны, кор тэнад ворсӧ-кывзысьӧ быд сӧн. Тіян, нывъяслӧн, гашкӧ, мӧд ног-а?

— Дерт, мӧд ног, — нерыштіс Света. — Миянӧс ӧд абу вирысь да яйысь тэчӧма, а мыйыськӧ мӧдторйысь... Гашкӧ, уль сёйысь да кӧдзыд ваысь.

Ким сьӧлӧмсяньыс нин серӧктіс воча.

Улича весьтӧ нюжӧдӧмаӧсь кузь сойяснысӧ плавкӧс пома электрическӧй пӧнаръяс, наысь, зэв югыд бус моз, ньӧжйӧник киссьӧ еджыд югӧр. Неджуджыд топольяс сулалӧны пашкырӧсь, частӧ шырӧмысла найӧ лоӧмаӧсь турун юр кодь топыдӧсь, гӧгрӧсӧсь.

Улича дзиб йылын, карлӧн медвылысінын, зонъяс ӧти пачкаысь ӧзтісны папироскаяс, ӧтчукӧрӧн сулалыштісны куритчигмоз.

Рытъя пемыдас гӧгӧрбок сярвидзисны бияс. Мый ыджда карыс лоӧма, пом ни дор. Ӧтарын, пемыд енэжас быттьӧ, тыдалісны радио да телевизионнӧй вышкаяслӧн чим гӧрд би розъяс; мӧдарын грымгис-муракыліс аэродром; кыпӧдчысь сьӧкыд самолётъяслӧн косялӧм-жургӧмысь, кажитчӧ, тіраліс карыс дзоньнас. Да-а, буракӧ, эз чайтлыны аэродром вӧчысьясыс, мый татшӧма паськалас карыс, діалас портсӧ; эз вермыны чайтны найӧ сідз жӧ, мый сэтшӧм регыдӧн сё мортӧс качӧдысь самолётъяс кутасны пуксьыны татчӧ.

Ӧдйӧ паськалӧ кар... Со нин наукаяс Академиялӧн быдса городок лоӧма. Кутшӧм сӧмын специалист оз уджав сэні! Мыйсӧ сӧмын эз аддзыны нин найӧ да уна мукӧд разведчикъяс миян озыр республикаысь! Из шомтӧ и зарнитӧ, нефтьтӧ и титантӧ, газтӧ и весиг алмазтӧ...

А шуйгавылын со сулалӧны институтлӧн короминаясыс. Мыйта коми ныв-зон югдӧдісны сэні юрнысӧ да лэбисны-разгысисны помтӧм-дортӧм Коми му пасьтала, мед сетны тані босьтӧм тӧдӧмлунъяссӧ быдмысь войтырлы. Этатчӧ со кыпӧдчӧма музыкальнӧй театр. Мыгӧрыс сылӧн ыджыд корабльлӧн кодь; югдӧдӧм бияса, сійӧ быттьӧ уйӧ кытчӧкӧ войся пемыдас.

Водзын вижа-гӧрда биясӧн югзьӧ вокзал, джуджыд шпиль йылас ӧмидз рӧмӧн ломзьӧ ыджыд звезда.

Бияс, бияс... Войся пемыдын паськыда югзьысь уна рӧмъяснад ті век кыдзкӧ ёна шызьӧданныд мортӧс...

— Став шудсӧ тэныд, дона кар! — виччысьтӧг кыпыда шуис Света.

— Да, став шудсӧ тэныд, миян кар! — шусис и Кимлӧн. — И мед тэ важ мозыд уна нэмъяс чӧж на век лоан коми йӧзлы югыд кодзулӧн...

— Толик, помнитан, ми тэкӧд тані тшак на вотлім? — шуис Гена.

— Омӧлик тшак жӧ эськӧ да, масльӧяс да мый да, — аслас вӧсни гӧлӧсӧн шыасис мӧдыс. — Вот картупельтӧ пасьталаыс тані пуктылісны.

— А ӧні, видзӧд, быдлаын бияс... Крепыда стрӧитчӧны.

— Ӧні тані медуна йӧзыс олӧ, — шуис Лёшка. — И ставыс том семьяяс.

— Сідзкӧ, тэ регыд татчӧс олысь жӧ лоан?

— Мыйлакӧ?

— Гӧтрасьны кӧсъян да!

— А-а...

— Сэсся, гӧтрасян да, тэ дінӧ и пырнытӧ он кут лысьтны...

— Но, ребята!..

— Эн на водзвывсӧ нокайт. Кӧть и шплинт Раяыд, велӧдас на дорын узьлыны.

— Тэ, Лёшка, первойсянь кӧртвомав и зэлӧд вӧжжисӧ, — шуис Анатолий. Сійӧ вӧлі куим во нин гӧтыра.

«А найӧ оз жӧ ӧтмоза кывны олӧмсӧ, кӧть эськӧ и вӧчӧны ӧти и сійӧ жӧ удж, — друг мӧвпыштіс зонъяс йылысь Света, налысь гажа сёрнисӧ кывзігмоз. — Но сэк жӧ налӧн ставныслӧн быттьӧ эм мыйкӧ ӧткодьтор... Мый нӧ эськӧ? Мый нӧ эськӧ сэтшӧмыс? — Гашкӧ, олӧм вылас, мир вылас кыдзкӧ зэв восьса сьӧлӧмӧн видзӧдӧмыс? Асьнысӧ крепыда вужъясьӧмаӧн кылӧмыс? Тӧндзи тай папа кыдзкӧ тадзи жӧ шуліс... Найӧ, дерт, лёксӧ аддзӧны миянысь не этшаджык. А, гашкӧ и, унджык на? Но лёкыс найӧс оз повзьӧдлы. Гашкӧ, найӧ видзӧдӧны сы вылӧ асланыс уджын корсюрӧ овлысь брак вылӧ моз жӧ? Сытӧг пӧ тай некӧн оз на артмы. Но таысь найӧ оз весьӧпӧрны, таысь налӧн оз пемды мир вылас ясыд видзӧдласыс...»

— Эм татшӧм мӧвп — кытшовтыштны выль керкаяс гӧгӧр, — шуис Ким. — Мед миян жӧникным велӧдчӧ, кыдзи том гозъяясыс олӧны.

— Понданныд кӧ серавны, ме пышъя тіян дінысь, — шуис Лёшка, но гӧлӧсыс вузаліс морттӧ: сылы вӧлі зэв нимкодь кывны гӧтрасьӧм йылысь сёрнияссӧ.

Кежисны бокӧ, мӧдӧдчисны вит судта керкаяс костӧд, кодъяс вӧліны дзик ӧткодьӧсь, боквыв сувтӧдӧм ыджыд ящикъяс кодьӧсь. Ӧшиньясын — разнӧй бияс и разнӧй занавесъяс, восьса форточкаясысь кылӧны разнӧй шыяс, ёнджыкасӧ — лыйсьӧм-горзӧм, сы вӧсна мый телевизор пыр талун петкӧдлӧны военнӧй фильм.

А со этайӧ улыс судтаса комнатаас горзӧны дзик мӧд ног. Дружинникъяс сувтісны ӧшинь улас. Да, тайӧ абу телевизор... Друг зиль-зёльмуні ӧшинь, лёкысь клопнитіс ӧдзӧс, и нывбаба гӧлӧс повзьӧмӧн горӧдіс:

— Ой, караул! — А сэсся и нывбабаыс звиркнитіс кильчӧ вывсянь да усиг-чеччигтыр пондіс котӧртны керка пӧлӧн. Здук мысти сы бӧрся лыйыштіс-петіс код мужик да, медмисьтӧм кывъяснас нывбабасӧ пинялігтырйи да мыйӧнкӧ шенасигтырйи, уськӧдчис вӧтчыны.

Лёшка стен пӧлӧнсянь нюжӧдліс коксӧ, мужикыс конъясис да зульскысис-усис йизьыштӧм асфальт вылӧ. Зонъяс вевсясисны сы вылӧ, а Света котӧртіс суӧдны нывбабаӧс.

Дядьӧ эськӧ и пондыліс жӧ чужъясьны, но татшӧм багатыръясыдкӧд он на ёнасӧ водзсась: песовтісны кияссӧ мышкас, и мортыд пырысь-пыр лӧнис. А киас сылӧн вӧлӧма дженьыдик челядь лыжи.

Кор Света бӧр воис сыркъялысь нывбабакӧд, ставӧн пырисны квартираӧ. Кык комната, лӧсьыд пызан-улӧс, выль диван, телевизор. Джоджъяссӧ мичаа краситӧма, сӧстӧмӧсь.

— Колюк, Валюк, ті нӧ кӧнӧсь, кагаяс? — гораа шуис нывбаба сыркъялӧмсӧ лӧньӧдны зілиг. Сійӧ вӧлі ар комына, лӧсьыдіник еджыд чужӧма, син дорыс зэв ыджыда лӧзӧдӧма.

Некод эз шыась сылӧн кывъяс вылӧ, сӧмын мужикыс, кодӧс сойясӧдыс кутісны Лёшка да Анатолий, сьӧкыда киргис-лолаліс.

— Колюк, абуӧсь али мый ті? — повзьыштӧмӧн нин горӧдіс нывбаба, сійӧ дугдіс сыркъявнысӧ.

Сэки гольсмуныштіс ванна ӧдзӧс, да сэтысь полігтырйи петісны ар сизима сьӧдіник зонка да ар вита чойыс, кыкнанныс чужӧм пасьталаныс ниртӧмаӧсь синванысӧ. Полігтырйи видзӧдлісны тӧдтӧм йӧз вылӧ, сэсся казялісны мамсӧ да уськӧдчисны сы дінӧ.

— Повзинныд, кагаяс менам, — юрсиӧдыс шыльӧдігтыр шуаліс мамыс. — Но чӧвлӧй, но чӧвлӧй...

На вылӧ видзӧдігӧн Света муртса ачыс эз бӧрддзы, синъясыс, эз и тӧдлы, вазисны, и горшыс курдіс.

Мужикыс вӧлі ичӧтик, косіник, сьӧд кутш кодь. «И тайӧ гагыс ещӧ лысьтӧ лэптыны кисӧ этатшӧм гӧтыр вылӧ!» — шензис и скӧраліс Света.

— Тайӧ нӧ верӧс тіян? — век жӧ юаліс Света, сылы эз на эскыссьы.

— Да..

— Мыйысь нӧ тышкасьӧ?

— Деньга корӧ. Абу на, видзӧд, пӧтӧма. Кыськӧ локтіс лёльӧ кодь-а. Век татшӧм, кыдзи коддзас.

— Ми дружинникъяс, — шуис Гена. — Вермам лэччӧдны сійӧс вытрезвительӧ.

— Лэччӧдӧй, лэччӧдӧй! — збоймис нывбаба. — Войбыд жӧ нин син оз лэдзлы лапкыны-а, аслым ни челядьлы.

— А позяс и дас вит сутки кежлӧ пуксьӧдлыны «геройтӧ», — водзӧ сёрнитіс Гена. — Тышкасьӧмсьыс. Сэні, гашкӧ, велалыштас.

Нывбаба быттьӧ друг повзьыштіс, гӧгӧртӧдіс синъяснас дружинникъясӧс, сэсся сувтіс верӧс вылӧ, коді вӧлі коньӧр моз лёткысьӧма крепыд зонъяслӧн кияс вылын. Сійӧ йирышталіс пиньнас, вомсьыс виж тшӧка лыӧдыс визувтіс дулльыс.

— Вай энӧ нин лэччӧдӧй! — шуис сэсся нывбаба синъяссӧ дзеблаліг. — Гашкӧ, палялас сэсся. Вай кӧрталамӧй ки-коксӧ, мед сідзи гортын узьӧ. А пондас кӧ горзыны, вомас мыйкӧ сюя.

— Тадзинад ӧмӧй велалас сійӧ! — пӧся шуис Света, кодлӧн кутіс лӧгыс петны нывбаба вылӧ. — Асывнас палялас, а рытнас бара жӧ сідзи вӧчас...

— Сэтшӧм частӧсӧ оз жӧ эськӧ йӧйтавлы да, — нывбаба дорйис нин мужиксӧ. — А ӧні, кор висьтала, мый дружинникъяс кӧртавлісны, гашкӧ, вежӧрсяласджык. А пуксьӧдӧмсьыд, ныланӧй, ыджыд пӧльзаыд оз жӧ ӧд ло. Удж вывсьыс вермасны вӧтлыны. Мыйӧн ме этаясӧс сэки кута вердны? Ті эн думайтӧй, сідзсӧ сійӧ абу нин сэтшӧм шыбитана морт. Челядьӧс радейтӧ и. Сӧмын тай, кор юас, винаыс йӧйтӧдлӧ.

Зонъяс зэлыда домавлісны ичӧтик дядьӧӧс да водтӧдісны джоджӧ, кытчӧ нывбаба вольсыштіс важ кышӧд. А сэсся, мӧвпалыштіс да, юрлӧс на тшӧтш вайис.

Ывла вылын Света шуис Кимлы:

— Да, олӧмыд — олӧм на и эм!

— Бабаыд пӧ — сунис, мужикыд пӧ — ем, — серӧктігмоз вочавидзис мӧдыс.

— Тэнад Раюкыд эськӧ тадзтӧ эз вӧч, — шуис Лёшалы Гена. — Сійӧ эськӧ, шплинтыд, эз и лэдз код юратӧ.

— И правильнӧ эськӧ вӧчис! — шуис Света.

— Мый нӧ тані правильнӧыс! — шуис Анатолий. — Менам ӧти тӧдса быд гажа юра дырйи посводзас узьлӧ. Гӧтырыс оз лэдз гортас да. Тайӧ нӧ ёна мича.

— Эн ю! — шуис Света.

— А мыйла нӧ либӧ водкасӧ лэдзӧны? — эз лэдзчысь Анатолий. — Ме кывлі, мый водкасьыс государствоным медыджыд доход босьтӧ. Гашкӧ, став ракетаяссӧ вӧчӧны тайӧ доход вылас.

— Толя, тыдалӧ, сэтчӧдз воӧдчас сёрнинас, мый миянлы, вина юысьяслы, колӧ заводитны сэсся сетавны орденъяс, — шуис Ким. — Кымын ёнджыка мортыс юӧ, сымын ыджыдджык орден ляскыны морӧсас.

Дыркодь сералісны та вылын: вот пӧ сэки эськӧ и ордйысьыштім юӧмнад!

Кор пырисны кафеӧ, лӧнь ывла вылӧ велалӧм пельясыс муртса эз потны: сы мында тані вӧлі шумыс.

Неыджыд векньыдик залын веглясисны-йӧктісны, дзескыдысла ниртчисны ӧта-мӧд дінас, гашкӧ, сё-мӧд ныла-зонма.

«Быттьӧ тывйӧ шедӧм черияс!» — думыштіс Света. Неыджыд джаз, ставыс томиник зонъяс, няжгисны-ворсісны «шейк», а уска зон чеччалігтыр да вежнясигтыр дубаситіс кыз пома бедьясӧн гора барабанъясӧ да ыргӧн тасьтіясӧ, мый вермӧмысь равзіс-сьыліс бувгысь-омлялысь музыка шыяс ногыс:


...Энӧ мунӧй, челядь,

Африкаӧ овны,

Сэні ӧд — акулаяс,

Сэні ӧд — гориллаяс,

Сэні ӧд — ёсь пиня да ыджыд крокодилъяс!


И тайӧ кывъяссӧ сійӧ горзіс-шуаліс помтӧг, быттьӧ эз морт вӧв, а тшыксьӧм пластинка, код вывті емыс бергалӧ пыр ӧти и сійӧ жӧ воргаӧд.

Мед не янсавны тайӧ кыдзсюрӧ веглясьысь йӧз чукӧрас, Света шашаритчис Кимлы сояс да найӧ кутісны мырдысьӧн писькӧдчыны зал мӧдар помӧ, кӧні вӧлі буфет. Света эз и казявлы, кыдзи сылӧн кокъясыс асьныс кутісны тшӧтш вӧрны ыззьӧдысь музыка шыяс улын, кутшӧмкӧ здукӧ сылы весиг окота лолі тшӧтш вунӧдчыны да, гӧрӧкталігтыр, тайӧ дзикӧдз ышмӧм ныв-зон мозыс жӧ, заводитны веглясьны-чеччавны.

Буфет дорын зонъяс ӧдва-ӧдва сибӧдчисны вузасьысьыс дінӧдз. Света тшӧктіс юавны Кимлы буфетчицаыслысь: кажитчӧ оз пӧ сылы татшӧм койташыс?

— Кажитчӧ, ме велалі нин, — дыр падъявтӧг вочавидзис ныв.

— Ким, вай нӧшта юасьыштам, — шуис Света. — Кӧть тӧдмалам, мыйся йӧз татчӧ волывлӧны, мый думайтӧны найӧ...

— Позьӧ, — шуис мӧдыс, сылы вӧлі аслыс окота тӧдны тайӧс. Матыстчисны сӧдз шабді юрсиа томиник ныв дінӧ. Света тувкнитіс Кимлы: тэ пӧ юась!

— Бур нылӧй, эстшӧм мича тэнад юрсиыд, — шуис Ким, мый медводз воис юрас. Мӧдыс югъялысь синъясӧн, буракӧ, вӧлі юыштӧма, видзӧдліс ыджыд тушаа зон вылӧ да повтӧг вочавидзис:

— Менам не сӧмын юрси, но и ачым мича.

— Тэ нӧ эськӧ уджалан нин али велӧдчан на?

— Велӧдча, торговӧй техникумын. А мый?

— Да нинӧм... И частӧ тэ татчӧ волывлан, кажитчӧ тэныд тані?

— Кажитчӧ. Сӧмын тай зонъясыс этшаджыкӧнӧсь, унджыкыс — ныв... Тэнад со эм жӧ нин...

Кузь тушаа зон дыр эз кӧсйы вочавидзны, кӧні уджалӧ. Сэсся медбӧрын шуис жӧ: «Ӧти неыджыд заводын». Кажитчӧ-ӧ тані сылы? «Зэв ёна кажитчӧ».

— А гашкӧ, кыдзкӧ бурмӧдыштны колӧ? Мед интереснӧйджык вӧлі? — юасис Света.

— Бур эськӧ, паськӧдыштны кӧ залсӧ, — пель сайсӧ гыжйыштіс зон. — Мед унджыкӧн тӧрисны.

Нӧшта ӧти ныв шуис:

— Зэв ёна кажитчӧ!

Средньӧй школа помалысь ныв шуис мӧд ногджык:

— Ме чайті, тані стихотворениеяс лыддьӧны. Ме первойысь на тарыт локті. Кыкӧн ми локтім. Куш йӧктынытӧ гажтӧм.

Тайӧ воча кывсьыс Светалӧн пӧсялӧм чужӧмӧ быттьӧ ӧвтыштіс ыркыд тӧвруӧн.

— Ме стихъяс жӧ кывзыны локті, бур музыка тшӧтш, — шуис Света гӧгрӧс чужӧма ныв вылӧ шоналӧм сьӧд синъяснас видзӧдігтыр.

А зал пасьтала мудз тӧдтӧг няжгисны-грымгисны:


Сэні ӧд — ёсь пиня

да ыджыд крокодилъяс...


Кызьӧд глава


Нывбабаяслӧн праздник — Март 8 лун — Кимлы вайис выль тӧждысьӧмъяс.

Водзтіджык нин сійӧ кӧсйысьліскодь тайӧ лунас пыравны Миля ордӧ. Но кор дружинникалігӧн Света кутіс нуӧдчыны вӧрӧ исласьны лыжиӧн, Кимлӧн кывйыс мыйлакӧ эз бергӧдчы шуны, ог пӧ вермы.

Ӧні водз асыв, квайт час, армиясяньыс на Ким велалӧма садьмыны та кадӧ и кӧть кор оз вод, век садьмӧ. Асывнад лӧнь, юрыд сӧстӧм, и зэв бура думайтсьӧ, уроктӧ велӧдсьӧ.

Оз кӧ талун сійӧ пырав Миля дінӧ, мӧдыс ёна и чушнитчас-скӧрмас.

А мый лоӧ, оз кӧ сійӧ мун исласьны? Мый, сытӧг исласясны, Максимъяс пӧ тай тшӧтш мунӧны. Но Кимлы окота жӧ мунны исласьны. «Бӧртинас Милялы висьтала, мый зэв ёна висис юрӧй, а тіян ордын бара на эськӧ ковмис юыштны. Вӧрас муні, мед сӧстӧм сынӧднас пальӧдчыны...

Вот лешакыд, нывбабаяслӧн праздник лунӧ нывъяс вӧсна жӧ и лоӧ вийсьыны!»

Сэсся Ким пондіс нуӧдны вӧрӧ тшӧтш и садьмӧм Генаӧс. Но сійӧ шуис, мый мунас Мусанов дядь ордӧ лӧсьӧдавны ветельяс.

— Сідзкӧ, либӧ тэ мунігмозыд шыбит Милялы пошта кудъяс открытка, — шуис Ким кыдз вермис веськодьджыка.

— Позьӧ. — Гена, дерт, гӧгӧрвоыштӧ, мый вӧчсьӧ другыс сьӧлӧмын, но немтор оз юась.

— Бурджык, оз кӧ аддзыв Миляыс тэнӧ...

— Дела... — шуис Гена, а недыр мысти сэсся и муніс.

Ким пасьталіс лӧз ной спортивнӧй костюмсӧ, пелькиник лыжнӧй шапка. Думайтыштіс да тасма вылас ӧшӧдіс кучик пуртӧса пуртсӧ: ӧти сайын кӧсйис керавны тусяпу вож. Гардеробса зеркалӧсянь сы вылӧ видзӧдіс пӧлӧс пельпомъяса да вына коска молодеч, кодлӧн чорыд мускулъясыс тӧдчана мылькъясисны свитер пырыс; сылӧн быттьӧ и ставыс лада вӧлі, не кӧ лыддьыны этша узьӧмысла пемдыштӧм чужӧмсӧ да гудырмыштӧм синъяссӧ. Но нинӧм, вӧрса сынӧдыс быдлаті шыльӧдас-сӧдзмӧдас!

Шуисны аддзысьны вокзал дорын, дас ӧти часын.

Вылын шпиля, шпиль помас звездаа, гырысь ӧшиньяса руд вокзал дорысь Ким казяліс Светаӧс, и сьӧлӧмыс суніс-лэбыштіс кытчӧкӧ аслас местасьыс. Асъя став майшасьӧмъясыс вошины, ловсӧ ойдӧдіс пӧсь радлун. Ныв сулаліс киас лыжияса, лым еджыд шапкаа, сэтшӧм жӧ еджыд да небыд свитера, фотоаппарата.

— А ме нин чайті, мый ковмас ӧтнамлы мунны, — шуис Света, еджыд шапка увсяньыс сьӧд синъяснас меліасьӧмӧн.

Кимлы эз вӧв лӧсьыд, мый воис сёрӧнджык, но ӧттшӧтш лои и нимкодь, мый Света сулалӧ ӧтнасӧн.

— Света, тіян праздникӧн тэнӧ! — сьӧлӧмсяньыс шуис Ким. — Став бурсӧ тэныд! Мед збыльмасны став кӧсйӧмъясыд.

— Аттьӧ, Ким.

— Мукӧдъясыс тай абуӧсь на жӧ-а... — шуис Ким, кодлы окота нин вӧлі мунны вӧрӧ войтырсӧ виччысьтӧг.

— Максим звӧнитліс: ог пӧ вермы мунны, другъяс пӧ воисны.

— Праздник луннад, дерт...

— Праздник кӧ, сэсся и быть юны колӧ! Этатшӧм гажа лунас. И абу налӧн праздникыс! Скӧрмӧдчӧ сӧмын...

А луныс и збыль мича пуксис, шондіа, буретша ыркыд, пӧльтыштӧ лун тӧв.

— Ме мазь босьті сьӧрысь, — вӧзйис Ким. — Гашкӧ, мавтыштам лыжитӧ?

— Да? — дзикӧдз долыдмис ныв. — Молодеч лоан, мавтан кӧ...

Ким мавтіс нывлысь сьӧда-еджыда краскаӧн волялысь лыжияссӧ, сэсся найӧ подӧн вуджисны шлакӧсь да мазьӧсь кӧрт туй визьяс вомӧн да лыжиасисны.

— Ким, а тэ талун нач ковбой кодь, паськыд шляпа сӧмын оз тырмы. Мыйла нин пуртсӧ босьтін?

— А друг кӧинъяс уськӧдчасны. Коді кутас тэнӧ дорйыны?

— Кысь татчӧ кӧиныс локтіс?

— Серала. Колӧ бедьтор керыштны.

— А вай ме тэнӧ снимайта. Вокзал весьтас. Зэв лӧсьыд кадр лоӧ.

— Кыдз кӧсъян, — эз пыксьы Ким.

На водзын и бӧрвылын вӧрӧ гузьгисны-мунісны лыжияса йӧз. Коді сӧмын эз вӧв тані, матігӧгӧрас! Том и пӧрысь, гырысь и посни, ныв и зон. Но век жӧ Ким казяліс, нывбабауловыс унджыкӧн вӧліны. Буракӧ, мужикъяс гӧтыръяснысӧ мӧдӧдӧмаӧсь исласьны, а асьныс кольччӧмаӧсь гортаныс налысь праздниксӧ пасйыны.

Быдӧн пасьтасьӧма, кыдз вермӧма, мичаджыка: алӧй и еджыд, гӧрд и лӧз и ӧтпырйӧ уна рӧма свитераӧсь, сэтшӧм жӧ шапкааӧсь, нимкодь чужӧмаӧсь... Йӧз пырисны и пырисны шондіӧн югзьӧдӧм вӧрӧ; и вӧрыс ачыс тшӧтш нимкодясис, ачыс тшӧтш воча радліс сійӧс татшӧма пыдди пуктысь йӧзлы. Кимлы вӧрыс кажитчис мелі мамӧн, коді зэв нин дыр абу аддзылӧма челядьсӧ, ёна нин гажтӧмтчӧма наысь и со ӧні, ӧтлаасьӧм бӧрас, некыдз эз вермы дзебны ылькйысь-петысь радлунсӧ.

Медводдза неыджыд керӧсӧ матыстчигӧн Света тэрыба шыбитіс лыжи бедьяссӧ, кватитіс бокас ӧшалысь фотоаппаратсӧ да лӧсьӧдчис снимайтны воча исковтысь лыжникъясӧс. Тайӧ вӧліны серамбана ая-пиа, ар куим-ӧ-нёля детинка пукаліс батьыслӧн паськыд пельпомъяс вылын да пыскыль кывйӧн гажаа сьыліс:


Капитан, капитан, подтанитэсь,

Капитан, капитан, улыбнитэсь,

Тойко смейым поколаются моя.


Кымын водзӧ пырисны вӧрӧ, сымын лыжняыс лои небыдджык, шыльыдджык да сӧстӧмджык, эзджык кут тӧдчыны карса трубаясысь пуксьысь саыс. И сымын лӧсьыдджык да долыдджык лои сьӧлӧмъяс выланыс.

Света чепсасис-котӧртіс водзвылын. Сійӧ тювӧдіс кужысь лыжница моз — водзвыв сетчыштӧмӧн, кокъяснас пружина моз ӧдӧбтышталӧмӧн да южмӧм лым вылын сьылысь-дзуртышталысь бедьяснас ворсігтырйимоз йӧткасьӧмӧн.

«Тайӧ кузь кокаыд тай нӧ турӧб кодь!» — шензис да нимкодясис Ким, сійӧ муртса и удитіс вӧтчыны ныв бӧрся. А лыжияс вылысь, буракӧ, шыляліс мазьыс, и найӧ кутісны шливӧдны вый вывті моз. А гашкӧ, и найӧс тшӧтш ӧддзӧдіс том вына ныла-зонмалӧн пӧсь вирыс?

— Ме ог ӧдйӧ мун? — друг сувтіс да юаліс Света. — Кыдз тэнад юрыд? Век на жувгӧ?

— Неуна... Вӧрыс ыркӧдас и бурӧдас. — Кимлы любӧ Светалӧн татшӧм тӧждысьӧмысь. Сылы ставсьыс любӧ.

Шондіа вӧрын еджыд лымсӧ сьӧда-лӧзаӧн серӧдӧмаӧсь пуяслӧн кузь вуджӧръясыс, эз кутны кывны карлӧн шыясыс, сылысь жургӧм-йиркӧдӧмсӧ вежис вӧрлӧн негораа шувгӧмыс. Неуна пӧсялыштӧм вир-яйыс корис ёнджыка, джуджыдджыка лолавны, и ныла-зонма кыскисны и кыскисны ас пытшканыс сӧстӧмысь-сӧстӧм сынӧдсӧ, и Кимлы кажитчис, мый лыс да лым кӧра чӧскыд сынӧдыс коддзӧдыштӧ сійӧс.

Зэв уна йӧзӧс пановтісны. И кыкнанныслы любӧ вӧлі шуркнитны-ордйӧдны кодӧскӧ; на вылӧ видзӧдысь, шензьысь-завидьтысь синъяскӧд вочаасигӧн любӧ вӧлі тӧдны, мый тэ ён, бура кужан исласьны, и мыйлакӧ кажитчис: нэм чӧжыд лоан татшӧмӧн... Тадзи пановтігъясӧ Света унаӧнкӧд кыпыда чолӧмасис, дерт, журналистыдлӧн уна тӧдсаяс эмӧсь, и Кимлы эз жӧ вӧв лӧсьыдтӧм тӧдны-кывны, мый буретш сійӧ, Ким, мунӧ тайӧ нылыскӧд; и торйӧн нин сэк, кор ӧткымынъяс сатшкысьлісны сы вылӧ юасьысь, тӧдмавны зільысь видзӧдласнаныс.

Тайӧ лызь туйӧдыс Ким пӧшти эз на ветлӧдлыв, ёнджыкасӧ найӧ котравлісны Краснӧй Гӧралань, а нӧшта тшӧкыдджыка петавлісны машинаӧн ыліджык вӧрӧ да паськыд лямпаясӧн шуръявлісны кианыс пищальӧн. Та вӧсна сійӧ эзджык тӧд татчӧс местаяссӧ. Регыд мысти найӧ петісны козъя вӧрысь паськыдкодь кушинӧ, шор увтасӧ. Буракӧ, тані весалӧмин — видз.

— Пенсионер чой тайӧ, — шуис Света. Сылӧн пӧсялӧм чужӧмыс ломзис сӧстӧм вирӧн, лым еджыд тугъя шапкасӧ вештӧма юр пыдӧс вылас, ньылӧдӧм кымӧсас лясӧмаӧсь сьӧд юрси пратьясыс.

— Мыйла нӧ «Пенсионер чой»? — шензьыштіс пошиктысь Ким.

— А видзӧд, кодъяс ёнджыкасӧ исласьӧны тані, — шуис Света.

Чойыс вӧлі кузь да алькӧс, сэні тырыс ӧтарӧ-мӧдарӧ гыисны олӧма йӧз — ёнджыкасӧ кызӧсь, ньӧжмыд вӧрасаӧсь. Да нӧшта посни челядь горзісны-исласисны.

— Ми татчӧ огӧ сувтлӧй, мунам водзӧ, — шуис Света.

— А кӧть и сувтан, исковтнытӧ он вермы: быть зурасян кодкӧ вылӧ, — сераліс Ким.

Лызь туйыс ӧні мӧдӧдчис кузь козъя вӧрӧд, вӧрсӧ юковтысь, рытывлань мунысь визирӧд. Тані йӧзыс лои этшаджык нин, паныдасьлісны сӧмын том йӧз.

— Быттьӧ эсійӧ кушинас кулӧм сувтӧдӧмаӧсь, коді кутӧ став пӧрысьсӧ да поснисӧ, — шуис Ким.

— Эн на серав, ачыд коркӧ пӧрысьман, — меліа шыасис Света; сылы воис сьӧлӧм вылас зонлӧн тадзи вежӧртӧмыс.

Сук козъя вӧрӧ шонді эз сидз, и тані вӧлі гажтӧмджык. Омӧльджыка исковтӧдіс и. Сы вӧсна мый лызь туйсӧ вӧлі ёнакодь серӧдӧма гылалӧм коз пу лыскӧн.

— Ой-ой-ой, мыйта лыскыс киссьӧма! Мыйла нӧ эськӧ тайӧ? Абу быттьӧ сотчӧма да... — чатрасис Света.

— Козйыд, буракӧ, тшӧтш вежӧ паськӧмсӧ, — шуис Ким. — Вӧрад тай быдӧн вежӧны паськӧмсӧ — пипу и кыдз, сьӧдбӧж и кӧч. И муыс ачыс. Буракӧ, вӧр-ваыс оз вермы овны татӧг, оз вермы овны асьсӧ ӧтарӧ выльмӧдтӧг.

— Но козйыс, козйыс кутшӧм! А? — век на шензис Света. — Видзӧднысӧ быттьӧ пыр веж, весиг тӧлын гажӧдӧ-мичмӧдӧ вӧрсӧ. А ачыс, вӧлӧм, пӧрччысьлӧ жӧ.

— Буракӧ, гусьӧникӧн, яндысьысь ныв моз, — шуис Ким, а Света серӧктіс.

— Интереснӧй пу — козйыд, — Кимлы вӧлі зэв окота сёрнитны Светакӧд. — Видзӧд кутшӧм стройнӧйӧсь да йылаӧсь найӧ. Мыйла эськӧ став козйыс йыла? Весиг медпӧрысьыс?

— Код тӧдас... Сэтшӧм нин модаыс налӧн.

— Козйыд пӧ кувтӧдзыс быдмӧ.

— Да? Вот эськӧ йӧзлы сідзи жӧ! — шуис Света.

— Тэнад сідз нин абу дженьыд тушаыд, — шуис Ким да дыр кежлӧ сибдыліс видзӧдласнас водзын мунысь вылӧ. Светалӧн плавкӧс пельпомъяса, вӧсни коска да гӧгрӧс бекъяса мыгӧрыс пӧсьӧдіс Кимлысь вирсӧ.

Ныв кежис лыскӧн серӧдӧм визир вылысь, и регыд найӧ петісны паськыд да югыд шор ковтысӧ, исковтны сэті лои нӧшта на нимкодь. Лыжияс исковтісны кыдзкӧ вывті нин гылыда, быттьӧ асьныс, ньӧти выныштчытӧг. И местаыс таті вӧлі зэв гажа, и шондіа, а найӧ кыкӧн, став вӧр пасьталаыс кыкӧн. Ӧні Света муніс тэрмасьтӧг, кузь воськолӧн, и кӧть Ким неуна мудзыштіс нин — ӧд асывнас сёйтӧг петіс — сьӧлӧм вылас вӧлі помтӧм лӧсьыд: и сыысь, мый лыжиясыс сэтшӧм шыльыда исковтісны, и сыысь, мый вӧрыс вӧлі шондіа да гажа и, дерт жӧ, сыысь, мый сы водзвылын вӧлі Света. Ким исковтіс, а ачыс чатрасис-видзӧдіс гӧгӧр. Вӧр весьтӧ кыпӧдчӧм шонді ӧні кень кодь вӧсни кымӧръяс сайын и эз ломзьы сэтшӧм яра, и тайӧ, гашкӧ и, вӧлі бурджык на, сы вӧсна мый йӧв кодь сӧстӧм лымйыс неуна сӧмын дзирдалыштіс зэв посньыдик киньясӧн, стеклӧ пызь моз. Ёна жӧ мича да шыльыд вӧлі тайӧ лымйыс! Ӧтилаын, кор снимайталісны ӧта-мӧднысӧ, Ким эз вермы кутчысьнысӧ да весиг шыльӧдыштіс лымсӧ первой чуня кепыся кинас, а сэсся и кепысьтӧгыс. Ӧти сайын и сёйыштіс лымсӧ, горшыс ёна косьмис да. Света казяліс тайӧс, тӧждысьӧмӧн ӧлӧдіс:

— Эн сёй лымсӧ пӧсьйывсьыд! Висьман.

— Горшӧй косьмӧ. Быттьӧ пӧкмелля вылӧ.

— Ті нӧ винасӧ ёна жӧ юанныд? — Светалы окота вӧлі шуны эз «ті», а «тэ», тӧдмавны Ким йылысь ӧтнас йылысь, но, думыштіс да, эз шу сідзсӧ.

— Гм... — Кимлы неокота асьсӧ омӧльтны Света водзын, но и эз вермы пӧръявны сійӧс да сьӧкыдпырысь шуис: — Шочиника овлӧ и сідзи...

— А ме чайті, тэ абу сэтшӧм...

Кимлы лои сэтшӧм яндзим виччысьтӧг шуӧм тайӧ кывъяссьыс, мый весиг пондыліс каитчыны исласьны мунӧмысь: «Кӧнкӧ, другъяс гажаа сьылӧны пызан сайын. Миля, гашкӧ, курыда ышлолалӧ. А меным, гажӧдчӧм пыдди, лоӧ кывзыны со кутшӧм кывъяс... А нинӧмла и гугӧдны тадзи сьӧлӧмӧс!»

Но кутшӧмкӧ тӧдтӧм вын тшӧктіс сылы водзӧ на вачкавны асьсӧ сьӧлӧм дойдалысь кывъясӧн:

— Ме эськӧ и гӧгӧрвоа тайӧс, — ышловзис Ким, — кутчыся. Но мукӧддырйиыс мынлӧ каличыс. Ме пытшкын олӧ быттьӧ кык морт. Ӧтиыс абу нин сэтшӧм йӧй, йӧз дінӧ абу чорыд сьӧлӧма ни. Зільӧ кыссьыны мичаджык олӧмлань, сӧстӧмджык олӧмлань. А мӧдыс, кор вермылӧ, мырдысьӧн тшӧктӧ зимогоритны, юны-гуляйтны, песны йӧй вынӧс.

Муныштісны чӧла. Со кӧчиль чеччалӧма туй вывсянь вӧрӧ. Снимайтам сылысь кок туйсӧ! А этайӧ коз увсӧ нӧ коді ёгӧсьтӧма? Дерт жӧ, ур килльысьӧма! Дыр чатрасисны багатыр кодь коз вылӧ, но аддзан ӧмӧй кодӧскӧ сылӧн пашкыр лапъяс костысь. А этайӧ сісь пу йылас нӧ ур жӧ али мый уджалӧма? Чатӧртісны юрнысӧ, чуймисны.

— Видзӧд, видзӧд! — бӧр нимкодьмис Света. — Кодкӧ нарошнӧ щель вӧчӧма? Аддзан, кольсӧ сэтчӧ топӧдӧма-сюйӧма! Сизь али мый?

— Сизь.

— Сійӧ тай зэв тӧлка вӧлӧма!

Света копыртчыліс да лэптіс кык коз коль. Ӧтиыс вӧлі вӧрӧдтӧм на, ыджыд пуля кодь топыд да шыльыд, а мӧдыс бонзьӧма-чошкысьӧма.

— Уджалӧма абу! — шензис ныв. Сійӧ дыр видлаліс небзьӧдӧм кольсӧ, сэсся радпырысь шуис: — Кык кӧйдыс тусь кольӧма жӧ!

— Наысь туй шӧрӧ быдмас кык коз, — шуис Ким. — Видзӧд, сизьыд тшӧтш отсалӧ вӧрыдлы паськавны. И вӧрзьӧдлытӧм коль со орччӧн. Уськӧдіс да дыш лои корсьнысӧ.

— Кыдзи ставыс йитчӧма ӧта-мӧдыскӧд. Да ӧд, Ким?

— Да.

— Тэд, буракӧ, дона жӧ вӧрыс?

— Сытӧг эськӧ гажтӧмджык вӧлі олӧмыд. Сійӧ быттьӧ весалӧ, бурмӧдӧ ловтӧ, тадзи ветлан да...

— А тэ эськӧ мый медъёна кӧсъян олӧмас?

— Ме? — Ким падмыліс виччысьтӧмысла. — Ме кӧсъя унджык тӧдны да аддзыны. Мыйкӧ бурджыкӧс вӧчны... И... и пӧся радейтны нылӧс...

— И немтор на эз збыльмы тайӧ кӧсйӧмъяссьыс?

— Эз на.

— Весиг бӧръяыс?

— Весиг сійӧ...

— Быттьӧ тэнад эз вӧвлыны ни абуӧсь матысса нывъясыс?

— Вӧвліны, мыйла эз... Но... шуи нин тай: мися, немся кӧсйӧм на эз збыльмы. Бӧръя каднас куті казявны тайӧс торйӧн нин ясыда да ёся.

Пурснитлӧны лым пытшкӧ бедьяс, небзьыштӧм юж чушкыштӧ лыжияс улын. Найӧ петісны паськыдкодь важ туй вылӧ, кодӧс, буракӧ, код тӧдас кор писькӧдлӧмаӧсь.

«Ӧддзӧмвывсьыд тай чистӧ висьтассис-а! — майшасьӧ Ким. — Но мый нӧ вӧчан, кор мӧд ногыс менам оз артмы сыкӧд».

Светалы любӧ, мый Кимкӧд сылӧн сёрниясыс пыр татшӧм веськыдӧсь, мый найӧ сы мында восьтӧны сылы, кыдз журналистлы. Таысь ӧтдор, сылы и кыдзи нывлы интереснӧ, лӧсьыд тадзсӧ сёрнитігӧн.

Посни вӧр тіль дінын Ким сувтіс да тусяпу куст вылӧ индігмоз шуис:

— Шойччыштам, меным колӧ выль пуртӧс вылӧ керыштны тусяпусӧ. Важыс, дедлӧн на лӧсьӧдлӧмаыс, киссьыны кутіс. Бӧр лэччигӧн босьтам сэсся.

— А мыйла нӧ буретш тайӧ пуыс колӧ?

— Сійӧ зэв ён, кокни и абу сирӧд дука. Ми ичӧт дырйи тусяпусьыд уна ньӧввуж вӧчлім. Сійӧ миянӧс ёна ворсӧдліс войнаӧн.

— А мыйла нӧ пуртӧссӧ пуысь колӧ вӧчны?

— Мичаджык лоӧ. Палитан-сотан, шыльӧдан стеклӧӧн, кутшӧмкӧ сер вӧчыштан — любӧ видзӧднытӧ.

— Но ӧд та вылӧ уна кад ковмас?

— Мый ёна унаыс — шойччӧм пыдди! Ме путӧ да пуа уджтӧ зэв радейта, кӧть эськӧ ӧні и кӧрт дорын уджала. — Ким пурскысис-пырис лыжинас небыд лымйӧ да кутіс тотшкӧдны-керавны пуртнас сой кызта кын тусяпу вож. Света гусьӧникӧн лӧсьӧдчис да чикнитіс-снимайтіс Кимӧс ноксянінас.

Сэсся ныла-зонма петісны паськыд кушинӧ.

— Пӧчинок кӧ вӧвлӧма? — шуис Ким.

— Да, Максимпоз. Кутшӧмкӧ пӧ Максим овлӧма.

Том вӧрӧн тільсявны заводитӧм кушиныс, буракӧ, вӧлі ёльлӧн зэв джуджыд керӧсӧн, сы вӧсна мый водзын шондіӧн югдӧдӧм вӧрыс тыдаліс быттьӧ увтасінын.

— Гажаин бӧрйылӧма, — шуис Ким мӧвпалана, овтӧм кушин вылӧ видзӧдігӧн сійӧс босьтіс гӧгӧрвотӧм норлун.

— Эз ӧд йӧйӧсь вӧвны коми дядьясыд. Эз жӧ думайттӧг овмӧдчыны сьӧд вӧр шӧрӧ.

— Да-а... Водзті, дерт, тані быдторйыс вӧлі: тшак и пув-чӧд, сьӧла и дозмӧр, видз и му... Но мыйта вын, кутшӧм характер, кутшӧм повтӧмлун да винёвлун колӧ мортлы, мед со тадзи ӧткӧн овмӧдчыны сьӧд вӧр шӧрӧ!

— И вермасьны сыкӧд олӧм вӧсна! — Света тшӧтш ыззис Кимлӧн кывъясысь. Тайӧ здукас нывлы кажитчис, мый тӧдтӧм Максимыс, коді коркӧ овмӧдчылӧма татчӧ, вӧлі Ким кодь жӧ томӧн, вынаӧн да быдтор вылӧ дасьӧн.

Кор Света да Ким воисны ыджыд чой йылӧ, сэні вӧліны вит-ӧ-квайт том морт. Буракӧ, пӧттӧдзыс нин исласьӧмаӧсь. Кимлысь видзӧдлассӧ кӧвъялісны лымйӧ сутшйӧдлӧм чегӧм лыжияс. Гашкӧ, кызь торпыриг вӧлі сэні. Лыжиясысь вӧчӧм тайӧ потшӧсыс быттьӧ ӧлӧдіс быдӧнӧс: «Другӧ, исковттӧдзыд думыштлы гортад бӧр мунӧм йылысь!»

— Помыс эм-ӧ чойыслӧн? — Ким юаліс зонъяслысь.

— Эм, мӧдар югыдас сӧмын, — воча серӧктіс ӧти.

Ким йӧткыштчис, лажыньтчыштіс и пырысь-пыр жӧ бура мавтӧм лыжиясыс чепӧсйисны крут да шыльыд лызь туйӧд ньӧввужысь мынӧм ньӧв моз. Ӧдйӧджык, ӧдйӧджык! Восьса пельясас кутіс уркйӧдлыны кыськӧ друг лоӧм тӧв. «Колӧма пельясӧс тупйыны...» — сёрмӧмӧн думыштіс сійӧ. Синъясыс тырисны синваӧн. Но чышкыштны найӧс оз позь, некор — колӧ быд здукӧ видзчысьны усьӧмысь. Лым бус пуркйӧ-резӧ чужӧмас. Джуджыдкодь гуранъясын вылӧкодь чеччӧдлӧ-люлльӧдлӧ. Кокъяс пружина кодьӧсь. Туша быттьӧ бордъясьӧма, сьӧлӧм тшӧтш нетшкысьӧ-лэбӧ морӧсын. Но мый тайӧ водзынас? Мый сьӧдӧдӧ лызь туй шӧрас? Мыр?! Вӧрзис...

— Эй, виччысь, таляла! — горӧдӧмыс ачыс петӧ вӧвлытӧм гораа, косялӧ вӧр-васӧ.

Кодкӧ патурликасис, путкыльтчис туй вылысь, здук кежлӧ паныдасьлісны завидьтысь синъясыс Кимлӧн кыпыдлунӧн ӧзйысь синъяскӧд... Водзӧ!.. Пыр ӧдйӧджык... Шочиника чиркнитлывлӧны бедьяс, тёпканъясті шлопкысьлӧны дзикӧдз ярмӧм лыжияс... Чукыль! Кутчысь, а то швачкысян козъясӧ. Пӧлыньтчыштам веськыдвыв... Лӧсьыд! Шутьлялӧ пельясын тӧв. И друг — шуть — нетшыштіс пӧсялӧм юрсьыс шапкасӧ... «Шуи, мися, коліс зэлӧдны!» Но нинӧм, он бергӧдчы. Ог на кынмӧй. Паныд кайысь-посйысьысь ныла-зонма нюмъялӧны: «Нинӧм, другӧ, шапкатӧгыд ӧдйӧджык лэбӧдӧ!» Но со чойыс мудзӧ жӧ крутасӧ усьны, вочасӧн алькӧсмӧ. Дурмылӧм лыжияс палялыштӧны, надзмӧдыштӧны синтӧм-пельтӧм лэбӧмсӧ. Кимлӧн вӧлись лигышмунӧны кокъясыс, пидзӧсъясыс заводитӧны тірзьыштны. Но сы пыдди сьӧлӧмыс радлӧ-чеччалӧ морӧсас, а юрас дзивкъялӧны нимкодьысь-нимкодь мӧвпъяс: «Эг усь!.. Эз чег лыжиӧй!»

Сувтӧм бӧрас думыштіс: «Исковтас-ӧ Света?» — А ныв со нин, вӧтӧдӧ нин сійӧс, бандзибъясыс ломалӧны, синъясыс югъялӧны лысваа сьӧд сэтӧр моз.

— О-ой! Кутшӧм лӧсьыд! — шудаа горзӧ Света. — Каям, ещӧ исковтам, Ким?

— Света, миян сиктын ӧти мужик вӧвлӧма и, тӧдан, мый сійӧ шулывлӧма? Век кӧ пӧ эськӧ праздник, да век кӧ пӧ эськӧ йӧз ордын, да век кӧ пӧ эськӧ чой горув...

— Асланьыс мудер вӧлӧма! — сераліс ныв.

А тыдавтӧм дзиб йывсянь пуля моз шуркйӧдлісны-воисны воча пыр выль и выль лыжникъяс, шудтӧмджыкъяс да кужтӧмджыкъяс тёпканъясын тімбыльтчылісны да кыдзсюрӧ некымын пӧв патурликасьлісны.

Света да Ким исковтісны ещӧ ӧтчыд. И Максимлӧн ен бара на видзис найӧс, эз лэдз усьны, эз чег налысь вильыд лыжинысӧ. Мӧдысьсӧ тӧвзьыштӧм бӧрын найӧ мунісны водзӧ лызь туйӧд да кыпӧдчисны зэв джуджыд да гӧгрӧс мыльк йылӧ, кысянь шондіӧн ойдӧдӧм вӧр-ваыс тыдаліс помтӧм саридз кодьӧн. Ныла-зонмалӧн эз на лӧньны сьӧлӧмъясныс ньӧв моз шуркйӧм-исковтӧмысь, а тані, гӧгрӧс дзиб йылын сулалігӧн, найӧ нӧшта на ёна кутісны ыпъявны, тырисны кутшӧмкӧ бордъя нимкодьлунӧн; кажитчис, мый ёнджыка кӧ чепӧсъян тасянь, он и тӧдлы, кутан лэбны-шывкъявны лӧзалысь, тулыс кежлӧ лӧсьӧдчысь вӧр весьтӧд.

— Буракӧ, лыжи мозыд немтор оз бордйӧд морттӧ, — шуис Ким морӧссьыс и став сӧнъяссьыс сӧстӧм, ловзьӧдысь вын кыліг. — Ни самолёт, ни машина, ни вӧв... Исковтан тадзи да быттьӧ выльысь чужан.

— Оз ӧд весьшӧрӧ йӧз мунны шойччыны лымйӧн тырӧм гӧраясӧ. — Светалӧн пӧсялӧм, кисьмӧм оз рӧмӧн ломалысь чужӧмыс вӧлі вӧвлытӧм кыпыд; тайӧ здукас дзикӧдз бурмӧм сьӧлӧма нывлы кажитчисны ёна шудтӧмӧсь найӧ, кодъяс асланыс дышысла оз тӧдлыны татшӧм нимкодьлунсӧ.

А уліын шыльквидзысь ёль ковтысыс, кодӧс вӧлі шебралӧма еджыд да няр кучик кодь шыльыд лымйӧн, чукйӧн тырӧма лӧзоват, синтӧ ёрысь югыдӧн. Джуджыд керӧсъясын вӧрыс абу нин тӧвся моз лым туктаяса, тӧвся серти кажитчӧ вежджыкӧн нин, сӧстӧмджыкӧн, и вӧрсьыс быттьӧ тшӧтш нин кылыштӧ тулыс дукыс.

И тайӧ помтӧм сӧстӧмлун пӧвстас Светалӧн думъясыс да лолыс лоины вӧвлытӧм сӧстӧмӧсь жӧ; и кодкӧ кӧ эськӧ тайӧ кыпыд здукас шуис сылы, мый му вылын, весиг тасянь матын, чужан карас, эм на неэтша лёктор, то Света эськӧ чуймис.


МӦД ЮКӦН


Кызь ӧтиӧд глава


Кор Ким, лыжияснас гольӧдчигтыр, пырис асланыс жырйӧ, Гена вӧлі гортын нин, пукаліс пызан сайын да зэв думыштчӧмӧн мыйкӧ визьйӧдліс тетрадьӧ. Вӧрса сӧстӧмлунӧн тырӧм, кыпалӧм лола Кимлы таысь кыдзкӧ весиг нелӧсьыд лоліс.

— Мусанов дядь шызьӧдіс талун, Кимка, — шуис Гена аслас думъясысь орӧдчытӧг на. — Асьсӧ кӧть талун жӧ капиталкаӧ мӧдӧд, а юрыс уджалӧ на. Шуӧ: мыйта трос пӧ запаньясын вӧйӧ-вошӧ, и кутшӧм сьӧкыд пӧ тросъяссӧ перйыны-лэптыны арын, мукӧдыс сой кызта да. А позьӧ пӧ машинаӧн, шуам, трелёвщик вылӧ лӧсьӧдны ыджыдджык барабан да каттьыны сэтчӧ троссӧ сунис тюрик вылӧ моз. А сэсся кранӧн лӧсьыдіника, мед оз дзугсьы, мынтӧдны-перйыны... Желляліс менӧ старикыд! Пукала со, жугла юрӧс... Быдлаӧ колӧ математика, код лешакыс сӧмын лӧсьӧдлӧма сійӧс. Кӧть сэсся тшӧтш пыр институтӧ, а? Кӧть нин сопромат да высшӧй математика велӧдӧм могысь.

— Талун юрсьыным кутам вӧтлыны став думъяс! — гажаа вочавидзис Ким.

Сэки вӧлись Гена мӧвпыштіс, кӧні да кытысь воис ёртыс. И таысь Игнатов кыкысь кызӧктыштіс.

— Талун тэа-меаӧс сизим час кежлӧ корисны Светаяс ордӧ пасйыны нывбаба праздник, — шуис Ким да сюся видзӧдліс, кыдзи мӧрччас другыслы тайӧ юӧрыс.

— Мый тэ, ме ог мун! — ырсмуніс Гена. — Мун, колӧкӧ, ӧтнад.

— Тэ кӧ он мун, и ме ог мун. А Светаыс кыкнаннымӧс корис тшӧтш и батьыс нимсянь.

— Дела!.. Мый нӧ ми сэн кутам вӧчны, мунам да? Сэні, кӧнкӧ, асланыс компания. Налӧн асланыс сёрни. Ог-ӧ ми лоӧй сэні каля чукӧрӧ веськалӧм ракаясӧн? Но тэтӧ, гашкӧ, шуам, онджык на...

— Ӧткодьӧсь, тэ кӧть ме...

— Дела!.. А кӧсйысин нин?

— Ме эг кӧсйысь! Но Светаыс эз и кут кывзыны огйӧдлӧмӧс.

— Сідзкӧ, мӧдім карӧ — корсьны пӧдарки, — дугдіс падъявны Игнатов.

Светаяс ордӧ найӧ воисны сизим час да джынйын. Эз, найӧ эз вунӧдны урчитӧм кадсӧ, эз кикурӧда йӧзӧн вӧвны ни; налы вӧлі яндзим тэрмасьнысӧ — медводзӧн пӧ ещӧ локсяс. А гӧститнытӧ медводзӧн локтысьыд тай асьсӧ век нин мыжаджыкӧн чайтӧ: думыштасны пӧ ещӧ, мый сылы медуна колӧ.

Другъяс вежӧмаӧсь нин тӧвся пальтонысӧ, пасьталӧмаӧсь тулыс-арын новланӧс, кыкнанныс чибльӧг модаа сьӧд шапкааӧсь. Звӧнок шы вылӧ налы восьтыны петіс Николай Васильевич, мыйӧн казяліс, кодъяс пырисны, мугов чужӧмыс — а сылӧн вӧлі ывла вылын дырӧн овлысьлӧн гожъялӧм-дубитчӧм чужӧм — дзоньнас тыри сьӧлӧмсянь петысь радлунӧн.

— Но и бур, мый воинныд! Чолӧм-здорово... — нимкодя шуаліс Николай Васильевич зонъяслы пӧрччысьны да пальтонысӧ ӧшлыны отсасиг. — Ме жӧ шуи: мися, оз вермыны не кежавны.

— Тайӧ — Гена, — заводитліс тӧдмӧдны Ким.

— Тӧда, тӧда, муса пи... Вай пырӧй жырйӧ, виччысьӧны нин войтырыс. А кыдзи тэ асьтӧ кылан, Ким? Юрыд кыдзи?

— Нинӧм! Менам юрлы не татшӧмтор нин вичмыліс.

Ыджыд жырйӧ ӧдзӧс дорсянь Николай Васильевич кыпыда горӧдіс:

— Видзӧдӧй, кутшӧм «гвардеечьясӧс» ме вайӧді!

Кыкнан «гвардеечыс» вӧліны бур сьӧд костюмаӧсь, лым еджыд дӧрӧмаӧсь, кодъясӧс шӧрӧдыс юковтӧмаӧсь сьӧд регатъяс; кыкнанныслӧн векни ныра ботинкиясыс югъялісны.

— Бур рыт, — яндысьӧмысла тіралыштысь гӧлӧсӧн, юрсӧ копыртыштӧмӧн шуис тушааджык «гвардеечыс» — Ким.

— Нывбабаяслӧн праздникӧн тіянӧс! — шуис и мӧдыс.

Ставӧн видзӧдісны на вылӧ: лада мыгӧра да шыльыд чужӧма том йӧз вылад тай век любӧпырысь видзӧдсьӧ. А тайӧясӧс быдӧн нин виччысис, и быдӧн аслас чайтӧм серти быттьӧ водзвыв аддзис нин найӧс.

Света буретш вӧлі петӧ мӧд жырйысь и, «гвардеечьясӧс» казялӧм бӧрын, шензьӧмӧн сувтовкерліс: ӧтлаынсӧ найӧ кыдзкӧ зэв нин тӧдчана петкӧдчисны. На вылӧ видзӧдігӧн ныв вежӧрын пырысь-пыр жӧ вирдыштісны помӧдз стӧчмӧдтӧм на мӧвпъяс сы йылысь, мый со пӧ кутшӧм йӧз пыкӧны олӧмсӧ, мый кор пӧ эмӧсь татшӧм йӧзыс, асьтӧ лӧсьыдджыка кылан му вылас.

А «гвардеечьяс» сулалісны орччӧн, кыйкнитавлісны синъяснаныс ӧтарӧ-мӧдарӧ, кызӧктышталісны, эз тӧдны, мый водзӧ вӧчны. Сэки Света тӧдмӧдіс найӧс мукӧд гӧсьтъяскӧд. Наысь кындзи воӧмъясыс тані вӧліны куимӧн: Максим Сахаров, Рудольф Надуткин да Катя Шомысова.

Максим бур тӧдсаяслы моз чургӧдіс зонъяслы еджыд да небыд кисӧ, кодӧс Кимлы жаль вӧлі весиг лючкиджык топӧдлыны кӧртӧн вӧдитчӧмысь чорзьӧм кабырнас, а мӧд кинас Максим ышӧданаа тапкӧдышталіс кыкнаннысӧ мышкӧдыс. Эз тӧдтӧмӧ пуксьы и Рудольф, сійӧ нимтіс зонъясӧс «дорогушаясӧн» да шмонитӧмӧн велӧдіс, мед водзӧ вылӧ найӧ некор эз сёрмӧдчыны пир вылӧ. Катя, гожся шонді кодь вашъялысь чужӧма, тшӧтш жӧ уськӧдчис паныд; сійӧ вӧлі гӧгрӧс, шыльыд и зэв ыджыд морӧсъяса.

Николай Васильевич том морт моз шуркнитіс комнатасянь кухняӧ, мыйкӧ нӧшта на вайис сёян-юанӧн сідз нин тырӧм пызан вылӧ. Пӧрысь мамыс тшӧтш ноксис и. Мыйкӧ пуктас пызан вылӧ, сэсся сувтлӧмӧн вель дыр видзӧдлас том йӧз вылӧ ассьыс мӧвпсӧ мӧвпалысь синъясӧн.

Кор кутісны пуксьӧдны пызан сайӧ, сёрмыштӧм зонъяс видзӧдлісны ӧта-мӧд выланыс, бара кызӧктыштісны, сэсся Гена шуис:

— Тані ми, праздникаддза, ӧттор-мӧдтор... вайим кӧзяйкаяслы.

— Да мый ті! — горӧдіс Света. — Нинӧм оз ков!..

Но Ким разис газет тубрас, перйис сэтысь кӧр куысь вурӧм мичаник тяпи. — Тайӧ тіянлы, бабуш.

Баб босьтіс мыччӧмасӧ, шӧйӧвошӧмӧн видзӧдалӧ то ӧти вылӧ, то мӧд вылӧ.

— Менымсӧ нин мыйла? — пондіс шуавны. — Пӧрысьыслы... — Топӧдіс сэсся тяпияссӧ небыд гӧннас кос морӧс бердас, чышкыштіс сӧнӧд килутшнас синъяссӧ. — Сё пасибӧ инӧ, кагаяс. Дай Бог здоровье тіянлы... Кувны кута да, тайӧн и тшӧкта дзебны, мед шоныдджык лоӧ сэні...

— А тайӧ Светалы, — шуис Гена мичаник кӧрӧбка восьтігтыр. Сэсся и перйис сэтысь вӧсньыдик эзысь чеп йылын ӧшалысь ыджыд кулон.

— Йӧйминныд кӧ ті-а! — шӧйӧвошис ныв. — Абу ӧд ме барыня. Татшӧм донатор он жӧ ньӧбӧй! Буракӧ, янтарь тайӧ?

— Ми чайтім, тіянлы лӧсялас, — кыкнан нимсяньыс сёрнитіс Гена. Кыкнанныс пырысь-пыр жӧ казялісны, мый Светалы кажитчис налӧн бӧрйӧмторйыс, и таысь налы лои зэв нимкодь.

— Мый эськӧ мем оз лӧсяв да, — водзсасис на Света.

— Тайӧ — главнӧйыс, — шуис Ким.

— Гашкӧ, копыртыштланныд юрнытӧ? — шуис Гена.

— А мый, копырта ӧд... Ме ӧд мичатор вылад зэв лют.

Света копыртыштіс югъявмӧн сьӧд юрсиа юрсӧ, и Гена ӧшӧдіс сылы сьыліас кулонсӧ. Вӧсньыдик эзысь чептыс небыда инмӧдчис нывлӧн еджыд сьылі бердӧ, а кор Света веськӧдчис да сувтіс люстралы паныдӧн, ыджыд восьсаина морӧсас пуксьӧм янтарыс дзирдыштіс ниалӧн югыд сир войт моз.

— Светка! Сэтшӧма мунӧ тэныд! — медводзӧн шыасис Катя.

Татшӧм сяма горӧдӧмыс ёнджыка на вӧзйысис зонъяслӧн. Ӧд зон сьӧлӧмыд авъя ныв дырйиыд дзикӧдз вошлӧ ас выйсьыс: пӧсявлӧ и кӧдзавлӧ, ыдждывлӧ и топавлӧ... Лавсан сора еджыд нойысь вурӧм платтьӧа, кодлысь кӧлыс да зеп доръяссӧ дорӧсалӧма сьӧд бархат визьӧн, джуджыд кокбӧрляа еджыд туплиа, кыпыдлунӧн ӧзйысь сӧстӧм чужӧма Света талун вӧлі лӧсьыд мыгӧра юсь кодьӧн, коді ылі муясысь бӧр воӧма Войвылӧ, чужанінас, кӧні сійӧс виччысьӧ радейтчӧм да шуд.

Пызан сайын медводдза тост тшӧктісны висьтавны Максимлы, тэнад пӧ медлӧсьыда артмас. Сійӧ сувтіс — гажа и долыд — кудриа сьӧд юрсиыс синмӧдзыс лэччӧма, негырысь тӧлка синъясыс шоныда читкырасьӧны.

— Татшӧм луннад абу и кокни висьтавны тосттӧ, — шуис Максим, югыд больясӧн ворсысь шампанскӧй вылӧ видзӧдіг, сылӧн неыджыд вомысь шыясыс петісны эз дзик ясыда, быттьӧ кывйыс торксьыштіс, но ме век жӧ шуа дженьыдика:


Лэптам вай бокалъяс вылӧдз —

Таысь оз кӧ дивит Света —

Налы копыртчылам улӧдз,

Коді йӧзлы олӧм сетӧ!


— Браво! Ура! — горӧдісны пызан сайын пукалысьяс да сувтлісны. Света шудаа сераліс.

«Вот мутиыд, кодакості сэтшӧм бура лӧсьӧдіс!» — чуймыштіс Ким.

Сэсся юисны тшӧтш и на вӧсна, кодъястӧг нывбабаяс ӧдвакӧ эськӧ вермисны сетны выль олӧмсӧ.

Уна лыда закускаяс вылӧ видзӧдтӧг ставӧн медводз уськӧдчисны свежӧй налим юква вылӧ; Николай Васильевич вайис зэв ыджыд миска, кытысь паркйис сэтшӧм чӧскыд кӧр, мый том йӧз тӧдлытӧг кылӧдісны дульнысӧ.

— Вот добра! — шуис Гена; ачыс чери кыйысь, тӧвбыднад сійӧ, буракӧ, ёна нин гажтӧмтчӧма свежӧй юкваысь. — Ті нӧ тӧвнас кыйсянныд жӧ, Николай Васильевич?

— Омӧлика. Нёль-ӧ-вит продольник шыбитӧма йи улӧ.

— Коньӧр улӧ сетчӧ! — вузаліс батьсӧ Света. — Тӧвбыд на свежӧй чери сёйим.

— Николай Васильевич, сюсь мортыд, кӧть ваас пыралас да куталас, но черитӧгыд оз лок, — ас морт моз шуис Максим.

Гена да Николай Васильевич панісны сёрни тӧвся чери кыйӧм йылысь.

Кимкӧд орччӧн, веськыдладорсяньыс, пукаліс баб. Сійӧ тшӧтш неуна юыштіс шампанскӧй да, буракӧ, гажмыштіс. Виччысьтӧг баб босьтіс Кимлысь кисӧ аслас кос киясӧ да меліа пондіс шыльӧдны кикарсӧ. Баблы, тыдалӧ, лӧсьыд вӧлі кывны аслас ыркалӧм кинас том мортлысь пӧсь вир-яйсӧ.

— Ме тэнӧ ёнджыка любита Максьӧсяысь, — виччысьтӧг шӧпнитіс баб Кимлы пеляс. — Тэ сэтшӧм мича да бур...

Ким весиг гӧрдӧдыштіс, оз куж мый шуны. Но век жӧ шмонитанаа думыштіс: «Вот эськӧ тадзсӧ кӧ сёрнитіс внучкаыд тэнад!»

Юисны коньяк. Лыжиӧн исласьӧмысь мудзӧм бӧрын Кимлы зэв лӧсьыд лои. И торйӧн нин сыысь, мый пызан сайын некод эз ышнясь, ставныс вӧліны ӧткодьӧсь, найӧс, заводсаясӧс, некод эз ӧтдорт. Выль тӧдса зонъяс юӧмысь эз бӧрыньтчыны ни — Максим и Рудольф зэв жӧ чӧскыдпырысь кымыньтлісны румкаяссӧ. Сӧмын тай Николай Васильевич мудеритіс, румкасьыс сійӧ чурснитлывліс зэв ичӧтикаӧн да выльысьсӧ сӧмын тыртыштавліс. Кысь нин пӧ меным тіян бӧрся вӧтчыны. Ті пӧ ме вылӧ эн видзӧдӧй...

Кор бара кутісны кисьтавны коньяк, Гена ки пыдӧснас тупкис ассьыс румкасӧ:

— Ме сэсся ог, пытшкӧсын шеваыс шуӧ: тырмас пӧ.

— Ютӧм улӧ кӧсъян сетчыны? — наяна тувйыштіс Рудольф, коді вӧлі тӧдчымӧн нин гажа.

— Мыйла нӧ... — сьӧлӧмсяньыс сёрнитіс Гена. — Збыль оз ков. Железнӧя шуа.

— Сійӧ пыр татшӧм, — дорйис другсӧ Ким. — Коддзытӧдзыс некор оз ю. — Кимлы вӧлі нимкодь Гена вӧсна. Аслыс сылы окота на вӧлі юыштны тайӧ шань войтырыскӧд, но вывтіасьнысӧ йӧз дорын эз жӧ лысьт.

— Кутшӧм нӧ тэ рабочӧй класс тадзинад! — дивитіс Генаӧс Рудольф. — Кутшӧм нӧ тэ диктатор, дорогуша?

— Ме вот эськӧн йӧктышті, — рама нюмъялігтыр шуис Гена. — Меным, юыштӧм бӧрад, зэв окота гажӧдчыны.

— Кутам йӧктыны! Правильнӧ, Гена! — кыпыда шуис Света ки пыдӧсъяснас воча кучкалігтыр. Ныв тэрыба включитіс радиола, матыстчис Гена дінӧ, и найӧ мӧдісны лайкыда кывтны вальс шыяс улын; ӧтыджда тушааӧсь, ӧтиыс юсь кодь еджыд, мӧдыс чукчи кодь сьӧд, кыкнанныс вӧліны зэв мастерӧсь йӧктыны и пырысь-пыр жӧ гӧгӧрвоисны ӧта-мӧднысӧ да, воча нюмъялігтыр, шуркъялісны-бергалісны, а бокисяньыс кажитчис, мый йӧктысьяслӧн кокъясныс оз и инмавны джоджас, найӧс новлӧдлӧ-гартӧ гуся вильыш тӧв ныр.

На вылӧ видзӧдӧмысь Кимлӧн тшӧтш луддзисны кокъясыс, и сійӧ корис йӧктыны Катяӧс. Катя сылы вӧлі сӧмын пельпомӧдзыс, нывлӧн яя киыс вӧлі чорзьыштӧм, тӧрытъя тупӧсь кодь топыд, а ён морӧсыс пыр ӧтарӧ зырӧдыштіс Кимӧс. Но аслас кыз яй вылӧ видзӧдтӧг Катя бергаліс кокниа, ёна кокньыдджыка Ким дорысь, коді некор эз вӧвлы бур йӧктысьӧн. «Уна и вын талӧн! — думайтіс аслас пӧв йывсьыс зон. — Кыдзи бара такӧд лӧсялӧ жебиник Рудольфыс-а?..»

Кор бара на ставӧн лӧсялісны пызан сайӧ, Максим юаліс заводсаяслысь:

— Зонъяс, а тіянлы лӧсьыда-ӧ овсьӧ му вылас? Сӧмын веськыда, а?

Ставӧн чошкӧдісны пельнысӧ. Найӧ, кодъяс бура тӧдісны Максимӧс, пыр жӧ думыштісны: бара пӧ, буракӧ, пондісны сьӧлӧмсӧ нӧйтны некор куслытӧм думъясыс. Заводсаяслы жӧ кажитчис, мый тайӧ сёрнисӧ эз пырмунігмоз панны, мый тайӧ йӧзыс налӧн сёрни серти кӧсйӧны бурджыка донъявны найӧс, — и эз ёна тэрмасьны воча кывнас.

— Ме, ас пайысь, олӧм вылас ог норась, — шуис Гена.

— Хм... тадзтӧ ӧд и видз вылын ризъялысь чань вермис эськӧ шуны, кынӧмыс кӧ пӧт, — нюмъялігтыр шуис Максим.

Света лыйыштіс Максимӧс тэрыб видзӧдласнас да ӧлӧданаа кызӧктыштіс.

Гена, дӧзмытӧг, воча нюммуніс Максимлы:

— Вермис эськӧ да... Толькӧ ӧд, чаньыдлы, ме чайта, любӧ сӧмын пӧт кынӧм вӧснаыс... А ми нимкодясям тшӧтш и сэк, кор ӧдйӧ да бура дизель артмас... Железнӧя шуа... Кор йӧзыс ошкыштасны: зумыда пӧ муркӧдчӧ тіян вӧчӧмаыд...

— Но ӧд быд лун ӧти и сійӧ жӧ тор...

— Ме чайта, му вылас унджык йӧзыс пыр ӧтиторджык и вӧчӧны, — шуис Гена кымӧссӧ гырысь чукыръясӧ кӧрыштӧмӧн. — И та вӧсна быдӧн, велалас да, бурджыка и унджык вӧчӧ.

— Но абу-ӧ гажтӧм лунысь-лун куш сӧмын гайкаяс зэлӧдавны? — водзӧ на сюйсис Максим.

— Мыйла нӧ сӧмын гайкаяс? — вашъяліс Гена. — Дизельыд либӧ тракторыд не сӧмын гайкаясысь да болтъясысь артмӧны. Мед чукӧртны сійӧс да вӧрзьӧдны места вывсьыс, не этша жӧ колӧ тӧдны да сяммыны.

— И сьӧлӧмыд бурмылӧ, ме чайта, не омӧльджыка ті вок, газетчиклӧн серти! — вывтіджык пӧся шыасис Ким; татшӧм сёрнисьыс сылӧн пондіс нин ырзьыны лолыс, весигтӧ пель бокъясыс гӧрдӧдісны. — Тіян пиысь мукӧдыс тай куш сӧмын зуд кодь статьяяс жӧ гындӧны, жугйысь пӧжалӧм тупӧсь кодьӧс ли... Кодъясысь пӧсь ни кӧдзыд йӧзыслы... Некыті оз вӧрзьыв — ни вежӧр, ни лов... Шуам, нюжӧдасны-гындасны сы йылысь, кыдзи сійӧ жӧ Генаыс тыртӧ нормасӧ 105 процент вылӧ... Тайӧ нӧ сьӧлӧм бурмӧдана удж?

Чорыд кывъяс артмисны Кимлӧн. Но кватитчис сійӧ шуӧм бӧрас нин. Друг ыззьысь сьӧлӧмыс неӧтчыд нин «кӧмӧдліс» сійӧс тадзи... Пӧсь яндзим шымыртіс зонмӧс: «Корисны бур мортӧс моз... А ме...»

Мыйкӧ дыра кежлӧ чӧв-лӧнь пуксьыліс, а сэсся гажаа горӧдіс Рудольф:

— Кӧть и ёна солалӧмӧн шуӧма, но — грандиознӧй!

Максим шоныда видзӧдліс шӧйӧвошӧм зон вылӧ:

— Ким, ме ӧд ог кӧсйы шуны, мый став газетчикъясыс шудаӧсь. Мый ассьыныс уджсӧ найӧ век вӧчӧны сьӧлӧмсяньыс, мый збыльысь творчество ыпъялӧ сэки налӧн. Эк, милый мой, унаысь на ковмылӧ гижны сійӧс, мыйысь ньӧти оз бурмы лолыд. Ме ог кӧсйы омӧльтны и тіянлысь уджнытӧ... Ме сӧмын юала: мися, интереснӧя-ӧ овсьӧ тіянлы?..

«Тайӧ — зэв тӧлка и зэв шань морт!» — шоналӧм сьӧлӧмӧн думыштіс Максим йылысь Ким; поэтлӧн авъя сёрниыс сайкӧдыштіс яндзимӧн шымыртӧм зонмӧс.

— Татшӧмтор вылад пырысь-пыртӧ он и вочавидз, — другыслы отсӧг вылӧ воис Гена. — Абу велалӧмаӧсь ми лӧсьыдатӧ сёрнитны, миянлы эськӧ киӧнджык мыйкӧ песны-вӧчны. — Гена кабралыштіс негырысь сӧнӧд кияссӧ. — Но, часлы, кӧть шуа татшӧмтор. Вот, шуам, босьтам менӧ. Шуам, муна ме заводӧд — а сійӧ миян ёна нин паськаліс, йӧзыс код тӧдас нин мыйта! — муна, а мекӧд быдӧн чолӧмасьӧ. Мукӧдсӧ ачым ог тӧд, а чолӧмасьӧны. И оз сідз-тадз, оз мырдысьӧн, а бурысь. Кӧть директор, кӧть коді... Любӧй! И оз сӧмын чолӧмасьны, а, матыстчасны да, сёрнитыштасны на... Ыджыд-ӧ ме шплинт, а пыдди пуктӧны. Сы вӧсна мый дас вонад мыйкӧ, тыдалӧ, бурсӧ вӧчсьӧма жӧ нин. Вот ме и шуа: муна, мися, заводӧд и сэтшӧм нимкодь — мортӧн ачымӧс кыла... Ті сӧмын энӧ сералӧй, сё збыль тайӧ. Кыдзкӧ сьӧлӧм бурмымӧн ачымӧс мортӧн кыла, колана мортӧн... Железнӧя шуа...

Николай Васильевич, тэрыб мортыд, чепӧсйис Геналань да пондіс кутлыны сылысь кияссӧ, шуавны:

— Зэв лада висьталін, муса пи! Зэв лада...

Света, кодлӧн вӧрзис жӧ сьӧлӧмыс, друг думыштіс: «Колӧ Генаыслы тшӧктыны тадзи жӧ сёрнитны шышкалысь зонъяс водзын!»

— А тэ, Ким, тэ нӧ тадзи жӧ асьтӧ кылан? — водзӧ юасис Максим.

— Ме? — Ким курыштіс-сыныштіс кинас сук веж юрсисӧ, сылы эз нин вӧв окота сёрнитны — бара мыйкӧ не сідзи шусяс, но ставӧн видзӧдісны сы вылӧ, виччысисны, и сійӧ мырдысьӧн лӧньӧдыштіс асьсӧ, зілис кутны мӧвпъясыслысь лэбӧмсӧ зэлыдджык дом йылын. — Ме? Ме заводын эг на Генка мындасӧ вӧч, мед сы моз жӧ ачымӧс кывны. Сы мында сямлунӧй абу на ни. Сійӧ ӧд миян — Его Величество Геннадий І, моторъяслӧн король. — Ким ачыс медводз нюммуніс тадзсӧ ыдждӧдлӧмысь, а Гена сӧмын пӧлньӧдлыштіс юрнас: мӧдӧдчис пӧ лӧсьӧдлыны...

— Тэ ас йывсьыд, ас йывсьыд шу, — корис Максим.

— Метӧ ола... Уджала, ог вись...

— Сідзкӧ, ставыс тырмӧ тэныд — немтор сэсся оз и ков?

— Эг шу ме сідзисӧ да. Тадзинад буретш и пӧран «ризъялысь чаняд», код йылысь тай тэ шуин.

— Мый нӧ либӧ тэныд оз тырмы?

Кимӧс бара на пондіс ыззьӧдны тайӧ сёрниыс, сійӧ эз и казявлы, кыдзи бӧр личалыштіс зэлӧдӧм домыс.

— А ныж на ме олӧмас.

— Ныж?

— Да но... Менам, кыдз мортлӧн, быд дор зэв на ныж.

— И лёк тайӧ?

— Да... Гӧльмӧдӧ олӧмтӧ.

— Мый нӧ либӧ колӧ вӧчны?

— Быд дор лоӧ ӧтырышъя зудъявны-лэчтыны, мед сійӧ бритва кодьӧн либӧ шыла кодьӧн лои. Мед олӧмас быдлаӧ пыдӧджык сатшкысис.

— Тайӧс вӧчны — сӧвмӧдны да, ме эськӧ шуи, выльмӧдны асьтӧ — зэв абу кокнитор. Кӧсйӧмсянь да артмӧмӧдз тані лёка ыджыд костыс, — эз лэччысь Максим.

— Ме тӧда, — шуис Ким, мӧвпӧн тырӧм синъясыс сылӧн лапнитлывтӧг, аддзытӧма видзӧдісны быттьӧ Максим пыр. — Ме тӧда тайӧс, — выльысь шуис Ким. — Но видлӧмысь лёкыс оз ло... Батьӧ да мамӧ меным сетлӧмаӧсь абу нин туйтӧм вир-яй, вежӧртор тшӧтш и. Мукӧдторыс — ме сайын, ас сайын. Верма кӧ — верма, а ог кӧ... Ӧні нинӧмла водзвыв тунавны!

— Мотортӧ лунысь-лун вӧчӧмыд оз-ӧ торкав таысь?

— Ӧні тай отсасьӧ на-а.

— Ог гӧгӧрво, кутшӧм ногӧн? — Максим збыльысь чуймыштӧма.

— Кыдз тэд шуны... — Ким, пикӧ воӧм морт моз, гежмаліс видзӧдласнас налысь сёрнисӧ сюся кывзысьясӧс, а сэк кості ырзьӧм вежӧрыс этшсьыс петмӧн корсяліс сэтшӧмторъяс, кодъяс эськӧ медъёна подулалісны сӧмын на висьталӧм мӧвпсӧ. — Но, шуам, заводын ме буракодь нин куті тӧдны двигательяс, техника дінӧ сибалі. Тайӧ нӧ омӧль? Ме чайта, ӧнія кадӧ овны техника гӧгӧрвотӧг — абу тыр вира олӧм. А водзті, пӧрӧдчигӧн, ме, позьӧ шуны, сідзи и олі. Мӧд-кӧ, заводын ме став сьӧлӧмӧн, став вир-яйӧн гӧгӧрвои, мый сэтшӧмыс уна йӧза коллектив. Мый ыджда вын сійӧ! Дерт, ме и водзті нин кутшӧмакӧ тӧдлі тайӧс, сы вӧсна мый, кыдз сӧмын помнита, век нин йӧз дінын вӧлі, но ӧнія кодясӧ лолӧй некор на эз бурмывлы йӧзкӧд ӧтлаын олӧм-уджалӧмысь... А коймӧд-кӧ, тані ме первойысь тӧдмалі, кутшӧмӧн овлӧ мужичӧйяс костын збыльысь дружбаыс...

Кывзысьяс пӧвстысь быдӧн гӧгӧрвоис, кодлы инмӧны Кимлӧн бӧръя кывъясыс, — ставӧн тӧдлытӧг бергӧдчыштісны Гена Игнатовлань. Моторъяслӧн король пукаліс гырддзаӧн пыкӧм ки вылас юрсӧ лэдзӧмӧн, синъясыс эз тыдавны, и оз вӧлі позь тӧдмавны, мый вӧчсьӧ тайӧ здукас сылӧн, туланлӧн кодь кос да винёв, вир-яй пытшкын.

А ыззьӧм Кимлы чайтсис, мый эз на куж лючкисӧ эскӧдны выль тӧдсаяссӧ — а зэв окота вӧлі эскӧднысӧ! — и сійӧ пӧся содтіс:

— Ме чайта, он кӧ понды вина юӧм вылӧ сетчыны да кыдзисюрӧ лотйыны кадтӧ, быдторсӧ позяс вӧчны... Кӧть сэсся кӧн эн уджав — редакцияын кӧть заводын... А мый нӧ? Суткиын кызь нёль час! Уджалан сӧмын кӧкъямыс час. Но, шуам, сизим час узян, час-мӧд сёйӧм-юӧм вылӧ... И ещӧ на мыйта кад кольӧ! А сэсся — кык шойччан лун. Быдса кык лун!.. Тайӧ, ме ногӧн, миян олӧмын донъявны позьтӧм буртор!.. Ме, рабочӧй морт, тіян моз жӧ верма мунны библиотекаӧ, босьтны да лыддьыны любӧй книга... Ме верма мунны театрӧ, видзӧдны любӧй спектакль, кывзыны любӧй музыка. Ме верма нимкодясьны художникъяслӧн уджъясӧн... Отпуск дырйи ме верма ветлыны любӧйлаӧ — шоныд море дорӧ и йиа гӧраяс вылӧ... Войдӧр во ме туристалі Чехословакияын... А водзӧ кежлӧ, сьӧм чукӧртышта да, гашкӧ, и Европа гӧгӧр кытшовта... А мый? — Ким сьӧлӧмсяньыс нюммуніс.

— Но, дорогушаяс, шензьӧдінныд ті менӧ! — кыз ӧчки стеклӧӧн ыдждӧдӧм синъяссӧ наяна читкыралігтыр шуис Рудольф. — Кывзан тіянлысь, и артмӧ, мый заводад тіян уджалӧны толькӧ корольяс да святӧйяс, да великӧй трезвенникъяс.

Заводсаяс шӧйӧвошӧмӧн видзӧдлісны ӧта-мӧд выланыс.

— Некод оз шу тадзисӧ, — нурбыльтіс сэсся Ким.

— Быд дивӧыс на жӧ миян эм, — шуис Гена. — Неважӧн на со цехысь ӧти юысьӧс вӧтлім. Сідзсӧ зэв сяммысь морт, моторъястӧ железнӧя тӧдӧ, но юӧ. Ӧддзас да, лун-мӧд-коймӧд пылляс. А сэсся, локтас да, гайка оз вермы зэлӧдны, киясыс тірзьӧны. Тайӧ нӧ уджалысь!.. Брак петавлӧ, рекламацияяс воалӧны... Но кызвыннас войтырыс зэв шань. Ӧд миян унджыкыс велӧдчӧ — коді заочнӧя институтын, коді рытъя школа помалӧ...

— Тэ велӧдчан жӧ? — тэрыба юаліс Максим, кодлысь вежӧрсӧ гильӧдіс нин выль мӧвп.

— Ӧні ог, кольӧм во помалі средньӧй школа. Таво Ким помалӧ.

— Зэв бур, — шуис Максим. — Но вот тэ, Гена, тшӧтш пыран институтӧ. Кутшӧм думъясӧн эськӧ тэ сэтчӧ пыран медъёнасӧ? Гашкӧ, мед лоны инженерӧн? Заводса директорӧн? А гашкӧ, и министрӧн?

— Но, шуан жӧ тэ! — серӧктіс Гена.

— А мый? Не нэм чӧжыд жӧ станок дорын сулавны. Кӧнкӧ ӧд ӧні нин волӧ дум: пӧрысьладор пӧ сьӧкыд лоӧ.

— Ме, Максим, пыра жӧ институтас, ёнджыкасӧ сы понда, мед велӧдны сопромат да высшӧй математика, — шуис Гена. — Мед эськӧ ачым кужи вӧчны став расчётсӧ... А директорӧн лоны ме ог кӧсйы. Бурджык лоны сямаджык слесарӧн, чем урӧс директорӧн.

— Он кӧсйы, али он вермы да сы вӧсна? — эз лэдзчысь Максим.

— Оз кӧ кыскы, мыйла асьтӧ мырдӧнавны, — шуис Игнатов. — Ме ачымӧс тӧда, кутшӧм ме морт, мый вылӧ туяджык... Ӧні, карӧд мунігӧн, частӧ паныдасьлӧны менам вӧвлӧм ученикъяс. Коді инженерӧн лои, коді спортивнӧй деятельӧн, а ӧти весиг лекторалӧ. Но и мед. Ме налы ньӧти ог завидьты, железнӧя шуа. Быдӧнлӧн аслас туй. Менам аслам жӧ. Вӧчны дизельяс ньӧти абу лёкджык, шуам, лекция лыддьӧм дорысь.

Максим кузя видзӧдліс Гена вылӧ, сэсся и Ким вылӧ тшӧтш, шуис тӧдчымӧн вежсьӧм гӧлӧсӧн:

— А кыланныд, зонъяс, меным окота лои кыпӧдны тіян вӧсна тост... — А кор мӧдъясыс виччысьтӧмысла бергӧдчисны сылань, содтіс: — Кыпӧдны сы вӧсна, мый ті буретш татшӧмӧсь... Кужысь-сяммысьӧсь, и сэк жӧ тшӧтш и олӧмсӧ бура кылысьӧсь... Да, да, чӧрт возьми, тшӧтш и олӧмсӧ бура кылысьӧсь!.. А тайӧс ме, гашкӧ и, медъёна пыдди пукта мортыдлысь... Ёна ті бурмӧдінныд менсьым сьӧлӧмӧс... А то ме ӧнӧдз тӧдлі уна сэтшӧм рабочӧйӧс, кодъяс асланыс ворйысь кындзи немтор оз аддзыны. И оз кӧсйыны аддзыны!.. Ылӧ мунны оз ков — менам кык сусед сэтшӧмъясыс... Ӧтиыс уджалӧ стройка вылын, а мыйсӧ сӧмын нин эз новлы сійӧ сэтысь гортас! Метлахскӧй плиткатӧ и белилатӧ, люстратӧ и ва сорлалан крантӧ. И не сӧмын гортас новлӧ, но и бокӧ на вузавлӧ, вина вылӧ. Лёк, грубӧй... Да и кысь мӧд кодьнас сылы лоны, кор, гашкӧ, нэм чӧжнас немся книга на эз лыддьыв... Ӧти книга на эз ньӧблы челядьыслы... А мӧд суседыс эськӧ быттьӧ и раминик гортас, но мунас кӧ вӧрӧ, зверсяыс зверӧн лоӧ. Сылы нинӧм оз сулав тулысын койт вылысь лыйлыны ӧтитӧг став дозмӧрсӧ. Либӧ нёньӧдчысь йӧраӧс... Меным зывӧкӧсь татшӧм рабочӧйясыд!.. Став татшӧм йӧзыс... Ме уна нин думайтлі став татшӧмторъяс йывсьыс... Зіли гӧгӧрвоны, кытысянь найӧ лоӧны, мыйла ӧнӧдз некыдз оз бырны миян олӧмысь... Ме уна нин гижи быд пӧлӧс лёкалӧмыслы паныд. Ме ог вермы не гижны та йылысь... Ӧні на со, неважӧн, помалі быдса поэма...

— Поэма? Кутшӧм поэма? — пӧся юаліс Света, коді эз на и вештыв синсӧ Максим вылысь сылӧн кузя сёрнитігчӧжыс.

— Но, дорогуша, и тэ ӧнӧдз эн лыддьы сійӧс миянлы?! — гораа дивитіс другсӧ Рудольф.

Заводса зонъяс сьӧлӧмсяньыс тшӧтш корисны лыддьыны.

— Тайӧ поэмаыс менам, позьӧ шуны, сьӧлӧмысь пыдзыртӧмтор... — шуис Максим. — Ме гижи сійӧс синва сорӧн, и та вӧсна — ньӧти чукльӧдлытӧг...

Сійӧ сувтіс ӧшинь дорӧ, кыкнан кинас нӧшта на пашкырмӧдіс кудриа сьӧд юрсисӧ, чуньнас визьнитӧдіс шӧрт кодь вӧсньыдик уссӧ да шуис:

— Нимыс поэмаыслӧн «Савать Ӧндрейлӧн олӧм».

Сэсся вештыштіс ӧшиньысь лӧза-еджыд сера кыз занавес, видзӧдліс уна биясӧн дзирдалысь кар вылӧ да пӧся заводитіс:


Тӧвся турӧб гудыр войӧ

Ружтіс-чужис кызьӧд нэм...


Шуис тайӧс и ланьтіс. Ставӧн чӧла пукалісны да виччысисны. Кутіс кывны сӧмын, кыдзи ывлаын чашйысьӧ-муралӧ ён тӧв. Сійӧ то ӧтмоза ыргис, то друг кусліс, а сэсся выль вынӧн уськӧдчыліс керка вылӧ, и сэки ӧшиньын кутшӧмкӧ личалӧм стеклӧ пондыліс нораа тронякывны.

Кост вӧчыштӧм бӧрын Максим вежсьӧм гӧлӧсӧн бара кутіс шуавны:


Сэк жӧ Саватейлӧн гидын

Нявӧстіс тшӧтш турӧбыскӧд

Кага гӧлӧс — чужис витӧд пи.


Сэсся Максим эз нин дугдыв лыддьынысӧ. Сійӧ вӧлі кӧть и гажмӧма винаысь, ньӧтчыд эз мытшасьлы, ньӧтчыд эз торксьыв. Сӧмын и ӧвтышталіс чепӧльӧ чукӧрмӧм чуньяса веськыд кинас, быттьӧ тадзисӧ чуктӧдаліс кыськӧ пытшкӧссьыс стрӧка бӧрся стрӧка. Киас сылӧн весиг кабалатор эз вӧв.

Ким видзӧдіс Максимлӧн вӧсни паръяса вом вылӧ, код весьтын чеччаліс-йӧктіс вӧсни ускыс, да виччысис, мый мӧдыс гажмӧмысла мыйкӧ вунӧдас, но поэт ратшкӧдіс и ратшкӧдіс водзӧ; сьӧкыд да чорыд кывъяс, вылісянь усьысь ва моз, киссисны и киссисны кывзысьяс вылӧ. Кимлы тайӧ кажитчис дивӧӧн.

Поэмаыс вӧлі кыті рифмуйтӧма, кыті абу. Но сійӧс кывзігӧн эз думайтсьы сутши-кетшияс йывсьыс, сы вӧсна мый сьӧлӧмтӧ дзоньнас шымыртліс сэні ыпъялысь пӧсь чувствоыс — мырдысьӧн тшӧктіс радлыны либӧ ойзыны-ружтыны.

Поэмаын висьтавсис, кутшӧм гӧля да сьӧкыда олісны Савать котыр. Изӧрмӧм муяс вылын быдмыліс омӧлик нянь. А кӧдзыд да зэра гожӧмъясӧ и немтор эз волы. Мед не кувны тшыг, Саватей мунліс ыджыдджык пияныскӧд Урал-Из сайӧ шом сотны, а гортсаяс пыкисны ловнысӧ вотӧсӧн да чериӧн.

Но кӧть кутшӧм сьӧкыд эз вӧв, Саватей шуис велӧдны витӧд писӧ, Ӧндрейсӧ. Сылы зэв окота вӧлі, мед эськӧ сы семьяысь кӧть ӧти грамотнӧй морт петас. «Гашкӧ, и попӧдз воӧ!» — шонтыліс асьсӧ думъяснас Саватей. Сэсся ӧд Ӧндрейыс налӧн кыдзкӧ зэв писькӧс, мывкыд чужлӧма, кӧть эськӧ и курас-карас.

Став семьяӧн ӧтвылысь велӧдісны Ӧндрейӧс — бать и вок сикас. Асьныс кыз дӧра гачьясӧн ветлӧдлісны, а Ӧндрейлы школаӧ мунны — сатин дӧрӧм да матерье гач. Мед эз вӧв йӧзсьыс омӧльджыкӧн! Асьныс жуг сора нянь йирӧны, а Ӧндрейлы карӧ, духовнӧй училищеӧ, мӧдӧдӧны еджыд тупӧсьяс, косьтӧм дозмӧр кӧяяс. Мед юрыс бурджыка уджалӧ, мед унджык тӧдӧмлун кыскӧ вемас. Мед бур попӧн лоӧ.

Ӧндрей бура гӧгӧрвоис ставсӧ тайӧс да ньӧти эз жалит асьсӧ велӧдчигӧн. Век медбуръяс лыдын вӧлі. Пемыд вӧралысьлӧн пи, а тӧдӧмлунъяснас да вежӧрнас пановтіс став купеч пиянсӧ.

Вӧлӧгдаӧ, духовнӧй семинарияӧ, мӧдӧдісны сэсся велӧдчыны морттӧ.

А мирын тайӧ каднас муніс ыджыд война: «царлӧн бур пиян» кымӧс на кымӧс люкасисны «немецкӧй кайзерлӧн быдтасъяскӧд». Тадзсӧ люкасьны Саватейлысь нуисны куим пиӧс. Кыксӧ кувтӧдзныс зутшйӧдлӧмаӧсь кузь сюраясыд. А коймӧдыс воис кулӧма нисьӧ ловъя: тыяссӧ чишкалӧма газ.

Сэсся гымӧбтіс революция. Россияын уна нэмъясӧн чӧжсьӧм лӧглуныс, страшнӧй бушков моз, нетшыштіс и царӧс, и помещикъясӧс — став вир юысьӧс... Но вир юысьяс эз кӧсйыны бурӧн сетчыны, найӧ панісны выль кось.

И тайӧ вир кисьтана косяс Саватейлӧн бара куим пи муніс. Тшӧтш и дас кӧкъямыс арӧса Ӧндрей; сылы ньӧти эз ло окота велӧдчыны попӧ.

Ыджыдджык вокыс, кодлӧн эз на бурдны тыясыс, усис Вашка дорын Кай-Чердынскӧй полкын воюйтігӧн. Ӧндрей ачыс дзебис-гуаліс сійӧс да лои сы пыдди взводса командирӧн. А мӧд воксӧ гражданскӧй война помланьӧ нин гуалӧмаӧсь Крымӧ.

Тадзи Саватейлӧн коли ӧти пи. Медічӧтыс. Нинӧм он вӧч. Мортыд тай оз вермы посйыны олӧмсӧ ас кӧсйӧм ногыс, олӧмыс песлӧдлӧ морттӧ, кыдзи сылы колӧ.

Бур ещӧ, мый медбӧръя пиыс ыджыд мортӧн лои. Кӧть и том на вӧлі, кызь ӧти арӧса, гражданскӧй война вылысь полкӧвӧй комиссарӧн воис.

Сэсся Ӧндрей, ас коддьӧмыс жӧ варышъяскӧд ӧтвылысь, пондіс Коми му сӧвмӧдны, коми йӧзлысь культура кыпӧдны. Ачыс водзӧ на велӧдчис. Пӧрысь Саватей гозъя нимкодясьнысӧ оз вермыны пинас.

Сӧмын тай ӧтчыд, комын сизимӧд воын, газет вайис сиктӧ кок йывсьыд уськӧдысь юӧр: налӧн пӧ Ӧндрейыс, налӧн вына бордъя варышыс, — враг.

Пуксьӧдісны Савать Ӧндрейӧс тюрмаӧ. Юасьӧны, допрос бӧрся допрос, кодлы да донысь-ӧ пӧ тэ Коми мусӧ кӧсйин вузавны.

Мыйла нӧ пӧ меным сійӧс вузавны, кор сы вӧсна ассьым вир кисьті. Медся ыджыд кӧсйӧмнас пӧ менам век вӧлі: вӧчны чужан мусӧ мичаджыкӧн да озырджыкӧн. И мед эськӧ коми войтыр шудаджыка оліс ӧтувъя сӧветскӧй семьяын.

Но эскасны ӧмӧй мортлы, кодӧс нимтӧма врагӧн?

Вӧвлӧм полкӧвӧй комиссарӧс судитісны да пуксьӧдісны. Сэні мортыдлӧн и помасис олӧмыс.

Пӧрысь Савать регыд жӧ сэсся кувсис. Эз и тӧдлы, кыдзи пиыслысь нимсӧ бӧр лэптісны. Кутісны шуны: вот пӧ мортыс вӧлӧма! Вот пӧ кодлысь колӧ велӧдчыны овны!


Максим помаліс лыддьыны, и лои шы ни тӧв. Быттьӧ жырйӧ виччысьтӧг пырис ош, и йӧз шӧйӧвошины, оз тӧдны, мый вӧчны. Колӧ кутны сійӧс, а оз кужны кыдзи. Сӧмын кыліс керка ӧшиньясӧ швачкысь тӧвлӧн ыргӧм-пессьӧмыс.

Медводзӧн ырсмуніс-шыасис Катя:

— Ой-ой-ой, Максим, этатшӧмтор ӧд он жӧ гиж!

— А мый? — Максимлӧн чужӧмыс дзикӧдз кельдӧдӧма, сылӧн абу на лӧньӧма шызьылӧмыс. Абу ӧмӧй збыльтор тайӧ? Эз ӧмӧй вӧвлы татшӧмыс миян олӧмын?

— Мало ли мый эз вӧв миян олӧмын! — виччысьтӧг горӧдіс коддзӧм Рудольф Надуткин, пызанӧ кучкигмоз. — Но нинӧмла важсӧ вӧрӧшитны. Талун миянлы колӧ гажӧдчыны!

Максим лыйыштіс другсӧ лэчыд видзӧдласӧн:

— Ми быд лун вӧрӧшитам важсӧ, кӧсъян кӧ тӧдны!.. Но сэтысь бурсӧ казьтылігӧн нинӧмла куньны синъяснымӧс ковтӧм лёкалӧмыс вылӧ... Быттьӧ эз и вӧвлы сійӧ... А вӧлі, вӧлі! И та йылысь колӧ казьтывны кӧть нин сы вӧсна, мед выльысь эз ло сэтшӧмыс... Мед тэа-меалӧн олӧмным эз пуксьы Савать Ӧндрейлӧн моз. Тэнадтӧ, шуам, эськӧ оз да...

— Чорыда тэ гижӧмыд... — шуис Ким, сылӧн чужӧм вылын гызьӧм ва веркӧс вылын моз, тӧдчис лолыслӧн майшасьӧмыс. — Ме эг на кывлы татшӧм нога гижӧмаястӧ...

— Тэныд кажитчис?! — пӧся юаліс Максим.

— Менсьым сьӧлӧмӧс быттьӧ нетшкӧны лестукъясӧн... — зілис вежӧртны лов кылӧмсӧ Ким.

— А менӧ быттьӧ пӧдтӧ татшӧм гижӧдыд, меным быттьӧ немторӧн лолавнысӧ лои, железнӧя шуа. — Гена Игнатов юасяна видзӧдӧ Максим вылӧ. — Меным быттьӧ колӧ, мед гижӧдъясыс не сӧмын пӧдтісны важ лёкнас, а велӧдісны да ышӧдісны водзӧ бурджыка овны...

— Тэныд, Гена, дерт, кӧнкӧ, моторъясыд гӧгӧрвоанаджыкӧсь... — нюмъялігтыр шуис Максим.

— А ме чайта, Генаыс зэв лӧсьыда шуис! — ырыштчис Максим вылӧ Света. — Поэзияыс йӧзлы вылӧ и эм!

— Милая Света, тӧндзи тэ шуин, мый нинӧмла пӧ гижны пӧлянъяс да розаяс йылысь. Ӧні ме гижи ковтӧг лёкалӧм йылысь... И тайӧ тэныд оз кажитчы? Ме, милая Света, поэзияас некор мырдысьӧн ог корсь шӧрсӧ. Ог кодлӧнкӧ тшӧктӧм серти гиж ни... Ме гижа сійӧс, мыйысь медъёна нимкодясьӧ либӧ медъёна доймалӧ сьӧлӧмӧй. И, ме чайта, поэзияыслӧн могыс сыын и эм, мед вӧрзьӧдны мортсӧ, чужтыны мыйкӧ дінӧ радлун либӧ лӧглун.

— А ме, ас пайысь... — пӧся шыасис Николай Васильевич, — ме, ас пайысь, кывзі Максимӧс да мӧвпалі: мися ловйӧн кӧ коли Савать Ӧндрейыс, эз эськӧ сэтшӧма лёксӧ пес, кыдзи ӧні Максим. Сійӧ, дерт, эськӧ дӧбелькиӧдз эз жӧ вунӧд сы ыджда ӧбидатӧ, но, пиньяссӧ топӧдӧмӧн да сосъяссӧ пуджӧмӧн, том дырйиыс моз, бара на тышкасис олӧмсӧ водзӧ бурмӧдӧм вӧсна. Сійӧ эськӧ ставсӧ гӧгӧрвоис.

Максим восьтыліс на вомсӧ мыйкӧ воча шуны, но сэки Катя, кодӧс кутіс шогӧдны нин тайӧ сёрнисьыс, горӧдіс гажа гӧлӧсӧн:

— Тіянӧс кӧ он ӧлӧд, буракӧ, помыс оз во. Праздник — йӧктыны, гажӧдчыны колӧ, а найӧ ӧтарӧ вензьӧны.

Катя пуксис пианино сайӧ да зумыд кияснас пондіс мыйкӧ грымгыны-ворсны. И ыджыд жырйӧ пырысь-пыр жӧ быттьӧ ызгысисны и бушков, и визув ю.


Кызь кыкӧд глава


Тӧв да тулыс костын муніс жӧ чорыд вензьӧм. Овлісны сэтшӧм здукъяс, кор найӧ, дзикӧдз ярмӧм бӧрын, лэдзлісны ӧта-мӧдныслы паныд ассьыныс став вынъяснысӧ, и сэки му вылыс вошліс йӧзлӧн син водзысь, тырліс мургӧм-омлялӧмӧн, сэки лёкысь чашйысисны важмӧм керка вевтъяс, краджӧдчӧмӧн чукталісны пӧрысь топольяслӧн увъяс да лёкысь жуньгисны карсӧ черань везъясӧн моз кыӧм проводъяс. Сэки то петавліс синтӧм-пельтӧм коръя лым, кодӧс ён турӧбыс печкис-гартіс кыдзи сылы колӧ, то кыськӧ мыччысьліс пӧсялӧм нин шонді да личкыліс турӧбсӧ, и гӧгӧр друг тшӧкмунліс-лӧньліс, и гырысь лым чиръясыс пондылісны ворсны-югъявны эзысь бобувъяс моз.

А сэсся тӧлыс, выныштчис да, кытчӧкӧ ылӧдз на зырӧдліс тулыссӧ — мӧдыслӧн весиг дукыс эз пондыв кывны, — кык лун чӧж сапкис-усис лым, и сьӧдасьӧм, шолясьлӧм важ лымйыс бӧр едждыліс, лолі сӧстӧмӧн. Но ӧти асылӧ виччысьтӧг вувзьысисны тулыслӧн шӧр вынъясыс — лун тӧв да ыпъялысь шонді, — и пырысь-пыр жӧ карыс ойдіс синтӧ ёрысь лӧзоват югыдӧн, кутісны гольскыны-гылавны керка вевтъяс вылысь чугун кодь сьӧкыд йи нёньяс, а пажын кадлань кок улын шнячкакыліс нин выль лымйысь лоӧм сӧнік, сэсся и письтісны шоръяс.

Сідзкӧ, видза олан, тулыс! Бара на ми олім тэнад вотӧдз. И ӧні тэ, ывла вывсӧ весаліг-ловзьӧдіг, дерт жӧ, тшӧтш кылӧдан-нуан неэтша омӧльсӧ и йӧз сьӧлӧмъясысь...

Заводса клуб вӧлі шӧтӧма йӧзӧн, кыдзи рыныш — кольтаясӧн. И кызвыннас воисны том йӧз. Мукӧддырйиыс ныла-зонмаӧс мырдысьӧн лоӧ кыскыны собрание вылад, а тані со кортӧг быдӧн тӧрӧдчӧ-сюйсьӧ. И сӧмын-ӧ шоча овлантор тӧдмавны кӧсйӧмыс гильӧдӧ найӧс да кыскӧ татчӧ? Буракӧ, оз сӧмын тайӧ. Том сьӧлӧмыдлы унджык колӧ. Татшӧм здукъясас том сьӧлӧмыд, кӧсъян кӧть он, ачыс пӧся ырзьылӧ, вийсьӧ-пессьӧ да тшӧктӧ ёнджыка мӧвпавны не сӧмын лоӧмтор йывсьыс, но тшӧтш и йӧз йылысь, ас йывсьыд, олӧм йывсьыс, кӧні тэныд колӧ мунны кузьысь-кузь туй да сымда бергӧдны-керны.

Пӧрччысянінын Кимлы паныд лои Миля Братенкова. Ныв радпырысь и дивитыштӧмӧн видзӧдліс Ким вылӧ, збоя лӧсьӧдіс сылы мышсӧ, мед зон отсалас пӧрччыны гӧрдовруд анча воротника пальтосӧ, а ачыс сэк кості шуаліс:

— Ким, тэ тай нӧ пышъявны кутін меысь? Али, нӧйтӧм бӧрад, он лысьт колльӧднытӧ? — Миля эськӧ и заводитліс нормӧдны лӧсьыдіник, тыр вира чужӧмсӧ, но мортыдлӧн тайӧ эз и артмы, буракӧ, сылӧн дзоньвидзалунӧн ыпъялысь чужӧмӧ норыс да гажтӧмыс эз тӧдны туйсӧ.

— Мый тэ, Миля, ог жӧ пышъяв! — дорйысис Ким. — Век на мыйкӧ висьӧдчышталі да мый да. — Сёрнитіс и ачыс любӧпырысь видзӧдавліс гӧгрӧсіник Миля вылӧ, код вылӧ быттьӧ ляскӧмаӧсь алӧй да турунвиж дзоридзьяса платтьӧсӧ. Миля дінысь быттьӧ сявкйисны кутшӧмкӧ гӧгӧрвотӧм пӧсь югӧръяс, найӧ быттьӧ коддзӧдыштісны ловсӧ, и ӧні вӧлись Ким казяліс, мый гажыс бырӧма нин Миляысь, и сэтшӧм окота вӧлі важ моз пӧся кутчысьлыны сыкӧд.

— Висян кӧ, миян ордын эськӧ куйлыштін, — водзӧ дивитіс Миля. — Ме эськӧ ӧдйӧ бурдӧді.

— Абу лӧсьыд, Миля...

Найӧ пырисны залӧ. Дзескыд радъясын сярвидзисны нин уна лыда юръяс, да, визув ювывса кось вылын моз, кыліс ызгӧм шы. Пуксисны сценасянь неылӧ.

— Ким, а кодӧс нӧ тэ мездін? — юаліс Миля. — Он тай нӧ и петкӧдлы.

— Со тай пукалӧ, сьӧд юрсиаыс. — Ким индіс синъяснас воддза радын, стенладорын, пукалысь Света вылӧ.

Милялӧн лыбавлісны дженьыдик сьӧд синкымъясыс, и сійӧ ышловзьӧмӧн моз шуис:

— А-а-а... — Сэсся друг кутіс тэрыба чабравны вӧйтчӧм рӧчьяса топыд кияссӧ, юаліс: — А каракуль юраыс нӧ коді жмитчӧма сы дінӧ?

«Абу жӧ эськӧ жмитчӧма да, Миля!» — ас кежас вензьыштіс нывкӧд Ким. И шуис:

— Максим Сахаров, гижысь жӧ, поэт.

— Телевизор пыр аддзылі... А лӧсьыд парочкаыс... — Ким вылӧ сюся видзӧдліс Миля.

— Да-а, туяна, — нурбыльтіс мӧдыс, сэсся кежӧдіс сёрнисӧ. — Мыйкӧ вывті нин уна чукӧрмӧма йӧзыс. Та мында йӧз дырйиыд и сёрнитнытӧ он сяммы, кывйыд вошӧ.

— Мыйсӧ бара думайтӧны ӧні подсудимӧйясыс-а? — сьӧлӧмсяньыс шуис Миля.

— Кутшӧм подсудимӧйяс? — эз велав первойсӧ Ким. А сэсся гӧгӧрвоис. — Став шышсӧ кӧ эськӧ тадзи судитісны, ыджыд пасибӧ на висьталісны да.

— А кӧнӧсь найӧ? — эз ӧвсьы сёрнитны радейтысь Миля. — Йӧртӧмӧн видзанныд?

— Милиционеравнысӧ эн лок да, — серӧктіс Ким. — Тэтӧг код найӧс видзас? Залын пукалӧны бать-мамыскӧд. Дерт, кодлӧн эмӧсь.

— Яндзимыс, кӧнкӧ, бать-мамыслы!.. О господи! А мукӧдыс нӧ батьтӧм-мамтӧмӧсь?

— Эм ӧти сэтшӧмыс — бабыскӧд олӧ, мамыс эновтлӧма.

Некымын лун чӧж уджаліс милицияса следователь Петухов, кодкӧд сӧмын абу аддзӧдчылӧма сійӧ! Медбӧрын шуис: асьныд кӧ пӧ онӧ на кӧсйӧй вайӧдны делӧсӧ судӧдз, ме пӧ абу паныд. Томӧсь на пӧ, да позьӧ видлыны кыдзкӧ мӧд ног «мыськалыштны» найӧс, бур йӧз водзын чорыдджыка янӧдны. Татшӧмторыд пӧ вермас судитӧм дорысь не омӧльджыка мӧрччыны, абу кӧ мортыс дзикӧдз нин тшыксьӧма... А оз кӧ мӧрччы, кутасны кӧ и водзӧ шышкавны, то ӧні пӧ найӧ лоӧны тшӧтш и миян син улынӧсь, любӧй кадӧ ми вермам босьтны найӧс. «А миян кабыръясным неуна чорыдджыкӧсь тіянлӧн серти!» — серӧктӧмӧн помаліс следователь.

Комсомол горкомса секретар шуис: колӧ пӧ корны том йӧзӧс автошколаысь, стройка вылысь, сплавнӧй рейдысь да школаысь, кӧні уджалӧны да велӧдчӧны Валерьян, Гаврил, Марс да Сашук.

Корам пӧ тшӧтш и сэтчӧс веськӧдлысьяссӧ да комсоргъяссӧ — мед видзӧдлӧны асланыс быдтасъяс вылӧ. А мӧдъясыслы тӧдса йӧз водзын яндзимджык лоӧ...

Заводса парторг, Виль Николаевич, тшӧктіс корны тшӧтш олӧмаджык уджалысьясӧс, кодъяслӧн нимъясыс паськыда тӧдсаӧсь. Найӧ пӧ унатор нуисны ас вывтіныс и вермасны шуны медся мӧрччана кывсӧ.

Света шуис, мый колӧ пӧ эськӧ сідзи нуӧдны делӧсӧ, мед мыжмӧмъясыс дзикӧдзсӧ эз жӧ повзьыны, мед эськӧ веськыда висьталісны ставсӧ; мед эськӧ мукӧд том йӧзыслы ясыда лои гӧгӧрвоана, кыдзи да мыйла найӧ сувтісны татшӧм лёк туй вылас... «Мед эськӧ миян зільӧмъясным потшисны лёк туй вылас пыранінсӧ тшӧтш и мукӧд зонъяслы...» — тӧдчӧдіс журналистка.

Сцена вылӧ, виж нойӧн вевттьӧм пызан дінӧ, кысянькӧ занавес сайсянь петіс Гена Игнатов. Тэрыб воськолӧн петіс, буракӧ, ёна шызьӧма та мында йӧз водзад, векньыдик рудов чужӧмыс быттьӧ банйыштӧма. Бур туйӧ новлан сьӧд костюма ачыс, шыльӧдӧма-мольӧдӧма сійӧс, некутшӧм чукыр оз тӧдчы. А морӧсас «Знак Почёта» орден дзирдыштлывлӧ. Залын пукалысьяслӧн уна видзӧдлас крестасьлісны тайӧ орден вылас, сы вӧсна мый оз на быд том морт вермы ошйысьны татшӧмторнад. Гена читкыртліс синъяссӧ залын помтӧг тыдалысь юръяс вылӧ, тіралыштысь гӧлӧссӧ лӧньӧдны зілиг, ньӧжмыда шуис:

— Заводитам кӧ сэсся-а...

Йӧз пырысь-пыр лӧнисны, талысь пӧ, ичӧт гӧлӧсаыдлысь, ещӧ он и велав, он кӧ кут сюся кывзыны. А тӧдмавны, мый вӧлӧма да мый лоӧ, зэв окота.

— Генкаыд али мый лоӧ главнӧй пыддиыс? — Миля матыстліс кызіник гӧрд вом доръяссӧ Кимлы пель дінас.

— А мый — оз туй?

— Мый эськӧ, гашкӧ, оз туйыс да... А ме чайті — суддяяс да прокуроръяс...

— Ёртъяс! — шуис Гена. — Со ми мыйтӧмӧн чукӧрмим татчӧ. И, тӧдӧмысь, тіян пӧвстысь быдӧн локтіс эз нач сы могысь, мед эськӧ видзӧдлыны менам мича чужӧм вылӧ. — Геналысь йывмӧм, быттьӧ кык пӧв костын топӧдӧм чужӧмсӧ некыдз эз позь шуны мичаӧн, и та вӧсна воддза радъясыс тӧдчымӧн гызьыштісны. — Ме чайта сідзжӧ, мый тіян пӧвстысь унджыкыс эз локны татчӧ и асьнысӧ петкӧдлӧм могысь. — Зал и тайӧ кывъяссьыс шызьыштліс. — Быдӧн ми локтім татчӧ сьӧлӧмъяснымлӧн тшӧктӧм серти, сы вӧсна мый найӧ тшӧктӧны миянлы кыдзкӧ бурджыка овны. А ме чайта, бурыс ӧдйӧджык да кокниджыка кутас шедны сэк, кор пондам ӧтвылысь корсьны сійӧс, ӧта-мӧдлы отсалӧмӧн, ӧта-мӧдӧс дорйӧмӧн корсьны... Ме тайӧс железнӧя шуа тіянлы! — бӧръя кывъяссӧ шуигӧн Геналӧн чорзьыштіс, вынсяліс гӧлӧсыс, мортыд весиг швычӧка ӧвтыштіс кинас, быттьӧ киас сылӧн вӧлі мӧлӧт, гайка зэлӧдан сьӧкыд ключ ли.

Генаӧс шензяна синъяснас «сёйысь» Миля ырсмунӧм сьӧла моз швуч-швачкерис кияснас, сэсся и мукӧд пондісны клопӧдны.

— Тайӧ тай зэв мастер вӧлӧма сёрнитнысӧ, — йӧзлӧн друг ызмунӧмысь падмыштӧм Гена вылӧ пӧся видзӧдіг шуис Миля. — А ме чайтлі, сійӧ сӧмын кӧрт куснявны сяммӧ.

Кимлы вӧлі нимкодь жӧ ёртыс вӧсна. Ӧд ӧтвылысь лои думайтӧма, ёна лӧсьӧдчӧма тайӧ зэв кывкутана рытыс кежлӧ.

— Ёртъяс, ті, буракӧ, тӧданныд нин, мый тайӧ рытыслы помканас лои мисьтӧм факт, — водзӧ сёрнитіс Гена. — Нёль том морт вой шӧрын пемыд улича вылын уськӧдчисны ныв вылӧ и мырддисны сылысь сьӧмсӧ. Нылыс пондіс горзыны, и сылы отсӧг вылӧ воис буретш матын лӧсялӧм миян заводса зон. Пансис тыш. Заводсаыс кыдзкӧ-мыйкӧ вермис разӧдны шайка-лейкасӧ, кӧть эськӧ и сылысь юрсӧ муртса эз поткӧдны.

Ӧні зал тӧдчымӧн нин гызис: пондіс дзуртны скамьяясӧн, кызӧктавны, пӧся шӧпкӧдчыны. А кодкӧ и скӧрысь горӧдіс:

— Да кӧнӧсь нӧ шпанаясыс?! Видзӧдлам кӧть на вылӧ!

— Ставӧн танӧсь! — кисӧ вывлань лэптӧмӧн горӧдіс Гена. — Вайӧ сӧмын лӧня кутам, вайӧ ставсӧ кутам сьӧрсьӧн-бӧрсьӧн керны. — Гена кӧсйис на водзӧ сёрнитыштны, но залын шумыс пыр ӧтарӧ содіс, и сылы быть лои чукӧстны мыжаясӧс сцена вылӧ.

Пукалысьяслӧн радъяс костӧ медводзын петіс Марс. Юрсӧ копыртыштӧмӧн мӧдӧдчис сценалань и муртса эз шатовмун сы вылӧ веськӧдӧм уна видзӧдласысь: быттьӧ топыда пукалысь йӧзлӧн видзӧдласъясыс ӧтвывтчисны да друг пӧрисны ён тӧв нырӧ, коді зільӧ пӧрӧдны сійӧс кок йывсьыс, кытчӧкӧ тӧвзьӧдны. Марс здукӧн пӧсяліс, лолыс кутіс тірзьыны-нетшкысьны тӧв гурйылӧ веськалӧм би моз. Асьсӧ выныштӧдӧмӧн сійӧ кыдзкӧ-мыйкӧ восьлаліс слабитӧм кокъяснас да оз и помнит, кыдзи воис сцена вылӧдз.

— Кутшӧм мичаник! — шуис Миля Братенкова, сійӧ колльӧдіс Марсӧс жалитысь и шензьысь синъясӧн. — Артист кодь!..

— Тайӧ и эм батьтӧм-мамтӧмыс, — воча шӧпнитіс Ким.

— Да-а?.. Татшӧм мичаникыдлы ме эськӧ сідз сеті вит шайттӧ, грабиттӧг, — содтіс Миля.

Сашук Таранов бӧба нюмъяліс. Гӧрбакодь ныра мугов векни чужӧмыс сылӧн и ставнас кузь да вӧсньыдик тушаыс, кодӧс вӧлі дзикӧдз личлэдзӧма, тапикасьысь походкаыс и вартан паличьяс моз кыдзсюрӧ бовъялысь киясыс — ставыс быттьӧ чуймӧмӧн висьталіс сы вылӧ азыма видзӧдысь йӧзлы: «Аддзанныд, кутшӧм на ме челядь руа? Онӧ жӧ кутӧй менӧ, татшӧмсӧ, чорыда мыжавны».

Сашуклӧн кузь юрсиыс лэччӧма пельпом вылӧдзыс да весигтӧ, тар бӧж моз, чикыльтчӧма на сэні. Гачыс зэв паськыд клёша, утка кок моз паськалӧ увланьыс. Сідзсӧ гачыс сьӧд, а клёшас тувъясыс чим гӧрдӧсь, и складкаяссӧ некымынлаті шнуръясӧн топӧдӧма.

— И татшӧм полӧкалӧяссьыс лоӧ повны петны войся карӧ, — шуис Максим, мыжтӧм кутю моз тапикасьысь Сашук вылӧ дзугыльмыштӧм синъясӧн видзӧдіг. Сэсся ышловзьӧмӧн содтіс: — Быть пов, кор найӧ, кӧинъяс моз, стаяӧн ветлӧны.

— А ми — быдӧн ӧткӧнӧсь, — ёртыслысь лов кылӧмсӧ гӧгӧрвоӧмӧн шуис Света. — Ӧткатӧ мый не пурны.

Сценалань восьлалысь, зумыштчӧм Валерьянлӧн сук сьӧд синкымъясыс вӧлі ӧтлаасьӧмаӧсь ӧта-мӧдныскӧд, мый вӧсна вожа тшӧка лыа кузьмӧс чужӧмыс кажитчис зэв чорыдӧн, кӧть эськӧ лов кылӧмыс вӧлі дзик мӧд кодьӧн. Валерьян поліс. И поліс медсясӧ сыысь, мый та мында йӧз пӧвстад вермисны веськавны тшӧтш и сійӧ дядьясыс, кодъяслысь водзтіджык нин лои мырддьылӧма вина. И тайӧ йӧзыс кӧ тӧдасны сійӧс, ӧнія мыжыс лоӧ сьӧкыдджыкӧн, и код тӧдас на, кыдзи-мый ставыс бергӧдчас. Валерьянлы друг сэтшӧм окота лои пасьтавны сьӧд ӧчки, дзебны синъяссӧ, лоны тӧдтӧмӧн, не ас кодьысӧн.

Залын сӧмын ӧти гоз син эз видзӧд сценалань восьлалысь Валерьян вылӧ; тайӧ синъясыс вӧліны батьыслӧн, Пантелеймон Михайловичлӧн. Сійӧ пукаліс тӧдтӧм йӧз пӧвстын, вӧлі гражданскӧй паськӧма; гӧтырсӧ сійӧ эз вайӧд — пондан пӧ ещӧ лювзыны сэні... Пантелеймон Михайлович эз видзӧд пиыс вылӧ, шог синъясӧн видзӧдіс бокӧ, но всё равно аддзис писӧ. Сӧмын аддзис не ӧнія Валерьянӧс, пӧшти ас кузьтаыс жӧ зонмӧс, а ичӧт кагаӧс, кодлӧн, чужӧм бӧрас, пежасис да зэв дыр эз бурд гӧгйыс. Мыйта ковмис ноксьыны-шогавны сэки Пантелеймон Михайловичлы! Сыктывкарӧдз катӧдліс кагасӧ, республикаса медбур врачьяслы петкӧдліс... Ӧні со тайӧ кага вӧснаыс лоӧ пукавны юр ӧшӧдӧмӧн, яндзим видзӧдлыны йӧзлы синмас. «Кыдзи-мый нӧ ставыс тайӧ лоӧма? — вийсьӧ-майшасьӧ Пантелеймон Михайлович. — Мыйла нӧ буретш менам пикӧд татшӧмыс лоӧма?»

— Но, тайӧ Валерьян да! — друг катша моз китшкӧбтіс Миля Братенкова.

Валерьян кыліс тайӧс, и повзьӧмысла тан сувтліс вирыс, муртса эз пӧр кок йывсьыс. Но ныв гӧлӧсын эз тӧдчы лёкалӧмыс, да кыдзкӧ бӧр ас выяс воыштіс.

— Тэ тӧдан сійӧс? — шензьӧмӧн юаліс Ким, кор Валерьян муніс на дінті.

— Шикарнӧй зонмыс! — быттьӧ нинӧм абу и вӧвлӧма, сёрнитіс Миля. — Пӧдругакӧд, Зинакӧд, мыйкӧ дыра крутитісны, кытчӧдз кутшӧмкӧ Марс абу мырддьӧма... Менӧ тшӧтш шампанскӧйӧн юктавліс, медчӧскыд кампетнас гӧститӧдліс и... Тэ вед вунӧдлан-а... — Миля серӧктіс да вильыша топӧдчыштіс Ким дінӧ.

Медбӧръяӧн сцена вылӧ котӧрӧн моз кайис Гаврил. Сійӧ муніс йӧзӧн тыр радъяс дорті йӧжгыльтчӧмӧн, вывланьӧ йывмӧм юрсӧ паськыд пельпомъясас сюйыштӧмӧн, мышкуыс кӧдзалӧма; Гавриллы сьӧлӧм чунавтӧдзыс кажитчис, мый сійӧс ӧні тшапнитасны сы вылӧ лӧгпырысь видзӧдысь тайӧ йӧзыс, кыдзи коркӧ сиктын, домаласны гезйӧн да кутасны швичйӧдлыны нюдз ньӧръясӧн. Гаврил ӧні медлёк кывъяснас ёрис асьсӧ сыысь, мый тӧндзи эз пышйы, а кывзысис Людалысь да кольччис. «Кымынкӧ мелі кыв шуис, да и сылі... — майшасис Гаврил. — Ӧні эськӧ кӧн нин вӧлі! Мун да корсь эськӧн...»

«Корсаръясӧс» пуксьӧдісны сцена вылӧ, председательлӧн пызанысь неуна бокӧджык сувтӧдӧм лабичӧ, заллы паныда чужӧмӧн.

Кутшӧм сьӧкыд, вӧлӧм, лэптыны мыжмӧм синъястӧ ассьыд лэчыда дзоргысь йӧз вылӧ! Куимӧныс пукалісны вӧрзьывтӧг, видзӧдісны джоджӧ, сӧмын Сашук легзис-катласис, ӧтарӧ-мӧдарӧ чатрӧдлӧ юрсӧ; челядь руыс да вежавидзтӧмыс тӧдчис сылӧн и тані. А залсянь горзісны:

— Видзӧд, ӧні баляпиян кодь рамӧсь пукалӧны...

— Судитны колӧ, мед кӧть и томӧсь! Мукӧдъяс мед тшӧтш велалӧны!

— Ми татшӧм арлыднас Москва дорйим, вирнымӧс кисьтім, мед налы бурджыка овсис, а найӧ, пежъяс, со мый керӧны!..

— Бать-мамсӧ, бать-мамсӧ колӧ орччӧн пуксьӧдны!

Гена кыдзкӧ-мыйкӧ ӧлӧдіс ярмыны заводитӧм йӧзӧс, корис:

— Вайӧ ӧтиӧн-ӧтиӧн кутам. Коді первой кӧсйӧ?

Пырысь-пыр жӧ воддза радысь звирк сувтіс шӧр арлыда мужичӧй да кисӧ чургӧдӧмӧн горӧдіс:

— Вайлы меным кыв! — А кор Гена тшӧктіс сёрнитнысӧ, заллань бергӧдчӧмӧн дядьӧ висьталіс: — Кольӧм арӧ менам ӧти ёрт командировкаӧ воліс. Но вот... Петі пӧ самолётысь, тэрмасьтӧг подӧн муна гостиницалань, нимкодяся карын быдмӧм выль керкаясӧн. Но эг пӧ тай дыр гонняв: кыдз пӧ тай мышсянь сетыштісны юрӧ! Садьмӧма мортыд кутшӧмкӧ пемыд дворын, вирӧн ойдӧма. Ӧдва-ӧдва кыссьӧма миян ордӧдз. Грӧш деньга зептас абу... Мый нин эськӧ деньгаыд да, чуть эз синтӧммы мортыс, юрас швачкӧдӧмысь куим тӧлысь больничаын куйліс... Но вот, ме и шуа: гашкӧ, тайӧяс и вӧліны да?!

— Эг ми! — юрсӧ кыпӧдіс да эскӧдана пӧсьлунӧн шуис Валерьян. Дядьӧӧс кывзігӧн Валерьянӧс друг дӧжныштіс мӧвп: «Тадзнад миянлы став эмсӧ и абусӧ вермасны кӧвъявны!»

А зал мургис-ызъяліс:

— Зверъяс!.. Кӧинъяс!.. Кысь-мый татшӧмъясыс чужӧны-а?!

— Позьӧ меным висьтавны тшӧтш? — дзӧран чуньяса кисӧ нюжӧдӧмӧн корис олӧма нин мужичӧй, ёна нин шочмӧм юрсиа, збой чужӧма. Тайӧ вӧлі фрезеровщик Мусанов. Кор сетісны кыв, сійӧ ярскӧб гӧлӧсӧн заводитіс:

— Ме ачым веськавлі татшӧмъясыслӧн гыж улӧ... Кыдзи вӧлі делӧыс? Как раз, пукалыштім гортын субӧта лунӧ, винаыс эз тырмышт, и ме котӧрті лавкаӧ. Пӧдласяндорыс ӧчередь ыджыд, дыр ковмис сулавны. Меным ӧчередь воис, и водзӧ мырдысьӧн кутіс тувъясьны-сюйсьыны кутшӧмкӧ том морт. Старикъяс сулалӧны, а сійӧ ӧчередьтӧг сюйсьӧ, некутшӧм яндзим абу. Ме, дерт, эг лэдз... Сэсся, как раз, петі ывлаӧ и нем думайттӧг муна гортӧ, веськыдала дворъясӧд... И кыдз тай уськӧдчасны ме вылӧ — ӧти чужйӧ, мӧд кучкӧ, коймӧд вина кырымысь нетшкӧ. Ме, кыдз верма, водзсася. Ах, мися, сволочьяс, ак паразитъяс, мый нӧ ті старикыскӧд керанныд! Ме ӧд, мися, финскӧй и Отечественнӧй война вылын ранитчылӧм морт. А найӧ толькӧ и пӧвсалӧны. Ме уси нин кок йылысь, а найӧ кульӧны. Но, мися салдат, пом тай, тыдалӧ, кутіс тэныд воны. Со кыдзи ковмас кувны, аслад керка дінын. Думайта тадзи, а аслам синваӧй петӧ шогысла да забеднӧысла... Но Енмыс тай эз на жӧ дзикӧдз эновт менӧ — кутісны кывны гӧлӧсъяс, и кӧин чукӧрыс руз-размуніс.. И вед некодӧс ог тӧд, арся войыс пемыд вӧлі, а магазинса вылас, думыштлытӧгыд, эг и лючки видзӧд, гажа юрнад сьӧд ӧчкисӧ толькӧ помнита.

Пӧрысь салдатлӧн висьтыс лёкысь кезнитӧдіс залын пукалысьяслысь сьӧлӧмъяссӧ. Уна пинь воча мурчнитчис, уна кабыр гӧрддзасьліс из кодь чорыдӧдз. Скӧрлунӧн тырӧм залыс ӧні Кимлы кажитчис ытвадырся запань кодьӧн: кор тай ыджыд ваыс, ён визулыс жмитӧ-топӧдӧ керъяссӧ, жуньгытӧдз зэлалӧмаӧсь стальнӧй тросъяс, гӧгӧр дзуртӧ-кражӧдчӧ; и майшасяна чайтсьӧ, мый нӧшта кӧ ӧтчыд выныштчас юыс, запаньыс чашмунӧ-резьдӧ, и сэтчӧ чукӧрмӧм уна-уна керйыс лёкысь вувзьысяс ойдӧм видзьяс пасьтала.

И йӧзлысь чукӧрмӧм лӧглунсӧ ёнджыка на кылісны сцена вылын пукалысьяс.

«Кодкӧ ӧти кӧ ӧні уськӧдчас — всё!.. — йӧжгылясис Валерьян. — Сэки и нырыштасны... Сэки и бать оз вермы кутны... Милицияыс нӧ абу али мый тані, али тшӧтш гражданскӧйӧ пасьтасьӧмаӧсь. — Валерьян эз казявлы, кыдзи сылӧн бур ногӧн думыштсис милиция йылысь, кӧть ӧнӧдз ыліті кытшовтлывліс сэтчӧс уджалысьяссӧ. — Ок эськӧ, мынны кӧ ӧні бурӧн!..»

«Бурджык эськӧн, мед судитісны, чем тадзи мучитны... — Гаврил казяліс, мый сылӧн заводитӧны легзьыны пидзӧсъясыс. — Ок ме йӧй, йӧй, эг пышйы!..» — сэсся сійӧ косьмӧм вом доръяснас кызмырдысьӧн шӧпнитіс Валерьянлы: — Колӧ соссьыны... Ставсьыс соссьыны...

Сашук гусьӧникӧн видзӧдлывліс сылань, кӧні пукаліс жугыль чужӧма батьыс, Пётр Максимович. Зонка, думсьыс, зілис казявны сэтысь и мамсӧ, сэки эськӧ мамаыс, гашкӧ, и дорйис сійӧс, Сашукӧс, ставсяыс медбура, ӧд сійӧ быдтор вермӧ вӧчны. Но мамаыс эз вӧв. Софья Степановна бӧрдігтыр окаліс Сашукӧс татчӧ мӧдӧдігӧн, шуис, мый ставыс лоӧ бур — ме пӧ сёрниті нин кодкӧд колӧ, ветлӧй пӧ батьыдкӧд. Ачыс Софья Степановна эз лок, сылы кажитчис, мый, мунас кӧ, кулӧ яндзимысла. Ӧд сійӧс быдӧн тӧдӧ, быдӧн кутас видзӧдны сы вылӧ наян синъясӧн.

«Ме ӧд финскӧй и Отечественнӧй война вылын ранитчылӧм морт. Мый нӧ ті старикыскӧд керанныд?» — пӧрысь салдатлӧн тайӧ кывъясыс ӧні ёсь пурт моз сатшкысисны Марслы сьӧлӧмас. Сылӧн весиг син водзас пемдыліс, кор думыштіс, мый тшӧтш вермис лоны сэні... И ӧти здукӧн аслас став олӧм-вылӧмыс, вӧйысьлы моз, петкӧдчис сэтшӧм ясыда, сэтшӧм гӧгӧрвоана, мый Марс, гашкӧ, первойысь на казяліс сэтысь став коньӧрлунсӧ, став мисьтӧмсӧ; казяліс, и сэтшӧм сьӧкыд да шог лои, мый муртса эз омльышт кӧзяинсӧ воштӧм пон моз.

— Ӧнія том йӧзыд ставыс сэтшӧмӧсь! Ставыс сэтшӧм лёкӧсь! — друг горӧдіс кутшӧмкӧ нывбаба; и тайӧ горӧдӧмыс биӧн моз чишкыштіс йӧзӧс: найӧ дзикӧдз ызмунісны. Ӧтияс горзісны: сідзи и эм пӧ, мӧдъяс, дерт, томджыкъяс, яра вензисны накӧд.

— Ёртъяс, — гӧлӧс тырнас шуис сэки председателялысь Гена Игнатов, сійӧ гӧгӧрвоис, мый не кӧ вештыны зал весьтӧ ӧшйӧм чарда кымӧръяссӧ, вермас омӧльтор артмыны. — Ёртъяс, ме чайта, ӧні ми кывзыштам ассьыным «именникъясӧс», — Гена индіс нёль друг вылӧ, — кодъяс ради ми воим татчӧ «нимлунасьнысӧ». Мед висьтасьӧны, кыдзи найӧ воӧдчисны татшӧм чесьтӧдзыс.

Первойӧн кыв корис Марс. Гӧгрӧс чужӧм вылас бандзибъясыс гӧрдӧдӧмаӧсь. Педзыштіс места вылас, сэсся виччысьтӧг мӧдӧдчис бокынджык сулалысь трибуналань, мыйӧн шензьӧдіс и ёртъяссӧ и залын пукалысьяссӧ.

— Ме кора уважайтана публикаӧс ёнасӧ не дивитны менӧ, сёрниӧй кӧ кузьджык лоӧ, — тіралыштысь гӧлӧсӧн шуис Марс. — Ме татшӧм лун кежлас вель кузя нин лӧсьӧдчи и, позьӧ шуны, гижи быдса речь...

— Ре-ечь? — бара китшнитіс Милялӧн, и сылӧн тайӧ китшнитӧмыс ас ногыс мӧрччис йӧзлы, уна чужӧмӧ койыштіс-ляскис гажа нюм.

— Да, речь, — шуис Марс. Сійӧ казяліс авъя нывлысь сы вылӧ сьӧлӧмсянь видзӧдӧмсӧ, и лов кылӧмыс быттьӧ крепаммыштіс. — И ме ӧні сійӧс тіянлы лыддя сідзи, кыдзи эм.

— Но, речь? Давай-давай!

— Граждана судьяяс! Уважайтана публика! — пӧся горӧдіс Марс водзвыв гижӧмасӧ. — Ставӧн ті зэв сьӧлӧмсяньыд кывзінныд прокурорлысь мыжалана речсӧ, и тіян морӧсъясын, тӧдӧмысь, кыптіс неэтша скӧрлун миян дінӧ, кодъяс зывӧктана пытшъяс моз заводитісны курччавны карлысь сӧстӧм вир-яйсӧ. — Марс шуис тайӧс лов шысӧ вежлытӧг, сувтовкерис да видзӧдліс залӧ. Сэні вӧлі шы ни тӧв. Зон, ӧддзӧдчис, да водзӧ кутіс лыддьыны речсӧ...

— Ми, дерт, мыжаӧсь йӧз водзын, — кутіс воны помланьыс Марс. — И миянӧс, тӧдӧмысь, мыждасны. Ме, ас пайысь, некутшӧм прӧща ог кор... Ме висьталі ассьым медбӧръя кывйӧс сы могысь, мед эськӧ кыдзкӧ-мыйкӧ ӧлӧдыштны мукӧд зонкаясӧс, мед найӧ эз нин талявны менсьым чукыльӧсь-мукыльӧсь туйӧс... Ме висьталі ставсӧ тайӧс тшӧтш и сы вӧсна, мед эськӧ и гырысьясыс вӧліны сьӧлӧмаджыкӧсь судьбаӧн дойдӧм ме кодь зонкаяс дінас, мед эськӧ найӧ корсюрӧ тшӧтш думыштчылісны: мыйся жӧ олӧм пӧ олӧ татшӧм коньӧрыс, кодарлань мунӧ сійӧ...

Марс нюмыль-нямылькерис тетрадьсӧ, сюйис гач зептас да, нор чужӧма, веськӧдчис аслас местаӧ. Дзикӧдз лӧньӧм залын мыйкӧ дыра кылісны сӧмын гулыд пӧвъяс вывті сылӧн воськовъясыс. Марслӧн ёртъясыс, кодъяс немтор эз тӧдны тайӧ речь йывсьыс, видзӧдісны сы вылӧ мӧдар югыдысь воӧм морт вылӧ моз да лабич вылын местасӧ прӧстмӧдісны ёна ыджыдджыкӧс войдӧрся серти.

— Марс правильнӧ висьталіс! — скамья вылысь сувтігмоз букыша шуис Гаврил. — Омӧлика быдмигад ми вокыслӧн лёкыс ичӧтысянь чӧжсьӧ. Мукӧдыс чужӧмсяньыс вый да нӧк пытшкын купайтчӧны, кампет-преник оз и быравлы пызан вывсьыс. А меным няньыс пӧттӧдз эз век вичмывлы. Таысь нӧ лӧгыд оз кут петны?

Залын йӧз кутісны кызӧктавны, ӧти-мӧдлаын вензьӧм кыптіс. А со председательлань нюжӧдӧма кисӧ Света:

— Позьӧ меным воча сёрнитыштны Гаврилыскӧд?

— Давай, Света, — шуис Гена. Сэсся заллань шыӧдчӧмӧн стӧчмӧдіс: — Тайӧ — Светлана Туробова. Буретш сылысь миян другъясным кӧсйылӧмаӧсь «удждыны» сьӧмсӧ.

Света тшӧтш кыпӧдчис сцена вылӧ, сувтіс председателькӧд орччӧн. Чим сьӧд юрсиӧн дорӧстӧм еджыд чужӧмыс ӧзйыштӧ алӧй вирӧн, гырысь синъясыс пӧся югъялӧны; нывлӧн став ӧбликыс висьталӧ, мый сійӧ нетшкысьӧ, мый сійӧ дась панны ыджыд вен.

— Тэ, Гаврил, шуин, мый лӧгыд пӧ петӧ, — ставлы кывмӧн, но спокойнӧя шуис Света. — А код вылӧ нӧ?

— Хы!.. Код вылӧ... Олӧм вылас... Мыйла сійӧ менам сэтшӧм, а мукӧдлӧн абу сэтшӧм... — шуис Гаврил Светалань юрсӧ ош моз копыртӧмӧн.

— Но ӧд олӧмыс, йӧзыс тэныд нарошнӧ оз жӧ вӧчны лёксӧ... Ме чайта, миян кадӧ быдӧнлы нин позьӧ бура овны: велӧдчыны и бура сёйны-юны, лӧсьыда пасьтасьны и бура шойччыны. Быттьӧ сьӧлӧмсяньыд кӧ кутан уджавны.

— А менам кӧ оз артмы сідзисӧ, — шуис Гаврил. — Абу кӧ велӧдлӧмаӧсь менӧ сідзисӧ овны... Меным кӧ юны окота...

— Сэтшӧм томысяньыс?.. Кор нӧ удитін велавнысӧ? Бать-мамсяньыд али мый?

— Но, насянь... А мыйла найӧ юӧны? Мыйла мукӧдыс оз юны, а найӧ юӧны? Коді мыжа таысь? Найӧ ӧд эз кӧнкӧ Америкаын юысьяснас лоны. А тані жӧ, асланым йӧз пӧвстын!.. — шуис Гаврил да видзӧдліс залӧ.

— Вермас лоны, мый тэнсьыд бать-мамтӧ коркӧ кодкӧ дойдіс, — шуис Света. — Мыйкӧ налӧн эз лючки да шыльыда артмы. Но ӧд та понда оз жӧ позь сэсся нэм чӧжыд лёк дукӧн сісьмыны олӧмас. Колӧ жӧ медбӧрын аслыд кывкутны йӧз водзас, верстьӧ мортыдлы... Но, тэ ӧні мыжалан олӧмсӧ, юӧм-гусясьӧм вылӧ сетчан. А сэсся коркӧ лоӧны аслад челядь... Думыштлы, кутшӧм налӧн, коньӧръяслӧн, олӧмыс лоӧ, кутшӧмӧн найӧ быдмасны татшӧм бать дінад? Найӧ ӧд тэнӧ тшӧтш жӧ проклинайтны коркӧ кутасны... Помтӧг ӧд сэсся тадзи оз жӧ вермы лоны... — Светалӧн ясыд чужӧмыс, Гаврил вылӧ гӧгӧрвоӧмӧн видзӧдысь синъясыс тӧдчымӧн нормисны. Сылӧн сёрниысь йӧз казялісны, мый нылыслӧн татшӧм кывъясыс чужисны, дерт, эз пырмунігмоз, а, буракӧ, важысянь нин дойдалӧны сылысь сьӧлӧмсӧ.

Светалӧн тайӧ сёрниыс ёна мӧрччис Кимлы. Сійӧ кывзіс журналисткаӧс кутшӧмкӧ мелі нимкодьлунӧн: кывзіс, а шоналӧм лолыс, нылӧс ыдждӧдлыны зільысь лолыс, тэчис вежӧрас вӧвлытӧм мӧвпъяс: «Светаыслӧн ыджыд сьӧлӧмыс, буракӧ, кылӧ олӧм-кадыслысь став шыяссӧ, весиг медся нэриник шыяссӧ. Кылӧ, гашкӧ и, сідз жӧ, кыдзи, шуам, гулыд яг, гожӧм помся ясыд лӧнь асылӧ кылӧ быд трачкӧм шы, кылӧ и вочавидзӧ йӧлаӧн...»

А Гаврил эз сэсся куж немтор шуны, сӧмын шӧйӧвошӧмӧн кыйкйӧдліс ӧтарӧ-мӧдарӧ. Света лэччис жӧ аслас местаӧ, кӧні сійӧс пыр жӧ пӧся кутыштліс Максим.

— Тан Гаврил, Марс тшӧтш и, лэдзисны синванысӧ, норасисны омӧлик челядь кад вылӧ, — шуис председателялысь, Гена Игнатов. — А ме тӧда, и неэтша, сэтшӧм зонъясӧс, кодъяс весиг бать-мамнысӧ оз помнитны, но шаньсьыс-шань йӧзӧн лоины... Шуам, Кимка Котков, коді мездіс нывсӧ... Мортыслы детдомса нянькаяс вӧлӧмаӧсь бать-мамнас, а видзӧдлы, кутшӧм железнӧй ӧні сійӧ. Кимка, шу тшӧтш кыв-мӧд!

— Света зэв нин бура висьталіс да, — яндысигтыр шуис Ким места вывсяньыс.

Но залса войтырлы, буракӧ, окота вӧлі видзӧдлыны журналисткаӧс мездысь вылӧ, и унаӧн кутісны корны, мед Ким тшӧтш петалас сцена вылӧ да висьталас мыйкӧ.

Сцена вылӧ кыпӧдысь пос вомӧн ӧтчыд чеччыштӧмӧн Ким кайис трибуна дорӧ да, синмас лэччысь кузь юрсисӧ кинас ӧтырышъя вешталӧмӧн, пӧся да тэрыба шуис:

— Да, ме тӧда, мый сэтшӧмыс батьтӧм-мамтӧм олӧм! Тӧда, кыдзи шогыс да гажтӧмыс мукӧддырйиыс чуть оз джагӧд тэнӧ... И сэтшӧм окота лолӧ, мед эськӧ батьыд либӧ мамыд шылькнитіс юрсиӧдыд да меліа бурӧдіс тэнӧ. Но абуыс кысь бурӧдас... Татшӧм зонкаыд вермас доймыны олӧмас, вермас и дзугсьыны. Быдторйыс вермас лоны сыкӧд!.. Но коркӧ-некоркӧ и сылӧн воӧ сэтшӧм кад, кор сійӧ ачыс ассьыс юалӧ: «Кыдзи колӧ водзӧ овны меным вӧльнӧй свет вылас, чужи нин кӧ ме мортӧн?» И кымын водзджык юалан, сымын бурджык. И, ме ногӧн, нинӧм жӧ абу лёкыс, частӧджык кӧ тадзи пондан юасьны ачыд ассьыд... Дерт, ыстысьны быд пӧлӧс помкаяс вылад кокньыдджык. Не сідзи быдтісны... Дойдісны... Ӧтдортӧны... Но тадзи кӧ быдӧн кутас няргыны да тайӧн вештыны ассьыс мыжъяссӧ, сэки ми помӧ ни дорӧ огӧ воӧй... Ме ногӧн, мортлы медводз аслыс колӧ ёнджыка кывкутны олӧм водзас аслас вӧчӧм-керӧмысь... Быд мортлы колӧ кывкутны!

Ким яналыштіс велӧдана нога татшӧм сёрнисьыс и сэтшӧм жӧ тэрыба, кыдзи и кайис, бӧр лэччис. Зал пӧся донъяліс сылысь кывъяссӧ, а Миля ниртчыштіс сы дінӧ мелі кань моз, а сэсся шуис:

— Ким, сэтшӧм лӧсьыда тэ думайтан, ме мукӧддырйиыс весиг полышта тэысь.

— Думъяссьыс нӧ мый повны? — шуис Ким.

— Мамӧ шуӧ: думыд пӧ медъёна йӧйтӧдлӧ морттӧ, — вашкӧдіс Миля.

Пантелеймон Михайлович Кызродевлы желлясисны жӧ Кимлӧн кывъясыс: «Чужин кӧ мортӧн...» «Да, чужин кӧ мортӧн, мучитчы, — жугыля и шога мӧвпаліс сійӧ. — Ов ныж да мустӧм гӧтыркӧд, став йӧз водзас янав йӧй пи вӧсна». Мыйла нӧ тадзи лои сылӧн олӧмын? Эз, буракӧ, ас кадӧ куж сійӧ юавны ассьыс... Ӧні, гашкӧ, сёр нин, юрыс нин кушмис... Позьӧ шуны, шуд аддзывтӧг кушмис... А кодӧс мыжалан таысь? Кӧні сійӧ медводдза воськолыс, кодсянь заводитчис ӧнія мучитчӧмас туйыс?.. Жуглясис тадзи Пантелеймон Михайлович и сэк жӧ завидьтіс Ким коддьӧмъяслы, и весиг лӧгыс петыштіс.

Но со, кылӧ, горӧдіс инас ӧшйытӧм Мусанов дядь:

— Мый нӧ, ставыс али мый найӧ батьтӧм-мамтӧмӧсь?! Эй тэ, кузь юрсиа герой, тэ нӧ сирӧта жӧ.

— Ме?! — ырсмуніс Сашук. — Ме абу!.. Менсьым мамаӧс став карыс тӧдӧ!

— Но-о? Кыдз нӧ эськӧ сылӧн нимыс?

— Софья Степановна Таранова, — ыкшаа шуис Сашук да чатӧртыштіс юрсӧ.

— Таранова?! — чуймис Мусанов. — Хым!.. Тӧдса и эм...

Тайӧ нимсӧ кывлӧм бӧрын залын пондісны жӧдзны и унаӧн мукӧдъяс.

— А, гашкӧ нӧ, мамаыд висьталыштас миянлы тэнсьыд биографиятӧ? — водзӧ сёрнитіс пӧрысь фрезеровщик.

Сэки орчча радысь чеччис Пётр Максимович, ичӧтик, чужӧмыс пемдӧма, да шога шуис:

— Софья Степановна абу тан, а ме — Сашуклӧн батьӧн лоа.

Ставӧн шура-шара бергӧдчисны сылань.

— Мый ме верма висьтавны та кузя? — Пётр Максимович видзӧдіс йӧз юръяс вывті, весиг сценаысь вылӧджык. — Меным, дерт, ёна яндзим пукавнысӧ тан. Буракӧ, таысь яндзимыс меным некор на эз вӧвлы... Гортын ставыс тырмӧ: сёй, ю душа и мера, кышавны-кӧмавны быдтор эм и, а пиӧй петӧма да... нывлысь вит шайт мырддьӧ... Н-да... Ті, дерт, кӧсъянныд тӧдны, мыйла тадзисӧ лои?.. Код тӧдас... Ме быд ногыс нин думайті... Ме чайта: медыджыд помкаыс сійӧ, мый миян семьяын абу сӧгласыс... Меным абу лӧсьыд та йылысь висьтавны, но мый нӧ керан... Миян керкаын быттьӧ куим государство олӧ. Ӧти государство шусьӧ Софья Степановнаӧн, мӧд — Пётр Максимовичӧн, коймӧд — Сашукӧн. Быд государство лыддьӧ асьсӧ независимӧйӧн, нуӧдӧ ассьыс политика, оз терпит, кор мӧдъяс торкалӧны сылысь асшӧр олӧмсӧ. Ме ог кут висьтавлыны тіянлы, кыдзи да мыйла лои торъя государствояс вылӧ юксьӧмыс, но шуа: тайӧ зэв лёктор, и асьныд аддзанныд, мыйӧ сійӧ вайӧдӧ.

Сьӧкыд вӧлі кывзыны Пётр Максимовичӧс, и нӧшта сьӧкыдджык — видзӧдны сы вылӧ; сылӧн гырысь чукырӧсь чужӧмысь шогыс рудзаліс-сӧдзтысис быттьӧ тыдавмӧн, кыдзи ёна кӧтӧдӧм ветьӧкысь ва.

— Саша, а тэ мый шуан? — юаліс Гена Игнатов. — Тэныд нӧ абу жальӧсь бать-мамыд, тадзи мучитан найӧс да?

— Ме ӧд ог нарошнӧ... — легис-бӧбъяліс Сашук.

— Но а, век жӧ, мыйла тэ сибӧдчин тайӧ войтыр дінас?

— Накӧд гажаджык...

— Вина юӧмыс да шышкалӧмыс нӧ — гаж? А школаад нӧ гажтӧм?

— Гажтӧм... И гортын гажтӧм... Бур другъяс менам эз вӧвны. Он и тӧд, мый керны. Лыддьысьны дыш-а...

— Тэ олан ыджыд керкаяса кварталын. Тіян, буракӧ, тэ кодь зонъясыс тырыс эм. Мый найӧ вӧчӧны рытъяснас?

— Код мый кужӧ...

— Некутшӧм удж оз нуӧдсьы накӧд?

— Кутшӧм удж? — шензьыштіс Сашук. — Коді нуӧдас? Сӧмын, мыжман кӧ, корлӧны милициялӧн детскӧй комнатаӧ...

— Быд морт асьсӧ толькӧ тӧдӧ, — шыасис век на чӧв олысь Валерьян. — Куш ас пондаыс вийсьӧ.

— Сідзкӧ, ті олӧмсьыс нинӧм бурсӧ он и казявлӧй? — чуймӧмӧн юаліс Света.

— Мыйла нӧ, — шмонитӧмӧ бергӧдіс Валерьян. — Миян зэв гажа рытъяс вӧвліны. Нывъяскӧд... Шампанскӧйӧн... Гитараӧн...

— О Енмӧй! — торкис сійӧс Света. — И тадзи сёрнитӧны миян героическӧй кадся том йӧз!

— Некутшӧм героическӧй кад ме ог аддзы! — зумыша шуис Гаврил. — Йӧзыс, кыдзи и век, мырсьӧны, жӧритӧны да рӧдмӧны...

Тайӧ кывъяс бӧрас залын кыптіс сэтшӧм шум, мый немтор эз позь велавны, коді мый сёрнитӧ. Унджыкӧныс горзісны, мый оз позь татшӧм йӧзсӧ бӧр лэдзны вӧля вылӧ. Найӧ сӧмын тшыкӧдны кутасны мукӧдсӧ.

Председателялысь Гена ӧдва-ӧдва лӧньӧдіс ыззьӧм йӧзӧс.

— Чӧлджыка, чӧлджыка, ёртъяс! — шуаліс сійӧ. — Ми ӧд татчӧ сы могысь и локтім, мед веськыда сёрнитны. Мед повтӧг висьтавны, коді мый думайтӧ... Сӧмын сэки ми вермам бурджыка тӧдмавны висьӧмсӧ да заводитны колана ногӧн лечитны сійӧс.

Кыв сетісны сплавнӧй рейдса ёртлы; мый пӧ тэ верман шуны асланыд уджалысь — Марс йылысь.

Сувтіс зэв кузь тушаа, вӧвлӧн кодь кузьмӧс чужӧма пӧрысь дядь да кос гӧлӧсӧн чорыда шуис:

— Аскисянь жӧ ми сійӧс уволитам. Видзӧд, кутшӧм доброхот вӧлӧма... Миянлы уджалысь колӧ, а не грабитысь да речьяс гижалысь...

— Кыдз нӧ позьӧ ӧні сійӧс уволитны? — друг горӧдіс Кимкӧд орччӧн пукалысь Миля Братенкова. — Мый нӧ лоӧ сэки мортыскӧд?

— Та йылысь коліс сылы аслыс водзджык думайтны. — Дядьӧ стрӧга лыйыштіс видзӧдласнас Милялань. — Абу нин кага... Миянлы татшӧм шышъясыд оз ковны... Миян татшӧмъястӧгыс сідз нин тырмӧ вина юысьыс да удж дисциплина торкалысьыс. Кодӧс карын некытчӧ оз босьтны, сійӧ и уньыртӧ-локтӧ миянӧ...

Сэсся сёрнитіс автошколаысь чиган кодь мугов чужӧма, ар комын вита мужичӧй. Сійӧ быдсӧн чепӧсйыштіс Валерьянлань:

— А ме чайті вӧчны Кызродевсӧ медбур шоперӧн. Сэтшӧм сьӧлӧмсянь быттьӧ велӧдӧ машинатӧ да... Снимайтӧ бура и... Сійӧ миянлы фотостенд лӧсьӧдіс... Ми весиг сійӧс комсоргӧ кӧсйим бӧрйыны...

Зал сьӧкыда ышловзис тайӧ кывъяссьыс. Мужичӧй здук-мӧд кывзысьыштіс да курыда содтіс:

— Этатшӧм томысянь йӧзыс пондісны лоны кык бана шаньга кодьӧсь... Мун да сэсся и тӧд, кодыс сылӧн главнӧй баныс...

Гаврил йылысь сёрнитіс комсомольскӧй секретарыс — сырчик кодь тэрыб вӧраса, бур вирпаса еджыд чужӧма ныв:

— Ми водзджык нин казявлім Гавриллысь неэтичнӧй олан сямсӧ, — сяркӧдіс сійӧ. — Та вӧсна шуим нуӧдны сыкӧд индивидуальнӧй воспитание. Комсомольскӧй бюро индіс шефствуйтны сы вылын бюроса членӧс, медбур штукатуръясысь ӧтиӧс, Люда Туисоваӧс. Мед эськӧ сійӧ велӧдіс ассьыс подшефнӧйсӧ бура уджавны да сӧстӧма овны. Но, буракӧ, Туисова ёрт поручениесӧ вӧчис формальнӧя, эз сяммы колана ногӧн воспитайтны подшефнӧйсӧ. Ковмас накажитны сійӧс...

— Кодӧс накажитны? — юаліс Гена Игнатов.

— Кыдзи — «кодӧс»? — здук кежлӧ мытшасьліс секретар. — Туисовасӧ, дерт! И сы пыдди индыны выль шефӧс...

Залын, первойысь на тарыт кежлӧ, серӧктісны.

— Да кыдз нӧ ӧтнас нывкаыс воспитайтас татшӧм кӧинсӧ?! — чеччыштігмоз горӧдіс Мусанов дядь. — Ті нӧ мыйкӧ думайтанныд он? Да ӧд татшӧмсӧ став коллективӧн колӧ кеслыны? Быд лун кеслыны... А не ӧти коньӧр нывка вылӧ лэдзны...

— Ӧні кывзам Сашук йылысь учительницалысь кыв, — водзӧ нуӧдіс председатель.

Сувтіс ар нелямына, висьлӧс чужӧма нывбаба да майшасяна шуис:

— Мен некыдз, но некыдз оз эскыссьы, мый эсійӧ скамья вылас тшӧтш пукалӧ Тарановалӧн пи. Софья Степановналӧн пи!.. Софья Степановнаыс рӧдительскӧй комитетса член, волывлӧ школаӧ, выступайтӧ... Ошкыны оз вермы писӧ... Сэтшӧм сійӧ тӧлка. Гортас и радиолатӧ мастеритӧ... И музыкатӧ радейтӧ... Но и дивӧ... Но и сё дивӧ!.. Кыдз нӧ ӧні сэсся миянлы, учительяслы, коли думайтны? Мый семьяын немтор оз вӧчсьы челядьӧс велӧдӧм-воспитайтӧм кузя? Весиг Тарановаяс кодь семьяын немтор оз вӧчсьы? Сэки мый нин сёрнитны Гавриллӧн кодь бать-мам йылысь?.. Сідзкӧ, сӧмын школа вылӧ ставсӧ тайӧс и лэдзӧмаӧсь?..

Чӧв усьліс, пӧся видзӧдліс гӧгӧр:

— Ёртъяс! Тіян унаӧнлӧн эмӧсь жӧ челядьыд... Вайӧ ӧтвылысь кутам быдтыны-велӧдны найӧс! Школакӧд ӧтвылысь... Тайӧ ӧд зэв ыджыдтор, — быдтыны челядьӧс. Шуда да тӧлка челядьӧс!.. Мед эськӧ найӧ эз жӧ нин веськавны со этатшӧм скамьяяс вылас! Мед со этатшӧм томысянь эз жугӧдны ассьыныс олӧмнысӧ... Да мед эз дойдавны бать-мамныслысь сьӧлӧмъяссӧ...

Учительницалӧн пӧсь кывъясыс дзикӧдз пузувтісны сідз нин повзьӧм Валерьянӧс. Торйӧн нин сы вӧсна, мый сэки сійӧ буретш видзӧдіс залын пукалысь батьыс вылӧ. Батьыс вӧлі лётнитӧма-ӧшӧдӧма юрсӧ пидзӧсас пыкӧм кияс вылас, чужӧмыс эз тыдав, а пыр шыльыдӧн овлысь зумыд куш юрыс ӧні Валерьянлы кажитчис рушмӧм капуста мач кодьӧн. И паськыд пельпомъясыс со быттьӧ топалӧмаӧсь, нямыртчӧмаӧсь.

«Час ӧні тшӧктасны висьтасьны батьлы... — Валерьянлӧн сувтліс вирыс тайӧ думсьыс. — Мый сійӧ, коньӧр, шуас?.. Мед кӧть эз нин юасьны сылысь... Ме ачым мыйкӧ шуа!.. Мем вемӧдз нин ставыс мӧрччис... Таысь ыджыдджык яндзимыс да дойыс сэсся оз нин овлы...»

И Валерьян корис кыв.

— Верманныд кӧ прӧститны — прӧститӧй... — Тіралысь вом доръясыс Валерьянлӧн оз вермыны ясыдасӧ шуавны кывъяссӧ. — Дурӧм-ворсӧмсянь заводитім, а со кытчӧдз делӧыс воис... Ӧні вӧлись ме гӧгӧрвои, кутшӧм йирӧ ми кӧсйим чеччыштны... Пыдӧстӧм йирӧ... Некор петавтӧм вылӧ чеччыштны...

Тайӧ сьӧкыд здукас Валерьян сьӧлӧм тырнас эскис, мый ӧнісянь сылӧн олӧмыс дзик мӧд кодьӧн лоӧ, сӧстӧмӧн. Ӧні эськӧ сійӧ ёна и скӧрмис, кодкӧ кӧ шуис, мый важыс, код дінӧ ёна нин велаліс, неӧтчыд на бӧр вермылас сійӧс...

Сетісны медбӧръя кыв Марслы. Сылӧн пӧсялӧм-гӧрдӧдӧм чужӧмыс и шог руӧн тырӧм синъясыс оз на лысьтны эскыны, мый ставыс тайӧ бурӧн вермас помасьны.

— Эскӧй кӧть эн, а ме ӧні быттьӧ муні чистилище пыр, — шуис сійӧ кыдз вермис ясыдджыка. — И быттьӧ выль мортӧн петі сэтысь. Водзӧ олӧм вылӧ зумыд надеяӧн... Некор менам оз вун ставыс тайӧ, мый кӧть оз ло мекӧд... Нэм чӧж оз вун... Ставныдлы аттьӧ таысь...

— А тэ мый шуан, Гаврил? — юаліс Гена Игнатов.

— Ме? — чермунліс мӧдыс. — Он кӧ пуксьӧдӧ, ме черессилу на понда уджавны... Ме вед верма уджавнытӧ... Асывъяснад некутшӧм садьмӧдӧм оз ковмы ни...

— Медбӧръя кыв сетсьӧ Александр Петрович Тарановлы! — гораа шуис председателялысь.

Сашук пырысь-пырсӧ эз гӧгӧрво, мый тадзисӧ ыдждӧдлӧны сійӧс, а сэсся быйк чеччис, гигзьыштіс Геналы воча да, катласиг-дзӧригтыр, шуис:

— Ме гожӧмнас муна военно-спортивнӧй лагерӧ. Сэні велӧдча парашютӧн чеччавны.

— Тэ кӧсъян шуны, мый выліас, му весьтас, ён тӧлыс железнӧя пыркӧдас тэ пытшкысь став гудырсӧ? — юаліс Игнатов.

— А мый, гашкӧ, и пыркӧдас, — вочавидзис Сашук гызьӧм зал вылӧ видзӧдігтыр.

Та бӧрын, кыдзи и овлӧ прамӧй суд вылын, морт дас кымын — найӧ, кодъяс медъёна вӧліны йитчӧмаӧсь талунъя делӧыскӧд, — сайӧдчисны гуся сӧвещание вылӧ. Сэсся Гена Игнатов — а сійӧ лоис быттьӧ стрӧгджыкӧн — кыпыда да важнӧя юӧртіс добровольнӧй присяжнӧйяслысь шуӧмсӧ:

— Сы вӧсна, мый скамья вылын пукалысь войтырыс зэв на томӧсь, сы вӧсна, мый медводдзаысь на мыжмисны и пыдісянь гӧгӧрвоисны ассьыныс лёк вӧчӧмсӧ, та вӧсна судитны тюрмаын пукӧдӧм могысь найӧс оз на ков. Но налы кӧ оз мӧрччы талунъя сёрниыс, талунъя бурсиӧмыс, и найӧ кӧ водзӧ на кутасны мунны преступлениеяс туйӧд, то водзӧ вылӧ некутшӧм милӧсьт налы оз ло: выль лёк вӧчӧм дінас лоӧ содтӧма важсӧ, и сэки найӧс кутас судитны сӧветскӧй закон аслас став справедливӧй чорыдлунӧн.


Кызь коймӧд глава


Фойеын Миля буретш вӧлі висьтавлӧ Кимлы аслас «переживайтӧмъяс» йылысь, кор на дінӧ матыстчисны Света да Максим. Миля пырысь-пыр жӧ дугдіс китшкыны, оз тусь рӧма чужӧмыс быгалыштіс. Света тыр синмӧн видзӧдліс Миля вылӧ, мыччис сылы кисӧ, меліа шуис:

— Света. — А кор Миля зумыд кинас зэлыда кабыртліс чуньяссӧ, мӧвпыштіс: «Буракӧ, та дінысь и воӧ вӧлі Кимыс сійӧ войнас. А лӧсьыд... Шыльыд и гӧгрӧс».

Но тадзи сӧмын мӧвкнитіс Света вежӧрын, сы вӧсна мый лолыс сылӧн век на ыпъяліс залын ыззьылӧмысь.

— Со ӧд кыдзи лоис, Ким! — восьтіс сійӧ сьӧлӧм кылӧмсӧ. — Молодечьяс жӧ эськӧ ті да... Сэтшӧма бурмис менам лолӧй... И бордъя думъяс жуӧны юрын...

— Кутан гижны? — юаліс Максим; сійӧ кыдзкӧ тӧдлытӧг долыдмыштіс, кор аддзис Кимӧс топыд вир-яя визув Милякӧд. «Налӧн лоӧны багатыр кодь пиян!» — весиг мӧвпыштіс.

— Колӧ видлыны, Макс! — пӧся шуис Света. — Ог на тӧд сӧмын — кыдзи? Кыдзи бӧрйыны медколанасӧ... Мед эськӧ и йӧзсӧ не дойдавны нин, но мед эськӧ и мукӧдъяссӧ, кӧть кутшӧмакӧ, ӧлӧдыштны татшӧмторъяссьыс. — Сэсся сійӧ быттьӧ сайкалыштіс, юаліс Милялысь:

— Ті, гашкӧ, ӧтлаын велӧдчанныд?

— Ми Кимкӧд мӧд во нин ӧти парта сайын пукалам, — наяна шуис Миля.

— Зэв бур, пукаланныд кӧ, — Милялӧн тадзи шуӧмыс быттьӧкӧ и парсыштіс Светаӧс. — Да, Ким, папа меным тшӧктіс казьтыштны тэныд, мый кӧсйысьӧмыд пыртны сылы мыйкӧ. Пӧльыдлӧн пӧ тай кольӧма.

— Кӧсйыси...

— Эн вунӧд. Папалӧн мыйкӧ ёна нин гажыс бырӧма тэысь...

Света да Максим петісны клубысь. Кор на бӧрся пӧдласис ӧдзӧс, Миля скӧрысь нерыштіс журналисткаӧс:

— «Папалӧн ёна нин гажыс бырӧма!..» Аслад буди бырӧма-а! Мый сійӧ сирасьӧ тэ дінӧ, Ким?

— Ачыд тэ сирасян! — друг дӧзмис Ким.

— Ой, пузис самӧварыс! — кутіс серавны Миля. — Мунам, бурджык, йӧктыштам.

— Дыш...

— Мунам но!

— Абу окота, Миля... Со тай Генка ӧтнас жӧ сулалӧ, йӧкты сыкӧд. Кужӧджык сійӧ...

Ким мыйкӧ дыра видзӧдыштіс уна лыда йӧктысьяс пӧвстын кокниа шуркъялысь Миля да Гена бӧрся, сэсся гажтӧм лои сылы. Тшӧтш и Миляысь яндзим лои: ковтӧг чорыда сёрнитіс. И Ким тэрыба пасьтасис да муніс гортас.

Света да Максим ньӧжйӧникӧн восьлалісны рытъя карӧд, жар клубысь петӧм бӧрын азыма лолалісны ыркыд, из шом тшын кӧра сынӧдсӧ. Сэсся Максим долыдпырысь пондіс мизгыны-сьывны:


...И хотя ты станешь бабушкой,

Всё равно ты будешь Ладушкой,

Лада-а!..


— Макс, эн омляв! — дӧзмӧмӧн шуис Света. — Йӧймӧмаӧсь быттьӧ, быдӧн ӧтиторсӧ омлялӧ!

Максим падмис:

— Лӧдз али мый тэнӧ курччис, милая Света? Ӧні на быттьӧ медся шуда мортнас вӧлін, а, видзӧд со, дӧзмӧмыд нин. Некыдз ме ог вермы гӧгӧрвоны тэнӧ... Тэ быттьӧ турӧба тувсов лун, кор сёысь вежсьылӧ поводдяыс: то тӧв шутьлялӧ, то лым сапкӧ, то шонді жайгӧ да войтва тёпкӧдӧ...

— Ме ӧд Туробова и эм, — нюммуніс Света. Сэсся содтіс: — Мый нӧ либӧ шондіа лун кодь ясыдъяс дінас он сибӧдчы?

— Тэнӧ век на песӧ кольӧм рытыс, да? — кежис вочавидзӧмсьыс Максим. — Дугды... Но, шуам, нёль шышӧс мездін судысь. Но и мый? Аски мӧд нёль лоӧ! Бара ли мый уськӧдчан налысь лёк сьӧлӧмъяссӧ бурмӧдны? Няйтас луасьны?

— Няйтас луасьтӧгыс и мичаыс унаысь оз артмыв, Макс. Весиг зарни весалӧны-перйӧны няйтысь; ракпаньлӧн нильӧг яй пытшкысь аддзӧны жемчуг; куйӧд вылын быдтӧны дзоридзьяс.

— Тайӧс тэ лӧсьыда шуин, Света, но лӧсялӧ-ӧ татшӧмыд миянлы? Мем пыр ёнджыка и ёнджыка чайтсьӧ, мый миян луасьӧмысь дзоридзыд оз чуж. Ме видзӧда да, гижӧмаыд зэв омӧля мӧрччӧ унджык йӧзыслы, зэв омӧля веськӧдӧ найӧс. И таысь менӧ шогӧдлӧ...

— Оз мӧрччы сы вӧсна, мый гижӧдъясным артмӧны дубӧсь да дэбыдӧсь, и йӧзлӧн оз бурмы наысь ловныс. Весиг мӧдарӧ на: бурмӧм пыдди лӧгасьӧны йӧзыс...

— Мукӧдыслы кӧть медся сӧстӧмсӧ сет, всё равно оз бурмы тшыксьӧм лолыс, — ышловзис Максим. — Лыддяс сэтшӧмыс тэнад сьӧлӧмысь пыдзыртӧматӧ, шпыньмунас и пуксяс другыскӧд ректыны вина доз. А сэсся... сэсся тэа-меалы бара ковмас корсьны няйт пытшкысь жемчуг...

— Кодкӧ пуксяс, а кодкӧ, гашкӧ, и оз. Кодкӧ, гашкӧ, и мӧвпыштчас! — пӧся шуис Света.

— Мортыд, милая Света, зэв гӧгӧрвотӧм лов. Видзӧдлан сы вылӧ — быттьӧкӧ ничево, туян. Но со сійӧ паныдасьӧ мӧд морткӧд, и заводитчӧ война. Эк, милая Света, кымын сюрс во нин велӧдӧны мортӧс бурджыкӧн лоны... Аристотель да Сократ на велӧдлісны. А сійӧ со век на пурта да бомбаа ветлӧдлӧ, нывъясӧс грабитӧ да посни челядьӧс лыйлӧ. Мортыд кӧть и зэв тӧлка лои, но век на зэв йӧй...

— Но ӧд мортыс, торъя мортыс, оз сюрс во ов му вылас! Пыр выль и выль йӧз чужӧны. И быд морт, позьӧ шуны, выльысь тӧдмалӧ олӧмсӧ, мирсӧ... Аддзылін, мыйта ныв-зон воліс талун? Найӧ кӧсйисны жӧ мыйкӧ выльӧс тӧдмавны. Кыдз нӧ он отсав налы бур кывйӧн, верман кӧ, сяммыштан...

— Меным окота жӧ отсавны, милая Света. Зэв окота. Окота тшӧтш и кыдзкӧ бурджыка гӧгӧрвоны мортсӧ. Шуам, сійӧ жӧ карса мортсӧ... Кыдзи сійӧ олӧ? Мый понда ёнджыкасӧ вийсьӧ? Мый медъёна колӧ сылы?.. Со, шуам, тайӧ мортыс асылын петӧ аслас позйысь ывла вылӧ, тэрмасьӧ-котӧртӧ кутшӧмкӧ контораӧ. Сэні лунтыр гижалӧ кабалаяс, звӧнитӧ телефон пыр, полыштӧ начальниксьыс... Квайт часын сійӧ жӧ мортыс мунӧ мӧдарӧ. Мый йылысь сійӧ думайтӧ сэки? Гашкӧ: талун пӧ гӧтырӧй уджалӧ рытъя сменаын, сідзкӧ, колӧ котӧртлыны лавкаӧ, мыйкӧ лӧсьӧдны ужнайтны, вердны челядьӧс. Морт сулалӧ ӧти ӧчередь, мӧдӧс, коймӧдӧс... Дӧзмӧ и босьтӧ тшӧтш вина доз... Чайтан, сійӧ кывзас менсьым, ме кӧ шуа: «Эн босьт винасӧ, бурджык, мун да лыддьысь гортад»? Оз кывзысь!.. Сэсся коркӧ-некоркӧ челядь вердӧмаӧсь лоины, ачыс тшӧтш пӧт и код. Лӧсьыд лои... Морт нёровтчӧ диван вылӧ видзӧдны телевизор да сэтчӧ и унмовсьӧ. Аски сідзи жӧ... Кольӧны вояс. Мортлӧн чужӧмас содӧны чукыръяс, а аслас олӧмысь медся главнӧйсӧ, кодӧс вӧчӧм вылӧ, гашкӧ, и чужліс вӧльнӧй свет вылас, мортыс век на кӧсйӧ вӧчны аски. Но локтӧ сэтшӧм лун, код бӧрын аскиыс оз нин ло... Ӧні сэсся и юавсьӧ: вермас-ӧ ми вок коддьӧмыс вежны тайӧ мортыслысь оласногсӧ? Вежны сылысь лов кылӧмсӧ?

— Вермас! — ярскӧба шуис Света.

— А менам, милая Света, татшӧм ыджыд эскӧмыс и абу.

Мыйкӧ дыра чӧла восьлалӧм бӧрын Света друг юаліс:

— Макс, тэ некор на эн висьтавлы меным, мыйла торйӧдчин гӧтырыдкӧд?

Максим падмыліс таысь, кузя ышловзис да шуис нормыштӧмӧн:

— Милая Света, та йылысь позьӧ уна висьтавны. Но ме вайӧда миянлысь, гозъялысь, ӧти сёрни, и тэ, кыдз творческӧй натура, ставсӧ гӧгӧрвоан...

Ме вӧзъя вӧлі сылы мирсьыс став лирическӧй поэзиясӧ!

Сійӧ шуис: тайӧ пӧ абу платтьӧ, ме пӧ сійӧс ог вермы пасьтавны.

Ме вӧзйи сылы вӧр-валысь мичлунсӧ, сӧстӧм ёльлысь дзольгӧмсӧ!

Сійӧ шуис: менам пӧ кынӧмӧй оз пӧт сыысь, ни горшӧй оз веськав.

Мый нӧ, мися, либӧ колӧ тэныд?

Меным пӧ бурджык вӧлі, тэ кӧ вӧзйин, тайӧяс пыдди, кӧть ӧти даса.

Со кутшӧм пӧдруга меным веськавліс, милая Света. Ӧні ачыд думыштлы, кутшӧм олӧмыс менам вӧлі, сьӧкыд.

— Но ӧд «дасаыс» колӧ жӧ, Макс. Ӧд и кага нин тіян вӧлӧма. Куш лириканад сійӧс он верд ни он пасьтӧд... Ачыд тай быдмылӧмыд батьтӧг...

— Эк, милая Света, вай эн нин дойдав менӧ каганас... Менам сьӧлӧмӧй потласьӧ сы вӧсна... Некор сӧзасьлытӧм рана моз ымралӧ сійӧ морӧсын... Но всё равно тай торйӧдчыны лоис... Кор тэнсьыд войбыдъя уджтӧ, пессьӧм-мучитчӧмтӧ оз лыддьыны уджӧн — тайӧ ме кодьыслы абу жӧ олӧм...

Татшӧм сёрнияссьыс кусыштіс Светалӧн лов вылысь талунъя ыззьылӧмыс: быттьӧ виччысьтӧм пуж чишнитіс шонді вылӧ ёна на надейтчысь дзоридзьяссӧ.

Максимлӧн мӧвпъясысь мынтӧдчыны Света эз вермы и гортас.

«Вермас-ӧ ми вок коддьӧмыс вежны, бурмӧдны мортӧс?»

А збыль кӧ оз? Став гижӧм-керӧмыс кӧ сылӧн збыльысь пожйӧн ва койӧм? Куш сӧмын кабала тшыкӧдӧм?

Тайӧ мӧвпъяссьыс Светалӧн пемдыліс син водзыс.

Сійӧ, Света нима ныв, сёйӧ кодлӧнкӧ киясӧн быдтӧм нянь, новлӧ кодлӧнкӧ киясӧн вӧчӧм пась... А ачыс мый водзӧссӧ сетӧ? Збыль ӧмӧй сӧмын дуб ва, мыйысь некодлӧн оз бурмы лолыс?

Сідзкӧ нӧ, мый?! Мый нӧ колӧ вӧчны? Мый водзӧсӧ колӧ вӧчны сылы, мыйкӧ кӧ кӧсйӧ сетны йӧзлы коланасӧ?! Нянь кодь да пась кодь жӧ коланасӧ? Мыйджык да кыдзиджык колӧ керны-вӧчны сылы, тшӧтш кӧ нин чужис сійӧ мортӧн?!

Лӧсьыда ӧнтай шуис Ким: чужин кӧ мортӧн, кывкут ас вӧснаыд... А вот и кывкут, кор весиг он на тӧд, колана али абу тэнад уджыд. Налы та боксянь, дерт, гӧгӧрвоанаджык — вӧчисны мотор и тӧдӧны, мый сійӧ колӧ йӧзлы.

Но сылӧн, Светалӧн, колана жӧ, колана уджыс! Максим вывтіджык омӧльтӧ асьсӧ... И уджсӧ ассьыс... А, гашкӧ, и нарошнӧ вӧйпӧдлӧ сійӧс, водзвыв артыштӧмӧн зільӧ восьтыны олӧмыслысь джуджыд сюнъяссӧ, мед сійӧ, Света, эз чайт, мый олӧмыс сӧмын гажа праздник кодь; мед сійӧ, том журналистка, гӧрис-босьтіс аслас гижӧдъясын гырысьджыка, лэпталіс-бергӧдаліс сэтшӧм пластъяс, кодъяслӧн вына му син вылын азыма чужисны эськӧ Бурыслӧн петасъяс.

Сідзкӧ, оз ков жалитны асьтӧ та могысь! Колӧ пыдзыртны гижӧдад лолыдлысь став жарсӧ и дойсӧ, йӧзлӧн шудаджык олӧм вӧсна пессьӧмсӧ. Колӧ корсявны сэтшӧм кывъяс, сэтшӧм мӧвпъяс, мед эськӧ найӧ вермисны вӧрзьӧдны, ӧзтыны йӧзӧс, торйӧн нин том йӧзӧс. Ӧзтыны бур вылӧ, тайӧ му вылас сетӧм олӧмсӧ интереснӧйджыка, шудаджыка коллялӧм вылӧ.

А ӧзтыныд, ыззьӧдныд морттӧ быдторйӧн позьӧ! Позьӧ... Со тай нӧ ачыс сійӧ, Света, талун на вӧлі ӧзйӧма. А воддза лунъяснас сэтшӧма ӧзйыліс, весиг конькиӧн фигурнӧя исласьысьясӧс видзӧдігӧн. Дерт, эз жӧ быдӧнысь... И тані сэтшӧмтор жӧ артмӧ! Ӧтияс быттьӧ шыльыда жӧ исласьӧны, лӧсьыда вӧчӧны став колана фигураяссӧ, оз джӧмдавны. Но лов пытшкад мыйлакӧ некыті оз вӧрзьыв... А мӧдъяс вылӧ видзӧдігӧн кыдзкӧ тӧдлытӧг ыпнитан-ӧзъян, лолыд нимкодясьӧ, тырӧ югыд радлунӧн, и окота аслыд вӧчны мыйкӧ бурӧс да мичаӧс.

И, буракӧ, тадзи жӧ быдторйысь, быд удж керӧмысь. Кор сійӧс керӧны оз тяпки-ляпки — мед сӧмын кодлыськӧ син пӧртны, а кор мортыс сетӧ керан-вӧчаныслы ассьыс медшӧр вынъяссӧ, став пӧсьлунсӧ и сямсӧ. Кор мортыс оз вермы сытӧг овны, кыдзи колипкай — сьывтӧг.

Сэки вермас ӧзтыны йӧзӧс не сӧмын пӧсь сёрниа оратор, но и черӧн керасьысь, не сӧмын гырысь мӧвпъяса математик, но и чӧскыд нянь пӧжалысь, и гижысь!

Сідзкӧ, сылы, Светалы, колӧ дзикӧдз вылӧ вунӧдлыны ас йывсьыс. Колӧ мыйкӧ дыра кежлӧ лолыны наӧн, кодъяс йылысь кӧсйӧ гижны. Мед эськӧ найӧ кабала вылын эз лоны вуджӧръяс кодьӧн, а мед ловъя йӧзӧн и колины...

А кыдзи тайӧс вӧчны?

Буракӧ, медводз колӧ стӧчмӧдны, кыдзиджык да мыйӧнджык йӧзыс, быд морт медъёна шызьӧдӧны сійӧс, Светаӧс. А сідзкӧ, и уна мукӧдӧс тшӧтш.

Шуам, кыдзи эськӧ сійӧ серпасалас Кимӧс, босьтчас кӧ быттьӧ гижнысӧ?

Вежӧрыс сылӧн, дерт, сёрмыштӧма сӧвмӧмнас. Ӧні вӧлись кутӧма казявны, мый уна тӧдтӧг да олӧмсӧ, ӧніясӧ и важсӧ, пыдіа гӧгӧрвотӧг збыль вылӧ мортӧн он ло. Но кыдзсюрӧ олігас лёкыс йиджӧма жӧ нин сы пытшкӧ и, буракӧ, корсюрӧясӧ дзикӧдз вылӧ вермылӧ...

А сідзсӧ мортыс шензьӧдана шань. Сы вылӧ видзӧдлігӧн весиг кыдзкӧ шызьыштлӧ лолыд...

Но, а кутшӧмджык эсійӧ нылыс, коді тай Кимыскӧд вӧлі?

Том ельдӧг кодь. Абу ме моз кос вижля...

А мыйла сійӧ меным колӧ? Ме ӧд сійӧс ог кут сюйны аслам гижӧдӧ. Меным колӧ бурджыка петкӧдлыны заводсаясӧс. «Корсаръясӧс» колӧ ясыдджыка мыччӧдлыны. Кыдз шуласны, нетшыштны пельӧдныс да и петкӧдны гож водзӧ... Шуам, мыйджык найӧс, ставнысӧ, ӧтувтӧ? Мый ӧткодьыс налӧн? Збыльысь ӧд, мый нӧ эськӧ? Абу велӧдӧмаӧсь найӧс мӧд морт йылысь ыджыда да бур ногӧн думайтны, со и пурсьӧны... Лёк ногӧн быдтӧм урӧс кычан моз, коді, кӧзяинсьыс ӧтар, быдӧн вылӧ эралӧ-усьласьӧ...

Но сэк жӧ найӧ и быдӧн разнӧйӧсь: быдӧнлӧн аслас чужӧм, аслас вӧрас. И ставсӧ тайӧс колӧ казявны да петкӧдлыны ловъяӧс моз. Весигтӧ кияссӧ. Киыд ӧд уна жӧ висьталӧ морт йывсьыс. Шуам, Максимлӧн кос чуньяса неыджыд киыс ас кодьыс жӧ нервнӧй. Но тайӧ киыс гижӧ сьӧлӧмтӧ вӧрзьӧдана кывъяс:


«Эськӧ чорыд изйысь дзоридз

Сывдіс радейтӧмлӧн би...»


Кимлӧн кыдз пу йӧг кодь топыд кабырыс вермӧ вежыньтны кодсюрӧлысь тшӧка лыяссӧ. Но сійӧ жӧ чуньясыс, разсясны да, рисуйтӧны русалкаӧс...

Валерьян Кызродевлӧн удж тӧдтӧм на киыс вит шайт понда шамралӧ татшӧм русалкаясыслысь голяяс. Милялӧн пельк киыс, гашкӧ, малалӧ Кимлысь кузь юрсисӧ. А нӧшта эмӧсь батьыслӧн кияс, кодъясӧс сійӧ, Света, ставсяыс ёна радейтӧ. Сы вӧсна мый тайӧ негырысь, рӧчьяс костас гӧрдоват гӧнъяса киясыс вынаӧсь и меліӧсь, и быдтор кужӧны вӧчны, и немтор оз мын да усь наысь.

Кор Света вӧлі ичӧт на, тайӧ шоныд киясыс мыссьӧдлывлісны и пасьтӧдлісны сійӧс, кылісны кӧсаяссӧ. И сэтшӧм любӧ вӧлі нывкалы кывны налысь вына пельклунсӧ.

Мыйсӧ сӧмын эз вӧчлыны тайӧ киясыс! Найӧ ӧткодь пелька поткӧдлісны увйӧсь пес чуркаяс и лебезитісны нежнӧй дзоридзьяс, вӧчалісны парникъяс и кыисны кулӧм, гижисны гусясьӧм йылысь актъяс и солалісны тшак.

Торйӧн нин шызьӧдлывлісны нывкаӧс батьыслӧн киясыс аръявыв, кор му вылын, вӧр-ваын быдтор кисьмыліс-сӧвмыліс. Сэки батьыслӧн киясӧ — быттьӧ йиджтысьлісны войвыв мулӧн став пӧлӧс кӧръясыс: сола тшаклӧн ёсь кӧрыс и сэтӧр корлӧн шомыс, чеснӧклӧн курыдыс и дозмӧр вир-яйлӧн мырдыс...

«Жаль, мый нывкаыд, быдмыштӧм бӧрас, ылалыштӧ бать дінсьыс», — мӧвпалӧ Света. Ӧні быттьӧ яндзим нин лоӧ, пондас кӧ батьыс шыльӧдны юрсиӧдыд. И коркӧя моз он нин висьтав сылы ассьыд майшасьӧмъястӧ да сьӧлӧм дойястӧ. А висьтавнысӧ эськӧ и эм мый!..

Мамыд со абу ни...

И ставыс тайӧ — олӧм, ставыс йитчӧма ӧта-мӧдыскӧд. А сылы, Светалы, гижигас ставсӧ колӧ бура гӧгӧрвоны да немтор не дзугны.


Кызь нёльӧд глава


Колис лун дас. Миян войтырлысь ловнысӧ ойдӧдлӧм ытваыс быттьӧкӧ и ямыштіс нин. Неэтша лӧп сійӧ нӧбӧдіс-нуис, неэтша видз бур нюйтӧн вынсьӧдіс. Но и бур ытваыд оз на тай вермы дзикӧдз вылӧ весавны дыр кад чӧжӧн кляптӧссьӧм юястӧ...

Карса улича вылын Пётр Максимович Тарановлы паныдасис Сашуклӧн класснӧй веськӧдлысьыс да шуис:

— Пётр Максимович, ті тай нӧ энӧ кутӧй волыны школаӧ? Софья Степановнаӧс сы дыра нин синмӧн эг аддзыв.

— А мый? Коліс эськӧ? — чуймыштіс мӧдыс.

Учительницалӧн стрӧгкодь синъяса векни чужӧмыс лои кедзовтанаӧн:

— Ог тӧд... Пиыдлӧн куим «двойка» петіс четвертяс да. Тіянлы кӧ веськодь таысь, дерт...

— Кыдзи куим «двойка»! — Пётр Максимовичлӧн быдсӧн вошліс гӧлӧсыс. — Ме жӧ ачым видзӧдлі дневниксӧ... Мамыс кырымаліс... Немся «двойка» сэні эз вӧв... Дерт, и «пятьяс» абуӧсь.

— Куим «двойка» вӧлі пасйӧма сэтчӧ.

— Но дивӧ тай!.. Но и дивӧ!..

Пётр Максимович важӧн нин эз ветлыв ӧнія моз тэрыбасӧ: сійӧ лӧсйис-муніс гортас котӧрӧн сорӧн, некодӧс казявтӧг. Сылӧн, сідзсӧ лӧнь мортлӧн, сьӧлӧмыс ӧні вӧлі потан выйын, а ӧттшӧтш сир курыд шог лои. Сылы некыдз эз эскыссьы, мый бӧръя лоӧмторъяс бӧрас пиыс бара на вермис тадзи пакӧститчыны. Пётр Максимовичлы тайӧ кажитчис олӧмас медбӧръя тшупӧдӧдзыс усьӧмӧн. И таысь сы сьӧлӧмын некутшӧм прӧща эз вӧв.

Аслас ключӧн ӧдзӧс восьтігӧн Пётр Максимович кыліс магнитофонса сьылысьлысь мый вынсьыс горзӧм, и тайӧ шыясыс ещӧ на скӧрмӧдісны сійӧс.

Сашук пукаліс ыджыд жырса пызан сайын, ӧти киас кутіс книга, мӧд кинас сёйис, а кокъяснас и став тушанас тшӧтш легис-зымӧдчис музыка шыяс улӧ. Пётр Максимовичлӧн томдырся мозыс сьӧктіс-зэлаліс кулакыс, сійӧ лёкысь горӧдіс:

— Мый тэ керин дневникад, урӧд?!

Сашук повзьӧмысла ляпмуніс улӧс вылас, тірзьысь вом доръяснас мыйкӧ пондыліс шуны:

— Папа, ме!..

Но Пётр Максимович немтор эз кыв, скӧрыс да сьӧлӧм дойыс быттьӧ уль сирӧн тупкисны пельяссӧ, сійӧ сӧмын жмотйӧдліс пиыслы кулакнас, став йывсьыс вунӧдӧмӧн кучкаліс кытчӧ веськалӧ.

Дасысь кымын кульыштӧм бӧрын сӧмын паляліс Пётр Максимович. Друг быттьӧ чуймыштіс, гӧгӧрвоысьджык синъясӧн нин видзӧдліс никсысь пиыслӧн лесмунӧм-йӧжгыльтчӧм туша вылас, ымӧстіс, шлапкис-тупкис кыкнан кинас чужӧмсӧ да уськӧдчис аслас жырйӧ.

А эновтӧм магнитофон, быттьӧ нинӧм абу и вӧвлӧма, водзӧ сьыліс ышмысь вильыш гӧлӧсӧн йӧй сьыланкыв:


А нам всё равно!

А нам всё равно!

...Всё нам трын-трава...


Лимзысь Сашук чеччис да кусӧдіс магнитофонсӧ, тэрыба матыстчис батьыслӧн жырса ӧдзӧс дінӧ, но эз лысьт пырны. Сулыштіс чӧла сыркъялігтыр, а сэсся и восьтіс ӧдзӧссӧ.

Батьыс пукаліс неыджыд письменнӧй пызан саяс, юрсӧ кияс вылас ӧшӧдӧмӧн; и гӧрбыльтчӧм мышкыс, и лётмунӧм пельпомъясыс вӧчисны сійӧс зэв коньӧрӧн.

— Папа, «двойкаясыс» менам важсьыс на петісны, — бӧрдігтыр шуаліс Сашук. — Менам бӧръя каднас ёна кольсьӧма... Ме эг нин кӧсйы шогӧ уськӧдны тіянӧс... Мися, бӧръя четвертьнас ставсӧ бӧр косӧда.

— Мыйла нӧ тэ он честнӧя ов, Сашук? — юрсӧ кыпӧдлытӧг шуис Пётр Максимович. — Мый нӧ тэныд оз тырмы? Мыйла нӧ тэ бать-мам йывсьыд ньӧти он думыштлы?

— Папа, верит меным!.. Ме кӧдзӧдчи нин важ лёксьыс! Ме кута бӧр бурджыка велӧдчыны.

Пётр Максимович сувтіс да топӧдіс пиыслысь юрсӧ морӧс бердас, кутіс шыльӧдны нывлӧн кодь юрсиӧдыс.

— Юрситӧ со мый кузя лэдзӧмыд и... Полӧкалӧ кодь ветлӧдлан.

— Папа, тэ мамыдлы эн висьтав...

— Кыдз нӧ татшӧмтор он висьтав, Сашук? Тэ со бара нин кӧсъян правдасӧ дзебны. Мыйла нӧ тэ сэтшӧм лоӧмыд?

— Эн висьтав, папа!

— Мамаыд метӧг тайӧс тӧдмалас, — ышловзис Пётр Максимович. — Гашкӧ, и тӧдӧ нин.

— Ой, папа, мый нӧ мем вӧчны?!

Рытнас Сашук гортас эз лок.

Коньӧр Софья Степановна вӧлі йӧйман выйын. Сійӧ эз ӧшйы места вылас, ветлӧдліс жырйысь жырйӧ кӧтасьӧм синъяса, и чужӧмас вӧлі сы мында мам шог.

Кор верӧсыс висьталіс, мый скӧрмӧмвывсьыс ёна нӧйтіс Сашукӧс, Софья Степановна кутчысис юрас.

— Ой, кын морт тэ, кын морт! Мый нӧ вӧчин?! — майшасис пикӧ воӧм мам. — Сідзи ӧмӧй колӧ сёрнитны кагаыскӧд? Сылӧн жӧ сэтшӧм нежнӧй сьӧлӧм! Сэтшӧм впечатлительнӧй сійӧ... Важ дойыс на эз вӧв бырӧма сылӧн... Сашукӧй!.. Гашкӧ, и ӧшӧдчис нин, кагаӧй менам... Мун корсь буди, паськыд плеш!

Пётр Максимович кыв ни джын эз лысьт шуны воча. Сійӧ вӧлі и ачыс зэв ёна повзьӧма. Сійӧ ӧні и ачыс эскис, мый матӧ воӧм пиыс вермис мыйкӧ вӧчны аскӧдыс.

Пётр Максимович кайліс керка лӧскас да, лоана шуштӧм серпасысь водзвыв полігтыр, фонарикӧн видлаліс став пельӧсъяс. Сэсся петіс рытъя карӧ, ветліс Сашуккӧд ӧти классын велӧдчысь зонка ордӧ, лэччыліс Валерьян Кызродев дінӧ, но сьӧлӧм личӧданасӧ некод нинӧм эз висьтав.

Пётр Максимович воліс став вокзалъясӧ — Сашук некӧн эз вӧв. Збыль ӧмӧй мыйкӧ лёктор лои?!

Сьӧкыд сьӧлӧмӧн Пётр Максимович бӧр пырис гортас. Кӧть эськӧ эн и пыр сэтчӧ, но кытчӧ воштысян...

Мый сійӧ вермис вочавидзны гӧтырыслы, сы вылӧ веськӧдӧм, надеяӧн ӧзйысь синъяслы? Немтор.

— Ой, кырныш, помаліс тай кагасӧ! — шуис коньӧр мам, йӧжгыльтчӧм верӧс вылас помтӧм лӧглунӧн и зывӧктӧмӧн видзӧдлігтыр.

Софья Степановна бара на — кымынӧдысь нин! — уськӧдчис телефон дорӧ, лэптіс трубкасӧ, мед звӧнитны милицияӧ, но эз звӧнит, вынтӧма бӧр гольскис-пуктіс трубкасӧ. Сылӧн эз на жӧ помӧдз быр надеяыс Сашуклӧн локтӧм вылӧ. А водзвыв йӧзасьны, кар пасьта лэптыны выль мисьтӧм слава, сылы эз жӧ окота вӧв.

— Соня, тэ лӧньӧдышт асьтӧ, — небыда шуис Пётр Максимович. — Буракӧ, кутшӧмкӧ друг ордӧ узьмӧдчис. Аски локтас... Сійӧ ӧд миян мудер, дипломат кодь, тӧдӧ, мый тарыт эськӧ эз юрси ньылӧдыс шыльӧдны...

— Ланьт тэ, кын чурка! — друг мый вынсьыс горӧдіс Софья Степановна. И бӧрддзис. А сэсся бӧрдӧм сорӧн да лёкысь, зывӧктӧмӧн пондіс шуавны: — Менсьым сісьтін олӧмӧс да и кагаӧс помалін... Бӧрйылан жӧ мужикӧс! Ой-ой-ой!.. Мун буди син водзысь, мустӧм ош!.. Зывӧк тэ меным! Зывӧ-ӧк!..

Софья Степановна вомсӧ паськӧдӧмӧн, морӧс тырнас сьӧкыда лолаліс, сылы, берег вылӧ веськалӧм черилы моз, эз тырмы сынӧдыс, мыйысь нӧшта нин сотчӧмӧн сотчис морӧсыс да гудырмис юрыс.

— Куш ме век мыжа... — пондыліс на рама бурӧдны ярмӧм и пикӧ воӧм гӧтырсӧ Пётр Максимович.

— А коді нӧ?! Тэ!! Тэ!!! Кын морт!! Ой-й!..

— Тэ нӧ ёна «сыв»? — лӧня, но скӧрысь жӧ нин шуис Пётр Максимович. — Ме тэ вӧсна эновті ассьым семьяӧс, нылӧс. Мед тэныд бур вӧчны, ме некор эг казьтыв на йылысь... Эг отсав ни. Ме дзикӧдз вылӧ вошті нылӧс... И тані со — «мустӧм ош». А коркӧ колана вӧлі... Кор тэнӧ эз на сэтшӧма лэптыны... Кор эн на вӧв руководящӧй номенклатурнӧй бабаӧн... Кор эн на банкетась ыджыд начальствокӧд.

— Мун син водзысь, ради бога!!! — Софья Степановна весиг зымкнитіс кокнас.

— Ме муна... — гажтӧма шуис Пётр Максимович. — Ме верма дзикӧдз мунны. Ме видзӧда да, менам колӧ нин вӧчны аслам олӧмӧйлы баланс. Но тэ, Соня, кӧть и метӧг, шудаджыкӧн он жӧ ло. Сашук оз ло ни...

Пётр Максимович юрсӧ ӧшӧдӧмӧн пырис аслас жырйӧ, перйис письменнӧй пызансьыс джынъялӧм водка доз да стӧкан, кисьтіс стӧкан тырыс да горша юис.

Регыд мысти думъясыс быттьӧ лӧньыштісны. Найӧ дой вӧчтӧг, пыр овлантор вылӧ моз, индісны медся веськыд, медся колана туй, код йылысь бӧръя каднас неӧтчыд нин вӧлі думыштлӧма: «вӧчны аслам олӧмӧйлы баланс».

Пётр Максимович чӧла видзӧдліс шкап сайын сулалысь двустволка вылӧ, кодӧс во нёль-ӧ-вит нин эз босьтлы киас. «Гашкӧ и, чистӧ нин сімис», — друг мӧвпыштсис ковтӧма.

Сэсся Пётр Максимович пондіс думайтны сы йылысь, мый колӧ эськӧ лыйны сьӧлӧмас, но сэки вермас киыд дрӧгнитны, и пуляыс бокӧ мунас. Он кув ещӧ, а сӧмын дойдан асьтӧ. Бурджык нин вомад стволсӧ сюйны да швачкыны, сэки оз дрӧгнит.

«Кывлас оз нывкаӧй-а? Кутшӧмджык бара сійӧ лои-а?»

Пӧсь ни кӧдзыд сылы лоӧ, кӧть и кывлас... Буракӧ, Сашук дыртӧ оз шогав ни... Налӧн асланыс олӧм. Некоднаныслы ме эг ло матыссаӧн, аслам олӧмӧн, аслам примерӧн эг сяммы ӧзтыны налысь ловнысӧ. Эг сяммы. Налӧн, гашкӧ, сӧмын вирыс кутшӧмакӧ ме кодь, а ловныс — абу...»

Пётр Максимович ышловзис да кутіс корсьны пуляа патрон. Но сэки воссис ӧдзӧс, и кыліс Софья Степановналӧн повзьӧм гӧлӧсыс:

— Петя, мый тэ тані вӧчан? Меным страшнӧ ӧтнамлы... Петя, прӧстит менӧ сідзи сёрнитӧмсьыс... Ме ачым ог тӧд, мый ме вӧча.

Пётр Максимович дзикӧдз шӧйӧвошис тайӧ кывъяссьыс, и гӧлӧссьыс, кутшӧмӧн вӧлі шуӧма найӧс. Гӧтырыслӧн сёрниас вӧлі не сӧмын пикӧ воӧм мортлӧн ёна майшасьӧм, но мыйкӧ тшӧтш и мӧдтор, Пётр Максимовичӧн вунӧдӧматор нин; сэні тшӧтш вӧлі матысса мортлӧн, уна во чӧж нин орччӧн олысь ёртлӧн мелілун. Татшӧмсӧ Пётр Максимович важӧн нин эз кывлы. И сылӧн пырысь-пыр жӧ быттьӧ гугасис лолыс и здук кежлӧ садьтӧг повзьыліс сыысь, мый ӧні на кӧсйыліс вӧчны.

— Соня, оз ков сэтшӧма вийсьыны, — став мелілунсӧ чукӧртӧмӧн шуис сійӧ. — Немтор оз ло...

Софья Степановна, пидзӧс вылас шыбитчӧмӧн, ляскысис верӧсыслы кос волӧдзас да кутіс сыркъявны-бӧрдны. А Пётр Максимович чӧла шыльӧдіс гӧтырыслысь топыд яя мышсӧ, и сылы кажитчис, мый ӧні медводдзаысь на паныдасьӧ визув да варов Сонякӧд.

Сійӧ войнас гозъя, вель ыджыда нин коставлӧм бӧрын, узисны ӧтлаын. Узьӧмыс эськӧ, шуам, эз и вӧв — сыӧдз-ӧ, кор сэтшӧма виччысян вошӧм питӧ! — но куйлісны ӧти вольпасьын и ӧти сёрни сёрнитісны.

А Сашук воис аскинас. И, дерт, ёна ыджыд видӧмъяс эз нин вичмыны сылы. Кутшӧм нин сэн видчӧм! — сё пасибӧ, мый ловъя на!


Кызь витӧд глава


Николай Васильевич, мыйӧн сӧмын воис удж вылысь, тэрыба вежсис да петіс йӧрӧ — колӧ вӧлі теплицаӧ сюйны вӧв куйӧд, кодӧс тӧдса шопер вайыштіс совхоз картаысь.

— Сёйыштін эськӧ первой! — тӧждысяна видліс вӧзйыны пӧрысь мамыс.

— Бӧртиджык, мырсьышта да, чӧскыдджыка сёйсяс, — шуис Николай Васильевич.

Куйӧдыс вӧлі бур, тавося на да улис. Николай Васильевич гургӧдаліс сійӧс водзвыв вольсалӧм пӧвъяс кузя ӧти кӧлесаа неыджыд тачкаӧн да нимкодьпырысь думайтіс, кутшӧм бура кутас пӧсявны татшӧм куйӧдыд да шонтыны мусӧ. Улісянь тайӧ шоныдыс, вылісянь — шонділӧн жайгӧмыс, и кыдз сэсся не быдмыны ӧгуречыдлы да помидорыдлы.

Николай Васильевич вӧлі быдтор дінӧ сьӧлӧмсянь босьтчысь, удж радейтысь мортӧн, но век жӧ аслас неыджыд сад йӧрас лолыс сылӧн, позьӧ шуны, медъёна бурмывліс. Ӧд мыйыс сӧмын эз вӧв сэні! Керка пӧлӧныс да йӧр гӧгӧрыс, буракӧ, садиталӧма став пуяссӧ да кустъяссӧ, кодъяс сӧмын быдмӧны миян — да и не сӧмын миян! — муын: пожӧм и ӧмидз, ниа пу и сэтӧр, сус пу и льӧм пу; быдмисны сэні тшӧтш куим яблоня, сирень куст, весигтӧ шомкор да вӧдитан оз вӧліны йӧрас; быд гожӧм сярвидзис-нюмъяліс мича баннас уна пӧлӧс дзоридз, выйӧдзтӧ гладиолусъяс да астраяс... Позьӧ шуны, тані вӧлі неыджыд ботаническӧй сад; и кутшӧм кӧть морт эз веськавлы сэтчӧ гожӧмын, шензьӧмысла вель дыр акйӧдлывліс да окйӧдлывліс, морӧс тырнас лолавліс-кыскывліс чӧскыд сынӧдсӧ да сьӧлӧмсяньыс ошкывліс бур киподтуя кӧзяинӧс.

Кор керка дорӧ матыстчис Ким, Николай Васильевич вӧлі ноксьӧ йӧрын восьса морӧса дӧрӧм кежысь. Весиг шапкасӧ пӧрччӧма, мугов куш юрыс ньылӧдӧма. «Сылӧн, буракӧ, юрсьыс гожйӧдыс оз и вушйыв», — думыштіс Ким, дядьӧлӧн тэрыб вӧрасъясӧн нимкодясигтыр.

— Уджалысь йӧзлы, чолӧм! — шуис Ким яндысигтырйи.

Мӧдыс тэрыба бергӧдчыштіс, и пырысь-пыр жӧ мугов чужӧмыс нимкодьмис:

— А Ким! Чолӧм-здорово! Лок, лок...

— Кӧсйысьӧмтортӧ вайи, важ пуртӧсӧс... — ӧдйӧджык висьталіс могсӧ Ким.

— Пуртӧстӧ? Аттьӧ, бур пи!.. — водзӧ на нимкодьмис кӧзяин, быттьӧ Ким вайис сылы эз важ пуртӧс, а зарни ёкмыль. — Часлы, пырам гортӧ.

Николай Васильевич сувтӧдіс тачкасӧ пес лэбулӧ, ки мышнас ньылӧдӧм кымӧссӧ ниртігмоз, дӧвӧльпырысь видзӧдліс теплица вылӧ.

— Час, коркӧ гожӧмнас волы. Аддзан со пызансӧ? Швачкам-сувтӧдам сэтчӧ вина доз, ваялам ставсӧ, мый йӧрын быдмӧ, и — пуксьылам. Ӧгуречыд лысваа на, оз тусьяс ыркӧдӧны вомтӧ.

— Быдторсӧ ті тані быдтанныд, Николай Васильевич, сымда удж бергӧданныд, — сигарет ӧзтігмоз Ким довкнитіс юрнас йӧрлань.

— Ог ме, а муыс чужтӧ-быдтӧ, Ким. Шонді нӧшта да... — Николай Васильевичлы долыд, мый сылысь уджсӧ гӧгӧрвоӧны. — А ме? Ме сӧмын отсася налы, кыдз верма... Мыйӧн воас пуктысян кад — быд рыт йӧрын, кӧть ог и пырав гортӧ. Коскӧдз пӧрччыся, кӧмтӧм, гач кокъясӧс пидзӧсӧдз пуджӧма, жӧдза-тапикася. Аслым сэтшӧм любӧ кывны кок улын небыд да шоныд мусӧ. А кор тэнад пуктӧмаыд, тэнад киясӧн малалӧм-чередитӧмаыд вӧрзяс, пондас петны муысь, сэки сё пӧв нимкодь лоӧ. Ӧд кутшӧм рӧм сӧмын оз мыччысь муысь! Кысь мый сӧмын и сӧдзтысьӧ-петӧ! Ӧти тусьысь — лым еджыд, мӧдысь — синтӧ ёрмӧн гӧрд. Кыськӧ тай, небось, кыскӧ быдмӧгыс... Ывла мичыд кодь сэсся немтор нин абу...

— А мукӧдлӧн йӧрас куш сӧмын картупель и эм, — шуис Ким.

— Хы-ы... — шпыньмуніс Николай Васильевич. Кыкнанныс найӧ пукалісны-куритчисны пес пилитан кӧзла вылын. — Куш картупельнад, дерт, этшаджык ноксьӧмыд. Но ӧд сэки и йӧрыд гажтӧмджык. Немтор вылӧ видзӧдлыны. — Чӧв усьліс, кызӧктыштіс да мӧвпаланаджык содтіс: — Менам, гашкӧ и, эськӧ картупель жӧ вӧлі, не кӧ Нина, мада гӧтырӧй... — кузя ышловзис. — Сійӧ миян ёна дзоридзьястӧ радейтіс... Гашкӧ, сы вӧсна, мый кӧдзыдінын чужлӧма, тундраын. Изьватас сійӧ миян вӧлі. Мыйӧн сӧмын керканымӧс кыпӧдім, пырысь-пыр жӧ кӧйдысъяс кыськӧ судзӧдіс, кӧть эськӧ сэкся кадас быттьӧ и не дзоридзьясӧдз вӧлі. Мед пӧ миян нывканым мича дзоридз пӧвстын быдмӧ, мед пӧ быдмигчӧжыс босьтӧ налысь мичлунсӧ да авъялунсӧ. Сэтшӧм сійӧ вӧлі миян...

Николай Васильевич бара чӧв усьліс, сэсся кучкыштіс веськыд кинас кӧзла помӧ да кыпыда нин шуис:

— Он, му дінсьыд менӧ он кӧдзӧд! Кымын во ола карын, позьӧ шуны, пролетарий, но сьӧлӧмӧс век кыскӧ му дінӧ, ог вермы ме сытӧг, му выв быдмӧгъястӧгыд...

Кильчӧ поскӧд кайигӧн друг юаліс:

— Сэсся, шуан, вӧчинныд шышъясыслы Нюрнбергскӧй процесс? Света висьтасис... Кыдз тэ чайтан, мӧрччас тайӧ налы?

— Ёна тай майшасисны-а, — шуис Ким. — Код тӧдас сэсся.

— Света миян шуӧ жӧ: татшӧм гогналӧм бӧрад пӧ найӧ выльысь пыртӧма кодьӧсь лоӧны. Ог тӧд. Гашкӧ и... Сӧмын морттӧ зэ-эв сьӧкыд вежны!

— Тайӧтӧ сідз, — ӧтикывъясис Ким.

— Бӧр кӧ ас кежсьыныс кольӧны, ньӧти оз вежсьыны. Томлуныслысь бисӧ бара на пондасны лотны кутшӧмкӧ йӧйталӧм вылӧ.

— Ми ӧтиӧс босьтім асланым бригадаӧ.

— Вот и молодечьяс! — зэв ёна долыдмис Николай Васильевич. — Буртор керинныд! Тіян дінын сійӧ бӧр на веськӧдчас. Югыдінӧ веськалӧм быдмӧг моз... Мортыд пӧ кодкӧд олӧ, сы кодь и лоӧ. Торйӧн нин том мортыд.

Пӧрысь баб дыркодь кутліс Кимлысь кисӧ да меліа шуаліс:

— Лок, лок, дона морт, важӧн тай эн пырав... — А сэсся индіс шуда синъяснас аслас кокъяс вылӧ: — Шань и добра ті вайинныд меным... — Бабӧ чушъяліс-ветлӧдліс козьналӧм кӧр ку тяпиясӧн.

Николай Васильевичлы ёна кажитчис Кимӧн вайӧм пуртӧсыс, кӧть эськӧ, мукӧдлы кӧ, татшӧмторйыд шыблас кӧлуйӧн сӧмын вӧлі. Пуртӧссӧ, буракӧ, вӧчлӧмаӧсь кутшӧмкӧ зэв ён кучикысь; гашкӧ, сё во чӧж вӧдитчӧмысла сійӧ лакӧн мавтӧма кодьӧдз шылялӧма, но серыс век на тӧдчис — ӧтар банас шыа дядьӧ вӧлі бытшкӧ ошкӧс.

— Татшӧм добра огӧ жӧ шыбитӧй, — нимкодясис Николай Васильевич. — Бур киподтуя морт вӧчлӧма... Аддзам сылы местасӧ.

Кӧзяинлӧн жырйын кузяла сулалісны стеклӧалӧм шкапъяс, кодъясӧс Николай Васильевич ачыс жӧ вӧчліс. Мыйыс сӧмын эз вӧв сэні. Чуймӧм Кимлӧн видзӧдлас улӧ пырысь-пыр жӧ веськалісны дзирдалысь из шомтор, кык-ӧ-куим туис, зэв мича сера, кутшӧмкӧ шыльыд гӧна куысь вӧчӧм сумка, еджыд тшын рӧма ыджыдкодь сов из, уна чалля кӧр сюр, и весигтӧ пашкыр бӧжа сьӧд тар.

— Николай Васильевич, тіян тані быдса музей вӧлӧма да! — шуис Ким то кӧзяин вылӧ, то шкапъяс вылӧ шензьӧмӧн видзӧдігтыр.

— Музей не музей, а ӧттор-мӧдтор эм нин. Важысянь нин чукӧрта да.

— И, буракӧ, ставыс тайӧ ас муысь.

— Сэсь, дерт, кысь нӧ сэсся! Коми муысь и коми йӧз йылысь, — шуис Николай Васильевич, и синъясыс сылӧн шоналісны. — Тшӧтш и на йылысь, кодъяс овлісны миянӧдз. Ӧд найӧ кыз нэмъяс пыдӧсысь вайисны миянӧдз мича кыв и кутшӧмкӧ да кутшӧмкӧ, мед, шуам, абу нин сэтшӧм озыр, культура. Та йылысь оз эськӧ ков вунӧдны ӧнія олысьяслы... Ме ачым неэтша ветлӧдла командировкаӧ, волі нин республикаса пӧшти быд сиктӧ, ог нин шуӧй каръяс йылысь, и мыйкӧ да мыйкӧ быдысь на судзӧдлі да вайлі сьӧрысь. Света тшӧтш ваялӧ и... И со, чукӧрмис тай...

Николай Васильевич тэрыб кинас судзӧдіс синмӧсь сёй кодь руд из да юаліс:

— Мый эськӧ тайӧ?

— Из тай кутшӧмкӧ.

— А мыйла татшӧм розьӧсь?

— Буракӧ, енмыс сэтшӧмӧн вӧчлӧма.

— А мыйла буретш татшӧмӧн «вӧчлӧма енмыс»? Он тӧд? Тайӧ, муса пи, нефть пластысь тор. Вӧлӧмкӧ, татшӧм синмӧсь изъяс и сӧдзтысьӧ муыдлӧн сьӧд вирыс. А кӧн нефть, сэн и газ... Ме вот видзӧда тайӧ синмӧсь из вылас и быттьӧ аддза, кыдзи миян озыр войвыв муысь помтӧг мунӧ нефть да газ...

— Из шом тшӧтш и!

— И вӧр, и куяс, и дона чери, и кӧр яй, и турипув...

— Да-а, мыйыс шу сӧмын абу миян, Николай Васильевич!

— А видзӧдлы со этайӧ шапка вылас, меным сійӧс, ёна кори да, вурӧдіс ӧти тӧдса вӧралысь ёрт.

Ким босьтіс киас пемыдруд пушыд шапкасӧ, и чуньясыс пурскысисны мича сук гӧн пытшкас, медводдза небыд лым пиӧ моз.

— Тулан куысь?

— Сыысь.

— Мича. Татшӧм шапкатӧ эськӧ некутшӧм король эз яндысь новлыны.

— Дерт. Оз ӧд весьшӧрӧ заграницаад куяссьыд зарниӧн мынтысьны.

— А ёна-ӧ тэ ӧні аддзывлан со этатшӧм чачаяссӧ? — юаліс Николай Васильевич, лӧсьыдіник туис петкӧдлігмоз.

— Карсьыд эг на аддзыв.

— И сиктын эз кутны лоны, непӧштӧ карын!.. А лёк ӧмӧй эськӧ вӧлі, татшӧм туисъяснас кӧ карса барышняяс лавкаӧ йӧвла ветлӧдлісны? Ӧд со кутшӧм лӧсьыд! Кӧрт бидонсяыд! Оз нин почовтчы йӧлыд! Озджык шонав, оз сім-дукӧссьы ни...

— Кыддзыд уна ковмас...

— Чӧв! Ӧд мыйта ми пӧрӧдчигад кыдзсӧ жуглам да сідз колям ягӧ! Кылӧднысӧ сійӧс огӧ вермӧй да... Делӧыс абу сыын! А сыын, мый ми и таын важ бурсӧ пондім вунӧдны. Ӧні ми, кӧть и коми йӧзӧн шусям, сюмӧдтӧ сӧмын сотны кужам, би ӧзтыны сійӧн. Вӧрӧ вотчыны мунам клёнӧдчысь ведраясӧн, а мышкӧ, небыдик да кокньыдик пестер пыдди, кӧвъялам ёсь пельӧса ящик, коді быд пуӧс люкалӧ.

Медводз здукъясас, кор Ким веськаліс тайӧ жыръяс да аддзис сэтысь быд пӧлӧс кӧлуйсӧ, Николай Васильевич кажитчис сылы тешкодь мортӧн. Быдторсӧ чукӧртан «висьӧмыс» сылӧн кажитчис кутшӧмакӧ йӧйталӧмӧн. Ӧні Ким казяліс, мый тадзисӧ вӧчигӧн Николай Васильевичлӧн, чужан мусӧ пӧся радейтысь мортлӧн, ёна бурмӧ сьӧлӧмыс.

Торъя шкапысь Ким казяліс коми книгаяс. Быдсяма книгаыс жӧ тані вӧлі: и ӧніяяс, мичаджыка серпасалӧмаяс, и зэв нин важсяӧсь, быгалӧм коркааӧсь. Ким казяліс весиг «Ордым» журнал.

— Тіян нӧ, заводад, ёна-ӧ лыддьысьӧны коминас? — юаліс Николай Васильевич.

— Омӧля, — шуис Ким. Сылы лои яндзимкодь, сы вӧсна мый и ачыс шочджыка босьтліс киас коми книга.

— Аддзан со, — ышловзис Николай Васильевич, — унаӧн кутісны вунӧдны чужан кывтӧ. Быттьӧ нарошнӧ кӧсйӧны дзикӧдз йывмӧдны сійӧс, екуняваняясыд... А ӧд миян кодь кывнас сёрнитлӧмаӧсь нин некымын сюрс во сайын. Со кысянь рӧдыс мунӧ!

— Збыль али мый?! — чуймис Ким, коді некор на та йылысь эз мӧвпавлы.

— А тэ кыдз чайтін! Нэмъяс чӧжӧн мый вӧвлӧма вӧр-ваын, а сідзжӧ енэжын, му вылын и весигтӧ му пытшкын, — быдӧнлы миян пӧльяс сетлӧмаӧсь зэв лӧсялана ним. Шуам: морт, лов, шонді, асыв, кымӧр, югыд, вӧв, йӧв, мусук, дозмӧр, гоб, ёді, пызь, нянь, чӧс, пурт, и весигтӧ кӧрт... Куш нин тайӧ кывъясыс висьталӧны, кутшӧм важысянь найӧ лоӧмаӧсь! Кыдз нӧ позьӧ вунӧдны ставсӧ тайӧс!.. Тӧдан, Ким, муса пи, меным кажитчӧ, мый ми, комияс, асьным асьнымӧс омӧльтыштам. Не сӧмын ас кывйысь, но и коми мортӧн чужӧмысь быттьӧ яндысям.

— Гашкӧ и, сідз...

— А мый нӧ, екуняваня! Быттьӧ миян некодӧс казьтывны... А ёна-ӧ казялан коми серсӧ карса керкаясысь? Мыйӧн найӧ торъялӧны мукӧд каръясса керкаясысь? Да нинӧмӧн оз! Весиг коми кыв вылын гижӧдъяс шоча тыдалӧны!.. А коліс эськӧ, мед воысь йӧзыс бурджыка аддзисны миянлысь чужӧмбаннымӧс, тӧдісны историянымӧс, олан сямнымӧс и этшнымӧс. А кор выль морт ставсӧ тайӧс кутас тӧдны, сэки сійӧ ёнджыка кутас пыдди пуктыны миянлысь мунымӧс и йӧзнымӧс.

Николай Васильевич ставсӧ тайӧс висьталіс зэв пӧся и эскӧдана, тӧдчис, мый ёна нин думайтӧма та йылысь. Сійӧ чӧв усьліс, сэсся шуркнитіс бӧръя шкаплань, тэрмасьӧмӧн судзӧдіс сэтысь ыджыдкодь бордъяса, сімӧн сёйӧм бана важ шы и, ӧддзӧдчӧмвывсьыс на, бара шуис:

— Со татшӧм шынас да, гашкӧ, черӧн нӧшта, коми войтыр овмӧдісны помтӧм-дортӧм войвыв, коді ӧні сетӧ страналы сымда озырлун. Абу ӧмӧй нин куш тайӧ дивӧ?! Ме эськӧ, екуняваня, медводз сувтӧді Сыктывкарын ыджыд памятник коми вӧралысьлы. И бур кывъяс эськӧ тшӧкті гижны сэтчӧ. Мед йӧз тӧдісны, кысянь-мый ставыс пансис, кысянь ми, ӧнія йӧз, петім.

— Тайӧ тіян зэв бур мӧвпъяс, Николай Васильевич.

Туробовлӧн сёрниӧн ыззьӧдӧм Кимлы ӧні, кыдзи некор, вӧлі нимкодь сыысь, мый ачыс — тшӧтш коми войтырлӧн пи. Сылӧн юр вемыс, коді век на жувгышталіс доймылӧм вӧснаыс, друг быттьӧ ясыдмис, и вынысь нуӧдіс-чуксаліс олӧмын мыйкӧ ыджыдджыктор вылӧ. Тайӧ здукас ас пытшсьыс том вынъяс кылысь Кимлы кажитчис, мый сійӧ мыйкӧ зэв бурӧс вермас вӧчны чужан мулы и ас йӧзлы.

Баб мӧдысь нин чуксаліс пызан сайӧ. Николай Васильевич, мыжа морт моз нюмъялігтыр, шуис:

— Со ӧд тэ кыдзи менӧ сёрнитӧдін... Но, петам чай юам.

— Ме ог, Николай Васильевич... Век ӧд ог кут сёйны-юны тіянын...

— Ланьт, бур кӧ колӧ!

— Светаыд со абу на и...

— Ме эг на и висьтав, йӧй юраыд! Сійӧ жӧ талун командировкаӧ муніс. Лесопунктӧ, куим лун кежлӧ.

Николай Васильевич кӧсйис содтыны, мый мунісны найӧ Максимкӧд, максимъяслӧн машинаӧн, но, мӧвпыштіс да, эз нин висьтав тайӧс.

— Сьӧкыд журналистыдлӧн уджыс... Торйӧн нин нывъясыдлы... — пызан сайын, чай юигӧн нин, шуис Ким.

— Сідзи, сідзи, муса пи! — Николай Васильевич песовтчыштіс зонлань. Ким и водзтіджык нин казяліс, мый тэрыб вӧраса Туробовлы сьӧкыд пукавны ӧти местаын — пыр нин дзӧрыштӧ, либӧ ырсмунӧ-чеччылӧ. — Мунас тадзи Светаӧй кытчӧкӧ, и век думайтсьӧ, век думайтсьӧ. Эз-ӧ мыйкӧ ло... Сійӧ ӧд миян быдлаӧ пырӧдчӧ, медся дзескыдінас вермас сюйсьыны. А этша ӧмӧй на лёк йӧзыд миян? Мукӧддырйиыс ачыд, мужик морт, и то повзьылан... А сійӧ ӧд нывка...

— Ёсь Светаыд тіян, сьӧлӧма и... — шуис Ким.

— Ёсь ли, вӧлянас босьтӧ ли, код тӧдас... Сійӧ миян ичӧтысяньыс пыр зонкаяскӧдджык ворсіс-ноксис. То самолёт модельтӧ накӧд тшӧтш мастеритӧ, то ордйысьӧ-котралӧ, то, палатка босьтӧма да, ю дорӧ вуграсьны мунӧ. Ёртъясыс шаньӧсь вӧліны быдмигас. Торйӧн нин Саша Беляев да Володя Черных. На дінын, позьӧ шуны, нылӧй вокъяс дінын моз быдмис... Ӧтиыс ӧні авиаконструктор, а мӧдыс море вылын капитаналӧ.

— Да-а?

— А гортӧ воас командировкасьыд, — водзӧ сёрнитіс Николай Васильевич, — бара на колӧ юртӧ жуглыны. Войбыдъясӧн пукалӧ-гижӧ. Мукӧддырйиыс час вит пукалас чеччывтӧг... Аслас чужӧмыс то ыпъялӧ скӧрлунӧн, то нюмъялӧ. А мукӧддырйиыс сымда шог чужӧм вылас, мый сьӧлӧм доймытӧдз жаль лолӧ, окота матыстчыны да шуны: дугды, мися, сэтшӧма мучитны асьтӧ!.. Но шуан ӧмӧй? Гашкӧ, татшӧм здукъясас сійӧ медшуда да? Ме ӧд кутшӧмакӧ гӧгӧрвоа жӧ. И ог кӧсйы кӧдзӧдны сійӧс радейтана уджсьыс. Сійӧ ӧд миян ичӧтысяньыс кӧсйыліс лоны журналисткаӧн.

— Сідзи и шуліс али мый?

— Часлы, ме тэд ӧти сочинение лыддя. Квайтӧд классын на сійӧ гижліс. Медбурӧн сэки шуисны, рӧдительскӧй лун вылын гораа лыддисны. Ме сійӧс учительницаыслысь кори, мися, коркӧ быдмас да, петкӧдла...

Николай Васильевич тэрыба пыраліс аслас жырйӧ, петкӧдіс сэтысь школьнӧй тетрадьысь важмӧмкодь нин кык лист, кӧні вӧлі нывкалӧн пӧлӧс да мича почерка гижӧд.

— Лыддя? — тіралыштысь гӧлӧсӧн юаліс Николай Васильевич; сылӧн водз чукырӧссьӧм чужӧмыс вӧлі небзьӧма и дзикӧдз бурмӧма, чужӧмыс югзис нывнас нимкодясьӧмӧн.

— Ме радпырысь кывза, — шуис Ким.

— «Ме кӧ эськӧ вӧлі верстьӧӧн» сочинение... — Николай Васильевич шуис тайӧс гораа, пӧся, сэсся лӧньӧдыштіс гӧлӧссӧ да водзӧ лыддис:

— «Ме кӧ эськӧ вӧлі верстьӧӧн, ме эськӧ быть бӧрйи аслым кутшӧмкӧ вӧвлытӧм удж, шуам, лои эськӧ геологӧн либӧ дрессировщицаӧн. Но медся ёна меным окота лоны журналисткаӧн да тайӧн вайны йӧзлы ыджыдджык радлун. Сэки эськӧ ме быдӧнлы отсаси, кӧть мед коді эз шыӧдчы ме дінӧ отсӧгысла.

Верстьӧ мортӧн лоӧм бӧрын кӧ миян пӧвстысь быдӧн ёна кӧсйис вӧчны му вылын буртор, сэки эськӧ мирыс вежсис. Став странаясыс кӧ отсасисны ӧта-мӧдныслы, сэки эськӧ му вылас эз вӧвны войнаяс.

Ме кӧ вӧлі верстьӧӧн, дерт, эг эськӧ вермы вежны став мирсӧ, кӧть эськӧ кутшӧма эг кӧсйы. Но ме эськӧ кӧть нин неуна вӧчи сы пайысь, мый ми вермамӧй вӧчны ӧтвылысь. Зэв окота ӧдйӧджык быдмыны да лоны верстьӧ мортӧн.

Ме кӧ эськӧ вӧлі верстьӧӧн!..»

Сочинение помлань воигӧн Николай Васильевичлӧн гӧлӧсыс пондіс джӧмдавны. Кимлӧн и аслас шызис лолыс. Ичӧт нывкалӧн мир йылысь не челядьлӧн кодь думысь, олӧм вӧсна сылӧн тадзи тӧждысьӧмысь.

— Но, кутшӧмджык? — юаліс Николай Васильевич лыддьыны помалӧм бӧрын.

— И тайӧс гижӧма квайтӧд классын велӧдчысь?

— Да... Ыджыд мортыд тадзтӧ оз гиж. Ок, Ким, муса пи, водзӧн ӧнія челядьыд пондісны тӧждысьны ыджыд олӧм вӧснаыд... Уна тӧдӧны, уна аддзӧны, уна думайтӧны. Бур йывсьыд и лёк йывсьыд. Кӧнкӧ, сӧстӧм челядь вежӧрнас неэтша шензьӧны: мыйла пӧ гырысьясыс бурасӧ оз кужны овны? Воюйтӧны, виалӧны ӧта-мӧднысӧ, юӧны. Быттьӧ пӧ оз позь му вылын шудаасӧ овны... Часлы пӧ ме быдмывла!

— А быдмам да, ыджыдӧн лоам да, уналӧн ставыс вунӧ, — шуис Ким.

— Да, уналӧн вунӧ, — ышловзис Николай Васильевич. — Быдмигкостіыс пыркалӧны югыд кӧсйӧмъясыс... А, гашкӧ, мукӧд зонкаыслӧн да нывкаыслӧн найӧ оз и чужлыны? Гашкӧ, ми, гырысьяс, огӧ и кужлӧй чужтынысӧ найӧс ичӧт мортъяслӧн сьӧлӧмъясын да вежӧръясын?

— Тіян йылысь тадзитӧ он шу, Николай Васильевич.

— Код тӧдас... Думысь тай быттьӧ век жӧ бур ног зіли ӧтка нывтӧ быдтыны-а... Немтор эг жалитлы. Велӧді-кери... Дерт, мамыс кӧ ловъя вӧлі, сійӧ эськӧ унджык на сяммис. Но абу шулӧма сылы дырсӧ овны да...

— Выльысьсӧ сэсся эн нин и гӧтрасьӧй?

Николай Васильевич эз пыр вочавидз. Ким вылӧ эз видзӧдлы ни, мыйысь мӧдыс повзьыштіс: бара пӧ юавсис мый оз ковсӧ!

Николай Васильевич некор эз сёрнитлыв та йылысь. Но талун лов вылас мыйкӧ быттьӧ небзис-нормыштіс. Гашкӧ, гӧтыртӧм олӧмысла гажтӧмыс дзикӧдз нин личкис, да быть колӧ вӧлі личӧдыштны морӧссӧ. А, гашкӧ, зонмыс зэв нин сьӧлӧмаӧн да мӧд мортлысь шогсӧ кылысьӧн кажитчис.

— Эг, муса пи, эг и гӧтрасьлы сэсся. — Николай Васильевич эз и тӧд, кытчӧ воштыны тэрыб кияссӧ. — Ӧти кадӧ эськӧ и кӧсйылі... Вӧлі тӧдса нывбаба, быттьӧ и шань морт. Но кыдзкӧ ӧтчыд, кор делӧыс ӧтлаасьӧмлань нин вӧлі матысмӧ, шуис меным: «Васильевич, Светаыдлы бурджык лоӧ, кутас кӧ овны бабыскӧд. А ми тэкӧд асьным, кыкӧн. Нывкаыд кутас волывлыны миянӧ. А то ӧтлаад олігӧн йӧз кагатӧ, он и тӧдлы, ӧбидитсяс».

Николай Васильевич кызӧктыштіс, дубитчӧм чужӧмыс небзис нориник нюмысь.

— Тадзитӧ олігӧн шуданад ме эськӧ эг жӧ вӧв... — Но регыдӧн бӧр гажмыштіс да варовджыка нин содтіс: — Ӧні, гашкӧ, гӧтрасьны? А мый? Света быдмис, велӧдчис, ачыс нин меысь бурджыка вежӧртӧ олӧмсӧ. Ӧні сӧмын и гӧтрасьны!

Нюмъялысь чужӧма олӧма морт вылӧ видзӧдігӧн Ким друг сьӧлӧм тырнас гӧгӧрвоис, кутшӧм дона Николай Васильевичыслы нылыс. Ӧд сійӧ, позьӧ шуны, сетӧма Светаыслы став олӧмсӧ ассьыс...


Кызь квайтӧд глава


«Видза олан, мамӧ!

Гижӧ тэныд письмӧ Марсикыд, тэнад бӧб пиыд.

Ме тэныд, мамӧ, важӧн нин немтор эг гижлы, кӧть эськӧ бӧръя каднас унатор ме вывті муніс. Ӧні со, пукси да, став пыддиыс и маркӧда, зэв кузь письмӧ гижа, ковмас дӧзмытӧдзыд лыддьыны.

Бабыд ловъя на. Кор вина юыштас, век тэнӧ казьтылӧ. Гожӧм кежлас зэв на дасьтӧ кӧрзинаяс, вовсю кӧсйӧ вотчыны, ог тӧд, вермылас оз-а.

А ме, мамӧ, неважӧн куті уджавны ыджыд заводын. Важӧн нин кӧсйылі сэтчӧ пырны, но водзті эз босьтлыны, а ӧні босьтісны...

Мамӧ, ме ӧні сӧмын на локті комсомольскӧй свадьба вылысь — гӧтрасис миян бригадаса ӧти зон, Лёшка нима. Ме неуна гажакодь. Но тэ эн думайт, мый ёна. Неуна сӧмын, юрӧй морскӧй сынӧд кодь сӧстӧм и зэв бура уджалӧ.

Мамӧ, тайӧ вӧлі капитальнӧй свадьба! Муніс сійӧ заводса столӧвӧйын, зэв ыджыд залын. Кор ми пырим сэтчӧ Кимкӧд да Генкакӧд — тайӧ менам выль ёртъяс, — ме синъясӧс паськӧді — сымда нин йӧзыс вӧлі. И ставыс, матросъяс кодь ён, том йӧз. Нывъяс и зонъяс, быдӧн мичаа пасьтасьӧмаӧсь... Тӧдан, мамӧ, столӧвӧйыс быттьӧ дзордзалысь виддзӧ пӧрӧма.

Пызанъяс сайӧ пуксисны сёысь унджык морт!

Кор лӧньыштісны, сувтіс миян бригадаса зон — Ким, а сійӧ циклоп кодь ыджыд да ён, лӧсыштас кӧ, шампанскӧй пробка моз летитан... Тӧдан, мамӧ, кыдз сійӧ шуис: «Дона другъяс! Ставныд ті бура тӧданныд, кутшӧмӧн овлӧ лысваӧн мыськӧм шондіа гожся асыв. Гӧгӧр ойдӧма шонді югыдӧн, ыркыд сынӧдыс свеж да чӧскыд, быд турун сі мыссьӧ лысваӧн... Рая да Алексей! Ми сьӧлӧмсянь кӧсъям, мед эськӧ тіян ӧтувъя олӧмныд вӧлі гожся асыв кодь жӧ югыдӧн да сӧстӧмӧн».

Та кузя и вӧлі речыс. А мый шу кузьсьыс, мамӧ? Свадьба дырйиыд? Ме аддзылі, кутшӧм шудӧн ыпнитліс невесталӧн сідз нин шуда чужӧмыс.

Нӧшта на пӧсь кывъяс вӧліны. Том гозъялы помтӧг сеталісны пӧдарки. А сэсся и грымӧбтіс заводса духӧвӧй оркестр, пондісны йӧктыны, сьывны кутісны. Видзӧда, и заводса директор тані жӧ, парторг и... Збыль, мамӧ! Найӧ кыкнанныс томӧсь на жӧ, нинӧмӧн оз торъявны мукӧдсьыс. Мукӧд моз жӧ тшӧтш юыштісны, сьылӧны и йӧктӧны. Тайӧ менӧ, гашкӧ, медъёна чуймӧдіс, мамӧ... Ӧнӧдз ме чайтлі, мый гырысь начальникъясыд баринъяс кодьӧсь, ми вокыд матӧ он сибав на дінӧ.

А аддзылін кӧ эськӧ тэ, кутшӧм чужӧма пукаліс невестаыслӧн мамыс. Мортыд, буракӧ, радлӧ и шензьӧ, и тшӧтш шӧйӧвошӧма. Буракӧ сылы, олӧма нин мортлы, вӧлі дивӧ кодьӧн, мый татшӧма пыдди пуктӧны сылысь зятьсӧ, прӧстӧй рабочӧйӧс. Веськыда кӧ шуны, меным, мамӧ, и аслым тайӧ вӧлі дивӧ кодьӧн... Непӧштӧ невесталӧн мамлы, кодлы, гашкӧ, тӧд вылас уси аслас свадьбаыс. Ачыс ӧд сійӧ верӧс сайӧ петігӧн, гашкӧ, ӧдва-ӧдва вермыліс чукӧртны приданнӧйсӧ. Ме, мамӧ, кывлі, кыдзи сійӧ шӧйӧвошӧмӧн шӧпкӧдіс: «Но молодечьяс... Но дона йӧз...»

Марс дугдіс гижӧмысь, кунис синъяссӧ, и быттьӧ выльысь аддзис невеста мамлысь шудысла шӧйӧвошӧм чужӧмсӧ. И нормыштіс сьӧлӧмыс. Буракӧ, сы вӧсна, мый аслас мамлӧн чужӧмысь оз со аддзывлы татшӧм шудсӧ.

«Мамӧ, ставыс сэні вӧлі сэтшӧм лӧсьыд, сэтшӧм бур, не кӧ ӧтитор!..»

Но мыйла нӧ колӧ гижны тайӧс мамыслы? Вежсяс ӧмӧй мыйкӧ, кӧть и норасьыштан?

Марс нямыртіс да косявліс бӧръя кывъяса листсӧ. Но лёк казьтылӧмыс бара нин желлясис сы пытшкӧ.

Свадьба вылас ӧткымынӧн ёнакодь гажмисны — юысьыд тай и тані вӧлӧма! — да пондісны воны ӧта-мӧд выланыс. Генка да Ким заводитісны миритӧдны кык дядьӧӧс. Тшӧтш и сійӧ, Марс, коді эз на лысьт ӧткӧн кольччыны выль ёртъяссьыс.

Ӧти дядьӧыс друг сувтӧдіс дулалӧм синъяссӧ Марс вылӧ да пондіс шуавны:

— Эт-тайӧ шышыс мый тані керӧ?! Т-тайӧ коркӧ менсьым в-вина мырддис... К-кутӧй сійӧс!..

— Эн вай сӧр нинӧм абусӧ, коддзин кӧ, — пырысь-пыр жӧ ӧлӧдіс Ким.

— Сорасин, Петрович, — шуис тшӧтш и Гена, дядьӧӧс сой пӧлӧдыс босьтігмоз. — Тайӧ миян друг.

— А-а, т-тайӧ тэ, Геннадий?.. Здорово... Д-друг, шуан?.. А н-нач ӧти кодь...

— Гажа юрнад сорасин, Петрович.

— Д-да?.. Гашкӧ и... А н-нач сы кодь...

— Мунам бурджык, Петрович, юыштам ӧтлаын том гозъя вӧснаыс. Мед железнӧя олӧны.

— М-мунам... Т-тэкӧд, Геннадий, ме кӧть кытчӧ м-муна! Б-бур морт тэ!..

Тайӧ серпассӧ казьтылігӧн Марс, лёк дойысь моз, тӧдлытӧг ымӧстіс. И садьмӧдіс бабсӧ.

— Мый нӧ ойзан сэні? — шыасис кокньыда узьысь пӧрысь морт. — Водін эськӧ, войдур.

— Тэ узь, узь, бабӧ... Ме мамӧлы письмӧ гижа.

— Но-но либӧ, бур пи, гиж... — долыдмис бабыс да весиг пуксис крӧвать вылас. Шочмӧм дзор юрсиыс узигас дзугсьӧма. Коркӧ мичаӧн вӧвлӧм ыджыд чужӧм вылас личалӧм кучикыс ӧшалӧ лёдзьясӧн. — Важӧн нин эн гижлы мамыдлы. Ок, бласлӧ кристос, олӧм жӧ эськӧ да. Ловъя мам дырйи зонкаыдлы лоӧ мамтӧг быдмыны...

— Пондіс сэн бара лӧвтны! Узь, сійӧс тӧд, бабӧ...

— Но-но, узя, узя. Тэ толькӧ, бур пи, тшӧтш пасйы, мед волас нин мамыд... Сідзи и гиж: ёна пӧ гажтӧмтчим, волы пӧ. А то пӧ бабыд кулас, оз сэсся и аддзыв тэнӧ...

— Гижа... Тэ сӧмын эн торкась сэсся.

Баб лӧнис. Код тӧдас, узьӧ ли оз ли сэсся.

Тӧдіс кӧ эськӧ сійӧ, кутшӧм сьӧкыд вӧлі внукыслы столӧвӧйын, кор код морт индаліс сы вылӧ. Марслӧн сы бӧрын тшӧтш и улыс парйыс кутіс доймыны — вирӧдз курччысьӧма. Сулаліс, буракӧ, кулӧма нисьӧ ловъя. Сылы кажитчис, мый став свадьбуйтысьыс зывӧка видзӧдӧны сы вылӧ. «Пышйыны, ӧні жӧ пышйыны татысь! — дӧжнасис юрас сӧмын ӧти мӧвп. — Заводнад дай ставнас! Дзикӧдз вылӧ пышйыны тайӧ карсьыс! Мунны кытчӧкӧ, кӧн тэнӧ некод оз тӧд, да сэні видлыны выль ног лӧсьӧдны олӧмӧс...»

Дерт, пышйис эськӧ, не кӧ Ким; сійӧ меліа крукыштіс сойӧдыс да шоныда шуис:

— Мый нӧ дзугыльмин, психолог? Свадьба вылын оз позь дзуглясьны. Вай жӧ тшӧтш кымыньтам шампанскӧй.

Шампанскӧй юӧм бӧрын Марс нуӧдліс Кимӧс ывла вылӧ мырдысьӧн моз шуис:

— Ким, а дядьӧыс, гашкӧ и, збыльтор висьталіс.

— А ми эскӧдам сійӧс, мый ылаліс... А сэсся пондас сюсьджыка видзӧдны тэнад удж вылӧ, тэнад олӧм вылӧ, и вежсяс думыс.

— Эк, Кимка! — Марслӧн шусис Геналӧн моз жӧ; и сэки, ӧні на бара, петіс синваыс. — Сёрӧнджык ті паныдасинныд меным... Видзӧд со, кутшӧм бӧжъяс нин колявсьӧма менам...

— Дас кӧкъямыс арӧснас — сёр? — сьӧлӧм сетіс Ким. — Йӧзыс тай нӧ нелямынын да ветымынын велӧдчӧны рытъя школаын... Эмӧсь миян сэтшӧмъясыс...

— Ӧні ме кӧсйи пышйыны... Бӧр лэптыны татысь якӧрӧс...

— Ок тэ, психолог! Олӧмад унаысь окота лолӧ пышйыны кытчӧкӧ... Торйӧн нин тэа-меалӧн кодь характера йӧзлы. Кор сьӧлӧмыд истӧг сир моз быдторйысь чажнитӧ-ӧзйӧ... Но ӧд муыс гӧгрӧс, пышъялан-пышъялан да бӧр важинас воан.

— Сьӧкыд овнысӧ лякӧминад...

— И мукӧдлаын абу кокни мортыдлы, — небыда шуис Ким. — Сьӧкыд лоны мортнад...

— Сідзи...

Марс казьтылӧ ӧні Кимкӧд тайӧ сёрнисӧ, ышлолалӧ: «Да, сьӧкыд лоны мортӧн!»

«Мамӧ, ме тай нӧ тэныд немтор на эг висьтав аслам выль удж йылысь. Бур йӧз босьтісны менӧ заводӧ, асланыс бригадаӧ. Эн думайт, мый медомӧликинас тэнсьыд питӧ тувйыштісны!

Ок, мамӧ, тӧдін кӧ эськӧ тэ, кутшӧма ме тірзи первой лунъяссӧ! Буракӧ, сідзи жӧ, кыдзи коркӧ тэ дорӧ волігӧн. Кор думайта вӧлі, кутшӧмджык нӧ эськӧ, мися, менам мамӧӧй, да кыдзи ми сыкӧд паныдасям...

ГПТУ-ын миян, кӧні ме велӧдчылі, ичӧтик няйт мастерскӧй сӧмын и вӧлі, а тані цехыс — помтӧм-дортӧм. Сэні ми вӧчалам гортса важ пачыд ыджда дизельяс.

Мамӧ, висьтавны тэныд, кыдзи ми тайӧс вӧчам? Эз на дӧзмӧд лыддьынытӧ? Эн дӧзмы, мамӧ. Талун меным окота зэв уна висьтавны тэныд.

Но вот, шуам, вайисны важ двигатель, коді миян бабысь на пӧрысьджык да киссьӧмаджык. Код пытшкысь, позьӧ шуны, дзикӧдз нин петӧма лолыс. Медводз сійӧс чуш-чаш разясны, сэсся и, няйтӧссьӧм кагаӧс моз, бурпӧт мыськасны-весаласны... Весассьӧ, небось, кӧть кутшӧм нагар абу! Кыдз дзижнитасны лыа струяӧн, лӧсьыда тай и нярскӧ. Сэсся важ деталь чукӧрсьыс заводитӧны бӧрйыны туянаджыкъяссӧ — оз-ӧ позь, дзоньталыштӧм бӧрын, выльысь на пуктыны. Быдлаын миян экономия...

Но вот, ми и сетам моторыслы выль лов. Меным, дерт, моторыд кутшӧмакӧ тӧдса нин — ӧд трактористӧ заводитлі велӧдчыны! — но век жӧ первой лунъяссӧ уджалігӧн зэв ёна шогӧдліс... Торйӧн нин бригадир вылӧ видзӧдігӧн, Генаӧн сійӧс шуӧны. Сылӧн тэрыб чуньяса киясыс вӧдитчӧны детальясӧн, буракӧ, сідзи жӧ, кыдзи тэнад киясыд чоюкъяслы кепысь кыигӧн. Найӧ, буракӧ, помӧдзыс кылӧны кӧртсӧ. Пуктас газораспределительнӧй клапан — быттьӧ сэні и вӧлӧма! Медстӧча регулируйтӧма... Татшӧмнад мен, буракӧ, некор не лоны, кӧть эськӧ и ёна зіля.

Ой, мамӧ, ме, буракӧ, ылӧдчышта! Куш майшасьӧм йылысь гижа. Тэ кӧ эськӧ аддзылін менӧ, кутшӧмӧн вӧлі ме заводын медводдза уджалан лун помын. Кор уна сё рабочӧйкӧд тшӧтш смена помасьӧм бӧрын петі завод проходнӧйӧд. Тэ эськӧ, буракӧ, шуин: тайӧ пӧ абу менам пиӧй. Тайӧ пӧ кутшӧмкӧ тшап адмирал, коді сӧмын на пасьвартӧма враглысь эскадрасӧ. Гашкӧ пӧ, и адмирал-корсар Френсис Дрейк. Либӧ весиг Нахимов!

Унаӧн пуксялісны мотоциклъяс да велосипедъяс вылӧ. А меным и автобусӧ абу окота пырны. Юрӧс чатӧртӧмӧн муна улича кузя. Мед видзӧдӧны йӧзыс, кӧні ме уджала, кутшӧм ме эм морт!

И весиг жаль лои, мый заводсянь зэв матын гортӧдз! Окота вӧлі бӧр бергӧдчывны да выльысь мунны...

Мамӧ, менам ӧнія выль ёртъяс олӧны дзик мӧд нога олӧм важ другъяс серти. Быттьӧ мӧд государствоса йӧз. Цехын унджыкыс велӧдчӧны — коді рытъя школаын, коді заочнӧя институтын. Спорттӧ унаӧн радейтӧны и. Ме на пӧвстын войся сюзь кодь.

Гашкӧ и, тшӧтш ковмас пырны велӧдчыны, вужъяся кӧ татчӧ. Ыджыд окотаяс эськӧ и абуӧсь велӧдчынытӧ да. Химияысь зэв ёна пола, школаын век «двойкаяс» вӧлі ваяла сыысь. Код сӧмын лӧсьӧдлӧма тайӧ наукасӧ-а?! Химиясьыд пӧ весиг чери кулӧ ваын...

Ким, код йылысь тай казьтышті нин, тшӧктӧ гижсьыны художественнӧй самодеятельностьӧ. Тэ пӧ — артист!.. Ог тӧд... Тэ, мамӧ, кор тай волі тіянӧ, казялін эн менсьым мыйкӧ артист сямасӧ? А, гашкӧ, збыль видлыны? Армияӧ код тӧдас на кор босьтасны. Туйла кӧ быттьӧ...

Тайӧ Кимыс меным ставсяыс медъёна кажитчӧ. Не кӧ сійӧ, код тӧдас, мый эськӧ лоис мекӧд. Меным сійӧ ӧні, мамӧ, бать пыдди и вок пыдди...

Ничево, мамӧ, тэ ме вӧсна эн шогсьы. Ме кыдзкӧ да мыйкӧ ола! Усьла да, чечча да — бара водзӧ.

Зэв ыджыд привет висьтав чоюкъяслы. Меным зэв ёна кажитчисны найӧ. Век син водзын сулалӧны. А менӧ казьтылӧны оз? Мамӧ, а ті волӧй коркӧ миянӧ. Ставныд и волӧй. Гашкӧ, дядьыдлы тшӧтш кажитчас тані да и кольччас. Менӧ кӧ оз ёна радейт, позяс ӧд и не ӧтлаын овмӧдчыны. Мед сӧмын матынджыкӧсь вӧлім ӧта-мӧдсьыным, позис частӧджык аддзӧдчывны.

Бабыд со тшӧктіс гижны и: мед пӧ волӧ, гашкӧ пӧ, кула нин сэсся да, ог и аддзыв...

Деньгасӧ кытчӧсюрӧ ме ӧні ог кут видзны, чӧжышта и мӧдӧда тіянлы туй вылад...

Быд бурсӧ тэныд, мамӧ! Став шудсӧ тіянлы, чоюкъяс!

Тіян пи да вок — Марс».


Кызь сизимӧд глава


Мӧд урок дырйи Миля гижис тетрадь листӧ да петкӧдліс парта сайын пукалысь ёртыслы со кутшӧм кывъяс: «Ким, вай перемена дырйиыс утьыштам гортӧ. Немтор талун юрӧ оз пыр. Окота тэкӧд, кыкӧн, олыштны. Тарыт гортын миян некод абу. Но?»

Кимлӧн ыпмунліс лолыс. Сійӧ бергӧдіс юрсӧ Милялань — нывлӧн пӧся югъялысь синъясыс гижӧдсяыс на унджык висьталісны.

А Ким друг кыліс сьӧлӧмсьыс, мый сылы окота и абу окота муннысӧ.

Но кыдзи шуан тайӧс Милялӧн пӧсь синъяслы да меліасьысь чужӧмыслы?

И Кимлы виччысьтӧг усины тӧд вылас Максимӧн коркӧ лыддьылӧм кывбурысь кывъяс: «Мый нӧ вӧчны, мый нӧ вӧчны мем? Кыдзи вочавидзны тэныд — ог?»

А синъяс пӧся юасьӧны, надея кутӧмӧн корӧны: «Но?»

— Но, — юрнас довкнитӧмӧн шӧпнитіс Ким.

Пырысь-пыр жӧ Милялӧн сьӧдӧн мавтӧм синлысъяса руд синъясын сявмуніс радлун, быттьӧ шонді вылысь вешйис кымӧр кень. И та вылӧ ковмис сӧмын ӧти дженьыдик кыв: «Но...»

Мунісны автобусӧн; Миля шуис, мый нинӧмла весьшӧрӧ воштыны кадсӧ подӧн шлёпиктӧм вылӧ. Ким пукаліс орччӧн ыззьӧм нывкӧд, кывзіс сылысь меліа китшкӧмсӧ, и сьӧлӧмыс пыр ёнджыка и ёнджыка майшасис — ӧні нин сьӧлӧмыс пыксис Миляяс ордӧ мунӧмысь.

Миля оліс кар помын, кык судта пу керкаын: татшӧмъяссӧ ӧти кадӧ таладорас зэв уна стрӧиталӧмаӧсь.

Ныв пелька да любӧпырысь отсаліс пӧрччысьны гӧсьтлы, пыртіс аслас жырйӧ, шуис:

— Включит телевизор. Ме пырысь-пыр локта.

Ким вӧчис тшӧктӧмасӧ, сэсся нёровтчис креслӧ вылӧ. Гӧгӧр сылы тӧдса нин тані: кельыдлӧз шпалера стенъяс, ӧшиньын кык пӧвста занавес, ӧтиыс — еджыд вылын разнӧй рӧма кувшинъяса, мӧдыс — пырыс тыдалана, газӧвӧй, быттьӧ кизьӧриник ру павгысьӧма ӧшиняс. Миля кужӧ бӧрйыны мичатӧ, кӧть из улысь корсяс, но судзӧдас. Куим лампочкаа кокньыдик, лӧсьыдіник люстра; югъялысь юра, лым еджыд вевттьӧда крӧвать вылас немся чукыр абу. Кылыштӧ «Красная Москва»-лӧн тӧдса дук — Миля сӧмын тайӧ духисӧ пыдди пуктӧ. Ставыс на важ моз...

Важ моз на жӧ стенсянь, ыдждӧдӧм фотография вывсянь, видзӧдӧ ныв. Дженьыда шырӧм юрсисӧ лэдзалыштӧма кымӧс вылас, пельяс дінас юрсиыс пашкыра чикыльтчӧма. Чужӧмсӧ сылысь он шу ёна мичаӧн — паськыдкодь бордъяса ныр, ыджыдіник вомыс нюммунӧмысла воссьыштӧма; но сы пыдди синъясыс мичаӧсь, гырысьӧсь, ясыдӧсь, меліӧсь; и гӧгрӧсіник чужӧмыс тшӧтш ясыд да мелі; нылыс быттьӧ кӧсйӧ шуны: видзӧдлӧй, кутшӧм ме сӧстӧм да гажа, некутшӧм сім чут ме пытшкын абу.

А со и ачыс сійӧ локтӧ — вежсьӧма, восьса морӧса, буби туз кодь сера платтьӧа, коді оз ёна дзеб нывлӧн зумыд кокъяслысь мичлунсӧ. Коркӧ, гажа юрӧн, Ким шуліс Милялы, мый сылӧн кокъясыс бутылка кодь гӧгрӧсӧсь да шыльыдӧсь. Нывлы тайӧ кажитчис сэки.

Ставыс важкодь. Сӧмын тай сыкӧд, Кимкӧд, мыйкӧ быттьӧ лоӧма. Водзті, кор сійӧ веськавлывліс тайӧ жыръяс Милякӧд, сылӧн сьӧлӧмын, ызгысь тувсов шор моз пондыліс пессьыны радлун да шуд. Ӧні тайӧ шорсьыс ытваыс исковтӧма...

— Юыштам? — шуис Миля; сійӧ югзис асылын вӧр сайысь чеччысь шонді моз.

Ким поліс юнысӧ; тадзи югзьысь Миля дырйи ӧні сійӧ поліс ӧддзӧдны сьӧлӧмсӧ винаӧн — ӧд сэки виччысьтӧг бара на вермас ылькнитны ытваыс да мыськовтны-нӧбӧдны бӧръя каднас лоӧм помӧдъяссӧ. Но сылы и окота вӧлі юыштнысӧ — мед эськӧ личӧдны ловсӧ, ӧд сійӧ помӧдз на эз тӧд, мый колӧ вӧчны, эз тӧд, мый вӧчсьӧ сы пытшкын.

— Ичӧтика позьӧ, — шуис Ким.

Недыр мысти Миля сувтӧдіс пызан вылӧ арабскӧй коньяк; и сылы нӧшта на нимкодь лои, кор казяліс, кыдзи таысь шенмуніс Кимлӧн чужӧмыс.

— Тэ нӧ мый?! — шуис Ким. — Тайӧ ӧд дӧбелькиӧдз кольмӧдас миянӧс.

— А мед! — гажъяліс Миля. — Ӧтчыдтӧ позьӧ. Восьмой март кежлӧ ньӧблі... Сэтшӧма виччыси тэнӧ... Сӧмын тай ас пыддиыд открытка воис... Весиг печатьтӧм... — И ныв юасяна сотыштіс Кимӧс видзӧдласнас, а мӧдыс нӧшта на шӧйӧвошис; ачыс аслыс Ким пондыліс кажитчыны кык би костӧ веськалӧм кодьӧн. Ким немтор эз вочавидз, кыдз вермис гажаджыка бертовтчис сёрнинас:

— Вайин кӧ нин тайӧ добрасӧ, кисьталам инӧ! — Сэсся ачыс восьтіс да кисьталіс кока румкаясӧ.

— Вай юам «на брудершафт», — шуис Миля. — Ачыд тай коркӧ велӧдлін менӧ.

Ким ыпмунліс Милялӧн кывъясысь: ӧд тадзсӧ юигӧн румка кутысь сойясыд зэлыда кысьӧны ӧта-мӧдныскӧд, а сэсся, винасӧ юӧм бӧрын, колӧ топӧдчывны да чӧскыда окыштчыны.

— Гашкӧ, первойсӧ сідз юам, шонӧдчигмоз. — Ким мый вермӧмсьыс зілис корсьны бӧрыньтчан туй.

Милялӧн пырысь-пыр жӧ дубаліс чужӧмыс, и сійӧ шуис нораа:

— Ким, мый тэкӧд лоис? Ме пежасси али мый? Зывӧк али мый тэныд инмӧдчывны ме дорӧ?

— Эн сӧр мый оз ковсӧ, Миля! Тэ ставсяыс шань ныв! И вай юам тэ вӧсна!

Но радейтысь сьӧлӧмтӧ куш ӧти сёрнинад он на ёна бурмӧд, кӧть сэсся кутшӧм лӧсьыд кывъяс эн шуав. Татшӧм сьӧлӧмтӧ ӧтчыд пӧся окыштӧм вермас бурмӧдны ёнджыка рытывбыд кыв песӧм дорысь.

Милялӧн дзикӧдз нин гажыс бырис Кимлӧн вом доръясысь; сылы сэтшӧм нин окота вӧлі, важ моз, пуксьывны зонлы пидзӧс вылӧ да пӧся топӧдчывны сэтшӧм вына да сэтшӧм муса вир-яй дінӧ. Но мыйкӧ лоӧма Кимыскӧд, сы дінысь быттьӧ кӧдзыдӧн ӧвтыштӧ, и Миля оз тӧд, кыдзи сывдыны тайӧ кӧдзыдсӧ.

— Ким, тэ юышт ещӧ, юышт. — Миля выльысь тыртіс зонлысь румкасӧ. — Тэ ме вылӧ эн видзӧд... Тэ ӧд мужик морт...

Но и мӧд румка бӧрын на эз «пӧсяв» Ким. И кыдзкӧ зэв сьӧкыд лои кыкнанныслы, быттьӧ на син водзын куліс кодкӧ.

— Ким, тэ сэтшӧма нин газетса йывсьыс думайтан? — Милялы зэв сьӧкыд вӧлі шуны тайӧ кывъяссӧ, но не шунысӧ сійӧ эз нин вермы; сійӧ кӧть и ёна поліс кывны сьӧлӧмсӧ поткӧдысь воча кыв, но и дзикӧдз эз на жӧ вошты надеясӧ.

— Да, Миля... — шуис Ким синъяссӧ лэптывтӧг. — Ме ог тӧд, мый мекӧд лои...

— Йӧй тэ! Кытчӧ сюйсян?.. Он ӧмӧй аддзы, кутшӧм сылӧн кавалерыс? Мича и шань! Поэт! Книгаяс гижӧ!.. А тэ дінысь мазь дук да кӧрт дук кылӧ!.. Чайтан, сибӧдасны тэнӧ сэтшӧм мамзельясыс? Йӧй тэ, йӧй!.. — Милялӧн гӧлӧсыс ыпъяліс и бӧрдіс ӧтпырйӧ.

— Буракӧ, сідзи и эм, Миля... Но ме немтор ог вермы ачым аскӧд керны... Быттьӧ ляскисны сійӧс син водзӧ... Сьӧлӧмӧ и...

— Аддзӧма мичатор! Мый нӧ сылӧн мичаыс? Кузь кока тури кодь! Сьӧд чиганка кодь! Чужӧмас, сюзьлӧн моз, куш сӧмын бугыльясыс и югъялӧны!.. — коньӧр ныв ставсӧ тайӧс шуаліс пызан гӧгӧр и Ким гӧгӧр скӧрысь шуркъялігтыр.

— Миля, тэ эн горзы, горзӧмнад тані немтор он босьт, — жугыля шуис Ким.

— Да сьӧлышт тэ сы вылӧ, Ким! — Миля сувтіс Ким водзӧ да, пӧсь кияснас пель бокъясӧдыс босьтӧмӧн, кыпӧдіс зонлысь юрсӧ. — Немтор тэнад сыкӧд оз артмы! Асьтӧ сӧмын дойдалан... А бӧрас каитчыны пондан...

— Гашкӧ и, сідз...

— А ме чайтлі: овмӧдчам ӧтлаын... Оланін со эм, быдтор эм! Мама тэнӧ любитӧ и... Мичаник челядь эськӧ чужисны... Ов да ов! Эз ӧмӧй дышӧд нин ӧткӧнсӧ мучитчыны? Нэм чӧжыд общежитиеясын... Батьтӧгыд да мамтӧгыд... Мелі кыв тӧдтӧг...

— Миля, ме тэ моз нин и кӧсйылі... Збыль тэд шуа... Но ӧні ставыс пузувтчис... — Кимлӧн ныв вылӧ видзӧдысь синъясын вӧлі мучитчӧм и шог.

— Да мый менам оз кажитчы тэныд? Мый? Мый оз тырмы? — Миля весиг видзӧдліс ас вылас шензьысь да дойӧн тырӧм синъясӧн.

— Ставыс тэнад тырмӧ, Миля... Тэ кодь нылыс шоч... Тэ быттьӧ... ачыс вӧр-ваыс став кыпыдлуннас и мелілуннас. Ӧнӧдз тэ дінын менам век на бурмывліс сьӧлӧмӧй...

— Но ме жӧ эг на тшыксьы! Мыйла ӧтдортчан ме дінысь? Мыйла сюйсян мӧд дінӧ?

— Ог тӧд, Миля... Кыдз эськӧ тэд шуны... Сійӧ менӧ кыскӧ ас дінас... кыдзи гӧгӧрвотӧм, пыдӧстӧм енэж... Меным окота лэбны, лэбны сэтчӧ...

— Енэжсяньыд верман на и усьны! — шуис Миля.

— Да, верман. Ме ог шу, мый ог усь.

— Али чайтан, мый всё равно бӧр му вылӧ воан? Кӧть и усян? — Миля вежӧгтӧм да скӧрмӧмйывсьыс эз и казявлы, кыдзи тшӧтш пондіс сёрнитны Ким моз. — Он думайт, мый муыс сэки вермас лоны кынӧн нин? Вермас нин лоны не небыдӧн да дзоридзаӧн?

— Сійӧ и лёкыс, Миля, мый ме немтор ог думайт... Ог вермы думайтнысӧ. Но вай дугдам сэсся та йылысь. Кытчӧдз дзикӧдз эгӧ на скӧрмӧй ӧта-мӧдным вылӧ. Дивит кӧть эн, но ме ӧні муна гортӧ.

— Эн мун, Ким! — шуис Миля вошӧм гӧлӧсӧн, и лӧсьыдіник чужӧмыс, гашкӧ, первойысь на олӧм чӧжыс нюкырмуніс вӧвлытӧм шогысь.

— Миля, эн кут менӧ, сідзи бурджык лоӧ. — Кимлӧн сьӧлӧмыс не омӧльджыка доймасис, и помтӧм жаль вӧлі нылыс. — Меным колӧ ӧтнамлы олыштны... Ӧткӧн бурджыка донъявны, мый мекӧд лои. Ӧні эн кут менӧ.

— Ог лэдз! — горӧдіс Миля да зэлыда сывйыштіс Кимӧс голяӧдыс да, бӧрдігтыр и яндысигтыр, дзебис чужӧмсӧ сылӧн морӧс вылын. Коньӧр ныв некыдз эз вермы думыштны, мый Ким босьтас да мунас сы дінысь; мый сійӧ шудыс, код йылысь сьӧлӧм шонавмӧныс сы дыра нин мӧвпаліс, оз ло тарыт, и, гашкӧ, некор нин сэсся оз ло. И сійӧ повзьӧмӧн и коньӧрпырысь выльысь горӧдіс: — Ог лэдз!..

— Тэ кӧсъян окавны йизьӧм чуркаӧс? — бурысь шуис Ким, сыркъялысь нылӧс меліа лӧньӧдны зілигтыр.

Миля чепӧсйис Ким дінысь, чужӧмыс друг вежыньтчис дойысь да скӧрлунысь, и сійӧ пондіс лёкысь горзыны: — Оз ков меным йизьӧмыд! Мун, весась!.. Мун кос кока тури дінад!.. Тэнӧ сійӧ смилитӧма! Мый нӧ, вина сэн юан да!.. Но эн на радлы!.. Ме виа сійӧс! Паськыд бугыля сюзьӧс!

Миля кутіс пӧдны скӧрысла да ыззьӧмысла. Пиньясыс сылӧн пондісны таркакывны йиа ваӧ вӧйлӧм мортлӧн моз. Ким зэв ёна повзис, оз тӧд мый вӧчны. Кисьтіс стӧкан джын ва, сорис коньякӧн да пондіс сійӧн юктӧдны Миляӧс.

Миля, нинӧм гӧгӧрвотӧг на, горша юис, сэсся чӧла лэдзчысис диван вылӧ, сюркнёвтчис сэтчӧ да, чужӧмсӧ дзебӧмӧн, кутіс сыркъявны-бӧрдны.

Ким шыльӧдіс нылӧс юрсиӧдыс и мышкӧдыс, и ачыс аслыс кажитчис му вылас медся лёк мортнас; сылы кажитчис, мый сійӧс чужтылӧмаӧсь му вылас йӧзлы лёктор вайӧм могысь. Сылы помтӧг шог да забеднӧ лои, и мыйӧн Миля неуна лӧньыштіс, Ким тэрыба петіс керкаысь.


Кызь кӧкъямысӧд глава


Батьыслӧн шкапысь Валерьянлы син улас уси руд коркаа неыджыд книга — «Милиционерлӧн справочник». Босьтіс киас, листалыштіс, а сэсся быттьӧ домалісны сійӧс тайӧ книга дінас — оз вермы орӧдчыны.

Вӧлӧмкӧ, дзонь наука эм шпанитысь йӧзӧс куталӧм могысь! Гашкӧ, не ӧти сё индӧд!

Ӧтилаын вӧлі рисуйтӧма морт юръяс да чужӧмъяс — разнӧй пӧлӧсӧсь, унджыкыс зэв букышӧсь.

«Кутшӧм йӧз сӧмын абуӧсь свет вылас!» — зывӧкпырысь мӧвпыштіс Валерьян.

Став тайӧ чужӧмъяссӧ вайӧдӧма сы могысь, мед эськӧ позис бурджыка серпасавны мортӧс, да мед сэсся тӧдны сійӧс мӧд мортӧн висьталӧм серти. Стӧчмӧдсьӧ, кодлӧн кутшӧм овлӧ юр, балябӧж, кымӧс, ныр, синъяс, вом доръяс, вом и весигтӧ веськыд пельыс.

«А мый эськӧ менам медводз шыбитчӧ синмад?.. Буракӧ, сук сьӧд синкымъясӧй... Но, шуам, найӧс, ёна кӧ ковмас, позяс бритыштны. Нетшкыны пинцетӧн ли... А вот вожа тшӧка лытӧ он дӧмасав... Со тай менам кодь йывсьыс гижӧма жӧ: «Джуджыд тшӧка лы, чургӧдчӧма, вомӧна потаса. Быттьӧ ме йылысь и гижӧма», — весиг дзугыльмыштіс Валерьян.

А кор пондіс лыддьыны, кутшӧм мыжысь да ёна-ӧ вермӧны мыждыны мортӧс, — сійӧс весиг пӧсьӧ шыбитіс. Сы вӧсна, мый ӧткымын статьяяс быттьӧкӧ веськыда инмисны тшӧтш и сылы, Валерьянлы...

Вӧлӧмкӧ, зэв унаторйысь позьӧ йӧршитны мортӧс тюрмаӧ! Весиг челядьӧс вина юны велӧдӧмысь да кузь пурт новлӧдлӧмысь, кодлыкӧ грӧзитчӧмысь да тшӧтш и пасьтӧм йӧза снимокъяс вӧдитӧмысь.

Вот и корсарав!..

Сэсся ӧти юкӧнысь Валерьян казяліс самбо приёмъяс. Шуам, кыдзи позьӧ песовтны тэ вылӧ ырыштӧм пурт либӧ кулак да шнёпкыны уськӧдчысьсӧ му бердӧ.

Валерьян сувтіс ковёр вылӧ да пондіс книгаын индӧм серти шенасьны да чеччавны, мӧд мортлысь пыдди кватлавны ассьыс то ӧти, то мӧд кисӧ.

Ошлӧн кодь кузь да сук гӧна Митрӧпан нима кань дивӧпырысь видзӧдіс сы вылӧ.

Тадзи ноксигас и суис сійӧс Марина.

— А, Маринка, бур, мый воин! — шуис Валерьян; сэк кості ныв пӧрччис няр куысь вурӧм кузь гӧленя гӧрд сапӧгъяссӧ да шаракылысь болонь курткасӧ. Пӧрччысигас долыдпырысь думыштіс, мый ставсӧ тайӧс ачыс нин нажӧвитіс карын олігӧн.

Валерьян петаліс кухняас, вайис сэтысь картупель майкан да мыччис сійӧс дзикӧдз чуймӧм нывлы.

— Мый тэкӧд лоис, Валька? — шуаліс Марина. — Мый тэ керан?

— Немтор эз ло. Велӧда приёмъяс... Шуам, тэ быттьӧ пурта морт. Ноко, уськӧдчыв ме вылӧ, быттьӧ вылісянь шеныштчӧмӧн кӧсъян бырскыны.

Марина нюмъялігтыр шеныштчис, Валерьян, шуйга кинас ӧвтыштӧмӧн, пыкис нывлысь сойсӧ, а веськыднас кватитіс кимӧдзӧдыс да песовтіс. Марина ойӧстіс, майканыс мыніс кисьыс да зымкнитчис джоджӧ.

— Аддзылін? — долыдпырысь жеръяліс Валерьян.

— Ош омӧлик! О-й!.. — лӧвтіс Марина веськыд сойсӧ довкйӧдліг. — Мыр али мый ме, сідзи песлалан! Та бӧрын ножичӧс киӧ босьтны ог вермы...

— Маринка, а ноко улісянь кучкыны видлы, — быттьӧ нинӧм абу и вӧвлӧма, корис Валерьян.

— Мун сэтысь! Сідз нин сойӧй юкавны кутіс... — Сэсся нывлӧн чужӧмыс лои тӧждысянаджыкӧн. — Валька, мый тэ бара думыштін? Мыйла тэд колӧ татшӧм шенасьӧмыс?

— Он гӧгӧрво, йӧй? Тайӧ — самбо!.. Шуам, сёр рытын мунам ми тэкӧд пемыд уличаӧд. И друг кодъяскӧ уськӧдчасны, мед тэнӧ мырддьыны менсьым. Кужтӧгыд кыдзи ме доръя...

— А тэ эськӧ дорйин менӧ? — небзис Марина; сійӧ кутчысис зонлы сояс да меліа ниртчыштіс.

— Со тай, велӧдча...

— Ой, ме адӧй ёна пола тышкасьӧмсьыд! — сьӧлӧмсяньыс шуис ныв. — Вай ми тэкӧд вывті сёрӧнсӧ огӧ кутӧй ветлӧдлыны. Мый нӧ миянлы войдуравнысӧ. Кино ӧтлаын видзӧдлам, театрӧ ветлам либӧ, и — шань... Либӧ йӧктыны пыралам... Коді нӧ уськӧдчас, бурӧн кӧ кутан ветлӧдлыны?

«Хы! — серӧктіс ас кежас Валерьян. — Тайӧ милочкаыд, буракӧ, законнӧй мужик туйӧ нин пуктӧ менӧ. Вай но, вай!..»

Дзик сідзисӧ эськӧ Марина эз на жӧ чайт, но колӧ веськыда шуны: ачыс асьсӧ ёнакодь нин эскӧдіс, мый Валерьян сылӧн и лоӧ. Торйӧн нин Павла Васильевнакӧд, зонлӧн мамкӧд, ӧти сёрни бӧрын. Сэки коньӧр нывбаба вӧлі дзикӧдз шӧйӧвошӧма, инас эз ӧшйы. «Маринук, — сёрнитіс сійӧ, — вай кӧть тэ Валерсӧ ёнджыка кут. Тэнсьыд, гашкӧ, кывзысясджык... Колӧкӧ, гӧтрасьӧй, овмӧдчӧй гортын. Меным гажаджык лоӧ и. Кага кӧ лоӧ, ачым видза...»

«А тайӧ со бара на косясьны велӧдчӧ!» — дзугыля кывкӧрталіс ассьыс думъяссӧ Марина. И шуис:

— Мӧдысь ӧд ме, бара кӧ сюран, ог мун тэ вӧсна кевмысьны. Дугды буди косясьӧм йывсьыд думайтны.

Валерьянлы ӧні абуджык лӧсьыд, мый пикӧ волігас мӧдӧдліс Маринаӧс татшӧмтор вылӧ, и лӧгыс ӧні петыштӧ, мый ныв тӧдӧ сылӧн сэкся коньӧралӧм йылысь.

— Ме тэнӧ сэки кыдз медматысса мортӧс кори, а тэ тешитчан ме вылын, — шуис Валерьян.

— Ог, Валька! Ог жӧ тешитчы! — ырсмуніс Марина, пӧся босьтіс зонмӧс киясӧдыс да пондіс меліа видзӧдны сылы синмас. — Ме толькӧ кӧсъя, мед тэ шаня олін! Ӧні на вӧд сы дыра кардъялӧм морӧса ветлӧдлін! Меным вӧд жаль тэ!..

— Ок тэ, кысук... — Валерьян топӧдіс ас бердас ичӧтик Маринаӧс, нырнас сутшкысис нывлӧн пашкыр юрсиӧ. — Гашкӧ, ветлам тіян ордӧ, кысук? Зинкаыд гортын абу?

— Абу...

— Ветлам, тані регыд мам локтас.

— Но инӧ...

— Пахан меным грӧш деньга ӧні оз сет, весиг гӧрд доз нинӧм вылӧ ньӧбны.

— Менам эськӧ эм да, но, буди, огӧ кутӧй юнысӧ.

— Жаль кӧ деньгаыд, дерт...

— Абу жальын делӧыс, Валька! Тэныд менам немтор абу жаль! Кыдз тэ тайӧс он гӧгӧрво?!

— Босьтан либӧ?

— Мый сэсся тэкӧд керан...

— Бур кысукӧй тэ менам!

— Абу бур, а йӧй кысук, — шуис Марина, но шуис эз нин сэтшӧм дзугыля, сы вӧсна мый сьӧлӧмнас водзвыв нин нимкодьпырысь кыліс, кыдзи найӧ, вина юыштӧм бӧрын, некодысь повтӧг кутчысьласны.

Бӧрсӧ Валерьян воис гортас вой шӧр гӧгӧрын. Сійӧ вӧлі тӧдчымӧн гажакодь. Валерьян поліс гортас пырнысӧ да воигчӧжыс думайтіс, кыдзи эськӧ вештыны бокӧ батьыслысь гым-чардсӧ.

Батьыс ни мамыс, дерт, син эз на куньлыны; мыйсӧ сӧмын эз думайтны татшӧм кузь рытнад, торйӧн нин ӧні, пи пондаыс ёна нин доймасьлӧм бӧрын.

А Валерьян со пырӧ вашъялысь вома; чужӧмыс и гажаа дзулъялысь синъясыс корӧны: прӧститӧй пӧ, сёрмышті да, немтор лёксӧ пӧ ме эг вӧч...

— Папа, ме кӧсъя спортивнӧй кружокӧ гижсьыны! — кыпыда шуис Валерьян бать-мамыслӧн жырйӧ воськовтіг. — А мый, армия кежлад ӧд колӧ лӧсьӧдчыны. Мед нямӧд кодьӧн не лоны сэні... Ме кӧсъя самбо велӧдны. Ӧти тӧдса зонкӧд тарыт ёна нин пессим. Сы вӧсна и сёрмышті.

Пантелеймон Михайлович чеччис пызан сайысь, сувтіс пиыслы воча да чӧла мурталіс сійӧс видзӧдласнас, быттьӧ тшӧтясьӧм ош сылӧн вӧрӧ локтӧм мӧд ошкӧс. Павла Васильевна тӧждысьысь чипан моз сулаліс тані жӧ и быд здукӧ дась вӧлі уськӧдчыны отсӧг вылӧ.

— Бара на вина дук пӧдтӧ да? — зэлыда шуис ыджыдджык Кызродев.

— А, стӧкан гӧрдӧс юи, гортӧ мӧдӧдчигӧн нин. Тӧварышыс шуӧ: збойджыка пӧ мунсяс пемыд карӧдыс.

— Да мый нӧ тэ сӧран, а? — кыдзкӧ зэв нораа, сьӧлӧмас ыджыд дойӧн шуис Пантелеймон Михайлович да дзикӧдз матыстіс чужӧмсӧ пиыслӧн кынмӧм нюма чужӧм дінӧ. — Да код нӧ тэд веритас, а? Да мыйся нӧ тэ морт, а? Сьӧкыд ӧмӧй думыштны тэныд, мый тані виччысьӧны тэнӧ, мучитчӧны? Сэтшӧма нин ӧд тэ миянӧс песін... Абу жӧ ӧд ми кӧртӧсь сэсся, а...

Валерьян шӧйӧвошис батьыслӧн татшӧм сёрнисьыс. Сійӧ чайтіс, мый батьыс пондас горзыны, гашкӧ, и нӧйтас на, а сійӧ со сулалӧ нюкыртчӧм чужӧма, быттьӧ кынӧмыс орйӧдлӧ-висьӧ, и сэтшӧм нор кывъяс шуалӧ.

— Валер, тэ нӧ он нин али мый вермы овны винасӧ ютӧг? — шуис и Павла Васильевна.

— Мыччӧны кӧ, мыйла не юыштны... — заводитліс на тешӧ бергӧдны сёрнисӧ Валерьян.

— Но мыйла, мыйла тэ сэтшӧм? — чепӧлялӧм чуньяссӧ пиыслӧн ныр улын тірӧдігтыр шуис Пантелеймон Михайлович.

— Кутшӧм — «сэтшӧм»?

— Но немтор жӧ тэныд оз мӧрччы! Немысь немтор.

— А асьныд нӧ ті кутшӧмӧсь, асьныд?! — друг скӧрмис Валерьян. — Асьныд нӧ ті генийяс али ангелъяс?.. Тэ нӧ, папа, ачыд ангел, да? Да ӧд тэ, мыйта ме тӧда, мамалы бур кывсӧ шоча на шулін! Век ош моз мурзан. Либӧ пинь пырыд сӧдзӧдан... Тайӧ нӧ бур? А коркӧ пӧ мама тэныд зэв колана вӧлӧма, кор дядяным начальникалӧма да босьтӧма тэнӧ ас дінас...

— Ланьт, Валер! — повзьӧмӧн горӧдіс Павла Васильевна. — О господи, мый тайӧ лӧсьӧдлӧ, дур зонкаыс...

Пантелеймон Михайловичлӧн ыджыд, еджыд киыс ньӧжйӧникӧн лэччис морӧс вылас, сьӧлӧм дінас, сы вӧсна мый сэні зэв ёна чунӧбтіс, но гажа юра Валерьян эз кыв ни эз казяв тайӧс.

— А мый, абу сідзи, да? — водзӧ дӧжналіс сійӧ. — Асьнытӧ, небось, он аддзӧй, а менӧ толькӧ! Тіянлы эськӧ коліс, мед урӧс чипанысь лои зарни кольк? Ме ӧд тӧда, папа, — удж вылад тэнӧ оз жӧ зэв любитны... Ӧтияс, буракӧ, полӧны тэысь, а мӧдъяс водзын ачыд тірзян... А ме ог кӧсйы некод водзын тірзьыны! Мама моз куйӧд пытшкын ог кӧсйы лукйысьны ни... Вот лоа шоперӧн и понда ылі рейсъясӧ дзужъявны, некод нин тэ вылын оз сулав...

Овлӧны сэтшӧм кывъяс, кодъяс уна вожа мутӧй моз гудйыштӧны мортлысь став олӧмсӧ. Найӧ вӧрзьӧдӧны-лэптӧны сэтшӧм слӧйяс, кодъясӧс мортыс век на зільліс дзебны не сӧмын йӧзсяньыс, но весигтӧ и ассяньыс.

Кор виччысьтӧг лыбасны ортсыӧ татшӧм гусяторъясыс, сэки мортлы оз долыд овлы. Сідзи жӧ лои ӧні и Пантелеймон Михайловичкӧд. Сылы лои помтӧг шог да забеднӧ. Эз чайтлыв сійӧ кывны татшӧм сёрниястӧ аслас писянь, кодлы, кыдзи век на чайтсьыліс Пантелеймон Михайловичлы, сійӧ сетӧ став олӧмсӧ ассьыс.

— Да мый нӧ тайӧ сідзи увтчӧ бать-мамыскӧд?! — муртса оз бӧрд Павла Васильевна. — Вот яндысьтӧм синмыд! Паня, мый нӧ чӧв олан? Шу мыйкӧ!

— Мый шуан татшӧмыдлы?.. — сьӧкыда ышловзис Пантелеймон Михайлович. — Шу кӧть эн...

— А мыйла либӧ ме «татшӧмнас» лои? А, папа? — друг тшӧтш нормис Валерьян. — Мыйла менӧ оз кыскы книга дорӧ, а ёнджыка вина дорӧ кыскӧ? А? Гашкӧ, сы вӧсна, мый книгаясыд миян гортын, некор эз вӧвны, абу велалӧмаӧсь найӧс ньӧбавны...

— Библиотекаясыс нӧ мый вылӧ! — шуис Пантелеймон Михайлович. — Сэні ӧд, кутшӧм колӧ, сэтшӧм книга и эм.

— Ті нӧ асьныд ёна ветлывланныд библиотекаясас? — бара на тувйыштіс Валерьян.

— Паня, вурышт пель бокас, мый нӧ тайӧ сідзи сёрнитӧ тэкӧд! — дзикӧдз скӧрмис Павла Васильевна. — Но яндысьтӧм син! Но и быдті пиӧс! Ловтӧ пуктан сы понда, немтор он жалит, керка и быдтор сылы лӧсьӧдан, а ми жӧ мыжаӧсь лоим... Батьсӧ лыддьысьтӧмӧн мыжалӧ! Да ӧд батьыд тэнад, кӧсъян кӧ тӧдны, дас ӧти арӧсӧн вӧрӧ муніс кер кыскавны, кын пу йирны. Кызь арӧсӧдз эз и петавлы вӧрсьыс! Кысь нӧ сылы книга дінас велавнысӧ! Коньӧр, сідз нин нэм чӧжыс уджаліс и велӧдчис... А тэ куш сӧмын велӧдчыны он вермы! И миянӧс жӧ мыждан, яндысьтӧм син!

Гӧтырыслӧн тайӧ кывъясысь Пантелеймон Михайловичлӧн курзис горшыс, сійӧ пондіс курччавны вом доръяссӧ, а сэсся и петіс кухняас ва юыштны.


Кызь ӧкмысӧд глава


Рытнас карса улича вылын Кимӧс чукӧстіс тӧдса гӧлӧс:

— Рабочӧй класслӧн авангардлы — физкульт-привет!

Тайӧ вӧлі Рудольф. Чери сьӧм моз серӧдӧм сьӧд капрон плащыс сылӧн волялӧ кӧтасьӧмысла.

— Чолӧм! — Кимлы вӧлі нимкодь аддзысьны тӧдсакӧд.

— Поводдяыс! — Рудольф шеныштіс юрнас. — Кыдзи шуліс Серёжа Есенин: «Ох, и погодушка же...» Да сідз водзӧ.

Ывлаыс и збыльысь вӧлі шливгысь насмука кодь. Сьӧкыда усис ва лым, кӧтӧдіс тӧвся лымйысь мынтӧдчӧм нин керка вевтъяс, известкаӧн мавтӧм стенъяс. Йӧз ветлӧдлісны уличаӧд тэрмасьӧмӧн, йӧжгыльтчӧмӧн, мед не лэдзны мустӧм ва лымсӧ питшӧганыс.

— Татшӧм поводдя дырйиыд эськӧ пукавны... тӧдса местаын... И кывны, кыдзи шоналӧ пытшкӧсыд, — шуис Рудольф.

— А мый, вай шонтысям, — шуис Ким. Миля ордӧ ветлӧм да сыкӧд сьӧкыд сёрни бӧрын Ким ёна шогаліс тайӧ лун-войсӧ; торйӧн нин сы вӧсна, мый ныв кыкысь нин эз волы школаӧ. Кимлы окота вӧлі кыдзкӧ пальӧдыштны шогсӧ.

— Менам таньгаӧй абу, — ышловзис Рудольф. — Пенелопаӧй гарнитур вылӧ чукӧртӧ да ставсӧ конфискуйтіс.

— Менам эм. Премиятор сетыштісны...

— О-о, тайӧс, дерт, колӧ пасйыны!

— Ветлам ресторанӧ, — вӧзйис Ким.

— Но-о, сэні дона! — быдӧн повзьыштіс Рудольф. Сылӧн тӧдчымӧн ловзьыштіс гӧлӧсыс, вӧрасъясыс лоины тэрыбджыкӧсь. — Вай, бурджык, ми тэкӧд пыралам тётя Клёпа ордӧ.

Кимӧс чуймӧдыштіс татшӧм тешкодь нимыс, но сійӧ немтор эз кут юасьны, кывзысьӧмӧн вӧтчис Рудольф бӧрся.

Пырисны найӧ неыджыд «Соки-воды» магазинӧ. Сьӧд синкымъяса да гӧрд вом доръяса мичаник том нывбаба некутшӧма эз вӧв тётя Клёпа кодьӧн.

— Общепитса феялы — физкульт-привет! — важ тӧдса дінӧ моз шыасис Рудольф буфетчица дінӧ. — Лэдзӧй шонтысьыштны, ывлаыс дзикӧдз йӧймӧма.

— Воӧй, воӧй, — меліа шуис том нывбаба да кузя видзӧдліс гырысь гажа синъяснас лӧз берета да кучик курткаа Ким вылӧ. Буфетчица вӧлі ӧтнасӧн, татшӧм поводдя дырйиыд ва юысьыд, тыдалӧ, шоч жӧ.

— Сӧмын, буракӧ, «соки»-над да «воды»-над омӧля шоналан? — воча нюмъёвтіс кӧзяйкалы Ким.

— Татшӧм молодечьясыдлы и бурджыктор на сюрас! — Буфетчица копыртчыліс да лэптіс стойка улысь коньяк.

— Но кыдз он окышт тэнӧ таысь? — Рудольф весиг дугдіс кӧтасьӧм ӧчкисӧ чышкалӧмысь да окыштіс том нывбабалысь кисӧ. — А тайӧ дядьӧсӧ Кимӧн шуӧны. Сідзсӧ мортыс великӧй трезвенникъяс лыдысь!

Закуска вылӧ босьтісны кампет да яблӧг. Тшӧтш и лимонад: мед пырысьяс чайтӧны, мый тайӧяс лимонад дучкӧны. Пельӧсын сулаліс ӧтка гӧгрӧс пызан, и кык друг — чужӧмнаныс стенлань, ӧдзӧслань мышкӧн — станок дінӧ моз, дыр кежлӧ сувтісны сэтчӧ.

Кисьталісны коньяксӧ стӧканъясӧ, кыпӧдісны вывлань, и кытчӧдз некод на эз пыр, сёрнитны радейтысь Рудольф шуис:

— Мед, колӧкӧ, шливгӧ ывла вылыс! Миянлы ӧні тайӧ веськодь. Бур фея вӧчис миянӧс шудаӧн. Юам фея-волшебницаяс вӧсна! И тэнад премия вӧсна, Ким...

Коньяк регыдӧн ещӧ на варовмӧдіс Рудольфӧс.

— Ме ӧд помнита на, кыдзи тэ коркӧ ми вокӧс нимтін, — регыд заводитіс сійӧ. — Строчка вартысь гындейясӧн...

— Ме эг. Вензигад, гашкӧ, артмис... — небыда шуис Ким.

— А ме эг и дӧзмы! — серӧктіс Рудольф. Сійӧ тӧдчымӧн гажмис. — Ме, другӧ, ачым тӧда, мый ме сэтшӧм и эм. И, кӧсъян кӧ тӧдны, гордитча тайӧн!

— ?!

— Чуймин тай? А, чайтан, татшӧмнас кокни лоны? Чайтан татшӧмнас быдӧн вермӧ лоны? Дудки, брат!

Сійӧ мыччӧдліс кос да вӧсни чуня кабырсӧ, кытысь кузя чурвидзис певйыс.

— Та вылӧ колӧ эрудиция. И журналистскӧй хватка! И кӧсъян кӧ тӧдны, нахальство! А лопухъясыдлы, — шуйга кинас сійӧ некымынысь пыркнитіс пельсӧ. — А лопухъясыдлы татшӧмнад лоны — не видать.

Рудольф ӧні ачыс нин кисьталіс коньяксӧ, гоз-мӧдысь исыштіс сійӧс, чангыля да йыла нырсӧ стӧкан пытшкӧдз сюйлӧмӧн.

— Не видать! — пырысь-пыр жӧ выльысь шуис юӧм бӧрын, быттьӧ закуситіс тайӧ кывъяснас. — Лопухыд недель корсяс материалтӧ да мӧд недель мучитчас-гижас. Тайӧ нӧ журналист?! Тьпу тайӧ, а абу журналист! Татшӧм кӧ вӧлі став журналистыс, немся газет эськӧ эз и петавлы! Радио и телевидение эськӧ чӧв олісны... Ме абу сэтшӧм! Ме, позьӧ шуны, — волк! — Код юраыд эз и казявлы, кыдзи пондіс ошйысьны. — Ме — зубр!.. Кыдзи ме уджала? Шуам, сетӧны меным задание: вӧчны тайӧстӧ. Всё ясно! Редактор дінӧ менам эм сӧмын кык вопрос: «Когда? Сколько?»

— Ог гӧгӧрво... — шуис Ким.

— А зэв прӧстӧ! «Когда?» — кор кежлӧ колӧ гижнысӧ. «Сколько?» — уна-ӧ колӧ стрӧчитны.

— А темаыс?

— Любӧй тема вылӧ!

Рудольф шеныштіс-керыштіс кинас, пӧрччис кыз ӧчкисӧ да зэв матӧдз вайӧдліс победительлӧн моз видзӧдысь синъяса чужӧмсӧ Ким чужӧм дорӧ. Ӧчкитӧгыс синъясыс сылӧн вӧлӧмны зэв посниӧсь, гӧрд доръясаӧсь. «Порсьлӧн кодьӧсь», — виччысьтӧг думыштіс Ким. Сылы вӧлі зывӧк видзӧдны ӧчкитӧм синъясӧ.

— Любӧй тема вылӧ! — бара шуис Рудольф ӧчкиасьӧм бӧрын. — Талун ме верма гижны дояркаяслы сӧветъяс, а аски сяркнитны космос йылысь. Талун ме верма сетны на-гора шахтёр йылысь очерк, а аски возвеличитны кутшӧмкӧ хирургӧс. И сідзи бесконечно!

— Д-да!.. — сӧмын и сяммис шуны Ким. Ӧтарсянь кӧ, сійӧс кезнитӧдыштіс Рудольфлӧн код юра ошйысьӧмыс, а мӧдарсянь кӧ, сійӧ и эскис Надуткинлы: эз ӧтчыд лыддьывлы сылысь гижӧдъяссӧ газетысь, кывзыліс радио пыр. «Збыльысь — зубр! Колӧ жӧ татшӧм быдтор сяммысьӧн лоны!» Зон эз тӧд, ошкыны али дивитны колӧ таысь.

— А Максим? — юаліс сэсся Ким.

— Мый Максим? — лӧньджык гӧлӧсӧн шуис мӧдыс. — Сійӧ — поэт. А кыдз журналист?.. Сійӧ бура гижны вермӧ сӧмын искусство йылысь. Мый матынджык сылы... А дояркаяс йывсьыд сылы зывӧк гижны... Видзӧд, мӧс картаад специфическӧй запах...

Ким чӧскыда серӧктіс. Сэсся лӧня юаліс:

— А Света?

— Света? — тшӧтш жӧ юалана шуис Рудольф. Сувтӧдіс синъяссӧ Ким вылӧ. — Сійӧ, другӧ, сӧвсем мӧд каленкор... Сылӧн опытыс абу на. Сійӧ сьӧкыда гижӧ, но сьӧлӧмнас... А сьӧлӧмыс сылӧн миянысь сӧстӧмджык вира. Миян ӧд вирным наполовину сорлалӧма нин винаӧн. — Рудольф дзугыльмис. — Эк, Ким, вай лучшӧ юам! — кисьталіс дозсьыс коляссӧ, горша юис. Курччис яблӧг да дыр чӧла нёняліс сійӧс. Но сёрниыс мырдысьӧн нин вӧзйысис винаӧн небзьӧдӧм-шонтӧм пытшкӧссьыс. — А, гашкӧ и, бур ногӧн кӧ, куш сӧмын Света кодьяссӧ и колӧ кольны журналистскӧй удж вылас. Кодъяс сьӧлӧм вирнас гижӧны. Сӧстӧм вира сьӧлӧмнас. А мый ми? Максим — эстет... А ми вокыс — гындейяс! — курыда серӧктіс. — Ме, другӧ, ог нин и сэтшӧма гӧрдитчы тайӧн... Гашкӧ, тайӧ менам трагедия жӧ... А мый нӧ? Помӧдз велӧдчытӧм. Дас кык арӧссянь лои жӧ аслым вийны-перйыны кынӧмпӧт. Гижны заводиттӧдз быд пӧлӧс уджсӧ жӧ видлі. Проклятӧй война нырыштіс батьӧс... Нахватался верхушек, вот и стрӧчита... Сэсся со юыштны велалі и... А тӧдан, мыйта кадсӧ сёйӧ тайӧ делӧыд. Ме, гашкӧ и, коркӧ Света кодьӧн жӧ кӧсйылі лоны! Кӧсйылі ёнджыка гижны сэтшӧмтор, мый тшӧктӧ сьӧлӧмӧй...

Ким шӧйӧвошис тайӧс кывзігӧн. Быттьӧ виччысьтӧг кыліс варышлысь пыста моз коньӧра тивзӧм.

— Вывтіджык асьтӧ омӧльтан, Рудик, — меліа шуис зон. — Тэ абу омӧль морт.

— Эк, Ким!.. Тэ — бур мортыс! — Рудольф пӧся кутліс зонлысь кисӧ. — Гашкӧ, ещӧ ӧтиӧс босьтам? Сетас ӧд тетя Клёпаыд... Мыйкӧ душаӧй вӧрзис талун!

— Абу эськӧ жаль да... Коддзам ӧд.

— Коддзам, — сӧгласа ышловзис Рудольф, сэсся друг бергӧдіс сёрнисӧ: — А Максимлы везитӧ. Кыдз шуласны, в сорочке родился... Мича нывъяс, бобувъяс моз, сы дінын век жбыръялӧны... Тӧлка нывъяс. Света со тшӧтш и. Бара на ӧтлаын командировкаӧ мунісны, ӧти машинаӧн...

— Ӧтлаын?.. — Кимлӧн пӧся ыткӧбтіс вирыс, пыксис лов шыыс. А юрас — шӧйӧвошӧм мӧвп: «Батьыс, Николай Васильевичыс, эз и висьтав та йылысь. Часысь дырджык аслас музейӧн ошйысис, а та йылысь — кыв ни джын. Командировкаын пӧ тай... А, сідз кӧ нин шуны, мыйла сылы колі та йылысь юӧртнысӧ?»

Сэсся Кимлы тӧд вылас усины Милялӧн шог кывъясыс: «Енэжсяньыд верман на и усьны». Со сійӧ и шняпкысис-усис нин. Вылӧдз качлытӧг и зутшкысис. «Таковскӧй! Бӧрйысьысь петӧма! Знатнӧй принц! Другӧ, татшӧм бобувъясыд не тэнад чорыд кияслы...»

Думайтӧ тадзи Ким, а вежӧрыс, кинолента моз, петкӧдлӧ Светакӧд ӧтлаын исласьӧм. Со ныв, лым еджыд курткаа да сэтшӧм жӧ еджыд шапкаа, шливӧдӧ-мунӧ водзас. А сійӧ, Ким, оз вермы вештыны синъяссӧ нывлӧн лайкыда вӧрысь, шыльыда гӧгрӧстӧм мыгӧрысь.

«Видзӧднытӧ, дерт, позьӧ мыйта колӧ. И шань тэныд!..»

Пызан гӧгӧрын лоины нин выль вина юысьяс — лётчикъяс. Лимонад радейтысьяс тшӧтш кутісны пыравны и. Сідзкӧ, квайт час, учреждениеясын помасьӧма удж.

— А мый, Рудик, гашкӧ, збыльысь джагӧдам и эм нӧшта ӧтиӧс, — шуис Ким.

— Ме тай и шуа! Бур морт тэ, Ким... Давай тяпнитам предпоследний раз!

«Мед эськӧ ёнасӧ не коддзыны жӧ! — ӧлӧдіс ачыс асьсӧ Ким. — Колӧ эськӧ сувтны. Татшӧм лёка асьтӧ кылігӧн мыйкӧ вермас лоны ещӧ...»

Но тайӧ вӧлі жебиник кутӧд. Сы вӧсна мый зэв шог сылы лои. И тайӧ шогсӧ сійӧ здукас позис личкыны сӧмын винаӧн. Сэсся немторйӧн.

Кор Ким мӧд дозсӧ помалігӧн тшӧтш жӧ гажмис, друг юаліс:

— Рудик, а Максим, гашкӧ, воис нин да? Вот эськӧ бур вӧлі, сыкӧд кӧ тшӧтш...

Тайӧ кывъясыс, кӧть эськӧ и Ким зілис шуавны найӧс кыдз вермис веськодьпырысьджык, зэлыда петісны.

Коддзӧм Рудольф эз казяв тайӧс. А, гашкӧ и, казяліс да нарошнӧ пондіс ышӧдны тӧдчымӧн вежсьӧм Кимӧс:

— А ветлам, дорогуша, сылӧн аппартаментӧ! Воис кӧ воис, а эз кӧ и эз. Менам эм жӧ ключ сылӧн патераысь. Кыдз шуласны, свой человек. Верма пырны с кем угодно, включая и дам. Сы пыдди ме должен киськавны сылысь мята цвет...

Ким босьтіс нӧшта ӧти коньяк доз, и кык друг мӧдӧдчисны. Регыд мысти Ким казяліс, кыдзи сылӧн сьӧктаммӧны кулакъясыс да ярлунӧн ӧзйӧ сьӧлӧмыс. И повзьыштіскодь таысь.

«Колӧ бӧр бергӧдчыны, кытчӧдз абу сёр!» — заводитліс на кевмысьны Кимлӧн винаӧн жебмӧдӧм вежӧрыс.

Но кысь!.. Кор тайӧ коньӧр никсысьыслы паныд сувтіс нин винаӧн ярмӧдӧм ӧш, коді дась вӧлі пычӧдны-люкавны ассьыс соперниксӧ.

Максим эз вӧв.

И тайӧ друг пальӧдыштіс Кимӧс. Сылӧн быттьӧ югдыштліс вежӧрыс, и мортыд быттьӧ казяліс ас водзсьыс пыдӧстӧм йир, кытчӧ муртса-муртса гири-люки эз усь.

Максимлӧн квартира ӧдзӧсыс, пытшкӧс томан діныс, вӧлі кыза лӧсалӧма — тӧдӧмысь, неӧтчыд нин ключтӧг пыралӧмаӧсь. А жырйыс Кимӧс ёна шензьӧдіс сійӧн, мый быд стен, а сідз жӧ джоджыс и пӧтӧлӧкыс вӧліны краситӧмаӧсь разнӧй рӧмӧн. Гӧрд, виж, кельыдлӧз, турунвиж да весиг сьӧд рӧмъяс сука да яръюгыда быттьӧ вензисны ӧта-мӧдныскӧд. Шӧйӧвошӧм Ким эз и куж думыштны, бур али лёк тайӧ.

Жырйын вӧліны неыджыд книжнӧй шкап, бумагаӧн тырӧм письменнӧй пызан, кык улӧс, нӧшта ӧти улӧс пыдди — ыджыд кыдз пу чурка, мыйысь вӧлі лӧсйӧма морт юр. Ким пуксьыліс тайӧ юр вылас, и сылы кыдзкӧ быттьӧ нелӧсьыд лоліс. Стенъясын ӧшалісны вит-ӧ-квайт картина. Ӧтиын ачыс Максим, дзугсьӧм юрсиа да киас кузь шы кодь ручкаа, вӧлі тӧвзьӧ бордъя вӧв вылын, дерт, Пегас вылын. Мӧд картинаын кысянькӧ пемыдінсянь ӧзйысь да помтӧг шог синъясӧн тэ вылӧ видзӧдіс кутшӧмкӧ дядьӧ, и сылӧн видзӧдласыс быттьӧ дзужаліс ловтӧ. Верблюд гӧн эшкынӧн павкнитӧм важиник койка вылын куйліс радиола. Комнатаысь чорыда кыліс некор бырлытӧм табак дук, коді вӧлі сорласьӧма ӧшинь вылын быдмысь посни да небыд коръя мята кӧрӧн.

«Аслыссяма морт, тыдалӧ!» — думайтіс квартираса кӧзяин йылысь Ким, ӧтарӧ-мӧдарӧ шензьӧмӧн чатрасигтыр.

— Тані миянлы лоӧ космосын кодь спокойнӧ, — коддзӧмӧн сёрнитіс Рудольф. — Вайлы кисьтылам предпоследний раз.

— Быдса квартира ӧтнаслы сетлӧмаӧсь? — юаліс Ким.

— Как бы не так, дорогуша! Оз на ми вок водзын реверансъястӧ вӧчавны... Максим кык во оліс Алёнушкакӧд. А сэсся — столкновение характеров, стремление к самостоятельности. И разошлись, как в море корабли. Алёнушка кык арӧса Витюкыскӧд муніс под родительский кров...

«Гашкӧ, буретш Света вӧсна тадзисӧ лои?» — Кимӧс бара на вермӧны тайӧ мӧвпъясыс.

Но сэки жырйӧ пырис нӧшта ӧти том морт — Максимлӧн да Рудольфлӧн бур тӧдса, спортсмен, вермасьысь. Бур мый пырис, Ким сылы ёнджыкасӧ и кисьталіс вайӧм винасӧ. Вермасисны спортсменкӧд ки личкӧмысь да кыскасисны чунь крукӧн. Ким кыкнан ногыс вермис сійӧс. Сэсся вермасьысьӧс колльӧдісны аэропортӧ. Сы бӧрын нӧшта на пыралісны магазинӧ. «Босьта ӧти «Варна» Генкалы», — шуис Ким да сувтіс кассадінса кузь ӧчередьӧ. Кутшӧмкӧ дядьӧ пондіс сюйсьыны касса ӧшинь дорӧ сулавтӧг. Рудольф тӧв юысь варыш моз уськӧдчис сы вылӧ, магазин тырнас пондіс пинявны сійӧс. Сэсся тшӧктіс Кимлы:

— Дорогуша, тэ ёнджык, вай тодмышкав нахалӧс.

Ким зырӧдіс скӧра и дивӧпырысь видзӧдысь дядьӧӧс, шуис сылы:

— Другӧ, ӧчередьтӧг сюйсьысь мортыд мем кажитчӧ медся зывӧкӧн!

Тайӧ дядьӧыс вӧлі Пантелеймон Михайлович Кызродев.


Комынӧд глава


Ёна скӧрмӧм Пантелеймон Михайлович тӧдіс Кимӧс, да скӧрмӧм дінас содіс и шензьӧм. Сылы пырысь-пыр жӧ тӧд вылас уси собрание вылын пиыс вӧсна доймасьӧмыс и тайӧ том мортыслӧн сьӧлӧмас кутчысьысь кывъяс: «Чужин кӧ мортӧн, ёнджыка юась ассьыд, кыдзи колӧ овны...»

Сэки Пантелеймон Михайловичлӧн пессис-нюкрасис лолыс, а ӧттшӧтш завидьтіс тайӧ заводсаыслы да газетса нылыслы. «Найӧ шаньӧсь, тӧлкаӧсь, — помнитӧ, мӧвпаліс сэки майор, — налы, буракӧ, томысянь ставыс гӧгӧрвоана олӧмсьыс, и найӧ, дерт, лоӧны шудаӧсь... Не миян моз, сьӧдас вуджасны олӧмсӧ...»

Ӧні со тайӧ зонмыс ачыс код юра шӧйтӧ, общественнӧй местаын дзугӧ пӧрадок.

Пантелеймон Михайлович эз кут ньӧбны донтӧм калбас, петіс ывлаӧ да пемыдінас виччысьыштіс кык другӧс, а кор найӧ тшӧтш петісны магазинысь, ньӧжйӧникӧн мӧдӧдчис на бӧрся.

«Кодӧсь нин, а бара на вина босьтӧмаӧсь, — мӧвпаліс майор, — он кӧ ӧлӧд найӧс, мыйкӧ лёктор вермасны керны».

Улича вывті мунігӧн зонъяс гораа сёрнитісны, гегъялісны-сералісны, паныдасьысь йӧз бергӧдчылӧмӧн дивитӧмпырысь видзӧдісны на вылӧ. Торйӧн нин ёна йӧйталіс ичӧтджыкыс, урӧс петук кодьыс, а сэсся сійӧ зургис пельпомнас ыджыд портфеля мужичӧйлы, мыйысь мӧдыс шатовмуніс да муртса эз усь.

«Тайӧясӧс колӧ пыртны вытрезвительӧ! — шуис ас кежас майор. — Мед сэні пальӧдчыштӧны...» — Сэсся сійӧ суӧдіс том йӧзӧс, сувтіс на водзӧ да стрӧга шуис:

— А ноко, молодечьяс, мӧдӧдчыламӧй мекӧд!

— Кытчӧ тэкӧд? Код тэ сэтшӧмыс? — пырысь-пыр жӧ лэптіс сорссӧ ичӧт петукыс; сійӧ вӧлі сэтшӧм код, мый, буракӧ, вунӧдӧма нин магазинын паныдасьлӧмсӧ.

— Ме милицияын уджалысь. Ті кодӧсь, йӧткасянныд-тойласянныд, дойдаланныд гражданаӧс. Лоӧ нуӧдны тіянӧс вытрезвительӧ.

— Пардон, ме сэтчӧ ог кӧсйы мунны! — шуис Рудольф, но Пантелеймон Михайлович, нывъясӧс моз, топыда кутіс нин найӧс сой пӧлӧдныс.

— Ми абу на сэтшӧм кодӧсь, мед нуӧдны миянӧс вытрезвительӧ, — шуис Ким; мед кажитчыны садьджыкӧн, сійӧ мый вермӧмсьыс зілис мичаджыка шуавны кывъяссӧ.

— Тӧда ме пьянникъястӧ: кытчӧдз ныр выланыс оз зульскысьны, век «садьӧсь».

— Лэдзӧй, пӧжалуйста, миянӧс, и ме кӧсйыся лючкиӧн-бурӧн катӧдны тӧварышӧс гортӧдзыс, — корис Ким.

— Лэдза, дерт... Пельӧс сайӧдз мунанныд, юанныд нӧшта зепсьыд дознытӧ и понданныд пурны бур йӧзсӧ.

— Ог сэсся юӧй, тайӧс ме босьті общежитиеса ёртлы. Генкаӧн сійӧс шуӧны, колӧкӧ, аски волам сыкӧд тіян дінӧ...

— Тырмас больгыны, восьлалӧй тэрыбджыка! — шуис Пантелеймон Михайлович да кежис вытрезвительлань, сійӧ матын и вӧлі.

— Нинӧмысь миянӧс босьтнысӧ, ме ог мун! — скӧрмис Ким и тан сувтіс.

— Мунан! — шуис Пантелеймон Михайлович да пондіс вынысь кыскыны.

Ӧтиыс кыскӧ, мӧдъясыс пыксьӧны. Сэки Ким ёнджыка песовтчис, и Кызродев вильдіс да швач уси, ёна дойдіс пидзӧссӧ, но эз лэдзчысь Ким дінысь. Рудольф жӧ мыніс да кутіс латайтны-пышйыны. Кызродев перйис зепсьыс свисток да кыкысь тюрӧбтіс, а сэсся кӧсйис песовтны Кимлысь сойсӧ мышкас, но эз вермы; мӧдыс лёк вынӧн ӧвтыштчис кинас и веськаліс Пантелеймон Михайловичлы вомас. Доймӧм да скӧрмӧмвывсьыс майор паныд лӧсыштіс, мӧдыс тшӧтш вочавидзис...

Котӧрӧн локтісны куим милиционер, и кӧть кутшӧма эз пыксьы да нӧйтчы ярмӧм Ким, кыскисны сійӧс вытрезвительӧ.

Пантелеймон Михайловичлӧн зэв ёна доймис пидзӧсыс, потӧм вом дорсьыс петіс вир.

— Сволочь! — гораа шуаліс сійӧ милиционеръяс дырйи. — Код вылӧ усьласян? Кор висьтаси, мый ме милицияса уджалысь, дзикӧдз звермис... Но энлы! Ребята, мед документсӧ кольтӧг эз вӧв лэдзӧма тайӧс!

— Лоас вӧчӧма, тӧварыш майор?

Гортланьыс азыма восьлалігӧн Пантелеймон Михайлович казяліс, мый и плащ морӧсыс ыджыда резьдӧма. «Тайӧ тшӧтш содтӧдӧн лоӧ! — некыдз на эз вермы лӧньны сійӧ. — Ме тэд петкӧдла, геройлы!..»

— Но, кристос! Тшӧтш нин али мый косясин кодкӧдкӧ?! — повзис гортас гӧтырыс, Павла Васильевна, мыйӧн сӧмын казяліс верӧссӧ.

— Тэкӧд! — веськодьпырысь вочавидзис мӧдыс, сэсся юаліс: — Валерьян гортын?

— Гортын. Ӧні тай эськӧ оз ёнасӧ и петавлы рытъяснад да...

Пантелеймон Михайлович, пӧрччысьтӧг и мыссьытӧг, зур-зар пырис пиыслӧн жырйӧ. Валерьян куйліс крӧватяс, пель дінас пуктӧма «Спидоласӧ», кытысь кыліс нор музыка. Батьыс вылӧ видзӧдлӧм бӧрын чеччыштіс крӧватьсьыс да повзьӧмӧн горӧдіс:

— Мый лои, папа?!

— Ничево видыс, да? Тӧдан он, коді тадзсӧ керис?

— Коді?

— Тэнад другыд...

— Кутшӧм друг?! — помӧдз шӧйӧвошис Валерьян. — Менам некутшӧм друг абу!.. — горӧдіс сійӧ.

— Заводсаыд, коді ордлыястӧ кусняліс.

Валерьянлӧн гӧгрӧсмисны синъясыс:

— Мый тэ, папа?!

— Сійӧ, тэд шуӧны!

— Кимыс?.. Сійӧ ӧмӧй тӧдӧ тэнӧ? Сэки, клубас, тэ эн сёрнит да...

— Тӧдӧм оз ков. Садьтӧм кодӧсь, хулиганитӧны карын. А кор куті нуӧдны вытрезвительӧ да милицияын уджалысьӧн шуси, дзикӧдз звермис... Видзӧд, кутшӧм пасъяс колис. Пидзӧс гӧгыль, гашкӧ, вӧрзис и.

Пантелеймон Михайловичлы ӧні нин збыльысь кажитчис, мый буретш тадзи и вӧлі. Сылы кажитчис, мый заводса зон эз сідз-тадз ыръянит, а тӧдӧмӧн уськӧдчис власьтлӧн представитель вылӧ.

— Мый нӧ ӧні лоӧ, папа? — юаліс Валерьян; сылӧн лолыс кыдзкӧ друг ыпнитіс.

— Ме сылы, стерволы, петкӧдла, кыдзи милицияса майоръяс вылӧ усьласьны! Ме сійӧс велӧда дорын узьлыны!

— Он жӧ ӧд судитчыны кут, Паня? — порог дорсянь юаліс майышмунӧм Павла Васильевна.

— Тэнсьыд юала! — гӧтырыслань бергӧдчывтӧг шуис майор.

— Найӧ тай нӧ бурӧн со ставсӧ керисны! — бара на шыасис нывбаба.

— Ланьт, тэд шуӧма! — дзикӧдз пузис верӧсыс. — Мун сёйны лӧсьӧд, сійӧс тӧд!

Мам мунӧм бӧрын Валерьян юаліс:

— А збыль ӧд, папа?

— Аски жӧ начальстволы доложита. Сідзи, мися, и сідзи.. Тайӧ — абу шутка... А сэсся прокуратураӧ нуа делӧсӧ. — Тадзи сёрнитігӧн Пантелеймон Михайлович виччысьтӧг думыштіс, мый тайӧ делӧсьыс сылы, медбӧрын, вермасны и сетны важӧн нин заслужитӧм подполковник звание...

— Папа, а тайӧ абу водзӧс босьтӧм кодь?

— Мый тэ сӧран! — скӧраліс батьыс. — Власьтлӧн представитель вылӧ усьласьӧны код юраяс, а ме кута чеченитчыны накӧд. Тадзинад нӧ кутшӧм авторитет лоӧ милицияыслӧн?! Тадзинад став преступникыс миянлы сьылі выланым вожасяс!..

— Заводсаыс быттьӧ абу преступник кодь... Меным эськӧ веськодь да, менам лӧгӧй пуӧ жӧ сы вылӧ.

— Тӧрыт эз вӧв преступникӧн, а талун лои! — формула моз ратшнитіс майор.


Комын ӧтиӧд глава


Тешкодь вӧлі Кимлӧн садьмӧмыс...

Быттьӧ кӧсйӧ садьмынысӧ, а кодкӧ оз лэдз. Оз нин узь, а кажитчӧ, мый пыр на вӧтасьӧ, сы вӧсна мый некыдз оз вермы вӧрзьынысӧ.

Ким кымыньӧн куйлӧ чорыд топчан вылын. И сэтшӧма топӧдӧмаӧсь-кӧртавлӧмаӧсь сійӧс сэтчӧ, мый позьӧ вӧрӧдыштны сӧмын кокъяснас, пидзӧс кусыньсьыс улітіджык.

Ким мырдысьӧн зэвтӧ вежӧрсӧ, вӧтӧс моз казьтылӧ дядьӧкӧд пессьӧмсӧ, сэсся милициякӧд ноксьӧмсӧ. «Буракӧ, ёна скӧрмӧдсьӧма менам найӧс...» — дзужалӧ сійӧс гажтӧм мӧвп.

Мый нӧ ӧні бур йӧзыс, бур тӧдсаясыс шуасны сы йылысь, Ким йылысь?

А сэсся и дзенгис важӧн нин кыйӧдчысь мӧвп: «Кыдзи нӧ ме ӧні видзӧдла синъясас Светалы?»

Тьпу жӧ эськӧ да!..

Кимлы бӧр сетісны став документъяс и сьӧм — сё дас куим шайт. Веськыда кӧ шуны, сьӧмсӧ Ким эз нин и виччысь, сы вӧсна мый унаысь кывліс: вытрезвителяд пӧ куштӧны зептӧ.

Но милиционер шуис:

— Лыддьы тані. Мыйта вӧлі, сымда и эм...

Сэки Кимлӧн ырзьыштліс сьӧлӧмсӧ шонтысь надея: «Буракӧ, ӧні жӧ лэдзасны... Буракӧ, торъясӧ немтор эз ло...»

Но сійӧс эз на лэдзны, а нуӧдісны дежурнӧй дінӧ. Сэні, ыджыдкодь жырйын, уна лыда телефонъяса пызан сайын, пукаліс тӧдса старшӧй лейтенант. Сыкӧд Ким не ӧтчыд нин веськавліс чери кыйны. Кимлы ёна долыдджык лои сьӧлӧм вылас: тӧдсаыд — век нин тӧдса!..

Кимӧс казялӧм бӧрын старшӧй лейтенантлӧн кыпавлісны синкымъясыс. Петіс пызан сайысь да нуӧдіс зонмӧс коридор помӧдз, сэні юаліс:

— Тэ-ӧ тайӧ, Котков? Вомыд пыктӧма... Чужӧмыд пӧлыньтчӧма...

— Чорыдакодь юыштӧма лои тӧрыт... Ӧти дядьӧ, тіянын уджалысьӧн вӧлі висьтасьӧ, мырдысьӧн пондіс нуӧдны...

— Хы! — старшӧй лейтенант лэчыда видзӧдіс Ким вылӧ. — Кодӧс-кодӧс, а тэнӧ, Котков, эг чайтлы ме татысь аддзыны... Некыдз эг чайтлыв, мый тэ татшӧмторъяс верман вӧчны...

— Олӧмад тай быд ногыс артмылӧ... — ышловзис Ким. — А ӧні сэсся ме, гашкӧ, гортӧ муна?

— Эн на тэрма-ась!.. — шпыньмуніс мӧдыс. — Пукалышт менам кабинетын... Тӧдмасьышт миян уджӧн... А ӧти сайын тӧдмасьышт тшӧтш и накӧд, кодъяслӧн туй вылӧ тэ тӧрыт петӧмыд...

— Некутшӧм туй вылӧ ме эг пет! — ыпнитіс Ким.

— Найӧ, кодъяс ангел кодь сӧстӧмӧсь, ӧні узьӧны гортаныс небыд вольпасьын. А оз бовъявны вой шӧра войӧ милиция керкаын, — воча скӧрмыштіс мӧдыс.

Найӧ бӧр пырисны дежурнӧйлӧн кабинетӧ. Старшӧй лейтенант индіс Кимлы тыртӧм улӧс вылӧ, ачыс зумыда пуксис пызан сайӧ.

Пыртісны тошсялӧм чужӧма ойзысь дядьӧӧс. Кымӧсас сылӧн, кӧсичасьыс неуна вылынджык, эрсвидзис гырдӧсь рана, потӧма истӧг кӧрӧб кузя. Петі пӧ ресторанысь, неуна пӧ мунышті, да и кульыштісны сьӧкыд сулеяӧн.

Дядьӧӧс нуӧдісны больничаӧ.

Вайӧдісны кузь бурыся том мортӧс. Бура пасьтасьӧма, ыкша чужӧма.

— Ме протестуйта! — горзӧ. — Незаконнӧя вайӧдінныд! — Перйис папирос, кӧсйис ӧзтыны. Но дежурнӧй чорыда ӧлӧдіс:

— Куритчыны кутан мӧдлаын!.. А законнӧ али незаконнӧ, тыдовтчас суд вылын. Кор тэ сувтан ӧбидитӧм нывкаыслы воча.

Пырысь-пыр жӧ лӧньӧм том мортӧс нуӧдісны.

А дежурнӧйлӧн пызан водзӧ, ӧта-мӧд вылас пеж кывйӧн горзіг-видчиг, сувтісны мужика-бабаа, буракӧ, гозъя. Кыкнанныс ичӧтикӧсь, жебиникӧсь, ёна юӧмысла чужӧмъясыс чукрассьӧмаӧсь, вижӧсь, а мужикыслӧн, содтӧд, чужӧм кучикыс чездасьӧма гӧрд везъясӧн... Нывбаба кутіс киас ыджыд тетрадь лист, гырыся гижӧма кыкнанладорас. Тайӧ пӧ верӧс вылӧ заявление, вины пӧ кӧсйӧ. Кор сійӧ пуктіс кабаласӧ дежурнӧйлы пызан вылӧ, мужикыс уськӧдчыліс кватитны сійӧс. Буракӧ, чайтіс, мый косявлас кӧ, ставыс лоӧ бур...

— Мӧд к-ковмис! — код гӧлӧсӧн горзіс сійӧ. — М-мӧд сюрис!.. Тэныд этша, мый ме тэнӧ к-королеваӧс моз видза!..

Кимӧс медся ёна шензьӧдіс урӧс дядьӧлӧн «королевасӧ» казьтыштӧмыс. «Другӧ, король кодь и эм тэ...» — шога мӧвпыштіс сійӧ.

И ӧд ставыс йӧз! Ставыс чужлӧмаӧсь мича олӧм вылӧ... Шуд вылӧ. А со тай тайӧяслӧн шудыс!

Шогӧ усьӧм Кимлы весиг пондыліс кажитчыны, мый веськаліс помӧй гуӧ, кытчӧ чукӧрмӧ карысь став няйтыс, лёкыс, став шыбласыс.

И сійӧ, Ким Котков, со тані жӧ... Тані!

Окма!

А шынеля войтыр водзӧ на вайӧдалісны кодъясӧскӧ. Частӧ триньӧбтывліс телефон, кодъяскӧ корисны отсӧг, и шынеля йӧз, кобураа тасманысӧ лӧсьӧдыштӧмӧн, бара петавлісны пемыд ывлаӧ, журкнитлісны-мунісны паськыд гӧрд визя машинаӧн.

Сійӧ войнас Кимлы найӧ кажитчисны аслыспӧлӧс сизьясӧн, кодъяс мудз тӧдтӧг весалісны карсӧ быд пӧлӧс лёльӧсьыс.

Медбӧрын дежурнӧй шыасис сы дінӧ:

— Но мый, Ким Палыч, тӧдмасьыштін миян гӧсьтъяскӧд?

— Пӧттӧдз...

— Но и кыдз?

— Быттьӧ ад гуранӧ веськавлі...

— Хы! Но ладнӧ... Мун сэсся гортад, шойччы, — дежурнӧй судзӧдіс шкапсьыс «Варна» доз, этикетка вылас вӧлі гижӧма Кимлысь овсӧ. — Тайӧ пӧ тэнад, босьт.

— Ӧні оз ков сылы сетны, — шыасис гражданскӧй паськӧма морт.

— Дас час кежлӧ волы, — шуис дежурнӧй. — Паспортыдла, да и винаыдла тшӧтш.

Ким беретасис да петіс руа пемыд ывлаӧ.

Вӧлі куим час асыв, улича вылын некод эз тыдав. Ким видзӧдліс бӧрвыв, мед не вунӧдны, кутшӧм ӧдзӧсӧд пырны. Сьӧлӧмыс эз вӧв асінас.

Генка абу на и водлӧма. Шуӧ: вӧлі пӧ весиг выль другъяс ордад: Рудольф да Максим ордын. Максим пӧ муртса на воӧма командировкаысь, нинӧм оз тӧд. А Рудольф пӧ сынисадь узьӧ, весиг эг вермы садьмӧдны.

«А ме сійӧс сэтшӧма виччыси... «Друг» жӧ!» — водзӧ на дзугыльмис Ким.


Комын кыкӧд глава


«Мыйыс нин сӧмын эз лолы мекӧд! Ӧні, гашкӧ, и лои медлёкыс...»

Тадзи медводз мӧвпыштсис Кимлӧн, кор сійӧ, гортса вольпасяс узьыштӧм бӧрын, восьтіс синъяссӧ.

Сьӧлӧмыс доймасьӧ, Генаысь яндзим, весиг абу окота сёрнитны. Сійӧ кыв оз шу, но тадзи чӧв олӧмнас ещӧ нин кӧритӧ.

Гена муніс удж вылӧ, а Ким кольччис. Сэсся и петіс карӧ.

Войбыд зэрӧм бӧрын енэжыс, буракӧ, став слӧтсӧ койыштӧма му вылӧ, — енэжыс талун сӧдз, шонді вашъялӧ, небыд тӧвру меліа малалӧ зонлысь чужӧмсӧ, окота жан восьтыны морӧс да восьлавны и восьлавны тӧлыслы паныд.

Но Кимлӧн тай туй помыс дженьыд талун — милициялӧн керкаӧдз сӧмын.

А тулысыс ыджыд вынӧн мӧдӧдчис, регыд дзикӧдз садьмӧдас мусӧ, ставсӧ гӧгӧр ловзьӧдас.

Нывъяс шыбитӧмаӧсь кузь тӧвбыдӧн мустӧммӧм сьӧкыд пальтонысӧ, дженьыдик куртка-платтьӧаӧсь ветлӧдлӧны, ошйысьӧны мича кокъяснаныс.

Со тай, туй мӧдарӧдыс ӧти мунӧ. Сійӧ тшӧкыда паныдасьлывлӧ Кимлы и паныдасигӧн видзӧдлывлӧ зон вылӧ оз дзик веськодь синъясӧн... Буракӧ, и ӧні казяліс. Быттьӧ веськодьпырысь вуджис туй таладорӧ жӧ. Тотшсьӧдӧ чача кодь мичаник, кузь гӧлень помъясас тугъяса, сьӧд сапӧгъяснас. Кимлы кажитчӧ: нывлӧн воськолыс тӧдчымӧн ньӧжмӧ. Гашкӧ, сылы нимкодь тадзи восьлавны мыйӧнкӧ кажитчысь зон водзвылын? Нывлӧн кыз нейлон костюмыс (а, гашкӧ и, код тӧдас, кутшӧм «лон»!) быттьӧ пышйӧ пидзӧсъяссьыс. Кимлы бура тыдалӧ, кыдзи нывлӧн кок кусыньясас кӧрсьыштлӧны пырыс тыдалана вӧсньыдик капрон чулкиясыс да ӧдйӧ бӧр шылялӧны-веськалӧны. Ким казялӧ и кок кусыньясас тӧдчыштысь гӧпторъяссӧ...

Тайӧс аддзӧмысь ли, сӧнік дука тувсов сынӧдсьыс ли Кимлӧн туыштӧ лолыс — сылы окота радейтны. А колӧ со мунны милицияӧ...

Парк ойдӧма лӧзоват югыдӧн да сьӧд ракаяслӧн лэчыда горзӧмӧн. Ким видзӧдыштіс югъявмӧн сьӧд лэбачьяс вылӧ, позъяс дінын налӧн зыксьӧм-ноксьӧм вылӧ. «Со кодъяслы, буракӧ, медлӧсьыда овсьӧ: некод найӧс оз вӧрӧд, йӧз дорын сёян-юан век нин сюрӧ...»

Сыктыв берегъяс сылӧмаӧсь нин, а ачыс юыс кыз йи улын на. Тешкодь. Но сы пыдди арнас мӧдарӧ овлӧ: берегъясыс лым улынӧсь, а юыс восьса на. Вӧр-ваыд тӧдӧ, мый вӧчӧ: быдӧнлы мурталӧ колана кад.

Друг юр весьтын гымыштіс. Ким чатӧртліс юрсӧ — пыдӧстӧм лӧз енэжӧ сатшӧ реактивнӧй самолёт, бӧрсяньыс нёль визя еджыд бурысь нуӧдӧ, ачыс кажитчӧ ичӧтик эзысь перна кодьӧн. Кимлӧн вежыс петыштіс пилот вылӧ: пукавны эськӧ сы местаын да утьыштны кытчӧкӧ помтӧм лӧз йиркас, ылӧджык став мыжъяссьыс.

А век на водз. Гашкӧ, пыравны парикмахерскӧйӧ? Шырсьӧм-бритчӧмӧн мунны сэсся милицияас?

Шырысьыс, ыджыд тушаа, шыльыд вир-яя ныв, зэв варов веськаліс. Тайӧ вӧлі Зина.

Нывлӧн киясыс шоныдӧсь, найӧ небыда инмӧдчывлӧны Кимлы голяас, чорыда кылӧ дуки дук. Шоныд, лӧсьыд, пукавны и пукавны эськӧ тадзи...

— Юрсиыд тэнад кывзысьтӧм, — кылӧ, сёрнитӧ ныв. — Ачыд вӧд абу жӧ сэтшӧм? Чужӧмыд тай доймӧма со-а...

— Ӧткымынӧн шуӧны: сэтшӧм пӧ...

— Тэнсьыд эськӧ колӧ кудритны юрситӧ. Сэтшӧм сук со. Сэки эськӧ став нылыс тэнад вӧлі.

— Мый меным ставсьыс. Ме эськӧ тэ вылӧ, ӧтнад вылӧ, миритчи.

— Либӧ эн узь! Кӧсъян кӧ век мича юраӧн ветлӧдлыны, — ныв сералӧ и тэрыба гольскӧдчӧ кузь ножичнас. Зина оз тӧд Кимӧс, но век жӧ думайтӧ: «Грешитны кӧ нин — колӧ татшӧмъясыскӧд грешитны. А не Сашук кодь зырымбедьяскӧд».

Шырны помалӧм бӧрын Зина нӧшта видзӧдліс Ким вылӧ донйыштана синмӧн юрсяньыс кок улӧдзыс да шуис:

— Аддзан, кутшӧм молодеч лоин! Мӧдысь бара лок ме дінӧ.

— Сӧмын тэ дінӧ, — нюмъёвтіс Ким.

Буретш дас часын Ким пырис милицияӧ. Дежурнӧй нуӧдіс торъя жырйӧ: виччысьлы пӧ.

Пукалӧ Ким, а юрас нӧйтчӧны дойдасьысь мӧвпъяс: «Мыйла нӧ эськӧ ӧнтай паспортсӧ эз сетны? Дерт, кольӧдісны сы могысь жӧ, мый могысь ме тӧндзи босьтлі Валерьянлысь...»

Виччысьтӧг пырис тӧрытъя дядьӧыс — ар ветымына, ыджыд, ён мыгӧра, бритӧм юра, тыр вира чужӧма. «Вом дорыс со вирсермунӧма и пыктӧма!» — шогпырысь казяліс Ким. Дядьӧ стрӧга видзӧдліс зон вылӧ, зэлыда шуис:

— Но, ловъя на, герой? Мунам мекӧд.

Сійӧ дыр новлӧдліс Кимӧс кутшӧмкӧ коридоръясӧд, катӧдіс ӧти судтасянь мӧдӧ — татысь и петныд сэсся он аддзы! — и медбӧрын вайӧдіс неыджыд жырйӧ. И висьталіс со мый: ме пӧ майор, уджала следовательӧн, тӧрыт пӧ тэ тышкасин мекӧд. Со пӧ, видзӧд, улыс парйӧй кыдзи пыктӧма. Кокӧс пӧ кусыньтны лючки ог вермы ни.

Кимӧс пондіс шогӧдны татшӧм кывъяссьыд. Торйӧн нин сы вӧсна, мый дядьӧыслӧн гӧлӧсыс и став туша-рожаыс быттьӧкӧ нимкодясис сійӧс, Кимӧс, кутӧмысь.

Со и локтіс паспортла!

Сэсся майор звӧнитліс заводса парткомӧ: ӧти партизан пӧ тіян пукалӧ ме ордын. И висьталіс мыйысь. Та бӧрын шуис Кимлы:

— Тэнад делӧ йылысь ме висьталі нин аслам начальстволы. Абу ӧд шутка — уськӧдчыны милицияса уджалысь вылӧ. Татшӧмыд миян зэ-эв шоча овлӧ!

— Ті неуна содталыштанныд, — шуис Ким. — Ме эг усьлась, ме сӧмын пыкси, мед не пырны вытрезвительӧ.

— Ӧні, дерт, тэ верман висьтавны пу йылысь турияс, — шуис майор.

— Милицияыс меным немтор лёксӧ эз кер, — небыда и эскӧданаа шуис Ким. — Мыйла нӧ ме кута усьласьны сы вылӧ? Эг на ӧд ме дзикӧдз йӧймы...

— Сы йылысь тӧрыт коліс думайтны, — шуис Пантелеймон Михайлович.

Кимлы сетісны паспортсӧ, а тшӧтш и лёктор вылӧ йӧткыштысь «Варна» дозсӧ. Вайис сійӧс гортас, сувтӧдіс пызан вылас да шуис Геналы, коді буретш воӧма пажнайтны:

— Тӧрыт эськӧ кӧсйи вайны тайӧс, но эг тай воӧдчы. Мый сэсся керан...

Геналӧн векньыдик чужӧмыс нӧшта на йывмӧма. Кыв ни джын шутӧг босьтіс дозсӧ да петкӧдіс ывлаӧ. И пасьнитіс сэні.

Кимлӧн юрыс жувгыштӧ, шуйга бан бокыс да вылыс парйыс пыктӧма, а чужӧмыс пӧла лоӧма. Тешкодь... Немтор абу окота керны, талун заводын бара на уджавтӧм лои: пукалӧ, видзӧдӧ ӧшиньӧ, но некодӧс оз аддзы. Вомас курыд, быттьӧ ыж гидйын, немтор на эз сёйлы, оз ков сёйнысӧ. Ывла вылӧ петны яндзим и...

«Мый думыштас Света, кор тӧдмалас?» — тайӧ мӧвпыс медъёна кусньӧдліс Кимӧс.

«Гашкӧ, ветлыны комсомол горкомӧ? Шуны: мися, эг на ӧд сы ыджда мыж вӧч, мед тюрмаӧ пуксьӧдны; мися, тані уджалігӧн ыджыдджык пӧльза на сета».

«Ог, некытчӧ ог мун. Мед, колӧкӧ, пуксьӧдӧны. Сэні, тюрмаас, ӧд йӧз жӧ олӧны...

А сэки мый думыштас ме йылысь ичӧт вокӧй, кӧсйӧ тай отпускӧ волыны? Мый думыштасны найӧ, кодъяс чайтӧны, мый ме мыйкӧ буртор на верма вӧчны?»

Батьыс сы арлыднас усьӧма фронт вылын, усьӧма лёк врагкӧд тышкасигӧн, а сылы ӧмӧй ковмас тюрмаӧ мунны?..

Буракӧ, нинӧмла вӧлі карас воны сылы. Вӧрын чужліс, вӧрын и коліс овны. На пӧвстын, кодъяс бура тӧдӧны сійӧс, да татшӧмторъяссьыд вермасны и дорйыны и прӧститны.

Войнас Ким аддзыліс шензьӧдана вӧт. Быттьӧ пукалӧ жырйын кутшӧмкӧ тьӧтӧкӧд. Друг сэтчӧ пырис Света — збыльсяыс на мича, но дзугыль. Ким быттьӧ сійӧс важӧнкодь нин тӧдӧ да гусьӧникӧн радейтӧ. А сійӧ Кимӧс, буракӧ, оз тӧд.

— Света, — шуис тьӧткаыс, — ме видзӧда да, тэнад мичлуныд заводитіс чусмыны.

— Збыль?! — ырсмуніс Света, шога ышловзис, гӧлӧсас ыджыд дойӧн пӧся горӧдіс: — Кусӧ мичлунӧй!.. О енмӧй! А кутшӧм мича ме вӧвлі! Ок, кутшӧм мича вӧвлі!.. — Сэсся нормыштӧм гӧлӧсӧн сійӧ юаліс: — Сідзкӧ, ёна нин тӧдчӧ, мый ме вежси?

— Оз ёна, но тӧдчыштӧ, — шуис Ким джӧмдалана, тіралысь гӧлӧсӧн. — Но менӧ ті... Ті менӧ и татшӧмӧн... Кӧть кутшӧмӧн шызьӧданныд сьӧлӧм пыдӧсӧдз... Тіян дырйи ме век пондыла сотчыны жар биын!

Света яндысигтыр син бӧжнас кыйкнитліс тьӧтӧ вылӧ, сэсся тэрыба матыстчис Ким дінӧ.

— Кӧть малыштӧй морӧсӧс! Сотчӧ! — шуис Ким.

— Ой! — ымӧстіс Света радлунӧн и дойӧн да ыльӧбтіс Ким вылӧ сьӧд синъяссьыс югыдсӧ.

— Мунамӧй мекӧд! — шуис Ким.

— Но менам верӧсӧй кӧсйис воны татчӧ! — горӧдіс ныв. — Гашкӧ, тӧдан, Максим нима...

Но друг сійӧ тшапа чатӧртіс юрсӧ да биа пӧся пондіс шуавны:

— А мед воӧ! Мунамӧй! Мед, колӧкӧ, вӧтчӧ! Мед лыйӧ! Веськодь... Ме кӧсъя тӧдмавны радейтчӧмыслысь медмича здукъяссӧ! Ме кӧсъя сотчыны радейтчӧмлӧн ставсӧ сотысь биын! А сэсся позьӧ и кувны... — Ті кыланныд? Ме кӧсъя кувны томӧн! Мичаӧн! — лэчыда горӧдіс сійӧ да топыда ляскысис Ким дінӧ.

Зэв ёна грымӧбтіс коридор ӧдзӧс, и Ким садьмис. Восьтіс синъяссӧ да забеднӧысла окота лои сьӧлыштны.

«Ӧнісянь Светатӧ ковмас сӧмын вӧтын и аддзывны...» — дӧжныштіс сьӧлӧмсӧ жаль тӧдтӧм мӧвп.

Зэв яндзим вӧлі мунны пӧлыньтчӧм чужӧмнад удж вылӧ. Дерт, ставӧн нин тӧдӧны лоӧмтор йывсьыс. Тешкодьтор: тэ сэтшӧм на жӧ, важкодь, морт, но унаӧн талун видзӧдӧны нин тэ вылӧ мӧд синъясӧн.

Цехӧ пыригӧн Кимлӧн пондіс зэв ёна пӧсявны шуйга пельыс, пельнёньыс сотчӧмӧн-сотчӧ.

Выль мотор чукӧртны заводиттӧдз Ким дженьыдика висьталіс ёртъясыслы, кыдзи да мый лои. Юим пӧ Рудольфкӧд, сэсся дядьӧ пӧ пондіс кыскыны вытрезвительӧ и — водзсаси.

— Веськыда шуа тіянлы, — помаліс Ким сёрнисӧ, — ме эг и думыштлы уськӧдчыны сійӧ дядьӧ вылас.

— А дойдалін сійӧс? — юаліс Марс, сӧстӧм чужӧмыс сылӧн шӧйӧвошӧма.

— Кутшӧмсюрӧ пасъяс кольӧмаӧсь...

— Да-а... — ышловзис Анатолий. — Винаыд ми воктӧ мый вӧчӧ.

— Таысь оз жӧ кут судитчыны майорыс, мужик морт! — гажаа шуис Лёшка.

— Сідзкӧ, железнӧй команда оз лэдз дзикӧдз вӧйтны ёртсӧ? — шуис бригадирныс, Гена, аслас войтыр вылӧ шоныда видзӧдігтыр. — Уджав, Кимка.

Мастер талун быттьӧ оз и казяв Кимӧс. Гашкӧ, сійӧ нимкодясьӧ ас кежас? Сы вӧсна, мый бӧръя кадас Ким чорыдакодь вензьывліс сыкӧд.

Пажнайтанінысь воигӧн Ким паныдасис заводса парторгкӧд, Виль Николаевичкӧд. Сувтӧдіс Кимӧс, кисӧ сетіс.

— Кыдз нӧ тэ сідзсӧ, а, Котков? А ми тэнӧ партияӧ кӧсйим примитны? Эн на вунӧд сёрнинымӧс?

— Ме тай сэки шулі тіянлы: мися, водз на меным партияас...

Парторг шылькнитіс небыд русыд юрсисӧ, ышловзис.

— Да, ситуация! Эг виччысь ме тэсянь татшӧмсӧ.

Сьӧлӧма морт эськӧ Вильыс, но кутас-ӧ сійӧ быд бурлачитысь понда тӧждысьны?

Судитасны кӧ, школаыд помавтӧм кольӧ. А институт йывсьыд думъястӧ ковмас дзикӧдз вылӧ нин вунӧдны... Ӧти рытӧн, ӧтчыд юӧмӧн лоӧ дзугӧма став олӧмсӧ.

Ёна и кузьӧн кажитчис Кимлы луныс. Лёк думъяс, сьӧлӧм сотігӧн ылькйӧдлысь-кыпӧдчысь курыд моз, лунтыр чашйисны ловсӧ. Мыйӧн сӧмын помасис сменаыс, ӧдйӧ и усйысис гортас.

Час вит гӧгӧрын друг воис Света, кӧть эськӧ и сыкӧд Ким ӧні медъёна эз кӧсйы аддзӧдчывны. Ставсьыс сотіс яндзим — и лоӧмторсьыс, и пӧлыньтчӧм чужӧмсьыс, и, кыдз аслыс кажитчис, журналисткаӧс мыйӧнкӧ зэв ыджыдторйӧн ылӧдлӧмысь.

Ныв сьӧлӧмсяньыс здоровайтчис, вӧйӧм син гуранъяса да синсӧ дзеблалысь Ким вылӧ видзӧдігӧн сылӧн жальыс петіс.

— Ме видзӧда да, тіянкӧд абу гажтӧм овны, — шуис сэсся ныв, думсьыс, кыпыдджыка, — мыйкӧ да мыйкӧ век нин лоӧма.

— Гижысьыдлы абу ӧмӧй бурджык тайӧ? — Ким мырдысьӧн пычиктіс чужӧм вылас нюм мода; и, думсьыс, сэтшӧм ногӧн, мед эськӧ эзджык тӧдчы чужӧмыслӧн вежыньтчӧмыс. — Оз нин ков лӧсьӧдлыны, чӧвтав сӧмын лоӧмторъяссӧ кабала вылад, — содтіс сійӧ.

— Вот ме ӧні чӧвта коскысь тасмаӧс да сэтшӧма швичйӧдла тэнӧ! — шуис Света, и сылӧн петіс пытшкӧсса, ыджыд вынӧн кутан дойыс.

— Вачкавны эськӧ и колӧ да... — ышловзис Ким.

— Да тэ нӧ кӧть гӧгӧрвоан он, мый вӧчин?!

— Зэв бура гӧгӧрвоа. Дерт, ме гажа юра вӧлі, сьӧлӧмӧй вӧлі матӧ воӧма ӧтиторйысь...

— Мыйысь матӧ воӧма?

— А сідз...

— Но коді ӧні тэныд эскас?

— А тэ нӧ, тэ нӧ он жӧ эскы, Света? — пӧся юаліс Ким.

Налӧн видзӧдласъясыс вочаасисны, и сымындатор чукӧрмис тайӧ вочаасянінас.

— Мый пӧльзаыс ӧні менам эскӧмысь, кӧть эськӧ и эски, — шуис Света; сылӧн гӧлӧсыс вежсьыштіс видзӧдласъяслӧн паныдасьӧмысь.

— Меным тайӧ ставсьыс бурджык, — синсӧ лэптывтӧг шуис Ким.

Здук кежлӧ пуксьыліс чӧвлун, а сэсся ныв юаліс:

— Тэ нӧ сійӧ майорсӧ эн али мый тӧд?

— Ме эг... кыськӧ быттьӧ и водзвыв нин аддзылі, но сідзсӧ ог тӧд...

— Да тайӧ жӧ Кызродев, Валерьянлӧн батьыс.

— Абу жӧ вед!.. — Кимлӧн быдсӧн вомыс калькаліс чуймӧмысла. — Но дивӧ тай...

— Кыдз нӧ тэ он тӧд сійӧс?

— Ог но, сэки тай мыйлакӧ эз сёрнит, собрание вылад.

— А ӧні либӧ мый думайтан — бурджык али лёкджык тайӧ? Мый буретш сы шӧрӧ веськалін?

— Код тӧдас...

Со кутшӧм сёрни лои Кимлӧн Светакӧд. Гажтӧмджык да косджык вӧтын аддзылӧм дорысь.


Комын коймӧд глава


Ким дінысь петӧм бӧрын Светалы окота вӧлі котӧртны гортас да наперво пӧттӧдзыс бӧрдны. А сэсся и сьӧлыштны став вылас. Гижан удж вылас тшӧтш и. Дзикӧдз вылӧ... Вӧзйысьны, шуам, сэтчӧ, кӧні рӧдмӧдӧны-быдтӧны вотӧс да дзоридзьяс, питомникӧ вӧзйысьны уджавны. Ноксьыны ньӧжйӧникӧн и сьӧлӧм тырнад радлыны, кор тэнад быдтасъясыд мичмӧдасны мусӧ.

Эмӧсь жӧ шуда йӧз!

Кор талун Максим юӧртіс телефон пыр Кимлӧн мыжмӧм йылысь, дзикӧдз шӧйӧвошӧм ныв некыдз эз кӧсйы эскыны. А сэсся и ачыс котӧртіс общежитиеӧ, заводын смена помсӧ ӧдва виччысис.

«О енмӧй! — шогсис и скӧраліс Света. — Этадзи колӧ жӧ йӧйтавны! Неважӧнся став лоӧмторъяс бӧрас! А ме сы йылысь мыйсӧ эг думайтлы! Войяс эг узь. Но жӧ эськӧ став мужикыс да! Да ӧд сійӧ ӧні ставсӧ дзугис менсьым. Гижӧдӧйлысь панассӧ и сюрӧссӧ. Дзик ставсӧ! Но яндысьтӧм син...»

— Вот пӧ сэсся и гиж! Вот пӧ сэсся и сибӧдчы сьӧлӧмнад татшӧм йӧз дінад.

О мортӧй, мортӧй! Кыдзи нӧ эськӧ гӧгӧрвоны тэнӧ? Мый тэныд колӧ, мед эськӧ тэ эн пес йӧй вынтӧ? Мед эськӧ бур вынтӧджык песін?

Света корсис Рудольфӧс да тшӧктіс веськыда висьтавны ставсӧ, мый налӧн лои Кимкӧд. Мӧдыс висьталіс да, быттьӧ нинӧм абу и вӧвлӧма, тӧдчӧдіс:

— Прамӧя лои Кимлысь рацпредложениесӧ мыськовтӧма.

— А тэ нӧ эськӧ мыйла тшӧтш эн сюр Кимыскӧд? — Рудольф вылӧ зывӧка видзӧдігтыр шуис Света. — Мыйла эновтін ӧтнассӧ ёрттӧ?

— Ог помнит, Света, — мыж тӧдтӧма нюмъяліс Рудольф. — Сэтшӧма коддзысьӧма. Ме ӧд Ким сертиыд — джын морт...

— Пышйынытӧ, небось, помнитӧмыд! — дӧжныштіс ныв.

— Кокъясыд, буракӧ, асьныс тӧдӧны, кытчӧ колӧ мунны, — ӧчкисӧ чышкаліг да сы вылӧ зэв збыльысь видзӧдіг шуис Рудольф.

— Ті пӧ и Максим ордӧ тшӧтш волӧмныд? — водзӧ юасис Света.

— Волім... Ким друг пондіс нуӧдчыны, — нырнас кыскалыштіс Надуткин. — Зептас сылӧн тетрадь вӧлі, окота пӧ лыддьыштны Максимыслы.

— Кутшӧм тетрадь?

— Меным сетіс сэсся, на, колӧкӧ, ачыд видзӧдлы. — Рудольф перйис аслас кыз портфельысь шӧри кусыньтӧм школьнӧй тетрадь.

Света босьтіс сійӧс да видлавтӧг сюйис сумкаас.

— Сэсся нӧ кыдзи кӧсъян юысь другтӧ дорйыны? Сійӧс пӧ ӧд ёна кӧсйӧны мыждыны.

— Ме чайта, прӧста повзьӧдлӧны, — шогавтӧг шуис Надуткин.

— Тэнад чайтігкості, он и тӧдлы, решётка сайын лоӧ.

— Оз жӧ кӧ-а... — нюмъяліс Рудольф.

Света котӧртіс милицияӧ. Тӧдса капитан, Петухов, ар комына сьӧдов мужичӧй, — сійӧс полковник индыліс налы отсӧг вылӧ — кывлӧма жӧ нин лоӧмтор йывсьыс.

— Пантелеймон Михайлович шуӧ: кор пӧ ме висьтаси милицияын уджалысьӧн, Котковыс пӧ уськӧдчис тышкасьны.

— Оз вермы лоны! — горӧдіс Света. — Кимыс абу сэтшӧм морт!

— Сідзи тай шуӧ-а... Асывсяньыс нин доложитӧма начальстволы. Делӧсӧ тшӧктӧмаӧсь сетны прокуратураӧ.

— Мый нӧ вӧчны? — майшасис Света. — Вермасны ӧд судитны...

— Да, вермасны, — шуис капитан.

— Вай либӧ кӧть ме пырала полковник дорад! — шуис Света.

— Сійӧ аски сӧмын воӧ командировкаысь.

— Но ті, ті асьныд, эсканныд талы?

— Ме нинӧм ог вермы шуны, Светлана Николаевна. Ме делӧсӧ тӧда сӧмын на Пантелеймон Михайловичлӧн кывъяс серти. И, веськыда кӧ шуны, менӧ ачымӧс чуймӧдіс тайӧ. Ме Котков йывсьыд полковниклы сӧмын бур ногӧн висьтавлі...

Гортас мунігӧн Света курыда мӧвпыштіс: «Дерт, кӧнкӧ, Пантелеймон Михайловичыс ӧні менӧ тшӧтш уськӧдлӧ тӧд вылас: видзӧдлам пӧ, кутшӧм сёрнияс тэ ӧні панан!..»

Батьыс эз на вӧв воӧма удж вылысь, и Света зэв тэрыба кутіс видлавны Кимлысь тетрадьсӧ. Та дырйи нывлӧн тіралыштісны киясыс, пӧся югъялісны синъясыс. Кодкӧ кӧ эськӧ видзӧдліс сэки Света вылӧ боксянь, то вермис эськӧ шуны: нылыс пӧ, буракӧ, мыйкӧ зэв ыджыдтор кӧсйӧ аддзыны тайӧ шӧри кусыньтӧм, вӧсньыдик тетрадьсьыс.

Тетрадьын вӧлі гижӧма висьт. Светалӧн шоналыштіс сьӧлӧмыс, мый буретш татшӧмтор аддзис. Висьтын сёрниыс муніс сы йылысь, кыдзи кык том морт сёр арын мунӧны вӧрӧ да вошӧны. Некымын лун мысти гортас, ӧдва ловъя, воӧ сӧмын ӧтиыс. Мӧдсӧ аддзасны кулӧмаӧн. Авторыс ёсьтӧ мӧвпсӧ сы вылын, мыйла кык ӧткодь зон пӧвстысь ӧтиыс лябис да воштіс олӧмсӧ, а мӧдыс помӧдз тышкасис олӧм вӧснаыс да колис ловйӧн.

«Тышкасис и вермис!»

Света долыдмис: «Ким мӧд ног эз и вермы гижны!»

— Ме кута тышкасьны тайӧс гижысь вӧснаыс! — гораа шуис Света. — Ме ог на мун дзоридзьяс да ӧмидз быдтыны!

Но мый нӧ колӧ вӧчны? Кыдзи докажитны милицияыслы, мый Кимыс абу сэтшӧм морт, кутшӧмӧн кӧсйӧ петкӧдлыны Кызродев.


Медводз колӧ ветлыны заводӧ, тӧдмавны, кыдзи йӧзыс видзӧдӧны татшӧмтор вылас. Кыдзи найӧ ӧні донъялӧны Кимсӧ.

И бур эськӧ вӧлі, та йылысь кӧ тӧдісны тшӧтш и милицияас! Мед эськӧ сэні донъялісны Кимсӧ не сӧмын Кызродевлӧн висьталӧм серти, а паськыдджыка, гӧгӧрбок.

Колӧ нуӧдлыны тшӧтш капитан Петуховӧс! Но мунас-ӧ сійӧ?

Ныв полігтырйи звӧнитліс и дженьыдика висьталіс ассьыс мӧвпсӧ. Мӧдыс эз и кут пыксьыны.

Кор выльысь паныдасисны, Света шуис:

— Гашкӧ, ме тіянӧс, Григорий Николаевич, эштытӧминысь торкала, ӧтчыд дай мӧдысь...

Мӧдыслӧн мугов чужӧмыс муртса тӧдчанаа нюмдыштіс:

— Ӧ-ӧ... миян уджыд век эштытӧм...

Восьлалӧны орччӧн заводлань, Света син бӧжнас кыйкнитлывлӧ костюм кежысь мунысь, шапкатӧм капитан вылӧ.

Сійӧ шӧркодь тушаа, ар комына, ньӧжмыдкодь вӧраса, сьӧд юрсисӧ шыльӧдӧма кымӧсланьыс. Сёрниыс лабутнӧй, кывъяссӧ шуӧ бура вежӧрталӧмӧн.

— Григорий Николаевич, абу кӧ секрет, кутшӧмджык удж эськӧ ті ӧні нуӧданныд? — юаліс Света: сылы окота вӧлі сёрнитӧдыштны чӧв олысь капитанӧс.

Мӧдыс небыда вочавидзис:

— Миян уджыд, Светлана Николаевна, мукӧддырйиыс сэтшӧм овлӧ, мый абу и лӧсьыд висьтавны сы йылысь нывъясыдлы.

— Григорий Николаевич, кӧнкӧ, сьӧлӧмнаныд ёна и дзугыльмывланныд... Кор став татшӧмторйыс мунӧ тіян син водзын?

— Быдторйыс овлӧ, Светлана Николаевна. Мукӧддырйиыс юрсиыд сувтлӧ, кор аддзан, мый вермӧ вӧчны лёк морт. Но кор тӧдан, мый аслад уджӧн тэ кутшӧмакӧ отсалан бырӧдны пежсӧ, то сэки тшӧтш и бурмывлӧ сьӧлӧмыд.

«А ми повзьӧдлам милицияӧн кагаясӧс!» — капитанӧс кывзігӧн друг мӧвпыштіс Света.

А сійӧ нӧ, Света, мый либӧ вӧчӧ? Кӧсйӧ кесйӧдны милицияса ӧти уджалысьӧс мӧд вылӧ? Оз эскы милицияса уджалысьыслы? Эм-ӧ сылӧн та вылӧ правоыс?

Тайӧ виччысьтӧм мӧвпъясыс лӧсьӧдлісны Светаӧс. И сійӧ юаліс:

— Григорий Николаевич, а гашкӧ, ме тіянӧс позьтӧмтор вылӧ нуӧда?.. Кывлас кӧ Пантелеймон Михайлович...

— Ме тӧда, мый вӧча, Светлана Николаевна, — лабутнӧя шуис Петухов. — Меным аслым окота бурджыка тӧдмавны Котковсӧ. Меным сійӧ, кыдз морт, абу веськодь, — нюммуніс, и быттьӧ тайӧ нюмыс вежыштіс мӧвпсӧ. — Сэсся ӧд миян уджын оз ло лишнӧйӧн, пондан кӧ бурджыка тӧдны мортлысь психологиясӧ... Пондан кӧ бурджыка гӧгӧрвоны, мыйджык йӧтлалӧ сійӧс ӧти либӧ мӧдтор вылӧ.

— А быдӧн-ӧ тіян пӧвстысь тадзи уджалӧ? — ӧзйыштӧмӧн юаліс ныв. — Быдӧн-ӧ кужӧмӧн, быдӧн-ӧ колана ногӧн вӧдитчӧ сылы сетӧм ыджыд правоӧн?

Капитан, дерт, бура гӧгӧрвоис, кодарӧ синӧ нылыс. И сійӧ мӧвпыштіс: «Мый медъёна кыскӧ тайӧ нывсӧ татшӧм ноксьӧм-тӧждысьӧм вылас? Газетчиклӧн азарт? Али оз вермы миритчыны нелючкиясыскӧд? А, гашкӧ, тӧндзия мездӧмсьыс бурторӧн жӧ зільӧ мынтысьны Котковыслы?.. Но кыдзи кӧть эз вӧв, а нылыс — интереснӧй морт...» Тадзсӧ мӧвпалігмоз капитан восьлалыштіс чӧла, а сэсся вочавидзис:

— Ог тӧд... Кыдзи нӧ ме верма став вӧснаыс шуны. Но ме, ачым, бура тӧда, мый милиция киын право да закон — хирург киын ёсь скальпель кодьӧсь, кыткӧ кӧ не сідз вундан, кыткӧ кӧ кужтӧг вундан-керан — зэв омӧльтор вермас лоны.

— Григорий Николаевич, сэтшӧм лӧсьыда ті шуинныд тайӧс! — пӧся тӧдчӧдіс ныв.

— Сідзтӧ сідз, но ме ог гӧгӧрво, кыдзи ми кутам юасьны заводас? — кежӧдіс сёрнисӧ Петухов.

— Висьталам, мый газетысьӧсь ми, кыкнанным, гижны кӧсъям завод йывсьыс. Кӧсъям тӧдмасьны унджык йӧзкӧд... Шуам, мый пӧ ті верманныд висьтавны сэтшӧмтӧ морт йылысь?

— Видлам инӧ.


Медводз, дерт, ковмис кежавны заводса парторг Виль Николаевич дінӧ. Светалы водзтіджык нин воліс сьӧлӧм вылас тайӧ неыджыд тушаа, шабді юрсиа, тшӧгкодь, но визув мортыс. Заводӧ вотӧдз пӧ сійӧ уджавлӧма партия обкомын зэв кывкутана удж вылын, а сэсся со татчӧ вӧзйысьӧма. Ачыс. Первойысьсӧ тӧдмасигӧн жӧ Света, журналистка мортыд, юаліс Виль Николаевичлысь, мыйла сійӧ тадзсӧ вӧчис. А мӧдыс сэки лышкыда нюммуніс чужӧм тырнас да кытшлавтӧг шуис:

— Йӧзаинӧджык век менӧ кыскӧ... Радейта, мед эськӧ олӧмыс ме гӧгӧрын пуӧмӧн пуис. Том дырсянь тадзи... Буракӧ, комсомолын дыр уджалігӧн велалі.

Ӧні ковмас дзик мӧдтор йылысь юасьны, некодлы ковтӧмтор йылысь...

— Тӧда ме, тӧда... — шуис Виль Николаевич гора да зонкалӧн кодь сӧстӧм гӧлӧснас, кор воысьяс висьталісны ассьыныс могнысӧ. — Меным звӧнитлісны милициясянь... Тӧданныд кӧ, ме весиг чур-чермунлі сэки... Весьӧпӧрлі. Ким Котков этатшӧмтор вӧчӧма! Ми сійӧс партияӧ кӧсйылім примитны... Да, веськыда кӧ шуны, ме сійӧс... радейтлі! Гашкӧ, заводын быдӧнысь ёнджыка...

— А мыйысьджык нӧ эськӧ? — лов шысӧ кутӧмӧн юаліс Света.

— Мыйысь?.. Да сыысь, мый кыпыда олысь морт сійӧ. Оз мукӧдъяс моз нидзув этшӧн юрсӧ муӧ сюй, а вывлань кыпӧдӧ, югыдлань. Кыдз эськӧ бурджыка шуны тіянлы... Шондіа руа морт сійӧ! Сьӧлӧмыс ыззьӧ унджык овны, пӧсьджыка овны. Комсомол дырсянь ме радейта татшӧмъяссӧ... И нӧшта нин — быдтор артмӧ сылӧн.

Виль Николаевич вӧлі ёна шызьӧма, бурлунӧн йиджтысьӧм ыджыд чужӧмас вирыс ворсӧ, сёрнитігмозыс сійӧ жӧдзис-котраліс вомӧна пызан дорӧд.

— Либӧ, Светлана Николаевна, бӧръя лоӧмторъястӧ босьтӧй. Нидзув моз олысь мортыд ӧмӧй лысьтіс эськӧ тіянӧс мездыны? Да эз эськӧ, нинӧмысь! Кӧть сы водзын нин пуркӧшитісны. И зонкасӧ со босьтісны асланыс бригадаӧ, Марссӧ. Мед водзӧ оз вӧлі кӧсйы матӧ сибӧдны — меным пӧ уджавны колӧ, план тыртны, а не шпанаясӧс велӧдны, — и, тӧданныд кӧ, бригадирыскӧд, Игнатовкӧд, Кимыс ме дорӧдз воліс. Да кыдз жӧ не босьтны татшӧм положениеас?! Тайӧ жӧ государственнӧй тӧдчанлуна делӧ. Татшӧм зонкасӧ, да нӧшта сирӧтаӧс, зумыд кок йылӧ сувтӧдӧмыс...

— Меным тай нӧ эз и висьтавлыны, мый тіян дорӧдз волӧмаӧсь Марс вӧснаыс, — шуис Света вежсьыштӧм гӧлӧсӧн: парторглӧн кывъясысь нывлӧн вӧрзис лолыс.

— Волісны!.. Уджалӧ ӧні зонкаыс.

— Виль Николаевич, — шыасис сэсся чӧв олысь Петухов, — шуам, ті кӧ вӧлінныд судьяӧн и тіянлы колӧ вӧлі вынсьӧдны Котков вылӧ приговор, то мый эськӧ ті вӧчинныд? Пуксьӧдінныд-ӧ эськӧ сійӧс тюрмаӧ?

— Ме? — падмыліс парторг. — Ме эськӧ котӧртлі вӧрӧ, керышті нюдз льӧм пу ньӧр да бонзьытӧдзыс жбонькйӧдлі эськӧ, сӧтанаӧс... Со кутшӧм эськӧ вӧлі менам приговорыс!

— Судьяясыд тадзитӧ быттьӧ озджык вӧчлыны да, — шпыньмуніс следователь.

— А ме эськӧ вӧчи! — сӧдза юргысь гӧлӧснас ыпъяліс мӧдыс.

Кимъяслӧн цехыс неуна тӧдса нин Светалы, мӧдысь ӧд татчӧ воис. А кор водзынсӧ пыраліс, ёна и поліс, быттьӧ вӧтын моз веськавліс камгысь-дзужгысь кӧрт да моторъяс пытшкӧ. Каньпи кодь ичӧтикӧн да жебиникӧн сэки кажитчис ачыс аслыс.

Цехыс зэв кузь, джуджыд да югыд, и сэні, кыдз чайтсис Светалы, став вылас ыджыдалӧ металл. Сійӧ кӧдзыда югъялӧ поршеньяслӧн шыльыд банъясӧн и коленвалъяслӧн крут кусыня пидзӧсъясӧн; сійӧ прӧшви моз кысьӧма газораспределительнӧй системаясӧ, еджвидзӧ выліын ӧшалысь блокъясӧн да топливнӧй насосъясӧн; сійӧ жӧ куйлӧ важ детальяслӧн сьӧд чукӧрӧн. Металл клёнгӧ, дзуртӧ, сьылӧ, вешъялӧ киысь киӧ, кытчӧдз, медбӧрын, оз пӧр двигательӧ да мусюр кодь топыд да вына тракторӧ...

Котӧрӧн ноксьысь ӧти морткӧд Светалӧн виччысьтӧг вомӧнасис олан туй визьыс и, видзӧд, лоӧ со ветлыны-тӧждысьны сы понда...

Шыӧдчисны олӧма морт дінӧ. Дзор юрсиа, чужӧмыс пемыд, зэв чукырӧсь. Висьтасис слесарӧн, быдӧн пӧ тӧдӧ менӧ Петровичӧн.

— Котков?! — пузис-горӧдіс сійӧ юалӧмсӧ помӧдзыс виччысьтӧг. — Да ті тӧданныд, мый сійӧ вӧчӧма?! Позор! Вӧтлыны колӧ! Ӧні жӧ! Нинӧмла татшӧмъяссӧ видзны миян коллективын! Комсомолын — тем более! Колӧ лоны принципиальнӧйӧн! Решётка сайын сылӧн местаыс!

Петрович дінысь паркйыштіс вина дук.

А Света дзикӧдз бӧбмыліс. Мый-мый, а татшӧмтортӧ сійӧ эз виччысь. И сэтшӧм яндзим сылы лои капитанысь. Кӧть бергӧдчы да котӧрӧн пышйы татысь...

Тані жӧ паныдасис заводса комсорг, Роза Ладанова, косньӧд чужӧма, тэрыб синъяса ныв. Сійӧ шуис:

— Во сайын миян заводын вӧлі комсомольскӧй диспут. Темаыс — «Миян кадся том морт». Доклад ми тшӧктім вӧчны Кимлы. Комсомолецъяс, кӧнкӧ, помнитӧны на, кутшӧм доклад сійӧ вӧчис. Ме тай помнита-а. Тайӧ вӧлі сьӧлӧм ӧзтана речь! Менам личнӧ сійӧ рытнас быттьӧ чужисны бордъяс. Окота лои велӧдчыны, унджык тӧдмавны! А тшӧтш и неэтша шензи: кысь-мый, мися, та мындасӧ тӧдӧ тайӧ зонмыс, прӧстӧй слесарыс? Коді велӧдлӧма сійӧс татшӧм паськыдасӧ думайтны?.. Сы бӧрын ми бӧрйим Кимсӧ стенгазетса редколлегияӧ. Сэні сійӧ уна жӧ вӧчис, сӧмын тай бӧръя каднас кутіс пышъявныджык... А мыйла? — пӧсьӧдіс сёрнисӧ Роза. — Сы вӧсна, мый вина юӧмӧджык кутіс пырӧдчыны. Ме унаысь нин аддзылі сійӧс гажаӧн. А ӧтчыд вӧлі магазинын кыйялӧ другъясыскӧд. Зэв жӧ гажаӧсь... Локтіс ме дінӧ да корис удждыны деньга. Юны, дерт. Меӧдз, гашкӧ и, кодлысь нин эз кор.

Тайӧ сёрни бӧрас капитан шуис журналисткалы:

— Ме видзӧда да, Светлана Николаевна, чужӧмныд неуна югдыштіс...

— Татшӧмторъястӧ кывзігӧн кысь на и югдас... — ылӧсас нурбыльтіс ныв.

Лӧсьыд ныр-вома, шыльыд вир-яя том нывбаба, лаборантка, скӧрысь шуис:

— Котковӧс? Тӧда... Зэв асьсӧ вылӧ пуктысь морт, ми вокыдкӧд оз ёна сёрнит. Вӧтлыны колӧ заводысь. Мед судитӧны...

Петуховлы, кыдз следовательлы, интереснӧ вӧлі видзӧдны том журналисткалӧн чужӧм вежласьӧм бӧрся.

— Светлана Николаевна, а нывбабаяс пӧвстад со эмӧсь жӧ чорыд йӧзыд.

— Эн нин шуӧй, Григорий Николаевич...

Сэсся найӧ паныдасисны олӧма фрезеровщик Мусановкӧд. Тӧндзи, «корсаръясӧс» судитігӧн, сійӧ сёрнитіс жӧ. Дядьӧ шылькнитыштіс шочмӧм юрсиа неыджыд юрсӧ да шуис Светалы:

— Ме бурджыкасӧ тӧдмалі Кимӧс сы бӧрын, кор сійӧ мездӧма тэнӧ хулиганъясысь... Вот ме и шуа — кӧть тані, кӧть мӧдлаын шуа... Оз вермы лоны преступникӧн татшӧм смел да мукӧдлысь дойсӧ тадзи кылысь морт. Оз — и точка!

Мастер Кузовкинлӧн мӧд кодьджыкӧсь вӧліны кывъясыс:

— Битӧг пӧ тшын оз овлы. Котков кӧ эськӧ эз понды исковтны увлань, татшӧмторйыс эськӧ эз ло... Ме верма, шуам, тӧдчӧдны со мый: найӧ бригадирыскӧд, Игнатовкӧд, век венӧ пырӧны руководствокӧд. Ӧтитор налы оз кажитчы, мӧдтор. Тадзинад сьӧкыд веськӧдлыны производствонад. Тадзинад кутшӧм дисциплина! Руководствокӧд вензьӧ, а сэсся, видзӧд со, и милициякӧд тышкасьӧ. Татшӧмтор бӧрад, веськыда кӧ шуны, ме ог вермы сылы эскыны.

Та бӧрын кӧсйылісны матыстчыны Гена Игнатовлӧн бригадаса войтыр дінӧ, но сэсся Света шуис, мый ӧні оз ков. Сӧмын ылісянь недыр видзӧдыштісны налӧн удж бӧрся.

Зонъяс зіля ноксисны еджыд сӧстӧмлунӧн да югыд мавтасӧн лӧсталысь кык двигатель дорын. Двигательясыс, тӧдчӧ, зэв сьӧкыдӧсь, зэв гырысьӧсь, пӧшти морт судтаӧсь, быдӧнлӧн падвежӧн сулалӧны кыз стен кодь кык блок. Куимӧн — Лёша, Анатолий да Марс — уджалісны таладорджык мотор дінын. Найӧ вӧчисны сьӧдджык уджсӧ — йитлісны сой кодь кыз болтъясӧн картер, блокъяс да сідз водзӧ. А Гена да Ким лӧсьӧдісны газораспределительнӧй система, йитісны топливнӧй насос.

Ким сулаліс паныдӧн — сьӧд комбинезона, коссӧ топыда зэвтӧма югъялысь ыргӧн пряжкаа паськыд армейскӧй тасмаӧн, кузь юрсисӧ кутӧ усьӧмысь лӧз берет. Пыктӧм паръяса пӧлыньтчӧм чужӧмыс шог.

«Дерт, кӧнкӧ, думъясыс ӧні сылӧн ёна ылынӧсь топливнӧй насос дінсьыд...» — жальпырысь мӧвпыштіс зон вылӧ видзӧдысь Света.

А капитан Петухов мӧвпаліс тшӧтш и Марс йылысь. «Мый ӧні думайтӧ тайӧ зонмыс, кор Котковыс ачыс мыжмис? Тайӧ, дерт, бур нӧшыштӧмӧн лои сылы!.. Вермас бӧр усьны сьӧлӧмнас... Бур йӧзлы эскӧмсӧ дзикӧдз воштыны... Колӧ жӧ тадзи лоны!..»

— Светлана Николаевна, — шуис Петухов, — ті, пӧжалуйста, висьталӧй Котковыслы, мед ветлӧ больничаӧ да босьтӧ справка доймӧминъяс йывсьыс. Друг ковмас.

И пырысь-пыр жӧ нывлӧн пӧсь видзӧдласыс сотыштіс капитанӧс, лолыслӧн став пессьӧм-майшасьӧмыс тыдовтчис синъясас.

— Ті чайтад, сэтчӧдз делӧыс воас? — юаліс ныв.

— Нинӧм на ме ог тӧд, — шуис капитан. — А справкаыд зептӧ оз йир. — Сійӧ кӧсйис тшӧтш висьтавны, мый Пантелеймон Михайлович босьтӧма нин татшӧм справкасӧ, судмедэкспертизаысь, но эз висьтав. Сы вӧсна мый сідз нин уна майшасьӧмсӧ казяліс нывлӧн вежӧра синъясысь.

Сэсся журналистъяс пыралісны и конструкторскӧй бюроӧ. Сэтчӧс веськӧдлысьлӧн отсасьысь — Добрынина, сьӧд юрсиа, стрӧг чужӧма, спортсменкалӧн кодь топыд вир-яя нывбаба, висьталіс:

— Ме регыд на заводын уджала и бурасӧ ог на тӧд Котковтӧ. Но тӧда сылысь рацпредложениеяссӧ, клубысь рисунокъяссӧ аддзылі... Сёрнитны ковмыліс гоз-мӧдысь. И ме веськыда шуа тіянлы: син водзӧ сувтӧ интереснӧй морт, водзын мунысь морт. И личнӧ меным зэв жаль лоӧ, воштам кӧ ми сійӧс...

Добрыниналӧн сёрниыс муртса эз пычиктны Светалысь синвасӧ.

Кутшӧм вына овлӧ шуӧм кывйыд! Кор сійӧ инмӧ сатӧкинӧ. Сійӧ вермӧ, кольк кышӧс моз, пазьнитны сьӧлӧмтӧ, дзикӧдз нырыштны мортӧс. Но сійӧ жӧ вермӧ вӧчны мортӧс шудаӧн, вермӧ бордъявны сійӧс.

«Сӧмын тай ми ог век думыштлӧмӧн шуалӧй кывъяснымӧс!» — мӧвпаліс ас кежас Света.

Сэк кежлӧ буретш помасис смена, и уна йӧза чукӧрын Света да Петухов виччысьтӧг лоины неылынӧсь орччӧн восьлалысь Генаысь да Кимысь. Кимлӧн синъясыс вочаасисны Светакӧд, чуймӧмӧн дрӧгнитісны, а сэсся и омӧльтчӧм-пӧлыньтчӧм чужӧм вылас разалыштіс курыдкодь нюм.

Капитан да Света корисны ас дінаныс Генаӧс, нуӧдісны йӧзысь бокӧджык, сэсся Петухов тшӧтш юаліс сылысь Ким йылысь.

— Босьтасны кӧ Кимӧс бригадаысь, мыйкӧкертасны кӧ... сылы ни миянлы бурыс оз ло, — падъявтӧг, быттьӧ важӧн нин мӧвпыштӧмтор, висьталіс Гена. — Железнӧя шуа. Заводса став йӧз пӧвстысь, мед кӧть мый эз ло, Кимӧс медъёна уважайта. Сы вылӧ век позьӧ мыджсьыны, сы вылӧ позьӧ надейтчыны, сыкӧд позьӧ мунны кӧть кытчӧ.

Чорыдакодь пӧльыштавлӧ рытыв тӧв, шоныд тӧв, косьтӧ кӧтасьӧм керка стенъяс, кольӧм вося турунӧн рудӧдысь, няйтӧсь ластаяс. Светалӧн батьыс, Николай Васильевич, асывнас шуис, мый тайӧ тӧлыс жугӧдас ю вылысь йи, ва восьтас...

Видзӧд со, и йитӧ вӧрзьӧдны ён тӧв колӧ. Быдлаын мунӧ вермасьӧм. Коді кодӧс вермас...

— Светлана Николаевна, а абу ӧд шу кокни истинатӧ корсьны, — сёрнитӧ ёртыс, капитан Петухов. — Мед эськӧ скальпельнад, сорасьтӧг, вундыны.

— Да... — ышлолалӧ ныв.

— Но ме, Светлана Николаевна, сьӧлӧмсянь, интересӧн кывзі став сёрнияссӧ. Бур, мый нуӧдлінныд.


Комын нёльӧд глава


Тулыс, ёнджыка выныштчис да, чегис Сыктыв вылысь да Эжва вылысь кыз йисӧ. И сійӧ здуксяньыс войвыв муным, паськыд ота вӧр-ваным пондіс ловзьыны-садьмыны тӧвся узьӧмысь висьӧм бӧрын ёнмысь том морт моз жӧ азыма.

Визула да чожа, шочиник йи пластъяс панлалігтыр, уйӧ Сыктывлӧн пемыдгӧрд тувсов ваӧд пыжа. Варова жуньгӧ «Москва» мотор, ызгыштӧ пыж нырӧн косялӧм ва веркӧс. Бӧрӧ кольӧны паркса гырысь топольяс, кодъяс ӧні гӧлик кодь кушӧсь на, бӧрӧ кольӧ ыджыд праздникӧн гажмӧдӧм кар.

А найӧ со мунӧны гажсьыс.

— Мый эськӧ ӧні думайтӧны уткаясыс-а?

Тадзсӧ руль сайсянь шыасьӧ Николай Васильевич. Сылы нимкодь таво вылӧ первойысь петны пыжӧн, нимкодь кывны моторлысь ярскӧба жуньгӧмсӧ.

— Став уткаыс нин, кӧнкӧ, завещание гижис, — вочавидзӧ батьыслы Света. — Ӧд со кутшӧм вын мунӧ на вылӧ.

Ким нюммунӧ, сылӧн синъясыс сувтлӧны борт пӧлӧнын куйлысь ружьеяс вылӧ — вит ствол виччысьӧны удж... Сэсся видзӧдласыс пыксьӧ Светалӧн волялысь резинӧвӧй сапӧгъясӧ — вылӧджыксӧ исковтны, кӧть и зэв окота, оз лысьт, — и майышмунӧмӧн думыштчӧ: «Тӧді кӧ, мый Светаыс тшӧтш лоӧ, эг эськӧ мун...»

И Ким думайтӧ сьӧлӧмсӧ парсалысь гажтӧмлунӧн сы йылысь, кутшӧм лӧсьыд эськӧ вӧлі, бара кӧ петіс ю вылӧ Генкакӧд ӧтлаын. Сэки эськӧ эз ков тӧждысьны, кыдзи колӧ асьтӧ кутны: ышлолавны либӧ радлыны, нюжвидзны-шойччыны либӧ пасӧ лыйлыны.

Гена аски кӧсйис петны вывлань, Эжва катчӧс. А Николай Васильевич со увлань лэччӧдӧ. Николай Васильевичыс лун-мӧд сайын паныдасис сыкӧд, Кимкӧд, да шуис:

— Тӧварышӧс корся пыжӧн петавны. Ӧтнамлы гажтӧм. Окотаыд кӧ эм, лэччылам. Менам кулӧмъяс и быдтор эмӧсь. Юква лоӧ...

Коліс эськӧ «ог» шуны сэки, висьтавны, мый Генкакӧд бара мунӧны, но эз тай со шу.

Кыдзкӧ быттьӧ велавсьӧма нин Николай Васильевичыс дінӧ, велавсьӧма сылӧн сёрни дінӧ... Весиг лӧсьыд овлӧ, кор тайӧ вына да олӧма тэрыб мортыс паныдасигъясӧ зэлыда кутлӧ китӧ да та дырйи лӧз синъясыс ойдлӧны кыпыд радлунӧн.

Гашкӧ, Ким кыліс мыйкӧ бать сямаӧс Николай Васильевичыслысь? Ӧд олігчӧжыс сійӧ эз на тӧдлы бать мелілунсӧ...

А со и помасьӧ Сыктыв. Кар горулын сійӧ помалӧ ассьыс витсё километр кузя туйсӧ, топыда сывйыштчӧ Эжвакӧд да сэсся дугдӧ лоны Сыктылӧн. Верӧс сайӧ петӧм ныв моз воштӧ нимсӧ.

Кӧть кымынысь эз кывтлы таті Ким, быдысь на кыдзкӧ шызьыштліс сьӧлӧмыс. Гашкӧ, сыысь, мый Сыктылыс со тадзи бырӧ-помасьӧ? Öд сійӧ — Кимлӧн чужан ю. Ылын-ылын тасянь, ю йывланьын, Ким чужліс Сыктыв дорса сиктын, мыйӧн помнитӧ асьсӧ, пыр нин уяліс юлӧн сӧдз ваын. Сэні, Сыктыв керӧсса гажа ягын, куйлӧны Кимлӧн водзӧн кувсьӧм мамыс, пӧльясыс да пӧчьясыс. Сӧмын батьыс абу сэні, сійӧ кӧнкӧ сотчӧма ыджыд войналӧн биын, вошӧма, слук ни дук...

А, гашкӧ, Кимлы лолывлі нимкодь сыысь, мый тадзи со ӧтлаасьӧны Коми мулы сюрӧс сетысь тайӧ юясыс... Чужӧны кӧнкӧ дзик разі-пелиын, писькӧдӧны уна мусюр да щелья, кытшовтӧны не ӧти сё паськыд кӧдж, но век жӧ аддзӧны ӧта-мӧднысӧ да, пӧся радейтысьяс моз, янсӧдчывтӧг вылӧ нин сывйыштчӧны.

Мыйта олӧм гӧрддзасис нин да гӧрддзасьӧ юяслӧн берегъяс вылын! Кымын коми морт сӧвмис-бордъясис сэні, а сэсся аслас мывкыд уджӧн да подвигъясӧн паськыда нимӧдіс чужанінсӧ!

Сыктыв дзикӧдз нин куталӧма йиысь. Та вӧсна сылӧн усянінсянь Эжвалӧн джынйыс, шуйгаладорыс, вӧлі куш жӧ. А веськыдладорыс тшем на йиа. Но вочасӧн йи пластъяс шлывгисны-разӧдчалісны помтӧм-дортӧмӧн лоӧм ю пасьтала. Сідзкӧ, Эжвалӧн да Сыктывлӧн ваясыс дзикӧдз сорласисны...

«Кутшӧм кокниа, кутшӧм сӧгласа артмӧ тайӧ юясыдлӧн, — гажтӧмпырысь мӧвпаліс Ким. — Вот эськӧ йӧзлӧн сьӧлӧмъясыс кӧ татшӧм жӧ сӧгласа сибӧдчалісны ӧта-мӧд дінаныс».

Эз ков, эз ков сылы лэччыны тайӧ пыжас!

Света пукаліс орччӧн, но эз и шыасьлы. Сійӧ вӧлі бергӧдыштӧма юрсӧ Кимла дорысь да думайтӧмӧн видзӧдіс шлывгысь Эжва вылӧ, кодлӧн пыдӧстӧм вына ваыс нӧбӧдіс-нуис помтӧм йи. Йи пластъяс вӧліны пемыда лӧзӧдӧмаӧсь, сырзьӧм-бонзьӧмаӧсь, гырысьӧсь и посниӧсь, пыридз кодь ёсь доръясаӧсь и пельса вевт кодь гӧгрӧсӧсь. Мыйсӧ сӧмын найӧ эз нуны ас выланыс! И домтӧм пыжъястӧ, и бипур колясъястӧ, и кутшӧмкӧ ящикъястӧ, и додь пӧлӧзъястӧ, и вужлятӧ... А ӧтилаысь ныв казяліс чалльӧсь-вожӧсь сюра вильӧдӧм юр чашка. Буракӧ, ӧти кӧр лолӧн этшаджык лоӧма вӧрын...

«Юяс — олӧм весалысьяс, — друг мӧвпыштсис ставсӧ тайӧс аддзысь Светалӧн. — Ывлаыс, мирыс важӧн нин эськӧ тырисны, эз кӧ вӧвны юяс, эз кӧ тадзи, быд тулыс, нуны став няйтсӧ да пежсӧ».

Пыж бӧжын пукалысь Николай Васильевич сетіс моторлы медічӧт газ да веськӧдіс пыжсӧ алькӧс берегланьджык, кыті йиыс кывтіс шочджыка. «Оз кӧ коставлы, тадзинад и берегад петны сьӧкыд лоӧ! — майышмуніс сійӧ. — Гашкӧ, талун абу на колӧма вӧрзьыны? Аскиӧдз эськӧ кызыс личалыштіс...» Но бӧр бергӧдчыны эз жӧ вӧв окота, ловзьӧм юыс дзикӧдз нин шызьӧдіс морттӧ.

Кыз йи палакъяс вынӧн зыртчисны ӧта-мӧдныскӧд, дзуртісны, краджӧдчисны-потласисны, дзирдалісны шылялӧм доръяснас. Ю вылын вӧчсис ыджыдсьыс-ыджыд удж. Луныс вӧлі гажа, сӧдз енэжсянь азыма ыпъяліс шонді, юр весьтын, шудаа горзігтыр, гозйӧн-гозйӧн шывъялісны сӧстӧм быг кодь еджыд каляяс. Вӧлі ыркыд, сӧстӧм и кыдзкӧ югыдсьыс-югыд...

Ставсӧ тайӧс сьӧлӧмнас кылысь Николай Васильевич друг кыпыда шуис:

— Черияслы — ва, лэбачьяслы — сынӧд, а мортлы — став мирыс!

Ким ас кежас сӧмын и гажтӧма нюммуныштіс та вылӧ.

Видзчысьӧмнад Еджыд Ягӧдз гургисны-лэччисны вель дыр. Сэні Николай Васильевич шуис сувтны бакенщиклӧн керка дорӧ, кытісянь бокӧ кежӧ лӧнь тыкӧла.

Но зэв сьӧкыд вӧлі писькӧдчынысӧ сэтчӧ — кыз йи пластъяс няжӧдчигтыр зырӧдісны пыжлӧн кӧрт бокъясӧ, гирскӧдчисны винтлӧн тыдавтӧм бордъясын. Абу ёна гажа кывзыны татшӧм шыястӧ. Бур, мый Кимлӧн сой выныс тырмӧ — пыж нырын багырӧн сулалӧмӧн сійӧ век жӧ вермис косявны-костӧдны йияссӧ.

Муртса удитісны кусӧдны моторнысӧ лӧнь куръяын, петны пыжысь да веськӧдыштны дыр пукалӧмысь мудзӧм коснысӧ, кыдзи ю шӧрас, неуна вылынджык, йи пӧвстас, шлёп-пуксис утка.

— Мый ыджда-а!.. — пӧся вашнитіс Света да лажыньтчӧмӧн чепӧсйис пищальяслань. — Вай пыралам ичӧт пыжӧн!.. — шуис сійӧ Кимлы.

— Ылын... — падъяліс мӧдыс, кӧть эськӧ тіравмӧныс жӧ окота вӧлі пыравны уткала. — Йиыс ёна мунӧ...

— Полан? — нывлӧн синъясыс дэльӧдчисны.

Ким ыпнитіс да кыв шутӧг кватитіс кык лопта пелыс.

Света, киас двустволкаа, лажыньтчӧмӧн воськовтіс ичӧтик пыжӧ да, сылысь дзибрасьӧмсӧ лӧньӧдны зілигтыр, видзчысьӧмӧн водіс пыж нырӧ, ружьесӧ чургӧдіс водзлань. Ким пуксис бӧжладорса пуклӧс вылӧ да ёна копыртчӧмӧн пондіс лӧня, но вынысь сынны.

— Видзчысьӧмӧнджык, Ким! — бӧрсяньыс шуис Николай Васильевич; сійӧ дивитіс Светаӧс — дзик нинӧмла пӧ сюйсьыны йияс пӧвстас кольк кыш кодь пыжнас, — но кутны тай эз жӧ кут. Олӧма морт сьӧлӧмнас кыліс, мый Кимыслы ӧні быть колӧ петавны пыжнас...

Уткалӧн вылын юрыс тыдыштіс йияс пӧвстын берегсянь метр сё сайын. Сійӧ, буракӧ, абу на казялӧма пыжаӧс, визулыслы водзсасьтӧг лӧня кывтіс увлань. И Ким шуис вӧчны ыджыд кытшов — сюйсьыны йияс костӧ улісяньджык да гусьӧникӧн сэні виччысьны визув вылын кывтысь лэбачӧс.

Водзын вӧлі тувсов йӧй вынӧн туысь-пессьысь Эжва, пӧшти километр пасьта, мӧдар берегыс ӧдва-ӧдва тыдаліс сукмыны заводитӧм рӧмыдас. Татшӧм ю вылас сӧмын видзӧдлӧмсьыс кӧдзавлӧ мышкуыд, а налы колӧ пырны сы шӧрӧ коньӧр кодь пыжӧн. Сы вӧсна мый сэні пукалӧ утка, коді сэтшӧма ковмӧма со тайӧ асныра, но, та вылӧ видзӧдтӧг, муса нылыслы.

А Света ыркалыштіс сӧмын сэк, кор ыджыдкодь йи пласт зургис пыж бокӧ, мыйысь пыжыс дзибӧра пӧлыньтчыліс, шуйга набойнас гумовтіс васӧ. «Вот вӧям!» — кынмыліс места вылас Света. Сылӧн дзикӧдз кусліс лов шыыс, сылы сьӧлӧм доймымӧныс лои окота бергӧдчывны, аслас видзӧдласӧн лоны ӧтлаын Кимкӧд. Но и поліс бергӧдчынысӧ, поліс вӧрзьӧдчыны, сы вӧсна мый дзибрӧс пыж шатовмунліс быд вӧрзьӧмысь... Сэсся поліс и воштыны син увсьыс налань кывтысь уткасӧ...

А сійӧ, буракӧ, век на эз казяв кыйсьысьясӧс, а, гашкӧ и, чайтіс найӧс йи вылын кывтысь кокораӧн. Сійӧ нем думайттӧг шывкъяліс-уяліс паськыд коластын, сы бӧрысь кольччывтӧг вӧтлысис и Светалӧн ружье стволыс. Ныв кутшӧмкӧ ногӧн вӧлі быттьӧ кылӧ, мый быть инмас. Сылы весиг кажитчис, мый зарадитӧм патронас быд дрӧб тусь кыдзкӧ да мыйкӧ йитчӧма уткаыскӧд и оз вермы лэбовтны бокӧ. Татшӧм надеянас шоналӧмӧн, но сэк жӧ и ружьелӧн бӧрӧ сетӧмысь полыштӧмӧн, Света гымыштіс-лыйис. И пырысь-пыр жӧ кыліс Кимлӧн пӧся горӧдӧмыс:

— Молодеч, Света! Сӧмын эн вӧр, куйлы лӧня!

Кимлӧн тайӧ кывъяссьыс Светалы ёна лӧсьыд лои, быттьӧ сійӧ эз уткаӧс, а ошкӧс чергӧдіс. Ӧти здукӧн ныв быттьӧ зэв ёна мудзис, сылӧн лигышмуніс ки и кок. «Лӧсьыд жӧ, мый сійӧ орччӧн!» — шудаа думыштіс ныв.

— Кутчысьӧ-ӧй! — кыліс Николай Васильевичлӧн горӧдӧм. — Ме локта-а!

Судзӧдісны уткасӧ. Тайӧ вӧлӧма зэв ыджыд да мича ай сювчӧж. Но нимкодясьны сыӧн вӧлі некор. Колӧ вӧлі кыдзкӧ-мыйкӧ ӧдйӧджык петны йиа пленысь. Сулаланінсяньыс найӧ лоины нин вель ылынӧсь, и йиыс, неуна коставлӧм бӧрын, бӧр быттьӧ сукмис.

А кадыс сёр нин. Вӧліны буретш сэтшӧм здукъяс, кор кузя нюжмасьысь югыд рыт бӧрын вӧр-ваыслӧн друг быттьӧ мыйкӧ вӧрзьӧ да заводитӧ ӧдйӧ пемдыны. Вочасӧн сорласисны пемыдыскӧд вӧра берегъяс да кутісны кажитчыны ылыс мылькъясӧн. Тӧлыс лӧньыштіс. Но сы пыдди ёнджыка кутіс кывны йилӧн зыртчӧм-няжӧдчӧмыс. А нӧшта кыліс, кыдзи кӧнкӧ ылын сӧткӧ-пинясьӧ моторка заводитысь Николай Васильевич.

Ӧні, кор пемдіс нин, колӧ лоны нӧшта нин синмаджыкӧн и пеляджыкӧн. Ким пукаліс пуклӧс вылын веськыда, тушаыс сылӧн ньӧти эз вӧр, сынісны-уджалісны сӧмын киясыс. Пас пыддиыс сылӧн вӧлі бакенлӧн гӧрд би, коді кажитчис сэтшӧм ылысӧн и сэтшӧм мусаӧн. Сыныштлігъясӧ пелыслӧн кыпалӧм помысь тюргис-вияліс Кимлы пидзӧс вылас кӧдзыд ва, первойсӧ сійӧ быттьӧ эз и казявлы тайӧс, а кор казяліс, вӧлі нин коскӧдзыс кӧтасьӧма. Пондіс кынмыны, ӧтмоза нюжӧдӧм кокъясыс быттьӧ дубалісны. Сійӧ ньӧжйӧникӧн пондыліс кусыньтны найӧс, но пырысь-пыр жӧ зэв чорыд дой сотыштіс лядьвейсӧ. Войтӧв кыскис. Ёна доймӧмысла Ким весиг ымӧстыштіс. Ӧти кисӧ зептас сюйӧмӧн сійӧ заводитліс ниртыштавны пу кодьӧдз чорзьӧм кок чигсӧ. Но зептыс вӧлі ва, и яйыс вӧлі кӧтасьӧма, да киыс сӧмын вильсъяліс сы вывті. Ким ёнакодь повзис — войтӧлыдкӧд оз позь шутитны, мыйкӧ кӧ лоӧ, варччыны ни кок вылад сувтны он вермы... Но кыдзи нӧ мездысьны сыысь? Ким, ӧти кинас сынышталігтыр, мӧд кинас босьтіс голясьыс ной шарпсӧ, сюйис сійӧс гач улас. Кос нойлӧн инмӧдчӧмысь кокыс быттьӧ пырысь-пыр жӧ шоналыштіс, и чорзьӧминыс кутіс небзьыны, сэсся и дзикӧдз быри. Но вӧрӧдны коксӧ Ким эз нин лысьт, сы вӧсна мый войтӧлыс дзикӧдзсӧ эз мун, а, горш кӧин моз, кыйӧдчис кӧнкӧ зэв матын.

— Света, а тэ, вӧлӧм, бура лыйсян. — Кимлы окота кыдзкӧ шонтыштны пыж нырын чӧла куткырвидзысь нылӧс.

— Сэтшӧм матісяньыд нӧ коді оз инмы, — Светалӧн пиньясыс зяткакылӧны. — Лӧсьыда матыстчин... Менам эськӧ терпенньӧй эз тырмы сідзтӧ.

— Ме ӧд, кӧть омӧлик, да вӧралысь жӧ...

— Папа со ёна и сьӧласьӧ. Омӧлик мотор вӧснаыс...

— Век тай сідзи овлӧ: мыйкӧ кӧ зэв ӧдйӧ кӧсъян вӧчны, некыдз оз артмы, век мӧдарӧ артмӧ.

— Да-а...

Медбӧрын чушкысь-дзуртысь пемыдын скӧрысь таркнитіс Николай Васильевичлӧн моторыс. И пырысь-пыр жӧ Света да Ким горӧдісны ӧта-мӧд вежмӧныс:

— Ого-го!

— Папа-а!

А недыр мысти Николай Васильевич босьтіс изӧймитӧм утка кыйысьясӧс моторкаӧ. Светалӧн пиньясыс таркакылісны кыдзи сӧмын вермисны, но нывлы вӧлі долыд:

— Воигкості приключение лои! — кыпыда шуис сійӧ, батьыслӧн шоныд пасьӧ тубыртчигмоз.

— Тэнад приключение вӧсна менӧ чуть инфаркт эз кучкы! — радлунсӧ дзебӧмӧн броткис Николай Васильевич. — Ёна и ньӧръялі эськӧ, вӧйин кӧ. На юышт водкасӧ!

— Но ме жӧ водкаыслӧн миритчытӧм враг!

— Ю, тэд шуӧны. А то и збыльысь ньӧръяла!

Света юыштіс, а сэсся мыччис водка тыра кружкасӧ Кимлы.

— Ме ог ю, — ышловзис мӧдыс.

— Но, ичӧтикатӧ юышт, — жалитӧмпырысь шуис Николай Васильевич. — Мед кӧть шоналыштан.

— Ог, Николай Васильевич, — шуис Ким. Сылы друг лои зэв забеднӧ; забеднӧ сыысь, мый сылӧн век не бур йӧз мозыс артмӧ.

Кадыс вӧлі сёр нин, вой шӧр гӧгӧр нин лои, и ужнайтісны тэрмасьӧмпырысь, бакенщикӧн пестылӧм би вылын пузьӧдлісны сӧмын чайник. Колӧ вӧлі кӧть неуна, час-мӧд, узьыштны, медым сэсся петны уткаяслӧн асъя лэбалігкежлӧ. Моторкаысь кыпӧдісны став кӧлуй-паськӧмсӧ, кутшӧм вӧлі, да вольсасисны керка джоджӧ. Сэсся и пӧрччысьтӧг водалісны орччӧн.

— Мед некутшӧм сёрни эз вӧв! — ӧлӧдіс Николай Васильевич. — Узьӧй...

Ким чайтіс, мый ёна мудзӧм да полӧм-майшасьӧм бӧрад сійӧ пырысь-пыр жӧ унмовсяс, но унмыс некыдз эз лок.

«Колӧ жӧ вӧлі пырны сэтшӧм пыжӧн йи пӧвстӧ!»

Тайӧ мӧвпсьыс Ким бара на ставнас кӧдзавліс. Ӧні, кор сы улын вӧлі зумыд джодж, — йи шӧрӧ петалӧмыс кажитчис дзик нин йӧйталӧмӧн. Ӧні сылы кажитчис дивӧ кодьӧн, мый найӧ лючки-ладнӧ бӧр воисны берегӧ, дай ещӧ утка на вайисны.

Регыд мысти Ким кутіс кывны сьылісьыс Светалысь пӧсь лов шысӧ — узигас сыланьӧ бергӧдчис Светаыс. А сэсся Ким кутіс кывны мышнас и нывлысь топыд да шоныд кынӧмсӧ. Таысь сылы лои вӧвлытӧм лӧсьыд: сійӧ куйліс вӧрзьывтӧг, лов шысӧ кутӧмӧн, и сылы зэв окота вӧлі, мед эськӧ некор эз помасьлы тайӧ дивӧ кодь войыс...

А дзик орччӧн, ортсыын, увланьын моз, важ моз чушкис-зыртчис ю, сы вылын важ моз вӧчсис йиа ыджыд удж...

Сэсся Ким эз и казявлы, кыдзи вугыртсьӧма. Кор бӧр восьтіс синъяссӧ, ичӧтик ӧшиньӧд керка пытшкӧсӧ пырис асъя югӧр. Николай Васильевич эз нин вӧв. Света чӧскыда узис орччӧн. Шоныдінад сылӧн гӧрдӧдыштӧма чужӧмыс, тыр вира вом доръясыс мыйыськӧ нюмъялісны, вӧліны воссьыштӧмаӧсь, и Кимлы друг зэв окота лои небыдика инмӧдчывлӧмӧн топӧдны сылысь вом доръяссӧ. Но лысьтан ӧмӧй!..

Ӧтка ӧшинь дорын пукаліс бакенщик да мӧвпалігтыр видзӧдіс ю вылӧ. Сійӧ, буракӧ, эз на вӧв сэтшӧм пӧрысь, но нэмӧвӧйся яг моз дзикӧдз тошсялӧма-нитшсялӧма, юрси-тош пытшкас сӧмын синъясыс дзувъялісны да тыдалыштіс чангыля нырыс.

— Дядя, мый нӧ онӧ узьӧй? — меліа сетіс гӧлӧссӧ Ким.

— Оз тай узьсьы... — тшӧтш жӧ меліа воча шыасис бакенщик. — Юыс кутшӧм, а? Вот выныс! Оз тай ковтӧг шуны: биыд пӧ — сар, а ваыд — сарича.

— Регыд дзикӧдз кырӧдас тіянлысь керканытӧ, — шуис Ким да кывзысьыштіс, кыдзи зутшйӧдлӧны кырйӧ, керка подулӧ, сьӧкыд йи пластъяс. — Он и тӧдлӧй, кывтанныд...

— Кырӧдас, — ӧтикывъясис кӧзяин. — Водзынсӧ, кор на ме заводиті тані уджавны, быттьӧ вель ылын вӧлі керкасяньыс юӧдзыс. Буракӧ, сажень кызь кымын... Изӧ-уджалӧ тай юыд. Мунӧ кадыс...

Жар би вылын вӧлі нин пузьӧ чай. Николай Васильевич, этша узьӧмысла топалӧм чужӧма, но кыпыд да гажа, судзӧдаліс мешӧкысь кружка-пань.

— Но, узьыштін? — юаліс Кимлысь.

— Вугыртышті...

— Вот и бур, выныд лоӧджык. Час, чурскыштам чайсӧ, и зэв лада лоӧ. Ме чайта, тіянлы Светакӧд колӧ мунны ыджыд тыкӧла весьтӧдыс. А ме тані кулӧм вӧйта, а сэсся матігӧгӧрын кытшлалышта. Гашкӧ и, кодкӧ, уялысь ли лэбалысь ли, тшӧтш веськалӧ. Тіян воигкежлӧ пажын пуа. — Николай Васильевич бур синъясӧн видзӧдіс зон вылӧ.

А Ким эз и тӧд, радлыны али шогавны татшӧмторсьыс. Светакӧд ӧтлаын мунӧмысь. «А, гашкӧ, сійӧ мекӧд оз на и мун? — друг сэсся ыркӧдыштіс асьсӧ думнас. — Дивъя жӧ бакенщик дядьыслы!.. Вешйӧма олӧмыслӧн быгйӧсь-лӧптӧсь визув вылысь и шыньгӧ-олӧ. Со тайӧ дзользьысь лэбачьясыс моз шондікӧд ӧтлаын садьмӧ, нимкодясьӧ гажа вӧрӧн да паськыд ваа юӧн. Коркӧ тай Максим та вӧсна жӧ и гажтӧмтчис...»

Татшӧм думъяссьыс Ким нормыштіс да, йи пластъясӧн чушкысь-дзуртысь ю вылӧ видзӧдігтыр, шуис:

— Ми огӧ нин лоӧй... Уна сюрс во коляс... А Эжва-матушка быд тулысын тадзи жӧ кутас нӧбӧдны йисӧ... Сідзи жӧ, кыдзи сійӧ вӧчлывліс миян чужтӧдз уна сюрс во войдӧр. Ёна жӧ дженьыд мортыдлӧн олӧмыд...

— И тайӧ дженьыд кадколастас на лоӧ вийсьыны-шогавны, — шуис Николай Васильевич, коді бура гӧгӧрвоис, мый вӧчсьӧ зон сьӧлӧмын. — Но — нинӧм! Вай огӧ на кутӧй ӧшӧдны юрнымӧс. Шог бӧрас пӧ радлуныс ыджыдджык овлывлӧ!.. Видзӧд, кутшӧм гажа кӧсйӧ лоны луныс, екуняваня! Тӧлыс бергӧдчис и лунвывсянь пӧльыштіс. Шоныд лоӧ...

Азыма ломтысьысь бипур вылын кутіс шумитны саӧн кыза сирзьӧм чайник. Николай Васильевич кывзыштіс сылысь шумитӧмсӧ, нюммуніс да бӧр на косавліс воддза думас:

— Да, пиӧ, олӧмад немтор кокниа оз сетчы. Видзӧд со, и чайникыд пузьӧм водзвылын шумитӧ. Юыд, вӧрзигас, краджӧдчӧ-лыйсьӧ. И баба, горзігтыр, сьӧкыда вайӧ кага... Мортыдлы унаторкӧд лоӧ вермасьны, а медся ёнасӧ — аскӧдыс. Медся ыджыд вермӧмыс пӧ сэк, кор ачыд асьтӧ верман...

— Николай Васильевич, ті, дерт, кывлінныд ме йылысь эсійӧс? — синъяссӧ лэдзӧмӧн юаліс Ким.

Мӧдыс эз пыр вочавидз. Би жарысь гожъялӧм чужӧмсӧ ылӧдыштны зілиг, кежӧдыштіс мӧтыр вылын ӧшалысь чайниксӧ, сэсся вӧлись шуис:

— Но и мый, кывлі кӧ. Мыйыс ӧд оз овлы олӧмад да...

— Аттьӧ, Николай Васильевич... — Кимлӧн курзьӧм горшсьыс ӧдва-ӧдва петісны кывъясыс.

— Ме чайта, ставыс лючки-ладнӧ лоӧ... Ӧтчыд думыштан, быттьӧ и овны нин оз позь, мӧдысь думыштан — позьӧ на.

— Сідз эськӧ да...

— А винасьыд, муса пи, и збыльысь колӧ чӧвтчыны... Ӧні тіянлы, том йӧзлы, бура нин позьӧ овны. Он кӧ винанад асьнытӧ жугӧдӧй.

Быттьӧ сідз-тадз шуис, лӧниника, а сэтшӧм мӧрччана.

Регыд мысти, пельпом вомӧныс ичӧтик ки чышкӧда, керкаысь петіс Света. Лэччис ёна содӧм ваа куръя дорӧ да мыссис-чышкӧдасис. Сэсся перйис зепсьыс неыджыд гӧгрӧс зеркалӧ, лӧсьӧдіс сійӧс пожӧм ув вылӧ да сьӧд карандаш помӧн кутіс рисуйтавны син доръяссӧ. Синкымъяссӧ сылы вӧлі нинӧмла вӧрӧдны — найӧ сідз нин смоль сьӧдӧсь, лэбачлӧн вӧсньыдик бордъяс кодьӧсь... Тадзсӧ рисуйтчӧм бӧрын Светалӧн синъясыс, а найӧ пыр кажитчылісны Кимлы быттьӧ зэвтӧм видзӧдласаӧн, лоины быттьӧ нӧшта на гырысьджыкӧсь, а син еджыдъясыс быттьӧ водзӧ на едждісны, и налӧн сӧстӧмлун вылын нӧшта на сьӧда пондісны югъявны син аканьясыс.

«Мый сійӧ сэтшӧма баситчӧ?! — шензьыштіс Ким. — Вӧрсаясыс али мый пондасны видзӧдны сы вылӧ!»


Комын витӧд глава


Школаын велӧдчандырсянь Марс эз нин вӧвлы праздничнӧй демонстрацияяс вылын. Бӧръя воясас сылӧн быттьӧ дзикӧдз бырліс сьӧлӧмсьыс праздниксӧ кылӧмыс...

А ӧні со, таво, бӧр ойдӧдіс ловсӧ тайӧ кыпыд луныс. Сылы вӧвлытӧм нимкодь вӧлі мунны заводсаяслӧн быд ногыс мичмӧдӧм-вӧччӧдӧм колоннаын, весиг нимкодь вӧлі нуны плакат, кӧть эськӧ водзті, велӧдчигас, век зільліс сайӧдчыны татшӧмтортӧ вӧчӧмысь.

Плакатас вӧлі гижӧма: «Мед оласны сӧветскӧй йӧз!» Марс зілис лэптыны плакатсӧ вылӧджык, зілис зумыдджыка кутны киясас; и сылы бара на зэв окота вӧлі, мед эськӧ унджык тӧдса аддзыліс, кутшӧм колоннаын сійӧ восьлалӧ.

Трибуна дорті мунігӧн Марс, гашкӧ, медъёна горзіс «ура». Весиг репортёр, коді вӧлі ӧшлӧма ас вылас вит-ӧ-квайт фотоаппарат, чуймӧмӧн видзӧдліс сы вылӧ да снимайтіс.

Сӧмын ӧтитор чусмӧдыштіс Марслысь кыпыдлунсӧ — сылӧн вежӧрӧ, сьӧлӧмӧдзыс, эз-эз да бара на ылькнитліс Ким вӧсна тӧждысьӧм. «Кӧть и муніс сійӧ вӧрӧ, — мӧвпаліс зон, — вӧр-ваыс ӧдвакӧ ӧні нимкодьмӧдӧ сійӧс...»

И друг Марс аддзис уличабокса йӧз чукӧрысь Валерьянӧс, код дінӧ быть колӧ вӧлі ветлыны сылы. Мӧдыс казяліс жӧ сійӧс, синъясыс чуймӧмӧн дрӧгмунлісны, и весиг вомыс калькалыштіс.

Марс тэрыба сетіс плакатсӧ Лёшка гозъялы и петіс колоннаысь.

— Адмираллы — салют! Праздникӧн тэнӧ! — кыпыда шуис Марс киасигмозыс.

— Салют, комиссар! — Валерьян мырдысьӧн нюммуніс; сылӧн гӧгӧрвотӧма вӧрзис сьӧлӧмыс Марсӧс дзользьысь-сьылысь колоннаын аддзылӧмысь. — Тшӧтш жӧ лэдзисны парад вылас?

— А тэ нӧ ӧтнад сулалан? — воча бытшкӧбтіс Марс. — Ветлам миян ордӧ, менам сулалӧ ӧттор-мӧдтор. Абу, дерт, ром, ни абу мадера, но...

— Ветлам! — долыдмис Валерьян.

Гортас Марс вайис пызан вылӧ кык портвейн доз да ыджыд черинянь, рысь кодь еджыд чигъя камбалаысь.

— Баб вуграсьӧма и страпайтӧма, — долыдпырысь варовитіс Марс. — Ачыс бара нин пӧдруга ордас бал вылӧ муніс.

Валерьян сэк кості матыстчис стенын ӧшалысь ыджыд цветнӧй фотография дінӧ, код вывсянь збоя видзӧдісны куим мичаник нывка. Юаліс:

— Тайӧ нин мыйся бобувъяс? Водзті тай быттьӧ эг аддзыв.

— Чоюкъяс! — пӧся шуис Марс. — Ачым ыдждӧдны сетлі... Ме кодьӧсь абу?

— Мыйкӧ быттьӧ эм...

— Чӧжышта сьӧм да гӧститны корла... — шуис Марс, и мортыдлӧн гӧлӧсыс и чужӧмыс висьталісны, мый тайӧ кӧсйӧмыс важӧн нин шонтӧ сьӧлӧмсӧ.

Юыштісны винасӧ праздник вӧсна. Чеплялӧны черинянь и кыйкнитлӧны син бӧжнаныс ӧта-мӧд вылӧ. Быттьӧ тӧдтӧмсялӧмаӧсь. Быттьӧ орӧмаӧсь кутшӧмкӧ везъяс, кодъяс водзті йитлісны найӧс.

— Шуан, ныран сэсся заводын? Гайкаяс зэлӧдалан? — шуис Валерьян.

— Мый ковмас... Гайка и, трубопровод и...

— Но и кыдз?

— А мый, зэлалӧны... Ме дырйи нин вит дизель вӧчим. Сідзкӧ, вит судно вермасны петны туйӧ. Либӧ вит электростанция вермасны сетны би.

— Сэтшӧм дӧвӧля сёрнитан, быттьӧ ёна нин кажитчӧ тэныд тайӧ уджыс?

— А мый, сьӧлӧмсянь уджала. И ачымӧс бура кыла.

— Регыд дышӧдас! — серӧктіс Валерьян. — Ме тӧда тэнӧ, комиссар... Тэнад порокыд оз судзсьы пыр ӧти пӧлӧс гажтӧм уджтӧ тойны. Регыд мыйкӧ... свежӧйтор ковмас...

Марслӧн зумышмыліс чужӧмыс, зэлыда топавлісны вом доръясыс:

— Ковмас кӧть оз, а понда уджавны. Ог кӧ — сэки ачым аслым сьӧвзя ныр-вомӧ.

— Эн на водзвыв зарокась!.. Выль другыд тай тэнад зэ-эв жӧ велӧдіс, кыдзи колӧ овны, а ачыс мый вӧчӧ. — Валерьян первойсянь кӧсйис дойдны вывті нин, кыдз сылы кажитчис, нимкодясьысь другсӧ, и со — чуткис...

А Марс, мӧдарӧ, долыдмыштіс тайӧ кывъяссьыс; сыысь, мый сёрниыс тӧдлытӧг кежис сылы колана визьӧ; ӧд Валерьян ордӧ та могысь сійӧ и кӧсйыліс ветлыны. Марс тэрмасьтӧг выльысь тырталіс стопкаяс, вочавидзис сӧмын нин юӧм бӧрын:

— Сыын, мый тэ кӧсъян шуны, Дрейк, ставыс зэв на гудыр.

— Мый нӧ гудырыс? Пуксьӧдасны вот другтӧ, и ставыс сӧдз лоӧ. Шито-крыто лоӧ.

— А ме, Дрейк, ог эскы, мый Кимыс тюрмаӧ пуксьӧдмӧн мыжа. Кӧть юрӧс орӧд, ог эскы.

— Он-ӧ либӧ чайт тэ, хмырь омӧлик, мый менам бать лӧсьӧдлӧ нинӧм абусӧ? Висьтавлӧ пу йылысь турияс?

— Турияс — не турияс, а уткаяс — да!

— Вот кыдзи лӧсышта пель бокад! Сэки лоас тэд утка! — ырыштчис Валерьян.

— Лӧньджыка, Дрейк, лӧньджыка. Миян жӧ джентльменскӧй сёрнитчӧмъяс.

Налӧн видзӧдласъясыс вочаасисны. Ӧта-мӧдныслы важысянь нин тӧдса синъяс. Но быттьӧ и тӧдтӧмӧсь. Торйӧн нин Валерьянлӧн — найӧ ыпъялісны вӧвлӧм другыс дінӧ биа пӧсь лӧглунӧн.

— Кывзыштлы менам мӧвпъяслысь визьсӧ, Дрейк... Ким местаын кӧ кодкӧ вӧліс мӧд, то тэнад паханыд ӧдвакӧ матыстчис сы дінӧ. Но сійӧ казяліс гажа юра тӧдсаӧс, код вӧсна, гашкӧ, лои кольны не ӧти узьтӧм вой... Важ гудырыс ойдӧдіс сылысь сьӧлӧмсӧ... И со — спектакль гӧтов лои...

— Мый тэ сӧран! Бать менам честнӧй морт! Сійӧ вӧчӧ ассьыс долг!

— Долг, шуан?.. А мыйла нӧ либӧ эськӧ сійӧ тӧндзинад эз пуксьӧд тэа-меаӧс? Гоз-мӧд статья лӧсяліс эськӧ...

— Ме эг вӧрӧд милициясӧ! — горӧдіс Валерьян.

— Ок, ангел! Да ӧд тэ эськӧ, стрӧка кӧ сюрис, ковмис кӧ ассьыд кучиктӧ мездӧм могысь, кӧть кодӧс нырин-талялін.

Гажмыштӧм кык петук дасьӧсь нин вӧлі уськӧдчыны ӧта-мӧд вылас, но торкис звӧнок шы.

Воис Гаврил, гажакодь жӧ. Пызан вылӧ видзӧдігмоз кыскалыштіс тшӧтшыд нырнас, шуис:

— Но, а ме вӧлі шогся компания понда, — нимкодьпырысь шуис Гаврил да перйис гач зепсьыс джынъялӧм водка доз. — Юи стопка, а сэсся оз юсьы ӧтнамлӧн. Часлы жӧ, мися, Марс дінӧдз ветла, видзӧдла ловъя али кулӧма. Праздником!

Сылы сідз жӧ вочавидзисны, кӧть эськӧ кӧзяиныс, Марс, кезмунліс выль гӧсьт воӧмысь — сэтшӧм эз вӧв окота аддзыны гортсьыс дӧвӧля жеръялысь Габӧӧс.

Сэсся Валерьян да Гаврил юисны водка, а Марс шуис, мый оз кут еджыдсӧ юны, кисьталіс аслыс портвейн и зілис лажмыдджыкаӧн тыртавны румкасӧ. Код тӧдас на пӧ, мый вермас лоны важ другъясыдкӧд, коддзасны кӧ.

Гаврил тӧдіс жӧ нин Кимлӧн милициякӧд зурасьӧм йылысь. И тшӧтш радліс.

— И тэ, Габӧ, эскан тайӧ мойдыслы? — юаліс сылысь дзугыльмӧм Марс.

— Ме? Ни чӧрта ог эскы! — жеръяліс Гаврил. — Здра мыйкӧкертӧ Дрейклӧн предокыс!.. Но и мед! Мед пуксьӧдӧ!.. Мед тэнад муса Кимыд велӧдӧ тюрмаса войтырӧс, Матвей вок коддьӧмӧс... Лёка тай мастер баитнысӧ...

— И тіянлы оз ло яндзим, нинӧм абусьыс кӧ пуксьӧдасны мортсӧ? — скӧрмӧмысла Марслӧн вежсис чужӧмыс. — Ньӧти оз ло яндзим? Сы бӧрын, мый найӧ вӧчисны миянлы?

— Ми али мый пуксьӧдам? — шуис Гаврил.

— Но вай мыйкӧ вӧчам ӧтвылысь! — пӧся горӧдіс Марс. — Отсалам водзӧссӧ! Мунам Дрейклӧн бать дінӧ! Ӧтвылысь корам сылысь!.. Милицияӧ ветлам!.. Мися, оз ков тадзсӧ вӧчны! Оз позь...

— Ме бара некытчӧ ог мун! — шуис Гаврил да горша юис водка. — Милицияӧ ас вӧляысь ог жӧ мун.

— Ме ог жӧ, — шуис Валерьян да тшӧтш юис.

Марслӧн зывӧкысла да забеднӧысла петіс синваыс, и сійӧ кутіс шуавны помтӧм лӧглунӧн:

— Ок ті — йӧз!.. Да йӧз ӧмӧй ті?.. Нидзувъяс... Лёльӧяс... Дур понъяс!.. Акулаяс!.. Весасьӧй ме ордысь!.. И мед пеж дукныд некор сэсся эз кыв тані!..

Но «благороднӧй корсаръяс» ӧбидитчисны тадзтӧ ыдждӧдлӧмысь да уськӧдчисны Марс вылӧ, пондісны кыдзсюрӧ кучкавны сійӧс. Марс вӧлі садьджык наысь да воча дізьйӧдліс, сьӧрсьӧн-бӧрсьӧн ӧтисӧ и мӧдсӧ чергӧдліс кок йывсьыс. Но кыкӧннад век жӧ ӧдӧлитісны морттӧ, личкисны джоджӧ, пондісны чужъявны да талявны. Мӧдыс муртса удитіс кымыньтчыны да кияснас тупкыны юрсӧ.

Звермӧмвывсьыныс «корсаръяс» талялісны Марсӧс сыысь, мый сійӧ бурджык да тӧлкаджык наысь.

Сыысь, мый сійӧ бур местаын да бур йӧз дінын пондіс уджавны.

Сыысь, мый сійӧ со вермӧ кутчысьны вина юӧмысь, а найӧ — оз...

А вӧлі лун шӧра лун. Май 1 лун, югыд тувсов праздник лун... Коддзӧм-звермӧм «корсаръяс», гашкӧ, ёна на талялісны ассьыныс вӧвлӧм ёртнысӧ, но виччысьтӧг бара тюрӧбтіс звӧнок.

Сэки вӧлись палялыштісны. Сюр-сяр чепӧсйисны ӧтарӧ-мӧдарӧ, синъясыс кольчаасьӧмаӧсь. Чепӧсйылісны балконлань — но вылын, нёльӧд судтасянь он чеччышт, аслад лолыд жаль, йӧзыдлӧн кӧть абу-а...

А звӧнок мый вермӧмсьыс тюргӧ, тюргӧ...

Сэки найӧ гусьӧникӧн сувтісны ӧдзӧс дорӧ, швач восьтісны сійӧс да лёк тӧв ныр моз уськӧдчисны пос вылӧ. Ӧдӧбвывсьыныс кодӧскӧ пӧрӧдісны да, быттьӧ ошкысь пышйысь вӧвъяс, пондісны гымӧдны-лэччыны увлань.

Воысьыс вӧлі Гена Игнатов. Виччысьтӧмысла первойсӧ сійӧ весьӧпӧрліс, сэсся кӧсйис вӧтчыны пышйысьяс бӧрся, но кыліс Марслысь ойӧстӧмсӧ да тэрыба матыстчис сы дінӧ.

Марслӧн чужӧмыс вӧлі вирӧсь, кымӧсыс и вом дорыс потӧма, доймис бок и мыш.

— Аттьӧ, Генка, ас кадӧ воин, — нюмъёвтны зілиг шуис Марс.

— Мый тані тіян лои? Бара нин тай нӧ ӧтлаынӧсь? — сёрнитігмозыс Гена одеколонӧн мыськаліс Марслысь доймӧминъяссӧ.

Марс веськыда висьталіс ставсӧ.

— Дела-а! — шутёвтіс Гена. — А ме тэнӧ кӧсйи нуӧдлыны пыжӧн ветлыны... Но и йӧз!..

— Ме висьталі налы ставсӧ, мый на йылысь думайта, — шуис Марс.

— Да дойдан ӧмӧй кывнад татшӧмъястӧ, Марсик? — ёна скӧрмис Игнатов. — Этша ӧмӧй лои висьталӧма тӧндзи собрание вылад... И дивӧ босьтӧ менӧ, Марсик! Кыдзи мортыс вермӧ лоны татшӧм шакалнас? Уськӧдчасны ӧти морт вылӧ стаяӧн, вур-вар пурасны, калечитасны и — быттьӧ нинӧм абу и вӧвлӧма; важ моз олӧны-вылӧны йӧз дінын, сёйӧны, нюмъялӧны... А, Марсик?

— Ог тӧд...

— Но — пежъяс! Но — кӧинъяс... — эз вермы лӧньны скӧрмӧм и шемӧсмӧм Игнатов. — Но ӧні ми тіянлы петкӧдлам! Бур кывсӧ кӧ онӧ гӧгӧрвоӧй, сэтшӧм тискиӧ топӧдам!..

А Марслӧн сэк кості чужис нин выль план, мыйысь весиг югдыштіс доймасьӧм чужӧмыс:

— Гена, а ме чайта, бур, мый буретш ӧні менӧ тітшкӧдісны. Буретш Валерьян... Тайӧн ми вермам отсавны Кимлы. Колӧ кутшӧмкӧ ногӧн висьтавны Валерьянлӧн батьлы, мый тані лои... Позьӧ на и суктыштны: мортыслысь пӧ став лы-сьӧмсӧ пыркӧдӧма дона пиыд... Вӧрзьыны пӧ оз вермы. Мед сэсся батьыс ачыс думайтӧ, кутшӧм курс бӧрйыны...

— Тайӧ абу зэв бур план. Но миянлы ӧні колана! — долыдмис Гена Игнатов. — Ме ӧні жӧ муна корсьны капитан Петуховӧс. — Сэсся, ӧдзӧс дорсянь нин, бергӧдчыштліс да шоныда шуис: — А пыжнад ми тэкӧд, Марсик, мӧдысь на катлам... Унаысь на ӧтлаын катлам Эжва паныд.


Комын квайтӧд глава


Йӧзлы праздник, гажӧдчӧм-шойччӧм — сёян-юан тыр пызан сайын либӧ тувсов вӧр-ваын, а милициялы тайӧ лунъясас медся сьӧкыд уджалан кад. Сы вӧсна, мый унаӧн юсьӧны сэки да мыйсӧ сӧмын оз вӧчны...

Кор рытъявылыс полковник воис министерствоӧ да юаліс, мый нин вӧчсьӧ карын, сылы дженьыдика юӧртісны.

Сійӧ сувтіс паськыд ӧшинь дорӧ да дыр видзӧдіс паркса пуяс пыр тыдалысь ойдӧм Сыктыв вылӧ.

«Ок эськӧ, пуксьыны ӧні пыжӧ да бурпӧт сынны! Мед зэлавліс быд сӧн!..»

Тайӧ думсьыс нимкодьмыліс сьӧлӧмыс. И паметяс весиг вуджӧртыштіс челядьдырыс. Кыдзи коркӧ, зэв нин важӧн, батьыскӧд ветелясьліс Сыктыв вылын татшӧм жӧ ыджыд ва дырйи. Кыйлывліс пес кодь сынъясӧс да нитшсялӧм юра, кляп кодь сиръясӧс.

«Ӧні лоӧ кык кока сиръясӧс кыявны!» — дзугыльмыштіс полковник.

Сэсся сылы дум вылас усис, кыдзи тӧрыт паныдасьліс ӧти важ тӧдсакӧд. Коркӧ, зэв нин важӧн, сыкӧд ӧтлаын велӧдчылісны сиктса школаын.

Другыс ӧні лоӧма техническӧй наукаясса докторӧн, профессорӧн. Вӧр кыскалысь выль тепловоз думыштӧма.

А ачыс сійӧ, полковник, коді коркӧ тайӧ ёртсяыс бурджыка велӧдчыліс, век на лёк йӧзӧс куталӧ... Та вылӧ и муніс олӧмыс... Некутшӧм изобретение эз вӧч... И ӧні, буракӧ, оз нин и вӧч...

Кабинетӧ вӧзйысис да пырис капитан Петухов. Сійӧс казялӧм бӧрын полковниклӧн синъясыс небзисны, меліасисны. Кыдзкӧ зэв ёна воис сьӧлӧм вылас полковниклы тайӧ мортыс. Мукӧдсьыс торъявмӧн.

«Со кодъясӧн нималӧ миян талунъя милицияным! — нимкодя думыштіс полковник. — Тайӧяс и повтӧмӧсь, и велӧдчӧмаӧсь, и бура тӧдӧны морт ловлысь диалектикасӧ».

— Дежуритан жӧ, Григорий Николаевич? — меліа юаліс полковник.

— Да, Михаил Михайлович.

— Мыйкӧ кӧсйин висьтавны меным?

— Кӧсйи, Михаил Михайлович... — Петухов шуйга ки пыдӧснас лӧсьӧдыштіс кымӧсланьыс шыльӧдӧм юрсисӧ. — Помнитанныд, тіян дінӧ тай воліс журналистка Туробова?

— Кыдз жӧ, зэв бура помнита! — гажмис полковник. — Делӧсӧ ставсӧ и. Тэкӧд тай нӧшта сёрнитчылім отсавны налы...

— Михаил Михайлович, налӧн ӧні сэтшӧма сорсис-дзугсис ставыс... Ті командировкаын вӧлінныд, онӧ на тӧдӧй...

И Петухов дженьыдика висьталіс Кимлӧн да Пантелеймон Михайловичлӧн зурасьӧм йылысь.

Полковник кывзігмозыс вочасӧн зумышмис. Сэсся шуис, кыз чуньяснас пызанӧ таркӧдіг:

— Но, дивӧ тай тэ висьталін, другӧ! Дивӧ... А кыдзи та бӧрын журналисткаыс?

— Веськыда кӧ шуны — матӧ воӧма. Вийсьӧ-котралӧ...

— А мӧдыс нӧ сулалӧ сы доныс?

— Садьнас тай, буракӧ, туяна морт-а... Ыззьысь, буракӧ, оз век куж асьсӧ кутны, но, ме ногӧн, — абу шыблас морт. Заводас ошкӧны и.

— Вот задача, а... Пантелеймон Михайловичыс нӧ ёна скӧралӧ?

— Делӧыс прокуратураын нин...

— Да-а... — ышловзис полковник да бара веськӧдіс жугыльмӧм синъяссӧ Сыктыв вылӧ.

— Михаил Михайлович, тайӧ абу на ставыс. Час джын сайын ме дорӧ воліс Игнатов, Котковыслӧн бригадирыс, и тӧданныд мый висьталіс?

— Мый нӧ? — друг быттьӧ мудзыштӧм гӧлӧсӧн юаліс полковник синъяссӧ ӧшиньысь вештывтӧг.

— Талун Пантелеймон Михайловичлӧн пиыс да нӧшта ӧти «корсар» — тадзи найӧ вӧлі шуӧны асьнысӧ — бон-бус нӧйтӧмаӧсь асланыс вӧвлӧм шайкаса ӧти ёртӧс. Кодӧс котковъясыс босьтісны ас дінас уджавны. Бур, мый Игнатовыс удитӧма мездыны...

— Другӧ, дзугсьӧма и эм ставыс... — мӧвпалігтыр шуис полковник. — А Пантелеймон Михайловичыс тӧдӧ та йылысь?

— Ӧдвакӧ... Пиыс ӧдвакӧ ӧні лысьтас висьтавны сылы.

— Да-а... Со ӧд кутшӧмӧсь овлӧны пияныд... Григорий Николаевич, эн лэдз, мед тэнад пиыд татшӧмӧн жӧ лоис! — полковниклӧн гӧлӧсыс пӧсяліс. — Ми асьным велӧдам йӧзӧс бурджыка овны... Ми мыждам йӧзӧс лёкторъясысь... И зэв абу лӧсьыд, кор ассьыным челядьӧс ог сяммӧй быдтыны.

— Гӧгӧрвоа, Михаил Михайлович, — шуис Петухов.

— Но, тэнад ставыс сэсся, Григорий Николаевич? — юаліс полковник.

— Нӧшта ӧтитор, Михаил Михайлович. Тӧрыт юӧртісны Печорасянь, дзуг делӧ пӧ эм. Отсӧг корӧны.

— Д-да... Кодӧс нӧ эськӧ мӧдӧдны? Пантелеймон Михайлович ӧні, буракӧ, прӧстджык, ӧнія делӧсӧ кӧ не лыддьыны... Но сяммас-ӧ? Вывтіджык крут сійӧ, мукӧддырйиыс подулавтӧгджык кералӧ... Гашкӧ, бара тэд ковмас ветлыны, Григорий Николаевич?

— Верма и ветлыны, — эз зэв долыдпырысь шу Петухов.

— Тэ, Григорий Николаевич, эн дӧзмы. Сэтшӧм нин тай миян уджным... Да, петан да кежавлы Кызродев дінас, мед пыралӧ ме ордӧ.

Здук мысти кабинетӧ пырис Пантелеймон Михайлович, гораа тшӧлкнитіс кокбӧрляяснас:

— Тіян корӧм серти майор Кызродев воис, тӧвариш полковник!

Полковник воча сувтіс, петіс пызан сайысь пырысьлы воча, мыччис кисӧ, а кор ыджыд мыгӧра майор зэлыда топӧдліс кисӧ, мӧвпыштіс: «А век на ён, оз пӧрысьмы!»

— Пуксьы, Пантелеймон Михайлович, шойччы, — ылӧсас шуис полковник.

Майор пуксис креслӧӧ, киясыс неуна тіралыштӧны, негырысь руд синъясыс кыйкнитлӧны полковник вылӧ: сылӧн чужӧм серти зільӧны тӧдмавны, мыйла корис.

— Кутшӧма овсьӧ-уджавсьӧ, Пантелеймон Михайлович?

— Аттьӧ, тӧварыш полковник, ничево, ставыс бур.

— Павла Васильевналӧн кутшӧм здоровьеыс? Оз вись?

«Мыйкӧ тай зэв ылісянь заводитӧ!..» — повзьыштіс майор и тэрыба шуис:

— Оз, оз вись... Сійӧ миян кӧть и косӧньдзи, некор оз висьлы.

А полковник кыйкнитлывліс синъяснас майорлӧн кыз да паськыд пельпомъяс вылын, памятниклӧн моз, зумыда пукалысь юр вылӧ да эз куж, кодарсянь панны сёрнисӧ.

Дыр-ӧ нин сійӧ, полковник, тӧдӧ Кызродевӧс? Вель дыр нин, удж кузяыс. Сэсся со карӧ воис. Весиг заочнӧя помаліс средньӧй школа. Дерт, кызмырдысьӧн жӧ, куим во пыдди вит во ветлӧдліс. Но век жӧ помаліс. Быть помав, велӧдчытӧмтӧ ӧд вермисны на и вештыны удж вывсьыд, веськавны верман сокращение улӧ. А кытчӧ мунан сэки, кор нэм чӧжыд органъясын уджалан, кор нэм чӧжыд лоӧ преступникъясӧс кутавны да видзны.

Татшӧм думъяссьыс полковникӧс неуна шогӧдыштліс: ӧд и ачыс сійӧ та вылын сы дыра жӧ нин уджалӧ. Ӧд и ачыс сійӧ сы мында нин няйтсӧ аддзыліс йӧзлӧн олӧмысь, сэтшӧма нин изіс-тшыкӧдіс нервъяссӧ и сьӧлӧмсӧ.

— Кывлі, мисьтӧмтор суӧма тэнӧ, Пантелеймон Михайлович, — нисьӧ юаліс, нисьӧ сідз шуис полковник.

Кызродевлӧн шӧйӧвошӧмыс содыштіс. Сійӧ эз тӧд, кывліс-ӧ полковникыс пиыслӧн тӧндзия «корсаралӧм» йылысь, и ӧні думыштіс, мый начальникыс важсӧ на казьтылӧ... «Али сійӧ сёрнитӧ заводсасӧ кутӧм йылысь?»

— Мый он думайт, сійӧ тай и лоӧ, тӧварыш полковник, — шуис сэсся Пантелеймон Михайлович. — Том йӧз, комсомолечьяс, лэпталӧны кырымъяссӧ милиция вылӧ.

— Да, да, да... — скӧрмыштіс полковник. — Безобразие!

— Ме тай и шуа! — ловзис майор.

— Уськӧдчыны формаа морт вылӧ! Найӧс жӧ доръян, на вӧсна жӧ лун и вой тӧждысян! Праздникъяс он тӧдлы...

— Дерт, шуам, ме форматӧм вӧлі, — тэрыбиника шуис майор. — Но мый нӧ сыысь! Ӧд сійӧ вувзьысис ме вылӧ сэк, кор ме висьталі, коді ме сэтшӧмыс.

— Безобразие! — полковник скӧрысь зымкнитыштіс пызанас. — А ме, Пантелеймон Михайлович, муртса эг заводитлы корны тайӧ мортсӧ миянӧ уджавны. Кыдзкӧ ӧтчыд ошкисны да...

— Ог тӧд, садьнас, гашкӧ и, мӧд, — шуис майор. — Коднас тай бандит кодь-а. Мед пукалыштӧ, тюрмаыс, гашкӧ, веськӧдас...

— Оз кӧ тшыкӧд, оз кӧ дзикӧдз вылӧ дойд, — шуис полковник. — Овлӧ на тай и сідзи, ачыд тӧдан.

— Овлӧ эськӧ да... — чуймыштіс майор.

— А збыль-ӧ, Пантелеймон Михайлович, мый заводсаыс детдомын быдмылӧма, батьтӧг-мамтӧг? — друг юаліс полковник.

— Ог тӧд, — шуис майор, кӧть эськӧ и тӧдіс: коркӧя собрание вылын кодкӧ та йылысь казьтыштіс.

— Войнаыд уна олӧм пазӧдіс, — водзӧ сёрнитіс полковник. — Уна ныв-зонлӧн, позьӧ шуны, эз и вӧв челядьдырыс. Пондан тадзи думайтны да, жальыд петӧ.

— Нинӧм он вӧч, тӧварыш полковник, — шуис майор, — кодлӧн кутшӧм шуд.

— Да-а... — ышловзис полковник, и сьӧлӧмнас друг чорзьыштіс Кызродев вылӧ. А ӧттшӧтш и став кызродевъясыс вылӧ. Полковник друг думыштіс сы йылысь, мый татшӧм кызродевъясыс кыдзсюрӧ кысьӧм-везъясьӧм олӧмсӧ, став йӧзсӧ, буракӧ, куш сӧмын кык пельӧ и юкӧны — преступникъяс да непреступникъяс вылӧ. Тэ мыйкӧ вӧчин — всё! Тэ — преступник! Найӧ оз кутны думайтны, мый понда сідзсӧ либӧ тадзсӧ лои.

«Татшӧм кызродевъясыс видзӧднысӧ быттьӧ и честнӧйӧсь, и тільӧны-вӧчӧны ассьыныс уджнысӧ, — мӧвпаліс полковник, — но вӧчӧмторсьыс налӧн, буракӧ, некор оз шонавлы сьӧлӧмыс. Дерт, кор тэнад киӧ веськалӧны морт ӧбликсӧ воштӧм йӧз, сэки накӧд нинӧмла меліасьны. Но ӧд олӧмас неэтшаысь овлӧ и сідз, мый ковмылӧ бӧр сувтӧдны кок йылас тӧдлытӧг конйыштчӧм мортӧс, ковмылӧ дорйыны лёк йӧзӧн ӧбидитӧмаясӧс».

— Сідзкӧ, шуан, прокуратураын нин делӧыс? — юаліс сэсся полковник.

— Сэні, — шуис майор. — Ме чайта, колӧ показательнӧй суд вӧчны. Татшӧмыд оз частӧ овлы. Мед мукӧдъяслы тшӧтш мӧрччӧ.

— Да, да, да... — Полковник ӧні бара сулаліс ӧшинь водзын, видзӧдіс Сыктыв вылӧ. Коставлӧм бӧрын сійӧ, бергӧдчывтӧгыс, юаліс: — Пантелеймон Михайлович, а друг адвокатыс, ассьыс подзащитнӧйсӧ дорйигӧн, висьталас суд вылас, кыдзи заводсаыс отсаліс эрдӧдны том йӧзлысь банда? Кыдзи сэсся сійӧ бур сьӧлӧмӧн, гӧгӧрвоӧмӧн, пондіс отсавны зонъясыслы? А?

Кызродевлӧн мытшасьліс лолыс, ыпнитіс чужӧмыс, ки пыдӧсъясыс пӧсялісны. Бур, мый полковникыс оз видзӧд. «Сьӧд петукыс, дерт, важӧн нин ставсӧ висьталіс!» — думнас дӧжныштіс сійӧ капитан Петуховӧс. Но шуис кыдз вермис косджыка:

— Ме чайта, тӧварыш полковник, ӧтиыс мӧдыскӧд тані оз йитчы...

А полковник друг крута бергӧдчис: «Збыльысь тадзи думайтӧ али ворсӧ?» Но подчинённӧйыслӧн чужӧм серти немтор эз вермы гӧгӧрвоны.

— Да, чуть эг вунӧд, — шуис сэсся полковник, — сӧмын на висьталісны... Тэнад пӧ пиыд, да нӧшта ӧти... «корсар» талун зэв ёна нӧйтӧмаӧсь ассьыныс ӧти ёртсӧ. Мӧдыс пӧ кодӧскӧ дорйыны ли мый ли кӧсйӧма. Тэ, пӧжалуйста, разберитчы...

Тайӧ кывъяссӧ кӧть эськӧ и небыда вӧлі шуӧма, но кучкисны найӧ чорыда. Петігас Пантелеймон Михайлович весиг вунӧдіс тшолкнитны кокбӧрляяснас.

Аслас кабинетын Пантелеймон Михайлович дыр пукаліс кияс вылас юрсӧ ӧшӧдӧмӧн. Лӧгыс пуис-петіс, и шог вӧлі, и сэтшӧм ӧткаӧн кажитчис ачыс аслыс олӧмас.

«Дорйӧм пыдди, милициялӧн чесьт вӧсна сувтӧм пыдди, сійӧ оз-ӧ кӧсйы янӧдны менӧ йӧз водзас?! — скӧраліс Пантелеймон Михайлович полковник вылӧ. — Но энлыв на, эмӧсь на и тэ вылын начальникъясыс! Законъяс и...»

Но тадзисӧ скӧралігӧн, лёк жель моз, пырис и пырис Валерьян йылысь дум.

«Бара — пи!.. Мый бара сійӧ вӧчис?..»

Пантелеймон Михайловичлӧн сьӧлӧмыс потӧ та йылысь думайтігӧн.

Ӧд сійӧ сэтшӧма кӧсйис, мед эськӧ пиыс, ӧтка пиыс, лоис бур мортӧн!.. Ӧд ачыс со сійӧ пӧрысьмыны жӧ нин пондіс. Отсасьысь сылы колӧ! Сійӧс гӧгӧрвоысь морт! Дорйысь колӧ!.. Мед эськӧ ӧтлаын ветлыны вӧрӧ. Ӧтлаын мастеритны-столяритны. Ӧтлаын пукавны-сёрнитны.

А кӧн сійӧ — гӧгӧрвоысьыс да дорйысьыс? Эм да абу! Абу!.. Кӧин моз век видзӧдӧ пышйыны кытчӧкӧ гортысь...

Да и эм-ӧ гортыс налӧн? Ӧд и аслыс сылы, Пантелеймон Михайловичлы, унаысь неокота овлывлӧ мунны гортас... Сы вӧсна мый оз шонав сэні сьӧлӧмыс. Век ӧтнас... Век ӧтнас зуньгырасьӧ... Дыр-ӧ позьӧ сэсся стружитчыны да тотшкӧдчыны веранда вылад?.. Аръявылыд кӧть вӧрӧ ветлӧдлан, тшак да мый да вотан. И то лӧсьыдджык...

Но мыйла нӧ тадзи, мыйла нӧ татшӧмӧн лои сылӧн олӧмыс?!

Весиг пиыс, аслас пиыс нин ӧтчыд вомаліс: тэ пӧ мамалы бур кыв он сетлы... Кор пӧ ёна коліс, сэки, небось, гӧтрасин...

«Мыйсӧ тэ гӧгӧрвоан, зырымбедь! — майшасьӧ ӧні Пантелеймон Михайлович. — Абу колӧмын делӧыс, а — кажитчӧмын... Быттьӧ тай кажитчыліс сэки. Гӧгрӧс чужӧма, удж вылӧ сюсь, мелі...»

А сійӧ, Пантелеймон Михайлович, вӧлі помӧдз нин мудзӧма вӧр уджысь, дас кык арӧссянь сэні пессьӧмысь, кынмалӧмъясысь... Сылы окота вӧлі веськавны кытчӧкӧ лӧньтасінӧджык, шоныдджыкинӧ, кокньыдджыкинӧ. И Павлаыслӧн вокыс босьтіс сійӧс ас дінас кӧрт туй вылӧ. И отсаліс кыптыны. Весиг бронь судзӧдліс, мед война вылӧ не мунны...

«Бурджык колӧма сэки вӧзйысьны война вылас да усьны сэні!» — мӧвпалӧ ӧні Пантелеймон Михайлович. Но сійӧ кадас сылӧн, буракӧ, абу сідзи мӧвпавсьылӧма...

Либӧ нӧ мый — сэки тӧдӧмӧн али мый личкис, мырдысьӧн йӧршитіс пыдӧджык ассьыс сӧвесьтсӧ?

А сэсся ӧні олӧмыс водзӧс босьтӧ таысь?

А, гашкӧ, сійӧ, Пантелеймон Михайлович Кызродев, аслас шоныдджык да пӧтӧсаджык олӧм вӧсна унаысь нин пӧдтыліс тадзи ассьыс сӧвесьтсӧ? Да та понда зэв этша думайтліс ыджыд олӧм йывсьыс, мукӧд йӧз йылысь?..

Быттьӧ ош лапаяс, тшапнитісны талун Пантелеймон Михайловичӧс думъясыс. Сідзи и варсйӧны, сідзи и варсйӧны. Некыдз оз вермы мынтӧдчыны наысь.

«Мед кӧть пиӧс дзикӧдзсӧ не воштыны!» — муртса эз горӧд Пантелеймон Михайлович; кватитіс гӧрд дорӧса чорыд картузсӧ да уськӧдчис кабинетсьыс.

Милиция керкалӧн джуджыд кильчӧ вылын сылы воча воис нюкырмунӧм чужӧма, пыктӧм вом доръяса да синваӧн тырӧм синъяса Валерьяныс.


Комын сизимӧд глава


Важ тыкӧла ыджыд подков моз сапкысьӧма татчӧс гажа вӧрӧ, гашкӧ, вит километр кузьта. И веськыдладор джуджыд кыркӧтшас, пӧшти ва дінӧдзыс, воӧ мича пожӧма яг. Буракӧ, Эжваыс коркӧ таті визувтлӧма, да тайӧ кыркӧтшыс и вӧлӧма сылӧн берегнас, но сэсся мыйлакӧ сетчӧма шуйгавыв, кольӧма тайӧ лӧнь тысӧ чери кыйысьяслы да уткаяслы. И тэ кӧ абу дзик йӧй кыйсьысь — а уткаясыд йӧйястӧ ёнджыка радейтӧны, — то пожӧмъяс сайӧ дзебсясьӧмӧн позьӧ лӧсьыда сибӧдчыны ва дорӧдз да унджыклаас судзӧдны уткаястӧ лыйӧмнад. Дерт, найӧ кӧ водзджык оз казявны тэнӧ.

Ким эз ӧтчыд нин волы татчӧ да висьталіс Светалы, кыдзи тані колӧ кыйсьыны, а сэсся ныла-зонма мӧдӧдчисны берег пӧлӧн. Мыйкӧ мында муныштӧм бӧрын Ким гусьӧникӧн лэччис ва дорӧ, медым сэтысянь кузьджыка видзӧдавны, и водзысь пырысь-пыр жӧ казяліс уткаясӧс, кодъяс нимкодьпырысь шывкъялісны лӧня шыльквидзысь тыкӧла шӧрын.

Кор сійӧ висьталіс Светалы уткаяс йывсьыд, нывлӧн сьӧд синъясыс ыпнитісны.

— Ким, ме чайта, мый тэ — бур сьӧлӧма морт — ещӧ ӧтчыд лэдзан лыйнысӧ меным? — шуис Света зонлы синмас пӧся видзӧдігтыр.

— Мун, мун... — шӧйӧвошис Ким татшӧм лиска сёрнисьыд. Дерт, сылы аслыс зэв окота вӧлі лыйнысӧ, но Светалӧн корӧм вылӧ ӧні эськӧ сійӧ и не татшӧмтор на ньыв лэдзис.

Ныв лажыньтчӧмӧн тэрыба муніс водзӧ. Ким кольччис сулавны. Мыйкӧ дыра мысти уткаяс лэбисны. Света сулаліс рӧч вылын, гӧрдӧдӧма, пӧсялӧма да яра дорйысис:

— Вӧлӧмкӧ, ӧти дзик берег дорас уялӧма... Эг и казяв сійӧс. Ырснитіс да повзьӧдіс мукӧдсӧ...

Веськыдвылын, кӧнкӧ ылын-ылын яг весьтын, буретш вӧлі чеччӧ зэв ыджыд да зэв гӧрд шонді. Медсюсь сьылысьяс мыла шыясӧн заводитӧмаӧсь нин чолӧмавны сійӧс. Тыкӧла мӧдарын, ойдысь Эжвасянь пырысь визув вылын, свая виян баба моз, швачӧдчис ваӧ сьӧкыд кер. Сылӧн ӧтар помыс вӧлі, буракӧ, сибдӧма бадь кустӧ, а мӧдарыс ён визув вылас то чатӧртчыліс пушка ствол моз, то сьӧкыда шнёпкысьліс-усьліс ваӧ. Тайӧ швачӧдчӧмсӧ кывзігӧн Кимлы весиг пондыліс кажитчыны, мый оз кер нӧйтчы сэні, а кутшӧмкӧ ловъя лов вермасьӧ-вийсьӧ аслас олӧм вӧсна, мый вермӧмсьыс пессьӧ, но некыдз оз вермы ӧдӧлитны ваыслысь помтӧм вынсӧ.

Берег пӧлӧн чӧла восьлалыштісны водзӧ. Войся ыркыд дырйи тӧрсмунӧм туй пӧлӧнын сулаліс пыш кодь сук, том пожӧма вӧр.

— Мича жӧ пожӧма вӧрыд, — шуис Ким асъя шондіӧн югдӧдӧм, стын моз сулалысь яг вылӧ видзӧдігтыр. — Шань и пу пожӧмыд... Сытӧг вӧртӧ ме ог и лыддьы вӧрӧн.

— А кыддза расъясыс нӧ лёкӧсь? — пырысь-пыр жӧ воча шыасис Света. — Часлы, регыд сяргысясны югъялысь веж коръяс, и лым еджыд кыдзьяс вылӧ быттьӧ павкнитасны вежоват газӧвӧй чышъянъяс. Оз ӧмӧй кыпав лолыд, кор пыран татшӧм раскас?..

Кӧнкӧ ылын на моз жӧ варовитісны таръяс.

— Кылан? — юаліс Света кургысь шыяслань юрнас довкнитӧмӧн. — Гашкӧ, на дінӧ ветлыны?

— Ӧні сёрмим нин — тавой кежлӧ налӧн койтсис нин, — шуис Ким. — Сэсся ӧд кык кӧч бӧрсьыд вӧтлысигӧн вермас некоднанныс не сюрны.

Том пожӧма вӧрлӧн вуджӧръясыс зэв тшӧкыд плетеньӧн моз вомӧналӧмаӧсь туйсӧ да кыдзсюрӧ визьйӧдлӧны тшӧтш и Светаӧс, коді восьлалӧ водзын. Сёрнияс оз артмыны, и Кимлы кольӧ сӧмын видзӧдны водзын мунысь вылӧ да бара выль пӧв бергӧдлыны-путкылявны сьӧкыд мӧвпъяссӧ.

Света пелькиник шоныд курткаа, кодӧс мичаа дорӧсалӧма чикыльӧсь гӧна ыж куӧн. Тасмаӧ пысалӧм патронташыс зэлӧдӧма нывлысь коссӧ да бура тӧдчӧ, кутшӧм вӧсни сійӧ. Ставыс сылы сэтшӧм бура лӧсялӧ! И волялысь гӧна сьӧд шапкаыс. И пельпом вылас кӧвъялӧм пищальыс. И кӧрпилӧн кодь кокни восьласыс. И шапка увсьыс шлывгысь-усьысь сьӧд юрсиыс. И весиг посни пожӧмъяслӧн визьйӧдлысь, восьлалігас вералысь вуджӧръясыс...

А сэсся Кимлӧн вежӧрын муткыртчис-чужис дойдасьысь юалӧм: «А, шуам, майорыс кӧ збыльысь пондас судитчыны мекӧд, волас-ӧ эськӧ Светаыс суд вылас?»

Водзын тыдовтчис паськыд кушин, код шӧрын сулаліс неыджыд, пӧрысьысла ёна нин сьӧдӧдӧм керка. Пуксисны шойччыштны.

Керкаыс вӧлі ӧшиньтӧм да синтӧм морт моз зумыша видзӧдіс Эжвалӧн паськыд ковтыс вылӧ. Ӧти ӧшинь розьысь лӧскутӧн чурвидзис быгалӧм шпалер да гажтӧма шпорӧдчис ю дорсянь пӧльтысь тӧвру улын. Мый дыра нин сійӧ тадзсӧ шарӧдчӧ? Кимлӧн доймасис сьӧлӧмыс эновтӧм-киссьӧм олан поз вылӧ видзӧдігӧн. А коркӧ йӧз жӧ овлӧмаӧсь тані, кӧнкӧ, челядьӧс быдтісны, тӧждысисны нянь тупӧсь вӧсна, пессисны, майшасисны и со — некод нин абу. Со тані, буракӧ, йӧр вӧлӧма. Кымын пӧв зыръялӧма-кокалӧма тайӧ мусӧ. Мыйта киськалӧма пӧсьӧн. А ӧні понӧльлӧн бӧр кыскӧма.

Тӧдӧмысь, зонкаяс узьлывлісны эсійӧ паськыд пу крӧвать вылас. Тайӧ кушиныс, тайӧ ягыс вӧлі налы муса чужанінӧн, му вылын медся дона да муса пельӧсӧн. Кӧнӧсь со найӧ ӧні-а? Кытчӧ разӧдіс найӧс олӧм бергачыс? И казьтылӧны-ӧ найӧ ассьыныс чужан позсӧ?

Виччысьтӧг Ким кыліс гораа шутёвтӧм. Абу-ӧ кутшӧмкӧ зонка воӧма видлыны важ гортсӧ? Ким чатрасьыштіс гӧгӧр — некод эз тыдав. Но регыд мысти кодкӧ бара на шутёвтіс.

— Со кытчӧ видзӧдлы, со! — серӧктіс Света. — Пу йыласӧсь шутьлялысьясыс.

Тайӧ вӧлӧма тшӧтшӧдӧм сорса чим сьӧд ябыр. Сійӧ радпырысь дзӧрис пожӧм ув вылын да морӧссӧ шонді паныд чургӧдӧмӧн шутьляліс-сьыліс аслас мусукыслы, коді тӧждысьӧмӧн ноксис-жбыръяліс вылын сигӧра поз гӧгӧр: то тювкнитліс-пыравліс пемыд розьӧ, буракӧ, пыртліс лыстор, то бырс петавліс бӧр.

— Дыр-ӧ эськӧ нин волӧны татчӧ тайӧ гозъяыс? — долыдмис Ким. — Гашкӧ, найӧ помнитӧны на налы поз вӧчысь зонкаясӧс! Кытчӧ со разалісны найӧ-а?

— Гашкӧ, эстӧнӧсь? — индіс Света Эжвалӧн ковтыс мӧдарса ылӧдз тыдалысь керӧс вылӧ. Сэні вӧлі шаргысьӧма-паськӧдчӧма ыджыдсьыс-ыджыд стройка. Еджвидзисны уна судта керкаяс, тшынасис электростанциялӧн енэжсӧ пыкысь трубаыс.

Ким думӧ вӧйтчӧм синъясӧн дыр видзӧдіс помтӧм-дортӧм стройкалӧн мыгӧръяс вылӧ. Мыйта выль семья артмӧ сэні! Мыйта выль олӧм гӧрддзасьӧ-чужӧ!

— Гашкӧ и, сэтӧнӧсь, — дыр мысти шуис Ким. Сылы окота вӧлі, мед эськӧ татчӧс олысьясыс сэні и вӧліны, но такӧд тшӧтш сылы вӧлі и жаль, мый найӧ абу нин татӧнӧсь, мый налӧн позныс нэм кежлӧ эндӧма...

Уткаяссӧ водзджык казяліс Света. Сійӧ друг сувтіс, кутіс ёна дзоргыны увлань, здук кежлӧ бергӧдчыштлӧмӧн пӧся вашнитіс:

— Пукалӧны!

Веж кузь лыска посньыдик пожӧмъяс костӧд Ким казяліс жӧ лэбачьяссӧ. И пырысь-пыр жӧ шуис Светалы:

— Вай ӧні ме ветла!.. Тэ виччысьлы тані, эн вӧтчы ме бӧрся...

Ружьесӧ киас босьтӧмӧн да берегдорса чурк сайӧ саймовтчӧмӧн Ким тэрыба вешйис уткаяскӧд ӧтвесьтӧдз.

Сэсся пондіс кыссьыны, пӧсяліс, ньылӧдӧм голяас пондісны гильӧдчыны-сутшкасьны ляскысьӧм лысъяс. Берег чурк йылын тшӧкыда сулаліс понӧль чукӧр. Ким воис сэтчӧдз, видзӧдліс ва вылӧ, и сьӧлӧмыс ойдіс нимкодьлунӧн. Тыкӧлаыс таті буретш вӧлӧм топалӧ, векняммӧ, и мӧдарладорас, кызь вит кымын метр ылнаын, вавывса бадьяс дінын, лӧня вердчисны кык горда утка. «Кутшӧм лӧсьыда ме сибӧдчи!» — дӧвӧля думыштіс Ким, сійӧ сьӧлӧмнас кыліс, мый ӧти уткаыс быть лоӧ сылӧн и тэрмасьтӧг кутіс лӧсьӧдчыны, мед эськӧ бурджыка лыйны. Лэбачьяс вылӧ видзӧдӧмысь синъясыс вочасӧн шоналісны.

Торйӧн нин мича вӧлі айыс, коді чуть ли не кык пӧв пановтӧма мыгӧрнас эньсӧ. Асъя шонді югӧръяс улын сылӧн вылын юра топыд тушаыс югъяліс-пӧртмасис вӧр-васа став рӧмнас: лым еджыдӧн и югыдвежӧн, гӧрдоватӧн и пемыдлӧзӧн, пӧим рӧмаӧн и чим сьӧдӧн; а топыд гӧн вылас ӧшйӧм ва войтъяс дзирдалісны югыд киньяс моз.

Татшӧма вӧччӧм жӧник дінад энь уткаыс кажитчис коньӧрӧнджык, сійӧ вӧлі ӧткодьджык пемыдруд сера да кыткӧясті вижоват рӧма; но та вылӧ видзӧдтӧг мича другыс, буракӧ, ёна радейтіс сійӧс, сьӧлӧмсяньыс тӧждысис сы понда. Сійӧ то тшапа шлывкнитліс невеста гӧгӧрыс, то меліа пуктыліс юрсӧ сылӧн мыш вылӧ, то вайліс ловзьӧм бадь гар...

Татшӧмтортӧ аддзигӧн Ким сьӧлӧмын виччысьтӧг вӧрзис жальлун. Час ӧні сійӧ лэдзас куроксӧ, гымыштас лыйӧм шы, и жӧник уткалӧн вылын юрыс лётмунас-усяс; сійӧ помӧдз оз и удит сьывны ассьыс мелі сьыланкывсӧ... Кӧть эськӧ и, гашкӧ, олӧмас медводдзаысь на заводитіс тадзсӧ сьывны...

Мый нӧ либӧ — не лыйны али мый? Нарошнӧ повзьӧдны уткаяссӧ? Но сэки мый шуас Света?

Ким гусьӧникӧн пондіс чургӧдны ружьесӧ. Со нин прикладыс топӧдчис пельпом дінас, стволъяс серӧдӧм жӧлӧбыс нуӧдӧ гӧгрӧс мушкалань, коді вевттьӧма мича ай уткаӧс...

Тайӧ здукас Кимлӧн пӧсялӧм сьылі вылӧ небыда пуксис нывлӧн шоныд ки. И пырысь-пыр жӧ кыліс пӧся вашнитӧм:

— Эн лый...

Ким виччысьтӧмысла дрӧгмуніс, бергӧдчис тадзсӧ шуысьлань да паныдасис Светалӧн синъяскӧд. Нывлӧн чим сьӧд, сывдӧм сир моз югъялысь синъясын вӧлі сэтшӧмтор, кодысь шемӧсмӧм Кимлӧн пырысь-пыр жӧ вунісны и уткаясыс, и ставыс...

— Эн лый! — выльысь шӧпнитіс Света.

Но татшӧм видзӧдлас бӧрад шӧпкӧмыс сылӧн вӧлі дзик нин ковтӧмӧн. Ким шыбитіс ружьесӧ, бергӧдчис да кыкнан кинас шымыртіс-топӧдіс Светаӧс, тірзьысь вом доръяснас пондіс корсьны нывлысь пӧсь вомсӧ.

И аддзис.

Ок тэ, тулысӧй, тулысӧй! Мыйсӧ сӧмын тэ он вӧч ми воккӧд!

И не сӧмын ми воккӧд...

Джуджыд кыдз йылын, гӧлик кодь на куш увъяс пӧвстын, тыдаліс сьӧд чут кодь ловъя ёкмыль да зэв сӧдз, мича гӧлӧсӧн, тшӧкмунлытӧдзыс, азыма сьыліс:

— Тані ме! Тані ме! Тані, тані, тані ме!

Кимлӧн восьса морӧс вылӧ юрсӧ пуктӧмӧн куйлысь Света шудаа серӧктіс да ловъя сьӧд чутлань индігмоз шуис:

— Яндысьтӧмыд! Ӧд кыдзи чуксалӧ другсӧ...

— А, гашкӧ, тайӧ — зон. Ог ёна завидьты коньӧрлы. — Ким куньӧма синъяссӧ, шуйга кинас сывйыштӧма Светаӧс, веськыднас небыдика лебезитӧ сылысь юрсисӧ.

— Аддзас пӧвсӧ... Татшӧм сьылысьыд бара аддзас.

Лыа бӧж весьтын мусукасисны кык каля. Найӧ, шудаа тивзігтыр, вӧчалісны ыджыд кытшъяс, патурликасьлісны, чивкнитлісны-пуксьылісны шыльыд ва веркӧсӧ да еджыд ньӧвъясӧн бӧр лыйыштлісны лӧз енэжлань. Тайӧяслы шогсьыны вӧлі нинӧмысь нин!

Кутіс кывны дзодзӧгъяслӧн ӧта-мӧд вежмӧныс гогзьӧм: ныла-зонма весьтӧд лэбис ыджыд кельӧб. Кельӧбыслӧн шуйга бордйыс вӧлі тӧдчымӧн дженьыдджык веськыдсьыс. А ёсь йылыс, компас стрелка моз, стӧча индіс Войвылӧ.

— Буракӧ, кольччӧмаӧсь тырмытӧмъясыс кузь туйын... — шуис Света.

— А, гашкӧ и, лыйисны, — шуис Ким. — Ӧд мыйта ствол веськӧдӧма на вылӧ.

— И тэ моз оз быдӧн кежӧд сійӧс...

— Ачыд жӧ тшӧктін да...

— Ме водзвыв казялі нин, мый уткаясыс жальӧсь тэныд.

— Казялін? Збыль?

Ылысмӧ дзодзӧгъяслӧн гогзьӧм, выліті шлывгысь лэбачьяслӧн гӧлӧсъясыс быттьӧ нормыштӧны.

— Ким, тэ мый сідзи видзӧдан дзодзӧгъяс вылас?

— Меным окота лэбны накӧд.

— Лэбны? Ӧтнадлы?

— Сэні кык дзодзӧг оз тырмы...

— Тэ казялін? А, гашкӧ, сэні кык ай оз тырмы?

— Ме эськӧ сёрниті вожакыскӧд, и сійӧ, ӧтчыдысьтӧ, босьтіс эньӧс да айӧс.

— А эз кӧ кывзысь?

— Ме эськӧ вӧтлі сійӧс кельӧб йывсьыс да ачым понді нуӧдны.

— И кытчӧ эськӧ тэ нуӧдін миянӧс?

— Медся сӧдз ваинӧ, медся чӧскыд турунаинӧ, медся шондіаинӧ.

— Ким, тэ нарошнӧ сёрнитан сідзи, мед нӧшта на ёна кажитчыны меным? Ме сідз нин ог тӧд, мый вӧчны... Ой, тэ эн кывзы менсьым... Тэ он нарошнӧ сёрнит сідзисӧ... Тэ татшӧм и эм... Татшӧм и эм — муса... Либӧ, кыдзи шуис Виль Николаевич, — шондіа руа...

Светалӧн гӧлӧсыс ыззьӧмысла юралӧ.

И налӧн вом доръясыс выльысь ӧтлаасисны. И сьӧлӧмъясыс топӧдчӧм морӧсъясаныс кылісны ӧта-мӧдныслысь тіпкӧмсӧ. И таысь вӧлі сэтшӧм лӧсьыд.

Мыйкӧ дыра мысти Света тӧждысьӧмӧн шуис:

— А тэ он кынмы уль му вылас, донаӧй?

— Ме?! Кысь нӧ ме кынма, кор ме пытшкын яра сотчӧны кык тысяча кыксё шонді! Кӧсъян кӧ тӧдны, яла нитшка муыс ӧні меным кажитчӧ медся шоныд да медся небыд вольпасьӧн!

— Ким, висьтав, мыйла сідзи артмӧ: ӧтлаасьӧны вом доръяс, и сэтшӧм лӧсьыд лоӧ! Садьтӧ воштылан...

— Он быд вом дорысь... Сӧмын тэнадысь...

И бара топӧдчӧмаӧсь вом доръяс. Бара чепӧсйӧ наӧд ӧта-мӧднысӧ шызьӧдысь ток; олӧмас мортӧс медшудаӧн вӧчысь ток.

— Ме тай нӧ вунӧді, мый кӧсйи висьтавны, — шуис сэсся Света, лёзьмунӧм юрсисӧ шуда чужӧм вывсьыс вешталігтыр. — Тэкӧд став йывсьыс вунӧдан...

— Ме немтор жӧ ог помнит... Быттьӧ ӧні на татшӧмӧн, кутшӧм эм, чужи тайӧ гажа ягас...

— А-а, усис тӧд вылӧ! Ме шуа: тэ кӧ эн паныдась, ме верми ӧтлаасьны Максимкӧд... Ӧні, бӧръяысьсӧ командировкаӧ ветлігӧн, сійӧ... кораліс менӧ...

— И мый тэ вочасӧ шуин?! — повзис Ким да муртса эз чеччышт кок йылас.

— А тэныд нӧ тайӧс ёна колӧ тӧдны? — нарошнӧ дэльӧдыштіс Света.

— Да кыдзи нӧ меным оз ков тӧдны? Кыдзи нӧ, ӧнія бӧрын, ме верма овны тэтӧг?..

— Ме шуи сылы: мися, ог на кӧсйы петны верӧс сайӧ...

— Либӧ сійӧ век на кутас надейтчыны...

— Ӧні сэсся ковмас, буракӧ, мӧд ног нин шуны...

— Коньӧр Максим... Эстшӧм тӧлка да шань морт... Жаль быдсӧн...

Светалӧн сьӧд сир кодь син аканьясыс сэтшӧм вильыша да радейтанаа вешйисны синмыслӧн йӧв кодь сӧстӧм еджыд вывтіыс, мый Кимлӧн радейтӧмысла сідз нин сылысь сьӧлӧмыс песовтчис морӧсас кыдзкӧ нӧшта на шудаджыка.

— Света, рочаканьӧй менам, а менӧ кӧ... судитасны?

— Тэ ёна полан?

— Ме ёнджыка пола тэнӧ воштӧмысь... Вошта кӧ, мем сэсся не овны...

— А ме кӧсъя, мед тэ олін!

— Тайӧ тэ сайын лоӧ...

— Сідзкӧ, ме тэнӧ некытчӧ ог лэдз!

Ким курыда нюммуніс.

— Тэ мый сідзи нюмъялан, мый? Чайтан, ме немтор ог вермы вӧчны? Ме быдтор верма вӧчны! Торйӧн нин ӧні...

— Ок тэ, Света-Светочка! Кутшӧм бур ен со тӧдмӧдіс менӧ тэкӧд...

— Тэ тай жугыльмин, муспоз омӧлик?

— Эг жӧ, мый тэ, Светочка! — И Ким бара на топӧдіс нылӧс. Та бӧрын Света шуис:

— Кутшӧм лют тэ, вӧлӧм, окасьнысӧ, Ким Павлович.

— Ме быдтор вылӧ лют. Вӧчны кӧ — вӧчны, а не кӧ и не. Радейтны сідз жӧ дай...

— А тӧдан он тэ, лют морт, мый ме ордын тэнад тетрадьыд?

— Кутшӧм тетрадь? — повзьыштіс Ким.

— Рудик сетіс... Юан другыд...

— Да?.. Юр яндзим тай!.. Лыддин кӧ...

— Эг лыддьы... Мыйӧн сӧмын сетіс, пырысь-пыр жӧ пачӧ шыбиті.

— Сідзи и коліс!

— И сэтшӧма на ыпъяліс-сотчис. Сьӧлӧмнад гижӧмаыд сирӧд чаг моз сотчӧ.

— Тэ, сідзкӧ, лыддин?

— Ещӧ ӧд и юасьӧ, яндысьтӧм син! Тэ бурджык висьтав, эм-ӧ нӧшта татшӧм сяма тетрадьыс тэнад?

— Эмӧсь на, армияын ёна тшыкӧдлім кабалатӧ... — серӧктіс Ким. — Вӧлі пост вылын сулала, тӧлысь вылӧ видзӧда и мый эмсӧ и абусӧ лӧсьӧдла... Гулюяс йылысь и мича нывъяс йылысь. Но медся ёна дӧнзьыліс кырныш-империалистъяслы...

— А сэки кӧ буретш кырныш-империалистыс уськӧдчис, тэ вермин и не казявны?

— Верми и не казявны.

— Сэсся нӧ некодлы эн и петкӧдлыв ассьыд лӧсьӧдлӧматӧ?

— Армияас? Ӧти друглы сӧмын. Вӧлі сэтшӧм Серёжа Акимов — ме кодь кымын жӧ, жар-птица бӧрся вӧтлысьысь. Дзебсям вӧлі кытчӧкӧ кыкӧн и гӧлӧсъясным быртӧдз лыддялам ӧта-мӧднымлы ассьыным опусъясӧс... Но кӧть тэ мый эн шу, а тайӧ вӧліны шуда здукъяс... Кор тэнӧ бур сьӧлӧмӧн кывзӧ гӧгӧрвоысь друг...

— А кытчӧкӧ журналъясӧ эн ыстыв?

— Яндзим висьтавнысӧ... Кор меным вӧлі дас квайт арӧс, ме лыдди ӧти журналысь, мый сэні нуӧдӧны конкурс медбур кывбур вылӧ. Ме пукси и час джынӧн гижи кывбуртӧ. Сэсся и лыдди ёртъяслы. Налӧн синъясныс чашкалісны чуймӧмысла. Вот пӧ и дивӧ! — миян Кимкаыд мый вӧчӧ... И сэтшӧма ошкисны... И ӧтлаын кутім виччысьны журналсьыс воча кыв, а ӧттшӧтш и премия...

— Воис?

— Воис... письмӧ. Тайӧ пӧ некытчӧ туйтӧм гижӧд...

— Ок тэ, коньӧрушкаӧй менам!

— Да-а... Абу ёна долыд, кор воӧ татшӧм письмӧыд. Ме некодлы эг петкӧдлы сійӧс, гусьӧникӧн соті... А юасьысь ёртъяслы вочасӧн кӧвъялі мӧвп: буракӧ, мися, эз во менам кывбурӧй, пошта кытчӧкӧ воштіс...

— А тэныд окота овлывлӧ гижыштавны?

— Мем?.. Кор кыдзи. Кор окота, а кор и ньӧти абу. Мем рисуйтчыны окотаджык.

— Да?

— Да... Гижӧмнад кузя артмӧ... Мый сьӧлӧмсьыд вӧзйысьӧ, зэв кузя артмӧ. А рисуйтӧмаыд — ставыс син водзад, горӧдӧм кодь, взрыв кодь... Ӧтчыд видзӧдлӧмӧн пыркнитӧ ловтӧ.

— Тайӧс тэ бура казялӧмыд.

— Казявныд абу сьӧкыд. А вот вӧчнысӧ... Ӧтарӧ-мӧдарӧ шыбласигад... Туйтӧг олігад...

— Тэ, донаӧй, верман, ёна кӧ кӧсъян!

— Код тӧдас... Меным дзик на неважӧн кажитчис, мый вывті сьӧкыд лоны мортӧн. А ӧні ӧмӧй ме шуа тадзисӧ?

— А кыдзи нӧ эськӧ шуан?

— Ӧні ме шуа: лӧсьыд лоны мортӧн! Света-Светочка тэ менам! Тӧдін кӧ эськӧ тэ, кутшӧм окота меным сӧвмӧдны вежӧрӧс! Мед эськӧ сійӧ вермис пырӧдчыны морт сьӧлӧмлӧн медся гусяинъясӧдзыс, вермис бурджыка гӧгӧрвоны ыджыд мирсӧ!

— Ме кӧсъя жӧ тайӧс, мусаӧй!

— А нӧшта меным окота овлӧ лоны атаманӧн удал отрядын. Мед эськӧ ӧти киын вӧлі шашка, мӧдын — пистолет. Кыккокйыв скачитӧны вӧвъяс! Тӧв шутьлялӧ пельясын. Живкйӧдлӧны пуляяс... А тэ аслад удал зонъяскӧд тӧвзян и тӧвзян водзӧ, на вылӧ, кодъяс юӧны йӧзлысь вирсӧ.

— Но та могысь тэныд ковмас мунны кытчӧкӧ мӧд муӧ!

— Ӧтнамлы?

— Ме нӧ мый кута вӧчны сэні?

— Менам оз тырмы вынӧй тэнӧ кольны, Света-Светочка!

— Сідзкӧ, либӧ эн и коль менӧ, мусаӧй. Тэа-меалы и гортын уджыс тырмас.

— Ме век лоа тэкӧд, Света-Светочка!

— И век лоан ӧнія кодьӧн? Бордъяӧн? Некор он ныжмы?.. Ой, мый нӧ ме понді сӧрны нинӧм абусӧ!.. Ме эска тэныд, лют мортӧй тэ менам! Зэв ёна эска... Сэтшӧма жӧ, кыдзи и радейта!


Ловйӧн кольӧм уткаяс важӧн нин кытчӧкӧ сайӧдчисны. Кыдзйывса пыста век на пӧся чуксасис-сьыліс: «Тані ме, тані ме! Тані, тані, тані ме!»

А бакенщиклӧн Эжваӧ кырны пондӧм керка дінын дзикӧдз нин кӧдзаліс Николай Васильевичлӧн шыдыс.


lkejrlkelkrgner klrjnelknfrkl ekjnrjkenfrej

1